ରଥଯାତ୍ରାରେ ସୁରକ୍ଷା ବ୍ୟବସ୍ଥା କଡାକଡି ପାଇଁ ନିର୍ଦ୍ଦେଶ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,୭ ଜୁଲାଇ (ଓଡିଶା ଡଟ୍ କମ୍): ଅଗଷ୍ଟ ୧୮ ରେ ହେବାକୁ ଥିବା ରଥଯାତ୍ରାରେ ଯାତ୍ରୀମାନଙ୍କ ସୁରକ୍ଷା ଓ ଟ୍ରାଫିକ ପରିଚାଳନା ବ୍ୟବସ୍ଥାକୁ କଡାକଡି କରିବା ପାଇଁ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ମଙ୍ଗଳବାର ସଚିବାଳୟରେ ଅନୁଷ୍ଠିତ ବୈଠକରେ ନିର୍ଦ୍ଦେଶ ଦେଇଛନ୍ତି।

ବୈଠକରୁ ମିଳିଥିବା ସୂଚନା ଅନୁସାରେ ରଥଯାତ୍ରା ସମୟରେ ପୁରୀରେ ଏକ ଆଧୁନିକ ପୋଲିସ କଣ୍ଟ୍ରୋଲ ରୁମ, ସିସି ଟିଭି ବ୍ୟବସ୍ଥା ଏବଂ ୱାଚ ଟାୱାର ସଂପୂର୍ଣ୍ଣଭାବେ କାର୍ଯ୍ୟକାରୀ ହୋଇସାରିଥିବା ବେଳେ ଯାତ୍ରୀମାନଙ୍କ ଆସବାବପତ୍ର ଚେକିଂ ପାଇଁ ଏକ ଏକ୍ସରେ ଓ ମୋବାଇଲ ସ୍କାନର ମୁତୟନ କରାଯିବ।

ସେହିପରି ସୁରକ୍ଷା ବ୍ୟବସ୍ଥାକୁ ଅନୁଧ୍ୟାନ କରିବା ପାଇଁ ୯ ହଜାର ପୋଲିସ୍ ଫେ।ର୍ସ, ୧୨ ଜଣ କମାଣ୍ଡାଣ୍ଟ, ୩୦ଜଣ ଏଏସପି, ୭୦ଜଣ ଡିଏସପି, ୧୦୨ ଇନ୍ସପେକ୍ଟର ଓ ୭୮୦ ସବ୍ ଇନ୍ସପେକ୍ଟରଙ୍କ ସମେତ ଏସପି ରାଙ୍କର ଅଧିକାରୀମାନେ ରଥଯାତ୍ରା ସମୟରେ ପୁରୀରେ ରହିବେ । ଏତଦ୍ବ୍ୟତୀତ ସହରରେ ୨ ପ୍ଲାଟୁନ ରାପିଡ୍ ଆକ୍ସନ ଫେ।ର୍ସ ମୁତୟନ ରହିବେ ଏବଂ ତଟସୁରକ୍ଷା ପାଇଁ ଜଳସୀମାରେ ୩ଟି ବୋଟ୍ ଦ୍ୱାରା ପାଟ୍ରୋଲିଂ କରାଯିବ।

ଯାତ୍ରୀମାନଙ୍କୁ ନବକଳେବର ଓ ଟ୍ରାଫିକ ସୂଚନା ପ୍ରଦାନ କରିବା ପାଇଁ ପୁରୀରେ ୨୦ଟି ବଡ ଏଲଇଡ଼ି ଟିଭି ସ୍କ୍ରିନର ବ୍ୟବସ୍ଥା କରାଯିବ। ସେହିପରି ସହରର ୨୭ଟି ସ୍ଥାନରେ ପାର୍କିଂ ବ୍ୟବସ୍ଥା କରାଯାଇଥିବାବେଳେ ଏହି ବିଷୟରେ ଯାତ୍ରୀଙ୍କୁ ଅଧିକ ସଚେତନ କରିବା ପାଇଁ ବୁକଲେଟ ବଣ୍ଟାଯିବ ।

ଆଜିର ବୈଠକରେ ମୁଖ୍ୟ ଶାସନ ସଚିବ, ଉନ୍ନୟନ କମିଶନର, ମୁଖ୍ୟମନ୍ତ୍ରୀଙ୍କ ଅତିରିକ୍ତ ମୁଖ୍ୟ ଶାସନ ସଚିବ, ଗୃହ ପ୍ରମୁଖ ସଚିବ, ପୋଲିସ୍ ଡିଜି ଓ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।

ଓଡିଶା ଡଟ୍ କମ୍

Comments

0 comments