ଓଡିଶା ଡଟ କମ ସମ୍ବାଦଦାତା
ଭୁବନେଶ୍ଵର,ମଇ ୨୬ (ଓଡିଶା ଡଟ କମ) : କ୍ଷୁଦ୍ର ନିବେଶକମାନଙ୍କ ଠାରୁ ପ୍ରଲୋଭନ ଦେଖାଇ ପ୍ରାୟ ପଚାଶ କୋଟି ଟଙ୍କାର ଠକେଇର ଅଭିଯୋଗ ହୋଇଥିବା ଭିଷ୍ଟା କମ୍ପାନୀ ର ଆଉ ଜଣେ ଅଫିସରଙ୍କୁ ରାଜ୍ୟ କ୍ରାଇମ ବ୍ରାଞ୍ଚର ଅର୍ଥନୈତିକ ଅପରାଧ ଶାଖା ସୋମବାର ଦିନ ଗିରଫ କରିଛି । ସେ ହେଉଛନ୍ତି ଭିଷ୍ଟା ମ୍ୟାନେଜମେଣ୍ଟ ସର୍ଭିସେସ ଲିମିଟେଡର ଚାଟାର୍ଡ ଆକାଉଣ୍ଟାଣ୍ଟ୍ ଦେବ ପ୍ରସାଦ ମିଶ୍ର ।
ଅର୍ଥନୈତିକ ଅପରାଧ ଶାଖାରୁ ମିଳିଥିବା ତଥ୍ୟ ଅନୁଯାୟୀ ଭିଷ୍ଟା ମ୍ୟାନେଜମେଣ୍ଟ ସର୍ଭିସେସ ଲିମିଟେଡ ରେ ଦେବ ପ୍ରସାଦ ମିଶ୍ର ଚାଟାର୍ଡ ଆକାଉଣ୍ଟାଣ୍ଟ୍ ଭାବରେ ୨୦୧୦ ଓ ୨୦୧୧ କାମ କରୁଥିଲେ । ସେତେବେଳେ ସେ ଭିଷ୍ଟାର ସମସ୍ତ କମ୍ପାନୀର ଆକାଉଣ୍ଟିଂ ବିଷୟରେ ବୁଝୁଥିଲେ।
ଦେବ ପ୍ରସାଦ କମ୍ପାନୀର ଇନକମଟ୍ୟାକ୍ସ ଭରିବା ନାଁରେ ଅଧ୍ୟକ୍ଷ ଦେବ କୁମାର ପଣ୍ଡାଙ୍କ ଠାରୁ ପ୍ରାୟ ଷାଠିଏ ଲକ୍ଷ ଟଙ୍କା ଆଣିଥିଲେ, ହେଲେ ସେହି ଟଙ୍କାରେ କମ୍ପାନୀର ଇନକମଟ୍ୟାକ୍ସ ନଭରି ରାଜଧାନୀ ଉପକଣ୍ଠରେ ନିଜ ନାଁରେ ଏକ ଜମି କିଣିଥିଲେ। ଆହୁରି ମଧ୍ୟ ବହୁବାର ବଡ ଆମାଉଣ୍ଟର ଟଙ୍କା ଭିଷ୍ଟାର ଆକାଉଣ୍ଟରୁ ଶ୍ରୀ ମିଶ୍ରଙ୍କ ଆକାଉଣ୍ଟାକୁ ଯାଇଥିବା ର ପ୍ରମାଣ ମିଳିଛି ।
କ୍ରାଇମବ୍ରାଞ୍ଚ ଭିଷ୍ଟାର ଅଧ୍ୟକ୍ଷ ଦେବ କୁମାର ପଣ୍ଡାଙ୍କୁ ରିମାଣ୍ଡରେ ନେଇ ପଚରାଉଚରା କଲାବେଳେ ଏହି ସବୁ ତଥ୍ୟ ସାମ୍ମନାକୁ ଆସିଛି । ତେବେ ଇଓଡ଼ବଲ୍ୟୁ ତଦନ୍ତ ଜାରିରଖିବା ସହ ଯମାକାରୀଙ୍କ ଟଙ୍କା କେଉଁ କେଉଁ ଜାଗାରେ ନିବେଶ ହୋଇଛି ତାହାର ଅନୁସନ୍ଧାନ ଚଳାଇଛି।
ତେବେ ଏଁ ଯାଏ ଭିଷ୍ଟାର ଅଧ୍ୟକ୍ଷ ଦେବ କୁମାର ପଣ୍ଡାଙ୍କ ସହ ଦୁଇ ଜଣ ନିର୍ଦ୍ଦେଶକ ବିଜୟ ସ୍ଵାଇଁ ଓ ମନୋଜ ପଟ୍ଟନାୟକଙ୍କୁ ଅର୍ଥନୈତିକ ଅପରାଧ ଶାଖା ଗିରଫ କରିସାରିଛି । ଆଉ ଏବେ ଚାଟାର୍ଡ ଆକାଉଣ୍ଟାଣ୍ଟ୍ ଦେବ ପ୍ରସାଦ ମିଶ୍ରଙ୍କୁ ମଧ୍ୟ ଗିରଫ ହୋଇଛନ୍ତି ।
ଓଡିଶା ଡଟ କମ
