ଓଡିଶା ନ୍ୟୁଜ/ Odisha News
ଶିକ୍ଷା

କେନ୍ଦ୍ରୀୟ ବିଦ୍ୟାଳୟରେ ପିଛିଲା ବର୍ଦ୍ଧିତ ସ୍କୁଲ ଫି ଆଦାୟକୁ ବିରୋଧ

ଓଡିଶା ଡଟକମ ସଂବାଦ ଦାତା

ଭୁବନେଶ୍ୱର,ମଇ ୩ (ଓଡିଶା ଡଟ କମ), ୨୦୧୦ରେ ହୋଇଥିବା ସ୍କୁଲ ଫି ବୃଦ୍ଧିକୁ ନିକଟରେ ହାଇକୋର୍ଟ ଯଥାର୍ଥ ଦର୍ଶାଇବା ପରେ କେନ୍ଦ୍ରୀୟ ବିଦ୍ୟାଳୟ କତ୍ତୃପକ୍ଷ ପିଛିଲା ତାରିଖରୁ ଛାତ୍ର ଛାତ୍ରୀଙ୍କୁ ତାହା ଏକ କାଳୀନ ପଇଠ କରିବା ଓ ବର୍ଦ୍ଧିତ ସ୍କୁଲ ଫି ନିୟମିତ ଦାଖଲ ପାଇଁ ଦେଇଥିବା ନିର୍ଦ୍ଦେଶକୁ ଅଭିଭାବକ ମାନେ ବିରୋଧ କରିଛନ୍ତି ।

ପୂର୍ବରୁ ପ୍ରଥମରୁ ତୃତୀୟ ଶ୍ରେଣୀର ଛାତ୍ରଛାତ୍ରୀ ଜଣ ପିଛା ମାସିକ ୧୬୦ ଟଙ୍କା ଦେଉଥିବା ବେଳେ ଚତୁର୍ଥ ଶ୍ରେଣୀର ଛାତ୍ରଛାତ୍ରୀ ମାସିକ ୧୮୦ ଟଙ୍କା ଦେଉଥିଲେ । ଏବେ ସେମାନଙ୍କୁ ଏହାର ଦୁଇ ରୁ ତିନି ଗୁଣ ପର୍ଯ୍ୟନ୍ତ ପଇଠ କରିବାକୁ ପଡିବ ।

ଠିକ ସେହିପରି ସବୁ ଛାତ୍ର ଛାତ୍ରୀଙ୍କୁ ପିଛିଲା ତାରିଖରୁ ବର୍ଦ୍ଧିତ ଫି ଦେବାକୁ କୁହାଯାଇଥିବାରୁ ଜଣେ ଜଣେ ଦଶ ହଜାରରୁ ପଚାଶ ହଜାର ଟଙ୍କା ପର୍ଯ୍ୟନ୍ତ ଦେବାକୁ ବାଧ୍ୟ ହେବେ ବୋଲି ଅଭିଭାବକ ମାନେ ଅଭିଯୋଗ କରିଛନ୍ତି ।ଏହାର ବିରୋଧ କରି ସେମାନେ ରାମ ମନ୍ଦିର ନିକଟରେ ଥିବା କେନ୍ଦ୍ରୀୟ ବିଦ୍ୟାଳୟ-୧ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ ।

ମଞ୍ଚେଶ୍ୱରସ୍ଥିତ କେନ୍ଦ୍ରୀୟ ବିଦ୍ୟାଳୟ ସଂଗଠନର ଡେପୁଟି କମିଶନରଙ୍କ କାର୍ଯ୍ୟାଳୟ ସମ୍ମୁଖରେ ମଧ୍ୟ ଶତାଧିକ ଅଭିଭାବକ ପ୍ରାୟ ୮ଘଣ୍ଟା ଧରି ଶନିବାର ଦିନ ଧାରଣାରେ ବସି ରହିଥିଲେ ।

ପରେ ପୋଲିସ ସହାୟତାରେ ଡେପୁଟି କମିଶନର ଅଭିଭାବକ ସଂଘକୁ ଆଲୋଚନା ପାଇଁ ଡକାଇ କେନ୍ଦ୍ରୀୟ ବିଦ୍ୟାଳୟ ୧ ର ଅଭିଭାବକ ସଂଘର ଉପାଧ୍ୟକ୍ଷ ସାମ୍ବାଦିକ ଗିରିଜା ଶଙ୍କର ଦାଶ, ଦାମୋଦର ମଲ୍ଲିକ, ଆଡଭୋକେଟ ଅଶ୍ୱିନୀ ପ୍ରଧାନ, ବ୍ରଜକିଶୋର ପାତ୍ର, ଦୀପକ ମିଶ୍ର, ପ୍ରଭାତି ଦାଶ, ପ୍ରଶାନ୍ତ ସ୍ୱାଇଁଙ୍କ ସମେତ ୯ଜଣଙ୍କ ସହ ଆଲୋଚନା କରିଥିଲେ ।

ଅଭିଭାବକ ସଂଘ ଅଦାଲତରେ ରାୟର ପୁନର୍ବିଚାର ପାଇଁ ଏକ ରିଭ୍ୟୁ ପିଟିସନ ଦାଖଲ କରିବେ ବୋଲି କହିଛନ୍ତି ।

ଓଡିଶା ଡଟ କମ

Leave a Reply

This site uses Akismet to reduce spam. Learn how your comment data is processed.