ସାମ୍ବାଦିକ ସମ୍ମିଳନୀ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧(ଓଡିଶା ଡଟ୍ କମ୍)-ଲୋକପାଳ ବିଲ୍ ଆଣିବା ପାଇଁ ପ୍ରତିଶୃତି ଦେଇ ପାଳନ ନକଲେ ନେତାଙ୍କୁ ଆଉ ଭୋଟ ଦିଅନାହିଁ କି କ୍ଷମତାକୁ ଆଣନାହିଁ ବୋଲି କହିଛନ୍ତି ଆନ୍ନା ହଜାରେ ।

ଶନିବାର ଦିନ ରାଜ୍ୟ ଅତିଥିଭବନରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ହଜାରେ କହିଛନ୍ତି ଯେ,ତାଙ୍କ ଲଢ଼େଇ କେବଳ ଜନ ଲୋକପାଳ ବିଲରେ ସୀମିତ ତାହା ନୁହେଁ ।

ଭ୍ରଷ୍ଟାଚାରକୁ ମୂଳୋତ୍ପାଟନ କରିବା ପର୍ଯ୍ୟନ୍ତ ସେ ଲଢ଼ିବେ । ଦେଶର ଉନ୍ନତି କରିବାକୁ ହେବ । କେନ୍ଦ୍ର ସରକାର ଯେଉଁ ଜନଲୋକପାଳ ବିଲ ଆଣିଛନ୍ତି ତାହା ଅସଂପୂର୍ଣ । ଯଦି ପୂର୍ଣ୍ଣ ଜନ ଲୋକପାଳ ବିଲ ଆସେ ତେବେ ଦେଶରୁ ୬୫ ପ୍ରତିଶତ ଭ୍ରଷ୍ଟାଚାର ହଟିଯିବ ।

ସେ କହିଲେ ବାହାର ଦେଶରୁ ଯେତେ କଂପାନୀ ଆସୁଛନ୍ତି ସମସ୍ତେ ପରିବେଶକୁ ନଷ୍ଟ କରୁଛନ୍ତି । ଦେଶର ଖଣିଜ ସମ୍ପଦକୁ ଲୁୁୁୁଟୁ କରିବାକୁ ବହୁ ବିଦେଶୀ କମ୍ପାନୀ ଏ ଦେଶକୁ ଆସୁଛନ୍ତି । ସରକାର ସେହି କମ୍ପାନୀମାନଙ୍କ ପାଇଁ କୃଷକଙ୍କଠାରୁ ଜମି ଲୁଟୁଛନ୍ତି । ବିଦେଶୀ କମ୍ପାନୀମାନେ ଆମ ଖଣି, ଆମ ପାଣି ବ୍ୟବହାର କରି ଆମ ପାଣିପବନକୁ ପ୍ରଦୂଷିତ କରି କୋଟିକୋଟି ଟଙ୍କା ନେଇ ଯାଉଛନ୍ତି ।

ଏଫ୍ଡିଆଇକୁ ଚାଷୀମାନେ ବିରୋଧ କରିବା ଉଚିତ୍ । ବିଦେଶୀ କଂପାନୀମାନେ ଏ ଦେଶର ଅର୍ଥନୀତିକୁ ଶୋଷଣ କରିବେ । ଆମରି ଜିନିଷରୁ ଫାଇଦା ହାସଲ କରିବେ ।

ଦୁର୍ନୀତି ଯୋଗୁ ଦେଶର ଉନ୍ନତି ହେଉ ନାହିଁ । ଏହା ଯୋଗୁ ଦରଦାମ ବଢି ଯାଉଛି । ସାଧାରଣ ଜନତା ଚଳିବା ଅସମ୍ଭବ ହୋଇ ପଡିଛି । ଏହି ଦୁର୍ନୀତିକୁ ହଟାଇବାପାଇଁ ପ୍ରଥମେ ଜନ ଲୋକପାଳ ବିଲ ଆଣିବା ଦରକାର ବୋଲି ଆନ୍ନା ପ୍ରକାଶ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୩୦(ଓଡିଶା ଡଟ୍ କମ୍)-୧୯୯୮ ମସିହା ପରେ ଖୋଲିଥିବା ୪୧ଟି ମହାବିଦ୍ୟାଳୟରେ ତାଲା ପଡିବ । ଡିସେମ୍ବର ୫ ତାରିଖରେ ଏସବୁ କଲେଜର ଅଧ୍ୟାପକ,କର୍ମଚାରୀ ବିଧାନ ସଭା ଆଗରେ ଧାରଣା ଦେବେ ।

ରାଜ୍ୟ ଅନୁଦାନରୁ ବଞ୍ଚିତ ମହାବିଦ୍ୟାଳୟ କର୍ମଚାରୀ ସମନ୍ୱୟ ସମିତିର ଆବାହକ ପବିତ୍ର ମୋହନ ମିଶ୍ର ଏକ ସାମ୍ବାଦିକ ସମ୍ମିଳନୀରେ ଏହି ଚେତାବନୀ ଦେଇଛି । ସେ କହିଛନ୍ତି ରାଜ୍ୟ ସରକାର ୨୦୦୮ ଓ ୨୦୦୯ ମସିହାରେ ୪୮୮ଟି ଏବଂ ୬୬୨ ମହାବିଦ୍ୟାଳୟକୁ ଅନୁଦାନ ପରିସର ଭୁକ୍ତ କରିଥିବା ବେଳେ ୧୯୯୮ ପରଠାରୁ ପ୍ରତିଷ୍ଠିତ ଏହି ମହାବିଦ୍ୟାଳୟ ଗୁଡିକୁ ଅନୁଦାନ ଦେଇ ନାହାଁନ୍ତି ।

ଏହା ପ୍ରତିବାଦରେ ଆଗାମୀ ଦିନରେ ଆନ୍ଦୋଳନ ତୀବ୍ରତର ହେବାସହ ବିଧାନ ସଭା ସମ୍ମୁଖରେ ଆତ୍ମହୁତି ଦେବେ ବୋଲି ସଂଘ ପକ୍ଷରୁ ଚେତାବନୀ ଦେଇଛନ୍ତି ।

ଆମକୁ ଜନ୍ମଦେଇଥିବା ସରକାର ଆମର କୌଣସି ଦାବୀ ନଶୁଣନ୍ତି ତେବେ ଆମେ ସରକାରଙ୍କ ପାଖରେ ଅନୁମତି ମାଗୁଛୁ ଆସନ୍ତା ୫ ତାରିଖ ଠାରୁ ଅହୋରାତ୍ର ଧାରଣା ଦେବୁ । ଯଦି ଦାବି ପୁରଣ ନହେଲା ଆମର ଶେଷ ନିସ୍ପତି ଆତ୍ମହୁତି ଦେବୁ । ଏଥିପାଇଁ ମଧ୍ୟ ଅନୁମତି ମାଗୁଛୁ ବୋଲି ଶ୍ରୀ ମିଶ୍ର କହିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ବ୍ରହ୍ମପୁର,ନଭେମ୍ବର ୨୭(ଓଡିଶା ଡଟ୍ କମ୍)-ଗଂଜାମ ପୋଲିସ ନିକଟରେ ମଙ୍ଗଳବାର ଦିନ ପୁଣି ୩ ମାଓବାଦୀ ଆତ୍ମସମର୍ପଣ କରିଛନ୍ତି । ଏମାନଙ୍କ ମଧ୍ୟରେ ଦୁଇ ମହିଳା ଅନ୍ତର୍ଭୁକ୍ତ । ସମସ୍ତଙ୍କ ଘର ଅବିଭକ୍ତ ଗଞ୍ଜାମ ଓ ଗଜପତି ଜିଲ୍ଲାରେ ବୋଲି ପୋଲିସ କହିଛି ।

ଗଞ୍ଜାମ ଏସ୍ପି ଆଶିଷ ସିଂହ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇ କହିଛନ୍ତି ଯେ, ଚଳିତମାସ ୧୪ ତାରିଖରେ ସଂଘଟିତ ଭାଲିଆଗୁଡା ଏନ୍କାଉଣ୍ଟର ପରେ ଏହା ହେଉଛି ତୃତୀୟ ଆତ୍ମସମର୍ପଣ ।

ପୋଲିସର ସୂଚନା ଅନୁଯାୟୀ ଆତ୍ମସମର୍ପଣ କରିଥିବା ମାଓବାଦୀମାନେ ହେଲେ ଲଛମନ୍ ରାଇକ ଓରଫ ପାଟୁ,ମମିତା ଗମାଙ୍ଗ ଓରଫ ମଞ୍ଜୁଳା ଓ ଇଷ୍ଟର ରାଇକା ଓରଫ ମମତା । ପାଟୁ ମାଓବାଦୀଙ୍କ ନାଟ ଦଳର ନେତୃତ୍ୱ ନେଉଥିଲା ।

ତାର ଘର ଗଜପତି ଜିଲ୍ଲା ଆର୍ ଉଦୟଗିରି ଥାନା ଖଇରାମାହା ପଞ୍ଚାୟତ ତୁଡୁପଙ୍କା ଗ୍ରାମରେ । ମଞ୍ଜୁଳା ଓ ମମତାଙ୍କ ଘର ଗଂଜାମ ଜିଲ୍ଲା ବଡଗଡ ଥାନା ସାହାବା ପଞ୍ଚାୟତ ପାଟଶାଳା ଗାଁରେ ।

ପୋଲିସ କହିଛି ଏ ସମସ୍ତ ମାଓବାଦୀମାନେ ହେଉଛନ୍ତି ସବ୍ୟସାଚୀଙ୍କ ମାଓବାଦୀ ଦଳର କ୍ୟାଡର ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୨୫ (ଓଡିଶା ଡଟ୍ କମ୍)-ସ୍ୱାମୀ ବିବେକାନନ୍ଦଙ୍କ ୧୫୦ତମ ଜୟନ୍ତୀ ଅବସରରେ ସମଗ୍ର ଓଡିଶାରେ ୧୨ ଜାନୁଆରୀ ୨୦୧୩ ତାରିଖରୁ ୧୨ ଜାନୁଆରୀ ପର୍ଯ୍ୟନ୍ତ ବ୍ୟାପକ କାର୍ଯ୍ୟକ୍ରମ ଆୟୋଜନ କରାଯିବ ।

‘ଭାରତ ଜାଗ – ବିଶ୍ୱ ଜଗାଅ’ ସଂଗଠନ ରାଜ୍ୟର ପ୍ରତ୍ୟେକ ସହର ଏବଂ ଗ୍ରାମରେ ଏହି ଅବସରରେ ଶୋଭାଯାତ୍ରାମାନ ଆୟୋଜନ କରିବ, ସ୍ଥାନୀୟ ରୋଟାରୀ ଭବନରେ ରବିବାର ଏକ ସାମ୍ବାଦିକ ସମ୍ମିଳନୀରେ ଏହାର ରାଜ୍ୟ ଅଧ୍ୟକ୍ଷ କର୍ଣ୍ଣେଲ୍ ଶରତ କୁମାର ମହାପାତ୍ର କହିିଛନ୍ତି ।

୧୮ ଫେବୃୟାରୀ ୨୦୧୩ ତାରିଖ ଦିନ ବିଦ୍ୟାଳୟ ଓ ମହାବିଦ୍ୟାଳୟର ଛାତ୍ରଛାତ୍ରୀମାନଙ୍କ ଦଦ୍ୱାରା‘ସାମୂହିକ ସୂର୍ଯ୍ୟ ନମସ୍କାର’ କରାଯିବ । ୧୧ ସେପ୍ଟେମ୍ବର ୨୦୧୩ ଦିନ ବିଶ୍ୱ ବନ୍ଧୁତ୍ୱ ଦିବସ (ଚିକାଗୋ ବକ୍ତୃତା ଦିବସ) ଉପଲକ୍ଷେ ଯୁବକମାନଙ୍କୁ ନେଇ ରାଜ୍ୟର ବିଭିନ୍ନ ସ୍ଥାନରେ ‘ଭାରତ ଜାଗ ଦୋଡ଼’ କାର୍ଯ୍ୟକ୍ରମ ଆୟୋଜନ କରାଯିବ । ଏହି ସମାରୋହ କାର୍ଯ୍ୟକ୍ରମ ସମଗ୍ର ଓଡିଶାରେ ୨୦୧୪ ଜାନୁୟାରୀ ୧୨ ତାରିଖ ଦିନ ସମାରୋପ ହେବ ।

ଏହି ସମାରୋହ ଅଗଣିତ ଜନତାଙ୍କୁ ଉତ୍ସାହିତ କରିବା ସଙ୍ଗେ ସଙ୍ଗେ ନିଜ ନିଜର ବ୍ୟକ୍ତିତ୍ୱକୁ ପରିପ୍ରକାଶ କରିବାରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ଏବଂ ଭାରତବର୍ଷର ସ୍ୱପ୍ନକୁ ସାକାର କରିବାରେ ସହାୟକ ହେବ ।

ଏହି କାର୍ଯକ୍ରମକୁ ସଫଳ କରିବା ପାଇଁ ରାଜ୍ୟର ବହୁ ବିଶିଷ୍ଟ ପ୍ରଶାସକ, ଶିକ୍ଷାବିତ୍, ସମାଜସେବୀ, ଚିକିତ୍ସକ, ସାହିତ୍ୟିକ, କଳାକାରଙ୍କ ସମେତ ଅନ୍ୟ ବିଭିନ୍ନ କ୍ଷେତ୍ରରେ ପ୍ରତିଷ୍ଠା ଲାଭ କରିଥିବା ପ୍ରମୁଖ ବ୍ୟକ୍ତି ସମୁହ ଏହି ସମାରୋହ ସମିତିର ସଦସ୍ୟ ରହିଛନ୍ତି । ଯାହାର ସଂପାଦକ ଅଛନ୍ତି ଶିକ୍ଷାବିତ୍ ଡ଼କ୍ଟର ଧୀରେନ୍ଦ୍ର ନନ୍ଦ ।

ଏହି ମହୋତ୍ସବ ପାଳନ ପରିପ୍ରେକ୍ଷୀରେ ଚଳିତ ମାସ ୧୬ ତାରିଖରେ ଏହାର ରାଷ୍ଟ୍ରୀୟ ସମିତି ମୋଟ ୭୦ ଜଣ ସଦସ୍ୟଙ୍କୁ ନେଇ ସଂରଚନା ହୋଇ ସାରିଛି ଯାହାର ଅଧ୍ୟକ୍ଷ ପରମ ପୂଜନୀୟା ମାତା ଅମୃତାନନ୍ଦମୟୀ ଦେବୀ ଏବଂ ୭ମ, ୮ମ ଓ ୯ମ ଲୋକସଭାର ପୂର୍ବତନ ସାଧାରଣ ସମ୍ପାଦକ ସମ୍ମାନନୀୟ ଡ଼କ୍ଟର ସୁବାସ କଶ୍ୟପ କାର୍ଯ୍ୟକାରୀ ଅଧ୍ୟକ୍ଷ ଅଛନ୍ତି ।

ତତ୍ ସହିତ ଦେଶର ଜଣେ ମହାନ୍ ବ୍ୟକ୍ତିତ୍ୱ ତଥା ଚିନ୍ତାନାୟକ ପ୍ରଫେସର ଅନିରୁଦ୍ଧ ଦେଶପାଣ୍ଡେ ଏହାର ରାଷ୍ଟ୍ରୀୟ ସମ୍ପାଦକ ଅଛନ୍ତି । ଏହି ସାମ୍ବାଦିକ ସମ୍ମିଳନୀରେ ସଂଗଠନର ରାଜ୍ୟ ସଂପାଦକ ଡ଼କ୍ଟର ଧୀରେନ୍ଦ୍ର ନନ୍ଦ, ପ୍ରଚାର ବିଭାଗ ସଂପାଦକ ଅଶୋକ ସାହୁ, ସମୀର ମହାନ୍ତି ପ୍ରମୁଖ ଉପସ୍ଥିତ ଥିଲେ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ନଭେମ୍ବର ୭(ଓଡ଼ିଶା ଡ଼ଟ୍ କମ୍) – ସମ୍ବଲପୁର ପୁଲିସ ହାତରେ ଧରାପଡିଛି ଶାନ୍ତିନଗରର ଦୁର୍ଦ୍ଧାନ୍ତ ଅପରାଧୀ ରାଜେଶ ସାହୁ । ମଙ୍ଗଳବାର ଦିନ ଲପଙ୍ଗା ରେଳଷ୍ଟେସନ ଢାବା ମାଲିକକୁ ଗୁଳିକରି ଫେରାର ହୋଇଯାଇଥିବା ରାଜେଶ ଓ ତାର ସାଙ୍ଗସୋନୁ ଧରାପଡିଛନ୍ତି ।

ଏସପି ନିଖିଳ କୁମାର କାନୋଡ଼ିଆ ବୁଧବାର ଦିନ ଏଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଯେ, କାଉନସିଲରଙ୍କ ସମେତ ମୋଟ ୭ ଜଣଙ୍କୁ ଗିରଫ କରାଯାଇ ସେମାନଙ୍କ ପାଖରୁ ୬ଟି ବନ୍ଧୁକ, ୨୧ଟି ଗଳି, ୭ଟି ବାଘନଖ, ୩ଟି ପିସ୍ତଲ ଓ ଗୋଟିଏ ଟିଭିଏସ ଆପାଚି ମୋଟର ସାଇକେଲ ଜବତ ହୋଇଥିବା ରାଜେଶ ସାହୁ ଜଣେ ଚୋରା ବନ୍ଧୁକ ବେପାରୀ ।

ସେ ବିହାର ଓ ଝାଡ଼ଖଣ୍ଡରୁ ବନ୍ଧୁକ ଓ ଗୁଳି ଆଣି ସମ୍ବଲପୁର ଓ ଝାରସୁଗୁଡ଼ା ଜିଲାର ବିଭିନ୍ନ ଲୋକଙ୍କୁ ବିକ୍ରି କରିଥିଲା ।

ତା’ର ସୂଚନା ଅନୁସାରେ ପୁଲିସ ସମ୍ବଲପୁରର ୨୧ ନମ୍ବର ୱାର୍ଡ କାଉନସିଲର ଲକ୍ଷ୍ମୀନାରାୟଣ ପଟେଲ ଓରଫ ଘନକୁ ଗିରଫ କରି ଗୋଟିଏ ବନ୍ଧୁକ ଜବତ କରିଛି । ସେହିପରି ରେଙ୍ଗାଲି ଗୁରୁପାଲିର ରୁସ୍ତମ କବାଡ଼ିବାଲାକୁ ଗିରଫ କରି ଗୋଟିଏ ମାଉଜର, ୧ ପିସ୍ତଲ ଓ ୧ଗୁଳି ଜବତ କରିଛି । ଶାସନ ଥାନା ପରମାଣପୁରର ଚାଷୀ ଦିଲୀପ ବଘାରଠାରୁ ଏକ ପିସ୍ତଲ ଜବତ କରାଯାଇଛି ।

ଝାରସୁଗୁଡ଼ା ଜିଲା ଓରିଏଣ୍ଟ ଥାନାର ଗଜପତିନଗର ବାସିନ୍ଦା ସୁନିଲ ମଲ୍ଲିକ ଓ ବିଲୁ ସାହୁଙ୍କଠାରୁ ଏକ ୭.୬ କ୍ୟାଲିବରର ମାଉଜର, ୨ଟି ମ୍ୟାଗାଜିନ ଓ ୩ଟି ଗୁଳି ଜବତ କରାଯାଇଛି ।

ଓଡ଼ିଶା ଡ଼ଟ୍ କମ୍

ଗୋଲଖ ଚନ୍ଦ୍ର ଦାସ

ଭୁବନେଶ୍ୱର,ନଭେମ୍ବର ୬(ଓଡ଼ିଶା ଡ଼ଟ୍ କମ୍) -ଭାରତରେ ଥିବା ସମସ୍ତ ବାଂଲାଦେଶୀ ଅନୁପ୍ରବେଶକାରୀଙ୍କୁ ଚିହ୍ନଟ କରାଯାଇ ଦେଶରୁ ବାହାର କରି ଦିଆଯାଉ । ମତଦାତା ସୂଚୀରୁ ସେମାନଙ୍କ ନାମ କାଟି ଦିଆଯାଉ । ସେମାନଙ୍କୁ ଆଧାର କାର୍ଡ ଦିଆ ନଯାଉ ଓ ସେମାନଙ୍କ ପାଇଁ କର୍ମ ନିଯୁକ୍ତି ମଧ୍ୟ ବନ୍ଦ କରାଯାଉ ବୋଲି ରାଷ୍ଟ୍ରୀୟ ସ୍ୱୟଂସେବକ ସଂଘ ତରଫରୁ ଦାବି କରାଯାଇଛି ।

ରାଷ୍ଟ୍ରୀୟ ସ୍ୱୟଂସେବକ ସଂଘ,ଓଡିଶା ତରଫରୁ ଭୁବନେଶ୍ୱର ହୋଟେଲ କେଶରୀ ଠାରେ ଅନୁଷ୍ଟିତ ଏକ ସାମ୍ବାଦିକ ସମ୍ମିଳନୀରେ ସଂଘ ପୁରୀ ବିଭାଗର ସହବିଭାଗ ସଂଘ ଚାଳକ ସମୀର କୁମାର ମହାନ୍ତି ଏହା ଦାବୀ କରିବା ସହ କହିଛନ୍ତି ଯେ, ଗତ ଜୁଲାଇ ମାସରେ ଆସାମର କୋକ୍ରାଝାର,ଚିରାଙ୍ଗ ଓ ଧ୍ରୁବ୍ରୀ ଜିଲ୍ଲାରେ ବାଂଲାଦେଶୀ ମୁସଲିମ ଅନୁପ୍ରବେଶକାରୀମାନେ ହିଂସାକାଣ୍ଡ ସୃଷ୍ଟିକରିଥିଲେ ।

ସେମାନେ ଦେଶର ବିଭିନ୍ନ ଭାଗରେ ରହୁଥିବା ଉତର-ପୂର୍ବାଂଚଳର ନାଗରିକମାନଙ୍କ ମନରେ ଭୟ ସୃଷ୍ଟି କରାଇ ସେମାନଙ୍କୁ ସେମାନଙ୍କ କର୍ମସ୍ଥଳୀରୁ ବିତାଡିତ କରାଇଥିଲେ । ଏହା ଏକ ସ୍ଥାନୀୟ ଅଧିବାସୀ ବନାମ ବିଦେଶୀ ଅନୁପ୍ରବେଶକାରୀ ସମସ୍ୟା । ଏହାକୁ ସାଂପ୍ରଦାୟିକ ରଙ୍ଗଦେବା ନିନ୍ଦନୀୟ ।

କିଛି ଜାତୀୟତା ବିରୋଧୀ ଶକ୍ତି ଦେଶର ବିଭିନ୍ନ ସ୍ଥାନରେ ହିଂସାତ୍ମକ ପ୍ରଦର୍ଶନ ତଥା ନାଗରିକ ଓ ପୋଲିସ ଉପରେ ଆକ୍ରମଣ ଏବଂ ରାଷ୍ଟ୍ରୀୟ ସ୍ମାରକଗୁଡିକୁ ଅପମାନ କରିଥିବା ହେତୁ ସେମାନଙ୍କୁ ଚିହ୍ନଟକରି ଦଣ୍ଡ ବିଧାନ କରାଯାଉ । ଧମକକୁ ଡରି ପଳାୟନ କରୁଥିବା ଅସଂଖ୍ୟ ଉତର-ପୂର୍ବାଂଚଳ ନିବାସୀଙ୍କୁ ଦେଶବାସୀଙ୍କର ସହାୟତା ଓ ସାହସ ପ୍ରଦାନ ପ୍ରଶଂସନୀୟ ଏବଂ ଷଡଯନ୍ତ୍ରକାରୀ ଓ ରାଷ୍ଟ୍ରବିରୋଧୀ କାର୍ଯ୍ୟ ଦଣ୍ଡନୀୟ ।

ଇତି ମଧ୍ୟରେ ବାଂଲାଦେଶୀ ଅନୁପ୍ରବେଶକାରୀମାନେ ସମଗ୍ର ଦେଶରେ ନିଜର ପ୍ରଭାବ ବିସ୍ତାର କରି ସାରିଛନ୍ତି । ସେମାନେ ଜାଲ ନୋଟ୍ ତଥା ବେଆଇନ ଅସ୍ତ୍ରଶସ୍ତ୍ର ଚୋରା କାରାବାର, ନିଶାଦ୍ରବ୍ୟ ଓ ଅବୈଧ ଗୋରୁ ଚାଲାଣରେ ଲିପ୍ତ ରହୁଥିବାର ଖବର ମିଳୁଛି । ତେଣୁ ବାଂଲାଦେଶୀମାନଙ୍କୁ ଏ ଦେଶରୁ ବିତାଡିତ କରାଯାଉ ।

ବିଦେଶୀ ଆଇନ-୧୯୪୬ ଲାଗୁ କରାଯାଉ ଓ ଆଇଏମ୍ଡିଟି ଆକ୍ଟ -୧୯୮୩କୁ ସଂଶୋଧନ କରାଯାଉ । ବାଂଲାଦେଶ ସୀମାରେ ତାର ବାଡ ନିର୍ମାଣକାର୍ଯ୍ୟକୁ ତ୍ୱରାନ୍ୱିତ କରାଯାଉ । ଦେଶର ପ୍ରକୃତ ନାଗରିକମାନଙ୍କ ପାଇଁ ଏକ ରାଷ୍ଟ୍ରୀୟ ନାଗରିକ ପଞ୍ଜିକା ପ୍ରସ୍ତୁତ କରାଯାଉ ।

ଏଥିସହିତ ଶ୍ରୀ ମହାନ୍ତି କହିଛନ୍ତି ଯେ,୧୯୬୨ ମସିହା ଭାରତ ଚୀନ ଯୁଦ୍ଧରେ ଭାରତ ହରାଇଥିବା ୩୮ ହଜାର ବର୍ଗ କିଲୋମିଟର ଅଂଚଳକୁ ଫେରାଇ ଆଣିବା ପାଇଁ ଚେଷ୍ଟା କରିବା ପରିବର୍ତ୍ତେ ବାସ୍ତବିକ ନିୟନ୍ତ୍ରଣ ରେଖା ସମ୍ବନ୍ଧରେ ଯେଉଁ କଥାବାର୍ତା ଚାଲିଛି ତାହା ନିନ୍ଦନୀୟ ଅଟେ ।

୧୯୬୨ ଯୁଦ୍ଧର ପରାଜୟ ପାଇଁ ଦେଶର ରାଜନୀତି, କୂଟନୀତି ଓ ସାମରିକ ନୀତି ଦାୟୀ । ଏ ସମ୍ବନ୍ଧରେ ହେଣ୍ଡରସନ୍ କୁକ୍ ଓ ପି.ଏସ୍. ଭଗତ୍ ରିପୋର୍ଟକୁ ସାର୍ବଜନୀକ କରିବା ପାଇଁ କାର୍ଯକାରୀ ମଣ୍ଡଳ ଦାବି କରୁଛି । ଏହା ଦ୍ୱାରାଉପରୋକ୍ତ ତୃଟି ସମ୍ବନ୍ଧରେ ସମସ୍ତେ ଅବଗତ ହେବେ ।

ଚୀନ ବାରମ୍ବାର ଭାରତ ତିବ୍ବତ ସୀମା ଅତିକ୍ରମଣ କରି ସୂଚାଇ ଦେଉଛି ଯେ, ସେ ଆକ୍ରମଣରୁ ବିରତ ହୋଇ ନାହିଁ । ଏହାକୁ ଦୃଷ୍ଟିରେ ରଖି ସୀମା ପ୍ରବନ୍ଧନ କରିବା ତଥା ସ୍ୱତନ୍ତ୍ର ପାର୍ବତୀୟ ଆକ୍ରାମକ ସୈନ୍ୟଦଳ ସୃଷ୍ଟିକରିବା ପାଇଁ ଆର ଏସ୍ ଏସ୍ ଦାବି କରୁଛି ।

ଦେଶର ଶକ୍ତି, ସୂଚନା ତଥା ପ୍ରସାରଣ, ଶିଳ୍ପ ଓ ବାଣିଜ୍ୟ କ୍ଷେତ୍ରରେ ଚୀନର ବଢୁଥିବା ଆଧିପତ୍ୟ ଓ ସାଇବର ଆତଙ୍କ ଚିନ୍ତା ଜନକ । ଏଥିପାଇଁ ପଦକ୍ଷେପ ନେବା ଏବଂ ସାଇବର ନିରାପତା ବୃଦ୍ଧି ଦିଗରେ ଚେଷ୍ଟା କରିବା ଆବଶ୍ୟକ ବୋଲି ମହାନ୍ତି ପ୍ରକାଶ କରିଛନ୍ତି ।

ସଂଘର ଚତୁର୍ଦିବସୀୟ ଅଖିଳ ଭାରତୀୟ କାର୍ଯ୍ୟକାରୀ ମଣ୍ଡଳ ବୈଠକ ସୋମବାର ଦିନ ଚେନ୍ନାଇ ଠାରେ ଶେଷ ହୋଇଛି । ଏହି ବୈଠକରେ ସଂଗୃହୀତ ବିବରଣୀ ଅନୁଯାୟୀ ସମଗ୍ର ଦେଶରେ ଥିବା ୫୫,୨୨୬ଟି ମଣ୍ଡଳ ମଧ୍ୟରୁ ୨୪,୩୦୮ଟି ମଣ୍ଡଳରେ ସଂଘର କାର୍ଯ୍ୟ ଚାଲୁଅଛି ।

ସହରା ଳରେ ଥିବା ୩୮,୨୫୨ଟି ବସ୍ତି ମଧ୍ୟରୁ ୧୬,୬୦୩ଟି ବସ୍ତି ମଧ୍ୟରେ ସଂଘକାର୍ଯ୍ୟ ଚାଲୁଅଛି । ଦେଶର ୨୫,୮୩୪ଟି ସ୍ଥାନରେ ୩୮,୬୯୯ଟି ଦୈନିକ ଶାଖା ଚାଲୁଅଛି ବୋଲି ଶ୍ରୀ ମହାନ୍ତି ପ୍ରକାଶ କରିଥିଲେ ।

ଆଜିର ଏହି ସାମ୍ବାଦିକ ସମ୍ମିଳନୀରେ ଆରଏସ୍ଏସ୍ ପ୍ରଚାର ବିଭାଗ ବିଶ୍ୱ ସମ୍ବାଦ କେନ୍ଦ୍ର,ଓଡିଶାର ରାଜ୍ୟ ସଭାପତି ରଘୁନାଥ ପତି ଓ ରାଜ୍ୟ ସଂପାଦକ ଅଶୋକ କୁମାର ସାହୁ ଉପସ୍ଥିତ ଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକୋ୍ଟବର ୨୬(ଓଡ଼ିଶା ଡ଼ଟ୍ କମ୍)–ଓଡିଶା ଜନମୋର୍ଚ୍ଚାର ସମାବେଶକୁ ଭଣ୍ଡୁର କରିବା ପାଇଁ ଷଡ଼ଯନ୍ତ୍ର ଚାଲିଥିବା ଅଭିଯୋଗ ଆଣି ପୁଣି ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି ସାଂସଦ ପ୍ୟାରିମୋହନ ମହାପାତ୍ର ।

ଏକ ସାମ୍ବାଦିକ ସମ୍ମିଳନୀରେ ମୋର୍ଚ୍ଚା ତରଫରୁ କୁହାଯାଇଛି ଯେ, ସମାବେଶକୁ ଲୋକମାନେ ଯେପରି ନ ଆସିପାରିବେ ସେଥିପାଇଁ ଶକ୍ତିମନ୍ତ୍ରୀ ଓ ଅନ୍ୟାନ୍ୟ ସ୍ଥାନର ଆରଟିଓ ଏମ୍ଭିଆଇମାନେ ଗାଡି ମାଲିକଙ୍କୁ ଧମକ ଦେଉଛନ୍ତି ।

ଆସନ୍ତା ୨୮ ତାରିଖରେ ହେବାକୁ ଥିବା ସମାବେଶ ଭଣ୍ଡୁର କରିବା ପାଇଁ କିଛି ରାଜନେତା ଓ ଅଫିସର ଲାଗିପଡିଛନ୍ତି ବୋଲି ଏହି ଚିଠିରେ ଅଭିଯୋଗ କରାଯାଇଛି ।

ନୟାଗଡ ଜିଲ୍ଲାରେ ଶକ୍ତିମନ୍ତ୍ରୀ ଅରୁଣ ସାହୁ ଏବଂ କଟକ, ଆଠଗଡ, ଭୁବନେଶ୍ୱର, କେନ୍ଦ୍ରାପଡା ଆରଟିଓ ଏବଂ ଏମ୍ଭିଆଇ ମାନେ ଗାଡି ନଦେବାକୁ ମାଲିକଙ୍କୁ ଧମକ ଦେଉଥିବା ମୋର୍ଚ୍ଚ ଅଭିଯୋଗ କରିଛି ।

ଏନେଇ ଆରଟିଓ,ଏମ୍ଭିଆଇମାନଙ୍କ ପ୍ରତିକ୍ରୀୟା ମିଳି ନଥିବା ବେଳେ ଏହି ଅଭିଯୋଗକୁ ଖଣ୍ଡନ କରିଛନ୍ତି ମନ୍ତ୍ରୀ ଅରୁଣ ସାହୁ ।

ସେ କହିଛନ୍ତି ଗଣତାନ୍ତ୍ରୀକ ଉପାୟରେ ଯେଉଁ ନିର୍ବାଚନ ହୁଏ ସିଧା ସଳଖ ଲୋକମାନଙ୍କର ମତଦାତା ପାଉ ନଥିବା ବ୍ୟକ୍ତି ବା ସମ୍ମୁଖିନ ହୋଇ ନଥିବା ବ୍ୟକ୍ତି ପ୍ୟାରୀମୋହନଙ୍କ ଭଲି ଲୋକ ଏହିଭଳି ଭିତିହିନ ଅଭିଯୋଗ ଆଣି ପାରନ୍ତି । ଯାହାର କିଛି ସତ୍ୟତା ନାହିଁ ।

ଏହା ଏକ ଅପପ୍ରଚାର ମାତ୍ର । ପ୍ୟାରୀମୋହନ ମହାପାତ୍ରଙ୍କ ଏକମାତ୍ର ଉଦ୍ଦେଶ୍ୟ କଂଗ୍ରେସକୁ କ୍ଷମତାକୁ ଆଣିବାକୁ । ଦିଲ୍ଲୀ ଗସ୍ତ ପୂର୍ବରୁ ପ୍ୟାରୀମୋହନ ମହାପାତ୍ରଙ୍କ ଅଭିଯୋଗ ସଂପର୍କରେ ମୁଖ୍ୟମନ୍ତ୍ରୀ ନିଜର ପ୍ରତିକ୍ରୀୟା ପ୍ରକାଶ କରିକହିଛନ୍ତି ଯେ ପ୍ୟାରୀଙ୍କ ଅଭିଯୋଗ ମିଥ୍ୟା ଓ ଭିତିହିନ ।

ଅନ୍ୟ ପକ୍ଷରେ ଏକ ସାମ୍ବାଦିକ ସମ୍ମିଳନୀରେ ବିଜୁ ଯୁବ ଜନତା ଦଳର ରାଜ୍ୟ ସଭାପତି ତଥା ସରକାରୀ ଦଳର ଉପମୁଖ୍ୟ ସଚେତକ ସଂଜୟ କୁମାର ଦାସବର୍ମା କହିଛନ୍ତି ଯେ,ନିଲମ୍ବିତ ହେବାପରେ ଜନମୋର୍ଚ୍ଚା ନାମରେ ଏକ ସଂଗଠନ ଗଢି ମୁଖ୍ୟମନ୍ତ୍ରୀଙ୍କ ସମ୍ପର୍କରେ ଗଣମାଧ୍ୟମ ଜରିଆରେ ବିଭିନ୍ନ ଅଶୋଭନୀୟ ମନ୍ତବ୍ୟ ଦେଇ ମହାପାତ୍ର ଦଳର ସମ୍ମାନ କ୍ଷୁର୍ଣ୍ଣ କରୁଛନ୍ତି ।

ତାଙ୍କର ଏଭଳି ଅଶୋଭନୀୟ ମନ୍ତବ୍ୟକୁ ଦୃଢ ନିନ୍ଦା କରି ମହାପାତ୍ର ଦଳୀୟ ଟିକେଟରେ ନିର୍ବାଚିତ ରାଜ୍ୟସଭା ସଭ୍ୟ ପଦରୁ ତୁରନ୍ତ ଇସ୍ତଫା ଦେବାପାଇଁ ଦାସବର୍ମା ଦାବି କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକୋ୍ଟବର ୨୬(ଓଡ଼ିଶା ଡ଼ଟ୍ କମ୍)–ଓଡିଶାରେ ହୋଇଥିବା ସବୁ ଦୁର୍ନୀତିର ପର୍ଦ୍ଧା ଫାସ କରାଯିବ, ଭୁବନେଶ୍ୱରରେ ଏକ ସାମ୍ବାଦିକ ସମ୍ମିଳନୀରେ ଏହା କହିଛନ୍ତି ଇଣ୍ଡିଆ ଏଗ୍ନେଷ୍ଟ କରପୋସନର କୋର୍ କମିଟି ସଦସ୍ୟ ମନିଷ ସିଶୋଦିଆ ।

ସେ କହିଛନ୍ତି ଖଣିଜ ସଂପଦରେ ଭରା ଓଡଶା ବିକାଶ ନହେବର କରାଣ ଏଠାରେ ଯେଉଁ ସରକାର ଆସୁଛି ସେ ପୁଞ୍ଜିପତିଙ୍କ ଦଲାଲ ସାଜୁଛି ।

ବିଜେଡି ସରକାର କଂଗ୍ରେସ ସାଂସଦ ନବୀନ ଜିନ୍ଦଲ କଂପାନୀଙ୍କ ପାଇଁ ସୁପାରିଶ କରିବା ପ୍ରସଂଗକୁ ବି ସେ ଉଠାଇଥିଲେ । ସେ କହିଥିଲେ ବିଜେଡି ସରକାରର ଏପରି ମନୋବୃଚିରେ କଂଗ୍ରେସ ଓ ବିଜେପି ହାତ ମିଳାଇଛନ୍ତି ।

ସିଶୋଦିଆ କହିଛନ୍ତି ଓଡିଶାରେ କଂଗ୍ରେସ ଓ ବିଜେପି ବିରୋଧି ଦଳ ପରି ମନେ ହେଉନାହାଁନ୍ତି । ତେବ ବିକଳ୍ପ ରାଜନୈତିକ ଶକ୍ତିଭାବେ ଆଇଏସି ସଂସ୍ଥା ଏଥର ରାଜ୍ୟର ସବୁ ବିଧାନ ସଭା ଓ ଲୋକ ସଭା ଆସନରେ ପ୍ରାର୍ଥିଦେବ ।

ତେବେ ପଞ୍ଚାୟତ ରାଜ ମନ୍ତ୍ରୀ କଳ୍ପତରୁ ଦାସ କହିଛନ୍ତି ନବୀନ ଜିନ୍ଦଲ କଂଗ୍ରେସର ହୁଅନ୍ତ କି ବିଜେପିର ହୁଅନ୍ତୁ ସେଥିରେ ଓଡିଶା ବ୍ୟସ୍ତ ନୁହେଁ । ଓଡଶା ପାଇଁ ସେ ଅର୍ଥ ବିନିଯୋଗ କରିଛନ୍ତି ।

ସେ ୧୩ ହଜାର କୋଟି ଟଙ୍କାରୁ ଅଧିକ ଅର୍ଥ ବିନିଯୋଗ କରିଛନ୍ତି । ସେ ଦୃଷ୍ଟିରୁ ଓଡିଶା ସରକାର ତାଙ୍କପାଇଁ ଖଣି ସୁପାରିଶ କରି କୌଣସି ଭୁଲ କରି ନାହାଁନ୍ତି । କୌଣସି ଦଳ ପାଇଁ ନୁହେଁ ଓଡିଶାରେ ଶିଳ୍ପ ପାଇଁ ଆସିଥିବା ସବୁ କଂପାନୀକୁ ସରକାର ଖଣି ଦେଉଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୧୯(ଓଡ଼ିଶା ଡ଼ଟ୍ କମ୍) – ମୋ ସାଥିରେ କେହି ରହିଲେ ବା ନରହିଲେ ତାହା ମୋ ପାଇଁ ଗୁରୁତ୍ୱପୂର୍ଣ୍ଣ ନୁହେଁ । ପଛରେ ଅଛନ୍ତି ଓଡିଶାର ୪ କୋଟି ଜନତା । ବିଜୁ ବାବୁଙ୍କ ସ୍ୱପ୍ନକୁ ପୁରା କରିବା ପାଇଁ ମୁଁ ଉଦ୍ୟମ ଜାରି ରଖିବି ବୋଲି ନବୀନ ପଟ୍ଟନାୟକ ପ୍ରକାଶ କରିଛନ୍ତି ।

ପଛରୁ ଆକ୍ରମଣ ପାଇଁ ହୋଇଥିଲା ଉଦ୍ୟମ । ଗଣତନ୍ତ୍ରକୁ ହତ୍ୟା କରିବାକୁ ଉଦ୍ୟମ ହୋଇଥିଲା । ଓଡିଶାର ୪ କୋଟି ଜନତା ମୋ ପାଇଁ ଗୁରୁତ୍ୱପୂର୍ଣ୍ଣ । କ୍ଷମତାରେ ଥାଏ ବା ନଥାଏ ବଞ୍ଚି ଥିବା ପର୍ଯ୍ୟନ୍ତ ଓଡିଶାବାସୀଙ୍କ ପାଇଁ ଲଢାଇ କରି ଚାଲିବି ଓ କାମ କରିଚାଲିବି ପଟ୍ଟନାୟକ ପ୍ରକାଶ କରିଛନ୍ତି ।

ଭୁବନେଶ୍ୱରରେ ଅନୁଷ୍ଠିତ ସାଂସଦ ପ୍ୟାରିମୋହନ ମହାପାତ୍ରଙ୍କ ସାମ୍ବାଦିକ ସମ୍ମିଳନୀରେ ଟାର୍ଗେଟରେ ଥିଲେ ନବୀନ ପଟ୍ଟନାୟକ ଠିକ୍ ତାପରେ ବ୍ରହ୍ମପୁରଠାରେ ଅନୁଷ୍ଠିତ ବିଜେଡିର ମହାସମାବେଶର ନବୀନଙ୍କ ଟାର୍ଗେଟରେ ଥିଲେ ପ୍ୟାରୀମୋନ ମହାପାତ୍ର ।

କିନ୍ତୁ ମୁଖ୍ୟମନ୍ତ୍ରୀ କାହାରି ନାମ ପ୍ରକାଶ କରିନଥିଲେ ମଧ୍ୟ ବ୍ରହ୍ମପୁର ସମାବେଶରେ ତାଙ୍କ ବକ୍ତବ୍ୟ ଥିଲା ପ୍ୟାରୀଙ୍କ ପାଇଁ କଡା ଜବାବ । ଏହାକୁ ନେଇ ବିଜେଡି ରାଜନୀତି ସରଗରମ ହୋଇଛି ।

ବ୍ରହ୍ମପୁର ବଡମେଡିକାଲ ପଡିଆଠାରେ ଆଜି ବିଜେଡି ତରଫରୁ ଅନୁଷ୍ଠିତ ହୋଇଥିଲା ବିଶାଳ ସମାବେଶ । ସମାବେଶରେ ସାମିଲ ହୋଇଥିଲେ ଜିଲ୍ଲାର ୪ଜଣ ସାଂସଦ,୧୨ଜଣ ବିଜେଡି ବିଧାୟକ ଏବଂ ୫୦ ହଜାରରୁ ଅଧିକ ଦଳୀୟ କର୍ମୀ ଓ ସମର୍ଥକ ।

ଏହି ସମାବେଶରେ ରାଜ୍ୟପ୍ରତି କେନ୍ଦ୍ରର ଅବେହେଳାକୁ ପୁଣି ଥରେ ଦୋହରାଇ ଥିଲେ ପଟ୍ଟନାୟକ । ସେ କହିଛନ୍ତି ଯେ, ମେନେରାଲ ରୟାଲଟି ପ୍ରଦାନନେଇ କେନ୍ଦ୍ର ଅବହେଳା କରୁଛି । ରାଜ୍ୟରୁ ୮ ହଜାର କୋଟି ଟଙ୍କା ରାଜସ୍ୱ ଯାଉଥିଲେ ବି ରେଳବାଇର ବିକାଶ ହେଉ ନାହିଁ ।

ଏଭଳି ସମାବେଶ ମୁଖ୍ୟମନ୍ତ୍ରୀଙ୍କ ଇମେଜକୁ ବଢାଇଦେଇଛି ବୋଲି ରାଜସ୍ୱ ମନ୍ତ୍ରୀ ସୂର୍ଯ୍ୟନାରାୟଣ ପାତ୍ର କହିଛନ୍ତି ।

ଗ୍ରାମ ଉନ୍ନୟନମନ୍ତ୍ରୀ ବିକ୍ରମକେଶରୀ ଆରୁଖା କହିଛନ୍ତି ସମାବେଶ ଆଜି ଆଶାତୀତ ଭାବେ ସଫଳ ହୋଇଛି । ଯେପର୍ଯ୍ୟନ୍ତ ନବୀନ ଦଳର ସଭାପତି ଅଛନ୍ତି ସେପର୍ଯ୍ୟନ୍ତ ଦଳ ଆଗେଇ ଚାଲିଥିବ ।

ଯାହା ଆଶା କରାଯାଉଥିଲା ତାର ଦୁଇଗୁଣିତ ଲୋକ ଏଠାରେ ଏକଠି ହୋଇଥିଲେ । ଗଞ୍ଜାମର କୋଣ ଅନୁକୋଣରୁ ଲୋକମାନେ ଏଠାକୁ ଛୁଟି ଆସିଥିଲେ ।

ସାଂସଦ ସିଦ୍ଧାନ୍ତ ମହାପାତ୍ର କହିଛନ୍ତି ପ୍ରକୃତରେ ଲୋକମାନଙ୍କ ଭଲ ପାଇବା ଦଳ ପ୍ରତି, ଶଂଖଚିହ୍ନ ପ୍ରତି ଓ ନବୀନ ପଟ୍ଟନାୟକଙ୍କ ପ୍ରତି ଅଛି । ଯେତେଦିନ ପର୍ଯ୍ୟନ୍ତ ନବୀନ ବାବୁ ଅଛନ୍ତି, ତାଙ୍କ ନେତୃତ୍ୱ ଅଛି ବିଜୁ ଜନତା ଦଳ ଏମିତି ହିଁ ଥିବ ।

ଓଡ଼ିଶା ଡ଼ଟ୍ କମ୍