Connecting Odias
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ଏପ୍ରିଲ ୧୧ (ଓଡିଶା ଡଟ କମ) ସୋମବାର ୪୫.୮ ଡିଗ୍ରୀ ସେଲସିଅସ ପଞ୍ଜୀକୃତ କରି ଭୁବନେଶ୍ଵର ଗରମରେ ଏପ୍ରିଲ ମାସର ସର୍ବକାଳୀନ ରେକର୍ଡକୁ ଭାଙ୍ଗିଛି ।
ପୂର୍ବରୁ ଏପ୍ରିଲ ୨୩ , ୧୯୮୫ ରେ ରାଜଧାନୀ ରେ ସର୍ବୋଛ ତାପମାତ୍ରା ୪୫ ଡିଗ୍ରୀ ରେକର୍ଡ କରଯାଇଥିଲା। ଚଳିତ ଗ୍ରୀଷ୍ମ ରେ ଏ ପର୍ଯ୍ୟନ୍ତ ୧୬ ଜଣ ଅଂଶୁଘାତ ଜନିତ ମୃତ୍ୟୁ ବରଣ କରିଥିବା ଅଭିଯୋଗ ହୋଇଛି ।
ଓଡିଶା ଡଟ କମ
ଓଡିଶା ଡଟ କମ ସଂବାଦ ଦାତା
ନୂଆଦିଲ୍ଲୀ , ଅଗଷ୍ଟ ୨୮ (ଓଡିଶା ଡଟ କମ) ସ୍ମାର୍ଟ ସିଟି ଭାବେ ବିକଶିତ କରିବା ପାଇଁ କେନ୍ଦ୍ର ସରକାର ତିଆରି କରିଥିବା ସହର ମାନଙ୍କ ତାଲିକାରେ ଓଡିଶାର ଭୁବନେଶ୍ଵର ଓ ଇସ୍ପାତ ନଗରୀ ରାଉରକେଲା ସ୍ଥାନ ପାଇଛି ।
ସରକାରଙ୍କ ଦ୍ୱାରା ଧାର୍ଯ୍ୟ ମାନଦଣ୍ଡ ଭିତ୍ତିରେ ଏହି ସହରଗୁଡିକୁ ମନୋନୀତ କରାଯାଇଥିବା କେନ୍ଦ୍ର ସହରାଞ୍ଚଳ ବିକାଶ ମନ୍ତ୍ରୀ ଭେଙ୍କୟା ନାଇଡୁ କହିଛନ୍ତି ।
ମନୋନୀତ ସହର ମାନଙ୍କ ବିକାଶ ପାଇଁ କେନ୍ଦ୍ର ସରକାର ୪୮ହଜାର କୋଟି ଟଙ୍କା ଖର୍ଚ କରିବେ ପ୍ରତ୍ୟେକ ସହରର ବିକାଶ ପାଇଁ ବାର୍ଷିକ ୧୦୦କୋଟି ହିସାବରେ ୫ବର୍ଷରେ ୫୦୦କୋଟି ଟଙ୍କା ସରକାର ଦେବେ ।
ମନୋନୀତ ହୋଇଥିବା ସହରଗୁଡିକର ପ୍ରାଥମିକ ଭିତ୍ତିଭୂମି ବିକାଶ ପାଇଁ ଆସନ୍ତା ସପ୍ତାହରେ କେନ୍ଦ୍ର ସରକାର ଦୁଇ କୋଟି ଟଙ୍କା ଲେଖାଏଁ ସମ୍ପୃକ୍ତ ରାଜ୍ୟ ସରକାର ମାନଙ୍କୁ ଯୋଗାଇ ଦେବେ ।
ସ୍ମାର୍ଟସିଟିରେ ଅବିଚ୍ଛନ୍ନ ୨୪ଘଣ୍ଟିଆ ପାଣି ଓ ବିଜୁଳି ଯୋଗାଣ ବ୍ୟବସ୍ଥା, ଯୋଗାଯୋଗ ବ୍ୟବସ୍ଥାର ଉନ୍ନତି, ପ୍ରଦୂଷଣ ମୁକ୍ତ ବ୍ୟବସ୍ଥା, ସ୍ଥାନୀୟ ବାସିନ୍ଦାଙ୍କ ପାଇଁ ଜୀବିକା ନିର୍ବାହ ସୁବିଧା ପାଇଁ ଭିତ୍ତିଭୂମି, ସୁରକ୍ଷା ଓ ନିରାପତ୍ତା ପାଇଁ ଆବଶ୍ୟକ ବ୍ୟବସ୍ଥା ଆଦି ଅନ୍ତର୍ଭୁକ୍ତ।
ଉତ୍କୃଷ୍ଟ ସ୍ୱାସ୍ଥ୍ୟ ଓ ଶିକ୍ଷା ସେବା, ବର୍ଜ୍ୟବସ୍ତୁର ସୁ ପରିଚାଳନା ଆଦି ବ୍ୟବସ୍ଥା କାର୍ଯ୍ୟକାରୀ କରିବାର ପ୍ରସ୍ତାବ ଏହି ଯୋଜନାରେ ରହିଛି ।
ଓଡିଶା ଡଟ କମ
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ଜୁନ ୩୦ (ଓଡିଶା ଡଟ କମ) ସ୍ଥାନୀୟ ଏକ ଟିଭି ଚ୍ୟାନେଲର ସାମ୍ବାଦିକ ଓ କ୍ୟାମେରାମେନଙ୍କୁ ସୋମବାର ଭୁବନେଶ୍ଵର ରେଳ ଷ୍ଟେସନରେ ମାଡ ମାରି ଜଣେ ରେଳ ସୁରକ୍ଷା ବଳର ଅଧିକାରୀ ନିଲମ୍ବିତ ହୋଇଛନ୍ତି ।
ଷ୍ଟେସନରେ ଏକ ଟ୍ରେନ ୧୬ ଘଣ୍ଟା ବିଳମ୍ବରେ ପହଞ୍ଚିବାକୁ ବିରୋଧ କରି ଯାତ୍ରୀମାନେ ପ୍ରତିବାଦ କରୁଥିଲେ । ଆରପିଏଫ ଯବାନ ମାନେ ଘଟଣା ସ୍ଥଳରେ ପହଞ୍ଚି ଯାତ୍ରୀମାନଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଥିଲା ।
ଯାତ୍ରୀଙ୍କ ପ୍ରତିବାଦର ଦୃଶ୍ୟ କନକ ଟିଭିର ସାମ୍ବାଦିକ ସତ୍ୟଜିତ ସେନ ଓ କ୍ୟାମେରାମେନ ଶଙ୍କର ପାତ୍ର ଉତ୍ତୋଳନ କରୁଥିବ ବେଳେ ଆରପିଏଫ ଇନିସପେକ୍ଟର ସଞ୍ଜୟ କୁମାର ସ୍ଵାଇଁ ତାଙ୍କୁ ମାଡ ମାରି ତାଙ୍କ କ୍ୟାମେରା ଭାଙ୍ଗିବା ସହ କ୍ୟାମେରାରୁ କ୍ୟାସେଟ କାଢି ନେଇଯାଇଥିଲେ ।
ସେ କେତେକ ଯାତ୍ରୀଙ୍କ ସହ ସମ୍ପୃକ୍ତ ସାମ୍ବାଦିକ ଓ କ୍ୟାମେରାମେନଙ୍କୁ ବେଆଇନ ଭାବେ ବହୁ ଘଣ୍ଟା ଧରି ଅଟକ ମଧ୍ୟ ରଖିଥିଲେ ।
ଏହି ଖବର ପାଇ ବହୁ ସାମ୍ବାଦିକ ଓ ବିଭିନ୍ନ ସ୍ଵେଚ୍ଛାସେବୀ ସଂଗଠନ ଓ ରାଜନୈତିକ ଦଳର କର୍ମକର୍ତ୍ତା ଘଟଣାସ୍ଥଳରେ ପହଞ୍ଚି ଏହାର ବିରୋଧ କରିଥିଲେ ।
ଉତ୍ୟକ୍ତ ଲୋକେ ଷ୍ଟେସନରେ ଛିଡା ହୋଇଥିବା ଅନ୍ୟ କେତେକ ଟ୍ରେନକୁ ଛାଡି ନ ଥିଲେ । ଫଳରେ ବାଧ୍ୟ ହୋଇ ଆରପିଏଫ କତ୍ତୃପକ୍ଷ ବାଧ୍ୟ ହୋଇ ଘଟଣାର ଯାଞ୍ଚ ଆଦେଶଦେବା ସହ ଆରପିଏଫ ଇନିସପେକ୍ଟର ସଞ୍ଜୟ କୁମାର ସ୍ଵାଇଁଙ୍କୁ ଚାକିରିରୁ ନିଲମ୍ବିତ କରିଥିଲେ ।
ଏହାପରେ ପରିସ୍ଥିତି ଶାନ୍ତ ପଡିଥିଲା ଓ ଟ୍ରେନ ଚଳାଚଳ ସ୍ଵାଭାବିକ ହୋଇଥିଲା ।
ଓଡିଶା ଡଟ କମ
ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ଵର,୧୮ ଜୁନ (ଓଡିଶା ଡଟ୍ କମ୍): ରାଜଧାନୀରେ ଜମି ବିକ୍ରେତା ଜମିର ବିନା ଲେ-ଆଉଟ୍ ପ୍ଳାନ ମଞ୍ଜୁରୀରେ ଏଥର ଜମି ବିକ୍ରି କରିପାରିବେ ନାହିଁ ବୋଲି ଭୁବନେଶ୍ଵର ଉନ୍ନୟନ କତୃପକ୍ଷ ( ବିଡ଼ିଏ) କହିଛି ।
ବହୁ ଲୋକ ଲେ-ଆଉଟ୍ ପ୍ଳାନ ନଥିବା ଜମି କିଣି ସାରିବା ପରେ ନାନା ଅସୁବିଧାର ସମ୍ମୁଖୀନ ହେଉଥିବାରୁ ବିଡ଼ିଏ ଏହି ନିୟମ ଜାରି କରିଛି ।
ଏହି ନିୟମ ଅନୁସାରେ ଜମି ମାଲିକ ବିନା ଲେ-ଆଉଟ୍ ପ୍ଳାନରେ ଯଦି ଜମି ବିକ୍ରି କରନ୍ତି, ଜମି କିଣୁଥିବା ଲୋକ ବିଡ଼ିଏ ରେ ଅଭିଯୋଗ କରିପାରିବେ । ଉକ୍ତ ଅଭିଯୋଗ ଉପରେ ବିଡ଼ିଏ ଜମି ମାଲିକ ବିରୋଧରେ ଫୌଜଦାରୀ ମାମଲା ରୁଜୁ କରିପାରିବ । ପୁଲିସ ଜମିମାଲିକକୁ ଗିରଫ କରି କୋର୍ଟ ଚାଲାଣ କରିପାରିବ ।
ବିଡ଼ିଏ ଦ୍ଵାରା ସ୍ଵୀକୃତି ପ୍ରାପ୍ତ ଲେ-ଆଉଟ୍ ପ୍ଳାନକୁ ସବ୍-ରେଜିଷ୍ଟର ଅଫିସରରେ ଯାଞ୍ଚ କରିବାକୁ ରାଜସ୍ୱ ବିଭାଗକୁ କୁହାଯାଇଛି। ଜମି ବିକ୍ରି ପୂର୍ବରୁ ଲେ-ଆଉଟ୍ ପ୍ଳାନର ଯାଞ୍ଚ କରାଯିବ । ଏବଂ ଏହି ପ୍ଳାନ ନଥିଲେ ଜମି ବିକ୍ରି ହୋଇପାରିବ ନାହିଁ। କେବଳ ଜମି ବିକ୍ରେତା ନୁହେଁ ଜମି କିଣୁଥିବା ବ୍ୟକ୍ତି ମଧ୍ୟ ଲେ-ଆଉଟ୍ ପ୍ଳାନ ଦେଖି ଜମି କିଣିବାକୁ ବିଡ଼ିଏ କହିଛି ।
ଓଡିଶା ଡଟ୍ କମ୍
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ମଇ ୨୩ (ଓଡିଶା ଡଟ କମ) ୨୦୦୫ ମସିହାରେ ଭୁବନେଶ୍ଵରରେ ସଂଗଠିତ ହୋଇଥିବା ଦୁଇଟି ଲୋମ ହର୍ଷଣକାରୀ ହତ୍ୟାକାଣ୍ଡ ଘଟଣାରେ ସ୍ଥାନୀୟ ଅଦାଲତ ଗ୍ୟାଙ୍ଗଷ୍ଟାର ଅନିଲ ଛୋଟରାୟ ସମେତ ଷୋହଳ ଜଣ ଅଭିଯୁକ୍ତଙ୍କୁ ପ୍ରମାଣ ଅଭାବରୁ ଶୁକ୍ରବାର ନିର୍ଦୋଷରେ ଖଲାସ କରିଛନ୍ତି ।
ଉକ୍ତ ବର୍ଷ ଏପ୍ରିଲ ଅଠର ତାରିଖରେ ନୂଆପଲ୍ଲୀ ଥାନା ଅନ୍ତର୍ଗତ ଇଉନିଟ ୮ ପ୍ରାଚୀ ଡିଭିଜନ ନିର୍ବାହୀ ଯନ୍ତ୍ରୀଙ୍କ ଅଫିସ ସାମ୍ନାରେ ଏହି ହତ୍ୟାକାଣ୍ଡ ହୋଇଥିଲା । ଦିନ ପ୍ରାୟ ସାଢେ ବାରଟା ବେଳେ ଦୁର୍ବୁତ୍ତଙ୍କ ଗୁଳିମାଡରେ ସୁବାସ ଚନ୍ଦ୍ର ଦାସ ଓ ଧୀରେନ କୁମାର ସେଠୀ ନାମକ ଦୁଇଜଣଙ୍କ ଘଟଣା ସ୍ଥଳରେ ମୃତ୍ୟୁ ଘଟିଥିଲା ।
ପ୍ରଥମେ ସ୍ଥାନୀୟ ପୁଲିସ ଓ ପରେ କ୍ରାଇମ ବ୍ରାଞ୍ଚ ଏହାର ତଦନ୍ତ କରି ଗ୍ୟାଙ୍ଗ ଷ୍ଟାର ଅନିଲ ଛୋଟରାୟ ଓ କେତେକ ଠିକାଦାରଙ୍କୁ ଗିରଫ କରିଥିଲେ । ତଦନ୍ତ ରିପୋର୍ଟରେ ଯାଞ୍ଚ କରିଥିବା ସଂସ୍ଥା ଟେଣ୍ଡର ଫିକସିଂକୁ ନେଇ ଏହି ହତ୍ୟାକାଣ୍ଡ ହୋଇଥିବା ଦର୍ଶାଇଥିଲେ ।
ପୁଲିସ ଓ କ୍ରାଇମ ବ୍ରାଞ୍ଚ ତଦନ୍ତରେ ତାଳମେଳ ଅଭାବ, ଠିକ ଭାବେ ସାକ୍ଷ୍ୟ ପ୍ରମାଣ ଉପସ୍ଥାପନ କରିବାରେ ବିଫଳତା ଯୋଗୁଁ ଅଦାଲତ ଅଭିଯୁକ୍ତ ମାନଙ୍କୁ ଖଲାସ କରିଥିବା, ମାମଲାର ପରିଚାଳନା କରୁଥିବା ବରିଷ୍ଠ ଆଇନଜୀବୀ ସୌର ମହାପାତ୍ର କହିଛନ୍ତି ।
ହତ୍ୟାକାଣ୍ଡ ସ୍ଥାନରୁ ପୁଲିସ ଜବତ କରିଥିବା ଗୁଳି ଓ ଅଭିଯୁକ୍ତମାନଙ୍କ ଠାରୁ ଜବତ ବନ୍ଧୁକ ଗୁଳି ରେ ସମାନତା ପ୍ରମାଣ ହୋଇନଥିଲା ।
ମହାପାତ୍ର ଓଡିଶା ଡଟକମକୁ କହିଛନ୍ତି ଯେ ପୁଲିସ ଏହି ମାମଲାରେ ଅଠର ଜଣଙ୍କୁ ଅଭିଯୁକ୍ତ ଘୋଷଣା କରି ସତର ଜଣଙ୍କୁ ଗିରଫ କରିଥିଲା । ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରୁ ଜଣେ ଏହା ମଧ୍ୟରେ ମୃତ୍ୟୁ ବରଣ କରିସାରିଥିବା ବେଳେ ଆଉ ଜଣେ ଫେରାର ଅଛି ।
ଅଦାଲତରେ ଷୋହଳ ଜଣଙ୍କ ବିରୁଦ୍ଧରେ ବିଚାର ହୋଇଥିଲା ଓ ମାନ୍ୟବର ଜଜ ଉକ୍ତ ଷୋହଳ ଜଣଙ୍କୁ ପ୍ରମାଣ ଅଭାବରୁ ନିର୍ଦୋଷ ଘୋଷଣା କରିଥିବା ସେ କହିଛନ୍ତି ।
ରାୟ ପ୍ରକାଶ ପାଇବା ପରେ ସ୍ଥାନୀୟ ଜେଲରେ ଥିବା ଗ୍ୟାଙ୍ଗଷ୍ଟାର ଅନିଲ ଛୋଟରାୟ ଓ ଅନ୍ୟ କେତେକ ଅଭିଯୁକ୍ତ ଛାଡ ପାଇଛନ୍ତି ।
ଓଡିଶା ଡଟ କମ
ଭୁବନେଶ୍ୱର, ମଇ ୧୫ (ଓଡିଶା ଡଟ କମ) ରାଜ୍ୟରେ ଜମି ଆବଣ୍ଟନରେ ହୋଇଥିବା ବ୍ୟାପକ ଜାଲିଆତି, ବେଆଇନ୍ କାର୍ଯ୍ୟ ଓ ଅନିୟମିତତାର ସିବିଆଇ ତଦନ୍ତ କରାଯିବାକୁ ୩୦ଟି ସାମାଜିକ ସଂଗଠନର ସ୍ଵେଚ୍ଛାସେବୀ ଶୁକ୍ରବାର ଏଠାରେ ଦାବି କରିଛନ୍ତି ।
ବୁଦ୍ଧ ବିହାର ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସଙ୍ଗଠନମାନଙ୍କ ତରଫରୁ ଆବାହକ ଶ୍ରୀ ପ୍ରଦୀପ ପ୍ରଧାନ ଅଭିଯୋଗ କରିଛନ୍ତି ଯେ, ରାଜ୍ୟର ସହରାଞ୍ଚଳ ଯଥା ଭୁବନେଶ୍ୱର ଏବଂ କଟକରେ ସାଧାରଣ ପ୍ରଶାସନ ବିଭାଗ, ବିଡ଼ିଏ, ସିଡ଼ିଏ ଦ୍ୱାରା ହୋଇଥିବା ଜମି ଓ ବାସଗୃହ ଆବଣ୍ଟନରେ ବ୍ୟାପକ ଅନିୟମିତତା ଓ ଜାଲିଆତିର ପର୍ଦାଫାଶ ସିଏଜି କରିଥିଲେ ।
ଏହା ପରେ ରାଜ୍ୟର ବିଭିନ୍ନ ରାଜନୈତିକ ଦଳ ଏବଂ ସିଭିଲ୍ ସୋସାଇଟି ସଂଗଠନମାନଙ୍କ ତରଫରୁ ଏହି ଦୁର୍ନୀତିର ସିବିଆଇ ତଦନ୍ତ ଦାବୀ କରାଗଲା ପରେ ସରକାର ବାଧ୍ୟବାଧକତାରେ ଗତ ବର୍ଷ ଅଗଷ୍ଟ ମାସରେ ଏହାର ଅନୁଧ୍ୟାନ କରି ରିପୋର୍ଟ ଦେବାକୁ ଏକ ଟାସ୍କ ଫୋର୍ସ ଗଠନ କରିଥିଲେ ।
ଏହି ଟାସ୍କ ଫୋର୍ସ ବିଭିନ୍ନ ସରକାରୀ ସଂସ୍ଥାଦ୍ୱାରା ହୋଇଥିବା ଜମି ଆବଣ୍ଟନର ଅନୁଧ୍ୟାନ କରି ନଭେମ୍ବର ତିନିମାସ ପରେ ରାଜ୍ୟ ସରକାରଙ୍କୁ ରିପୋର୍ଟ ଦେଇଥିଲେ । ଉକ୍ତ ରିପୋର୍ଟ ଉପରେ ରାଜ୍ୟ ସରକାର ଡ଼ିସେମ୍ବରରେ କାର୍ଯ୍ୟାନୁଷ୍ଠାନ ରିପୋର୍ଟ ପ୍ରକାଶ କରିଥିଲେ ।
ଉକ୍ତ ରିପୋର୍ଟରେ ରାଜ୍ୟ ସରକାର ୧୯୯୫ ମସିହା ଠାରୁ ଇଚ୍ଛାଧୀନ କୋଟାରେ ଦିଆଯାଇଥିବା ସମସ୍ତ ଜମିକୁ ବାତିଲ୍ କରିବା, ମିଥ୍ୟା ସତ୍ୟପାଠ ବା ଭୁଲ୍ ତଥ୍ୟ ଦେଇ ଜମି ନେଇଥିବା ବ୍ୟକ୍ତିମାନଙ୍କର ବିରୁଦ୍ଧରେ ଫୌଜଦାରୀ ମକଦ୍ଧମା ରୁଜୁ କରିବା, ଅଯୋଗ୍ୟ ବ୍ୟକ୍ତି ବା ପରିବାର ନେଇଥିବା ଏକ ବା ଏକାଧିକ ପ୍ଲଟଗୁଡ଼ିକୁ ବ୍ୟାଜ୍ୟାପ୍ତ କରିବା ଘୋଷଣା କରିଥିଲେ ।
ଏହା ବ୍ୟତିତ ୧୯୯୫ ମସିହା ପୂର୍ବବର୍ତ୍ତୀ ସମୟରେ ସାଧାରଣ ପ୍ରଶାସନ ବିଭାଗ, ବିଡ଼ିଏ ଏବଂ ହାଉସିଂ ବୋର୍ଡ଼ ତରଫରୁ ଜମି ନେଇଥିବା ବ୍ୟକ୍ତି ବିଶେଷଙ୍କ ତାଲିକା ଛଅ ମାସ ମଧ୍ୟରେ ପ୍ରସ୍ତୁତ କରିବା, ସମସ୍ତ ଜମି ଆବଣ୍ଟନରେ ସ୍ୱତନ୍ତ୍ର ଅଡ଼ିଟ୍ ଅର୍ଥ ବିଭାଗ ଦ୍ୱାରା କରାଇବା, ଟାସ୍କ ଫୋର୍ସ କରିଥିବା ସୁପାରିଶକୁ କାର୍ଯ୍ୟକାରୀ କରିବା ପାଇଁ ତିନିମାସ ମଧ୍ୟରେ ଏହାର ପଦ୍ଧତି ନିର୍ଦ୍ଧାରଣ କରିବା ଇତ୍ୟାଦି ପଦକ୍ଷେପ ନେବାକୁ ମଧ୍ୟ ଘୋଷଣା କରିଥିଲେ ।
କିନ୍ତୁ ଦୀର୍ଘ ଛଅ ମାସ ବିତି ଯାଇଥିଲେ ମଧ୍ୟ ରାଜ୍ୟ ସରକାର ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହାଁନ୍ତି କି ଗୋଟିଏ ବେଆଇନ୍ ପ୍ଲଟ ସରକାରୀ ଅଧୀନକୁ ଆଣିନ ଥିବା ସେ ଅଭିଯୋଗ କରିଛନ୍ତି ।
ଅର୍ଥ ବିଭାଗ ଏପର୍ଯ୍ୟନ୍ତ କୌଣସି ସ୍ୱତନ୍ତ୍ର ଅଡ଼ିଟ୍ କରିନାହିଁ । ଭିଜିଲାନ୍ସ ବିଭାଗ କୌଣସି ତଦନ୍ତ ମଧ୍ୟ ଆରମ୍ଭ କରିନାହାଁନ୍ତି । ୧୯୯୫ ମସିହା ପୂର୍ବବର୍ତ୍ତୀ ସମୟରେ ସାଧାରଣ ପ୍ରଶାସନ ବିଭାଗ, ବିଡ଼ିଏ ଏବଂ ହାଉସିଂ ବୋର୍ଡ଼ ଦ୍ୱାରା ଆବଣ୍ଟିତ ଜମିର ତାଲିକା ପ୍ରସ୍ତୁତ କରିନାହାଁନ୍ତି ତେଣୁ ଏହାର ତଦନ୍ତ ସିବିଆଇ ଦ୍ଵାରା କରାଇବାକୁ ସେ ଦାବି କରିଛନ୍ତି ।
ଓଡିଶା ଡଟ କମ
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ମଇ ୮ (ଓଡିଶା ଡଟ କମ) ପୂର୍ବ ଭାରତର ୨୦୧୧ ଜନଗଣନା ନଥିପତ୍ର ତଥା ଏ ସମ୍ପର୍କୀୟ ଅନ୍ୟାନ୍ୟ ରେକର୍ଡ ସବୁ ସଂରକ୍ଷିତ ରଖିବା ପାଇଁ ପ୍ରାୟ ତେର କୋଟି ଟଙ୍କା ବ୍ୟୟରେ ଭୁବନେଶ୍ଵରରେ ରେକର୍ଡ ଚାରିମାସ ଭିତରେ ଏକ ଅତ୍ୟାନୁଧିକ ଗୋଦାମ ଘରର ନିର୍ମାଣ ସମ୍ପର୍ଣ୍ଣ ହୋଇଛି ।
ସହୀଦ ନଗରରେ ନିର୍ମାଣ ହୋଇଥିବା ଏହି କୋଠା ହେଉଛି ଜଣ ଗଣନା ସଂକ୍ରାନ୍ତୀୟ ନଥିପତ୍ର ସଂରକ୍ଷଣ କରିବା ପାଇଁ ନିର୍ମିତ ହୋଇଥିବା ଦେଶର ପ୍ରଥମ ଗୋଦାମ ଘର ।
ନିଆଁ, ଭୂକମ୍ପ, ଘଣ୍ଟା ପ୍ରତି ୧୮୦ କିଲୋମିଟର ବେଗର ଝଡ ତୋଫାନ ଆଦି ପ୍ରାକୃତିକ ଦୈବୀପାକ ପ୍ରତିରୋଧ କ୍ଷମତା ରଖିଥିବା ଏହି 
ଗୋଦାମ ଘରରେ ଅତ୍ୟାଧୁନିକ ବାରକୋଡିଂ ଓ ସ୍କାନର ବ୍ୟବସ୍ଥା ରହିଥିବା, ରାଜ୍ୟ ଜନଗଣନା ମୁଖ୍ୟ ବିଷ୍ଣୁପଦ ସେଠୀ କହିଛନ୍ତି ।
ଏହି ଗୋଦାମ ଘରରେ ଚାରିଟି ନିଷ୍କାସନ ଦ୍ଵାର, ଦୁଇଟି ରୋଲିଂ ସଟର ଓ ଦୁଇଟି ଅଗ୍ନି ନିରୋଧକ ଦ୍ଵାର ରହିଛି । ମୂଷା, ଝିଟିପିଟି ଆଦିଙ୍କଠାରୁ ନଥିପତ୍ର ରକ୍ଷାକରିବା ପାଇଁ ସ୍ଵତନ୍ତ୍ର ବ୍ୟବସ୍ଥା କରାଯାଇଛି । ପରିବେଶ ଅନୁକୂଳ ଓ ସବୁଦୃଷ୍ଟିରୁ ସୁରକ୍ଷିତ ଏହା ହେଉଛି ଭୁବନେଶ୍ଵରର ପ୍ରଥମ ଗୋଦାମ ଘର ।
ଓଡିଶା ଡଟ କମ
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର ଏପ୍ରିଲ ୩୦(ଓଡିଶା ଡଟ କମ) ଓଡିଶା ର ଭୁବନେଶ୍ଵର ସ୍ଥିତ କିଟ ବିଶ୍ୱବିଦ୍ୟାଳୟରେ ପଢୁଥିବା ଶତାଧିକ ନେପାଳୀ ଛାତ୍ରଛାତ୍ରୀ ବୁଧବାର ନିଜ ଦେଶ ନେପାଳକୁ ଫେରିଛନ୍ତି। କେବଳ ପରୀକ୍ଷା ଚାଲୁଥିବାରୁ ସେମାନେ ନିଜ ଦେଶକୁ ଫେରି ପାରି ନଥିଲେ।
ଭୂମିକମ୍ପ ପରେ ବହୁ ଛାତ୍ରଛାତ୍ରୀ ନିଜ ପରିବାର ଲୋକଙ୍କ ସହ ସଂମ୍ପର୍କ ସ୍ଥାପନ କରିପାରିନାହାଁନ୍ତି । ଯିବା ପୂର୍ବରୁ ଛାତ୍ରୀ ସ୍ଵପ୍ନା ଗୁପ୍ତା କହିଛନ୍ତି ଯେ, ”ଭୂମିକମ୍ପରେ ସେ ତାଙ୍କ ଜେଜେମାଙ୍କୁ ହରାଇଥିବା ବେଳେ ତାଙ୍କ ପରିବାର ଲୋକ ଅଳ୍ପକେ ବର୍ତ୍ତି ଯାଇଛନ୍ତି ଓ ସେମାନେ ଆଶ୍ରୟ ନେଇ ଟେଣ୍ଟରେ ରହୁଛନ୍ତି। ପରିବାରଲୋକଙ୍କ ମନାକରିବା ପରେ ବି ସେ ଘରକୁ ଆତ୍ମୀୟ ସହୋଦରଙ୍କ ସହ ମିଶିବା ପାଇଁ ଯାଇଛିନ୍ତି ।
ଆଉଜଣେ ଛାତ୍ର ରଜତ ବଜ୍ରଚର୍ଯା କହିଛନ୍ତି ସେ ତାଙ୍କର କଲେଜ ପରୀକ୍ଷା ଶେଷ କରି ଘରକୁ ଆଉ ଏକ ବଡ ପରୀକ୍ଷା ଦେବା ପାଇଁ ଯାଉଛନ୍ତି । କାରଣ ସେ ହେଲେ ଘରର ବଡପୁଅ ଓ ଏପରି ଘଡି ସନ୍ଧି ମୂହୁର୍ତ୍ତରେ ତାଙ୍କ ଛଡା ପରିବାରର ଆଉ କିଏ ଅଛି ।
ଏହି ଛାତ୍ରଛାତ୍ରୀମାନେ କିପରି ସେମାନଙ୍କ ଦେଶରେ ପହଞ୍ଚିଯିବେ ସେଥିପାଇଁ ଭାରତ ସରକାର ଉଦ୍ୟମ କରିଛନ୍ତି ଏବଂ କିଟ ପକ୍ଷରୁ ପିଲାମାନଙ୍କୁ ନେଇ ଷ୍ଟେସନରେ ଛାଡିଦେବାର ସୁବିଧା କରଯାଇଥିଲା । କିଟ ପ୍ରତିଷ୍ଠାତା ଅଚ୍ୟୁତ ସାମନ୍ତ ନେପାଳ ଭୂକମ୍ପ ପୀଡିତଙ୍କୁ ଦଶଲକ୍ଷ ଟଙ୍କା ସାହାଯ୍ୟ ଦେଇଥିବା ବେଳେ ଘରକୁ ପ୍ରତ୍ୟାବର୍ତ୍ତନ କରିଥିବା ଛାତ୍ର ଓ ଛାତ୍ରୀ ଓ ତାଙ୍କ ପରିବାରର ଶୁଭ କାମନା କରିଛନ୍ତି ।
ଓଡିଶା ଡଟ କମ
ଭୁବନେଶ୍ଵର, ଏପ୍ରିଲ ୩୦(ଓଡିଶା ଡଟ କମ), ନେପାଳରେ ଘଟିଯାଇଥିବା ଭୟାବହ ଭୂମିକମ୍ପରେ କ୍ଷତିଗ୍ରସ୍ତ ଜନତାଙ୍କ ସହାୟତା ନିମନ୍ତେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ପାଞ୍ଚକୋଟି ଟଙ୍କା ସହାୟତା ଘୋଷଣା କରିଛନ୍ତି।
ଏତଦବ୍ୟତୀତ ରାଜ୍ୟସରକାରଙ୍କ ବିପର୍ଯ୍ୟୟ ପ୍ରଶମନ କର୍ତ୍ତୁପକ୍ଷଙ୍କ ତିନିଜଣ ଅଧିକାରୀଙ୍କୁ ମଧ୍ୟ ରିଲିଫ ଓ ପୁନରୁଦ୍ଧାର କାର୍ଯ୍ୟରେ ସହାୟତା ଯୋଗାଇଦେବା ପାଇଁ ନେପାଳକୁ ପଠାଯାଇଛି।
ସୂଚନାଯୋଗ୍ୟ ଯେ ନେପାଳର ଉଦ୍ଧାର ଓ ରିଲିଫି କାର୍ଯ୍ୟରେ ସହାୟତା ଯୋଗାଇ ଦେବା ପାଇଁ ଓଆରଏଏଫ ଟିମ ପଠାଇବା ପାଇଁ ମୁଖ୍ୟମନ୍ତ୍ରୀ ପୂର୍ବରୁ ପ୍ରସ୍ତାବ ମଧ୍ୟ ଦେଇଥିଲେ। ନେପାଳ ଖୁବ ଶୀଘ୍ର ତାର ସ୍ଵଭାବିକ ଅବସ୍ଥାକୁ ଫେରି ଆସିବା ବୋଲି ସେ ଆଶାବ୍ୟକ୍ତ କରିଛନ୍ତି।
ଓଡିଶା ଡଟ କମ
ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା
ଭୁବନେଶ୍ୱର, ନଭେମ୍ବର ୧୯(ଓଡ଼ିଶା ଡ଼ଟ୍ କମ୍) ସିଆଇଆଇ ପୂର୍ବାଞ୍ଚଳର ପ୍ରତିନିଧି ଦଳ ତଥା ବିଭିନ୍ନ ଶିଳ୍ପାନୁଷ୍ଠାନର ପ୍ରତିନିଧିମାନେ ଶୁକ୍ରବାର ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ଓଡ଼ିଶାର ବିକାଶ କ୍ଷେତ୍ରରେ ସହଯୋଗ କରିବା ପାଇଁ ପ୍ରସ୍ତାବ ଦେଇଛନ୍ତି ।
ବିକାଶ ପାଇଁ ସିଆଇଆଇ ଏକ ଭିଜନ ୨୦୨୨ ପ୍ରସ୍ତୁତ କରିଛି । ଏଥିରେ କ୍ଷୁଦ୍ର ଓ ମଧ୍ୟମ ଶିଳ୍ପର ବିକାଶ, ଶିକ୍ଷା, କୃଷି, ପରିବେଶ ପ୍ରଭୃତି କ୍ଷେତ୍ରରେ କାମ କରିବା ପାଇଁ ଯୋଜନା ରହିଛି ।
ବାଲେଶ୍ୱରରେ ଏକ ଦକ୍ଷତା କେନ୍ଦ୍ର କରିବା ପାଇଁ ମଧ୍ୟ ପ୍ରସ୍ତାବ ରହିଛି । ଯେଉଁ କ୍ଷେତ୍ରରେ ଅଧିକ ନିଯୁକ୍ତି ହେବାର ସମ୍ଭାବନା ରହିଛି ସେ ବିଷୟରେ ଏହି କେନ୍ଦ୍ରରେ ପ୍ରଶିକ୍ଷଣ ଦିଆଯିବ ।
ଭୁବନେଶ୍ୱରରେ ବର୍ଷା ଜଳ ଅମଳ, ଜଳ ସଂରକ୍ଷଣ, ଗ୍ରୀନ ବସଷ୍ଟାଣ୍ଡ, ଆବର୍ଜନା ପରିଚାଳନା, ଶକ୍ତି ସଂରକ୍ଷଣ ଉପରେ ଗୁରୁତ୍ୱ ଦିଆଯିବ । ସେହିପରି ବିଭିନ୍ନ ସ୍ଥାନର ସ୍କୁଲ କ୍ଲଷ୍ଟର, ପର୍ଯ୍ୟଟନର ବିକାଶ ପାଇଁ ମଧ୍ୟ ଏହି ପ୍ରତିନିଧି ଦଳ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି ।
କଳାହାଣ୍ଡି, ବଲାଙ୍ଗୀର ଭଳି ପଛୁଆ ଜିଲ୍ଲାର ବିକାଶ ପାଇଁ “ଜିଲ୍ଲା ବିକାଶ” ଯୋଜନା ପ୍ରସ୍ତୁତ କରିବା ପାଇଁ କାର୍ଯ୍ୟ କରୁଛନ୍ତି ବୋଲି ପ୍ରତିନିଧି ଦଳ ସୂଚନା ଦେଇଛନ୍ତି ।
ଓଡିଶା ଡଟ୍ କମ୍
