ବନ୍ୟା ପ୍ରଭାବିତଙ୍କୁ ଜରୁରୀ ସହାୟତା ପ୍ରଦାନ ପାଇଁ ନିର୍ଦ୍ଦେଶ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ଵର,୨୨ ଜୁନ (ଓଡିଶା ଡଟ୍ କମ୍): ମାଲକାନଗିରି ଓ ନବରଙ୍ଗପୁର ଜିଲ୍ଲାର ବନ୍ୟା ପ୍ରପୀଡିତଙ୍କୁ ତୁରନ୍ତ ଜରୁରୀ ସହାୟତା ପ୍ରଦାନ କରିବାକୁ ମୁଖ୍ୟମନ୍ତ୍ରୀ ଏକ ଭିଡିଓ କନଫରେନସିଂ ମାଧ୍ୟମରେ ସମ୍ପୃକ୍ତ ଜିଲ୍ଲାପାଳ ମାନଙ୍କୁ ସୋମବାର ନିର୍ଦ୍ଦେଶ ଦେଇଛନ୍ତି ।

ଭିଡିଓ କନଫରେନସିଂରେ ଭାଗ ନେଇ ମାଲକାନଗିରି ଜିଲ୍ଲାପାଳ ଜିଲ୍ଲାର ବନ୍ୟା ଉପରେ ସୂଚନା ଦେଇ କହିଥିଲେ ଯେ ଯଦିଓ ବର୍ଷାର ପ୍ରକୋପ ଧୀରେ ଧୀରେ କମିବାରେ ଲାଗିଛି ରିଲିଫ କ୍ୟାମ୍ପରେ ପ୍ରାୟ ୬୦୦ଜଣ ଲୋକ ଏବେ ବି ରହିଛନ୍ତି ଓ ତାଙ୍କୁ ଚୁଡା, ଗୁଡ, ଡାଲି ଆଦି ରିଲିଫ ସାମଗ୍ରୀ ପ୍ରଦାନ କରାଯାଇଛି ।

ଜିଲ୍ଲାରେ ଦୁଇଟି ଓଆରଡ଼ିଏଏଫ ଟିମକୁ ନିୟୋଜିତ କରାଯାଇଛି। ଏବଂ ମାଲକାନଗିରି ଓ କାଲିମେଳା ମଧ୍ୟରେ ଯୋଗାଯୋଗ ପାଣି ଯୋଗୁଁ ବିଚ୍ଛିନ୍ନ ହୋଇଥିବାବେଳେ ନବରଙ୍ଗପୁରରେ ଇନ୍ଦ୍ରାବତୀ ଓ ଭସ୍କେଲ ନଦୀର ଜଳସ୍ତର ବିପଦ ସଂକେତ ତଳେ ରହିଛି ଏବଂ ଯୋଗାଯୋଗରେ ବିଚ୍ଛିନ୍ନ ହୋଇନାହିଁ ।

ସେହିପରି ୪୨୩ଟି ଘର ଭାଙ୍ଗିଛି ଏବଂ ଅନ୍ୟାନ୍ୟ କ୍ଷୟକ୍ଷତିର ଆକଳନ କରାଯାଉଥିବା ଜିଲ୍ଲାପାଳ ସୂଚନା ଦେଇଛନ୍ତି ।

ତେବେ ପାଣି କମିବା ପରେ କ୍ଷତିଗ୍ରସ୍ତ ରାସ୍ତା ଗୁଡିକର ତୁରନ୍ତ ମରାମତି କରାଇବା ସହ କ୍ଷୟକ୍ଷତିର ଆକଳନ କରି ପ୍ରପୀଡିତ ମାନଙ୍କୁ ସହାୟତା ପ୍ରଦାନ କରିବା ଉପରେ ଗୁରୁତ୍ଵ ଆରୋପ କରିବା ପାଇଁ ମୁଖ୍ୟମନ୍ତ୍ରୀ କହିଛନ୍ତି।

ମୁଖ୍ୟ ଶାସନ ସଚିବ ଶ୍ରୀ ଗୋକୁଳ ଚଦ୍ର ପତି, ଉନ୍ନୟନ କମିଶନର, ସ୍ଵତନ୍ତ୍ର ରିଲିଫ କମିଶନର ଶ୍ରୀ ଜି.ଭି.ଭି ଶର୍ମା ଓ ଜଳ ସମ୍ପଦ ପ୍ରମୁଖ ସଚିବ ଶ୍ରୀ ପି.କେ. ଜେନା ଏବଂ ଅନ୍ୟ ବରିଷ୍ଠ ଅଧିକାରୀ ମାନେ ଏହି ସମୟରେ ଉପସ୍ଥିତ ଥିଲେ।

ଏଠାରେ ଉଲ୍ଲେଖ ଯୋଗ୍ୟ ଯେ ଗତ ତିନିଟି ଦିନ ଧରି ଲଗାଣ ବର୍ଷା ଯୋଗୁଁ ମାଲକାନାଗିରି ଜିଲ୍ଲାରେ ବନ୍ୟା ପରିସ୍ଥିତି ସୃଷ୍ଟି ହେବ ସହ ସହରରୁ କେତେକ ଅଞ୍ଚଳକୁ  ଯୋଗାଯୋଗ ବିଚ୍ଛିନ୍ନ ଘଟିଛି ।

ବିଶେଷ କରି ବନ୍ୟା ଯୋଗୁଁ ଜିଲ୍ଲାର କାଲିମେଳା, ପୋଟେରୁ, କାଙ୍ଗୁରୁକୋଣ୍ଡା, ତମସା, ତର୍ଲାକୋଟି ଆଦି ଅଞ୍ଚଳ ପ୍ରଭାବିତ ହୋଇଛି । ଏହି ଅଞ୍ଚଳଗୁଡିକର ରାସ୍ତା ଉପର ଦେଇ ପାଣି ଚାଲୁଛି । ଜନସାଧାରଣ ନାହିଁନଥିବା ଅସୁବିଧାର ସମ୍ମୁଖୀନ ହେବାସହ ଗମନାଗମନ ବ୍ୟବସ୍ଥା ଏକ ପ୍ରକାର ଠପ ହୋଇଯାଇଛି।

ଓଡିଶା ଡଟ୍ କମ୍