ସଚିବାଳୟ

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ମଇ ୩ (ଓଡିଶା ଡଟ କମ) ଭୁବନେଶ୍ଵରସ୍ଥିତ ରାଜ୍ୟ ସଚିବାଳୟର ଏକ ଜନଗହଳିପୁର୍ଣ ସ୍ଥାନରେ ଶନିବାର ଡାମଣା ସାପ ଦେଇଥିବା କେତେକ ଅଣ୍ଡା ମିଳିବାରୁ ଏହାକୁ ନେଇ କର୍ମଚାରୀଙ୍କ ମହଲରେ ଭୟର ମାହୋଲ ସ୍ତୃଷ୍ଟି ହୋଇଛି ।

ଅର୍ଥ ବିଭାଗ ପଛରେ ଡ୍ରାଇଭର ମାନଙ୍କ ବିଶ୍ରାମ ସ୍ଥାନ ନିକଟରେ ସଫା ସୁତୁରା କାର୍ଯ୍ୟ ଚାଲିଥିବା ବେଳେ ଏହି ଅଣ୍ଡାଗୁଡିକୁ ଦେଖିବାକୁ ମିଳିଥିଲା । ଏହାପରେ କର୍ମଚାରୀମାନେ ସ୍ନେକ ହେଲପଲାଇନର ଶୁଭେନ୍ଦୁ ମଲ୍ଲିକଙ୍କୁ ଫୋନରେ ଯୋଗାଯୋଗ କରି ଡକାଇଥିଲେ । ମଲ୍ଲିକ ଘଟଣାସ୍ଥଳରେ ପହଞ୍ଚି ଅଣ୍ଡା ଗୁଡିକ ଉଦ୍ଧାର କରିଥିଲେ ।

ସେଠାରେ ଦଶଟି ଅଣ୍ଡା ଥିଲା ଓ ତାହା ଡାମଣା ସାପ ଦେଇଥିବା ଅଣ୍ଡା, ମଲ୍ଲିକ ଓଡିଶା ଡଟ କମ କୁ କହିଛନ୍ତି । ସଚିବାଲୟରୁ ଗତ ଦଶ ବର୍ଷ ଭିତରେ ପ୍ରାୟ ଷାଠିଏ ଟି ସାପ ଉଦ୍ଧାର କରାଯାଇଛି ଓ ସେମଧ୍ୟରୁ ଅଧିକାଂଶ ନାଗ ସାପ ।

ସଚିବାଳୟ ପରିସରରେ ସାପଙ୍କ ବାସସ୍ଥଳୀ ଥିବା ଆମେ ପୂର୍ବରୁ ସନ୍ଦେହ କରିଥିଲୁ ତେବେ ଏହା ପ୍ରମାଣିତ ହୋଇ ନ ଥିଲା । ଶନିବାର ପ୍ରଥମ ଥର ପାଇଁ ସାପ ଅଣ୍ଡା ମିଳିବାରୁ ଏହା ପ୍ରମାଣିତ ହୋଇଛି, ସେ କହିଛନ୍ତି । ବାହାରେ ସବୁବେଳେ ଗାଡି ମଟର ଚଳାଚଳ କରୁଥିବା ଓ ଲୋକଙ୍କ ଯିବା ଆସିବା ଲାଗି ରହିଥିବାରୁ ବାହାରୁ ସଚିବାଳୟ ପରିସରକୁ ସାପ ପ୍ରବେଶ କରିବାର ଖୁବ ସମ୍ଭାବନା ରହିଛି ।

ଠିକ ସେହିପରି ସଚିବାଳୟ ଭିତରେ କୁକୁର କିମ୍ବା ଅନ୍ୟକୌଣସି ପ୍ରାକୃତିକ ଶତ୍ରୁ ନ ଥିବାରୁ ଏହା ସାପଙ୍କ ପାଇଁ ସୁରକ୍ଷିତ ଚଳ ପ୍ରଚଳର ସ୍ଥାନ ପାଲଟିଛି । ଫଳରେ ସାପ ବ୍ୟତୀତ ସଚିବାଲୟ ମଧ୍ୟରେ ବେଙ୍ଗ ଓ ବିଭିନ୍ନ ଜାତୀୟ ମୂଷା ମଧ୍ୟ ନିଜର ଆସ୍ଥାନ ଜମାଇଛନ୍ତି, ସେ କହିଛନ୍ତି ।

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଫେବୃଆରି ୫(ଓଡିଶା ଡଟ୍ କମ୍ )-ଯୁବଶକ୍ତିକୁ ଗଠନମୂଳକ କାର୍ଯ୍ୟରେ ନିୟୋଜିତ କରିବା ସହିତ ସେମାନଙ୍କ ମଧ୍ୟରେ ଥିବା ପ୍ରତିଭାର ବିକାଶ ପାଇଁ ରାଜ୍ୟ ସରକାର ବିଜୁ ଯୁବ ସଶକ୍ତିକରଣ ଯୋଜନା ଆରମ୍ଭ କରିବାକୁ ନିଷ୍ପତି ନେଇଛନ୍ତି ।

ଚଳିତ ଆର୍ଥିକ ବର୍ଷରୁ ଏହି ଯୋଜନା କାର୍ଯ୍ୟକାରୀ କରାଯିବ । ସୋମବାର ଦିନ ସଚିବାଳୟଠାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏ ନିଷ୍ପତି ନିଆଯାଇଛି ।

ବୃଦ୍ଧବୃଦ୍ଧାଙ୍କ ପାଇଁ କମ୍ବଳ, ବିପିଏଲଙ୍କ ପାଇଁ ଟଙ୍କିକିଆ ଚାଉଳ ଯୋଜନା ପ୍ରଚଳନ ପରେ ଏବେ ଯୁବକଙ୍କୁ ବାନ୍ଧି ରଖିବା ପାଇଁ ସରକାର ବିଜୁ ଯୁବ ସଶକ୍ତୀକରଣ ନାମରେ ନୂଆ ଯୋଜନା ଆରମ୍ଭ କରିବାକୁ ଯାଉଛନ୍ତି ।

ଏହି ଯୋଜନା ଅନୁସାରେ ସହରାଞ୍ଚଳରେ ୪ ହଜାର ଯୁବକ ସଂଘକୁ ୧୦ ହଜାର ଟଙ୍କା ଲେଖାଏଁ ଅନୁଦାନ ଯୋଗାଇ ଦିଆଯିବ । ପରବର୍ତୀ ପର୍ଯ୍ୟାୟରେ ଏହି ଯୋଜନା ଗ୍ରାମାଞ୍ଚଳକୁ ସମ୍ପ୍ରସାରଣ କରାଯିବ । କ୍ରୀଡ଼ା, ସଂସ୍କୃତି ଓ ଗୋଷ୍ଠୀ ବିକାଶ କାର୍ଯ୍ୟରେ ସମ୍ପୃକ୍ତ କ୍ଲବମାନେ ଏହି ସହାୟତା ପାଇପାରିବେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ,୨୧(ଓଡିଶା ଡଟ୍ କମ୍)-ବିଭିନ୍ନ ସଂଗଠନର ବିରୋଧ ସତ୍ୱେ ଓଡିଶାରେ ସୁରୁଖୁରୁରେ ହେବ ମହିଳା କ୍ରିକେଟ ମହାକୁମ୍ଭ । ସୁରକ୍ଷା ବ୍ୟବସ୍ଥାକୁ ନେଇ ଆଜି ମୁଖ୍ୟମନ୍ତ୍ରୀ ଏହି ମର୍ମରେ ପ୍ରତିଶ୍ରୃତି ଦେଇଥିବା ଓଡିଶା କ୍ରିକେଟ ଆସୋସିଏସନ ତରଫରୁ ପ୍ରକାଶ ।

ଆଜି ଓସିଏ ସଭାପତି ରଣଜିବୀ ବିଶ୍ୱାଳ ଓ ସଂପାଦକ ଆର୍ଶୀବାଦ ବେହେରା ପ୍ରଥମେ ପୋଲିସ ଡିଜି ଓ ପରେ ମୁଖ୍ୟମନ୍ତ୍ରୀଙ୍କୁ ସଚିବାଳୟରେ ଭେଟି ସୁରକ୍ଷା ପ୍ରସଂଗରେ ଆଲୋଚନା କରିଥିଲେ ।

ପାକିସ୍ତାନ ଟିମ୍ ଖେଳିବା ନେଇ ଓଡିଶାରେ ଆନ୍ଦୋଳନ ସୃଷ୍ଟି ହୋଇଛି ବୋଲି ଓସିଏ କର୍ମକର୍ତା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅବଗତ କରାଇ ଥିଲେ । ଏହାପରେ ରାଜ୍ୟ ସରକାରଙ୍କ ଠାରୁ ସୁରକ୍ଷା ବ୍ୟବସ୍ଥା ପାଇଁ ନିର୍ଭର ପ୍ରତିଶ୍ରୃତି ମିଳିଛି ବୋଲି ଓସିଏ ସଂପାଦକ ଆର୍ଶୀବାଦ ବେହେରା ପ୍ରକାଶ କରିଛନ୍ତି ।

ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଗଲାବେଳେ ପୋଲିସ ଡିଜି ପ୍ରକାଶ ମିଶ୍ର,କ୍ରୀଡାମନ୍ତ୍ରୀ ରମେଶ ମାଝୀ,କଟକ ବାରବାଟି ବିଧାୟକ ଦେବାଶୀଷ ସମାନ୍ତରାୟ ସେମାନଙ୍କ ସହିତ ଥିଲେ ।

ପୋଲିସ ଡିଜି ପ୍ରକାଶ ମିଶ୍ର କହିଛନ୍ତି ଯେ,ବିଶ୍ୱକପ୍ ପାଇଁ ସମସ୍ତ ସୁରକ୍ଷା ଯୋଗାଇ ଦିଆଯିବ । ବିରୋଧିଙ୍କ ଭାବନା ପ୍ରତି ଆମର ସମ୍ମାନ ରହିଛି କିନ୍ତୁ ଏହା ପାକିସ୍ଥାନ ଇଣ୍ଡିଆ କଥା ନୁହେଁ । ଏହା ଆଇସିସି ଦ୍ୱାରାପରିଚାଳିତ ଆନ୍ତର୍ଜାତୀୟ ମ୍ୟାଚ । ଏଥିରୁ କୌଣସି ଟିମ୍ କୁ ବାଦ କରାଯାଇ ପାରିବ ନାହିଁ ।

ଆସନ୍ତା ୩୧ ତାରିଖରେ ଆରମ୍ଭ ହେବାକୁ ଯାଉଥିବା ମହିଳା କ୍ରିକେଟ ବିଶ୍ୱକପ ପାଇଁ ପାକିସ୍ଥାନ ଦଳ ୨୬ ତାରିଖ ଦିନ ଓଡିଶା ଆସିବ । କଟକ ଓ ଟାଙ୍ଗୀରେ ଦୁଇଟି ଅଭ୍ୟାସ ମ୍ୟାଚ ସହ ସମୁଦାୟ ୧୩ଟି ମ୍ୟାଚ ଖେଳାଯିବ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୨(ଓଡିଶା ଡଟ୍ କମ୍)-ବଲାଙ୍ଗିର ଜିଲାର ସୁକତେଲ ପ୍ରକଳ୍ପ ସଂକ୍ରାନ୍ତ ସମସା ସମାଧାନ ପାଇଁ ବିଧାନସଭାରେ ଘୋଷଣା ମୁତାବକ ଏକ ଉଚ୍ଚସ୍ତରୀୟ ବୈଠକ ଆଜି ସଚିବାଳୟଠାରେ ଅନୁଷ୍ଠିତ ହେବ ।

ମୁଖ ଶାସନ ସଚିବ ବିଜୟ କୁମାର ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ଏହି ବୈଠକରେ ବଲାଙ୍ଗିର ଜିଲାପାଳଙ୍କ ସହ ୬ଜଣିଆ ସୁକତେଲ କ୍ରିୟାନୁଷ୍ଠାନ କମିଟି ଓ ବିସ୍ତାପିତଙ୍କ ପ୍ରତିନିଧିମାନେ ଭୁବନେଶ୍ୱରରେ ପହଞ୍ଚିଛନ୍ତି ।

କମିଟିର ଆବାହକ, ତିନି ଜଣ ବରିଷ୍ଠ ଉପଦେଷ୍ଟା ,ଯୁବ ସଂଗଠନର ସଭାପତିଙ୍କ ସମେତ ଦୁଇ ଜଣ ବିସ୍ଥାପିତଙ୍କୁ ନେଇ ଗଠିତ ହୋଇଛି ୬ ଜଣିଆ କମିଟି । କିନ୍ତୁ ଏବେବେ ନିଜ ଜିଦ୍ ରେ ଅଡି ବସିଛି ସଂଗ୍ରାମ ପରିଶଦ ।

ସଂଗ୍ରାମ ପରିଷଦର ବରିଷ୍ଠ ଉପଦେଷ୍ଟା ପବିତ୍ର ବାଡତିଆ କହିଛନ୍ତି ଯେ, ଆମେ ତ୍ରିପାକ୍ଷିକ ଆଲୋଚନାକୁ ପ୍ରତ୍ୟାଖାନ କରିଛୁ । ସିଧାସଳଖ ସରକାରଙ୍କ ସହିତ ଦ୍ୱିପାକ୍ଷିକ ଆଲୋଚନା କରିବାକୁ ପ୍ରସ୍ତାବ ଦେଇଛୁ । ସଂଗ୍ରାମ ପରିଷଦ ଏହି ଆଲୋଚନାରେ ଭାଗନେଇ ନାହଁ ।

ଗତ ୧୧ଦିନ ହେଲା ବଲାଙ୍ଗିରରେ ଚାଲିଛି ଲୋୟର ସୁକତେଲ ଆନେ୍ଦାଳନ । ପ୍ରକଳ୍ପ ଆରମ୍ଭ କରିବା ଦାବିରେ ରିଲେ ଅନଶନ ବି ଚାଲିଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୧୨ (ଓଡିଶା ଡଟ୍ କମ୍)-ଘରୋଇ ବସ୍ ମାଲିକ ସଂଘ ଆସନ୍ତା ୧୪ ତାରିଖରେ ଡାକରା ଦେଇଥିବା ଧର୍ମଘଟ ଘୁଞ୍ଚି ଯାଇଛି । ଯଦି ଆସନ୍ତା ୩୧ ତାରିଖ ସୁଦ୍ଧା ବସ ଭଡା ବୃଦ୍ଧି କରାନଯାଏ ତେବେ ନଭେମ୍ବର ୧ ତାରିଖରେ ପୁଣି ଆନ୍ଦୋଳନ ହେବ ବୋଲି ମାଲିକ ସଂଘ କହିଛନ୍ତି ।

ଆଜି ବାଣିଜ୍ୟ ଓ ପରିବହନ ମନ୍ତ୍ରୀ ସୁବ୍ରତ ତରାଇଙ୍କ ସହ ମାଲିକ ସଂଘର କର୍ମକର୍ତାଙ୍କ ବୈଠକ ସଚିବାଳୟରେ ହେବାପରେ ପ୍ରସ୍ତାବିତ ଧର୍ମଘଟ ଘୁଞ୍ଚାଇବାକୁ ନିଷ୍ପତି ହୋଇଛି । ଦଶହରା ଦୃଷ୍ଟିରୁ ଧର୍ମଘଟ ଘୁଞ୍ଚାଇବା ନିମନ୍ତେ ସରକାର ଅନୁରୋଧ କରିଥିଲେ ।

ସରକାରଙ୍କ ଅନୁରୋଧପରେ ମାଲିକ ସଂଘର ଏକ ବୈଠକ ଡକାଯାଇ ୧୪ ତାରିଖ ଧର୍ମଘଟକୁ ସ୍ଥଗିତ ରଖା ଯାଇଛି । ଡିଜେଲ ଦର ବୃଦ୍ଧିହେବାପରେ ରାଜ୍ୟ ଘରୋଇ ବସ୍ ମାଲିକ ସଂଘ ଟିକସ ହ୍ରାସ ଓ ଭଡା ବୃଦ୍ଧି ଲାଗି ସରକାରଙ୍କ ନିକଟରେ ଦାବିକରିଥିଲେ ।

ଆଜିର ଏହି ବୈଠକରେ ବସ୍ ଭଡା ବୃଦ୍ଧି କରାଯିବ ବୋଲି ନିଷ୍ପତି ନିଆ ଯାଇଛି । ତେବେ ଚୁଡାନ୍ତ ନିଷ୍ପତି ନେବାକୁ ସମୟ ଲାଗିବ ।

ଯେପରି ଯାତ୍ରୀମାନଙ୍କୁ ନବାଧିବ ଓ ବସ୍ ମାଲିକମାନେ ବିଶେଷ କ୍ଷତିଗ୍ରସ୍ତ ହେବନାହିଁ ସେଥିପ୍ରତି ଦୃଷ୍ଟିଦେଇ ସରକାର ନିଷ୍ପତି ନେବେ ବୋଲି ବସମାଲିକ ସଂଘର କୋଷାଧକ୍ଷ ବରଦା ପ୍ରସନ୍ନ ଆଚାର୍ଯ୍ୟ ଗଣମାଧ୍ୟମକୁ କହିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ସେପ୍ଟେମ୍ବର ୨୯(ଓଡ଼ିଶା ଡ଼ଟ୍ କମ୍) – ଅନୁଗୁଳ, ଦାମନଯୋଡି ଏବଂ ଭୁବନେଶ୍ୱରସ୍ଥ ନାଲକୋର ବିଭିନ୍ନ କର୍ମଚାରୀ ସଂଘ ସମନ୍ୱୟ ସମିତିର ସଦସ୍ୟ ମାନେ ଆଜି ସଚିବାଳୟଠାରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରି ନାଲକୋରୁ ପୁଞ୍ଜି ପ୍ରତ୍ୟାହାର ନିମନ୍ତେ କେନ୍ଦ୍ର ସରକାରଙ୍କୁ ନିଷ୍ପତି ସଂପର୍କରେ ଆଲୋଚନା କରିଥିଲେ ।

ଆଲୋଚନା ସମୟରେ ସେମାନେ କେନ୍ଦ୍ର ସରକାରଙ୍କ ପୁଞ୍ଜି ପ୍ରତ୍ୟାହାର ନୀତିର ଦୃଢ ସମାଲୋଚନା କରିଥିଲେ । କେନ୍ଦ୍ର ସରକାରଙ୍କ ନାଲକୋ ନୀତିର ମୁଖ୍ୟମନ୍ତ୍ରୀ ବିରୋଧ କରିଥିବାରୁ ସେମାନେ ତାଙ୍କୁ ଧନ୍ୟବାଦ ଜଣାଇଥିଲେ ।

ନାଲକୋର ଉନ୍ନତି ପାଇଁ ରାଜ୍ୟ ସରକାର ଉଦ୍ୟମ ଜାରି ରଖିବେ ବୋଲି ଶ୍ରୀ ପଟ୍ଟନାୟକ କହିଥିଲେ । ଏହି ସାକ୍ଷାତ ସମୟରେ ଇଷ୍ପାତ ଓ ଖଣି ମନ୍ତ୍ରୀ ଶ୍ରୀ ରଜନୀକାନ୍ତ ସିଂହ, ସ୍କୁଲ ଓ ଗଣଶିକ୍ଷା ମନ୍ତ୍ରୀ ଶ୍ରୀ ରବିନାରାୟଣ ନନ୍ଦ ଉପସ୍ଥିତ ଥିଲେ ।

ଓଡିଶା ଡଟ୍କମ