ମାଓବାଦୀ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଫୁଲବାଣୀ,ସେପ୍ଟେମ୍ବର ୨୫(ଓଡ଼ିଶା ଡ଼ଟ୍ କମ୍) – କନ୍ଧମାଳରେ ମାଓବାଦୀଙ୍କ ବଡ଼ଧରଣର ବିସ୍ଫୋରଣ ଯୋଜନା ପଣ୍ଡ ହେବା ସହ ୩୪ ପ୍ରକାର ବିସ୍ଫୋରକ ଜବତ କରା ଯାଇଛି ବୋଲି ଜିଲା ପୁଲିସ ମୁଖ୍ୟ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି ।

ଜବତ ହୋଇଥିବା ବିସ୍ଫୋରକ ମଧ୍ୟରେ ୨୦ କିଲୋଗ୍ରାମର ଗୋଟିଏ, ୧୦ କିଲୋଗ୍ରାମର ଗୋଟିଏ, ୫ କିଲୋଗ୍ରାମର ଗୋଟିଏ, ୨ କି.ଗ୍ରାର ୧୦ଟି ଏବଂ ୧ କି.ଗ୍ରାର ୬ଟି ବିସ୍ଫୋରକ ଜବତ କରାଯାଇଛି । ଏହି ସବୁ ଅତ୍ୟାଧୁନିକ ଯାନ୍ତ୍ରିକ ବିସ୍ଫୋରକ ସାମଗ୍ରୀ ଏବଂ ସମସ୍ତ ବିସ୍ଫୋରକ ପୃଥକପୃଥକ ଭାବେ ଷ୍ଟିଲ ବକ୍ସରେ ରଖାଯାଇଥିଲା ।

ସେହିପରି ସାବୁନ ଖୋଳ ବୋମା ୪୦୦ ଗ୍ରାମର ୮ଟି, ହେଣ୍ଡ ଗ୍ରେନେଡ଼, ଡିଟୋନେଟର ୨୦ଟି, ୧୦ ରିମ ବିଦ୍ୟୂତ ତାର ଏବଂ ଏକ ବଡ଼ ପଲିଥିନ ଜବତ କରାଯାଇଛି । ଜବତ ହୋଇଥିବା ଦୁଇ କି.ଗ୍ରାର ୧୦ଟି ବୋମା ମଧ୍ୟରେ କେବଳ ଏକମାତ୍ର ବୋମା ଏକ ମଧ୍ୟମ ଧରଣର ଗାଡ଼ି ଧ୍ୱଂସ କରି ଦେଇପାରିବ ବୋଲି କୁହାଯାଇଥିଲା ।

ଘଟଣାସ୍ଥଳରେ କିଛି ବିସ୍ଫୋରକ ସାମଗ୍ରୀକୁ ବୋମା ନିଷ୍କ୍ରିୟକାରୀ ଦଳ ନଷ୍ଟ କରି ଦେଇଛନ୍ତି । କନ୍ଧମାଳ ଜିଲା କୋଟଗଡ଼ ଅଞ୍ଚଳରେ କମ୍ବିଂ ଅପରେସନ ବେଳେ ଏହି ଦ୍ରବ୍ୟ ଜବତ ହୋଇଛି ।

କୋଟଗଡ଼ ଥାନା ଅନ୍ତର୍ଗତ ଶ୍ରୀରାମପୁର ଜଙ୍ଗଲ ମଧ୍ୟରେ ମାଓବାଦୀମାନେ ବିପୁଳ ପରିମାଣର ବିସ୍ଫୋରକ ସାମଗ୍ରୀ ସାଇତି ରଖି ହିଂସା ପାଇଁ ପ୍ରସ୍ତୁତ ହେଉଥିବା ନେଇ ଜିଲା ଆରକ୍ଷୀ ଅଧୀକ୍ଷକ ଜୟନାରାୟଣ ପଙ୍କଜ କୌଣସି ସୂତ୍ରରୁ ଖବର ପାଇଥିଲେ ।

ଏହାପରେ ଏସଓଜି ଏବଂ ଅଷ୍ଟମ ବାଟାଲିୟନ ଯବାନମାନେ ମାଓ କ୍ୟାମ୍ପ ସନ୍ଧାନରେ ବାହାରିଥିଲେ । ଶ୍ରୀରାମପୁର ଜଙ୍ଗଲ ମଧ୍ୟରେ ଥିବା ଏକ ଖାତରେ ଏକ ପଲିଥିନ ଘୋଡ଼ା ହୋଇ କିଛି ସାମଗ୍ରୀ ଥିବା ସେମାନଙ୍କ ନଜରରେ ପଡ଼ିଥିଲା । ପରେ ବୋମା ନିଷ୍କି୍ରୟକାରୀ ଦଳ ସହାୟତାରେ ସମସ୍ତ ବିସ୍ଫୋରକ ଜବତ କରାଯାଇଥିଲା ।

ଏହି ଆକଳନ ଅନୁଯାୟୀ ଜବତ ହୋଇଥିବା ସମସ୍ତ ବିସ୍ଫୋରକ କେତେ ଭୟଙ୍କର ହୋଇପାରିଥାନ୍ତା ତାହା ଅନୁମେୟ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ପାଇକମାଳ,ଅଗଷ୍ଟ ୨୮(ଓଡ଼ିଶା ଡ଼ଟ୍ କମ୍)-୧୫ଦିନ ମଧ୍ୟରେ ୪ ଜଣ ଗୃହରକ୍ଷୀ ଇସ୍ତଫା ଦେଇଥିବା ଜଣାଯାଇଛି । ୨ଜଣ ଗୃହରକ୍ଷୀ ଏବଂ ଜଣେ ଗ୍ରାମରକ୍ଷୀ ପାଇକମାଳ ଅଂଚଳରେ ଇସ୍ତଫା ଦେଇସାରିଲେଣି ।

ଗତ ୨୨ ତାରିଖରେ ମାଣ୍ଡୋସିଲ ପଞ୍ଚାୟତ ଅନ୍ତର୍ଗତ ଧାରୋଲ ଗ୍ରାମର ଗ୍ରାମରକ୍ଷୀ ରାଜିନ୍ଦ୍ର ବାଗ ଓ ଗତ ୨୪ ତାରିଖରେ ମାଣ୍ଡିଆଢିପା ପଞ୍ଚାୟତ ଅନ୍ତର୍ଗତ ଚୁହାପାଲି ଗ୍ରାମର ଗୃହରକ୍ଷୀ ସୁବାସଚନ୍ଦ୍ର ସାହୁ ଇସ୍ତଫା ଦେଇଥିଲେ ।

ମାଓବାଦୀ ଭୟରେ ପାଇକମାଳ ଥାନାରେ କାର୍ଯ୍ୟରତ ଗୃହରକ୍ଷୀ କିଶୋର ଚନ୍ଦ୍ର ଦୀପ (୩୨) ମଙ୍ଗଳବାର ଚାକିରିରୁ ଇସ୍ତଫା ଦେଇଥିବା ଜଣାପଡିଛି ।

ସେ ବରଗଡ ଏସପିଙ୍କୁ ଲେଖିଥିବା ଚିଠିରେ ଦର୍ଶାଇଛନ୍ତି ଯେ ଗତ ୧୦ବର୍ଷ ହେଲା ସେ ହୋମଗାର୍ଡ ଭାବେ କାମ କରୁଥିଲେ ।

କିନ୍ତୁ ଗତ ୧୩ ତାରିଖରେ ପାଇକମାଳ ଥାନା ଅନ୍ତର୍ଗତ ଭୁଲିଆବନ୍ଧ ଗ୍ରାମର ଗୃହରକ୍ଷୀ ନାରାୟଣ ସୁନାଙ୍କ ହତ୍ୟା ଘଟଣାକୁ ନେଇ ଯେଉଁ ଚର୍ଚ୍ଚା ଏଠାରେ ଶୁଣିବାକୁ ମିଳୁଛି ସେଥିପାଇଁ ମୁଁ ଭୟରେ ଗୃହରକ୍ଷୀ ପଦରୁ ଇସ୍ତଫା ଦେବାକୁ ବାଧ୍ୟ ହେଉଛି ବୋଲି ସେ ପ୍ରକାଶ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ମାଲକାନଗିରି,ଅଗଷ୍ଟ ୨୪ (ଓଡ଼ିଶା ଡ଼ଟ୍ କମ୍)-ରାତିରେ କମ୍ବିଂ ସାରି ଯବାନମାନେ ଫେରୁଥିବା ବେଳ ଏକ ଭୟାନକ ଲ୍ୟାଣ୍ଡମାଇନ୍ ବିସ୍ପୋରଣରୁ ପ୍ରାୟ ୬୦ ଯବାନ ବର୍ତ୍ତିଯାଇଛନ୍ତି ।

ମାଲକାନାଗିରି ଜିଲ୍ଲାର କାଲିମେଳା ବ୍ଲକ ଅର୍ନ୍ତଗତ ଗମ୍ପାକୋଣ୍ଡା ପଂଚାୟତର ତୁଣ୍ଡୁକିମେଟଲା ନିକଟରେ ଏହି ଶକ୍ତିଶାଳୀ ଲ୍ୟାଣ୍ଡମାଇନ୍ ବିସ୍ପୋରଣ ଘଟିଥିଲା । ଏହି ବିସ୍ପୋରଣ ଯବାନମାନେ ଆସୁଥିବା ଯାନଠାରୁ ମାତ୍ର ୨୦ ମିଟର ଦୁରରେ ଘଟିଥିଲା । ମାଓବାଦୀଙ୍କ ଷଡଯନ୍ତ୍ର ବିଫଳ ହୋଇ ଯାଇଛି ବୋଲି କୁହାଯାଇଛି ।

ଏହି ଘଟଣାରେ ମାଓବାଦୀଙ୍କ ହାତଥିବା ଜଣାଯାଇଛି । ମାଲକାନାଗିରି ଏସ୍ ପି ଅଖିଳେଶ୍ୱର ସିଂ କହିଛନ୍ତି ଏହି ଘଟଣାରେ ଯବାନମାନଙ୍କ କୌଣସି କ୍ଷତି ଘଟି ନାହିଁ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅଗଷ୍ଟ ୧୩(ଓଡ଼ିଶା ଡ଼ଟ୍ କମ୍) ମାଓବାଦୀ ନେତା ସବ୍ୟସାଚୀ ପଣ୍ଡାଙ୍କ ବିରୋଧରେ ଥିବା ମାମଲା ପ୍ରତ୍ୟାହାର କରିବା ସହ ତାଙ୍କୁ ସମାଜର ମୁଖ୍ୟ ସ୍ରୋତକୁ ଆଣିବା ପାଇଁ ପତ୍ନୀ ଶୁଭଶ୍ରୀ ଦାସ ସୋମବାର ସରକାରଙ୍କ ନିକଟରେ ଦାବି କରିଛନ୍ତି ।

“ଗତ ଦୁଇ ବର୍ଷ ମଧ୍ୟରେ ସବ୍ୟସାଚୀ କୌଣସି ହିଂସାକାଣ୍ଡ କରିନାହାନ୍ତି । ସରକାର ତାଙ୍କ ବିରୋଧରେ ଥିବା ମାମଲା ପ୍ରତ୍ୟାହାର କରିବାକୁ ମୁଁ ନିବେଦନ କରୁଛି” ସିପିଆଇ ମାଓବାଦୀ ସଂଗଠନରୁ ସବ୍ୟସାଚୀ ବହିଷ୍କାର ହେବାର ତିନିଦିନ ପରେ ଶୁଭଶ୍ରୀ ଏକ ଘରୋଇ ଟିଭି ଚ୍ୟାନେଲକୁ କହିଛନ୍ତି ।

ତାଙ୍କ ପତିଙ୍କ ସଂପର୍କରେ କୌଣସି ନିଷ୍ପତି ନେବା ପାଇଁ ସରକାର ଏକ କମିଟି ଗଠନ କରି ଏଥିରେ ବରିଷ୍ଠ ପୋଲିସ ଅଧିକାରୀଙ୍କୁ ସାମିଲ କରନ୍ତୁ ବୋଲି ସେ କହିଛନ୍ତି ।

ତେବେ ଘଟଣା ସଂପର୍କରେ ପୋଲିସ ତୀକ୍ଷ୍ଣ ନଜର ରଖିଛି ବୋଲି ପୋଲିସ ମହାନିର୍ଦ୍ଦେଶକ ପ୍ରକାଶ ମିଶ୍ର ଗଣମାଧ୍ୟମକୁ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଶାନ୍ତନୁ ବିଶ୍ୱାଳ

ବରଗଡ଼, ଜୁଲାଇ ୨୭(ଓଡ଼ିଶା ଡ଼ଟ୍ କମ୍) ବରଗଡ଼ ଜିଲ୍ଲାର ପୁରୁଣା ବସଷ୍ଟାଣ୍ଡ, ସର୍ଗିଦାର ସମଲେଶ୍ୱରୀ ଢ଼ାବା, ବରତୁଣ୍ଡା ପ୍ରଭୃତି ଅଞ୍ଚଳରେ ମାଓବାଦୀଙ୍କ ପ୍ରଚାର ପତ୍ର ଦେଖିବାକୁ ମିଳିଥିବା ବେଳେ ଏହାକୁ ନେଇ ସାଧାରଣରେ ଆତଙ୍କ ସୃଷ୍ଟି ହୋଇଛି ।

ଏହି ପ୍ରଚାର ପତ୍ର ମାଧ୍ୟମରେ ଭାରତୀୟ କମ୍ୟୁନିଷ୍ଟ ପାର୍ଟି ମାଓବାଦୀ ସଂଗଠନର ମହାସମୁନ୍ଦ-ବଲାଙ୍ଗିର-ବରଗଡ଼ ଜୋନାଲ କମିଟି ପକ୍ଷରୁ ୨୫ ଜୁନକୁ କଳାଦିବସ ରୂପେ ପାଳନ କରିବା ସହ ୨୪ ଘଣ୍ଟିଆ ବନ୍ଦ ଡ଼ାକରା ଦିଆଯାଇଥିଲା ।

ଏଥିରେ ପ୍ରସ୍ତାବିତ ଏନ୍ସିଟିସି ଗଠନକୁ ବିରୋଧ କରାଯିବା ସହ, ଅପରେସନ ଗ୍ରୀନ ହଣ୍ଟ କୁ ସମ୍ପୂର୍ଣ୍ଣ ରୂପେ ବନ୍ଦ କରିବା ପାଇଁ ଆହ୍ୱାନ ଦିଆଯାଇଥିଲା । ଯଦିଓ ଏହି ପ୍ରଚାର ପତ୍ର ଜୁନ ୨୫ ତାରିଖ ପାଇଁ ଉଦ୍ଧିଷ୍ଟ ଥିଲା ତଥାପି ଲୋକେ ଶୁକ୍ରବାର ଏହାକୁ ଦେଖି ଭୟଭୀତ ହୋଇ ପଡ଼ିଛନ୍ତି ।

ବିଗତ କିଛି ବର୍ଷ ହେଲା ବରଗଡ଼ ଜିଲ୍ଳାରେ ମାଓବାଦୀ ଗତିବିଧି ବୃଦ୍ଧି ପାଇଥିବାରୁ ଲୋକେ ଆତଙ୍କିତ ଅବସ୍ଥାରେ ରହୁଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବ୍ରହ୍ମପୁର, ଜୁଲାଇ ୧୬(ଓଡ଼ିଶା ଡ଼ଟ୍ କମ୍) କନ୍ଧମାଳ ଜିଲ୍ଲା ବ୍ରାହ୍ମଣୀଗାଁ ଥାନା ଅନ୍ତର୍ଗତ ବିନାଲ ଗ୍ରାମର ଜଣେ ମହିଳା ମାଓବାଦୀ ଗଞ୍ଜାମ ପୋଲିସ ନିକଟରେ ସୋମବାର ଆତ୍ମସମର୍ପଣ କରିଛି ।

୨୦୦୯ରେ ସିପିଆଇ ମାଓବାଦୀ ସଂଗଠନରେ ସାମିଲ ହୋଇଥିବା ସବିତା ମଲ୍ଲିକ ଏସ୍ପିଙ୍କ ନିକଟରେ ଆତ୍ମସର୍ମପଣ କରିଥିବା ଜଣେ ଅଧିକାରୀ କହିଛନ୍ତି ।

ସଂପୃକ୍ତ ମାଓବାଦୀ ମାଓକ୍ୟାମ୍ପରେ ଖାଦ୍ୟ ପ୍ରସ୍ତୁତି କରିବା ସହ ଅନ୍ୟାନ୍ୟ କାମ କରୁଥିବା ପୋଲିସ କହିଛି । ଜଣେ ସିଆର୍ ପିଏଫ୍ ଯବାନଙ୍କ ହତ୍ୟା ଘଟଣାରେ ସେ ସଂପୃକ୍ତ ଥିବା ପୋଲିସ କହିଛି ।

ସମାଜର ମୁଖ୍ୟ ସ୍ରୋତରେ ସାମିଲ ହେବା ପାଇଁ ଆତ୍ମସମର୍ପଣ କରିଥିବା ସେ ପୋଲିସ ନିକଟରେ କହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ମାଲକାନଗିରି,ଜୁଲାଇ ୧୨(ଓଡ଼ିଶା ଡ଼ଟ୍ କମ୍) ମାଲକାନଗିରି ଜିଲ୍ଲାରେ ଗୁରୁବାର ପୋଲିସ ନିକଟରେ ଜଣେ ଦୁର୍ଦ୍ଧାନ୍ତ ମାଓବାଦୀ ଆତ୍ମସମର୍ପଣ କରିଛି ।

ରାଜ୍ୟବାହାର କ୍ୟାଡରଙ୍କ ଅତ୍ୟାଚାରରେ ଅତିଷ୍ଠ’ ହୋଇ ଆତ୍ମ ସମର୍ପଣ କରିଥିବା ପୋଲିସକୁ କହିଛି । ୩୦ ବର୍ଷ ବୟସ୍କ ବେଦ ପଡିଆମି ଗତ ତିନିବର୍ଷ ହେଲା କାଲିମେଳା-ମୋଟୁ ଳମ୍ ରେ କମାଣ୍ଡର ଭାବେ କାମ କରୁଥିଲା ।

ଜିଲ୍ଲା ପୋଲିସ ମୁଖ୍ୟ ଅନିରୁଦ୍ଧ ସିଂହଙ୍କ ନିକଟରେ ସେ ଆତ୍ମସମର୍ପଣ କରି ସମାଜର ମୁଖ୍ୟସ୍ରୋତରେ ସାମିଲହେବାକୁ ସ୍ଥିର କରିଥିବା କହିଛି । ଆତ୍ମସମର୍ପଣ କରିଥିବା ମାଓବାଦୀଙ୍କ ଥଇଥାନ ପାଇଁ ସରକାରକରିଥିବା ଘୋଷଣା ଅନୁସାରେ ତାକୁ ସହାୟତା ପ୍ରାଦାନ କରାଯିବ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି ।

ଓଡ଼ିଶା ଡ଼ଟ୍ କମ୍