ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ସେପ୍ଟେମ୍ବର ୯ (ଓଡିଶା ଡଟ କମ) ବିଭିନ୍ନ କାରଣରୁ ବ୍ୟାଙ୍କକୁ ଯାଇପାରୁନଥିବା ଚାଷୀମାନଙ୍କୁ ତାଙ୍କ ଘର ସାମ୍ନାରେ ବ୍ୟାଙ୍କ ସେବା ଉପଲବ୍ଧ କରାଇବା ଉଦ୍ଦେଶ୍ୟରେ ଓଡିଶା ରାଜ୍ୟ ସମବାୟ ବ୍ୟାଙ୍କ ବୁଧବାର ତାର ଭ୍ରାମ୍ୟମାଣ ବ୍ୟାଙ୍କ ସେବା ଆରମ୍ଭ କରିଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡିଶା ରାଜ୍ୟ ସମବାୟ ବ୍ୟାଙ୍କ ପରିସରରେ ଏହି ସେବା ବ୍ୟାଙ୍କସ ଅନ ହୁଇଲର ଉଦଘାଟନ କରିବା ସହ ଏକ ଅତ୍ୟାଧୁନିକ କୋର ବ୍ୟାଙ୍କିଙ୍ଗ ଡାଟା ମ୍ୟାନେଜମେଣ୍ଟ ସେଣ୍ଟର ଓ କୋର ବ୍ୟାଙ୍କିଙ୍ଗ ସେବା ର ଉନ୍ମୋଚନ କରିଥିଲେ ।
ସେ ଏହା ସହିତ ରାଜ୍ୟ ସମବାୟ ବ୍ୟାଙ୍କ ପକ୍ଷରୁ ରୂପେ ଡେବିଟ କାର୍ଡ଼ ବ୍ୟବସ୍ଥା ର ମଧ୍ୟ ଶୁଭାରମ୍ଭ କରିଥିଲେ । ଏହାଦ୍ଵାରା ସମବାୟ ବ୍ୟାଙ୍କ ର ଗ୍ରାହକମାନେ ଏଟିଏମ ରୁ ଟଙ୍କା ଉଠାଇବାର ସୁବିଧା ପାଇପାରିବେ ।
ଏହି ଅବସରରେ ଆୟୋଜିତ କାର୍ଯ୍ୟକ୍ରମରେ ଉଦବୋଧନ ଦେଇ ମୁଖ୍ୟମନ୍ତ୍ରୀ କହିଥିଲେ ଯେ ରାଜ୍ୟର ଅନେକ ପଞ୍ଚାୟତରେ ବ୍ୟାଙ୍କ ସୁବିଧା ନାହିଁ । ଏହାକୁ ଦୃଷ୍ଟିରେ ରଖି ରାଜ୍ୟ ସମବାୟ ବ୍ୟାଙ୍କ ଆଦିବାସୀ ବହୁଳ ଅଞ୍ଚଳରେ ବ୍ୟାଙ୍କ ଅନ ହୁଇଲ କାର୍ଯ୍ୟକ୍ରମ ଆରମ୍ଭ କରି ଲୋକଙ୍କ ପାଖରେ ବ୍ୟାଙ୍କିଙ୍ଗ ସୁବିଧା ଯୋଗାଇ ଦେଇଥିବା ଆନନ୍ଦର କଥା।
ସାରା ଦେଶରେ ଚାଷୀମାନଙ୍କ ପାଇଁ ଏହା ଏକ ଅଭିନବ ସୁବିଧା ହୋଇଥିବାରୁ ମୁଖ୍ୟମନ୍ତ୍ରୀ ରାଜ୍ୟ ସମବାୟ ବ୍ୟାଙ୍କକୁ ଧନ୍ୟବାଦ ଜଣାଇଥିଲେ | ଏହାର ସଫଳତାକୁ ଅନୁଧ୍ୟାନ କରି ରାଜ୍ୟ ସରକାର ସବୁ ବ୍ଲକ ରେ ଚାଷୀଙ୍କ ସୁବିଧା ପାଇଁ ଏହି କାର୍ଯ୍ୟକ୍ରମ ଆରମ୍ଭ କରିବା ପାଇଁ ସେ ପରାମର୍ଶ ଦେଇଥିଲେ ।
ରାଜ୍ୟରେ ଫସଲ ଋଣ ଆବଶ୍ୟକତା ପୂରଣରେ ସମବାୟ ବ୍ୟାଙ୍କ ଗୁଡିକର ଅଂଶ ୭୦ ପ୍ରତିଶତ ରହିଥିବା ବେଳେ ଜାତୀୟ ସ୍ତରରେ ଏହାର ହାର ମାତ୍ର ୧୭ ପ୍ରତିଶତ ଅଟେ।ତେଣୁ ଚାଷୀମାନେ ଯେପରି ସୁବିଧାରେ ଋଣ ପାଇପାରିବେ ସେଥିପାଇଁ ଏକ ରୋଡମାପ ପ୍ରସ୍ତୁତ କରିବା ପାଇଁ ସେ ସମବାୟ ବିଭାଗ କୁ ନିର୍ଦେଶ ଦେଇଥିଲେ |
ରାଜ୍ୟର ସମସ୍ତ ପ୍ରାଥମିକ କୃଷି ସମବାୟ ସମିତିର କମ୍ପ୍ୟୁଟରୀକରଣ ଏବଂ କିଷାନ କ୍ରେଡିଟ କାର୍ଡକୁ ସ୍ମାର୍ଟ କାର୍ଡରେ ପରିଣତ କରିବା କାର୍ଯ୍ୟ ଏକ ବର୍ଷ ମଧ୍ୟରେ ଶେଷ କରିବା ପାଇଁ ମଧ୍ୟ ମୁଖ୍ୟମନ୍ତ୍ରୀ ନିର୍ଦେଶ ଦେଇଥିଲେ ।
ବର୍ତ୍ତମାନ ମତ୍ସ୍ୟ ଓ ପଶୁ ସମ୍ପଦ ବିଭାଗର ସଚିବ ବିଷ୍ଣୁପଦ ସେଠୀ ସମବାୟ ବିଭାଗର ସଚିବ ଥିବା ବେଳେ ଏହି ଭଳି ଏକ ଅଭିନବ ସେବାର ପରିକଳ୍ପନା କରି ଆବଶ୍ୟକ ଉଦ୍ୟମ କରିଥିଲେ । ତାଙ୍କ ଉଦ୍ୟମରେ ଆରମ୍ଭ ହୋଇଥିବା ଏହି ସେବା ଦ୍ଵାରା ରାଜ୍ୟର ୫୫ ଲକ୍ଷ ଚାଷୀ ପରିବାର ଓ ପ୍ରାଥମିକ କୃଷି ସମବାୟ ସମିତି ଗୁଡିକ ଉପକାର ପାଇପାରିବେ |
ଏହି କାର୍ଯ୍ୟକ୍ରମରେ ସମବାୟ ମନ୍ତ୍ରୀ ଡକ୍ଟର ଦାମୋଦର ରାଉତ, ରାଜ୍ୟ ସମବାୟ ବ୍ୟାଙ୍କ ସଭାପତି ଶ୍ରୀ ଅକ୍ଷୟ ପଟ୍ଟନାୟକ,ସମବାୟ ବିଭାଗର ପ୍ରମୁଖ ସଚିବ ଶ୍ରୀ ମନୋଜ ଆହୁଜା,ନାବାର୍ଡ ର ମୁଖ୍ୟ ସାଧାରଣ ପ୍ରବନ୍ଧକ ଶ୍ରୀ କେଲେ ଏବଂ ସମବାୟ ବ୍ୟାଙ୍କ ନିର୍ଦେଶକ ପ୍ରମୁଖ ଯୋଗ ଦେଇଥିଲେ |
ଓଡିଶା ଡଟ କମ
