ମାଲକାନଗିରି

ଓଡିଶା ଡଟ କମ ସଂବାଦ ଦାତା

ମାଲକାନଗିରି, ଅଗଷ୍ଟ ୨୬ (ଓଡିଶା ଡଟ କମ) ମାଲକାନଗିରି ଜିଲ୍ଲା ବିଚ୍ଛିନ୍ନାଞ୍ଚଳ ଚିତ୍ରକୋଣ୍ଡା ଯାନବାଇ ଘାଟି ନିକଟରେ ମାଓଙ୍କ ଦ୍ଵାରା ଖଞ୍ଜା ଯାଇଥିବା ଲ୍ୟାଣ୍ଡମାଇନ ବିସ୍ଫୋରଣରେ ତିନ ଜଣ ଯବାନଙ୍କ ସମେତ ଚାରି ଜଣଙ୍କ ମୃତ୍ୟୁ ହୋଇଥିବା ବେଳେ ଛଅ ଜଣ ଯବାନ ଗୁରୁତର ଭାବେ ଆହତ ହୋଇଥିବା ପୁଲିସ କହିଛି ।

ବିଏସଏଫ ଯବାନ ମାନେ ମାଓ ବିରୋଧୀ ଅଭିଯାନ ଚଳାଇଥିବା ବେଳେ ଏହି ବିସ୍ଫୋରଣ ଘଟିଥିବା ରାଜ୍ୟ ପୁଲିସ ମୁଖ୍ୟ ସଂଜୀବ ମାରିକ ଓଡିଶା ଡଟ କମକୁ କହିଛନ୍ତି ।

ମୃତ ଯବାନଙ୍କ ମଧ୍ୟରେ ଜଣେ ଏଏସଆଇ, ଜଣେ ହାବିଲଦାର ଓ ଜଣେ କନେଷ୍ଟବଳ ରହିଛନ୍ତି । ଆହତ ହୋଇଥିବା ଯବାନମାନଙ୍କୁ ମାଲକାନଗିରି ମୁଖ୍ୟ ଚିକିତ୍ସାଳୟରେ  ଭର୍ତ୍ତି କରାଯାଇ ଚିକିତ୍ସା କରାଯାଉଛି । ବିସ୍ଫୋରଣ ପରେ ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯିବା ସହ ବ୍ୟାପକ ଖାନ ତଲାସ କରାଯାଉଛି ।

ଓଡିଶା ଡଟ୍ କମ୍

ଓଡିଶା ଡଟ୍କମ୍ ସମ୍ବାଦଦାତା

ଭୁବନେଶ୍ୱର, ଫେବୃଆରୀ ୧(ଓଡିଶା ଡଟ୍ କମ୍)- ରାଜ୍ୟ ସରକାର ମାଲକାନଗିରି ଜିଲ୍ଲାର ୭ଟି ବ୍ଲକକୁ ପୁନର୍ଗଠିତ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ପ୍ରସ୍ତାବ ଅନୁମୋଦନ ହେଲାପରେ ମୁଖ୍ୟ ଶାସନ ସଚିବ ବିଜୟ କୁମାର ପଟ୍ଟନାୟକ ଏ ସଂପର୍କରେ ସୂଚନା ଦେଇଛନ୍ତି ।

ସେ କହିଛନ୍ତି ମାଲକାନଗିରି ଜିଲ୍ଲାରେ ବହୁ ବିଛିନ୍ନାଞ୍ଚଳ ରହିଛି । ବ୍ଲକ ମୁଖ୍ୟାଳୟକୁ ଆସିବା ପାଇଁ ଲୋକଙ୍କୁ ଆନ୍ଦ୍ରପ୍ରଦେଶ ଯିବାକୁ ପଡୁଛି । ଗୋଟିଏ ଗୋଟିଏ ବ୍ଲକକୁ ଆସିବା ନିମନ୍ତେ ୨/୩ ଦିନ ସମୟ ଲାଗୁଛି । ଏହାକୁ ଦୃଷ୍ଟିରେ ରଖି ସରକାର ଏହି ପୁନର୍ଗଠନ କରିଛନ୍ତି ।

କୁଡୁମୁଲୁଗୁମା ବ୍ଲକ ପୁନର୍ଗଠନରେ ଚିତ୍ରକୋଣ୍ଡା ବ୍ଲକ ସୃଷ୍ଟି କରାଯାଇଛି । ଫଳରେ ବିଶେଷ ଅସୁବିଧା ଭୋଗୁଥିବା କୁଡୁମ୍ଲୁଗୁମା ବ୍ଲକର ୬ଟି ପଞ୍ଚାୟତର ଲୋକେ ଏଣିକି ଚିତ୍ରକୋଣ୍ଡାକୁ ଶୀଘ୍ର ଆସିପାରିବେ ।

ମୁଖ୍ୟ ଶାସନ ସଚିବ କହିଛନ୍ତି ଯେ,ମାଲକାନଗିରି ବ୍ଲକରେ ବର୍ତମାନ ୧୩ଟି ଗ୍ରାମ ପଞ୍ଚାୟତ ରହିଥିବାବେଳେ ପୁନର୍ଗଠନରେ ୧୯ଟି ଗ୍ରାମ ପଞ୍ଚାୟତ ରହିବ । ପଡିଆ ବ୍ଲକରେ ୧୦ଟି ପଞ୍ଚାୟତ ରହିଥିବାବେଳେ ୮ଟି ପଞ୍ଚାୟତ ରହିବ ।

ଖଇରପୁର ବ୍ଲକରେ ୯ଟି ପଞ୍ଚାୟତ ବଦଳରେ ୧୧ଟି ପଞ୍ଚାୟତ ରହିବାବେଳେ କୋରକୁଣ୍ଡା ବ୍ଲକରେ ୨୪ ପଞ୍ଚାୟତ ବଦଳରେ ୧୨ଟି ପଞ୍ଚାୟତ ରହିବ ।

ସେହିପରି କାଲିମେଳା ବ୍ଲକରେ ୨୧ଟି ପଞ୍ଚାୟତ ବଦଳରେ ୨୩ ପଞ୍ଚାୟତ ରହିଥିବାବେଳେ ମାଥିଲି ବ୍ଲକରେ ଯେଉଁ ୨୦ଟି ପଞ୍ଚାୟତ ରହିଛି ସେତିକି ପଞ୍ଚାୟତ ରହିବ । ତେବେ ୧୧ଟି ପଞ୍ଚାୟତ କୁ ନେଇ ଗଠିତ କୁଡୁମୁଲୁଗୁମା ବ୍ଲକ ପୁନର୍ଗଠନରେ ୧୫ଟି ପଞ୍ଚାୟତ ରହିବ ।

ଏହି ବ୍ଲକର ନାମ କୁଡୁମୁଲୁଗୁମା ପରିବର୍ତେ ଚିତ୍ରକୋଣ୍ଡା ହେବ । ବ୍ଲକ ମୁଖ୍ୟାଳୟ ଚିତ୍ରକୋଣ୍ଡା ହିଁ ରହିବ ବୋଲି କ୍ୟାବିନେଟ ବୈଠକରେ ଏହି ପ୍ରସ୍ତାବ ଅନୁମୋଦନ ହୋଇଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ମାଲକାନଗିରି, ଜାନୁଆରୀ ୩୧(ଓଡିଶା ଡଟ୍ କମ୍)-ମାଲକାନଗିରି ସଦର ମହକୁମା ସ୍ଥିତ ମୁଖ୍ୟ କାରାଗାରରେ ପ୍ରାୟ ୨୯ ଜଣ କଏଦୀ ଅନଶନରେ ବସିଛନ୍ତି । ଏମାନଙ୍କ ନାମରେ ନକ୍ସଲ କାର୍ଯ୍ୟକଳାପରେ ଲିପ୍ତ ଥିବା ଅଭିଯୋଗ ଉପରେ କେସ ମାନ ରହିଛି ।

କଏଦୀମାନେ ଆମରଣ ଅନଶନ କରିଥିବା ଯୋଗୁଁ ଜେଲ୍ କତୃପକ୍ଷ ଓ ଜିଲ୍ଲା ପ୍ରଶାସନର ମୁଣ୍ଡବ୍ୟଥାର କାରଣ ପାଲଟିଛି ।

ଜିଲ୍ଲାପାଳ ଅତିରିକ୍ତ ଦଦାୟିତ୍ୱ ଥିବା ପିଡିଆରଡିଏ ବିଶ୍ୱମୋହନ ରାୟ ଜେଲ ମଧ୍ୟକୁ ଯାଇ ଜେଲ କଏଦୀମାନଙ୍କୁ ବୁଝାଇଥିଲେ ମଧ୍ୟ କଏଦୀମାନେ ଅନଶନ ଜାରି ରଖିଛନ୍ତି ବୋଲି ଶ୍ରୀ ରାୟ ପ୍ରକାଶ କରିଛନ୍ତି । ୪ ଦଫା ଦାବି ନେଇ ଏହି କଏଦୀମାନେ ଅନଶନ ଚଳାଇଛନ୍ତି ।

ସେଗୁଡିକ ହେଲା ମିଥ୍ୟା ନକ୍ସଲ କେଶ୍ ଗୁଡିକ ପ୍ରତ୍ୟାହାର କରାଯାଉ । ନିଜ ପରିବାର ବର୍ଗଙ୍କୁ ମିଶିବା ପାଇଁ ଅନୁମତି ପ୍ରଦାନ କରାଯାଉ । ଜେଲରେ ଫୋନ୍ ବ୍ୟବସ୍ଥା କରିବା ଏବଂ ଗୋଟିଏ ମୋକଦ୍ଧମାର ଫଇସଲା ହୋଇଗଲା ପରେ ଆଉ ଗୋଟିଏ ମିଥ୍ୟା କେଶ୍ ଯୋଡା ଯାଉଛି ତାହା ପୋଲିସ ପକ୍ଷରୁ ନକରାଯାଉ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ମାଲକାନାଗିରି ୭(ଓଡ଼ିଶା ଡ଼ଟ୍ କମ୍) -ମାଲକାନଗିରି ଜିଲା ସୀମାନ୍ତବର୍ତୀ ଛତିଶଗଡ଼ ବିଜାପୁରଠାରେ ୨ମହିଳା ସମେତ ୫ଜଣ ମାଓବାଦୀଏସପି ପ୍ରଶାନ୍ତ ଅଗ୍ରୱାଲଙ୍କ ନିକଟରେ ଆତ୍ମସମର୍ପଣ କରିଛନ୍ତି ।

ତେବେ ମାଓ ସଂଗଠନର ବରିଷ୍ଠ ନେତାମାନେ କ୍ୟାଡର ନକ୍ସଲଙ୍କୁ ନିର୍ଯାତନା ଦେବାରୁ ସେମାନେ ସଂଗଠନ ଛାଡ଼ି ସମାଜର ମୁଖ୍ୟସ୍ରୋତରେ ସାମିଲ ହୋଇଥିବା କହିଛନ୍ତି । ଓଡ଼ିଶା ଓ ଛତିଶଗଡ଼ର ବହୁ ନକ୍ସଲ ହିଂସାରେ ଏମାନେ ଜଡ଼ିତ ଥିବାବେଳେ ସୁକୁମା ଜିଲାପାଳ ଆଲେକ୍ସ ପୋଲ ମେନନ ଅପହରଣର ମୁଖ୍ୟ ଥିଲେ ।

ସେମାନେ ହେଲେ ପିପୁଲ୍ସ ଲିବେରେସନ ଗରିଲା ଆର୍ମି(ପିଏଲଜିଏ)ର କମାଣ୍ଡର ପୁନମ ସୋନି ଓ ସୁବାସ ମାଲାଭି, ପାକୁଲ ରାମା, ମୁନି ତାଟି ଓ ଚିଟି ତାଟି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୫ (ଓଡ଼ିଶା ଡ଼ଟ୍ କମ୍) –ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି କୋରାପୁଟ ଜିଲ୍ଲା ଗସ୍ତରେ ଅନେକ ଉନ୍ନୟନ ମୂଳକ କାର୍ଯ୍ୟକ୍ରମର ଶୁଭାରମ୍ଭ କରିବା ସହିତ ପଶୁଧନ ବିକାଶ ପ୍ରକଳ୍ପର ଉଦଘାଟନ କରିଛନ୍ତି ।

ଏହି ପ୍ରକଳ୍ପରେ ଉନ୍ନତ ମାନର ଶଙ୍କର ଜାତୀୟ ଗୋଧନର ବିକାଶ ପାଇଁ ପଦକ୍ଷେପ ନିଆଯିବ ।

କୋରାପୁଟର ଓଏସଏପି ପଡିଆ ଠାରେ ଏହି ପ୍ରକଳ୍ପ ଉଦଘାଟନ କରି ମୁଖ୍ୟମନ୍ତ୍ରୀ ପଟ୍ଟନାୟକ କହିଛନ୍ତି ଯେ ଏହି ପ୍ରକଳ୍ପରେ ରାଜ୍ୟର ୧୩ଟି ଜିଲ୍ଲାରେ ଜେକେ ଟ୍ରଷ୍ଟ ସହଯୋଗରେ ୬୨୦ ଟି ସମନ୍ୱିତ ପଶୁଧନ ବିକାଶ କେନ୍ଦ୍ର (ଇ ଗ୍ରେଟେଡ ଲାଇଭଷ୍ଟକ ଡେଭଲପମେଟ ସେନଟର ) ଖୋଲାଯିବ ।

ଏହି ଯୋଜନାରେ ୫ ବର୍ଷରେ ୫ ହଜାର ଗାଁ ର ୩ ଲକ୍ଷ ପରିବାରକୁ ଡାଇରି ଡେଭଲପମେନଟ କାର୍ଯ୍ୟକ୍ରମରେ ସାମିଲ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ଏଥିରେ ଜିଲ୍ଲାର ଶିକ୍ଷିତ ଯୁବକ ମାନଙ୍କୁ ଲାଇଭଷ୍ଟକ କେନ୍ଦ୍ର ଗୁଡିକରେ “ଗୋପାଳ’ ଭାବରେ ନିଯୁକ୍ତି ଦିଆଯିବା ସହତି ଜିଲ୍ଲାର ପ୍ରତ୍ୟେକ ପଞ୍ଚାୟତରେ ଜଣେ ଜଣେ ଲାଇଭଷ୍ଟକ ଇନସପେକ୍ଟର ରଖାଯିବ ବୋଲି ସେ କହିଥିଲେ ।

ପ୍ରକଳ୍ପ ଦଦ୍ୱାରାଦୁଗ୍ଧ ଉପ୍ତାଦନ ବୃଦ୍ଧି ପାଇବା ସହିତ କାର୍ଯ୍ୟକ୍ରମରେ ସଂଶ୍ଲିଷ୍ଟ ପରିବାର ଗୁଡିକର ରୋଜଗାର ବୃଦ୍ଧି ପାଇବ ବୋଲି ମୁଖ୍ୟମନ୍ତ୍ରୀ କହିଥିଲେ ।

ରାଜ୍ୟର କୃଷକ ମାନଙ୍କୁ ଚାଷ ସହିତ ଗୋପାଳନ, କୁକୁଡା ଚାଷ, ମାଛ ଚାଷ ଆଦି କାର୍ଯ୍ୟକ୍ରମରେ ସାମିଲ କରି ସେମାନଙ୍କର ଆର୍ଥିକ ଅଭିବୃଦ୍ଧି କରିବା ସରକାରଙ୍କ ଲକ୍ଷ ବୋଲି ମୁଖ୍ୟମନ୍ତ୍ରୀ କହିଥିଲେ ।

ପଶୁସଂପଦର ସ୍ୱାସ୍ଥ୍ୟ ରକ୍ଷା ପାଇଁ ରାଜ୍ୟର ଆଦିବାସି ଜିଲ୍ଲା ଗୁଡିକରେ ୧୦୫ ଟି ଭେଟେରୀନାରୀ ଭ୍ରାମ୍ୟମାଣ ସ୍ୱାସ୍ଥ୍ୟ କେନ୍ଦ୍ର କାମ କରୁଛି । ସେଥିରୁ କେବଳ ୮୦ ଟି କେବିକେ ଜିଲ୍ଲାରେ କାମ କରୁଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ଏହି ଅବସରରେ ମୁଖ୍ୟମନ୍ତ୍ରୀ ରାଜ୍ୟ ସରକାରଙ୍କ ବିଭିନ୍ନ ବିକାଶ ଓ କଲ୍ୟାଣ ମୁଳକ ଉପରେ ମଧ୍ୟ ଆଲୋକପାତ କରିଥିଲେ ।

କୋରାପୁଟରେ ମୁଖ୍ୟମନ୍ତ୍ରୀ “ସାକ୍ଷର ଭାରତ କାର୍ଯ୍ୟକ୍ରମ” ଏବଂ “ନିଧି ମଉସା” ସ୍ୱାସ୍ଥ୍ୟ ସଚେତନତା କାର୍ଯ୍ୟକ୍ରମରେ ମଧ୍ୟ ଯୋଗଦେଇଥିଲେ ।

ଏହି କାର୍ଯ୍ୟକ୍ରମରେ ମନ୍ତ୍ରୀ ଦେବୀ ପ୍ରସାଦ ମିଶ୍ର, ରମେଶ ମାଝୀ, ରବି ନାରାୟଣ ନନ୍ଦ, ସାଂସଦ ଜୟରାମ ପାଂଗୀ ଏବଂ ବିଧାୟକ ମାନେ ଯୋଗ ଦେଇଥିଲେ । ପ୍ରବଳ ବର୍ଷା ଯୋଗୁ ମୁଖ୍ୟମନ୍ତ୍ରୀଙ୍କ ମାଲକାନଗିରି ଜିଲ୍ଲା ଗସ୍ତ ବାତିଲ କରାଯାଇଛି ।

ଓଡ଼ିଶା ଡ଼ଟ୍ କମ୍