ସମ୍ବଲପୁର

ଓଡିଶା ଡଟ୍ କମ୍ ସମ୍ବାଦଦାତା

ସମ୍ବଲପୁର,ଡିସେମ୍ବର ୨୦(ଓଡିଶା ଡଟ୍ କମ୍)-ପଶ୍ଚିମ ଓଡ଼ିଶା ବିକାଶ ପରିଷଦର ପୂର୍ବତନ ଅଧ୍ୟକ୍ଷ, ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ କୁଳପତି, ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟର ପୂର୍ବତନ ଡିନ୍ ଅଫ ରିସର୍ଚ୍ଚ ତଥା ଏ ଅଂଚଳର କୃତୀ ସନ୍ତାନ ଡ. ନିରଞ୍ଜନ ପଣ୍ଡାଙ୍କ ୮୨ ବର୍ଷ ବୟସରେ ପରଲୋକ ହୋଇଛି ।

ବୁଧବାର ଦିନ ଅପରାହ୍ନ ୫ଟା ୪୫ ମିନିଟରେ କଲକାତାର ଏକ ଘରୋଇ ଡାକ୍ତରଖାନାରେ ତାଙ୍କର ପରଲୋକ ଘଟିଛି । ତାଙ୍କ ମୃତ୍ୟୁ ଖବର ପ୍ରଚାରିତ ହେବାମାତ୍ରେ ସମ୍ବଲପୁର, ଭୁବନେଶ୍ୱର ଓ ଅନ୍ୟାନ୍ୟ ସ୍ଥାନରେ ଶୋକର ଛାୟା ଖେଳିଯାଇଛି ।

୧୦.୦୬.୧୯୩୧ ମସିହା ଜୁନ ୧୦ ତାରିଖରେ ସମ୍ବଲପୁର ଝାଡ଼ୁଆପଡ଼ାରେ ବୃନ୍ଦାବନ ପଣ୍ଡା ଓ ଜାନକୀ ଦେବୀଙ୍କ ତୃତୀୟ ସନ୍ତାନ ଭାବରେ ଜନ୍ମଗ୍ରହଣ କରିଥିବା ନିରଞ୍ଜନ ଗଙ୍ଗାଧର ମେହେର କଲେଜରେ ଅଧ୍ୟୟନ କରିବା ପରେ ବନାରସ ଓ ଏଲାହାବାଦରେ ଉଚ୍ଚତର ଶିକ୍ଷା ଗ୍ରହଣ କରି ଆମେରିକାରେ ପିଏଚଡ଼ି ଡିଗ୍ରୀ ଲାଭ କରିଥିଲେ ।

ସେ ବାରଣାସୀ, ଏଲାହାବାଦ, ରାଂଚି, କଲିକତା, ବିଶ୍ୱଭାରତୀ ଓ ଅନ୍ୟାନ୍ୟ ବିଶ୍ୱବିଦ୍ୟାଳୟର ବୋର୍ଡ଼ ଅଫ୍ ଷ୍ଟଡ଼ିଜ ତଥା ପରି·ଳନା କମିଟି ସଭ୍ୟ ଥିଲେ । ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି)ର ଏକ ଆଧୁନିକ ଗବେଷଣାଗାରକୁ ତାଙ୍କ ନାମରେ ନାମିତ କରାଯାଇଛି । ସମ୍ବଲପୁର ବିଶ୍ୱବିଦ୍ୟାଳୟର କୁଳପତି ଦାୟିତ୍ୱ ସଫଳତାର ସହ ତୁଲାଇବା ପରେ ସେ ୨୦୦୬ ମସିହା ଜୁଲାଇରୁ ୨୦୧୧ ଜୁଲାଇ ପର୍ଯ୍ୟନ୍ତ ପଶ୍ଚିମ ଓଡ଼ିଶା ବିକାଶ ପରିଷଦର ଅଧ୍ୟକ୍ଷ ଥିଲେ ।

ହୃତପିଣ୍ଡରେ ଅସ୍ତ୍ରୋପଚାର ପରେ ଗତ କିଛି ଦିନ ଧରି ସେ ଗୁରୁତର ଅସୁସ୍ଥ ଥିଲେ । ସେ ଜ୍ୟେଷ୍ଠପୁତ୍ର ଆଇଟିସିର ବରିଷ୍ଠ ଅଧିକାରୀ ସ୍ୱରୂପ ପଣ୍ଡାଙ୍କ ପାଖରେ ରହୁଥିଲେ ।

ବହୁ ବିଶିଷ୍ଟ ବ୍ୟକ୍ତି ତାଙ୍କ ପ୍ରତି ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି । ଗୁରୁବାର ଦିନ ତାଙ୍କ ମରଶରୀରକୁ କଲକାତାରୁ ଭୁବନେଶ୍ୱରସ୍ଥିତ ବାସଭବନକୁ ଅଣାଯିବା ପରେ ପୁରୀ ସ୍ୱର୍ଗଦ୍ୱାରରେ ଦାହସକ୍ରାର କରାଯିବ ବୋଲି ପାରିବାରିକ ସୂତ୍ରରୁ ଜଣାପଡ଼ିଛି ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ନଭେମ୍ବର ୭(ଓଡ଼ିଶା ଡ଼ଟ୍ କମ୍) – ସମ୍ବଲପୁର ପୁଲିସ ହାତରେ ଧରାପଡିଛି ଶାନ୍ତିନଗରର ଦୁର୍ଦ୍ଧାନ୍ତ ଅପରାଧୀ ରାଜେଶ ସାହୁ । ମଙ୍ଗଳବାର ଦିନ ଲପଙ୍ଗା ରେଳଷ୍ଟେସନ ଢାବା ମାଲିକକୁ ଗୁଳିକରି ଫେରାର ହୋଇଯାଇଥିବା ରାଜେଶ ଓ ତାର ସାଙ୍ଗସୋନୁ ଧରାପଡିଛନ୍ତି ।

ଏସପି ନିଖିଳ କୁମାର କାନୋଡ଼ିଆ ବୁଧବାର ଦିନ ଏଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଯେ, କାଉନସିଲରଙ୍କ ସମେତ ମୋଟ ୭ ଜଣଙ୍କୁ ଗିରଫ କରାଯାଇ ସେମାନଙ୍କ ପାଖରୁ ୬ଟି ବନ୍ଧୁକ, ୨୧ଟି ଗଳି, ୭ଟି ବାଘନଖ, ୩ଟି ପିସ୍ତଲ ଓ ଗୋଟିଏ ଟିଭିଏସ ଆପାଚି ମୋଟର ସାଇକେଲ ଜବତ ହୋଇଥିବା ରାଜେଶ ସାହୁ ଜଣେ ଚୋରା ବନ୍ଧୁକ ବେପାରୀ ।

ସେ ବିହାର ଓ ଝାଡ଼ଖଣ୍ଡରୁ ବନ୍ଧୁକ ଓ ଗୁଳି ଆଣି ସମ୍ବଲପୁର ଓ ଝାରସୁଗୁଡ଼ା ଜିଲାର ବିଭିନ୍ନ ଲୋକଙ୍କୁ ବିକ୍ରି କରିଥିଲା ।

ତା’ର ସୂଚନା ଅନୁସାରେ ପୁଲିସ ସମ୍ବଲପୁରର ୨୧ ନମ୍ବର ୱାର୍ଡ କାଉନସିଲର ଲକ୍ଷ୍ମୀନାରାୟଣ ପଟେଲ ଓରଫ ଘନକୁ ଗିରଫ କରି ଗୋଟିଏ ବନ୍ଧୁକ ଜବତ କରିଛି । ସେହିପରି ରେଙ୍ଗାଲି ଗୁରୁପାଲିର ରୁସ୍ତମ କବାଡ଼ିବାଲାକୁ ଗିରଫ କରି ଗୋଟିଏ ମାଉଜର, ୧ ପିସ୍ତଲ ଓ ୧ଗୁଳି ଜବତ କରିଛି । ଶାସନ ଥାନା ପରମାଣପୁରର ଚାଷୀ ଦିଲୀପ ବଘାରଠାରୁ ଏକ ପିସ୍ତଲ ଜବତ କରାଯାଇଛି ।

ଝାରସୁଗୁଡ଼ା ଜିଲା ଓରିଏଣ୍ଟ ଥାନାର ଗଜପତିନଗର ବାସିନ୍ଦା ସୁନିଲ ମଲ୍ଲିକ ଓ ବିଲୁ ସାହୁଙ୍କଠାରୁ ଏକ ୭.୬ କ୍ୟାଲିବରର ମାଉଜର, ୨ଟି ମ୍ୟାଗାଜିନ ଓ ୩ଟି ଗୁଳି ଜବତ କରାଯାଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର,ନଭେମ୍ବର ୩ (ଓଡ଼ିଶା ଡ଼ଟ୍ କମ୍)–ସମ୍ବଲପୁର ଗୋଲବଜାରରେ ଦାଦା ବଟିକୁ କେନ୍ଦ୍ରକରି ଘଟିଥିବା ଗୁଳିକାଣ୍ଡ ପ୍ରତିବାଦରେ ଆଜି ବନ୍ଦ ପାଳନ ହୋଇଯାଇଛି । ଏହି ପରିପ୍ରେକ୍ଷୀରେ ସମସ୍ତ ବ୍ୟବସାୟୀ ପ୍ରତିଷ୍ଠାନ ବନ୍ଦ ରହିଥିଲା । ଗୁଳିମାଟରେ ଆହତଙ୍କ ଅବସ୍ଥା ସ୍ଥିର ରହିଛି ।

ଘଟଣାରେ ସଂପୃକ୍ତ ମୁଖ୍ୟ ଅଭିଯୁକ୍ତଙ୍କ ସେକ୍ ମୁଜିର ସହିତ ୩ ଜଣଙ୍କୁ ପୋଲିସ ଗିରଫ କରିଥିବାବେଳେ ଅନ୍ୟ ଅଭିଯୁକ୍ତ ଫେରାର ଅଛନ୍ତି । ଆଗକୁ ଗୋଲ ବଜାରର ସୁରକ୍ଷା ବ୍ୟବସ୍ଥା କଡାକଡି କରିବା ପାଇଁ ଦାବି କରିଛନ୍ତି ବ୍ୟବସାୟୀ ମାନେ ।

ଦାଦା ବଟି ନଦେବାରୁ ଗୁରୁବାର ଅପରାଧୀମାନଙ୍କ ଆକ୍ରମଣର ଶୀକାର ହୋଇଥିବା ଗୋଲବଜାରର ବ୍ୟବସାୟୀ ସୀତାରାମ ସାହୁ ପୁଲିସରେ ଏତଲା ଦେଇଥିବାରୁ ଶୁକ୍ରବାର ଦିନ ଗୁଳିମାଡ଼ ଖାଇଥିଲେ । ତାଙ୍କୁ ସୁରକ୍ଷା ଦେଇଥିବା ଅନ୍ୟ ଜଣେ ଦୋକାନୀ ତ୍ରିଲୋକ ସାହା ମଧ୍ୟ ଗୁଳିମାଡ଼ରେ ଆହତ ହୋଇଛନ୍ତି ।

ଏହା ସ୍ଥାନୀୟ ବ୍ୟବସାୟୀ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ସେମାନେ ଗୋଲବଜାର ବନ୍ଦ କରି ପ୍ରଥମେ ଟାଉନ ଥାନା ଓ ପରେ ଏସପିଙ୍କ ବାସଭବନ ଘେରାଉ କରିଥିଲେ ବୋଲି ଜଣାପଡ଼ିଛି ।

ପ୍ରଥମ ଆକ୍ରମଣ ହେଲା ପରେ ପୁଲିସ ପର୍ଯ୍ୟାପ୍ତ ସୁରକ୍ଷା ଦେଇଥିଲେ ଅପରାଧୀମାନେ ଦ୍ୱିତୀୟ ଥର ଏଭଳି ମରଣାନ୍ତକ ଆକ୍ରମଣ କରିପାରିନଥାନ୍ତେ ବୋଲି ସେମାନେ କ୍ଷୋଭବ୍ୟକ୍ତ କରୁଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡଟ୍ କମ୍ ସମ୍ବାଦଦାତା

ସମ୍ବଲପୁର,ଅକ୍ଟୋବର ୯(ଓଡ଼ିଶା ଡଟ୍ କମ୍)-ବହୁ ଚର୍ଚ୍ଚିତ ନାବାଳିକା ବଳତ୍କାର ଓ ହତ୍ୟା ମାମଲାର ଆସୀମୀ ପ୍ରଦୀପ ଦଳେଇକୁ ସମ୍ବଲପୁର ଜିଲ୍ଲା ଦୌରାଜଜ ବିଭୁ ପ୍ରସାଦ ରାଉତରାୟ ଫାଶୀ ଦଣ୍ଡରେ ଦଣ୍ଡିତ କରିଛନ୍ତି ।

ଉଭୟ ପକ୍ଷ ଓକିଲଙ୍କ ଜବାବ ସୁଆଲପରେ ଦୌରାଜଜ୍ ଶ୍ରୀ ରାଉତରାୟ ମାମଲାର ଦଣ୍ଡ ବିଧାନ କରିଥିଲେ ।

ଅପହରଣ ଘଟଣା ପାଇଁ ଆଇପିସିର ଦଫା ୩୬୬ରେ ୧୦ ବର୍ଷ ସଶ୍ରମ କାରାଦଣ୍ଡ ଓ ୫ ହଜାର ଟଙ୍କା ଜୋରିମାନା ଏବଂ ଜୋରିମାନା ଅନାଦେୟ ଆଉ ଏକ ବର୍ଷ ସଶ୍ରମ କାରାଦଣ୍ଡ ଶୁଣାଇଥିଲେ ।

ଧର୍ଷଣ ପାଇଁ ଦଫା ୩୭୨ରେ ଆଜୀବନ କାରାଦଣ୍ଡ ଓ ୭ ହଜାରଟଙ୍କା ଜୋରିମାନା କରିଥିଲେ । ଜରିମାନା ଅନାଦେୟ ଆଉ ଦେଢବର୍ଷ ସଶ୍ରମ କାରାଦାଣ୍ଡାଦେଶ ଦେଇଥିଲେ ।

ପ୍ରମାଣ ନଷ୍ଟ ପାଇଁ ଦଫା ୨୦୧ରେ ୫ ବର୍ଷ ସଶ୍ରମ କାରାଦଣ୍ଡ ଓ ହଜାରେ ଟଙ୍କା ଜୋରିମାନା କରିଛନ୍ତି । ଜରିମାନା ଅନାଦେୟ ଅଧିକ ୬ ମାସ ସଶ୍ରମ କାରା ଦଣ୍ଡାଦେଶ ଦେଇଛନ୍ତି । ହତ୍ୟା ଦଫା ୩୦୨ରେ ଅଦାଲତ ମୁତ୍ୟୁ ଦଣ୍ଡାଦେଶ ଶୁଣାଇଛନ୍ତି ।

ଅଦାଲତଙ୍କ ଏହି ରାୟଙ୍କୁ ମୃତା ଛାତ୍ରୀଙ୍କ ପରିବାର ପକ୍ଷରୁ ସ୍ୱାଗତ କରାଯାଇଛି । ଆମ ପରିବାରକୁ ନ୍ୟାୟ ମିଳିଛି । ଆଉ କାହାରି ଝିଅ ସହ ଏଭଳି ଅନ୍ୟାୟ ନହେଉ ।

ଅଭିଯୁକ୍ତ ପ୍ରଦୀପକୁ ଶୀଘ୍ର ଫାଶୀ ଦଣ୍ଡରେ ଝୁଲିବା ସେ ଦେଖିବାକୁ ଚାହାଁନ୍ତି ବୋଲି ନାବାଳିକା ଉର୍ମିଳାଙ୍କ ମା ସନ୍ତୋଷିନୀ ନାଗ ପ୍ରତିକ୍ରିୟା ବ୍ୟକ୍ତ କରିଛନ୍ତି ।

ଗତ ସେପ୍ଟେମ୍ବର ମାସରେ ଘଟିଥିବା ଏହି ଜଘନ୍ୟ ଘଟଣାର ବିଚାର ମାତ୍ର ୨୮ ଦିନରେ ଶେଷ ହୋଇଥିଲା ।

ସୂଚନାଯୋଗ୍ୟ ଯେ, ତିଁଳାପଡାର ରାଣି ବଗିଚାରେ ନିଜ ପିତାମାନଙ୍କ ସହ ରହୁଥିବା ଉକ୍ତ ନାବାଳିକାକୁ ପ୍ରଦୀପ ଚାଉମିନ୍ ଖାଇିବାକୁ ଡାକିନେଇ ମନ୍ଦଲିଆ ପାର୍କକୁ ନେଇ ଯାଇଥିଲା ।

ପ୍ରଦୀପ ପୂର୍ବରୁ ସେମାନଙ୍କର ପରିଚିତ ଥିଲା । ନେବା ସମୟରେ ମା ସନ୍ତୋଷିନୀ ଓ ଅନ୍ୟଜଣେ ସ୍ଥାନୀୟ ମହିଳା କୈକେୟୀ ହାତୀ ତୁାକୁ ଦେଖି ଉର୍ମିଳାକୁ ନେବାକୁ ମନାକରିଥିଲେ ।

ପ୍ରଦୀପ ସେମାନଙ୍କ କଥା ନଶୁଣି ତାକୁ ନେଇ ଯାଇଥିଲେ । ରାସ୍ତା ପାର୍ଶ୍ୱସ୍ଥିତ ଏକ ବୁଦାମୂଳେ ତାକୁ ବଳକ୍ରାର କରିବାପରେ ତଣ୍ଟିଚିପି ହତ୍ୟାକରିଥିଲାା ପରେ ତାର ମୃତ ଦେହକୁ ଏକ ଖାଲୁଆ ଯାଗୁକୁ ଫିଙ୍ଗିଦେଇ ଫେରାର ହୋଇ ଯାଇଥିଲା ।

କଟକ ଜିଲ୍ଲାର ମୂଳ ନିବାସୀ ଅଭିଯୁକ୍ତ ପ୍ରଦୀପ ଦଳେଇ ଜଣେ ପତ୍ନୀ ପରିତ୍ୟକ୍ତ । ସେ ସମ୍ବଲପୁର ଆସି ବଡବଜାର ଅଞ୍ଚଳରେ ଏକ ଭଡାଘରେ ରହୁଥିଲେ । ଫାର୍ମରୋଡରେ ସେ ଜଣେ ବ୍ୟକ୍ତିଙ୍କ ଗାଡି ଚଳାଉଥିଲେ ।

ଘଟଣାଦିନ ବିଳମ୍ବିତ ସଂଧ୍ୟା ପର୍ଯ୍ୟନ୍ତ ଉର୍ମିଳା ଘରକୁ ନଫେରିବାରୁ ଘରଲୋକମାନଙ୍କ ସନ୍ଦେହ ହୋଇଥିଲା । ଖୋଜାଖୋଜି କରିବାପରେ ବି ନମିଳିବାରୁ ପଡାବାସୀଙ୍କ ସହ ପରିବାର ଲୋକେ ରାମଜୀଗୁଡି ଯାଇ ପ୍ରଦୀପକୁ ଧରି ଥାନାରେ ଜିମା ଦେଇଥିଲେ ।

ସମ୍ବଲପୁର ପୋଲିସ ଏହି ମାମଲାକୁ ଗୁରୁତ୍ୱର ସହ ନେଇ ମାମଲାର ତ୍ୱରିତ ବିଚାର ପାଇଁ ଘଟଣାର ମାତ୍ର ୭ ଦିନ ମଧ୍ୟରେ ଏସ୍ଡିଜେଏମ୍ଙ୍କ କୋର୍ଟରେ ଚାର୍ଜସିଟ୍ ଦାଖଲ କରିଥିଲେ ।

ଦୁଇ ଜଣ ପୁଲିସ ଅଫିସର ଆଇଆଇସି ଆରଏନ୍ ଦେଓ ଓ ତଦନ୍ତକାରୀ ପୁଲିସ ଅଫିସର ରଶ୍ମିତା ଜେନାଙ୍କ ସମେତ ୧୨ ଜଣଙ୍କ ସାକ୍ଷ ନିଆ ଯାଇଥିଲା ।

ଓଡ଼ିଶା ଡଟ୍ କମ୍