ମାଓବାଦୀ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୬(ଓଡ଼ିଶା ଡ଼ଟ୍ କମ୍) ଦାବି ପୂରଣ ପାଇଁ ସରକାରଙ୍କ ନିଷ୍ପତି ସତ୍ୱେ ଅପହୃତ ଇଟାଲୀୟ ପର୍ଯ୍ୟଟକଙ୍କୁ ମୁକ୍ତ କରିବାକୁ ଶୁକ୍ରବାର ମାଓବାଦୀମାନେ ମନା କରିଦେଇଛନ୍ତି ।

ମାଓ ମଧ୍ୟସ୍ଥି ଏବଂ ସରକାରଙ୍କ ମଧ୍ୟରେ ଚାଲିଥିବା ଆଲୋଚନା ଏକ ଫାର୍ସ ଏବଂ ଇଟାଲୀୟ ପର୍ଯ୍ୟଟକଙ୍କୁ ମୁକ୍ତ କରାଯିବ ନାହିଁ ବୋଲି ମାଓନେତା ସବ୍ୟସାଚୀ ପଣ୍ଡାଙ୍କ ଏକ ଅଡ଼ିଓ ବାର୍ତା ସ୍ଥାନୀୟ ଟିଭି ଚ୍ୟାନେଲରେ ପ୍ରସାରିତ ହୋଇଛି ।

ସେମାନଙ୍କର ଦାବି ସଂପର୍କରେ ମଧ୍ୟସ୍ଥିଙ୍କ ସହ କୌଣସି ଚୁକ୍ତି କରିନଥିବାରୁ ସେ ସରକାରଙ୍କୁ ସମାଲୋଚନା କରିବା ସହ ମଙ୍ଗଳବାର ସୁଦ୍ଧା ସରକାର ଦାବି ପୂରଣ ନକଲେ ତାଙ୍କ ଦଳ ଚରମ ପଦକ୍ଷେପ ଗ୍ରହଣ କରିବ ବୋଲି ସେ କହିଛନ୍ତି ।

ତେବେ ପର୍ଯ୍ୟଟକଙ୍କ ନିରାପଦ ମୁକ୍ତି ପାଇଁ ସରକାର ଗ୍ରହଣ କରିଥିବା ନିଷ୍ପତି ସଂପର୍କରେ ଦୁଇ ମାଓ ମଧ୍ୟସ୍ଥି ସ୍ପଷ୍ଟିକରଣ ଲୋଡ଼ିଛନ୍ତି । ସରକାର କିପରି ଭାବେ ବନ୍ଦୀଙ୍କୁ ମୁକ୍ତ କରିବେ ତାହା ସ୍ପଷ୍ଟ ଜଣାପଡ଼ୁ ନାହିଁ, ଏ ସଂପର୍କରେ ସରକାରଙ୍କ ଦ୍ୱାରାନିଯୁକ୍ତ ଅଧିକାରୀଙ୍କୁ ଜଣାଇଛୁ ବୋଲି ମାଓ ମଧ୍ୟସ୍ଥି ଦଣ୍ଡପାଣି ମହାନ୍ତି କହିଛନ୍ତି ।

“ଏ ସଂପର୍କରେ ସେମାନେ ଉତ୍ତର ଦେବେ” ତିନି ଅଧି୍କାରୀଙ୍କ ସହ ଆଲୋଚନା ପରେ ମହାନ୍ତି ଗଣମାଧ୍ୟମକୁ କହିଛନ୍ତି । ମୁଖମନ୍ତ୍ରୀଙ୍କ ଘୋଷଣା ପରେ ମାଓବାଦୀମାନେ ଅପହୃତଙ୍କୁ ମୁକ୍ତ କରିବେ କି ନାହିଁ ସେ ନେଇ ମଧ୍ୟସ୍ଥିଙ୍କ ନିକଟରେ କୌଣସି ସୂଚନା ନଥିବା ମହାନ୍ତି କହିଛନ୍ତି । “ବର୍ତମାନ ପରିସ୍ଥିତିରେ ଆମେ କିଛି କହିପାରିବୁ ନାହିଁ, ମାଓବାଦୀ ଯାହା କରିବେ” ସେ କହିଛନ୍ତି।

ଗତ ମାର୍ଚ୍ଚ ୧୪ ତାରିଖରେ କନ୍ଧମାଳ ଜିଲ୍ଲାରୁ ଓଡ଼ିଶା ଶାଖା ସିପିଆଇ ମାଓବାଦୀ ସଂଗଠନ ଇଟାଲୀୟ ପର୍ଯ୍ୟଟକ ୫୪ ବର୍ଷ ବୟସ୍କ ବାସୁସ୍କୋ ପାଓଲୋଙ୍କୁ ଅପହରଣ କରିନେଇଥିଲା ।

ସେହିପରି ଲକ୍ଷ୍ମୀପୁର ନିର୍ବାଚନ ମଣ୍ଡଳୀରୁ ପ୍ରତିନିଧିତ୍ୱ କରୁଥିବା ବିଜେଡ଼ି ବିଧାୟକ ଝିନ୍ନ ହିକକାଙ୍କୁ ସିପିଆଇ ମାଓବାଦୀ ସଂଗଠନର ଆନ୍ଧ୍ର ଓଡ଼ିଶା ବୋର୍ଡ଼ର ସ୍ପେଶାଲ ଜୋନାଲ କମିଟି ଗତ ମାର୍ଚ୍ଚ ୨୪ରେ କୋରାପୁଟ ଜିଲ୍ଲାରୁ ଅପହରଣ କରିନେଇଥିଲା ।

ମିଥ୍ୟା ମାମଲାରେ ବିଭିନ୍ନ ଜେଲ୍ ରେ ଥିବା ବନ୍ଦୀଙ୍କୁ ମୁକ୍ତ କରିବା ସହ ୧୩ଟି ଦାବି ପୂରଣ କରିବାକୁ ସିପିଆଇ ମାଓବାଦୀ ସଂଠନର ଉଭୟ ଦଳ ପକ୍ଷରୁ ସରକାରଙ୍କୁ କୁହାଯାଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୫(ଓଡ଼ିଶା ଡ଼ଟ୍ କମ୍) ଅପହୃତ ବିଦେଶୀ ପର୍ଯ୍ୟଟକ ଏବଂ ବିଧାୟକଙ୍କ ମୁକ୍ତି ପାଇଁ ଜେଲ୍ ରୁ ଖଲାସ ହେବାକୁ ଥିବା ୨୭ ଜଣ ବନ୍ଦୀଙ୍କ ନାମ ସରକାର ଗୁରୁବାର ଘୋଷଣା କରିଛନ୍ତି ।

ଏମାନଙ୍କ ମଧ୍ୟରେ ଆଠ ଜଣ ମାଓବାଦୀ ଥିବା ବେଳେ ସେମାନଙ୍କ ମଧ୍ୟରୁ ଦୁଇ ଜଣ ଆନ୍ଧ୍ରପ୍ରଶେ ଏବଂ ଛଅ ଜଣ ଓଡ଼ିଶାର ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଧାନସଭାରେ କହିଛନ୍ତି ।

ବିଧାୟକ ଝିନ୍ନ ହିକକାଙ୍କ ପାଇଁ ଚାଷୀମୂଲିଆ ଆଦିବାସୀ ସଂଘର ୧୫ ଜଣ ଓ ଆଠ ଜଣ ମାଓବାଦୀଙ୍କୁ ସରକାର ଜେଲରୁ ଖଲାସ କରିବେ ।

ବିଧାୟକଙ୍କ ମୁକ୍ତି ପାଇଁ ଖଲାସ ହେବାକୁ ଥିବା ବନ୍ଦୀଙ୍କ ମଧ୍ୟରୁ ଆଠ ଜଣ ମାଓବାଦୀ ହେଲେ ନର୍ସି କେନ୍ଦୁ୍ରକା, ଜୋରୁକା କେନ୍ଦ୍ରୁକା, ବେ ମାଢି, ଗଙ୍ଗା ସୋଡ଼ି, ଭୀମା ପଡ଼ିଆମି, ମଙ୍ଗରାଜ ରୁଆ, ମାଓ ମ୍ପତି ନୁର୍ଲା ନିଲମ ରେଡ୍ଡୀ ଓ ସେତୁ ପାଙ୍ଗି ।

ଚାଷୀ ମୂଲିଆ ଆଦିବାସୀ ସଂଘର ୧୫ ଜଣ ସଦସ୍ୟ ହେଲେ ରୁପୁନି ସିରିକା, ମିନିଆକା ସାନ୍ଦଲ, ମିନିଆକା ଜାମା, ସଉରା କାର୍ତାସିଆ, ନାଚିକା ସୁବା, ସ୍ୱାକୋ ଦିବା, ରବି ତାଡ଼ିଙ୍ଗି, ଧନ ହନ୍ତାଲ, ଦୋରା ହନ୍ତାଲ, ରମେଶ ନାଚିକା, ହୁଲୁକୁ କେଶବ, ଇନା ତାଡ଼ିଙ୍ଗି, ରୂପନା ହୁଲୁକା, ଅର୍ଗୁ ସିରିକା ଓ ବିଜୟ ତାଡ଼ିଙ୍ଗି ।

ସେହିପରି ଆରତୀ ମାଝି, ଶୁକ ନାଚିକା, ଚକ୍ର ତାଡ଼ିଙ୍ଗି ଏବଂ ମାଓନେତା ସବ୍ୟସାଚୀ ପଣ୍ଡାଙ୍କ ପତ୍ନୀ ସୁଭଶ୍ରୀ ଦାସ(ମିଲି ପଣ୍ଡା)ଙ୍କୁ ବିଦେଶୀ ପର୍ଯ୍ୟଟକ ପାଓଲୋ ବାସୁସ୍କୋଙ୍କ ମୁକ୍ତି ପାଇଁ ଖଲାସ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।

ଘୋଷଣା ଅନୁଯାୟୀ ରାଜ୍ୟ ସରକାର ସଂପୃକ୍ତ ବନ୍ଦୀଙ୍କ ମୁକ୍ତି ପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ
କରିବେ, ସେ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ମାଲକାନଗିରି, ଅପ୍ରେଲ ୪(ଓଡ଼ିଶା ଡ଼ଟ୍ କମ୍) ମାଲକାନଗିରି ଜିଲ୍ଲାରେ ବୁଧବାର ଜଣେ ମାଓବାଦୀ କମାଣ୍ଡର ଆତ୍ମସମର୍ପଣ କରିଥିବା ପୋଲିସ କହିଛି ।

ବିଭିନ୍ନ ହିଂସାକାଣ୍ଡରେ ସଂପୃକ୍ତ ମାଓ କମାଣ୍ଡର ସନ୍ୟାସୀ ପୂଜାରୀ ଜିଲ୍ଲା ପୋଲିସ ମୁଖ୍ୟଙ୍କ ନିକଟରେ ଆତ୍ମସମର୍ପଣ କରିଥିବା ବେଳେ ଗତ ୧୧ ବର୍ଷ ଧରି ସେ ପପ୍ଲୁର ଲମ୍ ରେ କାମ କରୁଥିବା ପୋଲିସ କହିଛି ।

କାଳିମେଳା ଥାନା ଆକ୍ରମଣ ସମେତ ଅନ୍ୟ ଘଟଣାରେ ମଧ୍ୟ ସେ ସଂପୃକ୍ତ ଥିବା ଜଣେ ବରିଷ୍ଠ ଅଧିକାରୀ କହିଛନ୍ତି । ଆନ୍ଧ୍ର ମାଓବାଦୀଙ୍କ ନିର୍ଯ୍ୟାତନା ସହିନପାରି ସେ ସମାଜର ମୁଖ୍ୟ ସ୍ରୋତରେ ସାମିଲ ହେବା ପାଇଁ ଆତ୍ମସମର୍ପଣ କରିଥିବା ପୋଲିସ କହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୩(ଓଡ଼ିଶା ଡ଼ଟ୍ କମ୍) ମାଓବାଦୀଙ୍କ ଅପହରଣକୁ ଦୃଷ୍ଟିରେ ରଖି କୋରାପୁଟ ଜିଲ୍ଲାକୁ ବିଦେଶୀ ପର୍ଯ୍ୟଟକଙ୍କ ଗସ୍ତ ଉପରେ ଜିଲ୍ଲା ପ୍ରଶାସନ କଟକଣା ଜାରି କରିଛନ୍ତି ।

ଦୁଇ ବିଦେଶୀ ପର୍ଯ୍ୟଟକ ଏବଂ ବିଧାୟକଙ୍କ ଅପହରଣ ପରେ ଜିଲ୍ଲାପାଳ ଏ ସଂପର୍କରେ ନିର୍ଦ୍ଦେଶନାମା ଜାରି କରି ସମସ୍ତ ଟୁର୍ ଅପରେଟରଙ୍କୁ ପତ୍ର ଦ୍ୱାରାଜଣାଇଛନ୍ତି ବୋଲି ଜଣେ ଅଧିକାରୀ ମଙ୍ଗଳବାର କହିଛନ୍ତି ।

ପର୍ଯ୍ୟଟକଙ୍କ ସୁରକ୍ଷା ଦୃଷ୍ଟିରୁ ପ୍ରଶାସନ ପକ୍ଷରୁ ଏଭଳି ନିଷ୍ପତି ନିଆଯାଇଛି ଏବଂ ଏହି ସମୟ ମଧ୍ୟ କୌଣସି ପର୍ଯ୍ୟଟକଙ୍କୁ ଆସିବା ପାଇଁ ଅନୁମତି ଦିଆଯିବ ନାହିଁ ବୋଲି କୁହାଯାଇଛି ।

ଗତ ଶନିବାର ରାୟଗଡ଼ା ଜିଲ୍ଲା ପ୍ରଶାସନ ପକ୍ଷରୁ ମଧ୍ୟ ଜିଲ୍ଲାକୁ ବିଶେୀ ପର୍ଯ୍ୟଟକଙ୍କ ଗସ୍ତ ଉପରେ କଟକଣା ଜାରି କରାଯାଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୩(ଓଡ଼ିଶା ଡ଼ଟ୍ କମ୍) ଇଟାଲୀୟ ପର୍ଯ୍ୟଟକଙ୍କ ମୁକ୍ତି ପାଇଁ ସରକାର ରାଜନୈତିକ ବନ୍ଦୀଙ୍କୁ ଖଲାସ କରିବା ସମ୍ପର୍କରେ ଘୋଷଣା ନକରି ଟାଳଟୁଳ ନୀତି ଅବଲମ୍ବନ କରୁଛନ୍ତି ବୋଲି ଉଲ୍ଲେଖ କରି ମାଓବାଦୀଙ୍କ ପକ୍ଷରୁ ଏକ ଧମକପୂର୍ଣ୍ଣ ଟେପ୍ ଜାରି କରାଯାଇଛି ।

ସିପିଆଇ ମାଓବାଦୀ ସଂଗଠନର ସମ୍ପାଦକ ସୁନୀଲ ଓରଫ ସବ୍ୟସାଚୀ ପଣ୍ଡା ଏନେଇ କଠୋର ପଦକ୍ଷେପ ନେବା ପାଇଁ ଏଥିରେ ଧମକ ଦେଇଛନ୍ତି ।

ସରକାରଙ୍କ ପକ୍ଷରୁ ଲିଖିତ ବୁଝାମଣାପତ୍ର ପ୍ରଦାନ କରାନଯିବା ପର୍ଯ୍ୟନ୍ତ ପାଓଲୋଙ୍କୁ ମୁକ୍ତ କରିବାର ପ୍ରଶ୍ନ ଉଠୁନାହିଁ ବୋଲି କୁହାଯାଇଛି ।

ମାଓବାଦୀଙ୍କ ବିରୋଧରେ ସରକାର ଆକ୍ରମଣାତ୍ମକ ପଦକ୍ଷେପ ଗ୍ରହଣ ପାଇଁ ଯୋଜନା କରୁଛନ୍ତି । ତେବେ ଏହାର ପରିଣାମ ଭୟଙ୍କର ହେବ ଓ ଏଥିପାଇଁ ସରକାର ଦ।ୟୀ ରହିବେ ବୋଲି ପଣ୍ଡା କହିଛନ୍ତି |

ଗଣନାଥ ପାତ୍ର ଓ ତାଙ୍କ ପତ୍ନୀ ଶୁଭଶ୍ରୀ ଓରଫ ମିଲି ପଣ୍ଡାଙ୍କ ସମେତ କେତେକ ରାଜନୈତିକ ବନ୍ଦୀଙ୍କୁ ମୁକ୍ତି, ଅଦାଲତରୁ ଜାମିନ ମିଳିବା ନେତାଙ୍କୁ ଅଟକ ରଖି ପୁଣି ମିଥ୍ୟା ମାମଲାରେ ସେମାନଙ୍କୁ ସଂପୃକ୍ତ ନକରି ସରକାର ଖଲାସ କରିବା ଆବଶ୍ୟକ ବୋଲି ସେ ପୁଣି କହିଛନ୍ତି ।

ତେବେ ମାଓବାଦୀଙ୍କ ଦ୍ୱାରାନିଯୁକ୍ତ ମଧ୍ୟସ୍ଥି ଦଣ୍ଡପାଣି ମହାନ୍ତିଙ୍କ ସହ ସରକାର ସୋମବାର ରାତିରେ ପୁଣି ଆଲୋଚନା ଆରମ୍ଭ କରିଛନ୍ତି ।

ଗତ ୧୪ ତାରିଖରେ କନ୍ଧମାଳ ଜିଲ୍ଲାରୁ ମାଓବାଦୀମାନେ ଦୁଇ ଇଟାଲୀୟ ପର୍ଯ୍ୟଟକ ୫୪ ବର୍ଷ ବୟସ୍କ ବାସୁସ୍କୋ ପାଓଲୋ ଓ ୬୧ ବର୍ଷ ବୟସ୍କ କ୍ଲାଉଡ଼ିଓ କୋଲାଞ୍ଜେଲୋଙ୍କୁ ଅପହରଣ କରିନେଇଥିଲେ ।

ତେବେ ଅପହରଣ ଦୀର୍ଘ ୧୧ଦିନ ପରେ ଗତ ୨୫ ତାରିଖରେ କନ୍ଧମାଳ ଜିଲ୍ଲାର ଏକ ସ୍ଥାନରେ ମାଓବାଦୀମାନେ କ୍ଲାଉଡ଼ିଓ କୋଲାଞ୍ଜେଲୋଙ୍କୁ କେତେକ ଗଣମାଧ୍ୟମ ପ୍ରତିନିଧିଙ୍କୁ ହସ୍ତାନ୍ତର କରିଥିଲେ ।

ଓଡ଼ିଶା ଡ଼ଟ୍ କମ୍