ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ଅଗଷ୍ଟ ୨୧ (ଓଡିଶା ଡଟ କମ) ଓଡ଼ିଶାର ଖ୍ୟାତନାମା କଥାଶିଳ୍ପୀ ତଥା ଭାଷା ବିଚାରକ ମନୋଜ କୁମାର ପଣ୍ଡାଙ୍କୁ ଚଳିତ ବର୍ଷର ଶାରଳା ପୁରସ୍କାର ପ୍ରଦାନ କରାଯିବ ବୋଲି ଘୋଷଣା କରାଯାଇଛି ।
ଆର୍ଥିକ ଦୃଷ୍ଟିରୁ ଓଡ଼ିଶାର ସର୍ବୋଚ୍ଚ ସାହିତ୍ୟ ପୁରସ୍କାର ଭାବରେ ପରିଗଣିତ ଶାରଳା ପୁରସ୍କାର ଚୟନ କମିଟି ଗତ କିଛି ବର୍ଷ ଧରି ନିଜ ଚୟନ ପଦ୍ଧତିକୁ ନେଇ ବେଶ୍ ବିସ୍ମୟକର ନିଷ୍ପତ୍ତି ନେଇଛନ୍ତି ।
ମୁଖ୍ୟ ସ୍ରୋତଠୁ ଦୂରରେ ରହି ସାହିତ୍ୟ ସାଧନା କରୁଥିବା ନିଷ୍ଠାପର ଲେଖକମାନଙ୍କୁ ଏହି ପୁରସ୍କାର ପ୍ରଦାନ କରାଯିବାର ଏକ ସୁନ୍ଦର ଧାରା ଆରମ୍ଭ ହୋଇଛି ।
ଯାହା ଫଳରେ ପ୍ରଫୁଲ୍ଲ ଦାସଙ୍କ ଭଳି ଲେଖକଙ୍କୁ ଶାରଳା ପୁରସ୍କାର ପ୍ରଦାନ କରାଯାଇଛି । ଚଳିତ ବର୍ଷ ଏହି କ୍ରମରେ ଆଉ ଏକ ବିସ୍ମୟକର ନିଷ୍ପତ୍ତି ହେଉଛି ମନୋଜ ପଣ୍ଡାଙ୍କୁ ଶାରଳା ପୁରସ୍କାର ମନୋଜ କୁମାର ପଣ୍ଡା ଖୁବ୍ ବେଶି ଲେଖିନାହାନ୍ତି ।
ତାଙ୍କର ତିନୋଟି ମାତ୍ର ଗଳ୍ପ ସଂକଳନ – ହାଡ଼ ବଗିଚା, ବର୍ଣ୍ଣବଗିଚା ଓ ମାୟା ବଗିଚା । ମାୟା ବଗିଚା ଗଳ୍ପ ସଂକଳନ ପାଇଁ ତାଙ୍କୁ ଶାରଳା ପୁରସ୍କାର ପ୍ରଦାନ କରାଯିବ ।
ଅଳ୍ପ ଲେଖିଥିଲେ ମଧ୍ୟ ତାଙ୍କର କଥନଶୈଳୀ ଅତ୍ୟନ୍ତ ପ୍ରଭାବଶାଳୀ ଓ ସମକାଳର ଗଳ୍ପ କ୍ଷେତ୍ରରେ ତାଙ୍କର ଏକ ନିଜସ୍ୱ ଶୈଳୀ ରହିଛି । ବର୍ଣ୍ଣନା ବହୁଳ ଗପର ଧାରାଠୁ ଅଲଗା ପ୍ରତୀକାତ୍ମକ ଗଳ୍ପଧାରାର ସେ ଜଣେ ଅଗ୍ରଣୀ ଶିଳ୍ପୀ ।
ଭାଷା, ଶୈଳୀ, ବିଷୟବସ୍ତୁ ଓ ଚରିତ୍ର ନିର୍ମାଣରେ ମନୋଜ ପଣ୍ଡାଙ୍କ କାରିଗରୀର ଏକ ସ୍ୱତନ୍ତ୍ର ଆବେଦନ ରହିଛି । ଖୁବ୍ କମ୍ ଗପ ଲେଖି ସବୁବେଳେ ଚର୍ଚ୍ଚାରେ ରହିଥିବା ମନୋଜପଣ୍ଡାଙ୍କୁ ଏହି ପୁରସ୍କାର ପ୍ରଦାନ କରାଯିବା ଫଳରେ ଓଡ଼ିଆ ଗଳ୍ପର ବିକଳ୍ପଧାରାକୁ ସମ୍ମାନିତ କରାଯାଇଛି ।
ଗାଳ୍ପିକ ମନୋଜ ପଣ୍ଡାଙ୍କ ଜନ୍ମ ବଲାଙ୍ଗୀରରେ । ବୃତ୍ତିରେ ଶିକ୍ଷକ । ଅଳ୍ପଦିନ ତଳେ ଚାକିରିରୁ ଅବସର ଗ୍ରହଣ କରିଛନ୍ତି । ତାଙ୍କର ନିଆରା ଗଳ୍ପ ଶୈଳୀ ଓ କଥନଭଙ୍ଗୀ ଯୋଗୁଁ ବେଶ୍ ଚର୍ଚ୍ଚାରେ ରହିଥିବା ମନୋଜ ପଣ୍ଡାଙ୍କୁ କୌଣସି ପ୍ରକାରେ ଆନୁଷ୍ଠାନିକ ସ୍ୱୀକୃତି ଆଜି ପର୍ଯ୍ୟନ୍ତ ମିଳିନଥିଲା ।
ଏପରିକି ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ତାଙ୍କୁ ଏଯାଏଁ ମିଳିନାହିଁ । କେବଳ ଗଳ୍ପ ରଚନା ନୁହେଁ, ପ୍ରବନ୍ଧ ଓ ଭାଷା ଚର୍ଚ୍ଚା କ୍ଷେତ୍ରରେ ମଧ୍ୟ ମନୋଜ କୁମାର ପଣ୍ଡାଙ୍କର ସ୍ୱତନ୍ତ୍ର ଅବଦାନ ରହିଛି ।
ବ୍ୟାବହାରିକ ଜୀବନରେ ଓଡ଼ିଆ ଭାଷାର ପ୍ରୟୋଗକୁ ନେଇ ସେ କିଛି ସୁନ୍ଦର ପ୍ରବନ୍ଧ ମଧ୍ୟ ଲେଖିଛନ୍ତି । ସେହି ଦୃଷ୍ଟିରୁ ଦେଖିଲେ ଶାରଳା ପୁରସ୍କାର ଚୟନ କମିଟିର ଏହି ନିଷ୍ପତ୍ତି ଐତିହାସିକ ।
ଲେଖକର ପ୍ରଭାବ ଓ ପ୍ରତିଷ୍ଠା ଅପେକ୍ଷା ତା’ର ଲେଖାକୁ ଗୁରୁତ୍ୱ ଦେଇ ପୁରସ୍କାର ପ୍ରଦାନ କରାଯାଇଥିବାରୁ ଶାରଳା ପୁରସ୍କାର କମିଟିକୁ ଧନ୍ୟବାଦ ଦେବାକୁ ପଡ଼ିବ । ପୁରସ୍କାର ବାବଦରେ ଶ୍ରୀ ପଣ୍ଡାଙ୍କୁ ୫ ଲକ୍ଷଟଙ୍କା ପ୍ରଦାନ କରାଯିବ ।
ଏହି ଅବସରରେ ଆସନ୍ତା ମାସ ଆୟୋଜିତ ହେବାକୁ ଥିବା ପୁରସ୍କାର ପ୍ରଦାନ ସମାରୋହରେ ବିଶିଷ୍ଟ ହିନ୍ଦୀ କଥାଶିଳ୍ପୀ ମୃଦୁଳା ଗର୍ଗ ମୁଖ୍ୟଅତିଥି ଭାବରେ ଯୋଗଦାନ କରିବେ ।
ଓଡିଶା ଡଟ କମ
