ସିଏଜି ରିପୋର୍ଟ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୪(ଓଡିଶା ଡଟ୍ କମ୍)-ବିନିଯୋଗ ପ୍ରମାଣ ପତ୍ର ଦେଲେ ନାହିଁ ରାଜ୍ୟ ସରକାର । ଯେଉଁଥିପାଇଁ ୧୮୨ କୋଟିରୁ ଅଧିକ ଟଙ୍କା କେନ୍ଦ୍ରକୁ ଫେରିଗଲା । କଣ୍ଟ୍ରୋଲର ଓ ଅଡିଟର ଜେନେରାଲ(ସିଏଜି)ଙ୍କ ରିପୋର୍ଟର ଏହି ତଥ୍ୟକୁ ନେଇ ଶୁକ୍ରବାର ଦିନ ବିଧାନସଭାରେ ଝଡ ଉଠିଛି ।

ବିଭିନ୍ନ ବିଭାଗର ଖର୍ଚ୍ଚକୁ ନେଇ ସରକାରଙ୍କ କାର୍ଯ୍ୟଶୈଳୀ ଉପରେ ବିରୋଧୀ ପ୍ରଶ୍ନ ଉଠାଇଛନ୍ତି । ହେଲେ ଏସବୁକୁ ଅତି ହାଲକା ଭାବେ ନେଇଛନ୍ତି ସରକାର । ଗତକାଲି ବିଧାନସଭାରେ ଅର୍ଥମନ୍ତ୍ରୀ ପ୍ରସନ୍ନ ଆଚାର୍ଯ୍ୟ ଆଜି କଟ୍ରୋଲର ଓ ଅଡିଟର ଜେନେରାଲ(ସିଏଜି)ଙ୍କ ରିପୋର୍ଟ ଉପସ୍ଥାପନ କରିଥିଲେ ।

ଏଥିରେ ଗତ ଆର୍ଥିକ ବର୍ଷ ମାର୍ଚ୍ଚ ସୁଦ୍ଧା ରାଜ୍ୟ ସରକାରଙ୍କ ଆର୍ଥିକ ସ୍ଥିତି ଓ ବିଭିନ୍ନ କାର୍ଯ୍ୟର ସମୀକ୍ଷା କରାଯିବା ସହ କେତେକ ସ୍ଥଳରେ ସରକାରଙ୍କ କାର୍ଯ୍ୟକଳାପର ସମାଲୋଚନା କରାଯାଇଛି । ଏହାକୁ ନେଇ ଆଜି ବିଧାନସଭାରେ ବିରୋଧୀ ସରକାରଙ୍କୁ ସମାଲୋଚନା କରିଛନ୍ତି ।

ବିରୋଧୀଦଳ ନେତା ଭୂପିନ୍ଦର ସିଂହ କହିଛନ୍ତି ସିଏଜି ତାଙ୍କ ରିପୋର୍ଟରେ ଦର୍ଶାଇଛନ୍ତିି ଯେ ବିଭିନ୍ନ କେନ୍ଦ୍ରୀୟ ଯୋଜନାରେ ରାଜ୍ୟରେ ଖର୍ଚ୍ଚ ହେଉଥିବା ଅର୍ଥରୁ ୨୭ହଜାର ୬୨୮କୋଟି ଟଙ୍କାର ବିନିଯୋଗ ପତ୍ର(ୟୁସି) ବିଭିନ୍ନ ବିଭାଗ ଦାଖଲ କରିବାରେ ବିଳମ୍ବ କରିଥିବା ଯୋଗୁଁ ରାଜ୍ୟ ସରକାର ୨୦୧୨-୧୨ ଆର୍ଥିକ ବର୍ଷରେ ୧୮୨.୪୮ କୋଟି ଟଙ୍କାର କେନ୍ଦ୍ରୀୟ ଅନୁଦାନ ହରାଇଛନ୍ତି ।

ରାଜ୍ୟ ସରକାର କେନ୍ଦ୍ରର ଅବହେଳା ନେଇ ସଦାବେଳେ ଅଭିଯୋଗ କରିଆସୁଛନ୍ତି । ହେଲ ଏବେ ଟଙ୍କା ଫେରିଯିବା ଘଟଣା ସରକାରଙ୍କ ଅଯୋଗ୍ୟତାକୁ ପ୍ରମାଣ କରିଛି ।

ରାଜ୍ୟ ସରକାରଙ୍କ ପାଖରେ ବହୁ ପରିମାଣର ବଳକା ଧନ ରହିଛି; କିନ୍ତୁ ତାହା ରିଜର୍ଭ ବ୍ୟାଙ୍କରେ ଭାରତ ସରକାରଙ୍କ କମ ସୁଧ ଥିବା ଟ୍ରେଜେରୀ ବିଲରେ ବିନିଯୋଗ କରାଯାଇଛି ।

୫୬୦୭ କୋଟି ଟଙ୍କାର ବଳକା ରାଜସ୍ୱ ଏବଂ ବିତୀୟ ସମ୍ବନ୍ଧୀୟ ୬୨୨ କୋଟି ଟଙ୍କାର ବଳକା ଅବଶେଷ ଅଧିକ ପୁଞ୍ଜି ସୃଷ୍ଟି ଓ ସମ୍ବଳ ସୃଷ୍ଟିରେ ଏହି ଅର୍ଥକୁ ବିନିଯୋଗ କରାଯାଇପାରିଥାନ୍ତା ବୋଲି ସିଏଜି ରିପୋର୍ଟରେ ମତ ଦିଆଯାଇଛି ।

ସରକାରୀ-ବେସରକାରୀ ସହଭାଗିତା ନୀତି (ପିପିପି) ଗଠନ କରିଛନ୍ତି । ୨୦୦୭-୧୨ ମଧ୍ୟରେ ଅର୍ଥ ବ୍ୟବସ୍ଥାରେ ୧୯ଟି ସେକ୍ଟରରେ ଭିତିି ସ୍ଥାପନ କରି ସର୍ବାଧିକ ସମ୍ବଳ ଉତ୍ପାଦନ କରିବା ପାଇଁ ଏହା ଉଦ୍ଧିଷ୍ଟ ଥିଲା ।

କିନ୍ତୁ ଏହି ସମୟ ମଧ୍ୟରେ ସମ୍ବଳ ସଂଗ୍ରହ ଅତି ନଗଣ୍ୟ ଥିଲା । କାର୍ଯ୍ୟକ୍ରମକୁ ତ୍ୱରାନ୍ୱିତ କରିବା କ୍ଷେତ୍ରରେ ଫଳପ୍ରଦ ପଦକ୍ଷେପ ନେବାକୁ ସିଏଜି ପରାମର୍ଶ ଦେଇଛନ୍ତି ।

ସଂସଦୀୟ ବ୍ୟାପାରମନ୍ତ୍ରୀ କଳ୍ପତରୁ ଦାସ କହିଛନ୍ତି ନିଜ ଏକାଉଂଟସରେ ନୁହେଁ ବିଭାଗର ଏକାଉଂଟସରେ ରହିଛି । ବର୍ଷଶେଷରେ ସେହି ଅର୍ଥ ଆସିଥିବାରୁ ଆସନ୍ତା ବର୍ଷ ଏହି ଅର୍ଥ ଖର୍ଚ୍ଚ କରାଯିବ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୨ (ଓଡ଼ିଶା ଡ଼ଟ୍ କମ୍)–କୋଇଲା ବ୍ଲକ ଆବଣ୍ଟନର ସିଏଜି ରିପୋର୍ଟ ଉପରେ ଅନୁଧ୍ୟାନ କରିବାକୁ ସଂସଦର ପବ୍ଲିକ ଆକାଉଣ୍ଟସ କମିଟି (ପିଏସି) ଶୁକ୍ରବାର ଓଡ଼ିଶା ପହଞ୍ଚିଛନ୍ତି ।

ଏଥିରେ ବିଜେଡିର ସାଂସଦ ଭତୃହରି ମହତାବଙ୍କ ସମେତ ୭ ଜଣ ସଦସ୍ୟ ଅଛନ୍ତି ।

କୋଇଲା ବ୍ଲକ ଆବଣ୍ଟନ କ୍ଷେତ୍ରରେ ହୋଇଥିବା ଅନିୟମିତତା ଉପରେ କାଗ ଦେଇଥିବା ରିପୋର୍ଟ ଉପରେ ପିଏସି ଅନୁଧ୍ୟାନ କରୁଛି । ଏଥିପାଇଁ କୋଇଲା ବ୍ଲକ ଆବଣ୍ଟନ ପାଇଁ ଓଡ଼ିଶା ସରକାରଙ୍କ ସୁପାରିଶର ସ୍ୱଚ୍ଛତା ଯାଞ୍ଚ କରିବ ପିଏସି ।

୨୦୦୪ରୁ ୨୦୦୯ ମଧ୍ୟରେ କୋଇଲା ବ୍ଲକ ଆବଣ୍ଟନର ନିରପେକ୍ଷତା ଉପରେ କାଗ ପୂର୍ବରୁ ପ୍ରଶ୍ନ ଉଠାଇଛି । ରାଜ୍ୟରେ ୧୦୮ଟି କମ୍ପାନୀ କୋଇଲା ଖଣି ପାଇଁ ଆବେଦନ କରିଥିବାବେଳେ ୨୫ଟି କମ୍ପାନୀକୁ କେଉଁ ଆଧାରରେ ଖଣି ଦିଆଗଲା ସେସମ୍ପର୍କରେ ମଧ୍ୟ କାଗ ଅଙ୍ଗୁଳି ନିର୍ଦ୍ଦେଶ କରିଛନ୍ତି ।

ସେଥିମଧ୍ୟରୁ ଓଡ଼ିଶାର ୬ଟି କମ୍ପାନୀ ଅନ୍ତର୍ଭୁକ୍ତ । କେଉଁ ଆଧାରରେ ରାଜ୍ୟ ସରକାର ନିର୍ଦ୍ଧିଷ୍ଟ କମ୍ପାନୀ ପାଇଁ କୋଇଲା ବ୍ଲକ ସୁପାରିଶ କରିଛନ୍ତି ତାହାର ଯାଞ୍ଚ କରାଯିବ ।

ସୈନିକ ମାଇନିଂ ସହ ହୋଇଥିବା ଚୁକ୍ତି, ନବ ଭାରତ ପାଇଥିବା କୋଇଲା ବ୍ଲକ ଏସାର କଂପାନୀକୁ ହସ୍ତାନ୍ତର କରିବା ଏବଂ ଅନ୍ୟନ୍ୟ କୋଇଲା ଦୁର୍ନୀତି ନେଇ ରାଜ୍ୟ ସରକାର ଅଡୁଆରେ ଅଛନ୍ତି ।

ଏଣୁ ଏ ସବୁ ଯାଞ୍ଚ ଘଟଣାକୁ ନେଇ କିପରି କମିଶନମାନଙ୍କୁ ସମ୍ମୁଖୀନ କରାଯିବ ସେ ଚିନ୍ତା ଏବେ ସରକାରଙ୍କୁ ଘାରିଛି । ଏହି ପ୍ରତିନିଧି ଦଳ କୋଇଲା ଦୁର୍ନୀତି ଯାଞ୍ଚ ସହ ପରିବେଶ ସମସ୍ୟାର ଅନୁଧ୍ୟାନ କରିବେ ।

ଅସୁସ୍ଥତା କାରଣରୁ ପିଏସି ଅଧ୍ୟକ୍ଷ ମୁରଲୀ ମନୋହର ଯୋଶୀ ଆସିନାହାଁନ୍ତି । ଏହି ପ୍ରତିନିଧି ଦଳ ଶନିବାର ଦିନ ରାଜ୍ୟ ସରକାରଙ୍କ ସହିତ ଆଲୋଚନା କରିବେ ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ କମ