ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର ଜୁଲାଇ ୧୫(ଓଡ଼ିଶା ଡ଼ଟ୍ କମ୍) ମୁଁ ବିଜୁ ଜନତା ଳ(ବିଜେଡ଼ି)ର ରାଷ୍ଟ୍ରପତି ପ୍ରାର୍ଥୀ ଓ ପ୍ରଥମେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୋ ନାଁ ପ୍ରସ୍ତାବ ଦେଇଥିଲେ ବୋଲି ରାଷ୍ଟ୍ରପତି ପ୍ରାର୍ଥୀ ପି.ଏ.ସାଙ୍ଗମା ଭୁବନେଶ୍ୱରରେ କହିଛନ୍ତି ।
“ମୁଁ ଆପଣମାନଙ୍କର ପ୍ରାର୍ଥୀ , ବିଜେଡିର ପ୍ରାର୍ଥୀ । ଜଣେ ଆଦିବାସୀ ବ୍ୟକ୍ତି ପୂର୍ବରୁ କେବେ ରାଷ୍ଟ୍ରପତି ପଦବୀ ପାଇନାହାନ୍ତି । ଏଥର ଏହି ପରେ ଜଣେ ଆଦିବାସୀଙ୍କୁ ବସାଇବା ପାଇଁ ସମ୍ପ୍ରଦାୟ ପକ୍ଷରୁ ଆହ୍ୱାନ ଦିଆଯାଇଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଥମେ ମୋ’ ନାମ ଘୋଷଣା କରି ଆଦିବାସୀ ସମ୍ପ୍ରଦାୟ ପ୍ରତି ସମ୍ମାନ ପ୍ରଦର୍ଶନ କରିଥିଲେ” ସାଙ୍ଗମା କହିଥିଲେ ।
ବର୍ତମାନ ସୁଦ୍ଧା ବିଜେଡି, ବିଜେପି, ଓଜିପି, ଅକାଳୀଦଳକୁ ମିଶାଇ ତାଙ୍କୁ ୧୮ଟି ଦଳ ସମର୍ଥନ କରୁଛନ୍ତି । ଆଉ କେତେକ ଦଳ ଖୁବ୍ ଶୀଘ୍ର ସେମାନଙ୍କର ସମର୍ଥନ ଘୋଷଣା କରିବେ ବୋଲି ସେ କହିଥିଲେ ।
ଓଡ଼ିଶାରୁ ପ୍ରଥମେ ତାଙ୍କ ପ୍ରାର୍ଥିତ୍ୱ ସମ୍ପର୍କରେ ଘୋଷଣା ହୋଇଥିବାରୁ ସେ ଆନନ୍ଦ ପ୍ରକାଶ କରିଛନ୍ତି । ବିଜେଡ଼ି କାର୍ଯ୍ୟାଳୟରେ ଆୟୋଜିତ ସଭାରେ ଯୋଗେଇ ସାଙ୍ଗମା ଦଳର ବିଧାୟକ, ସାଂସଦ ଏବଂ ମନ୍ତ୍ରୀ ମାନଙ୍କୁ ସମ୍ବୋଧନ କରିଥିଲେ ଏବଂ ପରେ ବିଜେପି କାର୍ଯ୍ୟାଳୟରେ ମଧ୍ୟ ବିଧାୟକ ମାନଙ୍କ ସହ ଆଲୋଚନା କରିଥିଲେ ।
ବିଜେଡି ଓ ବିଜେପି ପକ୍ଷରୁ ପୃଥକ୍ ଭାବେ ତାଙ୍କୁ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ଉଭୟ ଦଳର ସାଂସଦ ଓ ବିଧାୟକମାନେ ତାଙ୍କୁ ସମର୍ଥନ ଜଣାଇଛନ୍ତି ।
ସାଙ୍ଗମା ବିମାନବନ୍ଦରରେ ପହଞ୍ଚିବା ପରେ ଶାସକ ଦଳର ମୁଖ୍ୟ ସଚେତକ ରବି ପାଣି ଓ ଅନ୍ୟମାନେ ତାଙ୍କୁ ସ୍ୱାଗତ କରିଥିଲେ । ସାଙ୍ଗମା ବିମାନ ବନ୍ଦରରୁ ସିଧା ନବୀନ ନିବାସ ଯାଇ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲେ । ବିଜେଡ଼ି କାର୍ଯ୍ୟାଳୟରେ ଆୟୋଜିତ ସଭାରେ ମୁଖ୍ୟମନ୍ତ୍ରୀ ଦଳର ସାଂସଦ ଓ ବିଧାୟକ ମାନଙ୍କ ପାଖକୁ ଯାଇ ସାଙ୍ଗମାଙ୍କ ପରିଚୟ କରାଇଥିଲେ ।
ରାଜ୍ୟ କାର୍ଯ୍ୟାଳୟରେ ବିଜେପି ରାଜ୍ୟ ସଭାପତି ଜୁଏଲ ଓରାମ, ବିଧାୟକ ଦଳର ନେତା କନକବର୍ଦ୍ଧନ ସିଂହଦେଓ ଓ ଅନ୍ୟମାନେ ସାଙ୍ଗମାଙ୍କୁ ଅଭିନନ୍ଦନ ଜଣାଇଥିଲେ । ଓଡ଼ିଶାର ସମସ୍ତ ବିଜେପି ବିଧାୟକ ତାଙ୍କୁ ସମର୍ଥନ କରିବେ ବୋଲି କନକ ଘୋଷଣା କରିଥିଲେ । ବିଜେପି ତାଙ୍କୁ ସମର୍ଥନ କରିବା ପରେ କଂଗ୍ରେସ ଆତଙ୍କିତ ହୋଇଛି ବୋଲି ଏହି ଅବସରରେ ସାଙ୍ଗମା କହିଥିଲେ । ।
ପୂର୍ବରୁ ରାଷ୍ଟ୍ରପତି ନିର୍ବାଚନ ସମ୍ପର୍କରେ ଲୋକେ ଜାଣିବାକୁ ପାଉନଥିଲେ କିନ୍ତୁ ୨୦୧୨ ରାଷ୍ଟ୍ରପତି ନିର୍ବାଚନ ପାଇଁଗାଁରୁ ସହର ଯାଏଁ ଚର୍ଚ୍ଚା ଚାଲିଛି, ସେ କହିଛନ୍ତି ।
ଓଡ଼ିଶା ଡ଼ଟ୍ କମ୍
