ଜଗତସିଂହପୁର

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ପାରାଦ୍ବୀପ, ମଇ ୨୭(ଓଡ଼ିଶା ଡ଼ଟ୍ କମ୍) ଜଗତସିଂହପୁର ଜିଲ୍ଲା ପାରାଦ୍ବୀପ ଅଞ୍ଚଳରେ ବିପୁଳ ପରିମାଣର ବେଆଇନ ସ୍କ୍ରାପ୍ ଜବତ କରିବା ସହ ଜଣେ ପୂର୍ବତନ କାଉନ୍ସିଲରଙ୍କୁ ଗିରଫ କରିଥିବା ପୋଲିସ ରବିବାର କହିଛି ।

ଷଣ୍ଢକୁଦ ଅଂଚଳରୁ ଏହି ସ୍କ୍ରାପ୍ ଜବତ କରିଥିବା ବେଳେ ପୂର୍ବତନ କାଉନ୍ସିଲର ପ୍ରଫୁଲ୍ଲ ପରିଜାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣେ ପୋଲିସ ଅଧିକାରୀ କହିଛନ୍ତି ।

ତୈଳ ବିଶୋଧନାଗା ପ୍ରକଳ୍ପ ନିର୍ମାଣ ସ୍ଥାନରୁ ଏହି ଲୁହା ସାମଗ୍ରୀ ସବୁ ଚୋରି କରିବା ପାଇଁ ପରିଜା କେତେକ ଅସାମାଜିକ ବ୍ୟକ୍ତିଙ୍କୁ ନିୟୋଜିତ କରିଥିଲେ । ଚୋରି ପରେ ସାମଗ୍ରୀ ଗୁଡ଼ିକୁ ସେମାନେ କିଲୋଗ୍ରାମ ହିସାବରେ ବିକ୍ରି କରୁଥିଲେ ବୋଲି ପୋଲିସ କହିଛି ।

ତେବେ ଶନିବାର ରାତିରେ ସଂପୃକ୍ତ ବ୍ୟକ୍ତିମାନେ ଜଣେ ବ୍ୟବସାୟୀଙ୍କୁ ୧୫ କ୍ୱିଣ୍ଟାଲ ଲୁହା ସାମଗ୍ରୀ ବିକ୍ରି କରିଥିଲେ । ସଂପୃକ୍ତ ବ୍ୟକ୍ତି ସେଗୁଡ଼ିକ ଟ୍ରକରେ ନେବା ବେଳେ ପୋଲିସ ଖବର ପାଇଁ ଚଢାଉ କରିଥିଲା ଏବଂ ଜବତ କରିଥିଲା ବୋଲି ସେ କହିଛନ୍ତି ।

ଜବତ ସାମଗ୍ରୀ ଗୁଡ଼ିକ ମଧ୍ୟରେ ଆଲୁମିନିୟମ, ଲୁହା ଛଡ଼, ପ୍ଲେଟ, ତାର ଏବଂ କେତେକ ନୂଆ ବ୍ୟବହାର ହୋଇନଥିବା ଜିନିଷ ରହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ମଇ ୨୧(ଓଡ଼ିଶା ଡ଼ଟ୍ କମ୍) ଉପକୂଳବର୍ତୀ ଜଗତସିଂହପୁର ଜିଲ୍ଲାର ଏର୍ସମା ଏବଂ ବାଲିକୁଦା ଅଞ୍ଚଳରେ ପାନୀୟ ଜଳର ଅଭାବ ଯୋଗୁଁ ଲୋକମାନେ ବହୁତ ଅସୁବିଧାର ସମ୍ମୁଖିନ ହେଉଛନ୍ତି ।

ପ୍ରବଳ ଗ୍ରୀଷ୍ମପ୍ରବାହ ସମୟରେ ପାଣିର ଅଭାବରେ ସଂପୃକ୍ତ ଅଞ୍ଚଳର  ଲୋକଙ୍କ ଅବସ୍ଥା ଦିନକୁଦିନ ଅତ୍ୟନ୍ତ ଶୋଚନୀୟ ହୋଇପଡ଼ିଛି । ଲୋକମାନେ ଗାଧୋଇବା ଏବଂ ଲୁଗା ସଫା କରିବାକୁ ମଧ୍ୟ ପାଣି ପାଉନାହାନ୍ତି ।

ବିଭିନ୍ନ ସ୍ଥାନରେ ଚୂଆ ଖୋଳି ପାଣି ସଂଗ୍ରହ କରୁଛନ୍ତି ଏବଂ ଏହାକୁ ବ୍ୟବହାର କରୁଛନ୍ତି । ଫଳରେ ଏଭଳି ପାଣି ବ୍ୟବହାର କରି ସେମାନେ ବିଭିନ୍ନ ରୋଗରେ ଆକ୍ରାନ୍ତ ହେଉଥିବା ଅଭିଯୋଗ କରିଛନ୍ତି ।

ପାରାଦ୍ବୀପ, କୁଜଙ୍ଗ, ଏର୍ସମା ଏବଂ ବାଲିକୁଦା ଅଞ୍ଚଳରେ ଗତ ୧୫ଦିନ ମଧ୍ୟରେ ଜଳସ୍ତର ପ୍ରାୟ
ଦୁଇରୁ ତିନି ମିଟର ତଳକୁ ଖସିଯାଇଥିବା କୁହାଯାଇଛି । ଫଳରେ କୂଅ ଗୁଡ଼ିକର ଜଳସ୍ତର ମଧ୍ୟ ହ୍ରାସ ପାଇବା ସହ ନଳକୂଅରେ ପାଣି ବାହାରୁ ନାହିଁ ।

ପାଣିର ଅଭାବ ମେଣ୍ଟାଇବା ପାଇଁ ଲୋକମାନେ ଦୂଷିତ ପାଣି ବ୍ୟବହାର କରୁଥିବାରୁ ସେମାନେ
ଡ଼ାଇରିଆ ଏବଂ ଚର୍ମରୋଗରେ ଆକ୍ରାନ୍ତ ହେଉଛନ୍ତି । ତେବେ ଜନସ୍ୱାସ୍ଥ୍ୟ ବିଭାଗ ପକ୍ଷରୁ ଟ୍ୟାଙ୍କର ଯୋଗେ ଦିଆଯାଉଥିବା ପାଣି ନିୟମିତ ଭାବେ ଉପଲବ୍ଧ ହେଉନଥିବା ଅଭିଯୋଗ ହୋଇଛି ।

କେତେକ ସ୍ଥାନରେ ବିଦ୍ୟୁତ୍ କମ୍ ଭୋଲ୍ଟେଜ୍ ଯୋଗୁଁ ପାଇପ ଦ୍ୱାରାଜଳ ଯୋଗାଣ ବ୍ୟବସ୍ଥା ଅଚଳ ହୋଇପଡ଼ିଥିବା ବେଳେ ଅନ୍ୟ କେତେକ ସ୍ଥାନରେ ପାଇପ ଗୁଡ଼ିକ ଫାଟି ଯାଇଥିଲେ ମଧ୍ୟ ବହୁଦିନ ହେଲା ମରାମତି ହୋଇପାରି ନାହିଁ ।

ନଦୀ ଏବଂ ନାଳରେ କମ୍ ଜଳ ପ୍ରବାହିତ ହେଉଥିବାରୁ ଲୋକଙ୍କ ଆବଶ୍ୟକତାକୁ ଏହା ପୂରଣ କରିପାରୁ ନାହିଁ । ଫଳରେ ସେମାନେ ୫ରୁ ୭ କିମି ଚାଲିଚାଲି ଯାଇ ପାଣି ଆଣୁଛନ୍ତି ।

“”ଚାରି କିମି ଦୂରରେ ଥିବା ପଟୁଆ ଗ୍ରାମର ଜଣେ ବ୍ୟକ୍ତିଙ୍କ କୂଅରୁ ବର୍ଷ ତମାମ ଆମେ ପାଣି ଆଣି ଥାଉ । ଏହି କୂଅରୁ ପ୍ରାୟ ଦୁଇ ଶହ ପରିବାର ପିଇବା ପାଣି ପାଉଛନ୍ତି”” ଜଣେ ମହିଳା ସୁକାନ୍ତି ମଣ୍ଡଳ କହିଛନ୍ତି ।

ପାଣିର ଅସୁବିଧା ଯୋଗୁଁ ଆମେ ସପ୍ତାହରେ ଦୁଇ ଥର ଗାଧୋଉଛୁ ତେଣୁ ମହିଳା ଓ ପିଲାମାନେ ବିଭିନ୍ନ ଚର୍ମ ରୋଗରେ ଆକ୍ରାନ୍ତ ହେଉଛନ୍ତି ବୋଲି ଅନ୍ୟ ଜଣେ ମହିଳା ଅଭିଯୋଗ କରିଛନ୍ତି ।

ପ୍ରବଳ ଗ୍ରୀଷ୍ମ ପ୍ରବାହ ସମୟରେ ତାଲଦଣ୍ଡା ଓ ମାଛଗାଁଦୁଇଟି ପ୍ରମୁଖ କେନାଲରେ ପାଣି ଆସୁନଥିବାରୁ କେବଳ ମଣିଷ ନୁହେଁ ଗାଈ ଗୋରୁମାନେ ମଧ୍ୟ ପାଣି ପାଇପାରୁ ନାହାନ୍ତି ।

ଏର୍ସମା ଓ ବାଲିକୁଦା ଅଞ୍ଚଳର ପାଖାପାଖି ୨୦/୨୫ଟି ଗ୍ରାମରେ ପାନୀୟ ଜଳର ଅବାଭ ରହିଛି । ତେଣୁ ସଂପୃକ୍ତ ଗ୍ରାମବାସୀଙ୍କୁ ଟ୍ୟାଙ୍କର ଯୋଗେ ପାଣି ଯୋଗାଇ ବୋକୁ ନିର୍ଦ୍ଦେଶ ଦିଆଯାଇଛି ବୋଲି ପାରାଦ୍ଵୀପ ଅତିରିକ୍ତ ଜିଲ୍ଲାପାଳ ସୁରଜିତ୍ ଦାସ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ମଇ ୨୦(ଓଡ଼ିଶା ଡ଼ଟ୍ କମ୍) ପ୍ରସ୍ତାବିତ ପୋସ୍କୋ ପ୍ରକଳ୍ପ ନେଇ କମ୍ପାନୀ ଅଧ୍ୟକ୍ଷ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ପରେ ପ୍ରକଳ୍ପ କାର୍ଯ୍ୟ ନେଇ ପ୍ରଶାସନିକ ତତ୍ପରତା ପ୍ରକାଶ ପାଇଛି ।

ପଞ୍ଚାୟତିରାଜ ସଚିବ ତଥା ଇଡ୍କୋ ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ପ୍ରଦୀପ ଜେନା, ଇଡ୍କୋ ଜମି ଅଧିଗ୍ରହଣ ବରିଷ୍ଠ ଅଧିକାରୀ ସଂଗ୍ରାମ ମହାପାତ୍ର ଏବଂ ଅନ୍ୟ ଅଧିକାରୀମାନେ ଶନିବାର ପ୍ରସ୍ତାବିତ ଅଞ୍ଚଳକୁ ଗସ୍ତ କରି ପ୍ରକଳ୍ପର ଅଗ୍ରଗତି ସଂପର୍କରେ ଆଲୋଚନା କରିଛନ୍ତି ।

ଏହି ଅଧିକାରୀମାନେ ପୋସ୍କୋ ଅସ୍ଥାୟୀ ଶିବିରରେ ପହଞ୍ଚି ଦିର୍ଘ ୫ବର୍ଷ ଧରି ଘର୍ୱାର ଛାଡ଼ି ଖରାବାର୍ଷାରେ ଟିଣ ଛାତତଳେ ପଡି ରହିଥିବା ୫୨ ପରିବାରଙ୍କ ଦୁଃଖଦୁର୍ଦ୍ଧଶା ସମ୍ପର୍କରେ ପଚାରି ବୁଝିଥିଲେ ।

ଏରସମା ବ୍ଲକ୍ ର କନାଗୋଳି ଅଞ୍ଚଳ ଗସ୍ତ କରି ବାଳିଆମରା ନୀରେ ତୁରନ୍ତ ପୋଲ ନିର୍ମାଣ ସହିତ ପ୍ରକଳ୍ପ ପାଇଁ ଅଧିକୃତ ଅଞ୍ଚଳ ନୋଳିଆସାହି, ମହଦଦାବୀର ଆଶ୍ରମ, ପୋଲାଙ୍ଗ, ଭୂୟାଁପାଳ, ନୂଆଗାଁରେ ଥିବା ପୋସ୍କୋ ଜନସମ୍ପର୍କ କାର୍ଯ୍ୟାଳୟ, ଗୋବିନ୍ଦପୁର, ନୂଆଗାଁ ବାଲିସାହି ଆଦି ପରିଦର୍ଶନ କରିଥିଲେ ।

ପଞ୍ଚାୟତ କାର୍ଯ୍ୟାଳୟରେ ଗ୍ରାମବାସୀଙ୍କ ସହ ମଧ୍ୟ ଆଲୋଚନା କରିଥିଲେ । ଆଲୋଚନା ସମୟରେ
ଲୋକମାନେ ସ୍ଥାନୀୟ ଅଞ୍ଚଳର ସମସ୍ୟା ସମ୍ପର୍କରେ ପ୍ରଦୀପ ଜେନାଙ୍କୁ ଅବଗତ କରିଥିଲେ ।

ପରେ ପାରାଦ୍ବୀପସ୍ଥିତ ସର୍କିଟ୍ ହାଉସ୍ ରେ ଜିଲ୍ଲା ପ୍ରଶାସନ ଅଧିକାରୀଙ୍କ ସହ ଇଡ୍କୋ ଅଧ୍ୟକ୍ଷଙ୍କ ବୈଠକ ଅନୁଷ୍ଠିତ ହୋଇଥିଲା ଓ ଏଥିରେ ଆଗାମୀ ପଦକ୍ଷେପ ନେଇ ଆଲୋଚନା ହୋଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ମଇ ୧୮(ଓଡ଼ିଶା ଡ଼ଟ୍ କମ୍) ଆବଶ୍ୟକ ଡ଼ାକ୍ତାର ଓ ସରଞ୍ଜାମ ନଥିବାରୁ ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟ ତଥା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଗୁଡ଼ିକରେ ସ୍ୱାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡ଼ିଛି ।

ଏହି ଅଞ୍ଚଳରେ ଜଣ୍ଡିସ ଓ ଅନ୍ୟାନ୍ୟ ରୋଗ ଦେଖା ଦେଇଥିବା ବେଳେ ସ୍ଥାନୀୟ ଲୋକମାନେ ଏନେଇ ଭୟଭୀତ ହୋଇପଡ଼ିଛନ୍ତି ।

ଜିଲ୍ଲାର ଆଠଟି ବ୍ଲକର ଲକ୍ଷାଧିକ ଲୋକ ଏହି ଡ଼ାକ୍ତରଖାନା ଉପରେ ନିର୍ଭର କରୁଥିବା ବେଳେ
ରାଜନୈତିକ ଇଚ୍ଛାଶକ୍ତିର ଅଭାବ ତଥା ପ୍ରଶାସନିକ ଅବହେଳା ଯୋଗୁଁ ସେମାନେ ସେବା ପାଇବାରୁ ବଞ୍ଚିତ ହେଉଛନ୍ତି ବୋଲି ଲୋକମାନେ କହିଛନ୍ତି ।

ପ୍ରତିଦିନ ଗର୍ଭବତୀ ମହିଳାଙ୍କ ସମେତ ହଜାର ହଜାର ରୋଗୀ ଡ଼ାକ୍ତରଖାନାକୁ ଆସୁଥିବା ବେଳେ ଚିକିତ୍ସାଳୟରେ ବିଶେଷଜ୍ଞ ନଥିବାରୁ ରୋଗୀ ମାନଙ୍କୁ ଘରୋଇ କ୍ଲିନିକ୍, କଟକ ବଡ଼ ଡ଼ାକ୍ତରଖାନାକୁ ପଠାଇଦିଆଯାଉଛି।

ସେହିପରି ଆବଶ୍ୟକ ସରଞ୍ଜାମ ଅଭାବରୁ ମଧ୍ୟ ସ୍ୱାସ୍ଥ୍ୟସେବା ବାଧାପ୍ରାପ୍ତ ହେଉଛି । ଗତ ପାଞ୍ଚ ବର୍ଷ ତଳେ ଲଗାଯାଇଥିବା ଅଲଟ୍ରାସାଉଣ୍ଡ ମେସିନ୍ ମଧ୍ୟ ଖରାପ ହୋଇ ପଡ଼ିଛି । ଅଲଟ୍ରାସାଉଣ୍ଡ କରିବାକୁ ଲୋକ ମାନଙ୍କୁ କଟକ ଓ ଅନ୍ୟ ସ୍ଥାନକୁ ଯିବାକୁ ପଡ଼ୁଛି ।

ଏହାସହ ଚିକିତ୍ସାଳୟକୁ ଡ଼ାକ୍ତରମାନେ ନିୟମିତ ନଆସୁଥିବାରୁ ଏହା ରୋଗୀମାନଙ୍କୁ ବହୁତ ଅସୁବିଧାରେ ପକାଇଛି ।

ଜିଲ୍ଲାରେ ୨୭ଟି ଡ଼ାକ୍ତର ଏବଂ ୨୭ଟି ଏଏନ୍ଏମ୍ ପଦବୀ ଖାଲି ପଡ଼ିଥିବା ବେଳେ ଏଗୁଡ଼ିକ ପୂରଣ ପାଇଁ ଉଚ୍ଚ କର୍ତୃପକ୍ଷଙ୍କୁ କୁହାଯାଇଛି ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ବିଜୟ ସାହୁ କହିଛନ୍ତି ।

ସ୍ଥାନୀୟ ଲୋକଙ୍କୁ ଠିକ୍ ଭାବେ ସ୍ଥାସ୍ଥ୍ୟସେବା ଯୋଗାଇବା ଦାବିରେ ଶୁକ୍ରବାର ଯୁବକ କଂଗ୍ରେସ ପକ୍ଷରୁ ଜିଲ୍ଲା ମୁଖ୍ୟ ଚିକିତ୍ସାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ମଇ ୬(ଓଡ଼ିଶା ଡ଼ଟ୍ କମ୍) ଜଗତସିଂହପୁର ଜିଲ୍ଲା ଦହିସାହି ବଜାରରେ ରବିବାର ଦୁର୍ବୃତ୍ତଙ୍କ ଗୁଳିମାଡ଼ରେ ଜଣେ ଯୁବକ ଏବଂ ଜଣେ ବୃଦ୍ଧ ଗୁରୁତର ଆହତ ହୋଇଛନ୍ତି ।

ତୁଳସୀଗାଡ଼ି ନିକଟରେ ଆୟୋଜନ କରାଯାଇଥିବା ଯଜ୍ଞ ସ୍ଥଳ ନିକଟରେ ଗୁମୁଟିପୁର ଗ୍ରାମର ଜଗଦିଶ ଖଟୁଆ ନାମକ ଜଣେ ୨୧ ବର୍ଷ ବୟସ୍କ ବାଳକ ସାଇକେଲ ଷ୍ଟାଣ୍ଡ ଦେଇଥିଲେ । ଉକ୍ତ ଷ୍ଟାଣ୍ଡରେ ଜଣେ ଅଜଣାବ୍ୟକ୍ତି ମଟରସାଇକେଲ ରଖିବା ପରେ ଜଗଦିଶ ତାଙ୍କୁ ପାଞ୍ଚ ଟଙ୍କା ମାଗିଥିଲେ ।

ଅଜଣାବ୍ୟକ୍ତି ଜଣକ ଟଙ୍କା ଦେବାକୁ ମନା କରିବୋରୁ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏଥିରେ ସଂପୃକ୍ତ ବ୍ୟକ୍ତି ଉତ୍ତେଜିତ ହୋଇ ବାଳକ ଉପରକୁ ଗୁଳି ଚଳାଇଥିଲେ ।

ଗୁଳିମାଡ଼ ସଂପର୍କରେ ଜାଣି ଜଣେ ୭୨ ବର୍ଷ ବୟସ୍କ ବୃଦ୍ଧ ବାଳକକୁ ଉଦ୍ଧାର କରିବାକୁ ଆସିଥିବା ବେଳେ ଅଜଣା ବ୍ୟକ୍ତି ତାଙ୍କ ଉପରକୁ ମଧ୍ୟ ଗୁଳି ଚଳାଇଥିଲା । ଫଳରେ ଉଭୟ ବାଳକ ଓ ବୃଦ୍ଧ ଗୁରୁତର ଆହତ ହୋଇଥିଲେ ।

ଆହତ ମାନଙ୍କୁ ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଥିଲା ଏବଂ ଅବସ୍ଥା ଗୁରୁତର ହେବାରୁ ସେମାନଙ୍କୁ କଟକ ସ୍ଥାନାନ୍ତର କରାଯାଇଛି ।

ପରେ ସ୍ଥାନୀୟ ଲୋକମାନେ ସେଠାରେ ପହଞ୍ଚି ଗୁଳି ଚଳାଇଥିବା ବ୍ୟକ୍ତିକୁ ଧରି ପୋଲିସକୁ ହସ୍ତାନ୍ତର କରିଥିଲେ । ବ୍ୟକ୍ତି ଜଣକ ଗଞ୍ଜାମ ଜିଲ୍ଲାର ଲିପୁ ବୋଲି ପୋଲିସ କହିଛି । ପୋଲିସ ତା’ଠାରୁ ଗୋଟିଏ ରିଭଲଭର ଏବଂ ୧୫ଟି ଗୁଳି ଜବତ କରିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ଅପ୍ରେଲ ୧୨(ଓଡ଼ିଶା ଡ଼ଟ୍ କମ୍) ପାରାଦ୍ଵୀପ ସ୍ଥିତ ତୈଳ ବିଶୋଧନାଗାରରେ ନିର୍ମାଣ କମ୍ପାନୀର ଜଣେ ବରିଷ୍ଠ ଅଧିକାରୀଙ୍କୁ ଆକ୍ରମଣ କରିବା ଅଭିଯୋଗରେ ବିଜୁ ଶ୍ରମିକ ସଂଗଠନର ଦୁଇ ଜଣଙ୍କୁ ଗିରଫ କରିଥିବା ପୋଲିସ ଗୁରୁବାର କହିଛି ।

ବିଶୋଧନାଗାରରେ ପଶ୍ଚିମବଙ୍ଗର ଏକ ନିର୍ମାଣ କମ୍ପାନୀକୁ କାମ କରିବାକୁ ନିୟୋଜିତ କରାଯାଇଥିଲା । ନିଯୁକ୍ତି ଏବଂ ଠିକା କାମ ଦାବି କରି ଉକ୍ତ ଶ୍ରମିକ ସଂଗଠନର କର୍ମକର୍ତାମାନେ କମ୍ପାନୀ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ ।

ତେବେ କମ୍ପାନୀର ମ୍ୟାନେଜର ଅମିତ କୁମାର ମହାନ୍ତି ସେମାନଙ୍କୁ ନିଯୁକ୍ତି ତଥା ଠିକା କାମ ଦେବାକୁ ମନା କରିବୋରୁ ଉକ୍ତ ଲୋକମାନେ କାର୍ଯ୍ୟାଳୟରେ ଭଙ୍ଗାରୁଜା କରିବା ସହ ମହାନ୍ତିଙ୍କୁ ଆକ୍ରମଣ କରିଥିଲେ ।

ଏନେଇ ମହାନ୍ତି ଅଭୟଚନ୍ଦ୍ରପୁର ଥାନାରେ ଏକ ମାମଲା ରୁଜୁ କରିଥିଲେ । ଅଭିଯୋଗ ଅନୁସାରେ
ପୋଲିସ ଚଢାଉ କରି ବିପିନ ପରିଡ଼ା ଏବଂ ସୁରଜକାନ୍ତ ସ୍ୱାଇଁଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣେ ଅଧିକାରୀ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ମାର୍ଚ୍ଚ ୨୯(ଓଡ଼ିଶା ଡ଼ଟ୍ କମ୍) ଗାଡ଼ିରେ ନାଲିବତୀ ଲଗାଇବା ନେଇ ହାଇକୋର୍ଟ ତଥା ରାଜ୍ୟ ସରକାରଙ୍କ କଟକଣା ସତ୍ୱେ ଆଇନ ଉଲଂଘନ କରି ଜଗତସିଂହପୁର ଜିଲ୍ଲାରେ କେତେକ ଅଧିକାରୀ ନିଜ ଗାଡ଼ିରେ ନାଲିବତୀ ଲଗାଉଥିବା ଅଭିଯୋଗ ହୋଇଛି ।

ପାରାଦ୍ଵୀପ ବନ୍ଦର ଅଧ୍ୟକ୍ଷ ଜି.ଜଗନ୍ନାଥ ରାଓଙ୍କ ସମେତ ତିର୍ତୋଲ, କୁଜଙ୍ଗ, ବାଲିକୁ ଆଦିର ତହସିଲଦାର ମଧ୍ୟ ଏହାର ଉଲଂଘନ କରୁଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି ।

ଏହି ଅଧିକାରୀମାନେ କେବଳ ପେଟ୍ରୋଲିଂ ଏବଂ ଆଇନଶୃଙ୍ଖଳା ପରିସ୍ଥିତି ସମୟରେ ଏହା ଲଗାଇବା ପାଇଁ ନିୟମ ଥିବା ବେଳେ ସେମାନେ ବିଭିନ୍ନ ସଭା ସମିତି ତଥା ଅନ୍ୟ ଅଫିସକୁ ଯିବା ସମୟରେ ଗାଡ଼ିରେ ନାଲି ବତୀ ବ୍ୟବହାର କରୁଛନ୍ତି ।

ପୂର୍ବରୁ ବନ୍ଦର ଅଧ୍ୟକ୍ଷମାନେ ନାଲିବତୀ ଲଗାଉନଥିବା ବେଳେ ରାଓ ଆଇନ ଉଲଂଘନ କରି ଜିଲ୍ଲାର ବିଭିନ୍ନ ସ୍ଥାନକୁ ଯାଉଥିବା ଜଣେ ଶ୍ରମିକ ସଂଗଠନର ନେତା ଅଭିଯୋଗ କରିଛନ୍ତି । ପୋଲିସ ଓ ଜିଲ୍ଲା ପ୍ରଶାସନର ଜାଣତରେ ଅନ୍ୟମାନେ ମଧ୍ୟ ଗାଡ଼ିରେ ନାଲିବତୀ ବ୍ୟବହାର କରୁଥିବା ସେ କହିଛନ୍ତି ।

କେତେକ ସମୟରେ ସଂପୃକ୍ତ ଅଧିକାରୀଙ୍କ ପତ୍ନୀ, ସହ ଅଧିକାରୀ ତଥା କାର୍ଯ୍ୟାଳୟର ଅନ୍ୟମାନେ ଉକ୍ତ ଗାଡ଼ିରେ ଯିବା ଆସିବା କରୁଛନ୍ତି ଯାହାଦ୍ୱାରା ସ୍ଥାନୀୟ ଲୋକମାନେ ଦ୍ଵନ୍ଦରେ ରହୁଛନ୍ତି । ତେଣୁ ଏହାକୁ ତୁରନ୍ତ ବନ୍ଦ କରିବା ଉଚିତ୍ ବୋଲି ଲୋକମାନେ କହିଛନ୍ତି ।

ବିଜ୍ଞପ୍ତି ଅନୁଯାୟୀ ଓଡ଼ିଶା ହାଇକୋର୍ଟ ମୁଖ୍ୟ ବିଚାରପତି, ବିଚାରପତି, ଅଡ଼ିଟର ଜେନେରାଲ, ଆଡ଼ଭୋକେଟ ଜେନେରାଲ, ବିରୋଧୀ ଦଳ ନେତା, ସରକାରୀ ମୁଖ୍ୟ ସଚେତକ, ନିର୍ବାଚନ କମିଶନର, ମାନବାଧିକାର କମିଶନ, ମୁଖ୍ୟ ଶାସନ ସଚିବ ଏବଂ ଆର୍ଡ଼ିସିମାନ ନିଜ ଗାଡ଼ିରେ ନାଲିବତୀ ବ୍ୟବହାର କରିପାରିବେ ।

ଏହାବ୍ୟତୀତ ଜିଲ୍ଲା ମାଜିଷ୍ଟ୍ରେଟ, ଅତିରିକ୍ତ ଜିଲ୍ଲା ମାଜିଷ୍ଟ୍ରେଟ, ସମସ୍ତ ଜିଲ୍ଲା ଜଜ୍, ପୋଲିସ ପେଟ୍ରୋଲିଂ ଭ୍ୟାନ, ଅଗ୍ନିଶମ ଗାଡ଼ିରେ ନାଲିବତୀ ଲଗାଇବା ପାଇଁ ଅନୁମତି ଦିଆଯାଇଥିବା ବେଳେ ରାଜ୍ୟ ପ୍ରଶାସନିକ ପ୍ରାଧିକରଣ ଅଧ୍ୟକ୍ଷଙ୍କୁ ଏଥିପାଇଁ ଅନୁମତି ିଆଯାଇ ନାହିଁ ।

କେବଳ ଅନୁମତି ପାଇଥିବା ବ୍ୟକ୍ତି ନାଲିବତୀ ଲଗାଇବା ଉପରେ ଜିଲ୍ଲା ମାଜିଷ୍ଟ୍ରେଟ ଏବଂ ଏସ୍ପି ସ୍ପଷ୍ଟ କରିବାକୁ ଗତ ଦୁଇ ବର୍ଷ ତଳେ ହାଇକୋର୍ଟର ତତ୍କାଳୀନ ମୁଖ୍ୟ ବିଚାରପତି ଆଇଏମ୍ କୁଦ୍ଧୁସି ଏବଂ ବିଚାରପତି ସଞ୍ଜୁ ପଣ୍ଡା ସରକାରଙ୍କୁ ନିଦେ୍ର୍ଧଶ ଦେଇଥିଲେ ।

ତେବେ ବନ୍ଦର ଅଧ୍ୟକ୍ଷ ଗାଡ଼ିରେ ନାଲିବତୀ ଲଗାଇବା ପାଇଁ ଅନୁମତି ପାଇନାହାନ୍ତି, ସେ ସରକାରଙ୍କ ନିଦେ୍ର୍ଧଶକୁ ବେଖାତିର କରି ଏହା ବ୍ୟବହାର କରୁଛନ୍ତି ବୋଲି ପାରାଦ୍ଵୀପ ଅତିରିକ୍ତ ଜିଲ୍ଲା ମାଜିଷ୍ଟ୍ରେଟ ସୁରଜିତ୍ ଦାସ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ମାର୍ଚ୍ଚ ୧୮(ଓଡ଼ିଶା ଡ଼ଟ୍ କମ୍) ଜଗତସିଂହପୁର ଜିଲ୍ଲାରେ ବିଭାଗୀୟ କର୍ତୃପକ୍ଷ ଏବଂ ହାଇକୋର୍ଟଙ୍କ ନିର୍ଦ୍ଦେଶକୁ ବେଖାତିର କରି ସ୍କୁଲ ଠାରୁ ବହୁ ଦୂରରେ ପରୀକ୍ଷା କେନ୍ଦ୍ର କରାଯାଇଥିବାରୁ ମ୍ୟାଟ୍ରିକ ପରୀକ୍ଷାର୍ଥୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।

ଜିଲ୍ଲାର ୨୮୫ ହାଇସ୍କୁଲର ୧୮, ୩୧୮ ଜଣ ଛାତ୍ରଛାତ୍ରୀ ୭୧ଟି ପରୀକ୍ଷା କେନ୍ଦ୍ରରେ ସୋମବାର ହେବାକୁ ଥିବା ମ୍ୟାଟ୍ରିକ ପରୀକ୍ଷା ଦେବେ ।

ପରୀକ୍ଷା କେନ୍ଦ୍ର ବହୁତ ଦୂରରେ ହୋଇଥିବାରୁ ସେଠାକୁ ଯିବା ପାଇଁ ଅଧିକ ସମୟ ଲାଗିବ ଏବଂ ପରୀକ୍ଷା ଦେବାରେ ବାଧାପ୍ରାପ୍ତ ହେବ ବୋଲି ବିଭିନ୍ନ ହାଇସ୍କୁଲର ଛାତ୍ରଛାତ୍ରୀମାନେ କହିଛନ୍ତି ।

ସ୍କୁଲ ଠାରୁ ୪୦ କିମି ଦୂରରେ ପରୀକ୍ଷା କେନ୍ଦ୍ର କରାଯାଇଥିବାରୁ ଏହା ହାଇକୋର୍ଟଙ୍କ ନିର୍ଦ୍ଦେଶକୁ ଅବମାନନା କରାଯାଇଛି ବୋଲି ଅଭିଭାବକମାନେ ଅଭିଯୋଗ କରିଛନ୍ତି ।

ଯେଉଁ ସ୍ଥାନ ଗୁଡ଼ିକରେ ପରୀକ୍ଷା କେନ୍ଦ୍ର ୪୦ କିମି ଦୂରରେ ରହିଛି ସେଗୁଡ଼କ ପରିବର୍ତନ କରିବା ପାଇଁ ସେମାନେ ଜିଲ୍ଲାପାଳ ଏବଂ ସ୍କୁଲ ଓ ଗଣଶିକ୍ଷା ବିଭାଗର ହସ୍ତକ୍ଷେପ ଲୋଡ଼ିଛନ୍ତି ।

ସରକାର ସ୍କୁଲ ଠାରୁ ୫/୧୦ କିମି ଦୂରରେ ପରୀକ୍ଷା କେନ୍ଦ୍ର କରିବା ପାଇଁ ନିର୍ଦ୍ଦେଶ ଦେଇଥିଲେ ମଧ୍ୟ
ତାହା କରାଯାଇ ନାହିଁ ବୋଲି ଜଣେ ଅଭିଭାବକ ସୁଦର୍ଶନ ସ୍ୱାଇଁ କହିଛନ୍ତି ।

ଭୌଗୋଳିକ ସ୍ଥିତି ଯୋଗୁଁ ୫ରୁ୧୦ କିମି ମଧ୍ୟରେ ପରୀକ୍ଷା କେନ୍ଦ୍ର କରିବା କଷ୍ଟକର କିନ୍ତୁ କେତେକ ସ୍କୁଲର କେନ୍ଦ୍ର ଏହି ଦୂରତା ମଧ୍ୟରେ କରାଯାଇଛି ବୋଲି ସ୍କୁଲ ସିଆଇ ପ୍ରଶାନ୍ତ କୁମାର ସ୍ୱାଇଁ କହିଛନ୍ତି ।

ଓଡ଼ିଶା ଡ଼ଟ୍ କମ୍