ସାକ୍ଷାତକାର

ଭବିଷ୍ୟତରେ ଜଣେ ଭଲ ଡାକ୍ତର ହେବି: ସାର୍ଥକ

ଓଡ଼ିଶା ଡ଼ଟ୍ କମ୍ : ବଳରାମ ମିଶ୍ର

ବଲାଙ୍ଗୀର, ଜୁନ୍ ୨୫(ଓଡ଼ିଶା ଡ଼ଟ୍ କମ୍) ଚଳିତ ବର୍ଷ ମ୍ୟାଟ୍ରିକ ପରୀକ୍ଷାରେ ସମଗ୍ର ରାଜ୍ୟରେ ପ୍ରଥମ ସ୍ଥାନ ହାସଲ କରିଥିବା ବଲାଙ୍ଗୀର ସରସ୍ୱତୀ ଶିଶୁ ମନ୍ଦିର ଛାତ୍ର ସାର୍ଥକ ପ୍ରଧାନ ଭବିଷ୍ୟତରେ ଜଣେ ଡ଼ାକ୍ତର ହୋଇ ଜନସାଧାରଣଙ୍କ ସେବା କରିବାକୁ ଲକ୍ଷ୍ୟ ରଖିଛନ୍ତି ।

ପରୀକ୍ଷା ସମୟରେଦିନକୁ ୧୦ ରୁ ୧୨ ଘଣ୍ଟା ପରିଶ୍ରମ କରୁଥିବା ସାର୍ଥକ ଡ଼ାକ୍ତରୀ ପଢିବା ପରେ ଆଇଏଏସ୍ ପାଇଁ ଚେଷ୍ଟା କରିବେ ବୋଲି କହିଛନ୍ତି ।

ପରୀକ୍ଷାରେ ଟପ୍ପର ହେବି ବୋଲି ମୁଁ ଆଶା ରଖିଥିଲି । ଏଥିପାଇଁ ବର୍ଷ ଆରମ୍ଭରୁ ଯୋଜନା କରି ବିଭିନ୍ନ ବିଷୟରେ ପାଠ ପଢୁଥିଲି ଓ ପ୍ରତି ବିଷୟ ପାଇଁ ସ୍କୁଲ ଶିକ୍ଷକଙ୍କ ପରାମର୍ଶ ନେଉଥିଲି, ସେ କହିଛନ୍ତି ।

ପରୀକ୍ଷା ଫଳ ଜାଣି ମୁଁ ବହୁତ ଖୁସି । ଚଳିତ ବର୍ଷ ପ୍ରଶ୍ନପତ୍ର କଷ୍ଟ ଥିଲା କିନ୍ତୁ ଠିକ୍ ମାର୍କ ଆସିଛି । ସଫଳତା ପଛରେ ସ୍କୁଲ ଶିକ୍ଷକଙ୍କ ବହୁତ ଅବାନ ରହିଛି । ବାପା ମା’ ପ୍ରତିମୁହୁର୍ତ୍ତରେ ମୋତେ ଉତ୍ସାହିତ କରୁଥିଲେ, ସେ କହିଛନ୍ତି ।

ବଲାଙ୍ଗିର ସହର ତୁଳସୀନଗର ପଡାରେ ରହୁଥିବା ସାର୍ଥକଙ୍କ ବାପା ବିରାଟ କେଶରୀ ପ୍ରଧାନ ସ୍ଥାନୀୟ ପୋଲିସ ହାଇସ୍କୁଲରେ ବିଜ୍ଞାନ ଶିକ୍ଷକ ଥିବା ବେଳେ ମାଁ ସ୍ନେହଲତା ପ୍ରଧାନ ଜଣେ ଆଦର୍ଶ ଗୃହିଣୀ ।

ସାର୍ଥକ ବିଦ୍ୟାଳୟରେ ପଢିବା ବ୍ୟତୀତ ଘରେ ଗଣିତ, ଇଂରାଜୀ ଓ ସଂସ୍କୃତ ବିଷୟରେ ଟିଉସନ ହେଉଥିଲେ । ରଚନା ଲେଖିବା ତଥା ବକ୍ତୃତା ଦେବା ତାଙ୍କ ରୁଚି ବୋଲି ସେ କହିଛନ୍ତି ।

ସାର୍ଥକ ଚଳିତ ମ୍ୟାଟ୍ରିକ ପରୀକ୍ଷାରେ ସାରା ରାଜ୍ୟରେ ରେକର୍ଡ ସୃଷ୍ଟି କରିଛନ୍ତି । ଏପର୍ଯ୍ୟନ୍ତ ବୋର୍ଡରେ କୌଣସି ଛାତ୍ରଛାତ୍ରୀ ୫୮୬ ନମ୍ବର ରଖିନଥିଲେ ବୋଲି ଜିଲ୍ଲା ଶିକ୍ଷାମଣ୍ଡଳାଧୀଶ ସଂଜୀବ ସିଂ କହିଛନ୍ତି ।

ଓଡ଼ିଶା ଡ଼ଟ୍ କମ୍

Leave a Reply

This site uses Akismet to reduce spam. Learn how your comment data is processed.