ସୁନାବେଶ

ଭୁବନେଶ୍ୱର, ୨୮।୬।୨୦୧୮: ପବିତ୍ର ରଥଯାତ୍ରା ଅବସରରେ ସୋସିଆଲ ମିଡିଆରେ ଏକ ଭକ୍ତିର ବାତାବରଣ ସୃଷ୍ଟି କରିବା ପାଇଁ ଆଗେଇ ଆସିଛି ଓଡ଼ିଶାର ଆଗଧାଡ଼ିର ଡିଜିଟାଲ ପୋର୍ଟାଲ ଓଡ଼ିଶାଲାଇଭ୍‍।

ସ୍ନାନ ପୂର୍ଣ୍ଣିମାଠାରୁ ନୀଳାଦ୍ରି ବିଜେ ପର୍ୟ୍ୟନ୍ତ ୨୮ ଦିନର ଅବଧି ମଧ୍ୟରେ ପ୍ରତିଦିନ ଗୋଟିଏ ଗୋଟିଏ ଭକ୍ତି ସଙ୍ଗୀତ ଓଡ଼ିଶାଲାଇଭ୍‍‍ର ଫେସବୁକ ପେଜରେ ପୋଷ୍ଟ କରାଯାଉଛି। ତା’ ସାଙ୍ଗକୁ ଏହି ଲୋକପ୍ରିୟ ଭଜନ ଓ ଜଣାଣଗୁଡ଼ିକୁ ୟୁଟ୍ୟୁବ୍‍, ଟୁଇଟର, ଇନଷ୍ଟାଗ୍ରାମ ଆଦି ସୋସିଆଲ ଚ୍ୟାନେଲ ମାଧ୍ୟମରେ ପ୍ରସାର କରାଯାଉଛି।

ଓଡ଼ିଶାଲାଇଭର ଏହି ଭକ୍ତି ସଙ୍ଗୀତ ପ୍ରସାର ଅଭିଯାନର ନାଁ ରହିଛି ‘ହେ ଚକାନୟନ’। ପ୍ରସିଦ୍ଧ ଭଜନ ଗାୟିକା ଶାନ୍ତିଲତା ବାରିକ ଛୋଟରାୟଙ୍କ କ୍ଲାସିକ ଉପସ୍ଥାପନା ‘ହେ ଚକାନୟନ’ ସ୍ନାନ ପୂର୍ଣ୍ଣିମା ଦିନ ଆରମ୍ଭ ହୋ‍ଇଥିବା ଏହି ଅଭିଯାନରେ ସ୍ଥାନ ପାଇଛି।

‘ହେ ଚକାନୟନ’ ସୋସିଆଲ ମିଡିଆ ଅଭିଯାନ ଅବସରରେ ଓଡ଼ିଶାଲାଇଭ ପକ୍ଷରୁ ବଛାବଛା ଭଜନ ଓ ଜଣାଣ ଦର୍ଶକମାନଙ୍କ ପାଇଁ ଉପସ୍ଥାପନ କରାଯାଉଛି। ତା’ ମଧ୍ୟରେ ରହିଛି ‘ଜଗବନ୍ଧୁ ହେ ଗୋସାଇଁ’, ‘ଚନ୍ଦନ ଲାଗି ସମୟେ ଚିତ୍ତ ଚିନ୍ତାମଣିକି’, ‘ବାଲିରେଣୁ ମହାବନ୍ଧ ସୁଜନେ ହେ’, ‘ସେ ତ ଭକତ ଭାବରେ ବନ୍ଧା’, ‘ଭୁଜ ତଳେ ମୋତେ ରଖ ମହାପ୍ରଭୁ’, ‘ଚକାନୟନକୁ ପତିତ କେହି’।

ଏହିସବୁ ଲୋକପ୍ରିୟ ଭକ୍ତି ସଙ୍ଗୀତଗୁଡ଼ିକୁ ବିଭିନ୍ନ ସମୟରେ ଗାଇଛନ୍ତି ଶାନ୍ତିଲତା ବାରିକ ଛୋଟରାୟ, ମନ୍ମଥ ମିଶ୍ର, ସୁସ୍ମିତା ଦାସ, ଅରବିନ୍ଦ ମୁଦୁଲି, ବିଜୟ ଜେନା, ମହାପ୍ରସାଦ କର, ସୁଧା ମିଶ୍ର, ନମ୍ରତା ମହାନ୍ତି, ସୌରଭ ନାୟକଙ୍କ ଭଳି ପ୍ରସିଦ୍ଧ କଳାକାରମାନେ। ସୋସିଆଲ ମିଡିଆରେ ଦର୍ଶକମାନେ ଏହି ଲୋକପ୍ରିୟ ଭକ୍ତିଗୀତଗୁଡ଼ିକୁ ଶୁଣିବା ସହ ନିଜର କମେଣ୍ଟ ଦେଇପାରିବେ। ଏଗୁଡ଼ିକ ସେୟାରକରି ଅଧିକ ଦର୍ଶକଙ୍କ ପାଖରେ ପହଞ୍ଚାଇବା ପାଇଁ ଓଡ଼ିଶାଲାଇଭ୍‍ ପ୍ରସାରଣ ବିଭାଗ ପକ୍ଷରୁ ଅନୁରୋଧ କରାଯାଇଛି।

“ଦେଶବିଦେଶରେ ଥିବା ଓଡ଼ିଆ ଶ୍ରୋତା ବିଶେଷକରି ଜଗନ୍ନାଥ ଭକ୍ତିସଙ୍ଗୀତକୁ ଖୋଜୁଥିବା ଗୀତ ରସିକମାନଙ୍କ ପାଇଁ ଏହା ଏକ ସୁନ୍ଦର ସୁଯୋଗ ହେବ”, କହିଛନ୍ତି ଓଡ଼ିଶାଲାଇଭର ସମ୍ପାଦକ ନୀଳାମ୍ବର ରଥ। ଏହାଛଡ଼ା ପ୍ରତିବର୍ଷ ଭଳି ଓଡ଼ିଶାଲାଇଭ୍‌ ରଥଯାତ୍ରା ସମୟରେ ବିଭିନ୍ନ କାର୍ୟ୍ୟକ୍ରମର ବ୍ୟାପକ ପ୍ରସାର କରିବା ସହ ପୁରୀରୁ ଶ୍ରୀଗୁଣ୍ଡିଚା, ବାହୁଡ଼ା, ସୁନାବେଶ, ଅଧରନୀତି ଏବଂ ନୀଳାଦ୍ରିବିଜେ ନୀତିର ସିଧା ପ୍ରସାରଣ କରିବାକୁ ଯାଉଛି ବୋଲି ଶ୍ରୀ ରଥ ସୂଚନା ଦେଇଛନ୍ତି।

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ପୁରୀ,୨୭ ଜୁଲାଇ (ଓଡିଶା ଡଟ୍ କମ୍): ଚଳିତ ଶତାବ୍ଦୀର ପ୍ରଥମ ନବକଳେବର ପର୍ବରେ ସୋମବାର ନବ ନିର୍ମିତ ଶ୍ରୀବିଗ୍ରହମାନଙ୍କ ରଥ ଉପରେ ପ୍ରଥମ ସୁନାବେଶର ଦର୍ଶନ କରିଛନ୍ତି ଲକ୍ଷାଧିକ ଭକ୍ତ ଓ ଶ୍ରଦ୍ଧାଳୁ ।

ଶ୍ରୀମନ୍ଦିର ପରମ୍ପରା ଅନୁସାରେ ଅଷାଢ ମାସ ଶୁକ୍ଳ ପକ୍ଷ ଏକାଦଶୀ ତିଥିରେ ଶ୍ରୀବିଗ୍ରହମାନଙ୍କର ସୁନାବେଶ କରାଯାଏ। ଏଥିରେ ଗୁଣ୍ଡିଚା ମନ୍ଦିରରୁ ଶ୍ରୀମନ୍ଦିର ଫେରି ସିଂହଦ୍ଵାର ସମ୍ମୁଖରେ ଉପସ୍ଥିତ ଥିବା ରଥାରୁଢ ଶ୍ରୀଜିଉମାନଙ୍କର ବିଧିମୁତାବକ ନୀତିକାନ୍ତି ପାଳନ ପରେ ବିଗ୍ରହମାନଙ୍କୁ ସୁନା ଅଳଙ୍କାରରେ ଆଭୂଷିତ କରାଯାଏ ।

ଶ୍ରୀମନ୍ଦିର ପ୍ରଶାସନ ଦ୍ଵାରା କରାଯାଇଥିବା ସ୍ଵତନ୍ତ୍ର ନୀତି ନିର୍ଘଣ୍ଟ ଅନୁସାରେ ହିଁ ଅପରାହ୍ନ ପ୍ରାୟ ୪ଟାରେ ମହାପ୍ରଭୁମାନଙ୍କର ସୁନାବେଶ ସମ୍ପର୍କିତ ବିଭିନ୍ନ ନୀତିକାନ୍ତି ଆରମ୍ଭ କରାଯାଇଥିଲା । ଏହା ପରେ ଆରମ୍ଭ ହୋଇଥିଲା ଶ୍ରୀବିଗ୍ରହମାନଙ୍କର ସୁନାବେଶ ।

ପୁଷ୍ପାଳକ, ଖୁଣ୍ଟିଆ, ଇତାପତି, ତଳୁଚ୍ଛ ଓ ଭିତରଚ୍ଛ ସେବାୟତମାନେ ଶ୍ରୀଜୀଉ ମାନଙ୍କୁ ଶ୍ରୀଭୂଜ, ଶ୍ରୀପୟର, ରତ୍ନ ପଦକ, ରତ୍ନ କିରୀଟ, ଓଡିଆଣି, କାନଫୁଲ, ମର୍କତ ମୁକୁଟ, ପଦ ପଲ୍ଲବ, ମୁଦି, କଣ୍ଠିମାଳ, ମର୍କତ ଯାଉଁଳି, ବଳା, ବାହୁଟି ଓ କଟି ମେଖଳା ଆଦି ୧୩୮ ପ୍ରକାରର ରତ୍ନ ଖଚିତ ସ୍ୱର୍ଣ୍ଣ ଅଳଙ୍କାରରେ ସୁସଜ୍ଜିତ କରିଥିଲେ ।

ମିଳିଥିବା ସୂଚନା ଅନୁସାରେ ଅଳଙ୍କାର, ଆଭୂଷଣ ଓ ଆୟୂଧରେ ସୁସଜ୍ଜିତ ଶ୍ରୀଜୀଉଙ୍କୁ ଦର୍ଶନ କରିବା ପାଇଁ ସନ୍ଧ୍ୟା ପରେ ଭକ୍ତମାନଙ୍କ ସଂଖ୍ୟା ଧିରେଧିରେ ବୃଦ୍ଧି ପାଇଥିଲା ।

ଭକ୍ତମାନେ କିପରି ଶାନ୍ତିଶୃଙ୍ଖଳାର ସହ ଏହି ସୁନାବେଶ ଦର୍ଶନ କରିପାରିବେ ସେଥିପାଇଁ ରଥ ଚାରିପଟେ ସ୍ଥାନୀୟ ପ୍ରଶାସନ ବ୍ୟାରିକେଡ଼ର ବ୍ୟବସ୍ଥା କରିଛି । ରଥ ନିକଟକୁ ଭକ୍ତମାନଙ୍କୁ ଏକ ପ୍ରବେଶ ପଥ ଦେଇ ଧାଡିକରି ଛଡ଼ାଯାଇଥିବା ବେଳେ ତଦନୁରୂପ ପ୍ରସ୍ଥାନ ପଥ ଦେଇ ମଧ୍ୟ ଧାଡିମାଧ୍ୟମରେ ବାହାରକୁ ଯିବାର ବନ୍ଦୋବସ୍ତ କରାଯାଇଛି ।

ଲକ୍ଷାଧିକ ଭକ୍ତଙ୍କ ସମାଗମ କୁ ଦୃଷ୍ଟିରେ ରଖି ସହରରେ ପୋଲିସ ଫୋର୍ସ ମୁତୟନ କରାଯିବା ସହ ରାପିଡ଼ ଆକ୍ସନ ଫୋର୍ସ, ବୋମା ନିଷ୍କ୍ରୀୟକାରୀ ଦଳ, ଡଗ୍ ସ୍କ୍ୱାର୍ଡ, କ୍ୱିକ୍ ରେସପନ୍ସ ଟିମ୍ କୁ ମଧ୍ୟ ନିୟୋଜିତ କରାଯାଇଛି । ପୁରୀ ବଡଦାଣ୍ଡର ବିଭିନ୍ନ ସ୍ଥାନରେ ସିସିଟିଭି କ୍ୟାମେରା ମଧ୍ୟ ଲଗାଯାଇଛି ।

ସେହିପରି ଟ୍ରାଫିକ ସମସ୍ୟା ଦୂର କରିବା ପାଇଁ ସହର ଭିତରକୁ ଆସିବା ଓ ଯିବା ପାଇଁ ଦୁଇଟି ବାଇପାସର ବନ୍ଦୋବସ୍ତ କରାଯାଇଛି । ଭକ୍ତମାନଙ୍କ ସୁବିଧା ପାଇଁ ପୁରୀ ବଡଦାଣ୍ଡରେ ଦୁଇ ଚକିଆ ଗାଡି ଚଳାଚଳକୁ ବନ୍ଦ କରାଯାଇଛି।

ବର୍ଷକରେ ପାଞ୍ଚଥର ବିଭିନ୍ନ ସମୟରେ ଶ୍ରୀବିଗ୍ରହ ମାନଙ୍କର ସୁନାବେଶ ହୋଇଥାଏ । ଚାରି ଥର ରତ୍ନ ସିଂହାସନରେ ହେଉଥିବାବେଳେ ଗୋଟିଏ ଥର ରଥ ଉପରେ ଅନୁଷ୍ଠିତ ହୁଏ ।

ଓଡିଶା ଡଟ୍ କମ୍