କେନ୍ଦ୍ରୀୟ ଉଦ୍ୟୋଗ ଯୋଗୁଁ ରାଜ୍ୟ ରାଜକୋଷ ସମୃଦ୍ଧ

ଭୁବନେଶ୍ୱର, ନଭେମ୍ବର ୧୨(ଓଡ଼ିଶା ଡ଼ଟ୍ କମ୍) ରାଜ୍ୟରେ ବିଭିନ୍ନ କର ବାବଦରେ ଯେତିକି ଟିକସ ସଂଗୃହୀତ ହେଉଛି ଏହାର ଅଧିକାଂଶ ଟିକସ ଆଠଟି କେନ୍ଦ୍ରୀୟ ଉଦ୍ୟୋଗରୁ ମିଳୁଥିବା ଏକ ସମୀକ୍ଷା ବୈଠକରୁ ଜଣାପଡ଼ିଛି ।

ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରୁ ଜଣାପଡ଼ିଛି ଯେ ଅଧିକ କର ଦେଉଥିବା ଦଶଟି ପ୍ରମୁଖ ସଂସ୍ଥା ମଧ୍ୟରେ ଆଠଟି କେନ୍ଦ୍ରୀୟ ଉଦ୍ୟୋଗ ଓ ଦୁଇଟି ରାଜ୍ୟ ସରକାରଙ୍କ ଉଦ୍ୟୋଗ ।

ସେହି ପ୍ରମୁଖ କେନ୍ଦ୍ରୀୟ ଉଦ୍ୟୋଗ ଗୁଡ଼ିକ ହେଲା ଇଣ୍ଡିଆନ ଅଏଲ, ଭାରତ ପେଟ୍ରୋଲିୟମ, ଏପିସିଏଲ୍, ଏମ୍ସିଏଲ୍, ରାଉରକେଲା ଷ୍ଟିଲ ପ୍ଲାଣ୍ଟ, ଏମ୍ସିଏଲ୍(ଝାରସୁଗୁଡ଼ା) ଏବଂ ଟାଟା ମୋଟର୍ସ । ରାଜ୍ୟ ସରକାରୀ ଉଦ୍ୟୋଗଦୁଇଟି ହେଲା ଓଡ଼ିଶା ଖଣି ନିଗମ ଏବଂ ଓଡ଼ିଶା ସିମେଣ୍ଟ ଲିମିଟେଡ଼୍ ।

ସୂଚନାଯୋଗ୍ୟ ଯେ, ଚଳିତ ୨୦୧୦-୧୧ ଆର୍ଥିକ ବର୍ଷ ପାଇଁ ୭ ହଜାର ୬୫୫ କୋଟି ଟଙ୍କାର ଟିକସ ସଂଗ୍ରହ ନିମନ୍ତେ ଲକ୍ଷ ଧାର୍ଯ୍ୟ କରାଯାଇଛି । ତନ୍ମଧ୍ୟରେ ବିକ୍ରୀକର ବାବଦରେ ୬ ହଜାର ୬ କୋଟି ଟଙ୍କା, ପ୍ରବେଶକର ବାବରେ ନଅ ଶହ କୋଟି ଟଙ୍କା ଏବଂ ବୃତ୍ତିକର ବାବଦରେ ୧୫୦ କୋଟି ଟଙ୍କା ଅର୍ନ୍ତଭୁକ୍ତ ।

ଏହି ଲକ୍ଷ୍ୟଧାର୍ଯ୍ୟ ପରିମାଣର ୪୯.୬୯ ପ୍ରତିଶତ ଇତିମଧ୍ୟରେ ଆଦାୟ ହୋଇଛି ।

ଓଡିଶା ଡଟ୍ କମ୍