କେଦାର ମିଶ୍ର

ଲଲାଟେନ୍ଦୁ ବିଦ୍ୟାଧର ମହାପାତ୍ର ନାଁ ଟି ସହିତ ଗତ ୩୫ ବର୍ଷର ଓଡିଆ ଜନଜୀବନ ଓ ଗଣମାଧ୍ୟମ ବେଶ୍ ଅଭ୍ୟସ୍ତ। ମାତ୍ର ୫୨ ବର୍ଷ ବୟସରେ ମୃତ୍ୟୁବରଣ କରିଥିବା ଲୁଲୁ (ଲଲାଟେନ୍ଦୁ ଅପେକ୍ଷା ଏ ନାଁ ଟି ସହ ଓଡିଶା ବାସୀ ବେଶୀ ପରିଚିତ) ଓଡିଶାର ଗାଁ ଗାଁ ରେ ଜଣେ ଯୁବ ନେତା ଓ ସଂଗଠକ ଭାବେ ପରିଚିତ ଥିଲେ ।

ଠୋ ଠୋ କଥା ଓ ଅପ୍ରମିତ ସାହସର ପ୍ରତୀକ ଭାବରେ ତାଂକୁ ଓଡିଶା ବାସୀ ଜାଣିଥିଲେ। ୨୦୧୫ ରେ ଓଡିଶା ମୁଖ୍ୟମନ୍ରୀ ନବୀନ ପଟ୍ଟନାୟକଙ୍କୁ ଖୋଲାଖୋଲି ଆହ୍ବାନ ଦେବାର ସାହସକୁ ନେଇ ଚର୍ଚା ଥମିନଥିବା ବେଳେ ଲୁଲୁ ଆରପାରିକୁ ଚାଲିଗଲେ।

ଅଶୀ ଦଶକରେ ଜାନକୀ ବଲ୍ଲଭ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ସମୟରେ ଲୁଲୁ ଥିଲେ ସବୁଠୁ ଅଲ୍ପବୟସ୍କ କିନ୍ତୁ ସବୁଠୁ ପ୍ରଭାବଶାଳୀ ରାଜନେତା। କଂଗ୍ରେସ ରାଜନୀତିରେ ମହା ମହା ନେତାଂକୁ ବେଖାତିର କରି ଲୁଲୁ ନିଜର ପତିଆରା ତିଆରି କରିଥିଲେ।

ତାଂକର ଦାମ୍ଭିକତା, ନିର୍ଭୀକତା , ଅପ୍ରିୟ ସତ କହିବାର ସାହସ ଓ ରାଜନୀତିରେ ଦୁଃସାହସିକତା ପ୍ରଦର୍ଶନ କରିବାର ପ୍ରବଣତା ତାଂକୁ ଅନନ୍ୟ ନେତାର ଗୌରବ ପ୍ରଦାନ କରିଥିଲା ।

ରାଜନୀତିରେ ସେ ବହୁ ଶତ୍ରୁ ତିଆରି କରିଛନ୍ତି, ବହୁ ଲୋକଂକର ଶତ୍ରୁ ସାଜିଛନ୍ତି , କିନ୍ତୁ ଶତ୍ରୁତା ନିଭାଇବାବେଳେ ରାଜନୈତିକ ଫାଇଦାବାଜିକୁ ସେ ଗୁରୁତ୍ବ ଦେଇ ନାହାନ୍ତି।

ତାଂକ ଆଗରେ ହୁଏତ ଅନ୍ୟ ଦଳକୁ ଯାଇ କ୍ଷମତା ଦଖଲ କରିବାର ଅନେକ ମୌକା ଥିଲା, ସେ କିନ୍ତୁ କଂଗ୍ରେସ ଦଳକୁ ଛାଡ଼ି ନାହାନ୍ତି । ଏହି ଲୋକପ୍ରିୟ ଯୁବ ନେତା ଲୁଲୁ ମହାପାତ୍ର, ତାଂକ ଜୀବନ ଓ ରାଜନୀତିକୁ ନେଇ କିଛି କଥା-

୧. ଲୁଲୁ ମହାପାତ୍ର ଏକ ଐତିହାସିକ ପରିବାରର ଦାୟାଦ। ପାଇକ ବିଦ୍ରୋହ ର ମହାନାୟକ ବକ୍ସି ଜଗବନ୍ଧୁ ବିଦ୍ୟାଧର ମହାପାତ୍ର ବଂଶର ଉତ୍ତର ପୁରୁଷ ଭାବରେ ବ୍ରହ୍ମଗିରି ର ଗଡ ରାଢନ୍ଗ ଗାଁ ରେ ତାଂକର ଜନ୍ମ ୧୪ ଫେବୃଆରୀ ୧୯୬୪ ମସିହାରେ ।

୨. ବିଜେବି କଲେଜ ରେ ପଢିବା ସମୟରୁ ତାଂକର ରାଜନୈତିକ ଜୀବନ ଆରମ୍ଭ ହୁଏ । ଅଶୀ ଦଶକରେ ଛାତ୍ର କଂଗ୍ରେସ ର ନେତୃତ୍ବ ନେଇ ସେ କଂଗ୍ରେସ ଦଳ ଲାଗି ଏକ ବଡ ସମର୍ଥକ ଗୋଷ୍ଠୀ ତିଆରି କରିଥିଲେ । ଓଡିଶାର ସବୁ ମହାବିଦ୍ୟାଳୟ ଓ ବିଶ୍ଵ ବିଦ୍ୟାଳୟରେ ଲୁଲୁଂକ ସମର୍ଥକ ଓ ଅନୁଗାମୀ ରହିଥିଲେ।

୩. ଲୁଲୁଂକ ପରେ ବହୁ ଛାତ୍ର ନେତା ଆସିଛନ୍ତି ଓ ଯାଇଛନ୍ତି । କିନ୍ତୁ ଲୁଲୁଂକ ପରି ଲୋକପ୍ରିୟ ତଥା ପ୍ରଭାବଶାଳୀ ହେବାରେ ତାଂକ ତୁଳନୀୟ କେହି ନାହାନ୍ତି। ଜୀବନର ଅନ୍ତିମ ମୁହୁର୍ତ୍ତ ପର୍ଯନ୍ତ ତାଂକ ଆଗରେ ଓ ପଛରେ ହଜାର ହଜାର ଛାତ୍ର ଓ ଯୁବକ ରହିଥିଲେ ।

୪. ଅଶୀ ଦଶକର ଲୁଲୁ ଥିଲେ ଦୁର୍ଦ୍ଧର୍ଷ ଛାତ୍ରନେତା । ତାଂକର କାହାକୁ ଡର ନଥିଲା ବା ଖାତିର ନଥିଲା । ଜାନକୀ ବାବୁଂକ ଶାସନରେ ସେ ଆଖି ଉଠେଇଲେ ପ୍ରଶାସନ ଥରୁଥିଲା ବୋଲି ଆଜି ବି ବିଶ୍ଵାସ କରାଯାଏ ।

୫. ଅଥଚ କୌଣସି ସମୟରେ ସେ କ୍ଷମତାରେ ନଥିଲେ । ୧୯୯୫ ରୁ ୨୦୦୦ ଜାନକୀ ବାବୁଂକ ତୃତୀୟ ପାଳିରେ ସେ ପ୍ରଥମ ଥର ପାଇଁ ବିଧାୟକ ଭାବେ ବ୍ରହ୍ମଗିରି ରୁ ନିର୍ବାଚିତ ହୋଇ ବିଧାନସଭାକୁ ଆସିଲେ । ତେବେ ପ୍ରତିଷ୍ଠା ଓ ପତିଆରା ଲାଗି ତାଂକୁ ପଦ ପଦବୀର ଆବଶ୍ୟକତା ନଥିଲା ।

୬. ୨୦୦୦ ରୁ ୨୦୦୯ ପର୍ଯନ୍ତ ବିଧାନସଭାରେ ବିରୋଧୀ ଦଳର ବିଧାୟକ ଭାବେ ତାଂକର ଭୂମିକା ଥିଲା ବେଶ୍ ପ୍ରଭାବଶାଳୀ । ବିଜେଡି-ବିଜେପି ମେଣ୍ଟ ସରକାରକୁ ବିଧାନସଭା ଭିତରେ ଓ ବାହାରେ ହଲାପଟା କରିବାରେ ତାଂକର ଭୂମିକା ବେଶ ଅଗ୍ରଣୀ ଥିଲା ।

୭. କଂଗ୍ରେସ ରାଜନୀତିରେ ସେ ଥିଲେ ସବୁଠୁ ପ୍ରଭାବଶାଳୀ ନେତା କିନ୍ତୁ ତାଂକ ନେତୃତ୍ଵ ଉପରେ କଂଗ୍ରେସ ର କେନ୍ଦ୍ରୀୟ ନେତୃତ୍ଵ ଭରସା କରି ପାରିନଥିଲେ।

ଲୁଲୁ ଛାତ୍ର ଓ ଯୁବ କଂଗ୍ରେସ ର ସଭାପତି ରହିବା ସହ ପ୍ରଦେଶ କଂଗ୍ରେସର କାର୍ୟକାରୀ ସଭାପତି ଓ ଉପ ସଭାପତି ରହିଥିଲେ। ହେଲେ ଶେଷ ଯାଏଁ ତାଂକୁ ପିସିସି ସଭାପତି ଦାୟିତ୍ଵ ମିଳି ପାରିଲା ନାହିଁ ।

୮. ଗତ କିଛି ବର୍ଷ ଧରି ବିଜେଡି ସରକାର ବିରୋଧରେ ତୀବ୍ର ସଂଗଠନ ଓ ଜନମତ ତିଆରି କରିବା ଲାଗି ତାଂକର ପ୍ରୟାସକୁ କଂଗ୍ରେସ ସମର୍ଥନ କରୁନଥିଲା । ଅନେକ ସମୟରେ ତାଂକର ଦୃଢ ଓ ଆକ୍ରମକ ରାଜନୀତିକୁ କଂଗ୍ରେସ ନେତୃତ୍ଵ ଡରି ଯାଉଥିଲେ।

୯. କଂଗ୍ରେସ ସମର୍ଥନ କରୁ ବା ନକରୁ ନିଜସ୍ବ ସଂଗଠନ ଜରିଆରେ ସେ ବିଜେଡି ନେତୃତ୍ବକୁ ସବୁବେଳେ ଅସୁବିଧାରେ ପକାଇ ଆସିଛନ୍ତି। ଅଂଡାମାଡ ରାଜନୀତିକୁ ନେଇ ଗତ ବର୍ଷ ଯେଉଁ ହଟ ଚମଟ ସୃଷ୍ଟି ହୋଇଥିଲା, ସେଥିରେ ଏକୁଟିଆ ପଡି ଯାଇଥିଲେ ମଧ୍ୟ ଲୁଲୁ ନିଜ ମତ ବଦଳାଇ ନଥିଲେ।

୧୦. ରାଜନୀତିରେ ବହୁ ନେତା ଆସିବେ ଓ ଯିବେ। ହେଲେ ସବୁ ଦଳ ଭିତରେ ନିଜର ବନ୍ଧୁ ସୃଷ୍ଟି କରି ପାରିଲା ପରି ଓ ଦରକାର ପଡିଲେ ଶତୃକୁ ବି ସାହାଯ୍ୟ କରିପାରିବା ପରି ଲୁଲୁ ମହାପାତ୍ରଂକ ଭଳି ନେତା ବିରଳ ହୋଇ ରହିବେ ।

ଗତ ୬ ନଭେମ୍ବର ସନ୍ଧ୍ୟା ରେ ଦିଲ୍ଲୀରେ ମେଦାନ୍ତ ହସପିଟାଲ୍ ରେ ତାଂକର ପରଲୋକ ଓଡିଶାର ଯୁବ ନେତୃତ୍ଵ କ୍ଷେତ୍ରରେ ଏକ ବିରାଟ ଶୁନ୍ୟସ୍ଥାନ ସୃଷ୍ଟି କରିଛି।

ଓଡିଶା ଡଟ କମ

କେଦାର ମିଶ୍ର

କେନ୍ଦ୍ରରେ ଗାଈ ଓ ଓଡ଼ିଶାରେ ନଈ – ଭାରତର ରାଜନୀତି ସମ୍ପର୍କରେ ମତାମତ ଦେବାକୁ ଯାଇ ଜଣେ ବନ୍ଧୁ ଏମିତି ବୁଦ୍ଧିଅ। ମନ୍ତବ୍ୟଟିଏ ଦେଇଛନ୍ତି । ସତକଥା କହିବାକୁ ଗଲେ, ଏବେ ସାରା ଭାରତର ରାଜନୀତି ଗାଈକୁ ନେଇ ଉଠୁଥିବା ପଡୁଥିବାବେଳେ, ଓଡ଼ିଶାରେ ମହାନଦୀର ପାଣିକୁ ନେଇ ରାଜନୀତି ଜୋର୍ ଧରିଛି ।

ମହାନଦୀକୁ ନେଇ ସବୁଠି ଚର୍ଚ୍ଚା ଓ ଚିକ୍ରାର । ତଥ୍ୟ ଅପେକ୍ଷା ଅନୁମାନକୁ ନେଇ ମହାନଦୀ ଏବେ ବିବାଦର ନଦୀ ପାଲଟିଯାଇଛି । ସବୁ ରାଜନୈତିକ ଦଳ ମହାନଦୀର ସୁରକ୍ଷା ପାଇଁ ଶେଷରକ୍ତ ବିନ୍ଦୁ ଦେଇ ସଂଗ୍ରାମ କରିବେ ବୋଲି ଡାକରା ଦେଇ·ଲିଛନ୍ତି ।

ତେବେ ମହାନଦୀ ରକ୍ତରେ ନୁହେଁ ବରଂ ପାଣିରେ ପରିପୁଷ୍ଟ ହେବା ଦରକାର । ମହାନଦୀ କାହାର ରକ୍ତରେ ହେଇ ନାହିଁ କିମ୍ବା କାହାର ଶେଷ ନିଃଶ୍ୱାସରେ ମହୀୟାନ୍ ହେବାକୁ ଅପେକ୍ଷା କରେନାହିଁ । ମହାନଦୀ ଓଡ଼ିଶାର ଜୀବନରେଖା ।

ସେ ତାର ଚିରସ୍ରୋତା ପ୍ରବାହରେ ଓଡ଼ିଶାର ଦେଢକୋଟି ଜନସାଧାରଣଙ୍କୁ ଜୀବନ ଦେଉଛି ଓ ଦେଇ ଚାଲିଥିବ । ତେଣୁ ମହାନଦୀର ପ୍ରାକୃତିକ ପ୍ରବାହ ଓ ତାର ରାଜନୈତିକ ପ୍ରବାହ ଭିତରେ ଦୂର ଦୂର ପର୍ଯ୍ୟନ୍ତ କୌଣସି ସମ୍ପର୍କ ନାହିଁ । ତେବେ ମହାନଦୀ ଓଡ଼ିଶାର ରାଜନୀତିରେ ହଠାତ୍ ଅନେକ ମତାନ୍ତର ଓ ମନାନ୍ତର ସୃଷ୍ଟି କରିଛି ।

ସବୁ ରାଜନୈତିକ ଦଳ ମିଳିତ ଭାବରେ ମହାନଦୀ ପାଇଁ ଲଢେଇ କରିବାକୁ ବାହାରିଛୁ ବୋଲି କହୁଥିବାବେଳେ ସବୁ ରାଜନୈତିକ ଦଳରେ ମହାନଦୀକୁ ନେଇ ବିବାଦ ଓ ବିସମ୍ବାଦ ଦେଖିବାକୁ ମିଳୁଛି । ମହାନଦୀ କୁ ନେଇ ଆରମ୍ଭ ହୋଇଥିବା ଓଡିଶା ରାଜନୀତିର ନୂଆ ସମୀକରଣ କୁ ନେଇ କେତୋଟି ବିଶେଷ କଥା-

୧. ଓଡ଼ିଶା ବିଧାନସଭାରେ ବିରୋଧୀ ଦଳ ନେତା ନରସିଂହ ମିଶ୍ର ମହାନଦୀକୁ ନେଇ ଦୀର୍ଘଦିନ ହେଲା ନିଜର ଅ।ଭିମୁଖ୍ୟ ସ୍ପଷ୍ଟ କରି ଅ।ସିଛନ୍ତି । ତାଙ୍କ ନେତୃତ୍ୱରେ ବିଜେଡ଼ିକୁ ବାଦ୍ ଦେଇ ବାକି ସବୁ ରାଜନୈତିକ ଦଳ ମହାନଦୀ ପାଇଁ ସଂଗ୍ରାମ କରିବାକୁ ସଂକଳ୍ପ ନେଇଛନ୍ତି ।

ତେବେ ନରସିଂହ ବାବୁଙ୍କ ଏହି ଉଦ୍ୟମ ପଛରେ ଓଡ଼ିଶା ପ୍ରଦେଶ କଂଗ୍ରେସ କମିଟି ଦୃଢତାର ସହିତ ଛିଡ଼ା ହେଲାଭଳି ମନେ ହେଉନାହିଁ । ନରସିଂହ ବାବୁଙ୍କ ମତ ଗୋଟିଏ ଅ।ଡ଼କୁ ଢଳୁଥିବାବେଳେ ପ୍ରଦେଶ କଂଗ୍ରେସର କମିଟି ସଭାପତି ପ୍ରସାଦ ହରିଚନ୍ଦନଙ୍କ ମତ ଅ।ଉ ଗୋଟିଏ ଅ।ଡ଼କୁ ଢଳୁଛି ।

ଗତ ସପ୍ତାହରେ ଆୟୋଜିତ ସର୍ବଦଳୀୟ ବୈଠକରେ ପିସିସି ସଭାପତି ରହସ୍ୟଜନକ ଭାବରେ ଅନୁପସ୍ଥିତ ରହିଲେ । ସେହିପରି ମହାନଦୀ ପ୍ରସଙ୍ଗରେ କଂଗ୍ରେସ ଦଳୀୟ ସ୍ତରରେ କୌଣସି ଅ।କ୍ରମକ ଭୂମିକା ନେଉନାହିଁ ।

ଏଥିରୁ ଗୋଟିଏ କଥା ସ୍ପଷ୍ଟ ହେଉଛି ଯେ ମହାନଦୀ ପ୍ରସଙ୍ଗକୁ ନେଇ ଦଳ ଭିତରେ ନରସିଂହ ମିଶ୍ରଙ୍କ ଉଦ୍ୟମ ପ୍ରତି କଂଗ୍ରେସର ଆନୁଷ୍ଠାନିକ ସମର୍ଥନ ନାହିଁ । ଭିତିରିଅ। ଖବର ଅନୁସାରେ କଂଗ୍ରେସର ତୁଙ୍ଗ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ଶ୍ରୀକାନ୍ତ ଜେନା ମହାନଦୀ ଆନ୍ଦୋଳନକୁ  ବିଜେଡ଼ି ସପକ୍ଷବାଦୀ ଆନ୍ଦୋଳନ ବୋଲି କହି ବୁଲୁଛନ୍ତି ।

ତେଣୁ ମହାନଦୀର ଜଳ ଏବେ କଂଗ୍ରେସ ଦଳ ଭିତରେ ବହୁ ଘାଈ ଓ ଘଳିଅ। ସୃଷ୍ଟି କରିଛି । ତେବେ ବିଳମ୍ବରେ ହେଲେ ମଧ୍ୟ କଂଗ୍ରେସ୍ ମହାନଦୀ ରାଜନୀତି କୁ ନେଇ ତତ୍ପର ହେବା ସହ ୧୬ ଅଗଷ୍ଟ ରେ ଓଡିଶା ବନ୍ଦ ପାଳନ କରିଛି  ।

୨. ସମାନ ଅବସ୍ଥା ଭାରତୀୟ ଜନତା ପାର୍ଟିରେ । ବିଜେପି ପାଇଁ ମହାନଦୀ ଆନ୍ଦୋଳନ ଏକ ଭୟଙ୍କର ବିରୋଧାଭାସ ସୃଷ୍ଟି କରିଛି । ଛତିଶଗଡ଼ରେ ବିଜେପି ସରକାର ରହିଥିବାରୁ ଓଡ଼ିଶା ବିଜେପି ଏ କ୍ଷେତ୍ରରେ ଛତିଶଗଡ଼ ବିରୁଦ୍ଧରେ ଅ।କ୍ରମକ ଭୂମିକା ନେଇପାରିବ ନାହିଁ ।

ଅନେକାଂଶରେ ବିଜେପି ଛତିଶଗଡ଼ର ମହାନଦୀ ମିଶନକୁ ସମର୍ଥନ କରୁଥିବାବେଳେ ଓଡ଼ିଶାର ସ୍ୱାର୍ଥକୁ ମଧ୍ୟ ସମପରିମାଣରେ ସୁରକ୍ଷା ଦିଅ।ଯାଉ ବୋଲି ଦାବି କରୁଛି ।

ତେବେ ଦଳର ଅ।ଭିମୁଖ୍ୟରୁ ଯାହା ଜଣାପଡୁଛି, ସେମାନେ ରମଣ ସିଂହଙ୍କ ପ୍ରତି ଅଧିକ ଉଦାର । ପୁନଶ୍ଚ ବିଜେଡ଼ିର ମହାନଦୀ ରାଜନୀତି ଏକ ଯନ୍ତା ଓ ଏହି ଯନ୍ତାରେ ପଡ଼ିବାକୁ ବିଜେପି ଚାହୁଁନାହିଁ ।

୩.  ବିଜେପିର ତୁଙ୍ଗନେତା ବିଜୟ ମହାପାତ୍ର ଓ ଦିଲ୍ଲୀପ ରାୟ ତେବେ ଛତିଶଗଡ଼ ସପକ୍ଷରେ କହିବା ପାଇଁ ଅ।ଦୌ ରାଜି ନୁହଁନ୍ତି । ବରଂ ଛତିଶଗଡ଼ ସରକାର ଓଡ଼ିଶା ବିରୋଧୀ ମନୋଭାବ ପୋଷଣ କରୁଛନ୍ତି ବୋଲି ବିଜେପି ନେତା ବିଜୟ ମହାପାତ୍ର ଖୋଲାଖୋଲି ଘୋଷଣା କରିଛନ୍ତି ।

ପୂର୍ବରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମହାନଦୀ ସମ୍ପର୍କରେ ଯେଉଁ ଅ।ଭିମୁଖ୍ୟ ପୋଷଣ କରିଥିଲେ, ତାକୁ ବିଜୟ ମହାପାତ୍ର ସିଧାସଳଖ ଖାରଜ କରିଦେଇଛନ୍ତି । ଯାହାଫଳରେ ମହାନଦୀକୁ ନେଇ ବିଜେପିର ଅନ୍ତଦ୍ୱର୍ନ୍ଦ୍ୱ ଏବେ ପଦାରେ ପଡ଼ିଯାଇଛି ।

୪. ମହାନଦୀ ପାଣି ଦୁଇ ପ୍ରମୁଖ ବିରୋଧୀ ଦଳ ଭିତରେ ଯେଉଁ ଫାଟ ସୃଷ୍ଟି କରିଛି, ସେଥିରୁ ଅ।ଉ ଏକ ନୂଅ। ସମୀକରଣ ସୃଷ୍ଟି ହେବ ବୋଲି ରାଜନୈତିକ ସମୀକ୍ଷକ ମାନେ ଅନୁମାନ କରୁଛନ୍ତି  ।

ଅର୍ଥାତ୍ ବିଜେପି ଓ କଂଗ୍ରେସରେ ଥିବା ଅସନ୍ତୁଷ୍ଟ ଅଥଚ ପ୍ରଭାବଶାଳୀ ନେତାମାନଙ୍କର ସମ୍ମିଳିତ ଉଦ୍ୟମରେ ବିଜେଡ଼ି ବିରୋଧରେ ଏକ ତୃତୀୟ ବିକଳ୍ପ ସୃଷ୍ଟି କରିବା ପାଇଁ ଉଦ୍ୟମ ଚାଲିଥିବା ସେମାନେ ଅନୁମାନ କରୁଛନ୍ତି । ଯେଉଁଥିରେ ବିଜେପି ଓ କଂଗ୍ରେସରୁ କିଛି ନେତା ବାହାରି ଅ।ସି ଏହି ତୃତୀୟ ବିକଳ୍ପରେ ସାମିଲ୍ ହେବେ ।

ସେମାନଙ୍କୁ ଓଡ଼ିଶାର ଅନ୍ୟ ଛୋଟ ଛୋଟ ରାଜନୈତିକ ଦଳ ଯଥା କମ୍ୟୁନିଷ୍ଟ, ଅ।ମ ଓଡ଼ିଶା, ସମତା କ୍ରାନ୍ତି ଦଳ ଇତ୍ୟାଦି ସମର୍ଥନ କରିବେ । ଏହି ମହାମେଣ୍ଟ ଅ।ବଶ୍ୟକ ପଡ଼ିଲେ ବିଜେପି କିମ୍ବା କଂଗ୍ରେସ ସହ ବୁଝାମଣା କରି ୨୦୧୯ ନିର୍ବାଚନକୁ ସାମ୍ନା କରିବାର ସମ୍ଭାବନା ଉନ୍ମୁକ୍ତ ରହିବ । ଏହା କେବଳ ଏକ ରାଜନୈତିକ ଅନୁମାନ ମାତ୍ର ।

୫. ଏବେ ଏହି ତୃତୀୟ ଶକ୍ତିର ସମ୍ଭାବନାକୁ ନେଇ ଉତ୍ସାହ ପ୍ରବଳ ହେବାରେ ଲାଗିଛି । ବିଜୁ ପଟ୍ଟନାୟକଙ୍କ ମୃତ୍ୟୁ ପରେ ଏମିତି ଏକ ବିକଳ୍ପ ଚିନ୍ତାର ସଫଳତାରୁ ବିଜୁ ଜନତା ଦଳ ଜନ୍ମ ନେଇଥିଲା । ସେତେବେଳେ ବିଜେପି ସହ ବିଜେଡ଼ିର ମେଣ୍ଟ ଫଳରେ କଂଗ୍ରେସ ସରକାରକୁ ପରାସ୍ତ କରାଯାଇପାରିଥିଲା ।

ତେଣୁ ଅ।ଜି ବିଜେଡ଼ିକୁ ପରାସ୍ତ କରିବାକୁ ହେଲେ ଏକ ତୃତୀୟ ଶକ୍ତିର ଅ।ବଶ୍ୟକତା ରହିଛି ଓ ସେହି ତୃତୀୟ ଶକ୍ତିଟି ଦ୍ୱିତୀୟ ଶକ୍ତି ଅର୍ଥାତ୍ କଂଗ୍ରେସ ବା ବିଜେପି ଭିତରୁ ଜଣକୁ ସହାୟକ ଭାବରେ ବାଛିବାକୁ ବାଧ୍ୟ ବୋଲି କୁହାଯାଉଛି ।

୬. ଏପ୍ରକାର ରାଜନୈତିକ ସମୀକରଣର ଗାଣିତିକ ମୂଲ୍ୟ କିନ୍ତୁ ଅତ୍ୟନ୍ତ ଦୁର୍ବଳ । ୨୦୧୪ ନିର୍ବାଚନରେ ଓଡ଼ିଶାର ଶାସକ ବିଜୁ ଜନତା ଦଳ ୪୩.୪ ପ୍ରତିଶତ ଭୋଟ୍ ପାଇଥିଲା । ଯାହାକି ୨୦୦୯ ନିର୍ବାଚନ ତୁଳନାରେ ୧୪ ପ୍ରତିଶତ ଅଧିକ ।

ବିଜେଡ଼ି ଏକାକୀ ଯେତିିକି ଭୋଟ୍ ପାଇଥିଲା, କଂଗ୍ରେସ ଓ ବିଜେପି ମିଳିତ ଭାବରେ ଠିକ୍ ସେତିକି ଭୋଟ୍ ପାଇଥିଲେ । ବିଜେପି ୧୮% ଓ କଂଗ୍ରେସ ୨୫.୭% ଭୋଟ୍ ପାଇଥିଲେ । ଅନ୍ୟ ରାଜନୈତିକ ଦଳଗୁଡ଼ିକର ଖାତା ଖତିୟାନ ଉଡ଼ିଯାଇଥିଲା ।

ଏକଦା ଓଡ଼ିଶାରେ ୬%ରୁ ଅଧିକ ଭୋଟ୍ ପାଉଥିବା କମ୍ୟୁନିଷ୍ଟ ମାନେ ଗତ ନିର୍ବାଚନରେ ଏକ ପ୍ରତିଶତ ଭୋଟ୍ ମଧ୍ୟ ପାଇବାରେ ବିଫଳ ହୋଇଥିଲେ । ତେଣୁ ଭୋଟ୍ ହାରକୁ ଦେଖିଲେ ଅ।ଜି ମଧ୍ୟ ବିଜେଡ଼ି ଅପରାଜେୟ ମନେ ହେଉଛି ।

୭. ପ୍ରଚଣ୍ଡ ମୋଦି ହାୱା ସତ୍ଵେ  ୨୦୧୪ ନିର୍ବାଚନରେ ବିଜେଡ଼ି ୧୪% ପ୍ରତିଶତ ଅଧିକ ଭୋଟ୍ ପାଇବାରେ ସଫଳ ହୋଇଥିଲା । ସେହି ନିର୍ବାଚନରେ ବିଜେପି ନିଜର ସବୁପ୍ରକାର ସୁଯୋଗ ସତ୍ଵେ ନିଜର ଭୋଟ୍ ପରିମାଣକୁ ୪% ବଢାଇବାରେ ସମର୍ଥ ହୋଇଥିଲା ।

ଅ।ଜି ମୋଦି ହାୱା ମିଳେଇଯିବା ଅ।ରମ୍ଭ କରିଛି । ଦରଦାମ୍ ନିୟନ୍ତ୍ରଣ ତଥା ଅନ୍ୟାନ୍ୟ ପ୍ରସଙ୍ଗରେ କେନ୍ଦ୍ର ସରକାର ସୁବିଧା ସ୍ଥିତିରେ ନାହାନ୍ତି । ତେଣୁ ଅ।ସନ୍ତା ନିର୍ବାଚନରେ ବିଜେପି ଯେ ୧୮% ଭୋଟ୍ ବଜାୟ ରଖିପାରିବ ତାର କୌଣସି ଗ୍ୟାରେଣ୍ଟି ନାହିଁ ।

ତେଣୁ ବିଜେପି ସହ ଯେଉଁ ତୃତୀୟ ଶକ୍ତିର ମେଣ୍ଟ କଥା କୁହାଯାଉଛି, ତାର ସଫଳତା ଅନ୍ତତଃ ଗାଣିତିକ ଦୃଷ୍ଟିରୁ ଅ।ଦୌ ସହଜ ନୁହେଁ । କଂଗ୍ରେସ ସହ ତୃତୀୟ ଶକ୍ତିର ମେଣ୍ଟ ସମ୍ଭାବନା ଯଥେଷ୍ଟ କମ୍ ।

ଏହାର କାରଣ ହେଉଛି ତୃତୀୟ ଶକ୍ତିରେ ଯେଉଁମାନେ ରହିବେ ବୋଲି କୁହାଯାଉଛି ସେମାନେ ପ୍ରାୟ ସମସ୍ତେ କଂଗ୍ରେସ ବିରୋଧୀ ରାଜନୀତିରୁ ଅ।ସିଛନ୍ତି । କଂଗ୍ରେସ ମେଣ୍ଟ ରାଜନୀତିକୁ ନେଇ ସବୁବେଳେ ରକ୍ଷଣଶୀଳ । ତେଣୁ ନୂଅ। ଗଢା ହୋଇଥିବା ଏକ ବିକଳ୍ପକୁ ନେଇ କଂଗ୍ରେସ ପରୀକ୍ଷା ନିରୀକ୍ଷା କରିବା ସମ୍ଭାବନା ଯଥେଷ୍ଟ କମ୍ ।

୮. ଯେଉଁ ତୃତୀୟ ବିକଳ୍ପର ଚିନ୍ତା ଏବେ କରାଯାଉଛି, ତାହା ବୈଚାରିକ ବା ବ୍ୟାବହାରିକ ଦୃଷ୍ଟିରୁ ସଫଳ ହେବାର ସମ୍ଭାବନା ଯଥେଷ୍ଟ କମ୍ । ତେବେ ମହାନଦୀ ରାଜନୀତି ପ୍ରଥମଥର ଲାଗି ଓଡ଼ିଶାରେ ଏକ ରାଜନୈତିକ ବିକଳ୍ପକୁ ଜନ୍ମ ଦେଉଛି ।

ଏହି ବିକଳ୍ପ ମହାନଦୀ ଉପରେ ଅ।ଶ୍ରା କରି ଅ।ଗକୁ ବଢିବାର ସ୍ୱପ୍ନ ଦେଖୁଥିବା ବେଳେ ମହାନଦୀ ପ୍ରସଙ୍ଗ ଅଧିକ ଦିନ ଲୋକଙ୍କୁ ପ୍ରଭାବିତ କରିବାର ସମ୍ଭାବନା ନାହିଁ । ବିଜେଡ଼ି ମହାନଦୀକୁ ଏକ ଭାବପ୍ରବଣ ପ୍ରସଙ୍ଗ ଭାବରେ ଉପସ୍ଥାପନା କରି ଲୋକଙ୍କ ଦୃଷ୍ଟି ଅ।କର୍ଷଣ କରିବାକୁ ଚେଷ୍ଟା କରୁଛି ।

ଇତି ମଧ୍ୟରେ ବିଜେଡ଼ି ଶାସନର ବହୁ ଦୋଷ ଦୁର୍ବଳତା ଚର୍ଚ୍ଚାକୁ ଅ।ସିଛି । ବିଶେଷ କରି ଗୁମୁଡୁମାହାରେ ପୋଲିସ୍ ର  ଗୁଳିଚାଳନା, ନଗଡ଼ାରେ ଅପପୁଷ୍ଟି ଜନିତ ଶିଶୁ ମୃତ୍ୟୁ,  ଚିଟଫଣ୍ଡ ଘୋଟାଲାରେ ବଡ଼ ବଡ଼ ମନ୍ତ୍ରୀଙ୍କ ସଂପୃକ୍ତି, ଶ୍ରୀମନ୍ଦିର ପରିଚାଳନାରେ ବ୍ୟାପକ ବିଫଳତା ଇତ୍ୟାଦି ପ୍ରସଙ୍ଗକୁ ନେଇ ବିଜେଡ଼ି ସରକାର ରକ୍ଷଣାତ୍ମକ ଅବସ୍ଥାରେ ଅଛନ୍ତି ।

ସେହି ସମୟରେ ମହାନଦୀ ପ୍ରସଙ୍ଗ ଉଠାଇ ସରକାରୀ ବିଫଳତାକୁ ଘୋଡ଼ାଇବା ପାଇଁ ଶାସକ ଦଳ ପ୍ରାଣାନ୍ତକ ଉଦ୍ୟମ କରୁଛି ଯାହାକୁ ସର୍ବଦଳୀୟ ବୈଠକରେ ପରୋକ୍ଷରେ ସମର୍ଥନ କରାଯାଇଛି ।

ରାଜ୍ୟର ସ୍ୱାର୍ଥ ପାଇଁ ମହାନଦୀ ପାଣି ପାଇଁ ସଂଘର୍ଷ କରିବାକୁ ଦଳମତ ନିର୍ବିଶେଷରେ ଯେଉଁ ଅ।ହ୍ୱାନ ଦିଅ।ଯାଇଛି, ତାହା ବିଜେଡ଼ି ରାଜନୀତିକୁ ବେଶ୍ ସୁହାଇଛି ।

୯. ମହାନଦୀ ପାଣିକୁ ନେଇ ରାଜନୀତିର ଏ ଯେଉଁ ଚକ୍ରବ୍ୟୁହ ସୃଷ୍ଟି ହୋଇଛି, ସେଥିରେ ଓଡ଼ିଶାର ବିକାଶ ହେବ କି ! ଅ।ଗାମୀ ନିର୍ବାଚନରେ ଶାସକ ବିଜେଡ଼ି ଦଳ ଲଗାତାର ପଂଚମ ଥର ପାଇଁ ଜନମତ ଲୋଡ଼ିବ । ସ୍ୱାଭାବିକ ଭାବରେ କୋଡ଼ିଏ ବର୍ଷର ସ୍ଥିତାବସ୍ଥା ବିରୋଧୀ ମନୋଭାବ ଭୋଟରଙ୍କ ଭିତରେ ଅ।ସିପାରେ ।

ତେବେ ସ୍ଥିତାବସ୍ଥା ବିରୋଧୀ ଭୋଟ୍ ର  ପରିମାଣ ସବୁବେଳେ ପାଂଚଞ୍ଚରୁ ସାତ ପ୍ରତିଶତ ହୋଇଥାଏ । ୪୩.୪%ରୁ ୧୦% ଭୋଟ୍ କମିଗଲେ ମଧ୍ୟ ବିଜେଡ଼ିର ସ୍ଥିତି ଦୁର୍ବଳ ହେଉନାହିଁ । ବିଜେଡ଼ି ଶାସନ ଉପରେ ପ୍ରହାର କରିବାକୁ ହେଲେ ବିରୋଧୀ ଦଳକୁ ୩୫%ରୁ ସାମାନ୍ୟ ଅଧିକ ଏକ ଭୋଟ୍ ବ୍ୟାଙ୍କ ତିଅ।ରି କରିବାକୁ ପଡ଼ିବ ।

ଅ।ଜିର ସ୍ଥିତିରେ ଯାହା ଅସମ୍ଭବ ଜଣାପଡୁଛି । ବିଜେପି ବା କଂଗ୍ରେସ ସହ ମେଣ୍ଟ କରି ଏକ ନୂଅ। ସମୀକରଣ ପ୍ରସ୍ତୁତ କରିବାର ଯେଉଁ ସ୍ୱପ୍ନ ବା ସଂକଳ୍ପ କଥା ଅ।ଜି ଉଠୁଛି, ତାହାର ପ୍ରସ୍ତୁତି ଏତେ ଧିମା ଯେ ଅ।ସନ୍ତା ବର୍ଷେ ଭିତରେ ବ୍ୟାପକ ପରିବର୍ତ୍ତନ ଅ।ଣିପାରିଲା ଭଳି ସ୍ଥିତି ଓଡ଼ିଶାରେ ନାହିଁ ।

୧୦. ଓଡ଼ିଶାର ନବୀନ ସରକାର ବିରୋଧରେ ତୀବ୍ର ଜନମତ ସୃଷ୍ଟି କରିପାରିଲା ଭଳି ଏକ ରାଜନୈତିକ ବାତାବରଣ ସୃଷ୍ଟି କରିବାରେ ବିରୋଧୀଦଳଗୁଡ଼ିକ ଗତ ୧୭ ବର୍ଷ ଧରି ବିଫଳ ହୋଇଛନ୍ତି ଓ ଏହି ବିଫଳତା ଖୁବ୍ ଶୀଘ୍ର ସରିଲାପରି ମନେ ହେଉନାହିଁ ।

ମହାନଦୀ ପ୍ରସଂଗରେ ବିଜେଡି ନିଜ ଦୋଷ ଓ ଦୁର୍ବଳତାକୁ ଅଧିକରୁ ଅଧିକ ପଦାରେ ପକାଇ ଚାଲିଛି । ଗତ ୧୬ ବର୍ଷ ଭିତରେ ଛତିଶଗଡ ସରକାର ଓଡିଶା ସରକାରଂକୁ ବହୁ ଚିଠି ଲେଖିଛନ୍ତି ଓ ସେସବୁକୁ ଫାଇଲ ଭିତରେ ଚାପି ଦିଆଯାଇଛି ।

ବାଜପାୟୀ ସରକାରରେ ବିଜେଡି ହାତରେ କେନ୍ଦ୍ର ଜଳସମ୍ପଦ ବିଭାଗର ଦାୟିତ୍ଵ ରହିଥିଲା ଓ ଦଳର ପୁରୁଖା ନେତା ଅର୍ଜୁନ ଚରଣ ସେଠୀ କେନ୍ଦ୍ରରେ ଜଳ ସମ୍ପଦ ବିଭାଗର କ୍ୟାବିନେଟ୍ ମନ୍ତ୍ରୀ ଥିଲେ । ମହାନଦୀ ଉପରେ ଛତିଶଗଡର ଅନେକ ପ୍ରକଳ୍ପ ଏହି ସମୟରେ ଅନୁମୋଦିତ ହୋଇଛି ।

ତେଣୁ ଏ ସଂକ୍ରାନ୍ତରେ ବିଜେଡି ର ଆଭମୁଖ୍ୟ କୁ ନେଇ ସନ୍ଦେହ ଓ ପ୍ରଶ୍ନବାଚୀ ରହିଛି । ପୁନଶ୍ଚ ମୁଖ୍ୟମନ୍ତ୍ରୀ ନିଜେ ବିଧାନ ସଭାରେ ଛତିଶଗଡ ପ୍ରକଳ୍ପକୁ ନେଇ ବକ୍ତବ୍ୟ ରଖିସାରିଛନ୍ତି, ଅଥଚ ସେତେବେଳେ ଏହାକୁ ନେଇ ବିଜେଡି ନରମ ଅଭିମୁଖ୍ୟ ନେଇଥିଲା ।

ଆଜି ହଠାତ୍ ବିଜେଡିର ଏହି ଅତି ଉତ୍ସାହ ସନ୍ଦେହର ଭାବନା ସୃଷ୍ଟି କରୁଛି । ଛତିଶଗଡ ସରକାରଂକ ଚିଠି ନମ୍ବର ଏଫ୍-୭- ୪୦-୩୧/ଏସ- ୨/୨୦୦୦, ସେପ୍ଟେମ୍ବର ୨୦୦୮ ଅନୁଯାୟୀ ଓଡିଶା ସରକାରଂକୁ କେଲୋ ପ୍ରକଳ୍ପ ବାବଦରେ ସବୁ ତଥ୍ୟ ଓ ସୂଚନା ଯୋଗାଇ ଦିଆ ଯାଇଥିଲା ।

ଓଡିଶା ସରକାର ସେଇ ଦିନଠୁ ଏହା ଉପରେ ଅଭିଯୋଗ କରିନାହାନ୍ତି । ଆଜି ମହାନଦୀ କୁ ନେଇ ବିଜେଡିର ଏହି ଅହେତୁକ ତତ୍ପରତା ପଛରେ ମହାନଦୀ ଲାଗି ଯେତିକି ଚିନ୍ତା ନାହିଁ, ତାଠୁ ଅଧିକ ପଂଚାୟତ ନିର୍ବାଚନ ଡର ଘାରୁଛି । ଏହି ରାଜନୈତିକ ପ୍ରସଂଗକୁ ଅଧିକ ରୁ ଅଧିକ ପବନ ଦେଇ ବିଜେଡି ସରକାର ଫାଇଦା ଉଠାଇବାକୁ ଉଦ୍ୟମ କରୁଛନ୍ତି ।

ଓଡିଶା ଡଟ କମ

ଶ୍ରୀ ବିଦୁର

ବହୁଚର୍ଚ୍ଚିତ ବିହାର ବିଧାନସଭା ନିର୍ବାଚନ ଫଳାଫଳ ଜାତୀୟସ୍ତରରେ ପ୍ରଭାବ ପକାଇବ ବୋଲି ୩ୟ ଥର ନିର୍ବାଚିତ ମୁଖ୍ୟମନ୍ତ୍ରୀ ଶ୍ରୀ ନିତିଶ କୁମାର ସାମ୍ବାଦିକ ସମ୍ମିଳନୀରେ ମନ୍ତବ୍ୟ ରଖିଛନ୍ତି । ଓଡିଶାରେ ଏହି ଫଳାଫଳ ର ପ୍ରଭାବ ପଡିବ କି ? ଯଦି ପଡିବ କି ପ୍ରଭାବ ପଡିବ ଏହି ଆଲୋଚନା ଏବେ ଜୋର ଧରିଛି ।

ବିହାରରେ ନିତିଶକୁମାରଙ୍କ ଜନତା ଦଳ -ୟୁ ଏକଦା ବିଜେପି ନେତୃତ୍ଵରେ ଗଠିତ ଜାତୀୟ ଗଣତାନ୍ତ୍ରିକ ସାମୁଖ୍ୟର ଅଂଶ ଥିଲା । ଏପରିକି ବିଜେପି ନିତିଶକୁମାରଙ୍କ ନେତୃତ୍ଵାଧୀନ ରାଜ୍ୟ ସରକାରରେ କ୍ଷମତାର ଭାଗୀଦାର ଥିଲା । ପରବର୍ତ୍ତୀ ସମୟରେ ନିତିଶକୁମାର ଲାଲୁ ଓ କଂଗ୍ରେସ ସହ ମିଶି ଏକ ମହାମେଣ୍ଟ ଗଠନ କରି ନିର୍ବାଚନ ଲଢି ସଫଳତା ହାସଲ କଲେ ।

ଯଦିଓ ବିହାର ତୁଳନାରେ ଆମ ରାଜ୍ୟର ଜନ ସଂଖ୍ୟା କମ ଓ ସେଠାରେ ନିର୍ବାଚନରେ ଗୁରୁତ୍ଵପୂର୍ଣ ଭୂମିକା ଗ୍ରହଣ କରିଆସୁଥିବା ଜାତିଆଣ ରାଜନୀତି ଓଡିଶାର ଦେଖିବାକୁ ମିଳେ ନାହିଁ ତଥାପି ରାଜନୈତିକ ଦୃଶ୍ୟପଟ୍ଟକୁ ବିଚାର କଲେ ଓଡିଶାର ଚିତ୍ର ଭିନ୍ନ ନୁହେଁ ।

ନୀତିଶଙ୍କ ପରି ଓଡିଶାରେ ନବୀନ ପଟନାୟକଙ୍କ ବିଜୁ ଜନତା ଦଳ ମଧ୍ୟ ଏକଦା ବିଜେପି ନେତୃତ୍ଵରେ ଗଠିତ ଜାତୀୟ ଗଣତାନ୍ତ୍ରିକ ସାମୁଖ୍ୟର ଅଂଶୀଦାର  ଥିଲା । ରାଜ୍ୟ ସରକାରରେ ମଧ୍ୟ ବିଜେପି କ୍ଷମତାର ଭାଗୀଦାର ରହିଥିଲା ।

ବିହାରରେ ବିଜେପି ନିଜ ସଙ୍ଗଠନକୁ ମଜଭୁତ କରିବା ପାଇଁ ଉଦ୍ୟମ କରିବା ପରିବର୍ତ୍ତେ ରାଜନୀତି ପଶାପାଲିର ସହଜ ମାର୍ଗ ଜରିଆରେ ସଫଳତା ପାଇବା ପାଇଁ ଉଦ୍ୟମ କରିବା ଏହାର  ବିପର୍ଯୟର କାରଣ ହେଲା ବୋଲି ସମୀକ୍ଷକ ମାନେ ମତ ଦେଉଛନ୍ତି ।

ବିଜେପି ଜାତିଆଣ ରାଜନୀତିର ବିରୋଧୀ ଭାବେ ଜନ ମାନସରେ ନିଜକୁ ପ୍ରସ୍ତୁତ କରିଆସିଥିବା ବେଳେ ପୂର୍ବତନ ବିହାର ମୁଖ୍ୟମନ୍ତ୍ରୀ ଜିତେନ ରାମ ମାଝିଙ୍କୁ ନେଇ ରାଜନୈତିକ ଧୃବିକରଣ କରିବାକୁ ଉଦ୍ୟମ କରିବା , ପ୍ରାର୍ଥୀ ମନୋନୟନରେ ସ୍ଥାନୀୟ ସଙ୍ଗଠନକୁ ଗୁରୁତ୍ଵ ନ ଦେବା ଏହି ପରି ଅନେକ କାରଣ ଯୋଗୁଁ ପାର୍ଟି ଏ ଏହି ସ୍ଥିତି ହୋଇଥିବା ଏହି ଦଳର ଅସନ୍ତୁଷ୍ଟ ନେତା ମାନେ ଖୋଲା ଖୋଲି ଭାବେ କହୁଛନ୍ତି।

ଠିକ ସେହି ପରି ଓଡିଶାରେ ମଧ୍ୟ ବିଜେପି ତାର ସାଙ୍ଗଠନିକ ସ୍ଥିତି ଦୃଢ କରିବା ପରିବର୍ତ୍ତେ ସହଜରେ କିପରି କ୍ଷମତା ହାସଲ କରିହେବ ସେ ପ୍ରଚେଷ୍ଟାରେ ଲାଗିଥିବା ରାଜନୈତିକ ସମୀକ୍ଷକ ମାନେ ମତ ଦେଉଛନ୍ତି ।

ଦଳର ଏକ ଗୋଷ୍ଠୀ ବିଜୁ ଜନତା ଦଳ ଓ କଂଗ୍ରେସ  କୁ ଭାଙ୍ଗି ବିଜେପିରେ ମିଶାଇବା, ଅଥବା ବିଜୁ ଜନତା ଦଳ ସହ ନିର୍ବାଚନ ବୁଝାମଣା କରିବା ଆଦି ବିକଳ୍ପ ରାସ୍ତା ଉପରେ ଜୋର ଦେଉଥିବା ବେଳେ ରାଜ୍ୟର ମୁଖ୍ୟ ସମସ୍ୟା କୁ ଯେଭଳି ଭାବରେ ଉଠାଇବା ଉଚିତ ତାହା କରୁନଥିବା ପରିଲକ୍ଷିତ ହେଉଛି ।

ଆଗାମୀ ଦିନରେ ଏକାକୀ କଂଗ୍ରେସର ପୁଣି କ୍ଷମତାକୁ ଫେରି ଆସିବାର ସମ୍ଭାବନା ଯେତେ କ୍ଷୀଣ ତାହାର ଅର୍ଥ ଯେ କେବଳ ଭାରତୀୟ ଜନତା ପାର୍ଟି କୁ ସହାୟକ ହେବ, ତାହା ଭାବିବା ଠକ୍ ନୁହେଁ ।

ଜରୁରୀକାଳ ପରିସ୍ଥିତିରୁ ଉଦ୍ଭବ କଂଗ୍ରେସ – ବିରୋଧି ଲୋକନାୟକ ଜୟପ୍ରକାଶ ନାରାୟଣଙ୍କ ପ୍ରେରିତ ଜନତାଦଳର ମୁଖ୍ୟ ଅଂଶ , ଏବେ ସରିଥିବା ବିହାର ବିଧାନସଭା ନିର୍ବାଚନରେ କଂଗ୍ରେସସହ ମହାଗଠବନ୍ଧନ କରି ନିର୍ବାଚନରେ ଅଭୂତପୂର୍ବ ସଫଳତା ହାସଲ  କରି ପ୍ରମାଣ କରିଦେଲେ ଯେ, ସେମାନଙ୍କ ଏକକାଳୀନ ସହଯୋଗୀ ଦଳ ଭାରତୀୟ ଜନତା ପାର୍ଟିକୁ ଏକାକୀ ଆଗକୁ ଯିବାକୁ ଦେବେନାହିଁ ।

ଜାତୀୟ ସ୍ତରରେ ମଧ୍ୟ ଭାରତୀୟ ଜନତା ପାର୍ଟିକୁ ଅଣହିନ୍ଦୁ ତଥା ଜାତିଆଣ ରାଜନୀତିର ସମ୍ମୁଖୀନ ହେବାକୁ ପଡ଼ିବ, ଯାହା ବିହାର ନିର୍ବାଚନରେ ସ୍ପଷ୍ଟ ବାରି ହେଉଛି ।

ଭାରତୀୟ ଜନତା ପାଟିର୍ ର ଏହି ଦଶା ହେବ ବୋଲି ସୂଚନା ଥିଲା, ଯେଉଁଭଳି ଭାବେ ଦଳର କେନ୍ଦ୍ର ନେତୃତ୍ବ ଟିକଟ ବଣ୍ଟନଠୁଁ ଆରମ୍ଭକରି ପ୍ରଚାର କାର୍ୟକ୍ରମରେ ସ୍ଥାନୀୟ ନେତାଙ୍କୁ ଅବହେଳା କରୁଥିଲେ ଏବଂ ଆଗକୁ ନିର୍ବାଚନ ଥିବା ସମୟରେ ସମ୍ବିଧାନରେ ଥିବା ସଂରକ୍ଷଣ ବ୍ୟବସ୍ଥା ବିଷୟରେ ଟିପ୍ ପଣି ଦେବା ଇତ୍ୟାଦି ଘଟଣା ନିଶ୍ଚିତ ଭାବେ ବିହାରର ଜାତିଆଣ ରାଜନୀତିକୁ ଖୋରାକ୍ ଯୋଗାଇଛି, ଏଥିରେ ସନ୍ଦେହ ନାହିଁ ।

ଜାତୀୟ ସ୍ତରରେ ଭାରତୀୟ ଜନତା ପାଟିର୍ ସକାଶେ ରାଜନୈତିକ ବାତାବରଣ ଆହୁରି ଜଟିଳ ହୋଇଛି, ଏଥିରେ ସନ୍ଦେହ ନାହିଁ ।

ଓଡ଼ିଶାରେ ଏହାର ପ୍ରଭାବ ନିଶ୍ଚୟ ପ୍ରତିଫଳିତ ହେବ ବୋଲି ଜଣାପଡ଼ୁଛି।ରାଜ୍ୟସଭାରେ ଏନ୍ ଡି ଏ ଶାସକ ଗୋଷ୍ଠୀ ସପକ୍ଷରେ ସଂଖ୍ୟା କମ୍ ଥିବା କାରଣରୁ ଓଡ଼ିଶାର ବିଜୁ ଜନତା ଦଳର ବିଶେଷତ୍ଵ ବଢିଛି ଏବଂ ଆଗାମୀ ଦିନରେ ପୁଣି ଗଠବନ୍ଧନର ଆବଶ୍ୟକତାର  ଯାହାକିଛି ସମ୍ଭାବନା ଥିଲା, ବିହାର ଫଳାଫଳ ପରେ ତାହା ଆହୁରି ମଳିନ ହୋଇଯାଇଛି ବୋଲି ବିଶେଷଜ୍ଞମାନେ ମତ ରଖିଛନ୍ତି ।

ଓଡ଼ିଶାରେ ଭାରତୀୟ ଜନତା ପାଟିର୍ ୨୦୧୪ ନିର୍ବାଚନ ପରଠାରୁ ଆହୁରି ଦୁର୍ବଳ ହୋଇ ପଡ଼ିଛି । ଗାଁ ଗହଳର ସମସ୍ୟାକୁ ବୁଝିଲା ଭଳି ନେତାଙ୍କ ଭୀଷଣ ଅଭାବ ରହିଛି । ଚାଷୀଙ୍କ ସମସ୍ୟା ତଥା ଗ୍ରାମୀଣ ଶିକ୍ଷକଙ୍କ ସମସ୍ୟା ବିରୋଧି ଦଳ ଭାବେ ଆଗକୁ ନେବାପାଇଁ ଭାରତୀୟ ଜନତା ପାର୍ଟିର ସାଙ୍ଗଠନିକ ଢାଂଚାର ଘୋର ଅଭାବ ରହିଛି । ସଙ୍ଗଠନ ନିର୍ମାଣ ଦିଗରେ ପାଟିର୍ ର କେନ୍ଦ୍ର ନେତୃତ୍ଵ ଯେ ତତ୍ପର ନୁହଁ, ତାହା ପରିଷ୍କାର ଜଣା ପଡ଼ୁଛି ।

ଅନ୍ୟ ଦଳରୁ ବହୁନେତା ବିଜେପିରେ ମିଶିଛନ୍ତି ଓ ରାଜ୍ୟସ୍ତରରେ ତାଙ୍କୁ ବହୁତ ପ୍ରାଧାନ୍ୟ ଦିଆଯିବା ପରେ ମଧ୍ୟ ଦଳର ଲୋକପ୍ରିୟତା ବଢିବା ଦେଖାଯାଉନାହିଁ । ଦଳରେ ଯେଉଁମାନେ ନିସ୍ଵାର୍ଥପର ଭାବେ କାମକରି ଜନସାଧାରଣଙ୍କ ଆସ୍ଥାଭାଜନ ହୋଇପାରିଥିଲେ, ସେମାନଙ୍କୁ ବର୍ଷ ବର୍ଷ ଧରି ପାର୍ଟି ରୁ  ବାହାରେ ନିଳମ୍ବିତ କରି ରଖାଯାଇଛି ।

ଓଡ଼ିଶାରେ କେନ୍ଦ୍ରମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇଙ୍ଗିତରେ ଦଳ ପରିଚାଳିତ ହେଉଛି ବୋଲି ଉଚ୍ଚ ରାଜନୈତିକ ମହଲରେ ପ୍ରବଳ ଚର୍ଚ୍ଚା ଧରିଛି । ସେ ବିହାରରୁ ନିର୍ବାଚିତ ରାଜ୍ୟସଭା ସଦସ୍ୟ ତଥା ବିଧାନସଭା ନିର୍ବାଚନ ଦାୟିତ୍ଵରେ ଥିବା ଜଣେ ମୁଖ୍ୟ କାରପଟଦାର ।

କିନ୍ତୁ  ବିହାରରେ ଦଳର ବିପର୍ଯୟ ପରେ ଧର୍ମେନ୍ଦ୍ରଙ୍କ କେନ୍ଦ୍ରରେ କଅଣ ସ୍ଥିତି ରହିବ ତାହା ହିଁ ବହୁ ଅଂଶରେ ଓଡ଼ିଶା ରାଜନୀତିକୁ ଖୋରାକ ଦେବ ବୋଲି ରାଜନୈତିକ ପର୍ଯ୍ୟବେକ୍ଷକମାନେ ମତ ପୋଷଣ କରୁଛନ୍ତି ।

ଓଡ଼ିଶା ଡ଼ଟ୍ କମରେ ପ୍ରକାଶିତ ଏହି ଲେଖା ଲେଖକଙ୍କ ନିଜସ୍ୱ ମତ । ଏହା ଓଡ଼ିଶା ଡ଼ଟ୍ କମର ମତାମତ ନୁହେଁ ।

ଓଡିଶା ଡଟ୍ କମ ଘୋଷଣାନାମା

ଯତୀନ୍ଦ୍ର ଦାଶ

ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ହୃଦୟ ଥିଲା ବିଶାଳ । ତାଙ୍କ ଭିତରେ ଥିଲା ଅମାପ ଧୈର୍ଯ୍ୟ । ଜନମାନସ ଓ ଗଣ ମାଧ୍ୟମରେ ସେ ସମୟରେ ନିର୍ମିତ ହୋଇଥିବା ତାଙ୍କ ନକରାତ୍ମକ ଛବିର ଠିକ ଓଲଟା ଥିଲା  ତାଙ୍କ ସ୍ଵଭାବ । ଯିଏ ତାଙ୍କ ସହ ମିଶିଛି ସେ ଏହା ଉପଲବଧି କରିଛି । ଦୁଇ ଦଶନ୍ଧି ର ସାମ୍ବାଦିକତା ଭିତରେ ତାଙ୍କସହ ଯେତେଥର ସମ୍ପର୍କରେ ଆସିଛି ମୁ ତାହା ଅନୁଭବ କରିଛି ।

ତାଙ୍କ ମୁଖ୍ୟମନ୍ତ୍ରୀତ୍ଵ ସମୟର କଥା । ଗଣ ମାଧ୍ୟମରେ ସେତେବେଳେ ରାଜ୍ୟରେ ଘଟିଥିବା କେତେକ ଘଟଣା ଯୋଗୁଁ ସେ ବିବାଦୀୟ ବ୍ୟକ୍ତି ଭାବେ ଚର୍ଚାରେ ଥାନ୍ତି । ଇଂରାଜୀ ସାପ୍ତାହିକ ବ୍ଲିଜରେ ସେତେବେଳେ ‘ମିଷ୍ଟର’ ନାମରେ ଏକ ସ୍ତମ୍ଭ ପ୍ରକାଶିତ ହେଉଥାଏ ।

ଚର୍ଚାରେ ଥିବା ଜଣେ ଜଣାଶୁଣା ବ୍ୟକ୍ତିତ୍ଵଙ୍କୁ ବ୍ଲିଜ ଏହି ସ୍ତମ୍ଭରେ ଅସୁବିଧାଜନକ ପ୍ରଶ୍ନ ସବୁ ପଚାରିଥାଏ । ତେବେ ପ୍ରକାଶନ ପୂର୍ବରୁ ଉକ୍ତ ବ୍ୟକ୍ତିଙ୍କୁ ପତ୍ରିକା ପ୍ରଶ୍ନର ଉତ୍ତରଦେବାକୁ ସୁଯୋଗ ଦେଇଥାଏ । ସେ ଯଦି ଉତ୍ତର ଦିଅନ୍ତି ତେବେ ପ୍ରଶ୍ନ ଓ ଉତ୍ତରସହ ତାହା ପ୍ରକାଶିତ ହୋଇଥାଏ ।

ଏହି କ୍ରମରେ ପଟ୍ଟନାୟକଙ୍କୁ ପଚାରିବାପାଇଁ କେତେକ ଅସୁବିଧାଜନକ ପ୍ରଶ୍ନ ବ୍ଲିଜ ସମ୍ପାଦକ ମୋତେ ପଠାଇଲେ । ଏହି ପତ୍ରିକାର ରାଜ୍ୟ ପ୍ରତିନିଧି ହିସାବରେ ମୁ ମୁଖ୍ୟମନ୍ତ୍ରୀ ପଟ୍ଟନାୟକଙ୍କ ଅଫିସ ସହ ଯୋଗାଯୋଗ କଲି । ସେଦିନ ସେ ବହୁତ ବ୍ୟସ୍ତ ଥାନ୍ତି ।

ତାଙ୍କ ଦିଲ୍ଲୀ ଗସ୍ତ କାର୍ଯ୍ୟକ୍ରମ ଥାଏ । ମୁଖ୍ୟମନ୍ତ୍ରୀଙ୍କ କାର୍ଯ୍ୟ।ଳୟ ଅଧିକାରୀ ମାନେ ତାଙ୍କସହ ସାକ୍ଷାତକାର ସମ୍ଭବନୁହେଁ ବୋଲି ମୋତେ ନାସ୍ତିବାଣୀ ଶୁଣାଇଥାନ୍ତି । ଏହାସତ୍ୱେ ମୁ ମୁଖ୍ୟମନ୍ତ୍ରୀଙ୍କ ସହ ନିଜେ କଥାହେବାପାଇଁ ଜିଦ ଧରିବାରୁ ଶେଷରେ ତାଙ୍କର ବ୍ୟକ୍ତିଗତ ସଚିବ ତାଙ୍କ ସହ ମୋର ଟେଲିଫୋନରେ କଥାବାର୍ତା କରାଇଲେ।

ମୁଖ୍ୟମନ୍ତ୍ରୀ ମଧ୍ୟାନ୍ନ ଭୋଜନ ବିରତି ପରେ ଅପରାହ୍ନ ଦୁଇଟା ସମୟରେ ତାଙ୍କ ବାସଭବନରେ ସାକ୍ଷାତକାର ପାଇଁ ଅନୁମତି ଦେଲେ । ତେବେ ଯିବାସମୟରେ ରାସ୍ତାରେ ମୋର ଗାଡି ଖରାପ ହୋଇଗଲା ଓ ମରାମତି କରି  ମୁଖ୍ୟମନ୍ତ୍ରୀ ନିବାସରେ ଏକ ଘଣ୍ଟା ବିଳମ୍ବରେ ମୁ ପହଞ୍ଚିଲି ।

ସେ ଚାହିଁଥିଲେ ସାକ୍ଷାତକାର ପାଇଁ ମନାକରି ପାରିଥାନ୍ତେ କିନ୍ତୁ ସେ ଉଦାରତାର ପରିଚୟଦେଇ ମୋତେ ଅପେକ୍ଷା କରିଥିଲେ ଓ ପାଖାପାଖି ପଇଁଚାଳିଶ ମିନିଟ
ଧରି ସବୁ ପ୍ରଶ୍ନର ଉତ୍ତର ଦେବା ପରେ ଦିଲ୍ଲୀ ଯାତ୍ରା କରିଥିଲେ ।

ଏଠାରେ ଉଲ୍ଲେଖଯୋଗ୍ୟ ଯେ ସେ ସମୟରେ ହେଉଥିବା ଭ୍ରଷ୍ଟାଚାର ଓ ଦୁର୍ନୀତି ସମ୍ପର୍କରେ ବାରମ୍ବାର ଲେଖୁଥିବା ସତ୍ଵେ ମୋ ପ୍ରତି ଜାନକୀବାବୁ କେବେବି ଅସୁୟାଭାବ ପୋଷଣ କରିନଥିଲେ। ଯେତେବେଳେ ମୁ ତାଙ୍କ ସାକ୍ଷାତକାର ପାଇଁ ସମୟ ମାଗୁଥିଲି ସେ ଦେଉଥିଲେ ଓ ସ୍ମିତହାସ୍ୟରେ ସମସ୍ତ ପ୍ରଶ୍ନର ଉତ୍ତର ଦେଉଥିଲେ । ନିଜେ ବହୁବର୍ଷ ସାମ୍ବାଦିକତା କରିଥିବାରୁ ଗଣ ମାଧ୍ୟମର ଭୂମିକା ସମ୍ପର୍କରେ ସେ ଖୁବ ସଚେତନ ଥିଲେ ।

ତାଙ୍କ ବ୍ୟକ୍ତିତ୍ଵର ଅନ୍ୟ ଏକ ଦିଗ ହେଲା ସେ ସାକ୍ଷାତ ସମୟରେ ମୁଖ୍ୟମନ୍ତ୍ରୀ ଭାବେ ନୁହେଁ ବନ୍ଧୁ, ଆତ୍ମୀୟ ସହୋଦର ଭଳି ବ୍ୟକ୍ତିଗତ ହାନି ଲାଭର ମଧ୍ୟ ଖବର ନେଉଥିଲେ । ଏହା ବ୍ୟତୀତ ରାଜ୍ୟର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରୁଥିଲେ ଓ ତାଙ୍କ ମତ ଜଣାଇବା ସହ ଅନ୍ୟର ମତ ମଧ୍ୟ ପଚାରି ବୁଝୁଥିଲେ ।

ପରବର୍ତୀ ସମୟରେ ତାଙ୍କ ସହ ବହୁବର୍ଷ ଧରି ମୋର କୌଣସି ଯୋଗାଯୋଗ ନ ଥିଲା । ତିନି ବର୍ଷ ତଳେ ଆମେ କେତେକ ପରିବାର ଉତ୍ତର ପୂର୍ବାଞ୍ଚଳ ବୁଲିବା ପାଇଁ ସ୍ଥିର କଲୁ । ସେହି ସମୟରେ ଆମ ପରିବାରର  ପିଲାମାନେ ଆସାମର ରାଜ୍ୟପାଳ ଜଣେ ଓଡିଆ ଥିବା ଖବର ପାଇ ଗୌହାଟିରେ ଥିବା ରାଜଭବନ ଦେଖିବା ପାଇଁ ଆଗ୍ରହ ପ୍ରକାଶ କଲେ ।

ମୋର ଅନିଚ୍ଛା ସତ୍ଵେ ରାଜଭବନକୁ ଏକ ଫୋନ କରା ଯାଇଥିଲା । କିଛି ସମୟ ପରେ ରାଜ ଭବନରୁ ଆମ ଘରକୁ ଫୋନ ଆସିଲା ଓ ରାଜ୍ୟପାଳ ନିଜଆଡୁ ବୁଲି ଆସିବାକୁ ନିମନ୍ତ୍ରଣ କଲେ । ରାଜଭବନରେ ଆମକୁ ଯେଉଁ ଆଦର ସତ୍କାର ମିଳିଲା ତାହା କେବେ ଭୁଲି ହେବନାହିଁ ।

ଜାନକୀ ବାବୁ ପ୍ରାୟ ଦୁଇଘଣ୍ଟା ଆମ ସହ କଟାଇଲେ । କହିଲେ ଏହା ତୁମର ଘରୋଇ ଗସ୍ତ ହୋଇଥିବାରୁ ସାମ୍ବାଦିକତା କି ରାଜନୀତି ବିଷୟରେ ଅନ୍ୟ କେତେବେଳେ କଥା ହେବା । ସେ ଆମ ପୁଅ ଝିଅଙ୍କ ସହ ବହୁସମୟ କଥାବାର୍ତ୍ତା ହେଲେ ଓ ଟୋ ଫଟୋ ଉଠାଇଲେ ।

ସେ ପରାମର୍ଶ ଦେଲେ ଛାତ୍ର ଛାତ୍ରୀ ନିଜର ରୁଚି ଅନୁସାରେ କ୍ୟାରିଅର ବାଛିବା ଉଚିତ । ଯଦି ଜଣେ ଚିତ୍ର କରିବାକୁ ଭଲ ପାଉଛି, କିମ୍ବା ସଂଗୀତ ରୁଚି ରଖିଛି ତେବେ ସେ ସେହି କ୍ଷେତ୍ରକୁ ତାର କ୍ୟାରିଅର କରିବା ଉଚିତ । ସେ ପିଲାମାନଙ୍କୁ ସନ୍ତରଣ ଶିଖିବାର ଆବଶ୍ୟକତା ସମ୍ପର୍କରେ ମଧ୍ୟ ବୁଝାଇଥିଲେ ।

ଯଦିଓ ଆମେ ସିଲଂ ବୁଲିବାପାଇଁ ସ୍ଥିର କରିଥିଲୁ ପ୍ରବଳ ଭିଡ ଯୋଗୁଁ ସେଠାରେ ଆମେ ବୁକ କରିଥିବା ହୋଟେଲରେ ରୁମ ପାଇବାରେ ଅସୁବିଧା ସୃଷ୍ଟି ହୋଇଥିଲା । ଆମେ ଗୌହାଟିରୁ ଫେରି ଆସିବା ପାଇଁ ଚିନ୍ତା କରିଥିଲୁ  ତେବେ ଜାନକୀ ବାବୁ ନିଜଆଡୁ ସିଲଂରେ ଥିବା ଆସାମ ଭବନ ବୁକ କରି ଆମର ବୁଲିବା ବ୍ୟବସ୍ଥା କରିଥିଲେ ।

ଆଜି ସେ ନାହାନ୍ତି ମାତ୍ର ତାଙ୍କ ହୃଦୟର ବିଶାଳତା ଆମକୁ ସବୁବେଳେ ତାଙ୍କର ସ୍ମରଣ କରାଇବ । ତାଙ୍କର ବିୟୋଗରେ ଆମର ଶ୍ରଦ୍ଧାଞ୍ଜଳି ।

(ଯତୀନ୍ଦ୍ର ଦାଶ ଓଡିଶା ଡଟକମର ମୁଖ୍ୟ ସମ୍ପାଦକ ଓ ପ୍ରତିଷ୍ଠାତା )