ରାଜଧାନୀ

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର,୧୩ ଜୁନ(ଓଡିଶା ଡଟ୍ କମ୍): ରାଜଧାନୀ ଭୁବନେଶ୍ଵରରେ ଦୀର୍ଘଦିନ ଧରି ଚାଲିଆସୁଥିବା ଦୁଇଟି ବେଆଇନ ଗୁଟଖା କାରଖାନା ଉପରେ ଚଢଉ କରି ଦଶ ଲକ୍ଷରୁ ଅଧିକ ଟଙ୍କାର ନକଲି ଗୁଟଖା ଜବତ କରିବା ସହ ପଚିଶ ଜଣଙ୍କୁ ଅଟକ ରଖିଥିବା ପୋଲିସ ଶନିବାର କହିଛି ।

ଖାରବେଳନଗର ଓ ଚନ୍ଦକା ଅଞ୍ଚଳରେ ଚାଲୁଥିବା ଏହି ନକଲି ଗୁଟୁଖା କାରଖାନାଗୁଡିକ ଉପରେ ଶୁକ୍ରବାର ସନ୍ଧ୍ୟାରେ ଚଢଉ ହୋଇଥିବା ପୋଲିସ ଡେପୁଟି କମିଶନର ସତ୍ୟବ୍ରତ ଭୋଇ ଓଡିଶା ଡଟ କମ କୁ କହିଛନ୍ତି। ରାଜ୍ୟରେ ଗୁଟଖା ତିଆରି ଓ ବିକ୍ରିକୁ ସରକାର ନିଷିଦ୍ଧ କରିସାରିଛନ୍ତି ।

ଓଡିଶା ଡଟ୍ କମ୍

News Bureau

ଭୁବନେଶ୍ଵର, ମଇ ୮ (ଓଡିଶା ଡଟ କମ ) ବିଭିନ୍ନ ସ୍ଥାନରେ ଶୁକ୍ରବାର ଗ୍ରୀଷ୍ମ ପ୍ରବାହ ଜାରି ରହିଥିବା ବେଳେ ପଶ୍ଚିମ ଓଡିଶାର ଝାରସୁଗୁଡା ସହରରେ ରାଜ୍ୟର ସର୍ବାଧିକ ୪୩.୪ ଡିଗ୍ରୀ ରେକର୍ଡ କରାଯାଇଥିବା ପାଣିପାଗ ବିଭାଗ କହିଛି ।

୪୨.୯ ଡିଗ୍ରୀ ରେକର୍ଡ ହୋଇଥିବା ହୀରାକୁଦ ସହର ରାଜ୍ୟର ଦ୍ଵିତୀୟ ଉତ୍ତପ୍ତ ସ୍ଥାନ ରହିଥିବ ବେଳେ ତାହା ତଳକୁ ତାଳଚେର ସହର ରହିଛି । ସେଠାରେ ଦିନର ସର୍ବୋଚ୍ଛ ତାପମାତ୍ରା ୪୨.୮ ଡିଗ୍ରୀ ରହିଥିଲା

ଚାଳିଶ ଓ ବୟାଲିଶ ଡିଗ୍ରୀ ମଧ୍ୟରେ ତାପମାତ୍ରା ରେକର୍ଡ କରାଯାଇଥିବା ଅନ୍ୟ ସହର ଗୁଡିକ ହେଲା ସମ୍ବଲପୁର, ସୁନ୍ଦରଗଡ, ଭବାନୀପାଟଣା, ବଲାଙ୍ଗିର, ଟିଟିଲାଗଡ ଏବଂ ଅନୁଗୁଳ ।

ରାଜ୍ୟର ଗୋଟିଏ କିମ୍ବା ଦୁଇଟି ସ୍ଥାନରେ ଆଗାମୀ ଚବିଶ ଘଣ୍ଟା ମଧ୍ୟରେ ସାମାନ୍ୟ ବର୍ଷା କିମ୍ବା ଘଡ ଘଡି ସହ ବର୍ଷା ହେବାର ସମ୍ଭାବନା ଥିବା ବେଳେ ଅନ୍ୟ ସ୍ଥାନରେ ପାଗ ମୁଖ୍ୟତଃ ଶୁଖିଲା ରହିବ ବୋଲି ପାଣିପାଗ ବିଭାଗ ଅନୁମାନ କରିଛି ।

ଭୁବନେଶ୍ଵର ଏବଂ ଆଖ ପାଖରେ ପାଗ ସାମାନ୍ୟ ମେଘୁଆ ରହିବାର ସମ୍ଭାବନା ଥିବା ବେଳେ ଦିନର ସର୍ବୋଚ୍ଚ ତାପମାତ୍ରା ପ୍ରାୟ ୪୦ ଡିଗ୍ରୀ ରହିବାର ସମ୍ଭାବନା ଥିବା ଅନୁମାନ କରାଯାଇଛି ।

ଓଡିଶା ଡଟ କମ

News Bureau

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଫେବୃଆରୀ ୨(ଓଡିଶା ଡଟ୍ କମ୍)-ଏବେ ପିଆଜ ଦର ହୋଇଛି ରାଜ୍ୟରେ ୩୦ ଟଙ୍କା । ବିଗତ ତିନି ଦିନରେ ବଢିଛି ଦଶ ଟଙ୍କା । ଏବେ ଚିନ୍ତାରେ ପଡିଛନ୍ତି ଖାଉଟି ।

ରାଜଧାନୀରେ ପୁର୍ବରୁ ପିଆଜ କୁଇଣ୍ଟାଲ ପିଛା ୧୫ଶହ ଟଙ୍କା ଥିବା ବେଳେ ଖୁଚୁରାରେ କିଲୋ ପିଛା ୧୫ ରୁ ୨୦ ଟଙ୍କାରେ ବିକ୍ରୀ ହେଉଥିଲା । ହେଲେ ଏବେ କୁଇଣ୍ଟାଲ ପିଛା ୨୪ଶହରୁ ୨୫ଶହ ଟଙ୍କା ରହିଛି । ତେବେ କିଲୋ ପିଛା ବ୍ୟବସାୟୀମାନେ ୩୦ ଟଙ୍କାରେ ବିକ୍ରୀ କରିବାକୁ ବାଧ୍ୟ ହେଉଛନ୍ତି ।

ବ୍ୟବସାୟୀ ନିରଞ୍ଜନ ସାହୁ କହିଛନ୍ତି ଯେ ମୌସୁମୀ ଖରାପ ଯୋଗୁଁ ପିଆଜ ରପ୍ତାନି କମ ଅଛି । ତେଣୁ ପିଆଜ ଦର ହୁ ହୁ ହୋଇ ବଢି ଚାଲିଛି । ପନ୍ଦରଦିନ ହେଲାଣି ଟଙ୍କେ ଆଠଣା ବଢୁଥିଲା ଏବେ ତିନି ଦିନ ହେଲା ଦଶଟଙ୍କା ବଢି ଯାଇଛି ।

ପିଆଜ ପାଇଁ ଆମ ରାଜ୍ୟ ନାସିକ, ବେଙ୍ଗଲୁର ଆଦି ରାଜ୍ୟ ଉପରେ ନିର୍ଭର କରେ । ଚଳିତ ବର୍ଷ ଏହି ରାଜ୍ୟରେ ପିଆଜ ଉତ୍ପାଦନ କମ୍ ହୋଇଛି । ତେଣୁ ଓଡିଶାକୁ ଯେତିକି ପରିମାଣରେ ପିଆଜ ଆସିବା କଥା ଆସି ପାରୁନାହିଁ ।

ଯେଉଁ ସବୁ ଗୋଦାମ ମାଲିକ ପିଆଜ ଗଛିତ ରଖିଛନ୍ତି ସେମାନେ ତାହାକୁ ଚଢା ଦରରେ ବିକ୍ରୀ କରୁଛନ୍ତି । ନୂଆ ପିଆଜ ବଜାରକୁ ଆସିଲେ ପିଆଜ ଦର କମିବ ବୋଲି ବ୍ୟବସାୟୀ ସଂଘ କହିଛି ।

ବ୍ୟବସାୟୀମାନେ ଯେପରି ଚଢା ଦରରେ ପିଆଜ ବିକ୍ରୀ ନକରିବେ ସେଥିପାଇଁ ତାଗିଦ୍ କରିଦେଇଛନ୍ତି ରାଜ୍ୟ ସରକାର । ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ସଚିବ ମଧୁସୂଦନ ପାଢି କହିଛନ୍ତି କମ୍ ପିଆଜ ଉତ୍ପାଦନ ଯୋଗୁଁ ଦର ବଢିଛି ।

ଓଡିଶା ଡଟ୍କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଫେବୃଆରୀ ୨(ଓଡିଶା ଡଟ୍ କମ୍)-ଶୀତ କମିଲା ବଢିଲା କୁହୁଡି । କୁହୁଡି ଯୋଗୁଁ କଲବଲ ହେଉଛନ୍ତି ଉପକୂଳ ବାସୀ । ରାଜଧାନୀର ଜନଜୀବନ ଅସ୍ତବ୍ୟସ୍ତ ହୋଇ ପଡିଛି । ରାଜ୍ୟର ଅଧିକାଂଶ ଅଞ୍ଚଳରେ ସକାଳ ୯ଟା ପର୍ଯ୍ୟନ୍ତ କୁହୁଡି କମୁନାହିଁ ।

କୁହୁଡି ଯୋଗୁଁ ଭୁବନେଶ୍ୱରରେ ଜୀବନ ଯାତ୍ରା ପ୍ରଭାବିତ ହୋଇଛି । ବିମାନସେବାରେ ମଧ୍ୟ ବାଧା ଉପୁଜିଛି । ଗତ ଦୁଇ ଦିନ ହେଲାଣି ରାଜ୍ୟର ଉପକୁଳ ଅଞ୍ଚଳର ସକାଳ କୁହୁଡିରେ ଆଛାଦିତ ହୋଇ ରହୁଛି । ଆଭ୍ୟନ୍ତରିଣ ଜିଲ୍ଲାରେ କୁହୁଡି ରହୁନି ସତ ଶୀତର ପ୍ରକୋପ ଏପର୍ଯ୍ୟନ୍ତ କମି ନାହିଁ ।

ଫୁଲବାଣୀ ଓ ସୁନ୍ଦରଗଡ଼ ଜିଲାକୁ ଛାଡ଼ିଦେଲେ ରାଜ୍ୟର ଅନ୍ୟ ସମସ୍ତ ଜିଲାରେ ସର୍ବନିମ୍ନ ତାପମାତ୍ରା ୧୦ଡ଼ିଗ୍ରୀ ସେଲସିୟସ ଉପରେ ରହିଛି । ଫୁଲବାଣୀରେ ରାତିର ସର୍ବନିମ୍ନ ତାପମାତ୍ରା ୬ଡ଼ିଗ୍ରୀ ଥିବାବେଳେ ଏହାର ଆଖପାଖ ଅଞ୍ଚଳରେ ସର୍ବନିମ୍ନ ତାପମାତ୍ରା ୫ଡ଼ିଗ୍ରୀ ତଳେ ରହିଛି ।

ତେବେ ଆସନ୍ତା ୨୪ ଘଣ୍ଟା ମଧ୍ୟରେ ଅଳ୍ପ କେତେକ ଅଞ୍ଚଳକୁ ବାଦଦେଲେ ରାଜ୍ୟର ବାକି ଅଞ୍ଚଳରେ ଶୀତ ପ୍ରକୋପ କମିବ । ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ଘନ କୁହୁଡ଼ି ଦେଖାଦେବ ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ସୂତ୍ରରୁ ଜଣାପଡ଼ିଛି ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୫(ଓଡିଶା ଡଟ୍ କମ୍ )- ବସ୍ତିର ପିଲାମାନଙ୍କୁ ନୈତିକ ଶିକ୍ଷା ପ୍ରଦାନ ତଥା ସେମାନଙ୍କ ସୁସ୍ଥ ଓ ସୁରକ୍ଷିତ ବାତାବରଣ ସହ ସାଂସ୍କୃତିକ ସଦଭାବନାର ବିକାଶ ଲାଗି ସେମାନଙ୍କୁ ଶିକ୍ଷିତ କରାଇବାର ଲକ୍ଷ୍ୟ ନେଇ ହମାରା ବଚପନ୍ ପକ୍ଷରୁ ଆଜି ସ୍ଥାନୀୟ ସାଲିଆ ସାହିରେ ବଡ ଦିନ ପର୍ବ ମହା ଆନନ୍ଦର ସହ ପାଳିତ ହୋଇଯାଇଛି ।

ବସ୍ତିର ପିଲାମାନଙ୍କୁ ନେଇ ଆରମ୍ଭ କରାଯାଇଥିବା ସ୍ୱତନ୍ତ୍ର ପ୍ରତିଭା ଅନ୍ୱେଷଣ କାର୍ଯ୍ୟକ୍ରମ ଧୁଲ କେ ଫୁଲ କାର୍ଯ୍ୟକ୍ରମ ଅର୍ନ୍ତଗତ ଏହି ବଡଦିନ ପର୍ବ ବସ୍ତିରେ ପାଳନ କରାଯାଇଛି ।

ସ୍ଥାନୀୟ ସାଲିଆ ସାହିର ଜନତା ନଗର, ଏକାମ୍ର ବିହାର, ମହାବୀର ବିହାର, ଶକ୍ତି ବିହାର, ନିରଙ୍କରୀ ନଗର, ଶାନ୍ତି ନଗର, ଆଦିତ୍ୟ ନଗର, ଲକ୍ଷ୍ମି ବିହାର ଅଞ୍ଚଳର ପ୍ରାୟ ୨୦୦ରୁ ଉର୍ଦ୍ଧ୍ଵ ଶିଶୁ ତଥା ଅଭିଭାବକ ଆଜି ବଡଦିନ ପାଳନର ମଜାନେଇଥିଲେ ।

ଏହି ଅବସରରେ କେକ୍ କଟାଯିବା ସହ, ବିଭିନ୍ନ ମଜାଦାର ଖେଳ ସହିତ ଷ୍ଟୋରି ଟେଲିଙ୍ଗ ମଧ୍ୟ କରାଯାଇଥିଲା । ପେପର ମାସ୍କ ସହ ଅରିଗାମି ଓ ବିଭିନ୍ନ କୈାତୁକିଆ କ୍ରୀଡାର ଆୟୋଜନ ସହିତ ପିଲାଙ୍କୁ ଚକୋଲେଟ ବଣ୍ଟା ଯାଇଥିଲା ।

ଏହା ସହ ବଡଦିନ ସଂଗୀତ ଗାନ ସହ ପିଲାମାନେ ସଂଧ୍ୟାରେ ବିଭିନ୍ନ ସଂଗିତର ତାଳେ ତାଳେ ନୃତ୍ୟ କରିବା ସହିତ କେତେଜଣ ଛୋଟପିଲା ଅକ୍ଷୟ ମହାନ୍ତି ସଂଗୀତ ପରିବେଷଣ କରିଥିଲେ ।

ସ୍ଥାନୀୟ ସାଲିଆ ସାହିର ଷ୍ଟାର କ୍ଲବ ସହଯୋଗ କରିଥିଲେ । ପିଲାମାନଙ୍କ ମଧ୍ୟରେ ସଦଭାବନା ତଥା ଏକ୍ୟ ଭାବ ଆଣିବା ପାଇଁ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିବା କଥା ଧୁଲ କେ ଫୁଲର ମୁଖ୍ୟ ବିକ୍ରମ କେଶରୀ ନାୟକ ପ୍ରକାଶ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୦(ଓଡିଶା ଡଟ୍ କମ୍)-ବ୍ଲକ ଗ୍ରାଣ୍ଟ ଶିକ୍ଷକଙ୍କ ପରେ ସୋମବାର ଦିନ ଗଣଶିକ୍ଷକ କରିଛନ୍ତି ରାଜଧାନୀରେ ରଣହୁଙ୍କାର । ସ୍ଥାୟୀ ନିଯୁକ୍ତି ଦାବୀରେ ଆନ୍ଦୋଳନ କରିଆସୁଥିବା ଗଣ ଶିକ୍ଷକମାନେ ରାଜଧାନୀରେ ବିଶାଳ ଶୋଭାଯାତ୍ରା ସହ ବିକ୍ଷୋଭ କରିଛନ୍ତି ।

ଦାବୀ ପୁରଣ ନହେବା ପର୍ଯ୍ୟନ୍ତ ସ୍କୁଲକୁ ଫେରିବେ ନାହିଁ ବୋଲି ଧମକ ଦେଇଛନ୍ତି । ଆଲୋଚନା ମାଧ୍ୟମରେ ଦାବୀ ପୁରଣ ହେବ ବୋଲି ପ୍ରତିଶ୍ରୁତି ଦେଇଛନ୍ତି ବିଭାଗୀୟ ମନ୍ତ୍ରୀ ।

ରାଜ୍ୟ ଗଣଶିକ୍ଷକ ମହାସଂଘର ଉପସଭାପତି ଶରତ ଚନ୍ଦ୍ର ନାୟକ ଅଭିଯୋଗ କରିଛନ୍ତି ଯେ,ଗଣଶିକ୍ଷକଙ୍କୁ ସ୍ଥାୟୀ କରିବା ପାଇଁ ସରକାର ପ୍ରତିଶ୍ରୁତି ଦେଇଥିବା ବେଳେ ଏ ଯାଏଁ ତାହା ପୂରଣ ନକରି ଠକି ଚାଲିଛନ୍ତି । ଦାବୀ ପୂରଣ ନହେଲା ଯାଏ ଆନ୍ଦୋଳନ ଚାଲୁ ରହିବ ବୋଲି ସେ ପ୍ରକାଶ କରିିଛନ୍ତି ।

“ସରକାରଙ୍କ ଦାବୀ ମୂତାବକ ଆମକୁ ଗଣଶିକ୍ଷକ ନିଯୁକ୍ତିର ୩ ବର୍ଷ ଭିତରେ ନିୟମିତ ଶିକ୍ଷକ ଘୋଷଣା କରନ୍ତୁ । ଏବଂ ତାହାର ନିଦେ୍ର୍ଧଶନାମା ପ୍ରକାଶ କରନ୍ତୁ । ଯଦି ଏହା ନକରିବେ ସେତେଦିନ ପର୍ଯ୍ୟନ୍ତ ଏ ରାଜରାସ୍ତାରେ ୨୪ ଘଣ୍ଟା ବସିରହିବୁ “।

ରାଜ୍ୟ ଗଣଶିକ୍ଷକ ମହାସଂଘର ସମ୍ପାଦକ ବୁଲୁ ବେହେରା କହିଛନ୍ତି ଯେ,ସରକାର ଆମକୁ ବାରମ୍ବାର ପ୍ରତିଶ୍ରୃତି ଦେଇଛନ୍ତି , ବିଧାନସଭାରେ ଘୋଷଣା କରିଛନ୍ତି । ଏପରିକି ମୁଖ୍ୟ ଶାସନ ସଚିବ ଆମକୁ ଡାକି ଆଲୋଚନା କରି ସୁଦ୍ଧା ପ୍ରତିଶ୍ରୃତି ପାଳନ କରିନାହାଁନ୍ତି ।

ଗଣଶିକ୍ଷା ମନ୍ତ୍ରୀ ରବି ନାରାୟଣ ନନ୍ଦ ପ୍ରତିଶ୍ରୃତି ଦେଇଛନ୍ତ ଯେ ବ୍ଲକ ଗ୍ରାଣ୍ଟ ଶିକ୍ଷକଙ୍କ ଭଳି ଆଲୋଚନା ମାଧ୍ୟମରେ ସମସ୍ୟାର ସମାଧାନ କରାଯିିବ । ମୁଖ୍ୟମନ୍ତ୍ରୀ ଏ ବିଷୟରେ ସମାଧାନ କରିବା ପାଇଁ ମଧ୍ୟ ନିର୍ଦ୍ଦେଶ ମଧ୍ୟ ଦେଇଛନ୍ତି ।

ସେ କହିଲେ ଆନ୍ଦୋଳନକାରୀମାନେ ହେଉଛନ୍ତି ଆମ ପରିବାର ଲୋକ । ଅଳି କରିବାର ଅଧିକାର ସେମାନଙ୍କର ଅଛି । ସେମାନଙ୍କର ଦାବୀ ଉପରେ ଆମେ ବିଚାର କରୁଛୁ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୮(ଓଡିଶା ଡଟ୍ କମ୍)-୨୦୧୩-୧୪ଶିକ୍ଷାବର୍ଷରୁ ବ୍ଲକ ଗ୍ରାଣ୍ଟ ପରିବର୍ତେ ପ୍ରତ୍ୟକ୍ଷ ଅନୁଦାନ ବ୍ୟବସ୍ଥା ଲାଗୁ କରିବାକୁ ସରକାର ସମ୍ମତି ପ୍ରଦାନ କରିବାପରେ ଆଜିଠାରୁ କାମରେ ଯୋଗ ଦେଇଛନ୍ତି ରାଜ୍ୟ ବ୍ଲକ ଗ୍ରାଣ୍ଟ ସ୍କୁଲର ଶିକ୍ଷକ ଓ କର୍ମଚାରୀ ।

ବ୍ଲକ ଗ୍ରାଣ୍ଟ ବ୍ୟବସ୍ଥାକୁ ଉଠାଇ ପ୍ରତ୍ୟକ୍ଷ ଅନୁଦାନ ବ୍ୟବସ୍ଥା ଲାଗୁ କରିବାକୁ ସରକାର ନୀତିଗତ ନିଷ୍ପତି ନେଇଛନ୍ତି ବୋଲି ବିଧାନସଭାରେ ରାଜ୍ୟ ସ୍କୁଲ ଓ ଗଣଶିକ୍ଷା ମନ୍ତ୍ରୀ ରବିନାରାୟଣ ନନ୍ଦ ସୂଚନା ଦେଇଛନ୍ତି ।

ଏ ସଂର୍ପକରେ ମନ୍ତ୍ରୀ ଶ୍ରୀ ନନ୍ଦ ଶୁକ୍ରବାର ଦିନ ବିଧାନସଭାରେ କହିଛନ୍ତି,ଏହି ପରିପ୍ରେକ୍ଷୀରେ ଗତ ନଭେମ୍ବର ୨୩ତାରିଖରେ ହୋଇଥିବା କ୍ୟାବିନେଟ ନିଷ୍ପତିର ପୁନର୍ବିଚାର କରାଯିବାକୁ ନିଷ୍ପତି ନିଆଯାଇଛି ।

ସରକାରଙ୍କ ଏହି ନିଷ୍ପତି ଫଳରେ ରାଜ୍ୟରେ ଥିବା ୧୯୮୨ଟି ବ୍ଲକ ଗ୍ରାଣ୍ଟ ସ୍କୁଲର ୨୫ହଜାରରୁ ଅଧିକ ଶିକ୍ଷକ ଓ କର୍ମଚାରୀ ଉପକୃତ ହେବେ । ୨୦୧୩ ଫେବୃଆରୀ ମାସ ସୁଦ୍ଧା କାବିନେଟରେ ଏହି ନୂତନ ବ୍ୟବସ୍ଥାକୁ ଉପସ୍ଥାପନ କରିବା ପାଇଁ ନିଷ୍ପତି ନିଆଯାଇଛି ।

ଏହି ନୂତନ ବ୍ୟବସ୍ଥାକୁ ରୂପାୟନ କରିବା ପାଇଁ ଦୁଇ ମାସ ସମୟ ଧାର୍ଯ୍ୟ କରାଯାଇଛି । ପ୍ରଥମ ପର୍ଯ୍ୟାୟରେ ୮ବର୍ଷ ଧରି ବ୍ଲକ ଗ୍ରାଣ୍ଟ ପାଇ ଆସୁଥିବା ବିଦ୍ୟାଳୟର ଶିକ୍ଷକ କର୍ମଚାରୀମାନଙ୍କୁ ପ୍ରତ୍ୟକ୍ଷ ଅନୁଦାନ ବ୍ୟବସ୍ଥାର ପରିସରକୁ ଅଣାଯିବ । ସରକାରଙ୍କ ଏହି ଘୋଷଣାକୁ ଶିକ୍ଷକ ସଂଘ ସ୍ୱାଗତ କରିଛି ।

ସୂଚନାଯୋଗ୍ୟ, ଗତ ନଭେମ୍ବର ୨୩ତାରିଖର କ୍ୟାବିନେଟ ନିଷ୍ପତିକୁ ବିରୋଧ କରି ଶିକ୍ଷକ ସଂଘ ପକ୍ଷରୁ ଗତ୨୯ରେ ଆଇନ ଅମାନ୍ୟ ଆନ୍ଦୋଳନ କରାଯାଇଥିଲା । ଏହାସହ ୩୦ ଓ ୩୧ ତାରିଖରେ ସମସ୍ତ ବିଧାୟକଙ୍କ ସରକାରୀ ବାସଭବନ ଘେରାଉ କରାଯାଇଥିଲା । ଦାବି ପୂରଣ ପାଇଁ ଡିସେମ୍ବର ୧୦ ତାରିଖରେ ରାଜଧାନୀରେ ବିଶାଳ ସମାବେଶ କରାଯିବାକୁ ସଂଘ ନିଷ୍ପତି ନେଇଥିଲା ।

ବ୍ଲକ ଗ୍ରାଣ୍ଟ ଶିକ୍ଷକ ଓ କର୍ମଚାରୀ ସଂଘର ସଭାପତି ପ୍ରଶାନ୍ତ ମହାପାତ୍ର କହିଛନ୍ତି ଯେ ଏଥିପାଇଁ ଆମେ ସରକାରଙ୍କୁ ଧନ୍ୟବାଦ ଦେଉଛୁ । ଆଜି ଠାରୁ ସମସ୍ତ ବିଦ୍ୟାଳୟରେ ପାଠ ପଢାଇବା ସହ କାମରେ ଯୋଗଦେବା ପାଇଁ ମୁଁ ଆମର ସସସ୍ତ ଶିକ୍ଷକ ଓ କର୍ମଚାରୀଙ୍କୁ ଅନୁରୋଧ କରୁଛି । ମାଟ୍ରିକ ପରୀକ୍ଷା ଓ ଟେଷ୍ଟ ପରୀକ୍ଷା କିପରି ସଫଳ ହେବ ସେଥିପାଇଁ ଶିକ୍ଷକମାନେ ଧ୍ୟାନଦିଅନ୍ତୁ ବୋଲି ସେ ନିବେଦନ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୨୪(ଓଡିଶା ଡଟ୍ କମ୍)- ବସ୍ତିରେ ରହୁଥିବା ଶିଶୁମାନଙ୍କୁ ସୁସ୍ଥ ଓ ସୁରକ୍ଷିତ ବାତାବରଣ ପ୍ରଦାନ କରିବାର ଲକ୍ଷ୍ୟନେଇ ଦେଶବ୍ୟାପୀ ଆରମ୍ଭ ହୋଇଥିବା “ହମାରା ବଚ୍ପନ” ମୋର୍ଚ୍ଚାର ଏକ ବିଶେଷ ପ୍ରସ୍ତୁତି ଭାବରେ “ଧୁଲ୍ କେ ଫୁଲ” କାର୍ଯ୍ୟକ୍ରମ ଆଜି ସ୍ଥାନୀୟ ପ୍ରଦର୍ଶନୀ ପଡିଆ ପରିସରରେ ଅନୁଷ୍ଠିତ ହୋଇଯାଇଛି ।

“ଧୁଲ୍ କେ ଫୁଲ୍”ର ପ୍ରତିଭାମାନେ ଆଜି ରାଜ୍ୟସ୍ତରୀୟ ଏହି ସମ୍ମାନଜନକ ମଞ୍ଚରେ ନିଜ କଳାର ପ୍ରଦର୍ଶନ କରିବାର ସୁଯୋଗ ପାଇଛନ୍ତି । ସିଆଇଆଇ ଦ୍ୱାରା ଆୟୋଜିତ ହେଉଥିବା ଏଂଟ୍ରପ୍ରାଇଜ ଓଡିଶାର ଆଜିର ସଂଧ୍ୟାରେ ରାଜଧାନୀର ବିଭିନ୍ନ ବସ୍ତିର କୁନି କୁନି ପ୍ରତିଭାମାନେ ନିଜ ଲୁକ୍କାୟିତ ପ୍ରତିଭାର ପରାକାଷ୍ଠା ପ୍ରଦାନ କରିଛନ୍ତି ।

ସ୍ଥାନୀୟ ସାଲିଆ ସାହି, ନୁଆପଲ୍ଲୀ ସବର ବସ୍ତି, ନିଳକଣ୍ଠନଗର ମୁଣ୍ଡା ସାହି ତଥା ଅନ୍ୟାନ ଅଞ୍ଚଳରୁ ଆସିଥିବା ଏହି ୧୬ଜଣ ପ୍ରତିଭା ଆଜି ସଂଗୀତ ତଥା ନୃତ୍ୟରେ ପ୍ରଦର୍ଶନୀ ପଡିଆର ଉପସ୍ଥିତ ଦର୍ଶକଙ୍କୁ ବିମୋହିତ କରିଥିଲେ ।

ଏପରି ଏକ ମଞ୍ଚରେ ନୃତ୍ୟ କରିବା ଦିନେ ଶ୍ରୀନିବାସ ଓ ସସ୍ମିତା ପରି ପିଲାମାନଙ୍କ ସ୍ୱପ୍ନଥିଲା ମାତ୍ର “ଧୁଲ୍ କେ ଫୁଲ୍” ସେମାନଙ୍କ ସବୁ ସ୍ୱପ୍ନକୁ ସାକାର କରିବାର ଏକ ନୂତନ ରାହା ଦେଖାଇପାରିଛି । ଏକ ଚାହା ବିକାଳିର ପୁଅ ଶ୍ରୀନିବାସ ଓ ସାଧାରଣ କର୍ମଜିବୀ ପରିବାରୁ ଆସିଥିବା ସସ୍ମିତାଙ୍କ ଆଶା କୁ ଏକ ସଂପୁର୍ଣ୍ଣ ରୂପ ଦେଇପାରିଛି ଧୁଲ୍ କେ ଫୁଲ୍ ।

ସେହିପରି ଟିନାର ବାପା ଜଣେ ଡ୍ରାଇଭର ଭାବରେ ଟିନାକୁ ସବୁ ପ୍ରକାର ସୁଖ ଦେଇଆସିଥିବା ବେଳେ ତାହାର ସଂଗୀତର ଯାତ୍ରାକୁ ଏକ ନୂତନ ଦିଶା ଦେଖାଇପାରିଛି ଧୁଲ୍ କେ ଫୁଲ୍ । ସେହିପରି ଏକ ଖବରକାଗଜ ବିକ୍ରେତାଙ୍କ ଝିଅ ଟିନାର ଅଧୁରା ଆଶାକୁ ମଧ୍ୟ ପୁରା କରିବାର ରାହା ଦେଖାଇଛି ଧୁଲ୍ କେ ଫୁଲ୍ ।

ଏହି ଧୁଲ୍ କେ ଫୁଲ୍ ର ଯାତ୍ରାରେ ୪୫୦ ଜଣ ବିଭିନ୍ନ ବସ୍ତିର ପିଲା ସାମିଲ ହୋଇ ବିଭିନ୍ନ ପର୍ଯ୍ୟାୟରେ ଶେଷ ଫିନାଲ ଷ୍ଟେଜକୁ ୧୬ଜଣ ମନୋନିତ ହୋଇଥିଲେ । ନୃତ୍ୟ ଓ ସଂଗୀତ ଉଭୟ ବିଭାଗରେ ଉଶ୍ଚୁକତା ଦେଖାଇ ଏହି ପିଲାମାନେ ସମବେତ ଜନତାଙ୍କ ମନ ମୋହିପାରିଥିଲେ ।

ବସ୍ତିରେ ରହୁଥିବା ପିଲାମାନଙ୍କୁ ଏକ ଉପଯୁକ୍ତ ବାତାବରଣ ପ୍ରଦାନ କରି ସେମାନଙ୍କୁ ନିଜ ପ୍ରତିଭାର ବିକାଶ କରାଇବାର ଦିଗରେ ଅଗ୍ରସର କରାଇବା ଏହି ଅଭିଯାନର ଲକ୍ଷ୍ୟ । ଭୁବନେଶ୍ୱରସ୍ଥ ୟୁଥ୍ ଡେଭଲପମେଣ୍ଟ ଫାଉଣ୍ଡେସନର ଏହି ଅଭିଯାନରେ ହମାରା ବଚପନ୍ ସହ ସଆଇଆ, ଫାଇଭ ଏଲିମେଂଟସ, ଟିମ୍ ପ୍ରମୁଖ ସହଯୋଗ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟେବର ୫ (ଓଡ଼ିଶା ଡ଼ଟ୍ କମ୍) – ସମାଜର ୯୩ ବର୍ଷ ପୂର୍ତି ଅବସରରେ ରାଜ୍ୟବ୍ୟାପୀ ଅନୁଷ୍ଠିତ ହୋଇ ଯାଇଛି ‘ସଦିଚ୍ଛାମୂଳକ ଗଣଦୌଡ’ ।

ରାଜଧାନୀ ଭୁବନେଶ୍ୱରରେ କୃଷି ମନ୍ତ୍ରୀ ଦେବୀ ମିଶ୍ର, ସୂଚନା-ଲୋକସମ୍ପର୍କ ଏବଂ ଶକ୍ତିମନ୍ତ୍ରୀ ଅରୁଣ ସାହୁ, ଯୋଗ ଦେଇଥିବା ବେଳେ ଜୟପୁରରେ ମନ୍ତ୍ରୀ ରବି ନନ୍ଦ ଯୋଗଦେଇଥିଲେ ।

ବିଭିନ୍ନ ସହରରେ ସ୍ଥାନୀୟ ବିଧାୟକ, ସାଂସଦ, ନଗରପାଳ, ସ୍ୱାଧୀନତା ସଂଗ୍ରାମୀ,ଜିଲାପାଳ, ଏସପି, ଅଥବା ପ୍ରଶାସନୀକ ଅଧିକାରୀମାନଙ୍କ ଦ୍ୱାରାଦୋଡ଼ କାର୍ଯ୍ୟକ୍ରମ ଶୁଭାରମ୍ଭ କରାଯାଇଥିଲା ।

ମୋଟ ୩୨ଟି ସହର ଏବଂ କଲିକତାରେ ଅନୁଷ୍ଠିତ ଗଣଦୌଡରେ କୁନି କୁନି ପିଲାଙ୍କଠାରୁ ଆରମ୍ଭକରି ବରିଷ୍ଠ ନାଗରିକ ପର୍ଯ୍ୟନ୍ତ ଶହଶହ ସଂଖ୍ୟାରେ ସ୍ୱତଃସ୍ଫର୍ତଭାବେ ଭାଗ ନେଇଥିଲେ ।

ବିଭିନ୍ନ ସ୍କୁଲ ଓ କଲେଜର ଛାତ୍ରଛାତ୍ରୀଙ୍କଠାରୁ ଆରମ୍ଭକରି ଯୁବକ ଯୁବତୀ, ସମାଜସେବୀ, କ୍ରୀଡ଼ାବିତ, ନେତା, ଅଭିନେତା, ମନ୍ତ୍ରୀ, ଅଫିସର ଏହି ଦୋଡ଼ରେ ଭାଗ ନେଇଥିଲେ ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ କମ