ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ୱର, ମାର୍ଚ୍ଚ ୧୦ (ଓଡିଶା ଡଟ୍ କମ୍) ମେଡିକାଲ ପି.ଜି ପ୍ରବେଶିକା ପରୀକ୍ଷାରେ କପି କରିଥିବା ୧୭ ଜଣ ଏମ୍.ବି.ବି.ଏସ୍ ଡାକ୍ତରଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ଗତ ଜାନୁୟାରୀ ମାସରେ ଅନୁଷ୍ଠିତ ହୋଇଥିବା ୨୦୧୨ ପାଇଁ ମେଡିକାଲ ପି.ଜି ପ୍ରବେଶିକା ପରୀକ୍ଷାରେ ୧୭ ଜଣ ପରୀକ୍ଷାର୍ଥୀ କପି କରୁଥିବା ବେଳେ ରାଜ୍ୟସ୍ତରୀୟ ସ୍କ୍ୱାଡ୍ ହାତରେ ଧରାପଡିଥିଲେ ।
ଏ ନେଇ ରିପୋର୍ଟ ମିଳିବା ପରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ତରଫରୁ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଏଭଳି ଅସାଧୁ ଉପାୟ ଅବଲମ୍ବନ କରିଥିବା ୧୭ ଜଣଙ୍କ ମଧ୍ୟରୁ ୬ ଜଣ ସରକାରୀ ଚାକିରୀରେ ଥାଇ ପରୀକ୍ଷା ଦେଉଥିବା ବେଳେ ୧୧ଜଣ ସିଧାସଳଖ ପରୀକ୍ଷା ଦେଉଥିଲେ ।
ସରକାରୀ ଚାକିରୀରେ ଥାଇ ପରୀକ୍ଷା ଦେଉଥିବା ୬ ଜଣ ଡାକ୍ତରଙ୍କ ବିରୁଦ୍ଧରେ ବିଭାଗୀୟ ଶୃଂଖଳାଗତ କାର୍ଯ୍ୟାନୁଷ୍ଠାନ ସହିତ ୨୦୧୩ ବର୍ଷରୁ ୩ ବର୍ଷ ପାଇଁ ସେମାନଙ୍କୁ ମେଡିକାଲ ପି.ଜି ପ୍ରବେଶିକା ପରୀକ୍ଷା ଦେବାକୁ ମନା କରାଯାଇଛି ।
ସେହିଭଳି ଅନ୍ୟ ୧୧ ଜଣ ମଧ୍ୟ ୨୦୧୩ ବର୍ଷରୁ ୩ ବର୍ଷ ପାଇଁ ପ୍ରବେଶିକା ପରୀକ୍ଷା ଦେଇ ପାରିବେ ନାହିଁ । ଆହୁରିମଧ୍ୟ ଏହି ୧୭ ଜଣଙ୍କର ପରୀକ୍ଷା ଖାତା ମୂଲ୍ୟାୟନ କରାଯିବ ନାହିଁ ବୋଲି କୁହାଯାଇଛି ।
ଓଡିଶା ଡଟ୍ କମ୍
