ଶଙ୍କରାଚାର୍ଯ୍ୟ

ପ୍ରଶାନ୍ତ ପଟ୍ଟନାୟକ

ବିଗତ ରଥଯାତ୍ରା ପୂର୍ବରୁ ପୁରୀର ଜଗତ୍‍ଗୁରୁ ଶଙ୍କରାଚାର୍ଯ୍ୟ ଶ୍ରୀ ନିଶ୍ଚଳାନନ୍ଦ ସରସ୍ୱତୀ ଓ ଗଜପତି ମହାରାଜ ରଥାରୁଢ଼ା ଚତୁର୍ଦ୍ଧାମୂର୍ତ୍ତିଙ୍କୁ ସ୍ପର୍ଶ କରିବା ସମ୍ପର୍କରେ ଏ ସାମ୍ବାଦିକ ସମ୍ମିଳନୀରେ ଦେଇଥିବା ବିବୃତି ଯଥେଷ୍ଟ ବିବାଦମାନ ହୋଇପଡିଥିଲା ।

ଏହି ବିବାଦ ପରିଶେଷରେ ଏପରି ମୋଡ ନେଇଥିଲା ଯେ ଶଙ୍କରାଚାର୍ଯ୍ୟ ରଥ ଉପରେ ଠାକୁରମାନଙ୍କୁ ଦର୍ଶନ କରିବାରୁ ସ୍ୱତଃ ବିରତ ହୋଇଥିଲେ । ସମ୍ପ୍ରତ୍ତି ଜଗତ୍‍ଗୁରୁ ନିଶ୍ଚଳାନନ୍ଦ ସରସ୍ୱତୀ ପୁନଶ୍ଚ ନିଜକୁ ଏକ ବିବାଦମାନ ପରିସ୍ଥିତିକୁ ଟାଣି ନେଇଛନ୍ତି ।

ନବକଳେବର ସମ୍ପର୍କରେ ଶ୍ରୀମନ୍ଦିର ପ୍ରଶାସନ ଶଙ୍କରାଚାର୍ଯ୍ୟଙ୍କ ଠାରୁ ପରାମର୍ଶ ଗ୍ରହଣ କରିନଥିବା ବିଷୟରେ ଗଜପତି ମହାରାଜା ନିରବ ରହିବା ଘଟଣା ଏବେ ଚର୍ଚ୍ଚାର ବିଷୟବସ୍ତୁ ହୋଇପଡିଛି ।

ପ୍ରାୟ ଏକମାସ ଧରି ନବକଳେବର ପର୍ବ ବନଯାଗ ଯାତ୍ରା ଆରମ୍ଭ ହୋଇଯାଇଛି । ବନଯାଗ ଯାତ୍ରାର କିଛିଦିନ ପୂର୍ବରୁ ଗଜପତି ମହାରାଜା ତାଙ୍କ ଶ୍ରୀନହରରେ ଛତିଶା ନିଯୋଗର କର୍ମକର୍ତ୍ତାଙ୍କୁ ଡାକି ନବକଳେବର ପର୍ବ ସମ୍ପର୍କରେ ଆଲୋଚନା କରିଥିଲେ ।

ଏଥିରେ ମୁଖ୍ୟ ପ୍ରଶାସକଙ୍କ ସହିତ ଜିଲ୍ଲାର ପଦସ୍ଥ ଅଧିକାରୀମାନେ ଉପସ୍ଥିତ ରହି ଆଲୋଚନାରେ ଅଂଶଗ୍ରହଣ କରିଥିଲେ । ନବକଳେବର ସମ୍ପର୍କିତ ବିଭିନ୍ନ ତଥ୍ୟମାନ ଦେଉଳକରଣ, ତଢ଼ଉକରଣ ସମେତ ଅନ୍ୟାନ୍ୟ ବ୍ୟକ୍ତିବିଶେଷଙ୍କ ସହିତ ଆଲୋଚନା କରାଯାଇଥିଲା ।

ଯେଉଁ ସେବାୟତମାନଙ୍କର ନବକଳେବର ପାଇଁ ଆବଶ୍ୟକତା ରହିଛି ସେମାନେ ସେମାନଙ୍କ କାର୍ଯ୍ୟ ତୁଲାଇବା ପାଇଁ ଗଜପତି ମହାରାଜ ବୈଠକରେ ପରାମର୍ଶ ଦେଇଥିଲେ । ନିଯୋଗ କର୍ମକର୍ତ୍ତାମାନେ ନବକଳେବର ସମ୍ପର୍କିତ ଆନୁଷ୍ଠାନିକ ଘୋଷଣା କରାଯାଇନଥିବା ବିଷୟ ଉଠାଇଥିଲେ ଏବଂ ଏ ସମ୍ପର୍କରେ ଗଜପତି ମହାରାଜଙ୍କ ଠାରୁ ସ୍ପଷ୍ଟୀକରଣ ମାଗିଥିଲେ ।

ଗଜପତି ମହାରାଜ ଏ ବିଷୟରେ ମୁଁ ଶ୍ରୀମନ୍ଦିରର ପ୍ରଶାସନ ସହିତ ଆଲୋଚନା କରି ଜଣାଇବି ବୋଲି ସେଠାରେ କହିଥିଲେ । ମାତ୍ର ଉପସ୍ଥିତ ଥିବା ଶ୍ରୀମନ୍ଦିର ମୁଖ୍ୟ ପ୍ରଶାସକ ସ୍ଥିରୀକୃତ ହୋଇଥିବା ଦିନଗୁଡିକ ବିଷୟରେ ଶ୍ରୀଜୀଉଙ୍କର ଯେଉଁ ଯେଉଁ ନୀତିଗୁଡିକ ହେବାକୁ ଅଛି ସେ ସମ୍ପର୍କରେ ସୂଚନା ପ୍ରଦାନ କରିଥିଲେ ।

ଗଜପତି ମହାରାଜ ମୁକ୍ତିମଣ୍ଡପ ପଣ୍ଡିତ ଇତ୍ୟାଦିଙ୍କ ପରାମର୍ଶ କ୍ରମେ ଚଳିତବର୍ଷ ନବକଳେବର ହେଉଛି ବୋଲି ସେବାୟତ କର୍ମକର୍ତ୍ତାଙ୍କ ନିକଟରେ ପ୍ରକାଶ କରିଥିଲେ । ଏହି ବୈଠକର ଗୋଟିଏ ଦିନ ପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଆଗାମୀ ଦିନରେ ହେବାକୁ ଥିବା ନବକଳେବର ସମ୍ପର୍କରେ ଘୋଷଣା କରାଯାଇଥିଲା ।

ଗତବର୍ଷ ରଥଯାତ୍ରା ସମୟରେ ଶ୍ରୀଜୀଉଙ୍କୁ ସ୍ପର୍ଶ କରିପାରିବେ ନାହିଁ ବୋଲି ଜଗତ୍‍ଗୁରୁ ଯେଉଁ ମତବ୍ୟକ୍ତ କରିଥିଲେ ତା ଦ୍ୱାରା କୌଣସି ଭକ୍ତଙ୍କୁ ରଥ ଉପରକୁ ଚଢ଼ିବା ପାଇଁ ଦିଆଯାଇନଥିଲା । କଡା ସୁରକ୍ଷା ମଧ୍ୟରେ ରଥଗୁଡିକୁ ରଖାଯାଇଥିଲା ।

ଅଦାଲତଙ୍କ ନିର୍ଦେଶକ୍ରମେ ଶୀଜୀଉଙ୍କୁ ସ୍ପର୍ଶ କଲେ ଅବମାନନା ହେବ ବୋଲି ପୋଲିସ୍‍ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଥିଲା । ରଥଯାତ୍ରା ଦିନ ଶଙ୍କରଚାର୍ଯ୍ୟ ରଥାରୁଢ଼ା ଶ୍ରୀଜୀଉମାନଙ୍କୁ ରଥ ଉପରେ ନଚଢ଼ି ବଡଦାଣ୍ଡରୁ ଦର୍ଶନ କରି ଫେରି ଯାଇଥିଲେ । ଏହି ଘଟଣା ସେତେବେଳେ ଚର୍ଚ୍ଚାର ବିଷୟ ହୋଇଥିଲା ।

ରାଜ୍ୟ ମନ୍ତ୍ରିମଣ୍ଡଳର ସଦସ୍ୟମାନଙ୍କ ମଧ୍ୟରେ ଏହାକୁ ନେଇ କଥା କଟାକଟି ମଧ୍ୟ ହୋଇଥିଲା । ସେତେବେଳେ ଏସବୁର ମୂକଦର୍ଶକ ପାଲଟି ଯାଇଥିଲା ଶ୍ରୀମନ୍ଦିର ପ୍ରଶାସନ । ଶ୍ରୀମନ୍ଦିର ପ୍ରଶାସନର ବରିଷ୍ଠ ଅଧିକାରୀମାନେ ଶଙ୍କରାଚାର୍ଯ୍ୟଙ୍କ ରଥ ଚଢ଼ିବା ଘଟଣାର ନିଜକୁ ଦୂରେଇ ରଖିଥିଲେ । ପରେ ଏ ସମ୍ପର୍କରେ ବିଚାର ବିମର୍ଶ ମଧ୍ୟ କରାଯାଇନଥିଲା ।

ସେତେବେଳେ ଶଙ୍କରାଚାର୍ଯ୍ୟ ଅପମାନିତ ହେଲା ଭଳି ନିରବ ରହି ଯାଇଥିଲେ । ୨୦୧୫ ମସିହାରେ ଶ୍ରୀଜୀଉଙ୍କର ନବକଳେବର ଅନୁଷ୍ଠିତ ହେବ ବୋଲି ତାର ତିନି ଚାରି ବର୍ଷ ପୂର୍ବରୁ ଜଣାପଡି ଯାଇଥିଲା । ସେଥି ନିମନ୍ତେ ରାଜ୍ୟ ସରକାର ତତ୍ପରତା ପ୍ରକାଶ କରି ପୁରୀ-ଭୁବନେଶ୍ୱର ରାଜପଥର ସମ୍ପ୍ରସାରଣ, ପୁରୀ-ଖୋର୍ଦ୍ଧା ରୋଡ୍‍ ରେଳପଥର ଦୋହରୀକରଣ ସହିତ ଅନ୍ୟାନ୍ୟ ବିଷୟ ସମ୍ପର୍କରେ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରାଇଥିଲେ ।

ମୁଖ୍ୟମନ୍ତ୍ରୀ ବାରମ୍ବାର ପ୍ରଧାନମନ୍ତ୍ରୀ ଏବଂ ଅନ୍ୟାନ୍ୟ ବରିଷ୍ଠ ମନ୍ତ୍ରୀଙ୍କୁ ନବକଳେବର ସମ୍ପର୍କରେ ବିଭିନ୍ନ ଉନ୍ନତିମୂଳକ କାର୍ଯ୍ୟ କରିବା ପାଇଁ ଅନୁରୋଧ କରିଥିଲେ । ମାତ୍ର ଶ୍ରୀମନ୍ଦିର ପ୍ରଶାସନ ନବକଳେବରକୁ ନେଇ ତତ୍ପରତା ପ୍ରକାଶ କରିନଥିଲା । ଶ୍ରୀମନ୍ଦିର ପ୍ରଶାସନ ପାଇଁ ଯେପରି ଅଡୁଆ ପରିସ୍ଥିତି ସୃଷ୍ଟି ନହୁଏ ସେଥିପ୍ରତି ପ୍ରଶାସନିକ ଅଧିକାରୀମାନେ ଅଧିକ ଯତ୍ନବାନ ହେଉଥିବା ଦେଖିବାକୁ ମିଳୁଥିଲା ।

ଶଙ୍କରାଚାର୍ଯ୍ୟଙ୍କ ରଥ ଚଢ଼ା ପ୍ରସଙ୍ଗ, ନବକଳେବର ପାଇଁ ବିଭିନ୍ନ ବର୍ଗର ସେବାୟତମାନଙ୍କ ସହିତ ବିଚାର ଆଲୋଚନା, ସେବାୟତମାନଙ୍କ ପ୍ରାପ୍ୟ ପାଉଣା ପ୍ରଦାନ ଦିଗରେ ଶ୍ରୀମନ୍ଦିର ପ୍ରଶାସନ ପ୍ରାୟ ନୀରବ ରହିଥିଲା । ଏ ସମସ୍ତ ବିଷୟ ଶ୍ରୀମନ୍ଦିର ପରିଚାଳନା କମିଟି ଅଧ୍ୟକ୍ଷ ହିସାବରେ ଗଜପତି ମହାରାଜ ଜାଣିଥିଲେ ମଧ୍ୟ କୌଣସି ପଦକ୍ଷେପ ନେଇନଥିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।

ଶ୍ରୀଜୀଉଙ୍କ ନବକଳେବର ସମ୍ପର୍କରେ ଶଙ୍କରାଚାର୍ଯ୍ୟଙ୍କର କୌଣସି ଗୁରୁତ୍ୱପୂର୍ଣ୍ଣ ଭୂମିକା ଥିବା ଗଜପତି ମହାରାଜ, ଶ୍ରୀମନ୍ଦିର ପ୍ରଶାସକ ବା ରାଜ୍ୟ ପ୍ରଶାସନ ହୁଏତ ଉପଲବଧି କରୁନଥିବାରୁ ଗଣମାଧ୍ୟମ ଜରିଆରେ ତାଙ୍କର କ୍ଷୋଭ ପ୍ରକାଶ ସତ୍ତ୍ୱେ ବି କୌଣସି ମହଲରେ ପ୍ରତିକ୍ରିୟା ବା ତତ୍ପରତା ପ୍ରକାଶ ପାଇନାହିଁ ।

ଶ୍ରୀ ଜୀଉମାନଙ୍କର ଦାରୁ ଚିହ୍ନଟ ହେବା ପରେ ରାଜ୍ୟର ଜନସାଧାରଣଙ୍କ ମନରେ ଯେଭଳି ପ୍ରବଳ ଉତ୍କଣ୍ଠା ଦେଖାଦେଇଛି ଏବଂ ସେମାନେ ଲକ୍ଷ ଲକ୍ଷ ସଂଖ୍ୟାରେ ଦଇତାପତି ଓ ବିଭିନ୍ନ ବର୍ଗର ସେବାୟତମାନଙ୍କୁ ଯେଭଳି ସମ୍ବର୍ଦ୍ଧନା ଓ ସମ୍ମାନ ଜଣାଉଛନ୍ତି ତାହାର ପ୍ରତିବଦଳରେ ସେମାନେ ଭକ୍ତମାନଙ୍କୁ ଅନୁରୂପ ଶ୍ରଦ୍ଧା ଓ ସମ୍ମାନ ଜଣାଇବା ଏକାନ୍ତ ଆବଶ୍ୟକ ।

 

(ଓଡ଼ିଶା ଡ଼ଟ୍ କମରେ ପ୍ରକାଶିତ ଲେଖା/ରିପୋର୍ଟ ଓ ସ୍ତମ୍ଭ ଲେଖକ/ଲେଖିକାଙ୍କର ନିଜସ୍ୱ ମତ ) ଓଡିଶା ଡଟ୍ କମ ଘୋଷଣାନାମା