ଭଦ୍ରକ

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ଜୁଲାଇ ୨୧(ଓଡ଼ିଶା ଡ଼ଟ୍ କମ୍) ଭଦ୍ରକ ଜିଲ୍ଲା ଚରମ୍ପା ଅଞ୍ଚଳରେ ବହୁଦିନରୁ ବ୍ରାଉନସୁଗାର କାରବାର ଚାଲୁଥିବା ଅଭିଯୋଗ ହୋଇ ଆସୁଥିବାବେଳେ ଶନିବାର କେନ୍ଦ୍ରାଞ୍ଚଳ ଗୁଇନ୍ଦା ଅବକାରୀ ବିଭାଗ ପାଞ୍ଚ ଲକ୍ଷ ଟଙ୍କାର ବ୍ରାଉସ ସୁଗାର ଜବତ କରିବା ସହ ଦୁଇ ଜଣଙ୍କୁ ଗିରଫ କରିଥିବା ପୋଲିସ କହିଛି ।

ସଂପୃକ୍ତ ବ୍ୟକ୍ତିମାନେ ଜଣେ ବ୍ୟକ୍ତିଙ୍କୁ ବ୍ରାଉନ ସୁଗାର ବିକ୍ରୀ କରୁଥିବା ଖବର ପାଇ କେନ୍ଦ୍ରାଞ୍ଚଳ ଗୁଇନ୍ଦା ଅବକାରୀ ବିଭାଗର ଏକ ଦଳ ଷ୍ଟେସନ ନିକଟରେ ଚଢ଼ାଉ କରିଥିଲେ ।

ଗିରଫ ସମୟରେ ରବୀନ୍ଦ୍ର ନାମକ ବ୍ୟକ୍ତିଙ୍କ ଠାରୁ ୩୨ଗ୍ରାମ ଓ ଚଗୁଲୁ ଠାରୁ ୧୪ଗ୍ରାମ ଏହିପରି ମୋଟ ୪୬ଗ୍ରାମର ବ୍ରାଉନ ସୁଗାର ଜବତ କରାଯାଇଥିଲା । ଜବତ ବ୍ରାଉନ ସୁଗାରର ଅନୁମାନିକ ମୂଲ୍ୟ ପ୍ରାୟ ୫ଲକ୍ଷ ଟଙ୍କା ହେବ ବୋଲି ପୋଲିସ କହିଛି ।

ଉଲ୍ଲେଖଯୋଗ୍ୟ, ଚରମ୍ପା ବଉଳ ପୋଖରୀ ଅଞ୍ଚଳର ରବୀନ୍ଦ୍ର ଓ ଚଗୁଲୁ ପୂର୍ବରୁ ବ୍ରାଉନ ସୁଗାର କାରବାର କରୁଥିବା ଅଭିଯୋଗ ହୋଇ ଆସୁଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ଜୁଲାଇ ୨୧(ଓଡ଼ିଶା ଡ଼ଟ୍ କମ୍) ଏକ ଧର୍ଷଣ ମାମଲାର ବିଚାର କରି ଭଦ୍ରକ ଜିଲ୍ଲା ଦୌରାଜଜ୍ ଜଣେ ଧର୍ଷଣ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରି ୭ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି ।

ବିଚାରପତି ମିହିର ରଞ୍ଜନ ପରିଡ଼ା ବନ୍ତ ଥାନା ଫୁଲଗଡ଼ିଆ ଗ୍ରାମର ଶିଶିରକୁ ଏହି ଦଣ୍ଡାଦେଶ ସହ ୫ହଜାର ଟଙ୍କା ଜରିମାନା ଓ ଜରିମାନା ଅନାଦେୟ ଅଧିକ ୫ମାସ ଜେଲ ଦଣ୍ଡ ଶୁଣାଇଛନ୍ତି ।

ଗତ ୨୦୧୦ ଡ଼ିସେମ୍ବର ୭ରେ ଫୁଳଗଡ଼ିଆ ଗ୍ରାମର ଦୁଃଶାସନ ଜେନାଙ୍କ ନାବାଳିକା କନ୍ୟା ସଉା କିଣି ଫେରୁଥିବା ସମୟରେ ଏକ ନିଛାଟିଆ ସ୍ଥାନରେ ସେହି ଗ୍ରାମର ଶିଶିର ତାଙ୍କୁ ଜୋର ଜବରଦସ୍ତ ଧର୍ଷଣ କରିଥିଲା ।

ସଂପୃକ୍ତ ନାବାଳିକାଙ୍କ ମା’ଙ୍କ ଏତଲା କ୍ରମେ ପୋଲିସ ମାମଲା ରୁଜ୍ଜୁ କରି ଅଭିଯୁକ୍ତ ମାନଙ୍କୁ ଗିରଫ କରିଥିଲା । ମାନ୍ୟବର ଅଦାଲତ ସମସ୍ତ ସାକ୍ଷ୍ୟପ୍ରମାଣକୁ ଭିତ୍ତି କରି ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିଥିବା ବେଳେ ଅନ୍ୟ ଦୁଇ ଜଣଙ୍କୁ ପ୍ରମାଣ ଅଭାବରୁ ନିର୍ଦ୍ଦେଷରେ ଖଲାସ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ଜୁନ୍ ୨୬(ଓଡ଼ିଶା ଡ଼ଟ୍ କମ୍) ଭଦ୍ରକ ଜିଲ୍ଲାରେ ଦିନକୁଦିନ ବେଆଇନ ଭାବେ ଗୋ ଚାଲାଣ ବଢୁଥିବାରୁ ଏହାକୁ ପ୍ରତିବାଦ କରି ଭାରତୀୟ ଜନତା ପାର୍ଟି ଭଦ୍ରକ ଶାଖାର କର୍ମୀମାନେ ମଙ୍ଗଳବାର ଜିଲ୍ଲାପାଳଙ୍କୁ ଦାବି ପତ୍ର ଦେଇଛନ୍ତି ।

ଏହି ଉପଲକ୍ଷେ କାଉନସିଲର ଘାଉଲି ଜେନାଙ୍କ ନେତୃତ୍ୱରେ କେତେକ କର୍ମୀ ଏକ ଶୋଭାଯାତ୍ରାରେ ବାହାରି ଜିଲ୍ଲାପାଳଙ୍କ କାର୍ଯ୍ୟାଳୟ ଠାରେ ପହଞ୍ଚିଥିଲେ ।

ଜିଲ୍ଲାରେ ୫ନଂ ଜାତୀୟ ରାଜପଥ ଦେଇ ଦୈନନ୍ଦିନ ବହୁ ଗୋରୁ ଟ୍ରକ ବିପଦଜନକ ଭାବେ ଯାଉଛି । କେବଳ ସେତିକିନୁହେଁ ସେସବୁ ଗାଡିରେ ସେହି ନିରିହ ଗୋରୁ ମାନଙ୍କୁ ଖାଦ୍ୟପେୟ ଦିଆନଯାଇ ଯେଉଁ ଭଳି ଭାବେ ସୁଦୁର କଲିକତା ଏବଂ ଅନ୍ୟାନ୍ୟ ରାଜ୍ୟକୁ ପଠାଯାଉଛି ତାହାକୁ କେହି ଆଖିରେ ନ ଦେଖିଲେ ବିଶ୍ୱାସକୁ ନେବେ ନାହିଁ ବୋଲି ସେମାନେ ପତ୍ରରେ ଉଳ୍ଲେଖ କରିଛନ୍ତି ।

ଗୋରୁ ବ୍ୟବସାୟୀମାନେ ମୋଟା ଅଙ୍କର ଟଙ୍କା ରୋଜଗାର ପାଇଁ ଦୈନନ୍ଦିନ ଜିଲ୍ଲାରୁ ବିଭିନ୍ନ ସ୍ଥାନରୁ ଶହ ଶହ ଗୋରୁଗାଈଙ୍କୁ କିଣି ଚାଲାଣ କରିବା ପାଇଁ ଏହି ର୍ୟାକେଟ୍ ରେ ସଂପୃକ୍ତ ରହୁଛନ୍ତି । ଫଳରେ ଗୋରୁ ଟ୍ରକଗୁଡିକ ବିଭିନ୍ନ ସମୟରେ ରାସ୍ତାରେ ଓଲଟି ପଡିବାରୁ ଗୋରୁ ଗାଈମାନେ ମରୁଛନ୍ତି ।

ତେଣୁ ଜିଲ୍ଲା ପ୍ରଶାସନ ପକ୍ଷରୁ ଏହି ବେଆଇନ ଗୋରୁ ଚାଲାଣକୁ ସଂପୂର୍ଣ୍ଣଭାବେ ବନ୍ଦ କରିବା ପାଇଁ ଏକ ସ୍ୱତନ୍ତ୍ର ପଦକ୍ଷେପ ନେବାକୁ ସେମାନେ ଦାବି କରିଛନ୍ତି । ନଚେତ୍ ସେମାନେ ଆଇନକୁ ହାତକୁ ନେବେ ବୋଲି ଚେତାବନୀ ଦେଇଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ଜୁନ୍ ୧୪(ଓଡ଼ିଶା ଡ଼ଟ୍ କମ୍) ଭଦ୍ରକ ଚରମ୍ପା ଛକ ଠାରୁ ଭଦ୍ରକ ରେଳ ଷ୍ଟେସନ ପର୍ଯ୍ୟନ୍ତ ଯାଇଥିବା ରାସ୍ତାକୁ ନିୟମାନୁଯାୟୀ ଓସାରିଆ କରିବା ଦାବିରେ ଜନଆନ୍ଦୋଳନ ଦେଖାଦେଇଛି ।

ଏ ନେଇ ଗୁରୁବାର ବିଜୁ ଛାତ୍ର ଜନତା ଦଳର ସଭାପତି ରାକେଶ ପଣ୍ଡାଙ୍କ ନେତୃତ୍ୱରେ ସ୍ଥାନୀୟ ଅଞ୍ଚଳର ବହୁ ସରପଞ୍ଚ ଓ ସାଧାରଣ ଲୋକ ଜିଲାପାଳଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି ।

ଚରମ୍ପା ଠାରୁ ଭଦ୍ରକ ଷ୍ଟେସନ ପର୍ଯ୍ୟନ୍ତ ଯାଇଥିବା ରାସ୍ତାର ସମ୍ପ୍ରସାରଣ ନିମନ୍ତେ ଭଦ୍ରକ ସ୍ଥିତ ପୂର୍ତ ଓ ଗୃହ ନିର୍ମାଣ ବିଭାଗ ଏକ ଟେଣ୍ଡର ଆହ୍ୱାନ କରିଥିଲା ।

ଉକ୍ତ ରାସ୍ତାଟି ଦୀର୍ଘଦିନରୁ ଅତି ସଂକୀର୍ଣ୍ଣ ଏବଂ ଜନଗହଳି ପୂର୍ଣ୍ଣ ହୋଇଥିଲା । ରେଳ ଷ୍ଟେସନ ଠାରେ ସିମେଣ୍ଟ ଠାରୁ ଆରମ୍ଭ କରି ବହୁ ଗୋଦାମ ଘର ଥିବାରୁ ଉକ୍ତ ରାସ୍ତା ଦେଇ ଦୁଇ ଶହରୁ ତିନି ଶହ ପର୍ଯ୍ୟନ୍ତ ଟ୍ରକ ଗୋଦାମ ଗୁଡ଼ିକରୁ ବିଭିନ୍ନ ଜିଲ୍ଲାକୁ ମାଲ ପରବହନ କରିଥାନ୍ତି ।

କିନ୍ତୁ ରାସ୍ତାକୁ ଚଉଡ଼ା କରାଇ ନଦେବା ପାଇଁ କେତେକ ବ୍ୟକ୍ତି ନିଜର ସ୍ୱାର୍ଥ ସାଧନ ଉଦ୍ଦେଶ୍ୟରେ ଚକ୍ରାନ୍ତ କରୁଥିବା ଅଭିଯୋଗ ହୋଇଛି । ତେଣୁ ସେମାନେ ଏହି ରାସ୍ତା ମଝିରେ ଏକ ମେଡ଼ିଆନ ନିର୍ମାଣ କରି ଗୋଟିଏ ପାର୍ଶ୍ଵ ରାସ୍ତାକୁ ୨୨ଫୁଟ ରଖି ପରେ ନିର୍ମାଣ ପାଇଁ ଦାବି କରିଛନ୍ତି ।

ଯଦି ଅଳ୍ପ କେତେକ ବ୍ୟକ୍ତିଙ୍କ ଚକ୍ରାନ୍ତରେ ଉକ୍ତ ରାସ୍ତାକୁ ପୂର୍ବ ନିର୍ଦ୍ଧାରିତ ମାପ ଅନୁଯାୟୀ କରାନଯାଏ ତେବେ ଗଣଧାରଣା ଓ ରାସ୍ତାରୋକ ପରି ଆନ୍ଦୋଳନାତ୍ମକ ପନ୍ଥାର ଆଶ୍ରୟ ନଦିଆଯିବ ବୋଲି ସେମାନେ କହିଛନ୍ତି ।

ସୂଚନାଯୋଗ୍ୟ ଚରମ୍ପା ବଜାର ଟ୍ରାଫିକ ବ୍ୟବସ୍ଥା ବିପର୍ଯ୍ୟସ୍ତ ହୋଇ ପଡ଼ିଥିବା ବେଳେ ଏଥିରେ ସୁଧାର ଆଣିବା ନିମନ୍ତେ ପରିବହନ ବିଭାଗର ଅଧିକାରୀମାନେ ଚରମ୍ପା ଛକ ଠାରୁ ରେଲୱେ ଷ୍ଟେସନ ପର୍ଯ୍ୟନ୍ତ ରାସ୍ତାର ସଂପ୍ରସାରଣ ଓ ଏକ ପାଖିଆ ରାସ୍ତା ନିର୍ମାଣ ପାଇଁ ସର୍ଭେ କରିଥିଲେ ।

ବିଭାଗୀୟ ଅଧିକାରୀଙ୍କ ରିପୋର୍ଟ ଭିତ୍ତିରେ ଏହାର କାର୍ଯ୍ୟକାରୀତା ପାଇଁ ରାଜ୍ୟ ସରକାର ଡ଼୍ରେନ ନିର୍ମାଣ ବାବଦରେ ୯୨ଲକ୍ଷ ଏବଂ ରାସ୍ତା ନିର୍ମାଣ ପାଇଁ ୨୬ଲକ୍ଷ ଟଙ୍କା ମଞ୍ଜୁର କରିଥିଲେ ।

ବିଭାଗ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଚରମ୍ପା ଛକ ଠାରୁ ଷ୍ଟେସନ ପର୍ଯ୍ୟନ୍ତ ମୋଟ ୪ଶହ ମିଟର ଦୈର୍ଘ୍ୟର ଏହି ରାସ୍ତାର ଉଭୟ ପାର୍ଶ୍ଵ ୧୮ଫୁଟ, ଡ଼ିଭାଇଡ଼ର ୨ଫୁଟ, ଉଭୟ ପାର୍ଶ୍ଵରେ ଡ଼୍ରେନ ନିର୍ମାଣ ପାଇଁ ୫ ଫୁଟ୍ ଏହିପରି ମୋଟ ୪୮ଫୁଟର ରାସ୍ତା ପାଇଁ ଟେଣ୍ଡର ହୋଇଥିଲା ।

ଉକ୍ତ ରାସ୍ତା ନିର୍ମାଣ ବାବଦକୁ ୩୬ ଓ ଡ଼୍ରେନ ନିର୍ମାଣ ପାଇଁ ୯୨ଲକ୍ଷ ଏହିପରି ମୋଟ ୧୨୮ ଲକ୍ଷ ଟଙ୍କାର ଟେଣ୍ଡର ହୋଇ କାର୍ଯ୍ୟାରମ୍ଭ ହେବାକୁ ସ୍ଥିର ହୋଇଛି । ମାତ୍ର ସଂପୃକ୍ତ ରାସ୍ତାର ଉଭୟ ପାଶ୍ୱର୍ରେ ସରକାରୀ ଜମିକୁ ନିଜ ଖଲରେ ରଖି କେତେକ ବ୍ୟକ୍ତି ବ୍ୟବସାୟ ଚଳାଇଛନ୍ତି ଯେଉଁମାନଙ୍କୁ ଉଚ୍ଛେଦ କରି ଥଇଥାନ କରିବାର ଯୋଜନା ଅଛି ।

ଚରମ୍ପା ଛକ ଠାରୁ ଡ଼ାହାଣିଗଡ଼ିଆ ପର୍ଯ୍ୟନ୍ତ ରାସ୍ତା ପାର୍ଶ୍ୱରେ ଗଢ଼ି ଉଠିଥିବା ଗ୍ୟାରେଜ ଗୁଡ଼ିକୁ ଉଚ୍ଛେଦ କରିବା, ସାଧାରଣ ଜନତାଙ୍କ ଯାତାୟାତରେ ସୁବିଧା ପାଇଁ ଟ୍ରାଫିକ ସମସ୍ୟାରେ ସୁଧାର ଆଣିବା ଆଦି ଉଲ୍ଲେଖ କରି ସେମାନେ ଦାବିପତ୍ରର ନକଲ ରାଜ୍ୟ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଭଦ୍ରକ ସାଂସଦ, ବିଧାୟକ, ଜିଲା ପରିଷଦ ସଭାପତି ଓ କାର୍ଯ୍ୟନିର୍ବାହୀ ଯନ୍ତ୍ରୀଙ୍କୁ ପ୍ରଦାନ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ସ୍ନିଗ୍ଧା ରାୟ

ଭଦ୍ରକ, ଜୁନ୍ ୮(ଓଡ଼ିଶା ଡ଼ଟ୍ କମ୍) ଭଦ୍ରକ ଜିଲ୍ଲାରେ ଶୁକ୍ରବାର ମାଛ ଧରାକୁ କେନ୍ଦ୍ର କରି ଗୋଟିଏ ପରିବାରର ଦୁଇ ଭାଇ ମଧ୍ୟରେ ସଂଘର୍ଷ ହେବାରୁ ଏଥିରେ ଜଣେ ପୁରୁଷ ଓ ଦୁଇ ଜଣ ମହିଳାଙ୍କ ସମେତ ତିନି ଜଣ ଆହତ ହୋଇଥିବା ବେଳେ ଅନ୍ୟଜଣେ ମହିଳା ନିଖୋଜ ଅଛନ୍ତି ।

ଅଗରପଡ଼ା ଥାନା ଅଧିନସ୍ଥ ବୋଡ଼କ ପାଟଣା ଗ୍ରାମରେ ଏକ ପୋଖରୀରେ ଉକ୍ତ ଗ୍ରାମର ଲକ୍ଷ୍ମଣ ରାଉତଙ୍କ ପୁତ୍ର ରମେଶ ରାଉତ, ରାଜକିଶୋର ରାଉତ ଓ ଚକ୍ରଧର ରାଉତ ପମ୍ପ ଲଗାଇ ମାଛ ଧରୁଥିବା ବେଳେ ଏହା ଯୌଥ ସମ୍ପତି ହୋଇଥିବାରୁ ଶ୍ରୀଧର ଏହାକୁ ବିରୋଧ କରିଥିଲେ ।

ଏଥିରେ ଉତକ୍ଷିପ୍ତ ହୋଇ ଉପରୋକ୍ତ ବ୍ୟକ୍ତିମାନେ ଶ୍ରୀଧର ସମେତ ତାଙ୍କ ପରିବାର ଉପରେ ମାରଣାନ୍ତକ ଆକ୍ରମଣ କରିଥିଲେ । ଆକ୍ରମଣରେ ଶ୍ରୀଧର ଓ ତାଙ୍କ ଦୁଇ କନ୍ୟା ଆହତ ହୋଇଥିଲେ ।

ତେବେ ଉକ୍ତ ଲୋକମାନେ ଶ୍ରୀଧରଙ୍କ ପତ୍ନୀଙ୍କୁ ମଧ୍ୟ ଆକ୍ରମଣ କରିଥିଲେ । ତେବେ ଶ୍ରୀଧର ଏନେଇ ଥାନାକୁ ଯିବାକୁ ଚାହିଁବାରୁ ସଂପୃକ୍ତ ଅଭିଯୁକ୍ତ ମାନେ ତାଙ୍କୁ ଥାନାକୁ ଯିବାକୁ କିମ୍ବା ଆହତଙ୍କୁ ଡ଼ାକ୍ତରଖାନା ଯିବାକୁ ଦେଇନଥିଲେ ।

ଓଡ଼ିଶା ଡ଼ଟ୍ କମ୍