ସମ୍ବଲପୁର

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ଜୁଲାଇ ୨୪(ଓଡ଼ିଶା ଡ଼ଟ୍ କମ୍) ସମ୍ବଲପୁର ଜିଲ୍ଲା ସ୍ଥିତ ହୀରାକୁଦ ଜଳଭଣ୍ଡାରରୁ ବୁଧବାର ଚଳିତ ବର୍ଷର ପ୍ରଥମ ବନ୍ୟା ଜଳ ନିଷ୍କାସନ କରାଯାଇଛି ।

ପୂର୍ବନିର୍ଦ୍ଧାରିତ କାର୍ଯ୍ୟକ୍ରମ ଅନୁଯାୟୀ ଜଳଭଣ୍ଡାରରେ ପୂଜାର୍ଚ୍ଚନା କରିବା ପରେ ଏହାର ସାତ ନମ୍ବର ସୁଇସ୍ ଗେଟରୁ ମହାନଦୀକୁ ବନ୍ୟାଜଳ ଛଡ଼ାଯାଇଛି ।

ପ୍ରତି ସେକେଣ୍ଡରେ ଜଳଭଣ୍ଡାରରୁ ୧୪, ୪୭୨ ଘନଫୁଟ୍ ଜଳ ନିଷ୍କାସିତ ହେଉଥିବା ବେଳେ ୧ଲକ୍ଷ ୫୨ ହଜାର ୨୦୫ ଘନଫୁଟ୍ ଜଳ ଜଳଭଣ୍ଡାରକୁ ପ୍ରବେଶ କରୁଛି । ବର୍ତମାନ ଜଳଭଣ୍ଡାରର ଜଳସ୍ତର ୬୦୫.୩୫ ଫୁଟ୍ ରହିଛି ।

ବନ୍ୟା ଜଳ ମହାନଦୀରେ ଯାଇ ୨୫ ତାରିଖ ଅପରାହ୍ନରେ ନରାଜ୍ ଓ ୨୬ ସକାଳେ ମହାନଦୀ ମୁହାଣ ପାରାଦୀପରେ ପହଞ୍ଚିବ ବୋଲି କୁହାଯାଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ଜୁଲାଇ ୨୨(ଓଡ଼ିଶା ଡ଼ଟ୍ କମ୍) ହୀରାକୁଦ ଜଳଭଣ୍ଡାରରୁ ଚଳିତ ବର୍ଷର ପ୍ରଥମ ବନ୍ୟା ଜଳ ଆସନ୍ତା ୨୪ତାରିଖରେ ନିଷ୍କାସନ କରାଯିବ ବୋଲି କୁହାଯାଇଛି ।

ବନ୍ୟା ଜଳ ମହାନଦୀରେ ଯାଇ ୨୫ ତାରିଖ ଅପରାହ୍ନରେ ନରାଜ୍ ଓ ୨୬ ତାରିଖ ସକାଳେ ମହାନଦୀ ମୁହାଣ ପାରାଦୀପରେ ପହଞ୍ଚିବ ।

୨୪ ତାରିଖ ଅପରାହ୍ନ ୩ଟାରେ ବନ୍ୟା ଜଳ ନିଷ୍କାସନ ପୂର୍ବରୁ ପ୍ରତ୍ୟେକ ୫ ମିନିଟ୍ରେ ଉଚ୍ଚ କ୍ଷମତା ବିଶିଷ୍ଟ ସାଇରନ୍ ବାଜିବ ଏବଂ ୩ଟା ୪୫ମି. ପରେ ପ୍ରତ୍ୟେକ ୨୦ ସେକେଣ୍ଡରେ ୧୫ ମିନିଟ୍ ପାଇଁ ଥରେ ଲେଖାଏଁ ସାଇରନ ବାଜିବ ।

ଉକ୍ତଦିନ ଅପରାହ୍ନ ୪ଟା ପରେ ମସ୍ୟଜୀବୀଙ୍କୁ ମହାନଦୀକୁ ନଯିବା ପାଇଁ ଜଳଭଣ୍ଡାର କର୍ତୃପକ୍ଷ ନିବେଦନ କରିଛନ୍ତି । ରବିବାର ସନ୍ଧ୍ୟା ୬ଟା ସୁଦ୍ଧା ହୀରାକୁଦ ଜଳଭଣ୍ଡାରର ଜଳପତ୍ତନ ୬୦୦.୦୮ ଫୁଟ୍ ରହିଥିବା ବେଳେ ଜଳଭଣ୍ଡାର ମଧ୍ୟକୁ ପ୍ରତି ସେକେଣ୍ଡରେ ୭୫ ହଜାର ୪୯୧ ଘନଫୁଟ୍ ଜଳ ପ୍ରବେଶ କରୁଛି ।

ସେହିପରି ବିଭିନ୍ନ କେନାଲରେ ସମୁଦାୟ ୨୪ ହଜାର ୮୫୨ ଘନଫୁଟ୍ ଜଳ ନିଷ୍କାସିତ ହେଉଛି । ପାୱାର ଚେନାଲରେ ୨୦ ହଜାର ୯୭୧ ଘନଫୁଟ୍, ବରଗଡ଼ କେନାଲରେ ୩ ହଜାର ୫୩୦ ଘନଫୁଟ୍, ଶାସନ କେନାଲରେ ୩୦୦, ସମ୍ବଲପୁର କେନାଲରେ ୪୪ ଓ ହୀରାକୁଦ କେନାଲରେ ୭ ଘନଫୁଟ୍ ଜଳ ନିଷ୍କାସିତ ହେଉଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ମଇ ୬(ଓଡ଼ିଶା ଡ଼ଟ୍ କମ୍) ପୂର୍ବତନ ରାଜ୍ୟସଭା ସଦସ୍ୟ ପତିତପାବନ ପ୍ରଧାନଙ୍କର ରବିବାର ୭୯ ବର୍ଷ ବୟସରେ ପରଲୋକ ହୋଇଯାଇଛି ।

ସେ ତାଙ୍କ ସାକ୍ଷୀପଡ଼ା ବୃକ୍ସହିଲ ସ୍ଥିତ ବାସ ଭବନରେ ଶେଷନିଃଶ୍ୱାସ ତ୍ୟାଗ କରିଛନ୍ତି । ସେ ଦିର୍ଘଦିନ ହେଲା ଶଯ୍ୟାଶାୟୀ ଥିଲେ ।

ମୃତ୍ୟୁ ଖବର ପାଇ ତାଙ୍କ ଶେଷ ଦର୍ଶନ ସକାଶେ ତାଙ୍କ ବାସ ଭବନକୁ ସହରର ବହୁତ ବିଶିଷ୍ଟ ବ୍ୟକ୍ତି, ବୁଦ୍ଧିଜୀବୀ ଓ ବନ୍ଧୁ ପରିଜନଙ୍କ ସୁଅ ଛୁଟିଛି ।

ଜନସାଧାରଣଙ୍କ ଶେଷ ଦର୍ଶନ ନିମନ୍ତେ ତାଙ୍କ ମର ଶରୀରକୁ ଆସନ୍ତାକାଲି ପର୍ଯ୍ୟନ୍ତ ତାଙ୍କ ବାସ ଭବନରେ ରଖାଯିବ । ସୋମବାର ସ୍ଥାନୀୟ ରାଜଘାଟରେ ତାଙ୍କ ଶେଷକୃତ୍ୟ ସଂପନ୍ନ କରାଯିବ ।

ପ୍ରଧାନ ପିଲାଦିନରୁ ଜଣେ ମେଧାବୀଛାତ୍ର ଥିଲେ । ସମାଜବାୀନେତା ରାମ ମନୋହର ଲୋହିଆଙ୍କ ଆଦର୍ଶରେ ଅନୁପ୍ରାଣିତ ହୋଇ ସେ ରାଜନୀତିରେ ଯୋଗ ଦେଇଥିଲେ ।

ସେ ଜୟ ପ୍ରକାଶ ନାରାୟଣଙ୍କ ସପୂର୍ଣ୍ଣ କ୍ରାନ୍ତିରେ ସକ୍ରିୟ ଭୂମିକା ଗ୍ରହଣ କରି କାରାବରଣ କରିଥିଲେ । ଦୀର୍ଘ ୧୯ ମାସ କାରାବରଣ କରି ଜେଲରୁ ଫେରି ତତ୍କାଳୀନ ଜନତାଦଳ ସରକାର ସମୟରେ ରାଜ୍ୟସଭାକୁ ମନୋନୀତ ହୋଇଥିଲେ ।

ସେ ୧୯୮୨ ପର୍ଯ୍ୟନ୍ତ ରାଜ୍ୟସଭା ସାଂସଦ ଥିଲେ । ସେ କିଛିିଦିନ ପାଇଁ ସମ୍ବଲପୁରରୁ ପ୍ରକାଶିତ ଦୈନିକ ହୀରାଖଣ୍ଡର ସଂପାଦନା ଦାୟିତ୍ୱରେ ରହିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ଅପ୍ରେଲ ୩୦(ଓଡ଼ିଶା ଡ଼ଟ୍ କମ୍) ସମ୍ବଲପୁର ଜିଲ୍ଲାପାଳଙ୍କୁ ଗିରଫ ତଥା ନିଲମ୍ବନ କରିବା ଦାବିରେ ଆସନ୍ତା ମଇ ୮ରେ ପଶ୍ଚିମ ଓଡ଼ିଶା ବନ୍ଦ ଡାକରା ପାଇଁ ପଶ୍ଚିମ ଓଡ଼ିଶା ଓକିଲ କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ପକ୍ଷରୁ ନିଷ୍ପତି ନିଆଯାଇଛି ।

ପଶ୍ଚିମ ଓଡ଼ିଶା ଓକିଲ କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ସାଧାରଣ ପରିଷଦ ବୈଠକରେ ୨୮ଟି ଓକିଲ ସଂଘ କର୍ମକତା ଉପସ୍ଥିତିରେ ଏହି ନିଷ୍ପତି ନିଆଯାଇଥିବା ରବିବାର ଏକ ସାମ୍ବାଦିକ ସମ୍ମିଳନୀରେ ସଂଘ ପକ୍ଷରୁ କୁହାଯାଇଛି ।

ଗତ ୨୩ ତାରିଖ ଜନସାଧାରଣଙ୍କ ସ୍ୱାର୍ଥକୁ ଦୃଷ୍ଟିରେ ରଖି ୱେସ୍କୋର ବିଦ୍ୟୁତ କାଟ୍ ପ୍ରତିବାଦରେ ଶାନ୍ତିପୂର୍ଣ୍ଣ ପ୍ରତିବାଦ କରିବାକୁ ଓକିଲମାନେ ଏକ ବସ୍ରେ ବୁର୍ଲା ଯିବାକୁ ବାହାରୁ ଥିବା ବେଳେ ଜିଲ୍ଲାପାଳ ସେଠାରେ ପହଂଚି ଓକିଲଙ୍କୁ ଆକ୍ଷେପ କରି ବିଭିନ୍ନ ପ୍ରକାର ଅଶାଳୀନ ଭାଷା ପ୍ରୟୋଗ କରି ଗାଳିଗୁଲଜ କରିଥିଲେ ବୋଲି କୁହାଯାଇଛି ।

ଏଥିପାଇଁ ଯେଉଁ ଅପ୍ରିତିକର ପରିସ୍ଥିତି ସୃଷ୍ଟି ହୋଇଥିଲା ସେଥିପାଇଁ ସଂପୂର୍ଣ୍ଣ ଭାବେ ଜିଲ୍ଲାପାଳ ହିିଁ ଦାୟୀ ବୋଲି ସଂଘ ପକ୍ଷରୁ କୁହାଯାଇଛି ।

ଏହି ଘଟଣାକୁ ନେଇ ଉଭୟ ପକ୍ଷରୁ ଏତାଲା ଦିଆଯାଇଥିବା ବେଳେ ଜିଲ୍ଲାପାଳ ଓ ଉପନିବନ୍ଧକଙ୍କ
ଏତଲା ଭିତ୍ତିରେ ୧୮ ଜଣ ଓକିଲଙ୍କୁ କେବଳ ଗିରଫ କରାଯାଇଥିଲା ।

ତେବେ ଓକିଲଙ୍କ ପକ୍ଷରୁ ଦିଆଯାଇଥିବା ଏତଲା ଭିତ୍ତିରେ ଜିଲ୍ଲାପାଳଙ୍କ ବିରୁଦ୍ଧରେ କୌଣସି
କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ । ସରକାରଙ୍କ ଏହି ପାତରଅନ୍ତର ନୀତି ବିରୋଧରେ ସମଗ୍ରସମଗ୍ର ପଶ୍ଚିମ ଓଡ଼ିଶାର ବିଭିନ୍ନ ଓକିଲ ସଂଘ ଆସନ୍ତା ୧ ତାରିଖରୁ ୭ ତାରିଖ ପର୍ଯ୍ୟନ୍ତ ନିଜ ନିଜ ଅଂଚଳରେ ଆନ୍ଦୋଳନ କରିବାକୁ ସ୍ଥିର କରାଯାଇଛି ।

ଏହି ସମୟ ମଧ୍ୟରେ ସଂଘ ପକ୍ଷରୁ ଜିଲ୍ଲାପାଳଙ୍କ ଗିରଫାରୀ ଓ ନିଲମ୍ବନ ଦାବିରେ କାର୍ଯ୍ୟବନ୍ଦ
ଆନ୍ଦୋଳନ ସହ ପ୍ରତ୍ୟେକଦିନ ବିକ୍ଷୋଭ, ଧାରଣା ଆଦି ଆନ୍ଦୋଳନ କରି ସରକାରଙ୍କ ଉପରେ ଚାପ
ପ୍ରୟୋଗ କରାଯିବ ବୋଲି କୁହାଯାଇଛି ।

ଯଦି ବନ୍ଦ ଡ଼ାକରା ସତ୍ୱେ ଜିଲ୍ଲାପାଳଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାନଯାଏ ତେବେ ଉକ୍ତଦିନ ସଂଘ ଓ କିମିଟି ପକ୍ଷରୁ ଆଗାମୀଦିନରେ ଆନ୍ଦୋଳନର ନୂତନ ରୂପରେଖ ସଂପର୍କରେ ସୂଚନା ଦିଆଯିବ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ ସମ୍ବାଦଦାତା

ଭୁବନେଶ୍ୱର, ଅପ୍ରେଲ ୨୭(ଓଡ଼ିଶା ଡ଼ଟ୍ କମ୍) ସମ୍ବଲପୁର ଜିଲ୍ଲାପାଳ ଓ ଓକିଲ ସଂଘ ବିବାଦ
ଘଟଣାରେ କ୍ରାଇମବ୍ରାଂଚ ପୋଲିସ ତଦନ୍ତ ଆରମ୍ଭ କରିଛି ।

କ୍ରାଇମବ୍ରାଂଚର ଏକ ଆଠ ଜଣିଆ ଦଳ ଶୁକ୍ରବାର ସମ୍ବଲପୁରରେ ପହଂଚି ଜିଲ୍ଲା ଏସ୍ପି ଏବଂ ଅତିରିକ୍ତ ଏସ୍ପିଙ୍କ ସହ ଆଲୋଚନା କରିଛନ୍ତି । ତଦନ୍ତକାରୀ ଦଳ ଗଣ୍ଡଗୋଳ ସ୍ଥଳ ମଧ୍ୟ ପରିଦର୍ଶନ କରିଛନ୍ତି ।

ଅନ୍ୟ ପକ୍ଷରେ ଜିଲ୍ଲାପାଳ ମୃଣାଳୀନୀ ଦର୍ଶୱାଲ ରାଜ୍ୟ ମହିଳା କମିଶନଙ୍କଦ୍ୱାରସ୍ଥ ହୋଇଛନ୍ତି ।

ଗୁରୁତ୍ୱପୂର୍ଣ ଦାୟିତ୍ୱରେ ଥିବା ଜଣେ ମହିଳା ଅଧିକାରୀଙ୍କୁ ଆଇନଜୀବୀମାନେ ଯେଉଁ ବ୍ୟବହାର ଦେଖାଇଛନ୍ତି ତାହା ବିଭିନ୍ନ କ୍ଷେତ୍ରରେ କାର୍ଯ୍ୟରତ ମହିଳା ଅଧିକାରୀ ଓ କର୍ମଚାରୀଙ୍କ ମାନସିକତାକୁ ଗଭୀର ଭାବେ ପ୍ରଭାବିତ କରିଛି ବୋଲି ସେ କମିଶନଙ୍କ ନିକଟକୁ ପଠାଇଥିବା ଅଭିଯୋଗ ଫର୍ଦ୍ଦରେ ଜଣାଇଛନ୍ତି ।

ଜିଲ୍ଲାର ସର୍ବୋଚ୍ଚ ପ୍ରାଶାସନିକ ପରେ ଥିବା ମହିଳା ଅଧିକାରୀଙ୍କୁ ସେମାନେ ଯେଉଁ ଅଶାଳୀନ ବ୍ୟବହାର ପ୍ରଦର୍ଶନ କରିଛନ୍ତି ତାହା ମହିଳା ଅଧିକାରୀ ଓ କର୍ମଚାରୀ ମନୋବଳକୁ ଶକ୍ତ ଆଘାତ ଲଗାଇଛି, ସେ ଉଲ୍ଲେଖ କରିଛନ୍ତି ।

ତେଣୁ ସେମାନଙ୍କ ବିରୋଧରେ ଦୃଷ୍ଟାନ୍ତମୂଳକ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଆବଶ୍ୟକ ବୋଲି ସେ ଜଣାଇଛନ୍ତି । ତେବେ ଏହି ଅଭିଯୋଗ ମିଳିବା ପରେ କମିଶନ ଅଧ୍ୟକ୍ଷା ସମ୍ବଲପୁର ଯାଇ ତଦନ୍ତ କରିବେ ବୋଲି କହିଛନ୍ତି ।

ଗତ ୨୩ ତାରିଖରେ କେତେକ ଲୋକ ଜମି କିଣାବିକା ପାଇଁ ସବ୍ ରେଜିଷ୍ଟ୍ରାର୍ ଅଫିସ୍କୁ ଯାଇଥିବା ବେଳେ ସେଠାରେ ପାଟିତୁଣ୍ଡ ହୋଇଥିଲା । ସବ୍ ରେଜିଷ୍ଟ୍ରାରଙ୍କ ଅଫିସ୍ରେ ଲୋକମାନେ ଭଙ୍ଗାରୁଜା କରିଥିଲେ ।

ସବ୍ରେଜିଷ୍ଟ୍ରାର ଏସଂପର୍କରେ ତୁରନ୍ତ ଜିଲ୍ଲାପାଳଙ୍କୁ ଜଣାଇଥିଲେ । ଜିଲ୍ଲାପାଳ ସଙ୍ଗେସଙ୍ଗେ ବାର୍ରେ
ପହଂଚି ଦୁର୍ବ୍ୟବହାର ପ୍ରଦର୍ଶନ କରିବା ସହ ସେମାନଙ୍କୁ ଗାଳିଗୁଲଜ କରିଥିବା ଓକିଲମାନେ ଅଭିଯୋଗ କରିଥିଲେ ।

ଓକିଲମାନେ ଏଥିରେ ଉତ୍କ୍ଷିପ୍ତ ହୋଇ ଜିଲ୍ଲାପାଳଙ୍କୁ ତୁରନ୍ତ ମନ୍ତବ୍ୟ ପ୍ରତ୍ୟାହାର କରିବାକୁ କହିଥିଲେ । ପରେ ଓକିଲ ଓ ସ୍ଥାନୀୟ ଲୋକମାନେ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟରେ ପହଂଚି ବ୍ୟାପକ ଭଙ୍ଗାରୁଜା କରିଥିଲେ ।

ଗୁରୁବାର ପୋଲିସ ଏହି ଘଟଣାରେ ୧୮ ଜଣ ଆଇନଜୀବୀଙ୍କୁ ଗିରଫ କରିବା ପରେ ଜାମିନରେ ଛାଡ଼ି ଦେଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ଅପ୍ରେଲ ୨୬(ଓଡ଼ିଶା ଡ଼ଟ୍ କମ୍) ସମ୍ବଲପୁର ଜିଲ୍ଲାପାଳ ଓ ଓକିଲ ସଂଘ ବିବାଦ ଘଟଣାରେ ପୋଲିସ ଗୁରୁବାର ୧୬ ଜଣ ଆଇନଜୀବୀଙ୍କୁ ଗିରଫ କରିଛି ।

ଗିରଫ ବ୍ୟକ୍ତିଙ୍କ ମଧ୍ୟରେ ଅଛନ୍ତି ଜିଲ୍ଲା ଓକିଲ ସଂଘର ସଭାପତି ପ୍ରମୋଦ କୁମାର ରଥ ଏବଂ ସଂପାଦକ ବିଜିତେନ୍ଦ୍ରୀୟ ପ୍ରଧାନ ।

ସେହିପରି ଗତ ସୋମବାର ଜିଲ୍ଲା ସବ୍ ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ ଭଙ୍ଗାରୁଜା କରିବା ଅଭିଯୋଗରେ ପୋଲିସ ଅନ୍ୟ ଚାରି ଜଣଙ୍କୁ ମଧ୍ୟ ଗିରଫ କରିଥିବା ଜଣେ ଅଧିକାରୀ କହିଛନ୍ତି ।

ସୋମବାର କେତେକ ଲୋକ ଜମି କିଣାବିକା ପାଇଁ ସବ୍ ରେଜିଷ୍ଟ୍ରାର୍ ଅଫିସ୍କୁ ଯାଇଥିବା ବେଳେ ସେଠାରେ ପାଟିତୁଣ୍ଡ ହୋଇଥିଲା । ସବ୍ ରେଜିଷ୍ଟ୍ରାରଙ୍କ ଅଫିସ୍ରେ ଲୋକମାନେ ଭଙ୍ଗାରୁଜା କରିଥିଲେ ।

ସବ୍ରେଜିଷ୍ଟ୍ରାର ଏସଂପର୍କରେ ତୁରନ୍ତ ଜିଲ୍ଲାପାଳଙ୍କୁ ଜଣାଇଥିଲେ । ଜିଲ୍ଲାପାଳ ସଙ୍ଗେସଙ୍ଗେ ବାର୍ରେ ପହଂଚି ଦୁର୍ବ୍ୟବହାର ପ୍ରଦର୍ଶନ କରିବା ସହ ସେମାନଙ୍କୁ ଗାଳିଗୁଲଜ କରିଥିବା ଓକିଲମାନେ ଅଭିଯୋଗ କରିଥିଲେ ।

ଓକିଲମାନେ ଏଥିରେ ଉତ୍କ୍ଷିପ୍ତ ହୋଇ ଜିଲ୍ଲାପାଳଙ୍କୁ ତୁରନ୍ତ ମନ୍ତବ୍ୟ ପ୍ରତ୍ୟାହାର କରିବାକୁ କହିଥିଲେ । ପରେ ଓକିଲ ଓ ସ୍ଥାନୀୟ ଲୋକମାନେ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟରେ ପହଂଚି ବ୍ୟାପକ ଭଙ୍ଗାରୁଜା କରିଥିଲେ ।

ସରକାର ପୂର୍ବରୁ ଏହି ଘଟଣାର କ୍ରାଇମବ୍ରାଂଚ ତଦନ୍ତ ପାଇଁ ନିର୍ଦ୍ଦେଶ ଦେଇଥିବା ବେଳେ ରାଜ୍ୟ ଆଇଏଏସ୍ ସଂଘ ମଧ୍ୟ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ସ୍ମାରକପତ୍ର ଦେଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ଅପ୍ରେଲ ୨୫(ଓଡ଼ିଶା ଡ଼ଟ୍ କମ୍) ସମ୍ବଲପୁର ଜିଲ୍ଲାପାଳ ଓ ଓକିଲ ସଂଘର ବିବାକୁ ନେଇ ସହରରେ ବୁଧବାର ଦିଆଯାଇଥିବା ବନ୍ଦ ଡ଼ାକରା ଯୋଗୁଁ ସାଧାରଣ ଜୀବନଯାତ୍ରା ପ୍ରଭାବିତ ହୋଇଛି ।

ଓକିଲ ସଂଘର ଏହି ୧୨ ଘଂଟିଆ ବନ୍ଦ ଯୋଗୁଁ ସମସ୍ତ ଦୋକାନ ବଜାର, ସରକାରୀ କାର୍ଯ୍ୟାଳୟ,ବୈଷୟିକ ଅନୁଷ୍ଠାନ, ଯାନବାହାନ ଚଳାଚଳ ବନ୍ଦ ରହିଥିବା ବେଳେ ଶିକ୍ଷାନୁଷ୍ଠାନ ଗୁଡ଼ିକ ଖୋଲା ରହିଛି ।

ଯାନବାହାନ ଚଳାଚଳ ବନ୍ଦ ଯୋଗୁଁ ବିଭିନ୍ନ ସ୍ଥାନରୁ ଆସିଥିବା ଯାତ୍ରୀମାନେ ସେମାନଙ୍କର ଗନ୍ତବ୍ୟସ୍ଥଳକୁ ଯାଇନପାରି ଅସୁବିଧାର ସମ୍ମୁଖିନ ହୋଇଛନ୍ତି ।

ସଂଘର କର୍ମକର୍ତା ଏବଂ ଉଠା ଦୋକାନୀ ସଂଘର କର୍ମକର୍ତାମାନେ ମାନେ ଜିଲ୍ଲାପାଳଙ୍କ ବହିସ୍କାର ଦାବିରେ ବିଭିନ୍ନ ସ୍ଲୋଗାନ ଦେଇ ଧାରଣା ଦେଇଛନ୍ତି । ବନ୍ଦକୁ ଦୃଷ୍ଟିରେ ରଖି ସହରର ବିଭିନ୍ନ ସ୍ଥାନରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।

ରାଜ୍ୟ ସରକାର ପୂର୍ବରୁ ଏହି ଘଟଣାର କ୍ରାଇମବ୍ରାଂଚ ତଦନ୍ତ ପାଇଁ ନିର୍ଦ୍ଦେଶ ଦେଇଥିବା ବେଳେ ଆଜି ରାଜ୍ୟ ଆଇଏଏସ୍ ସଂଘ ପକ୍ଷରୁ ବରିଷ୍ଠ ଅଧିକାରୀମାନେ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ସ୍ମାରକପତ୍ର ଦେଇଛନ୍ତି ।

ସୋମବାର କେତେକ ଲୋକ ଜମି କିଣାବିକା ପାଇଁ ସବ୍ରେଜିଷ୍ଟ୍ରାର୍ ଅଫିସ୍କୁ ଯାଇ ସେମାନେ ପୁରୁଣା ଜମି ମୂଲ୍ୟରେ ଷ୍ଟାମ୍ପ ଡ୍ୟୁଟି ବୋକୁ ସବ୍ ରେଜିଷ୍ଟ୍ରାର୍ଙ୍କୁ ଅନୁରୋଧ କରିଥିବା ବେଳେ ଏହାକୁ ନେଇ ପାଟିତୁଣ୍ଡ ହୋଇଥିଲା । ସବ୍ ରେଜିଷ୍ଟ୍ରାରଙ୍କ ଅଫିସ୍ରେ ଲୋକମାନେ ଭଙ୍ଗାରୁଜା କରିଥିଲେ ।

ସବ୍ରେଜିଷ୍ଟ୍ରାର ଏସଂପର୍କରେ ତୁରନ୍ତ ଜିଲ୍ଲାପାଳଙ୍କୁ ଜଣାଇଥିଲେ । ଜିଲ୍ଲାପାଳ ସଙ୍ଗେସଙ୍ଗେ ବାର୍ରେ ପହଂଚି ଦୁର୍ବ୍ୟବହାର ପ୍ରଦର୍ଶନ କରିବା ସହ ସେମାନଙ୍କୁ ଗାଳିଗୁଲଜ କରିଥିବା ଓକିଲମାନେ ଅଭିଯୋଗ କରିଥିଲେ ।

ଓକିଲମାନେ ଏଥିରେ ଉତ୍କ୍ଷିପ୍ତ ହୋଇ ଜିଲ୍ଲାପାଳଙ୍କୁ ତୁରନ୍ତ ମନ୍ତବ୍ୟ ପ୍ରତ୍ୟାହାର କରିବାକୁ କହିଥିଲେ । ପରେ ଓକିଲ ଓ ସ୍ଥାନୀୟ ଲୋକମାନେ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟରେ ପହଂଚି ବ୍ୟାପକ ଭଙ୍ଗାରୁଜା କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ଅପ୍ରେଲ ୨୩(ଓଡ଼ିଶା ଡ଼ଟ୍ କମ୍) ଓକିଲଙ୍କୁ ଦୁର୍ବ୍ୟବହାର ପ୍ରତିବାରେ ସୋମବାର ସମ୍ବଲପୁରରେ ଓକିଲ ସଂଘ ଓ ଜିଲ୍ଲାପାଳଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିବା ବେଳେ ବ୍ୟାପକ ଭଙ୍ଗାରୁଜା ହୋଇଛି ।

ଜମି ପଞ୍ଜିକରଣ ଉପରେ ହାଇକୋର୍ଟ ରାୟ ଗତ ଶନିବାର ପ୍ରକାଶ ପାଇବା ପରେ ଆଜି କେତେକ ଲୋକ ଜମି କିଣାବିକା ପାଇଁ ସବ୍ ରେଜିଷ୍ଟ୍ରାର୍ ଅଫିସ୍ ଯାଇଥିଲେ । ସେଠାରେ ସେମାନେ ପୁରୁଣା ଜମି ମୂଲ୍ୟରେ ଷ୍ଟାମ୍ପ ଡ୍ୟୁଟି ବୋକୁ ସବ୍ ରେଜିଷ୍ଟ୍ରାର୍ଙ୍କୁ ଅନୁରୋଧ କରିଥିଲେ ।

ତେବେ ସେ ହାଇକୋର୍ଟ ରାୟ ପାଇ ନାହାନ୍ତି ବୋଲି ଦର୍ଶାଇ ବର୍ଦ୍ଧିତ ରବର ଷ୍ଟାମ୍ପ ଡ୍ୟୁଟି ଦେବାକୁ କହିଥିଲେ । ଫଳରେ ଏହାକୁ ନେଇ ପାଟିତୁଣ୍ଡ ହୋଇଥିଲା । ସବ୍ ରେଜିଷ୍ଟ୍ରାରଙ୍କ ଅଫିସ୍ରେ ଲୋକମାନେ ଭଙ୍ଗାରୁଜା କରିଥିଲେ ।

ସବ୍ରେଜିଷ୍ଟ୍ରାର ଏସଂପର୍କରେ ତୁରନ୍ତ ଜିଲ୍ଲାପାଳଙ୍କୁ ଜଣାଇଥିଲେ । ଜିଲ୍ଲାପାଳ ସଙ୍ଗେସଙ୍ଗେ ବାର୍ରେ
ପହଂଚି ଦୁର୍ବ୍ୟବହାର ପ୍ରଦର୍ଶନ କରିବା ସହ ସେମାନଙ୍କୁ ଗାଳିଗୁଲଜ କରିଥିବା ଓକିଲମାନେ ଅଭିଯୋଗ କରିଛନ୍ତି ।

ଓକିଲମାନେ ଏଥିରେ ଉତ୍କ୍ଷିପ୍ତ ହୋଇ ଜିଲ୍ଲାପାଳଙ୍କୁ ତୁରନ୍ତ ମନ୍ତବ୍ୟ ପ୍ରତ୍ୟାହାର କରିବାକୁ କହିଥିଲେ । ତେବେ ଜିଲ୍ଲାପାଳ ଘଟଣାସ୍ଥଳରୁଦୌଡ଼ିଯାଇ ଏସ୍ପିଙ୍କ କାର୍ଯ୍ୟାଳୟ ଭିତରେ ପଶିଯାଇଥିଲେ ।

ପରେ ଓକିଲ ଓ ସ୍ଥାନୀୟ ଲୋକମାନେ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟରେ ପହଂଚି ବ୍ୟାପକ
ଭଙ୍ଗାରୁଜା କରିଥିଲେ ।

ତେବେ ସବ୍ରେଜିଷ୍ଟ୍ରାରଙ୍କୁ ଦୁର୍ବବ୍ୟହାର ପ୍ରଦର୍ଶନ କରାଯିବା ଖବର ପାଇ ଓକିଲଙ୍କ ସହିତ ଆଲୋଚନା ପାଇଁ ସେ ଯାଇଥିଲେ ଏବଂ ସେଠାରେ ଓକିଲମାନେ ତାଙ୍କୁ ଗାଳି ଗୁଲଜ କରିବା ସହ ଦୁର୍ବବ୍ୟହାର ପ୍ରଦର୍ଶନ କରିଥିଲେ ବୋଲି ଜିଲ୍ଲାପାଳ ମୃଣାଳୀନି ଦର୍ଶୱାଲ ତାଙ୍କ ପ୍ରତିକ୍ରିୟାରେ କହିଛନ୍ତି ।

ଜିଲ୍ଲା ଓକିଲ ସଂଘ, ଜିଲ୍ଲାପାଳ ଏବଂ ସବ୍ରେଜିଷ୍ଟ୍ରାରଙ୍କ ପକ୍ଷରୁ ଟାଉନ୍ ଥାନାରେ ଏ ସଂପର୍କରେ ତିନିଟି ଏତଲା ଦିଆଯାଇଥିବା ବେଳେ ଜିଲ୍ଲାପାଳଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର,ଅପ୍ରେଲ ୧୪(ଓଡ଼ିଶା ଡ଼ଟ୍ କମ୍) ସମ୍ବଲପୁର ଜିଲ୍ଲା ହୀରାକୁ ସ୍ଥିତ ଏଫ୍ସିଆଇ
ଗେ।ଦାମରେ ଶନିବାର ଅଗ୍ନିକାଣ୍ଡ ଘଟି ଲକ୍ଷାଧିକ ଟଙ୍କାର ଚାଉଳ ନଷ୍ଟ ହୋଇଥିବା ପୋଲିସ କହିଛି ।

ଶନିବାର ଛୁଟି ଯୋଗୁଁ ଗେ।ଦାମ ବନ୍ଦ ଥିଲା । ସକାଳେ ଗେ।ଦାମରେ ନିଆଁ ଲାଗିଥିବା ଦେଖି ସେଠାରେ ନିୟୋଜିତ ସୁରକ୍ଷାକର୍ମୀ ପୋଲିସକୁ ଖବର ଦେଇଥିଲେ । ବିଦ୍ୟୁତ ସର୍ଟସର୍କିଟ୍ ଯୋଗୁଁ ଅଗ୍ନିକାଣ୍ଡ ଘଟିଥିବା ପୋଲିସ ସନ୍ଦେହ କରୁଛି ।

ଗେ।ଦାମର ତିନି ଶହ ବସ୍ତା ଚାଉଳ ଓ ଗହମ ପୋଡ଼ି ଯାଇଥିବା ଅନୁମାନ କରାଯାଉଥିବା ବେଳେ କ୍ଷୟକ୍ଷତି ସଂପର୍କରେ ଏଫ୍ସିଆଇ କର୍ତୃପକ୍ଷ କୌଣସି ତଥ୍ୟ ପ୍ରଦାନ କରିନଥିବା ପୋଲିସ କହିଛି ।

ତେବେ ଖବର ପାଇ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଂଚି ଦୀର୍ଘ ସମୟ ପରେ ନିଆଁକୁ ଆୟତ୍ତ କରିଥିଲେ ।

ଓଡ଼ିଶା ଡ଼ଟ୍ କମ୍