ମୁଖ୍ୟ ଖବର

ପୋଲିସ ମହାନିର୍ଦ୍ଦେଶକ ଭାବେ ପ୍ରକାଶ ମିଶ୍ରଙ୍କ ଦାୟିତ୍ୱ ଗ୍ରହଣ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କଟକ, ଜୁଲାଇ ୬(ଓଡ଼ିଶା ଡ଼ଟ୍ କମ୍) ରାଜ୍ୟ ପୋଲିସ ମହାନିର୍ଦ୍ଦେଶକ ଭାବେ ବରିଷ୍ଠ ଆଇପିଏସ୍ ଅଫିସର ପ୍ରକାଶ ମିଶ୍ର ଶୁକ୍ରବାର ଦାୟିତ୍ୱ ଗ୍ରହଣ କରିଛନ୍ତି ।

କଟକ ସ୍ଥିତ ପୋଲିସ ମୁଖ୍ୟାଳୟରେ ପ୍ରଥମେ ତାଙ୍କୁ ଗାର୍ଡ଼ ଅଫ୍ ଅର୍ନର ପ୍ରଦାନ କରାଯିବା ପରେ ବରିଷ୍ଠ ଅଧିକାରୀଙ୍କ ଗହଣରେ ନିଜ କାର୍ଯ୍ୟାଳୟରେ ସେ ଦାୟିତ୍ୱ ଗ୍ରହଣ କରିଛନ୍ତି । ମାଓବାଦୀ ସମସ୍ୟା ଉପରେ ଗୁରୁତ୍ୱ ଦିଆଯିବ ବୋଲି ଦାୟିତ୍ୱ ଗ୍ରହଣ କରିବା ପରେ ମିଶ୍ର କହିଛନ୍ତି ।

୧୯୭୭ ବ୍ୟାଚ୍ ଆଇପିଏସ୍ ଅଫିସର ମିଶ୍ର ୨୦୧୦ରୁ କେନ୍ଦ୍ରକୁ ଡେପୁଟେସନ୍ ରେ ଯାଇ ନୂଆଦିଲ୍ଲୀର ଜାତୀୟ ବିପର୍ଯ୍ୟୟ ପରିଚାଳନା ବାହିନୀ(ଏନ୍ଡ଼ିଆର୍ଏଫ୍)ର ମହାନିର୍ଦ୍ଦେଶକ ଭାବେ କାର୍ଯ୍ୟ କରୁଥିଲେ ।

୧୯୫୬ ଫେବୃୟାରୀ ୨୯ରେ ପୁରୀରେ ଜନ୍ମଗ୍ରହଣ କରିଥିବା ମିଶ୍ର ରାଜ୍ୟର ବିଭିନ୍ନ ଜିଲ୍ଲାରେ ଏସ୍ପି ଭାବରେ ଏବଂ ଡିଆଇଜି ଓ ଗୃହ ବିଭାଗର ସ୍ୱତନ୍ତ୍ର ସଚିବ ଭାବେ ଦାୟିତ୍ୱ ନିର୍ବାହ କରିଛନ୍ତି । ସରକାର ଗତ ମଙ୍ଗଳବାର ମିଶ୍ରଙ୍କୁ ପୋଲିସ ମହାନିର୍ଦ୍ଦେଶକ ଭାବେ ନିଯୁକ୍ତ କରିଥିଲେ ।

ଗୁରୁବାର ସଂଧ୍ୟାରେ ମିଶ୍ର ନୂଆଦିଲ୍ଲୀରୁ ଆସି ଭୁବନେଶ୍ୱରରେ ପହଞ୍ଚିବା ପରେ ବରିଷ୍ଠ ଅଧିକାରୀମାନେ ତାଙ୍କୁ ସ୍ୱାଗତ କରିଥିଲେ । ବିଭାଗର ଅଫିସରମାନଙ୍କୁ ଦକ୍ଷତା ଅନୁଯାୟୀ ଦାୟିତ୍ୱ ଦିଆଯିବା ସହ ଭଲ ଅଫିସର ମାନଙ୍କୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ପ୍ରଦାନ କରାଯିବ ବୋଲି ବିମାନବନ୍ଦରରେ ମିଶ୍ର ସାମ୍ବାଦିକଙ୍କୁ କହିଥିଲେ ।

ଓଡ଼ିଶା ଡ଼ଟ୍ କମ୍