ସଭା ସମିତି

ଭୁବନେଶ୍ଵର, ଏପ୍ରିଲ ୨୩ (ଓଡ଼ିଶା ଡଟ କମ) ଉତ୍କଳ ଗୌରବ ମଧୁସୁଦନ ଦାସଙ୍କ ଜୟନ୍ତୀ ଉପଲକ୍ଷେ କେତେକ ଅନୁଷ୍ଠାନ ଦ୍ଵାରା “ମଧୁକଥା ସମାରୋହ” କାର୍ଯ୍ୟକ୍ରମର ଅଂଶବିଶେଷ ଭାବେ ଅପ୍ରେଲ୍ ୨୬ ତାରିଖରେ ୟୁନିଟ୍ ୩ ସ୍ଥିତ ବୁଦ୍ଧ ମନ୍ଦିର ପରିସରରେ ଏକ ବିଦ୍ୟାଳୟସ୍ତରୀୟ ପ୍ରତିଯୋଗିତା ଆୟୋଜନ କରାଯିବ ଯେଉଁଥିରେ ବକୃତା, କୁଇଜ୍, ଚିତ୍ରାଙ୍କନ, ଏକକ ଅଭିନୟ ଇତ୍ୟାଦି ରେ ପିଲାମାନେ ଭାଗ ନେଇପାରିବେ ।

ସନ୍ଧାନ ଓ ଜୟ ଓଡିଶାର ମିଳିତ ପ୍ରୟାସ ଓ ବିଭିନ୍ନ ମାନଙ୍କ ସହଯୋଗରେ ଆୟୋଜିତ ଏହି ତୃତୀୟ ସମାରୋହ ଅପ୍ରେଲ୍ ୨୭ ତାରିଖରେ ସ୍ଥାନୀୟ ଏକାମ୍ର ହାଟ ମୁକ୍ତ ମଂଚରେ ଅନୁଷ୍ଠିତ ହେବ ଓ କୃତି ପ୍ରତିଯୋଗୀ ମାନଂକୁ ସେଠାରେ ପୁରସ୍କୃତ କରାଯିବା ସହିତ ମଧୁ ବାବୁଙ୍କ ରଚିତ କବିତା କୁ ନେଇ ନୃତ୍ୟ , ସଂଗୀତ ଓ ସୁନାମଧନ୍ୟ ଶିଶୁ ମଧୁ ଜୟନ୍ତୀ ଉପଲକ୍ଷେ ସାହିତ୍ୟିକ ଦାସ୍ ବେନୁହୁରଙ୍କ ଦ୍ବାରା ମଧୁ କଥା ପରିବେଷଣ କରାଯିବ ।

ଏହା ସହିତ ମଧୁବାବୁଙ୍କ ସମୟର ସଂଗୃହୀତ ଫଟୋଚିତ୍ର ମଧ୍ୟ ପ୍ରଦର୍ଶିତ ହେବ । ଏହି କାର୍ଯ୍ୟକ୍ରମରେ ବହୁ ବିଶିଷ୍ଟ ବ୍ୟକ୍ତିବିଶେଷ ଯୋଗଦାନ କରିବାର ଯୋଜନା ରହିଥିବା ବେଳେ ବିଭିନ୍ନ ସମାଜିକ ଅନୁଷ୍ଠାନ ଓ ବିଦ୍ୟାଳୟର ଛାତ୍ରଛାତ୍ରୀ ମାନେ ନେ ସାମିଲ୍ ହେବେ ।

ଖରାଦିନର ସଂଧ୍ୟା ଅବକାଶକୁ ଏକାମ୍ର ହାଟରେ ମଧୁକଥା କାର୍ଯ୍ୟକ୍ରମ ମାଧ୍ୟମରେ ଉପଭୋଗ କରିବା ପାଇଂ ସମସ୍ତଂକୁ ସାଦର ନିମନ୍ତ୍ରଣ କରାଯାଇଛି । ପିଲା ମାନଙ୍କ ମଧ୍ୟରେ ମଧୁ ବାବୁ ଙ୍କ ପ୍ରତି ଭଲ ପାଇବା ଓ ତାଙ୍କ ଆଦର୍ଶ ରେ ଅନୁପ୍ରାଣିତ ହୋଇ ଏକ ଭଲ ମଣିଷ ହେବାର ସଂକଳ୍ପ ସୃଷ୍ଟି କରିବା ଲକ୍ଷରେ ଏହି କାର୍ଯ୍ୟକ୍ରମ ଆୟୋଜନ କରା ଯାଉଛି ବୋଲି କାର୍ଯ୍ୟକ୍ରମ ଆୟୋଜକ ସଦସ୍ୟ ସୁଶ୍ରୀ ମନସ୍ଵିନୀ ପରିଡା କହିଛନ୍ତି ।

ମଧୁ ବାବୁଙ୍କ ଜୟନ୍ତୀକୁ ସମଗ୍ର ଓଡିଶା ରେ ସମ୍ମାନର ସହିତ ପାଳନ କରିବା ନିମନ୍ତେ ଅନୁଷ୍ଠାନ ପକ୍ଷରୁ ଅନୁରୋଧ କରାଯାଇଛି । କାର୍ଯ୍ୟକ୍ରମରେ ଭାଗନେବା ନିମନ୍ତେ ବା ବିସ୍ତୃତ ବିବରଣୀ ନିମନ୍ତେ ୯୧୨୪୪୦୨୧୩୦ ନମ୍ବରରେ ଯୋଗାଯୋଗ କରିପାରିବେ ।

ଗୁରୁବାର ଭରତପୁର୍ ସ୍ଥିତ ବୀଣା ଭାରତୀ ବିଦ୍ୟା ମନ୍ଦିର ପରିସରରେ ଛାତ୍ର ଛାତ୍ରୀ ମାନଙ୍କ ସହିତ ବିଦ୍ୟାଳୟ ସ୍ତରୀୟ ମଧୁ ଗଳ୍ପ କାର୍ଯ୍ୟକ୍ରମ ଆୟୋଜନ କରାଯିବା ଅବସରରେ ଗପ ମାଧ୍ୟମରେ ମଧୁ ବାବୁଙ୍କ ଜୀବନରେ ଘଟିଥିବା ବିଭିନ୍ନ ଘଟଣା ଓ ତାଙ୍କର ବୁଦ୍ଧିମତା ବିଷୟରେ ଯୁବ କଥାକାର ରତ୍ନାକର ସାହୁ ଅତି ସାବଲିଳ ଭାବରେ ଉପସ୍ଥାପନା କରିଥିଲେ ।

ପିଲାମାନେ ଏହି ଅଭିନବ ପ୍ରୟାସକୁ ମନଭରି ଉପଭୋଗ କରିଥିଲେ । କାର୍ଯ୍ୟକ୍ରମ ଶେଷରେ ଗପ ସମ୍ପର୍କିତ ପ୍ରଶ୍ନ ପଚରାଯାଇ ପୁରସ୍କୃତ କରାଯାଇଥିଲା ଏବଂ ମଧୁ କଥା ସମାରୋହରେ ଅଂଶ ଗ୍ରହଣ କରିବା ନିମନ୍ତେ ନିମନ୍ତ୍ରଣ ଦିଆଯାଇଥିଲା । ଗତ ଅପ୍ରେଲ୍ ୧୮ ତାରିଖରୁ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ଅପ୍ରେଲ୍ ୨୫ ତାରିଖ ପର୍ଯ୍ୟନ୍ତ ବିଭିନ୍ନ ବିଦ୍ୟାଳୟରେ ଚାଲିବ ବୋଲି ଏହାର ଆୟୋଜକ ମାନେ କହିଛନ୍ତି ।

ଓଡ଼ିଶା ଡଟ କମ

ଭୁବନେଶ୍ୱର, ଏପ୍ରିଲ ୨୩ (ଓଡିଶା ଡଟ କମ) ହଜାରେରୁ ଊର୍ଦ୍ଧ୍ଵ ସ୍ଵେଚ୍ଛାସେବୀ ବୁଧବାର ଖୋର୍ଦ୍ଧା ଓ କେନ୍ଦୁଝର ଜିଲ୍ଲାର କେତେକ ସ୍ଥାନରେ ବିଭିନ୍ନ କାର୍ଯ୍ୟକ୍ରମର ଆୟୋଜନ କରି ପରିବେଶ ସମ୍ପର୍କରେ ସଚେତନତା ସୃଷ୍ଟି କରିଛନ୍ତି ।

ପିପୁଲସ୍ କଲଚରାଲ୍ ସେଣ୍ଟର (ପିକକ୍) ପ୍ରୋତ୍ସାହନରେ ଗଠିତ ଇକୋସେଭରସ ୟୁଥ ନେଟୱର୍କର ଭୁବନେଶ୍ୱର, ବାଲିଅନ୍ତା ଏବଂ କେନ୍ଦୁଝର ଶାଖାର ୧୦୦୦ ରୁ ଉଦ୍ଧ୍ୱର୍ ସଭ୍ୟ ଏବଂ ସଭ୍ୟା ଏକାଠି ହୋଇ ଏସ୍.ଓ.ଏସ୍. ଭିଲେଜ ଖଣ୍ଡଗିରି ଠାରେ ବିଭିନ୍ନ ଗଛ ଲଗାଇବା, ବାଲିଅନ୍ତାର ଏରକଣ୍ଟାଠାରେ ଗାଁ ସଫେଇ, ଗଛଲଗାଇବା, ବର୍ଯ୍ୟବସ୍ତୁକୁ ଉଠାଇ ତାକୁ ଡଷ୍ଟବିନରେ ପକାଇବା ଏବଂ କେନ୍ଦୁଝର ଜିଲ୍ଲାର ସ୍ୱାମପାଟଣା ବ୍ଲକ୍ ର ୧୦ ଟି ରୁ ଊର୍ଦ୍ଧ୍ଵ ଗ୍ରାମରେ ବିଭିନ୍ନ କାର୍ଯ୍ୟକ୍ରମର ଆୟୋଜନ କରିଥିଲେ ।

ଏପ୍ରିଲ ବିଶ୍ୱ ଧରିତ୍ରୀ ଦିବସ ଉପଲକ୍ଷେ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏଥିରେ ଇକୋସେଭ୍ରସ ୟୁଥ ନେଟୱର୍କର ଭୁବନେଶ୍ୱର ଶାଖାର ଏସ୍.ଓ.ଏସ୍. ର ଭିଲେଜର ଜାନଭି ଧଳ, ଦିପାଞ୍ଜଳୀ ମାଝି, ବାଲିଅନ୍ତା ଶାଖାର ଲିପା ପଟ୍ଟନାୟକ, କେନ୍ଦୁଝରର ମାନସ ମହନ୍ତ, ହିମାଂସୁ ମହନ୍ତ ଓ ଟିକି ମହନ୍ତ ଆଦି ଅଶଂଗ୍ରହଣ କରି ଥିଲେ ।

ସେମାନେ କହିଥିଲେ ପୃଥିବୀକୁ ସୁରକ୍ଷା ଦେବାକୁ ହେଲେ ନିଜେ ଛୋଟ ଛୋଟ ଅନେକ ପଦକ୍ଷେପ ନେବାକୁ ପଡିବ ଯଥା ଗଛ ଲଗାଇବା, ବର୍ଜ୍ୟବସ୍ତୁ କମାଇବା, ଜୈବ ପଦାର୍ଥ ବ୍ୟବହାର କରିବା ଓ ପ୍ରୟୋଗ କରିବା, ବିଦ୍ୟୁତ କମ ବ୍ୟବହାର କରିବା, ପ୍ଲାଷ୍ଟିକ ବ୍ୟବହାର କମ କରିବା ।

ମାଟି ଓ ପାଣି ଦୂଷିତ ନକରିବା, ପାର୍କ, ରାସ୍ତା ଇତ୍ୟାଦି ସ୍ଥାନରୁ ବର୍ଯ୍ୟବସ୍ତୁକୁ ଉଠାଇ ତାକୁ ଡଷ୍ଟବିନରେ ପକାଇବା, ଗାଡିର କମ ବ୍ୟବହାର କରିବା ଇତ୍ୟାଦି ଅନେକ ପଦକ୍ଷେପ ଆମେ ନେଇପାରିବା ସେମାନେ କହିଥିଲେ । ଶେଷରେ ଭାଗ ନେଇଥିବା ସମସ୍ତ ସଭ୍ୟ ଓ ସଭ୍ୟା ମାନେ ପ୍ରକୃତି ବନ୍ଧୁ ହେବା ପାଇଁ ଶପଥ ନେଇଥିଲେ ।

ଓଡିଶା ଡଟ କମ

ଭୁବନେଶ୍ଵର, ଏପ୍ରିଲ ୧୮ (ଓଡିଶା ଡଟ କମ) ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କ ଦ୍ଵାରା ଚବିଶ ଘଣ୍ଟିଆ ନ୍ୟୁଜ୍ ଟେଲିଭିଜନ ଚ୍ୟାନେଲ୍ କଳିଙ୍ଗ ଟିଭି ର ଉଦଘାଟନ ହୋଇଯାଇଛି ,ଯାହାର ଟ୍ୟାଗ୍ ଲାଇନ୍ ରହିଛି ” କଳିଙ୍ଗ ଟିଭି ‘କହେ ଠିକ ..ଦେଖାଏ ଠିକ..’ ।

ବିଶିଷ୍ଟ ସ୍ଵେଚ୍ଛାସେବୀ ତଥା କିଟ ଓ କିସ ସ୍ଥାପନ କରି ଦେଶ ବିଦେଶରେ ନିଜର ସ୍ଵତନ୍ତ୍ର ପରିଚୟ ସ୍ତୃଷ୍ଟି କରିଥିବା ଅଚ୍ୟୁତ ସାମନ୍ତଙ୍କ ଏହା ଆଉ ଏକ ନୂଆ ପ୍ରକଳ୍ପ ।

ଚ୍ୟାନେଲର ଲୋକାର୍ପଣ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ “ଓଡିଶାରେ ଗଣ ମାଧ୍ୟମର ବ୍ୟାପକ ବିକାଶ ଘଟିଛି । ବହୁ ସଂଖ୍ୟ।ରେ ଖବର କାଗଜ ଓ ଟିଭି ଚ୍ୟାନେଲ୍ର ରାଜ୍ୟରେ ପ୍ରସାରିତ ହେଉଥିବା ଏହା ପ୍ରମାଣିତ କରୁଛି । ଗଣମାଧ୍ୟମ ଯୋଗୁ ଦେଶବାସୀଙ୍କ ନିକଟରେ ସରକାର ସେବା ପହଞ୍ଚାଇ ପାରୁଛନ୍ତି । ଗଣମାଧ୍ୟମର ପ୍ରସାର ଗଣତନ୍ତ୍ର ପାଇଁ ଆବଶ୍ୟକ ।

ସେ କଳିଙ୍ଗ ଟିଭି ର ସଫଳତା କାମନା କରିଥିଲେ ଓ କହିଥିଲେ ଏହି ଚ୍ୟାନେଲ ରାଜ୍ୟର କଳା ସଂସ୍କୃତି ଓ ଲୋକଙ୍କ ସମସ୍ୟା ଏବଂ ବିକାଶମୂଳକ କାମପ୍ରତି ପ୍ରାଧାନ୍ୟ ଦେଇ ତାର ଦାୟିତ୍ୱ ନିଶ୍ଚିତ ପୂରଣ କରିବ ।

ଏଥିରେ ସମ୍ମାନୀୟ ଅତିଥି ଭାବେ ସ୍ଵାସ୍ଥ୍ୟ ଓ ପରିବାର କଲ୍ୟାଣ ଏବଂ ସୂଚନା ଲୋକସମ୍ପର୍କ ବିଭାଗ ମନ୍ତ୍ରୀ ଅତନୁ ସବ୍ୟସାଚୀ ନାୟକ ଯୋଗଦେଇ ଚ୍ୟାନେଲ ର ୱେବସାଇଟ୍ କୁ ଉଦଘାଟନ କରିଥିଲେ। ନିଜର ଅଭିଭାଷଣରେ କହିଥିଲେ ଯେ ,ତାଙ୍କର ଏହି ଚ୍ୟାନେଲ ଲୋକଙ୍କ ନିକଟରେ ନିର୍ଭୁଲ ଓ ନିରପେକ୍ଷ ଖବର ପହଞ୍ଚାଇବ ।

ଭୁବନେଶ୍ଵର ଏମପି ପ୍ରସନ୍ନ କୁମାର ପାଟ୍ଟଶାଣୀ ନିଜ ବକ୍ତବ୍ୟ ରେ କହିଥିଲେ,’କଳିଙ୍ଗ ନାମରେ ଓ ଜଗନ୍ନାଥଙ୍କ ନବକଳେବର ବର୍ଷ ରେ ଏହା ଆରମ୍ଭ ହୋଇଥିବାରୁ ଏହାକେବେ ବିଫଳ ହେବ ନାହି, ନିଶ୍ଚିତ ସଫଳତା ହାସଲ କରିବା ଯିବ ଓ ସଭିଙ୍କ ପ୍ରିୟ ହୋଇପାରିବ।

ଅନ୍ୟତମ ଅତିଥି ଭାବେ ଯୋଗଦେଇ ଭୁବନେଶ୍ଵର ଉତ୍ତର ବିଧାୟକ ପ୍ରିୟଦର୍ଶୀ ମିଶ୍ର, ତାଙ୍କ ବକ୍ତବ୍ୟ ରେ କହିଥିଲେ ଗଣମାଧ୍ୟମ ହେଉଛି ଗଣତନ୍ତ୍ର ର ଏକ ସୁଦୃଢ ସ୍ତମ୍ଭ । ଅଚ୍ୟୁତ ସାମନ୍ତ ଜଣେ ଦୂରଦ୍ରଷ୍ଠା ବ୍ୟକ୍ତି ଅଟନ୍ତି, ତେଣୁ ତାଙ୍କର ଏହି କଳିଙ୍ଗ ଟିଭି ନିଶ୍ଚିତ ଲୋକ ପ୍ରିୟ ହେବ।

କଳିଙ୍ଗ ଟିଭିର ପ୍ରତିଷ୍ଠାତା ଅଚ୍ୟୁତ ସାମନ୍ତ, ନିଜର ଅଭିଭାଷଣରେ କହିଥିଲେ ଯେ ,ତାଙ୍କର ଏହି ଚ୍ୟାନେଲ ଲୋକଙ୍କ ନିକଟରେ ସକାରାତ୍ମକ ନିର୍ଭୁଲ ଓ ନିରପେକ୍ଷ ଖବର ପହଞ୍ଚାଇବ । କଳିଙ୍ଗ ଟିଭିର ପରିଚାଳନା ନିର୍ଦେଶକ ହିମାଂଶୁ ଶେଖର ଖଟୁଆ ଶେଷରେ ଧନ୍ୟବାଦ ଅର୍ପଣ କରିଥିଲେ ।

ଓଡିଶା ଡଟ କମ

ଖୋର୍ଦ୍ଧା, ଏପ୍ରିଲ ୧୬ ( ଓଡିଶା ଡଟ କମ) ଖୋର୍ଦ୍ଧା ଜିଲ୍ଲାର ଜରିପୁଟ ତନ୍ତମୁଣ୍ଡିଆସ୍ଥିତ ସଙ୍କଟ ମୋଚନ ମହାବୀର ଦେବଙ୍କ ପଞ୍ଚବିଂଶତମ ବାର୍ଷିକୋତ୍ସବ ଉପଲକ୍ଷେ ରଜତ ଜୟନ୍ତୀ ସମାରୋହର ଶ୍ରୀରାମ ଚରିତ ମାନସ ନବାହ୍ନ ପାରାୟଣ ତଥା ପ୍ରବଚନ ମହାଯଜ୍ଞ କାର୍ଯ୍ୟକ୍ରମ ନିଖିଳ ଉତ୍କଳ ମଠମନ୍ଦିରାଧିଶ ସେବାସଂଘର ସଭାପତି ସ୍ୱାମୀ ଡକ୍ଟର ଅରୂପାନନ୍ଦଙ୍କ ଅଧ୍ୟକ୍ଷତାରେ ବୁଧବାର ଉଦଘାଟିତ ହୋଇଯାଇଛି ।

ମଳିପଡା ବଡ ମଠ ମହନ୍ତ ସ୍ୱାମୀ ଅନନ୍ତ ନାରାୟଣ ଦେବାଚାର୍ଯ୍ୟ ଏହି କାର୍ଯ୍ୟକ୍ରମକୁ ଆନୁଷ୍ଠାନିକ ଭାବରେ ଉଦଘାଟନ କରିବା ସମୟରେ ଶୁଭଲକ୍ଷ୍ମୀ ରାଉତରାୟ ଆବାହନୀ ସଙ୍ଗୀତ ସହିତ ଗୀତାପାଠ କରିଥିଲେ ।

ଶ୍ରୀ ଶ୍ରୀ ସଙ୍କଟ ମୋଚନ ମହାବୀର ସେବାସଂଘର ସଭାପତି ତାଙ୍କ ସ୍ୱାଗତ ଭାଷଣରେ ଏହି ରୌପ୍ୟ ଜୟନ୍ତୀ କାର୍ଯ୍ୟକ୍ରମରେ ଜରିପୁଟ ସମେତ ପାଖ ପଡୋଶୀ ଗ୍ରାମବାସୀ ତଥା ପ୍ରଶାସନିକ ସ୍ତରରେ ସମସ୍ତଙ୍କର ସମ୍ପୂର୍ଣ୍ଣ ସହଯୋଗ ରହିଛି ବୋଲି କହିଥିଲେ ।

୨୦୧୩ ମସିହାଠାରୁ ଏହି ପ୍ରସିଦ୍ଧ ପୀଠକୁ ଓଡିଶା ସରକାର ଏକ ପର୍ଯ୍ୟଟନ କେନ୍ଦ୍ର ରୂପେ ସରକାରୀ ମାନ୍ୟତା ଦେଇଥିବାରୁ ରାଜ୍ୟ ସରକାରଙ୍କୁ ସେ ସାଧୁବାଦ ଜଣାଇଥିଲେ ।

ଅନୁଷ୍ଠାନର ସଂପାଦକ ଦୟାନିଧି ରାଉତରାୟ ତାଙ୍କ ସଂପାଦକୀୟ ବେଦବାଣୀ ପାଠ କରି କହିଲେ ୧୯୯୧ ମସିହାରେ ଭୁବନେଶ୍ୱର ଚିତ୍ରକୂଟ ମଠ ମହନ୍ତ ସ୍ୱର୍ଗତଃ ହରିଚରଣ ଦାସ ମହାରାଜ ଓ କଣାସ ମଠ ମହନ୍ତ ବିଶ୍ୱମ୍ବର ଦାସ ମହାରାଜଙ୍କ ସକ୍ରିୟ ସହଯୋଗରେ ଏହି ଅନୁଷ୍ଠାନ ଏକ କଳ୍ପବୃକ୍ଷ ସଦୃଶ ନିଜର କଳେବର ବୃଦ୍ଧି କରି ଆଜି ଏକ ବିଶାଳ ବୃକ୍ଷରେ ପରିଣତ ହୋଇ ପାରିଛି ।

ଆଗାମୀ ଦିନରେ ଏହି ପୀଠରେ ଏକ ଭବ୍ୟ ଶ୍ରୀରାମ ମନ୍ଦିର ନିର୍ମାଣ କରିବା ପାଇଁ ସେ ଉପସ୍ଥିତ ସମସ୍ତ ଅତିଥି ଏବଂ ଶୁଭେଚ୍ଛୁ ମାନଙ୍କର ସହଯୋଗ କାମନା କରିଥିଲେ ।

ଏହି ଅବସରରେ ସ୍ଥାନୀୟ ବିଧାୟକ ରାଜେନ୍ଦ୍ର କୁମାର ସାହୁ ମୁଖ୍ୟ ଅତିଥି ଭାବରେ ଯୋଗଦେଇ ଅନୁଷ୍ଠାନର ମୁଖପତ୍ର ‘ଶ୍ରୀରାମ’, ଏକ ଭଜନ ସିଡି ‘ଭକ୍ତି ଅର୍ଘ୍ୟ’ ଏବଂ ଅନୁଷ୍ଠାନର ୱେବସାଇଟ ‘ଜରିପୁଟ୍ହନୁମାନ୍ ଡଟ୍ କମ୍’ କୁ ଉନ୍ମୋଚନ କରିଥିଲେ ।

ଅଞ୍ଜନା ତନୟା ରାଉତରାୟଙ୍କ ସଂଯୋଜନାରେ ଅନୁଷ୍ଠାନର ପୂର୍ବତନ ସଭାପତି ଲକ୍ଷ୍ମୀଧର କରଙ୍କୁ ମୁଖ୍ୟ ଅତିଥି ‘ମହାବୀର ସମ୍ମାନ -୨୦୧୫’ ପ୍ରଦାନ କରି ସମ୍ବର୍ଦ୍ଧିତ କରିଥିଲେ ।

ମୁଖ୍ୟବକ୍ତା ଭାବରେ ଓଡିଶା ବ୍ୟବସାୟୀ ମହାସଂଘର ରାଜ୍ୟ ସମ୍ପାଦକ ସୁଧାକର ପଣ୍ଡା ଯୋଗଦେଇ କଳୁଷିତ ସମାଜରେ ଏକ ସୁସ୍ଥ ଆଧ୍ୟାତ୍ମିକବାଦୀ ସମାଜ ଗଠନ କରିବା ଉଦେ୍ଧଶ୍ୟରେ ଏହି ଅନୁଷ୍ଠାନ ତରଫରୁ ହେଉଥିବା ଶ୍ରୀରାମ ଚରିତ ମାନସ, ପ୍ରବଚନ, ଯଜ୍ଞାଦି କାର୍ଯ୍ୟକ୍ରମ ସର୍ବାଗ୍ରେ ପ୍ରଶଂସନୀୟ ବୋଲି କହିଥିଲେ ।

ସମ୍ମାନୀତ ଅତିଥି ଭାବରେ ଖୋର୍ଦ୍ଧା ଓକିଲ ସଙ୍ଘର ସଭାପତି ଶକ୍ତି ଶଙ୍କର ମିଶ୍ର କହିଲେ ଏହି ପ୍ରାଚୀନ ପୀଠର ସର୍ବାଙ୍ଗୀନ ଉନ୍ନତି ଉଦେ୍ଧଶ୍ୟରେ ସରକାରଙ୍କ ସହଯୋଗ ପାଇଁ ସମସ୍ତ ପ୍ରକାର ଚେଷ୍ଟା ଜାରୀ ରହିବ ।

ଦୀର୍ଘ ଦଶ ଦିନ ବ୍ୟାପି ହେବାକୁ ଥିବା ଏହି ରଜତ ଜୟନ୍ତୀ କାର୍ଯ୍ୟକ୍ରମର ମୂଖ୍ୟ ସଂଯୋଜକ ଭାବରେ ମହନ୍ତ ବିଶ୍ଵମ୍ବର ଦାସ ମହାରାଜ, ସହଯୋଗୀ ଭାବରେ ମହାମଣ୍ଡଳେଶ୍ୱର ମହନ୍ତ ସୁଦର୍ଶନ ଦାସ ମହାରାଜ, ପୁ୍ର୍ଣଚନ୍ଦ୍ର ଦାସ ମହାରାଜ ଓ ରଘୁନାଥ ଦାସ ମହାରାଜ, ଆଚାର୍ଯ୍ୟ ଭାବରେ ପଣ୍ଡିତ ସଚ୍ଚିଦାନନ୍ଦ ଖାଡଙ୍ଗା ଏବଂ ପୁରୋଧା ଭାବରେ ଅବକାଶ କର ରହିଛନ୍ତି ବୋଲି ଅନୁଷ୍ଠାନର କାର୍ଯ୍ୟକାରୀ ସଭ୍ୟ ଶିକ୍ଷାବିତ୍ ଡଃ ଧିରେନ୍ଦ୍ର ନନ୍ଦ କହିଛନ୍ତି ।

ଏହି କାର୍ଯ୍ୟକ୍ରମରେ ସାଧୁସନ୍ଥ ଓ ଭକ୍ତମାନଙ୍କ ସହଯୋଗରେ ପ୍ରତ୍ୟେହ ଅଖଣ୍ଡ ହନୁମାନ ଚାଳିଶା ପାଠ, ମହାମନ୍ତ୍ର, ନାମ ସଂକୀର୍ତ୍ତନ ଓ ଭାଗବତ ପାଠ ସହିତ ସିଂହାର ଆଳତି, ବ୍ୟାସ ଓ ଧାରକ ମଣ୍ଡଳୀଙ୍କ ଦ୍ୱାରା ଶ୍ରୀରାମ ଚରିତ ମାନସ ପାଠ, ସୂର୍ଯ୍ୟପୂଜା, ଯଜ୍ଞଶାଳା ପୂଜା ଓ ମାନସ ଯଜ୍ଞ, ଯଜ୍ଞାହୂତି, ସଂଧ୍ୟା ଆଳତୀ, ଭଜନ ପରିବେଷଣ, ପ୍ରବଚନ ଏବଂ ଶେଷରେ ଶୟନ ଆଳତି ଅନୁଷ୍ଠିତ ହେବ ।

ନିର୍ମଳ ଚନ୍ଦ୍ର ଦାଶଙ୍କ ସଂଯୋଜନାରେ ପ୍ରତ୍ୟେହ ସଂଧ୍ୟା ୮ ଘଟିକାରୁ ହେବାକୁ ଥିବା ପ୍ରବବନ କାର୍ଯ୍ୟକ୍ରମରେ ବରେଣ୍ୟ ବକ୍ତା ଭାବରେ ମହନ୍ତ ସଦାନନ୍ଦ ଦାସ ମହାରାଜ, ସନ୍ଥ ଗୌତମ ଦାସ, କୌଳାସ ଚନ୍ଦ୍ର୍ର ପଣ୍ଡା, ନବୀନଜୀ, ଡଃ ପ୍ରଫୁଲ୍ଲ କୁମାର ମିଶ୍ର, କୃପାସିନ୍ଧୁ ମିଶ୍ର, କୌଳାସ ଚନ୍ଦ୍ର ତ୍ରିପାଠୀ, ଇଂ ମୃତ୍ୟୁଞ୍ଜୟ ଚୌଧୁରୀ, ଗୁରୁ ପ୍ରସାଦ ମହାପାତ୍ର ପ୍ରମୁଖ ସେମାନଙ୍କର ଆଶୀର୍ବଚନ ରଖିବା ପାଇଁ ସଦୟ ସମ୍ମତି ପ୍ରଦାନ କରିଛନ୍ତି ବୋଲି ଡଃ ନନ୍ଦ ଜଣାଇଛନ୍ତି ।

ଏହି ଉଦଘାଟନି ଦିବସରେ ସକାଳ ସମୟରେ ହନୁମାନ ଚାଳିଶା ପାଠ, ଅଙ୍କୁରାରୋପଣ କାର୍ଯ୍ୟକ୍ରମ ହୋଇଥିବାବେଳେ ଅପରାହ୍ନରେ ଜଳଯାତ୍ରା ବିଧାନ ଓ କଳସ ଶୋଭାଯାତ୍ରା ସହିତ ଶୁଭାଧିବାସ, ଘଟ ସ୍ଥାପନ, ଧ୍ୱଜ ଉତ୍ତୋଳନ ଓ ମାଲ୍ୟାର୍ପଣ ଆଦି କାର୍ଯ୍ୟକ୍ରମ କରାଯାଇଥିଲା ।

ଏହି ଅବସରରେ ଅନୁଷ୍ଠାନର ସାଂସ୍କୃତିକ ପରିଷଦର କଳାକାରମାନଙ୍କ ଦ୍ୱାରା ‘ମାନସ ଭଞ୍ଜନ’ ନାଟକ ସହିତ ବିଭିନ୍ନ ଭଜନ ନୃତ୍ୟ ଓ ସଙ୍ଗୀତ ପରିବେଷଣ କରାଯାଇଥିଲା ।

ଓଡିଶା ଡଟ କମ

ଖୋର୍ଦ୍ଧା ଏପ୍ରିଲ ୧୫ (ଓଡିଶା ଡଟ କମ) ସ୍ଥାନୀୟ ଗୀତା ଭବନ ପରିସରରେ ଓଡିଆ ନବବର୍ଷ ଉପଲକ୍ଷେ ବିଷୁବ ମିଳନ ସମାରୋହ ଖୋର୍ଦ୍ଧା ସାହିତ୍ୟ ସଂସଦ ତରଫରୁ ସଂସଦର ସଭାପତି ଶିକ୍ଷାବିତ୍ ବୈକୁଣ୍ଠନାଥ ରାଜଗୁରୁଙ୍କ ଅଧ୍ୟକ୍ଷତାରେ ମଙ୍ଗଳବାର ଅନୁଷ୍ଠିତ ହୋଇଯାଇଛି ।

ସଂସଦର ଉପସଭାପତି ଡକ୍ଟର ନିରଞ୍ଜନ ମହାନ୍ତିଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସଂସଦର ସମ୍ପାଦକ ଲକ୍ଷ୍ମୀଧର ବଡଜେନା ତାଙ୍କ ସ୍ୱାଗତ ଭାଷଣରେ କହିଲେ ଓଡିଶାର ଓଡିଆ ଭାଷା ଆଜି ଶାସ୍ତ୍ରୀୟ ମାନ୍ୟତା ପାଇଥିବାରୁ ଆମେ ଗର୍ବିତ ।

କିନ୍ତୁ ଓଡିଶାର ସଂସ୍କୃତି ଓ ପରମ୍ପରା ସହିତ ଜଡିତ ଓଡିଆ ନବବର୍ଷକୁ ସରକାରୀ ସ୍ତରରେ ମଧ୍ୟ ପାଳିତ ହେବା ପାଇଁ ଓଡିଶା ସରକାର ଯତ୍ନବାନ ହେବା ଦରକାର । ଏହି ଉଦ୍ଦେଶ୍ୟରେ ଏକ ପ୍ରସ୍ତାବ ରାଜ୍ୟ ସରକାରଙ୍କୁ ଦେବା ପାଇଁ ସେ ସମସ୍ତଙ୍କୁ ସେ ଆହ୍ୱାନ ଦେଇଥିଲେ ।

ସ୍ଥାନୀୟ ବିବେକାନନ୍ଦ ଇନଷ୍ଟିଚ୍ୟୁଟ ଅଫ୍ ଆଡଭାନସ ଏଜୁକେସନାଲ୍ ରିସର୍ଚ୍ଚ ଆଣ୍ଡ୍ ଟେକ୍ନୋଲୋଜିର ଅଧ୍ୟକ୍ଷ ତଥା ସ୍ୱଦେଶୀ ଜାଗରଣ ମଞ୍ଚର ପ୍ରାନ୍ତ ବିଚାର ପ୍ରମୁଖ ଶିକ୍ଷାବିତ୍ ଡକ୍ଟର ଧୀରେନ୍ଦ୍ର ନନ୍ଦ ଯୋଗଦେଇ କହିଲେ ମହାନ୍ ଉତ୍କଳୀୟ ସଂସ୍କୃତି ଅନୁସାରେ ମହାବିଷୁବ ସଂକ୍ରାନ୍ତିକୁ ସମଗ୍ର ଓଡିଶାର ପୁରପଲ୍ଲିରେ ଓଡିଆ ନବବର୍ଷ ଭାବରେ ପାଳନ କରାଯାଏ ।

ଏହି ଦିନ ପତ୍ୟେକ ଓଡିଆ ପଣା ପାନ କରିବାର ପରମ୍ପରା ଥିବାରୁ ଏହାକୁ ପଣା ସଂକ୍ରାନ୍ତି ମଧ୍ୟ କୁହାଯାଇଥାଏ । ଏହି ନବବର୍ଷକୁ ସ୍ୱାଗତ ଜଣାଇବା ପାଇଁ ରାଜ୍ୟର ବିଭିନ୍ନ ସ୍ଥାନରେ ଦଣ୍ଡନାଚ ଅନୁଷ୍ଠିତ ହୋଇଥାଏ । ଏହା ହେଉଛି ଆମ ସଂସ୍କୃତିକୁ ବାନ୍ଧି ରଖିବା ପାଇଁ ଏକ ବଳିଷ୍ଠ ମାଧ୍ୟମ ।

ସଂସଦର ଅନ୍ୟତମ ଉପସଭାପତି ଡଃ ବୃନ୍ଦାବନ ପଣ୍ଡା କହିଲେ ଓଡିଆ ଭାଷା ଓ ସଂସ୍କୃତି ପ୍ରତି ଖୋର୍ଦ୍ଧାର ଅବଦାନ ଅତୁଳନୀୟ । ସେଥିପାଇଁ ଆମେ ସମସ୍ତେ ଗର୍ବ ଅନୁଭବ କରିବା ଉଚିତ୍ । ସମ୍ମାନିତ ଅତିଥି ଭାବରେ ବରିଷ୍ଠ ଆଇନଜୀବି ବିଧାନ ଚନ୍ଦ୍ର ମହାନ୍ତି ଯୋଗଦେଇ ଦୀର୍ଘ ୩୦ ବର୍ଷ ଧରି ଖୋର୍ଦ୍ଧା ସାହିତ୍ୟ ସଂସଦ ସାହିତ୍ୟ କ୍ଷେତ୍ରରେ ସାରା ଓଡିଶାରେ ତାର ଚମତ୍କାରିତ ପ୍ରଦର୍ଶିତ କରିପାରିଥିବାରୁ ଅନୁଷ୍ଠାନର ସମସ୍ତ କର୍ମକର୍ତ୍ତାଙ୍କୁ ସେ ସାଧୁବାଦ ଜଣାଇଥିଲେ ।

ଅନ୍ୟମାନଙ୍କ ମଧ୍ୟରେ ବରୁଣେଇ ସାହିତ୍ୟ ସଂସଦର ସମ୍ପାଦକ ପ୍ରହଲ୍ଲାଦ ଦାସ, କୋଣାର୍କ ସାହିତ୍ୟ ସଂସଦର ସଂପାଦକ ନାରାୟଣ ଦାସ, ପଲ୍ଲିଶ୍ରୀ ସାହିତ୍ୟ ସଂସଦର ସଂପାଦକ ଡକ୍ଟର କୈଳାସ ଚନ୍ଦ୍ର ମହାରଣା, ମା ମଙ୍ଗଳା ସାହିତ୍ୟ ସଂସଦର ସଂପାଦକ ନୀଳାଦ୍ରିନାଥ ଜଗଦେବ, ମାସିକ ପତ୍ରିକା ଆମରି ସତ୍ୟର ପ୍ରତିଷ୍ଠାତା ଡକ୍ଟର ପ୍ରମୋଦ ଚନ୍ଦ୍ର ଦାଶ, ସାହିତି୍ୟକ ଗୋପାଳକୃଷ୍ଣ ଦାସ, ଉତ୍କଳ ସମ୍ମିଳନୀର ଜିଲ୍ଲା ସମ୍ପାଦକ ବିଚିତ୍ର ବଡଜେନା, ଶିକ୍ଷାବିତ୍ ପ୍ରଫୁଲ୍ଲ କୁମାର ସାମନ୍ତରାୟ, ଡକ୍ଟର ଚପଳା ପଣ୍ଡା, ରାଜ କିଶୋର କେଇ, ଲକ୍ଷ୍ମୀ ପ୍ରସାଦ ସାହୁ, ଲକ୍ଷ୍ମୀନାରାୟଣ ରଣସିଂହ, ସୁଶାନ୍ତ କୁମାର ସାହୁ, ସୁଧାକର ବାରିକ ପ୍ରମୁଖ ଉପସ୍ଥିତ ରହି ବିଷୁବ ମିଳନର ମହତ୍ୱ ଏବଂ
ଓଡିଆ ନବବର୍ଷର ଗୁରୁତ୍ୱ ଉପରେ ସେମାନଙ୍କର ବକ୍ତବ୍ୟ ରଖିଥିଲେ ।

ଓଡିଶା ଡଟ କମ

ଭୁବନେଶ୍ୱର, ଏପ୍ରିଲ ୧୫ (ଓଡିଶା ଡଟ କମ) ବୁଧବାର କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ ଭୁବନେଶ୍ୱରର ଲୋୟର ପି.ଏମ.ଜି. ଠାରେ ମହାନ ସ୍ୱାଧୀନତା ସଂଗ୍ରାମୀ ତଥା ସମ୍ଭିଧାନ ପ୍ରଣେତା ଭାରତରତ୍ନ ଡ଼ଃ. ବାବା ସାହେବଙ୍କ ୧୨୪ ତମ ଜନ୍ମଜୟନ୍ତୀରେ ମୁଖ୍ୟ ଅତିଥି ରୂପେ ଯୋଗଦେଇ ତାଙ୍କ ଆଦର୍ଶରେ ଅନୁପ୍ରାଣିତ ହେବା ପାଇଁ ଆହ୍ଵାନ ଦେଇଛନ୍ତି ।

ନିଜ ଉଦବୋଧନରେ ଓରାମ କହିଲେ ଯେ ଡ଼ଃ. ଆମ୍ବେଦକରଜୀ ଜଣେ ଅନନ୍ୟ ରାଜନୀତିଜ୍ଞ ଓ ସମାଜ ସୁଧାରକ ଥିଲେ । ଭାରତର ଏହି ମହାନ ବରପୁତ୍ରଙ୍କର ସାମୁହୀକ ବିକାଶର ମନ୍ତ୍ର ଆଜି ମଧ୍ୟ ସାରା ବିଶ୍ୱରେ ଏକ ଆଲୋକର କିରଣ ରୂପେ କାର୍ଯ୍ୟ କରୁଛି ।

ଆଜିର ଦିନରେ ବାବା ସାହେବଙ୍କର ମାନବିକତା, ଶାନ୍ତି ଓ ଭାତୃଭାବର ଆଦର୍ଶରେ ଅନୁପ୍ରାଣିତ ହେବା ପାଇଁ ସମସ୍ତେ ପ୍ରତିଶୃତିବଦ୍ଧ ହେବା ଉଚିତ ବୋଲି ଓରାମ କହିଥିଲେ ।

ରାଷ୍ଟ୍ରୀୟ ଦଳିତ ମହାସଭା ଦ୍ୱାରା ଆୟୋଜିତ ଏହି ଜନ୍ମଜୟନ୍ତୀରେ ସଭାରେ ରାଜ୍ୟସଭା ସାଂସଦ ବୈଷ୍ଣବ ପରିଡ଼ା,ବିଧାୟକ କୃଷ୍ଣଚନ୍ଦ୍ର ସାଗରିଆ, ଅଶୋକ ଭାରତୀ, ଅଶୋକ ମଲ୍ଲିକ, ବସନ୍ତ କର ଏବଂ ସୁକାନ୍ତ ବେହେରା ପ୍ରମୁଖ ଉପସ୍ଥିତ ଥିଲେ ।

ପରେ କେନ୍ଦ୍ରମନ୍ତ୍ରୀ ଶ୍ରୀ ଓରାମ କଟକ ଜିଲ୍ଲା ଓଲଟପୁର ଠାରେ ଥିବା ସ୍ୱାମୀ ବିବେକାନନ୍ଦ ନ୍ୟାସନାଲ ଇନଷ୍ଟିଚ୍ୟୁଟ ଅଫ ରିହାବିଲିଟେସନ୍ ଟ୍ରେନିଂ ଆଣ୍ଡ ରିସର୍ଚ୍ଚର ୧୯ତମ ବାର୍ଷିକ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇଥିଲେ ।

ଛାତ୍ର ସଂସଦର ସଭାପତି ଅଂଶୁମାନ ମହାନ୍ତିଙ୍କ ଅଧ୍ୟକ୍ଷତାରେ ଆୟୋଜିତ ଏହି ଉତ୍ସବରେ ସ୍ଥାନୀୟ ବିଧାୟକ ଡ଼ଃ.ପ୍ରମୋଦ ମଲ୍ଲିକ, ସ୍ୱାମୀ ବିବେକାନନ୍ଦ ନ୍ୟାସନାଲ ଇନଷ୍ଟିଚ୍ୟୁଟ ଅଫ ରିହାବିଲିଟେସନ୍ ଟ୍ରେନିଂ ଆଣ୍ଡ ରିସର୍ଚ୍ଚ ଡ଼ାଇରେକ୍ଟରଙ୍କ ସମେତ ଅନ୍ୟାନ୍ୟ ପଦାଧିକାରୀ ପ୍ରମୁଖ ଯୋଗଦେଇଥିଲେ ।

ଓରାମଙ୍କ ଯିବା ବାଟରେ କଟକ ଜିଲ୍ଲା ବିଜେପି ତରଫରୁ କଂଟାପଡ଼ା ଠାରେ ତାଙ୍କୁ ଭବ୍ୟ ସମ୍ବର୍ନ୍ଧନା ମଧ୍ୟ ଦିଆଯାଇଥିଲା । ଏଥିରେ ସ୍ଥାନୀୟ ବିଜେପି ନେତା ସୁଶାନ୍ତ ମଲ୍ଲିକ, ଲଲାଟେନ୍ଦୁ ବଡ଼ୁ, ରବି ନାରାୟଣ ମହାପାତ୍ର, ନମିତା ମିଶ୍ର ଏବଂ ପ୍ରଭାତ ମହାପାତ୍ରଙ୍କ ସମେତ ଶତାଧିକ ବିଜେପି କର୍ମୀ ଉପସ୍ଥିତ ଥିଲେ ।

ପରେ ସଂଧ୍ୟାରେ ଓରାମ ଭୁବନେଶ୍ୱରର ଚନ୍ଦକା ଶିଳ୍ପାଂଚଳସ୍ଥ ପ୍ରଶାନ୍ତି ବିହାର ସରସ୍ୱତୀ ଶିଶୁ ମନ୍ଦିରର ବାର୍ଷିକ ଉତ୍ସବରେ ଯୋଗଦେଇ ଆଜିର ଶିକ୍ଷା ବ୍ୟବସ୍ଥାରେ ଶିକ୍ଷାବିକାଶ ସମିତି ଦ୍ୱାରା ପରିଚାଳିତ ଶିଶୁ ମନ୍ଦିରର ବ୍ୟବସ୍ଥା ଓ ଭୂମିକା ସମ୍ପର୍କରେ ବିଶଦ୍ ଭାବେ ବର୍ଣ୍ଣନା କରିଥିଲେ ।

ଏଥିରେ ବିଜେପି ନେତା ଗୋଲକ ମହାପାତ୍ର, ଅଭୟ କୁମାର ସାମନ୍ତରାୟ, ଶିଶୁ ବିଦ୍ୟା ମନ୍ଦିର ପରିଚାଳନା କମିଟିର ଅଧ୍ୟକ୍ଷ ଏବଂ ସମ୍ପାଦକ, ଶିଶୁ ବିଦ୍ୟାମନ୍ଦିରର ପ୍ରଧାନ ଆଚାର୍ଯ୍ୟ ପ୍ରମୁଖ ଉପସ୍ଥିତ ଥିଲେ ।

ଓଡିଶା ଡଟ କମ

ଭୁବନେଶ୍ୱର, ଏପ୍ରିଲ ୧୪ (ଓଡିଶା ଡଟ କମ) ରାଜ୍ୟର ବିଭିନ୍ନ ସ୍ଥାନରେ ମଙ୍ଗଳବାର ସମ୍ବିଧାନର ପ୍ରଣେତା ଭାରତରତ୍ନ ଡକ୍ଟର ଭୀମରାଓ ରାମଜୀ ଆମ୍ବେଦକରଙ୍କ ଜନ୍ମ ଦିବସ ବିଭିନ୍ନ ସଂଗଠନ ପାଳନ କରିଛନ୍ତି ।

ରାଷ୍ଟ୍ରୀୟ ସ୍ୱୟଂସେବକ ସଂଘ, ଭୁବନେଶ୍ୱର ମହାନଗର ସଂଗଠନର କର୍ମକର୍ତ୍ତାମାନେ ଏକ ପଟୁଆରରେ ଆସି ଏଜି ଛକରେ ଥିବା ବାବାସାହେବଙ୍କ ମୂର୍ତ୍ତି ନିକଟରେ ପହଁଚିଥିଲେ ।

ସେଠାରେ ଥିବା ଆମ୍ବେଦକରଙ୍କ ପ୍ରତିମୂର୍ତ୍ତୀରେ ପଶ୍ଚିମବଙ୍ଗ ଓ ଓଡିଶା ପୂର୍ବକ୍ଷେତ୍ରର ସମାଜସେବୀ ଗୋପାଳ ପ୍ରସାଦ ମହାପାତ୍ର ମୁଖ୍ୟ ଅତିଥିରୂପେ ଯୋଗ ଦେଇ ପୁଷ୍ପମାଲ୍ୟ ଅର୍ପଣ କରିଥିଲେ ।

ଏହାପରେ ଅନ୍ୟମାନଙ୍କ ମଧ୍ୟରେ ସଂଘର ପୁରୀ ବିଭାଗ ସଂଘଚାଳକ ବୈକୁଣ୍ଠନାଥ ସାହୁ,ବିଭାଗ ପ୍ରଚାରକ ସୃଷ୍ଟିଧର ବିଶ୍ୱାଳ,ବ୍ୟବସ୍ଥା ପ୍ରମୁଖ ଉମାକାନ୍ତ ଗିରି,ପ୍ରସନ୍ନ ସେନାପତି,ଘନଶ୍ୟାମ ମହାପାତ୍ର, ଜୟକୃଷ୍ଣ ପୃଷ୍ଟି,ଦେବୀ ପ୍ରସାଦ ମହାପାତ୍ର,ନୀଳମଣି ମହାପାତ୍ର,ରାଜ୍ୟ ମିଡିଆସେଲ କାର୍ଯ୍ୟାଳୟ ସଂପାଦକ ଗୋଲଖ ଚନ୍ଦ୍ର ଦାସ ପ୍ରମୁଖ ଯୋଗଦେଇ ପୁଷ୍ପମାଲ୍ୟ ଅର୍ପଣ କରିଥିଲେ ।

ଏହି ଅବସରରେ ମୁଖ୍ୟ ଅତିଥି ମହାପାତ୍ର କହିଲେ ବିଶ୍ୱ ଇତିହାସରେ ଭାରତରତ୍ନ ଡକ୍ଟର ଭୀମରାଓ ରାମଜୀ (ବି.ଆର) ଆମ୍ବେଦକର ଏକ ବିରଳ ବ୍ୟକ୍ତିତ୍ୱ ।

ଭାରତ ସମ୍ବିଧାନର ମୁଖ୍ୟ ନିର୍ମାତା ଥିଲେ ସେ । ଅଛୁଆଁ, ପଛୁଆ ଓ ଅନଗ୍ରସର ଜାତିଙ୍କର ଉତ୍ଥାନ ପାଇଁ ନିଃସ୍ୱାର୍ଥପର ସମାଜ ସଂସ୍କାରକ ବାବାସାହେବଙ୍କ ଦାନ ଅସୀମ । ସାରାଜୀବନ ସେ ଅନୁନ୍ନତଙ୍କ ଉନ୍ନତି ପାଇଁ ଲଢ଼ିଛନ୍ତି ।

କୋଟିକୋଟି ଜନସାଧାରଣଙ୍କ ମନମନ୍ଦିରରେ ସେ ପୂଜା ପାଉଛନ୍ତି । ଜଣେ ବିଚକ୍ଷଣ ବିଦ୍ୱାନ, ଆଇନ ବିଶାରଦ, ବୁଦ୍ଧିଜୀବୀ, ସମାଜ ସଂସ୍କାରକ ଓ ରାଷ୍ଟ୍ରନୀତିଜ୍ଞ ଭାବରେ ସେ ସ୍ୱଦେଶ ତଥା ବିଦେଶରେ ବାରମ୍ବାର ସମ୍ବର୍ଦ୍ଧିତ ହୋଇଥିଲେ ।

ଜଣେ ପ୍ରଜ୍ଞାଶୀଳ, ବହୁପାଠୀ, ମାନବବାଦୀ ଦାର୍ଶନିକ ଭାବେ ମଧ୍ୟ ସେ ପରିଚିତ । ବିଂଶ ଶତାବ୍ଦୀର ଭାରତୀୟ ଜନନାୟକଙ୍କ ମଧ୍ୟରେ ଆମ୍ବେଦକର ବିଭିନ୍ନ ଦୃଷ୍ଟିକୋଣରୁ ଏକ ଅଦ୍ୱିତୀୟ, ପ୍ରାତଃ ସ୍ମରଣୀୟ, ଅସାଧାରଣ ପ୍ରଜ୍ଞା ପୁରୁଷ ।

ଭାରତର ଘୃଣ୍ୟ “ଜାତିପ୍ରଥା’ ବିଲୋପ ସଂଗ୍ରାମରେ ସେ ଥିଲେ ଜଣେ ମହାଯୋଦ୍ଧା । ଭାରତର ସମାଜ ଇତିହାସରେ ସେ ଜଣେ ଯୋଗଜନ୍ମା ସମାଜ ସଂସ୍କାରକ ଥିଲେ । ତାଙ୍କ ଜନ୍ମଦିବସରେ ଦେଶବାସୀ ତାଙ୍କ ଆଦର୍ଶରେ ଅନୁପ୍ରାଣିତ ହେଲେ ତାହା ତାଙ୍କପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ ବୋଲି ମହାପାତ୍ର ମତବ୍ୟକ୍ତ କରିଥିଲେ ।

ଓଡିଶା ଡଟ କମ