ରାଷ୍ଟ୍ରପତି

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ପୁରୀ, ଜୁଲାଇ ୨୨(ଓଡ଼ିଶା ଡ଼ଟ୍ କମ୍) ଭାରତର ରାଷ୍ଟ୍ରପତି ନିର୍ବାଚନ ଫଳାଫଳ ରବିବାର ଘୋଷଣା ହୋଇଥିବା ବେଳେ ନବନିର୍ବାଚିତ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କୁ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ବାଲୁକା କଳା ମାଧ୍ୟମରେ ଶୁଭେଚ୍ଛା ଜଣାଇଛନ୍ତି ।

ଏହି ଅବସରରେ ସୁଦର୍ଶନ ରବିବାର ପୁରୀ ବେଳାଭୂମିରେ ପ୍ରଣବ ଏବଂ ରାଷ୍ଟ୍ରପତିଭବନର ଏକ ପାଞ୍ଚ ଫୁଟ ଉଚ୍ଚତା ବିଶିଷ୍ଟ କଳାକୃତି କରିଛନ୍ତି । ବେଳାଭୂମିରେ ବହୁଲୋକ ଏହି କଳାକୃତିକୁ ଦେଖିବା ସହ ନୂଆ ରାଷ୍ଟ୍ରପତିଙ୍କୁ ଶୁଭେଚ୍ଛା ଜଣାଇଛନ୍ତି ।

ଏହି କଳାକୃତି କରିବା ପାଇଁ ତାଙ୍କୁ ଚାରି ଘଣ୍ଟା ସମୟ ଲାଗିଥିବା ବେଳେ ଏଥିରେ ପ୍ରାୟ ତିନି ଟନ୍ ବାଲି ବ୍ୟବହାର କରିଥିବା ସେ କହିଛନ୍ତି ।

ବାଲୁକା କଳା ମାଧ୍ୟମରେ ମୁଁ ନବ ନିର୍ବାଚିତ ରାଷ୍ଟ୍ରପତିଙ୍କୁ ଶୁଭେଚ୍ଛା ଜଣାଇଛି ବୋଲି ସୁଦର୍ଶନ କହିଛନ୍ତି ।

ପ୍ରଣବ ଆସନ୍ତା ୨୫ ତାରିଖରେ ଦେଶର ୧୩ତମ ରାଷ୍ଟ୍ରପତି ଭାବେ ଶପଥ ଗ୍ରହଣ କରିବେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜୁଲାଇ ୧୧(ଓଡ଼ିଶା ଡ଼ଟ୍ କମ୍) ରାଷ୍ଟ୍ରପତି ନିର୍ବାଚନ ପରିପ୍ରେକ୍ଷୀରେ ୟୁପିଏ ପ୍ରାର୍ଥୀ ପ୍ରଣବ ମୁଖାର୍ଜୀ ବୁଧବାର ଓଡ଼ିଶା ଗସ୍ତରେ ଆସିଥିବା ବେଳେ “ରାଷ୍ଟ୍ରପତି ଭବନ ଏକ ଅଳିଆଗଦା ନୁହଁ” ବୋଲି ଅନ୍ୟତମ ପ୍ରାର୍ଥୀ ପି.ଏ ସାଙ୍ଗମାଙ୍କ ମନ୍ତବ୍ୟ ଉପରେ ଗଣମାଧ୍ୟମକୁ କହିଛନ୍ତି ।

ଅର୍ଥମନ୍ତ୍ରୀ ଭାବେ ବିଫଳ ହୋଇଥିବା ପ୍ରଣବଙ୍କୁ କଂଗ୍ରେସ ରାଷ୍ଟ୍ରପତି ଭବନକୁ ଫିଙ୍ଗିଦେଉଛି ବୋଲି ମଙ୍ଗଳବାର ସାମଙ୍ଗା ମନ୍ତବ୍ୟ ଦେଇଥିଲେ । ଭବିଷ୍ୟତ ନିଶ୍ଚୟ ଏହାର ବିଚାର କରିବ ବୋଲି ପ୍ରଣବ କହିଛନ୍ତି ।

ରାଷ୍ଟ୍ରପତି ଭବନ ଏକ ଅଳିଆଗଦା ନୁହେଁ ଏବଂ ଏପ୍ରକାରର ଶବ୍ଦ ବ୍ୟବହାର କରାଯିବା ଉଚିତ୍ ନୁହେଁ” ବୋଲି ସେ କହିଛନ୍ତି । ରାଷ୍ଟ୍ରପତି ନିର୍ବାଚନକୁ ଦୃଷ୍ଟିରେ ରଖି ଅର୍ଥମନ୍ତ୍ରୀ ଥିବା ବେଳେ ତିନୋଟି ରାଜ୍ୟକୁ ସ୍ୱତନ୍ତ୍ର ପ୍ୟାକେଜ ଦିଆଯାଇଥିବା ଅଭିଯୋଗକୁ ମଧ୍ୟ ସେ ଖଣ୍ଡନ କରିଛନ୍ତି ।

କେଉଁ ରାଜ୍ୟକୁ କେତେ ସ୍ୱତନ୍ତ୍ର ପ୍ୟାକେଜ ଦିଆଯାଇଛି ତାହା ସମସ୍ତଙ୍କୁ ଜଣାଅଛି । ଏହି ତଥ୍ୟ କେହି ଲୁଚାଇ ଦେଇନାହାଁନ୍ତି । କିନ୍ତୁ ରାଷ୍ଟ୍ରପତି ନିର୍ବାଚନକୁ ଦୃଷ୍ଟିରେ ରଖି ସ୍ୱତନ୍ତ୍ର ପ୍ୟାକେଜ ଦିଆଯାଇଛି ଅଭିଯୋଗ ସମୀଚିନ ନୁହେଁ ବୋଲି ସେ କହିଛନ୍ତି ।

ଦୀର୍ଘ ୩୯ ବର୍ଷର ରାଜନୈତିକ ଜୀବନ ପରେ ସେ ରାଷ୍ଟ୍ରପତି ପଦବୀ ପାଇଁ ପ୍ରତି୍ୱନ୍ଦ୍ୱିତା କରୁଛନ୍ତି । ପ୍ରତି୍ୱନ୍ଦ୍ୱିତା କରିବା ପୂର୍ବରୁ ଦଳର ସମସ୍ତ ପଦରୁ ଇସ୍ତଫା ଦେଇଛନ୍ତି । ବିଭିନ୍ନ ସରକାରୀ ପଦବୀରୁ ମଧ୍ୟ ଅନ୍ତର ହୋଇଛି, ସେ କହିଛନ୍ତି ।

ବର୍ତମାନ ମୁଁ ଜଣେ ସାଧାରଣ ମଣିଷ । ସବୁ କିଛି କହିବାର ଅଧିକାର ମୋର ରହିଛି । ୟୁପିଏର ଅଂଶୀଦାର ଦଳ ସମେତ ଅନ୍ୟ ଦଳ ଗୁଡ଼ିକ ମତେ ସମର୍ଥନ କରୁଛନ୍ତି ଏବଂ ତୃଣମୂଳ କଂଗ୍ରେସ ସମର୍ଥନ କରିବା ନେଇ ବିଚାର କରୁଛି । ନିର୍ବାଚନର ଦୁଇ ତିନିଦିନ ପୂର୍ବରୁ ତୃଣମୂଳ କଂଗ୍ରେସ ନିଷ୍ପତି ନେବ ବୋଲି ସେ କହିଛନ୍ତି ।

ପ୍ରଣବ ବିଜୁ ପଟ୍ଟନାୟକ ବିମାନ ବନ୍ଦରରେ ପହଂଚିବା ପରେ ଦଳର ବରିଷ୍ଠ ନେତାମାନେ ତାଙ୍କୁ ସ୍ୱଗତ କରିଥିଲେ ।

ବିମାନବନ୍ଦରରୁ ପ୍ରଣବ କଂଗ୍ରେସ ଭବନକୁ ଯାଇଥିଲେ । ତାଙ୍କୁ ସ୍ୱାଗତ ଜଣାଇବା ପାଇଁ ଆଦିବାସୀ ଯୁବକ ଯୁବତୀମାନେ ପାରମ୍ପରିକ ନୃତ୍ୟ ପରିବେଷଣ କରିଥିଲେ । କଂଗ୍ରେସ ଭବନ ଠାରେ ସେ ଦଳର ବିଧାୟକ ଓ ସାଂସଦ ମାନଙ୍କ ସହ ଆଲୋଚନା କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜୁଲାଇ ୬(ଓଡ଼ିଶା ଡ଼ଟ୍ କମ୍) ଆସନ୍ତା ୧୫ ତାରିଖରେ ରାଷ୍ଟ୍ରପତି ପ୍ରାର୍ଥୀ ତଥା ପୂର୍ବତନ ଲୋକସଭା ବାଚସ୍ପତି ପି.ଏ ସାଙ୍ଗମା’ ଓଡ଼ିଶା ଗସ୍ତରେ ଆସୁଛନ୍ତି ।

ତାଙ୍କୁ ସ୍ୱାଗତ କରିବା ପାଇଁ ଶାସକ ବିଜୁ ଜନତା ଦଳ ପକ୍ଷରୁ ବ୍ୟାପକ ଆୟୋଜନ କରାଯାଉଛି । ସେ ପ୍ରଥମେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହିତ ଆଲୋଚନା କରିବା ପରେ ବିଜେଡି ବିଧାୟକ ଓ ସାଂସଦଙ୍କ ସହିତ କଥାବାର୍ତା କରିବାର ଯୋଜନା ରହିଛି ।

ଏହିିଦିନ ଦଳର ସମସ୍ତ ବିଧାୟକ ଓ ସାଂସଦ ମାନଙ୍କୁ ନବୀନ ନିବାସକୁ ଡକାଯାଇଛି । ସାଙ୍ଗମା’ଙ୍କ ପୁଅ କୋନରାଡଙ୍କୁ ଯେଭଳି ସ୍ୱାଗତ କରାଯାଇଥିଲା ତା’ଠାରୁ ଅଧିକ ଆଡମ୍ବରରେ ସ୍ୱାଗତ ପାଇଁ ଯୋଜନା ଚାଲିଛି ।

ରାଷ୍ଟ୍ରପତି ନିର୍ବାଚନ ପାଇଁ ସାଙ୍ଗମା’ଙ୍କ ନାମ ମୁଖ୍ୟମନ୍ତ୍ରୀ ପ୍ରଥମେ ଘୋଷଣା କରିଥିଲେ । ପରେ ବିଜେପି ସମେତ ଅନ୍ୟଦଳମାନେ ତାଙ୍କୁ ସମର୍ଥନ ଜଣାଇଛନ୍ତି । ସେହିପରି ୟୁପିଏର ରାଷ୍ଟ୍ରପତି ପ୍ରାର୍ଥୀ ପ୍ରଣବ ମୁଖାର୍ଜୀ ମଧ୍ୟ ୧୧ରେ ଓଡ଼ିଶା ଆସିବାର କାର୍ଯ୍ୟକ୍ରମ ରହିଛି

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୪(ଓଡ଼ିଶା ଡ଼ଟ୍ କମ୍) ଓଡ଼ିଶାର ନାମ ସଂଶୋଧନ ସଂକ୍ରାନ୍ତୀୟ ବିଲ୍ ଶୁକ୍ରବାର ରାଷ୍ଟ୍ରପତି ପ୍ରତିଭା ପାଟିଲଙ୍କ ଅନୁମୋଦନ ଲାଭ କରିବା ପରେ ଏହି ଖୁସିରେ ଶନିବାର ସରକାରୀ ଛୁଟି ଘୋଷଣା କରାଯାଇଛି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଛୁଟି ଘୋଷଣା କରିଥିବା ବେଳେ ସମସ୍ତ ସ୍କୁଲ, କଲେଜ, ବ୍ୟାଙ୍କ ଏବଂ
ସରକାରୀ କାର୍ଯ୍ୟାଳୟ ବନ୍ଦ ରହିବ ।

ଓଡ଼ିଶା ଡ଼ଟ୍ କମ୍