ଅର୍ଥ-ବ୍ୟବସାୟ

ଓଡିଶା ଡଟକମ

ଭୁବନେଶ୍ୱର,ଫେବୃଆରି ୬(ଓଡିଶା ଡଟକମ )- ଗୋବିନ୍ଦପୁର ଓ ଢିଙ୍କିଆଠାରେ ପସ୍କୋ ପାଇଁ ପୁଲିସ ଜରିଆରେ ବଳପୂର୍ବକ ଜମି ଅଧିଗ୍ରହଣକୁ ବିରୋଧ କରି ଆନ୍ଦୋଳନକରୁଥିବା ଛାତ୍ରଛାତ୍ରୀ ଓ ମହିଳାଙ୍କ ଉପରେ ପୋଲିସର ବର୍ବର ଆକ୍ରମଣକୁ ଛାତ୍ର ସଂଗଠନ ଅଲ୍ ଇଣ୍ଡିଆ ଡି.ଏସ୍.ଓର ପ୍ରତିନିଧି ଦଳ ତୀବ୍ର ନିନ୍ଦା କରିଛନ୍ତି ।

ଅଲ୍ ଇଣ୍ଡିଆ ଡେମୋକ୍ରାଟିକ୍ ଷ୍ଟୁଡେଣ୍ଟ ଅର୍ଗାନାଇଜେସନ୍ (ଅଲ୍ ଇଣ୍ଡିଆ ଡି.ଏସ୍.ଓ)ର ରାଜ୍ୟ ସଭାପତି ଅକ୍ଷୟ ଦାସ, ସଭାପତି ସୁବାସ ନାୟକ, ସମ୍ପାଦକ ଶିବାଶିଷ ପ୍ରହରାଜ, ସମ୍ପାଦକମଣ୍ଡଳୀ ସଦସ୍ୟ କେଦାରନାଥ ସାହୁ ଓ ସିଦ୍ଧାର୍ଥ ରଥ ପ୍ରମୁଖ ଏକ ପ୍ରତିନିଧି ଦଳରେ ଗୋବିନ୍ଦ ପୁର ଓ ଡିଙ୍କିଆ ସୀମାରେ ଚାଲିଥିବା ଆନ୍ଦୋଳନ ସ୍ଥଳକୁ ଯାଇ ବଳ ପୂର୍ବକ ଜମି ଅଧିଗ୍ରହଣ ବିରୋଧୀ ଆନ୍ଦୋଳନକୁ ସଂଗଠନ ପକ୍ଷରୁ ସମର୍ଥନ ଜଣାଇଥିଲେ ।

ପୋସ୍କୋ ବିରୋଧୀ ଆନ୍ଦୋଳନକୁ ଦମନ କରିବା ପାଇଁ ଶହ ଶହ ସଶସ୍ତ୍ର ପୁଲିସ ଫ୍ଲାଗ ମାର୍ଚ୍ଚ କରି ସନ୍ତ୍ରାସ ସୃଷ୍ଟି କରିବା ସହ ଘର ଘର ବୁଲି ଲୋକମାନଙ୍କୁ ଧମକ ଦେଉଛି ଓ ମହିଳାମାନଙ୍କୁ ଦୁର୍ବ୍ୟବହାର କରୁଛି ।

ଲୋକମାନେ ସ୍ୱେଚ୍ଛାରେ ଜମି ଦେଉଛନ୍ତି ବୋଲି ସରକାର ପ୍ରତାରଣାମୂଳକ ପ୍ରଚାର କରି ଚାଲିଥିବା ବେଳେ ଅତ୍ୟନ୍ତ ଅମାନବିକ ଓ ଅନ୍ୟାୟଭାବେ ପୋଲିସ ରାତି ଅଧିଆ ବା ବଡି ଭୋରରୁ ଆନ୍ଦୋଳନକାରୀମାନଙ୍କ ପାନ ବରଜ ଭାଙ୍ଗି ଚାଲିଛି ବୋଲି ଡି.ଏସ୍.ଓ କହିଛନ୍ତି ।

ଗଣମାଧ୍ୟମ ସମ୍ମୁଖରେ ଛାତ୍ରଛାତ୍ରୀ ଓ ମହିଳାମାନଙ୍କୁ ପୋଲିସ ଏବଂ ପଦାଧିକାରୀମାନେ ଯେଭଳି ଅତ୍ୟାଚାର କରିଛନ୍ତି, ଜନଗଣଙ୍କ ଉପରେ କିଭଳି ଆକ୍ରମଣ ହେଉଥିବ ତାହା ସେଥିରୁ ସହଜରେ ଅନୁମାନ କରାଯାଇପାରେ ।

ଏଣୁ ଏହି ଘଟଣାକୁ ଅଲ୍ ଇଣ୍ଡିଆ ଡି.ଏସ୍.ଓ ପକ୍ଷରୁ ତୀବ୍ର ନିନ୍ଦା କରାଯିବା ସହ ପ୍ରସ୍ତାବିତ ପୋସ୍କୋ ଅଞ୍ଚଳରୁ ତୁରନ୍ତ ପୋଲିସ ହଟାଇବା ଓ ବଳ ପ୍ରୟୋଗ କରି ଜବରଦସ୍ତି ଜମି ଅଧିଗ୍ରହଣ ବନ୍ଦ କରିବାକୁ ସରକାରଙ୍କ ନିକଟରେ ଦାବି କରାଯାଇଛି ଏବଂ ଏହା ବ୍ୟତିରେକ ଦୁର୍ବାର ଆନ୍ଦୋଳନ ସଂଗଠିତ କରାଯିବ ବୋଲି ଚେତାବନୀ ଦିଆଯାଇଛି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

କୁଜଙ୍ଗ, ଜାନୁଆରୀ ୩୦(ଓଡିଶା ଡଟ୍ କମ୍)-ପ୍ରସ୍ତାବିତ ପୋସ୍କ ପ୍ରକଳ୍ପର ଗୋବିନ୍ଦପୁର ବଟବେଲାରି ଠାରେ ପୋସ୍କ ବିରୋଧୀଙ୍କ ଧାରଣା ଅବ୍ୟାହତ ରହିଥିବାବେଳେ ମଙ୍ଗଳବାର ଦିନ ଚାରୋଟି ରାଜନୈତିକ ଦଳର ପ୍ରତିନିଧିମାନେ ଯୋଗଦେଇ ଧାରଣାକାରୀଙ୍କୁ ଉଦ୍ଦବୋଧନ ଦେଇଥିଲେ ।

ନୂଆଗାଁସ୍ଥିତ ପୋସ୍କୋ ଅସ୍ଥାୟୀ କାର୍ଯ୍ୟାଳୟରେ ଗତକାଲି ପ୍ରଶାସନ ପକ୍ଷରୁ କ୍ଷତିପୂରଣ ଚେକ୍ ବଣ୍ଟନ ପରେ ଆଜି ବିରୋଧୀମାନେ ତତ୍ପର ହୋଇଯାଇଛନ୍ତି । ବଟବେଲାରି ବାଲିଟିକିରାଠାରେ ଅଭୟ ସାହୁଙ୍କ ନେତୃତ୍ୱରେ ଶତାଧିକ ପୋସ୍କୋ ବିରୋଧୀ ମଙ୍ଗଳବାରଦିନ ଧାରଣାରେ ବସିଥିଲେ ।

ଏହି ଧାରଣାରେ ବହୁ ଛାତ୍ରଛାତ୍ରୀ ଉପସ୍ଥିତ ଥିବାବେଳେ ତିର୍ତ୍ତୋଲ ଶିକ୍ଷାଜିଲ୍ଲା ଅଧିକାରୀ ଓ ଜଗତସିଂହପୁର ପ୍ରକଳ୍ପ ସଂଯୋଜକ ନିର୍ମଳ ଦାସ ଘଟଣାସ୍ଥଳକୁ ଯାଇ ପିଲାଙ୍କୁ ବିଦ୍ୟାଳୟ ଫେରିଆସିବା ପାଇଁ ଅନୁରୋଧ କରିଥିଲେ ।

ରାଜ୍ୟର ପ୍ରମୁଖ ୪ଟି ରାଜନୈତିକ ଦଳ ସେମାନଙ୍କ ସହ ସାମିଲ ହୋଇଛନ୍ତି । ସିପିଆଇ ରାଜ୍ୟ ସଂପାଦକ ଦିବାକର ନାୟକ ଏଥିରେ ଯୋଗଦେଇ ସରକାର ବଳ ପ୍ରୟୋଗକରି ଜୋରଜବରଦସ୍ତ ଜମି ଅଧିଗ୍ରହଣ କଲେ ହଜାର ହଜାର କର୍ମୀ ଓ ନେତୃବୃନ୍ଦ ଧାରଣାସ୍ଥଳରେ ବସି ସରକାରଙ୍କୁ ଉଚିତ୍ ଜବାବ ଦେବେ ବୋଲି କହିଥିଲେ ।

ବାଣିଜ୍ୟ ମନ୍ତ୍ରୀ ଆନନ୍ଦ ଶର୍ମା ଓ ଦକ୍ଷିଣକୋରିଆରେ ପୋସ୍କୋ ଅଧିକାରୀଙ୍କ ଉଦ୍ଦବେଗ ସତ୍ୱେ ଏବଂ ଗ୍ରାମସଭାରେ ଜମି ଅଧିଗ୍ରହଣକୁ ସ୍ଥାନୀୟ ଲୋକେ ପ୍ରତ୍ୟାଖ୍ୟାନ କରିଥିବାବେଳେ ରାଜ୍ୟ ସରକାର କେଉଁ ଅଧିକାରରେ ଜୁଲମ କରି ପୁଲିସର ଭୟ ଦେଖାଉଛନ୍ତି ବୋଲି ପ୍ରଶ୍ନ କରିଥିଲେ ।

ଅନ୍ୟମାନଙ୍କ ମଧ୍ୟରେ ସମାଜବାଦୀ ପାର୍ଟିର ରାଜ୍ୟ ସଭାପତି ରବି ବେହେରା, ଫରୱାର୍ଡ ବ୍ଲକର ସନ୍ତୋଷ ମିତ୍ର, ସି.ପି.ଏମ୍ ର ସୁରେଶ ପାଣିଗ୍ରାହୀ ପ୍ରମୁଖ ପୋସ୍କୋ ଓ ପ୍ରଶାସନ ବିରୋଧରେ ବର୍ଷିଥିଲେ । ରାଷ୍ଟ୍ରୀୟ ଜନତା ଦଳର ନେତା ହରିଶ୍ ମହାପାତ୍ର ଯୋଗଦେଇନପାରି ତାଙ୍କର ଲିଖିତ ବାର୍ତା ପଠାଇଥିଲେ ।

ଓଡିଶା ଡଟ୍କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଜାନୁଆରୀ ୨୪(ଓଡିଶା ଡଟ୍ କମ୍ )- ଆନିମେସନ, ଭିଡ଼ିଓ ଗେମ୍ ଓ ଇଣ୍ଡଷ୍ଟ୍ରିଆଲ ଡିଜାଇନ୍ କ୍ଷେତ୍ରରେ କ୍ୟାରିଅର ଗଢ଼ିବାକୁ ଇଛା କରୁଥିବା ଭାରତର ଛାତ୍ରଛାତ୍ରୀମାନଙ୍କ ପାଇଁ ଏକ ସୁଖବର ।

ସେମାନେ ଏବେ ପୁନେ ଠାରେ ଭାରତର ଡିଏସ୍କେ ଗ୍ରୁପ୍ ଓ ଫ୍ରାନ୍ସର ଏକ ଅଗ୍ରଣୀ ସଂସ୍ଥା ସୁପଇନ୍ଫୋକମ୍ ଦ୍ୱାରାମିଳିତ ଭାବେ ପ୍ରତିଷ୍ଠା କରାଯାଇଥିବା ଏକ ପ୍ରତିଷ୍ଠାନରେ ଉପରୋକ୍ତ ବିଷୟରେ ଉନ୍ନତମାନର ଶିକ୍ଷା ଓ ପ୍ରଶିକ୍ଷଣ ପାଇପାରିବେ ।

‘ସୁପଇନ୍ଫୋକମ୍’ ଏସବୁ କ୍ଷେତ୍ରରେ ଶିକ୍ଷାଦାନ ଓ ପ୍ରଶିକ୍ଷଣ ପ୍ରଦାନ ପାଇଁ ଯଥେଷ୍ଟ ସୁନାମ ଅର୍ଜନ କରିଛି । ଏହି ଦୁୃଷ୍ଟିରୁ ଡିଏସ୍କେ ଗ୍ରୁପ୍ ଫ୍ରାନ୍ସର ଉକ୍ତ କମ୍ପାନୀ ସହିତ ଏକ ସ୍ୱାକ୍ଷର କରିଛି । ଉଭୟ କମ୍ପାନୀଙ୍କ ମଧ୍ୟରେ ସହବନ୍ଧନ ପ୍ରଶିକ୍ଷଣ ପାଇଁ ଆଉ ବିଦେଶୀ ରାଷ୍ଟ୍ରକୁ ନଯାଇ ନିଜ ଦେଶରେ ହିଁ ତତ୍ ସମ୍ବନ୍ଧୀୟ ସୁବିଧାସୁଯୋଗ ପାଇପାରିବେ ।

ପୁନେରେ ୨୦ ଏକର ପରିମିତ ଅଞ୍ଚଳରେ ଡିଏସ୍କେ ସୁପଇନ୍ଫୋକମ୍ ଇଣ୍ଟରନ୍ୟାସନାଲ କ୍ୟାମ୍ପସ ପ୍ରତିଷ୍ଠା କରାଯାଇଛି । ଏଠାରେ ଆନ୍ତର୍ଜାତିକ ସ୍ତରର ସଂରଚନା ନିର୍ମାଣ କରାଯାଇଥିବାବେଳେ ଅତ୍ୟନ୍ତ ଉନ୍ନତମାନର ଶିକ୍ଷାଦାନ ପ୍ରଣାଳୀ ଅନୁସରଣ କରାଯାଉଛି । ଏଠାରେ ଛାତ୍ରମାନଙ୍କ ପାଇଁ ହଷ୍ଟେଲ ସୁବିଧା ମଧ୍ୟ ଉପଲବ୍ଧ ଅଛି ।

ଆସନ୍ତା ଶିକ୍ଷାବର୍ଷ ପାଇଁ ଏହି ପ୍ରତିଷ୍ଠାନରେ ନାମଲେଖା ଆରମ୍ଭ ହୋଇଛି । ଏଠାରେ ଉପଲବ୍ଧ ହେଉଥିବା ବିଭିନ୍ନ ପ୍ରକାର କୋର୍ସ ମଧ୍ୟରୁ ଛାତ୍ରମାନେ ନିଜ ଆବଶ୍ୟକତା ଅନୁଯାୟୀ ଯେକୌଣସିଟିକୁ ଚୟନ କରିପାରିବେ ।

ଯୁକ୍ତଦୁଇ ପାସ୍ କରିଥିବା ଛାତ୍ରମାନେ ଉପରୋକ୍ତ ତିନୋଟି ବିଷୟରେ ବର୍ଷିକିଆ ଫାଉଣ୍ଡେସନ କୋର୍ସ କରିପାରିବେ । ସେମାନେ ମଧ୍ୟ ଏହି ବିଷୟଗୁଡ଼ିକରେ ତିନି ବର୍ଷିଆ ଡିଗ୍ରୀ ଅଥବା ଡିପ୍ଲୋମା କୋର୍ସରେ ଅଧ୍ୟୟନ କରିପାରିବେ । ଏହାଛଡ଼ା ସେମାନେ ଏହି ବିଷୟଗୁଡ଼ିକରେ ଚାରିବର୍ଷିଆ ଆଡ୍ଭାନ୍ସଡ ଡିଗ୍ରୀ ଅଥବା ଡିପ୍ଲୋମା ନଚେତ୍ ପାଞ୍ଚବର୍ଷିଆ ଫୁଲଟାଇମ୍ କୋର୍ସ ମଧ୍ୟ କରିପାରିବେ ।

ପ୍ରତିଷ୍ଠାନ କର୍ତ୍ତୃପକ୍ଷ ଏହାର ସଫଳତାରକୁ ନେଇ ଉତ୍ସାହିତ ହୋଇପଡ଼ିଛନ୍ତି । ଖୁବ୍ କମ୍ ଦିନରେ ଏହାକୁ ବିଭିନ୍ନ କ୍ଷେତ୍ରରୁ ମାନ୍ୟତା ଓ ପୁରସ୍କାର ମିଳିଛି । ଗତବର୍ଷ ଟ୍ରାନ୍ସପୋର୍ଟେସନ ଓ ମୋବିଲିଟି ଓ କ୍ଷୁଦ୍ର କାର ନିର୍ମାଣ ଆଦି ଅନେକଗୁଡ଼ିଏ କ୍ଷେତ୍ରରେ ଉନ୍ନତମାନର ଡିଜାଇନ୍ ପାଇଁ ପୁରସ୍କୃତ ହୋଇଛି ।

ପ୍ରତିଷ୍ଠାନର ସଫଳତା ଉପରେ ମନ୍ତବ୍ୟ ଦେଇ ଡିଏସ୍କେ ଗ୍ରୁପ୍ର ଚେୟାରମ୍ୟାନ ଓ ଏମ୍ଡି, ଡିଏସ୍ କୁଲ୍କର୍ଣ୍ଣି କହିଛନ୍ତି ଯେ ଏହା ଉପରୋକ୍ତ ବିଷୟ ଗୁଡ଼ିକର ଉନ୍ନତ ମାନବ ସମ୍ବଳ ପ୍ରସ୍ତୁତ କରିବାରେ ପ୍ରମୁଖ ଭୂମିକା ସଂପାଦନ କରୁଛି ।

ଏହି ପ୍ରତିଷ୍ଠାନରେ ଅଧ୍ୟୟନ ଶେଷ କରିଥିବା ଛାତ୍ରଛାତ୍ରୀମାନେ ନିଜେ ମଧ୍ୟ ଜଣେ ଜଣେ ସଫଳ ଉଦ୍ୟୋଗୀ ହୋଇପାରିବେ ବୋଲି ସେ ଆଶାବ୍ୟକ୍ତ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଜଗତସିଂପୁର, ଜାନୁଆରୀ ୨୦(ଓଡିଶା ଡଟ୍ କମ୍)-ଜଣେ ଠିକାଦାରଙ୍କ ସନ୍ଦେହଜନକ ମୃତ୍ୟୁକୁ ନେଇ ପାରାଦ୍ୱୀପ ତୈଳ ବିଶୋଧନାଗାରରେ ଶନିବାର ଦିନ ଲଙ୍କାକାଣ୍ଡ ଘଟିଛି  । ଘଟଣାକୁ ନେଇ ଆଇଓସିଏଲରେ କାର୍ଯ୍ୟ ବନ୍ଦ ହୋଇଯାଇଛି  ।

କୁଜଙ୍ଗ ବ୍ଲକ ତ୍ରିଲୋଚନପୁର ଗାଁର ସଂଜୟ ପାଳ ଆଇଓସିଏଲ୍ ପ୍ରକଳ୍ପର ଆଇଓଟେପ୍ ଇନଫ୍ରା କମ୍ପାନୀରେ ଠିକାକାମ କରୁଥିଲେ । ରାତିରେ କାର୍ଯ୍ୟ ଚାଲୁଥିବାରୁ ସେ ଗତକାଲି ରାତିରେ ଘରକୁ ନଫେରି କମ୍ପାନୀ ପରିସରରେ ରହିଯାଇଥିଲେ ।

ଶନିବାର ସକାଳେ ଶ୍ରମିକମାନେ କାମ କରିବାକୁ କମ୍ପାନୀ ଭିତରକୁ ଯିବାବେଳେ ସଞ୍ଜୟଙ୍କ ମୃତଦେହ ଝୁଲନ୍ତା ଅବସ୍ଥାରେ ୯ନଂ. ଟାଙ୍କି ସିଡିିରେ ଝୁଲୁଥିବା ଦେଖିବାକୁ ମିଳିଥିଲା । ସଞ୍ଜୟଙ୍କ ମୃତ୍ୟୁ ଖବର ବିଦ୍ୟୁତ ବେଗର ପ୍ରଚାର ହୋଇଯାଇଥିଲା ।

ଖବରପାଇ ନିକଟସ୍ଥ ତ୍ରିଲୋଚନପୁର ଗାଁର ହଜାର ହଜାର ମହିଳା ଓ ପୁରୁଷ ଆଇଓସିଏଲ୍ ଫାଟକ ନିକଟରେ ପହଞ୍ଚିଥିଲେ । ଶ୍ରମିକମାନେ ମଧ୍ୟ ଫାଟକ ନିକଟରେ ଏକତ୍ର ହୋଇଥିଲେ ।

ଲୋକେ ସଞ୍ଜୟଙ୍କ ମୃତଦେହ ଦେଖିବାକୁ ଚାହିଁଥିଲେ ମଧ୍ୟ ସିଆଇଏସଏଫ ଯବାନ ସେମାନଙ୍କୁ କମ୍ପାନୀ ଭିତରକୁ ଛାଡିନଥିଲେ । ଏହାକୁ ନେଇ ସ୍ଥାନୀୟ ଲୋକ ଓ ଶ୍ରମିକଙ୍କ ସହ ସିଆଇଏସଏଫ୍ ଯବାନଙ୍କ ପାଟିତୁଣ୍ଡ ହୋଇଥିଲା ।

ଉତ୍ୟକ୍ତ ଲୋକେ ୧ନମ୍ବର ଫାଟକ ନିକଟରେ ଧାରଣାରେ ବସି ପ୍ରକଳ୍ପ ଭିତରକୁ କାହାରିକୁ ଛାଡିନଥିଲେ । ଫାଟକ ନିକଟରୁ ଉଠାଇବା ପାଇଁ ସିଆଇଏସଏଫ୍ ଯବାନ ଲୋକଙ୍କୁ ଅନୁରୋଧ କରି ବିଫଳ ହେବାପରେ ଲାଠିମାଡ କରିଥିଲେ ।

ଜବାବରେ ଲୋକେ ମଧ୍ୟ ଢେଲାପଥର ମାଡ କରିଥିଲେ । ପରିସ୍ଥିତି ଅଧିକ ଜଟିଳ ହେବାରୁ ଯବାନ ମାନେ ୩ରାଉଣ୍ଡ ଫାଙ୍କା ଗୁଳିଚାଳନା କରିଥିଲେ । ଗୁଳିଚାଳନା ଦେଖି ଲୋକମାନେ ଜୀବନ ବିକଳରେ କିଏ କୁଆଡେ ଦୌଡି ପଳାଉଥିବାବେଳେ ସିଆଇଏସଏଫ୍ ଯବାନ ଶ୍ରମିକଙ୍କୁ ଗୋଡେଇ ଗୋଡେଇ ପିଟିଥିଲେ ।

ଏଥିରୁ ମହିଳା ବି ବାଦ ପଡିନଥିଲେ । ଲାଠିମାଡରେ ୨୫ରୁ ଅଧିକ ଶ୍ରମିକ ଓ ସ୍ଥାନୀୟ ଲୋକ ଆହତ ହୋଇଥିବାବେଳେ ଢେଲା ମାଡ଼ରେ ୫ଜଣ ସିଆଇଏସଏଫ୍ ଯବାନ ମଧ୍ୟ ଆହତ ହୋଇଛନ୍ତି ।

ଏହି ଘଟଣା ପ୍ରତିବାଦରେ ମା’ ବୈଦେହୀ ଶ୍ରମିକ ସଂଘ ସହ ବିଭିନ୍ନ ଶ୍ରମିକ ସଂଘ ପକ୍ଷରୁ ଆଇଓସିଏଲ ସମ୍ମୁଖରେ ଧାରଣା ଚାଲିଛିି ।

ସଂଘର ନେତା ରାକେଶ ପଟ୍ଟନାୟକ ଓ ବାବୁରାମ ଚୌଧୁରୀଙ୍କ ନେତୃତ୍ୱରେ ହଜାରେରୁ ଅଧିକ ଶ୍ରମିକ ଓ ସ୍ଥାନୀୟ ଲୋକ ଧାରଣାରେ ବସି ମୃତ ଠିକାଦାରଙ୍କ ପରିବାରକୁ ୫୦ଲକ୍ଷ ଟଙ୍କାର କ୍ଷତିପୂରଣ, ତଦନ୍ତ ଦାବି କରିବା ସହ ଆଇଓସିଏଲ୍ ପ୍ରକଳ୍ପ ସୁରକ୍ଷା ଦାୟିତ୍ୱରୁ ସିଆଇଏସଏଫ୍କୁ ବରଖାସ୍ତ କରିବାକୁ ଦାବି କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଜାନୁଆରୀ ୧୭(ଓଡିଶା ଡଟ୍ କମ୍)- ବିବିଧୀକରଣ ଯୋଜନାର ଅଂଶ ଭାବେ ନବରତ୍ନ ଉଦ୍ୟୋଗ ନ୍ୟ।ସନାଲ ଆଲୁମିନିୟମ କଂପାନୀ ଲିମିଟେଡ (ନାଲକୋ) ପକ୍ଷରୁ ଅନ୍ୟ ଧାତୁ ତଥା ଶକ୍ତି କ୍ଷେତ୍ରରେ ପ୍ରକଳ୍ପ ପ୍ରତିଷ୍ଠା ନିମନ୍ତେ ଉଦ୍ୟମ ହେଉଛି ।

ଏହି କ୍ରମରେ, ରାଜସ୍ଥାନର ଜୟସାଲମେର ଜିଲ୍ଲା ଅନ୍ତର୍ଗତ ଲୁଦାୱାର ଠାରେ କଂପାନୀ ୪୭.୬ ମେଗାୱାଟ କ୍ଷମତା ବିଶିଷ୍ଟ ଦ୍ୱିତୀୟ ପବନଚାଳିତ ବିଦ୍ୟୁତ ଉତ୍ପାଦନ ପ୍ରକଳ୍ପ ପ୍ରତିଷ୍ଠା କରିବାକୁ ଯାଉଛି ।

୨୮୩ କୋଟି ଟଙ୍କା ପୁଞ୍ଜିନିବେଶରେ ପ୍ରତିଷ୍ଠା ହେବାକୁ ଥିବା ଏହି ପ୍ରକଳ୍ପଟି ମେସର୍ସ ଗମେସା ୱିଣ୍ଡ ଟର୍ବାଇନ୍ସ ପ୍ରାଇଭେଟ ଲିମିଟେଡ ଦ୍ୱାରାକାର୍ଯ୍ୟାନ୍ୱିତ ହେବ । ଏହି ପ୍ରକଳ୍ପରେ, ପ୍ରତ୍ୟେକ ୮୫୦ କିଲୋୱାଟ ରେଟିଂ ବିଶିଷ୍ଟ ୫୬ଟି ୱିଣ୍ଡ ଟର୍ବାଇନ ସ୍ଥାପିତ ହେବ ।

ନାଲକୋର ନିଦେ୍ର୍ଧଶକ (ପି ଆଣ୍ଡ ଟି) ଶ୍ରୀ ଏନ. ଆର. ମହାନ୍ତି, ଜାନୁୟାରୀ ୧୨ ତାରିଖରେ ଏହି ପ୍ରକଳ୍ପର ଭିତିପ୍ରସ୍ତର ସ୍ଥାପନ କରିଥିଲେ । ଏହି ଅବସରରେ, କଂପାନୀର କାର୍ଯ୍ୟ ନିର୍ବାହୀ ନିଦେ୍ର୍ଧଶକ (ପି ଆଣ୍ଡ ଟି) ଶ୍ରୀ ଏସ.କେ. ଦାଶ ଉପସ୍ଥିତ ଥିଲେ ।

ଅଣପାରମ୍ପାରିକ ତଥା ନବୀକରଣଯୋଗ୍ୟ ଶକ୍ତି ଉତ୍ସର ବିନିଯୋଗ ଦିଗରେ ନାଲକୋର ଏହା ଦ୍ୱିତୀୟ ପଦକ୍ଷେପ ଅଟେ । ଏହାଦ୍ୱାରା କଂପାନୀକୁ ସରକାରଙ୍କ ତରଫରୁ ଆର୍ଥିକ ଲାଭ ମିଳିପାରିବ । ଏହି ପ୍ରକଳ୍ପଟି ଆଗାମୀ ୮ ମାସରେ ସଂପୂର୍ଣ୍ଣ ହେବ ।

ଏଥି ପୂର୍ବରୁ, ଗତ ଡିସେମ୍ବର ୩୦ ତାରିଖରେ, ଆନ୍ଧ୍ରପ୍ରଦେଶର କଡପା ଜିଲ୍ଲା ଅନ୍ତର୍ଗତ ଗଣ୍ଡିକୋଟାଠାରେ କଂପାନୀର ୫୦.୪ ମେଗାୱାଟ କ୍ଷମତା ବିଶଷ୍ଟ ପ୍ରଥମ ପବନଚାଳିତ ବିଦ୍ୟୁତ ଉତ୍ପାଦନ କେନ୍ଦ୍ର କାର୍ଯ୍ୟକ୍ଷମ ହୋଇଛି ।

ଏହି ପ୍ରକଳ୍ପ ଅଧିନରେ, ୨୭୪ କୋଟି ଟଙ୍କା ପୁଞ୍ଜିନିବେଶରେ ପ୍ରତ୍ୟେକ ୨.୧ ମେଗାୱାଟ୍‍ କ୍ଷମତାର ୨୪ଟି ୱିଣ୍ଡ ଟର୍ବାଇନ ସ୍ଥାପିତ ହୋଇଛି । ମେସର୍ସ ସୁଜଲନ ଏନର୍ଜୀ ଲିମିଟେଡ ଦ୍ୱାରାଏହି ପ୍ରକଳ୍ପଟି କାର୍ଯ୍ୟ।ନ୍ୱିତ ହୋଇଥିଲା ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୧୭(ଓଡ଼ିଶା ଡ଼ଟ୍ କମ୍)-ଭାରତର ସର୍ବବୃହତ ଘରୋଇ ବନ୍ଦର ‘ମୁନ୍ଦ୍ରା’ର ପରିଚାଳନା କରୁଥିବା ଆଦାନି ଗୋଷ୍ଠୀ ଧାମରା ବନ୍ଦରର ଏକକ ମାଲିକାନା ସହ ପୂର୍ବ ଉପକୂଳରେ ନିଜର ସ୍ଥିତି ଜାହିର କରିବ ।

ଆଦାନି ଗୋଷ୍ଠୀର ଅଧ୍ୟକ୍ଷ ଗୌତମ ଆଦାନି, ଏଲ ଏଣ୍ଡ ଟି ଅଧ୍ୟକ୍ଷ ଏ.ଏମ ନାୟକ ଓ ଟାଟା କମ୍ପାନୀ ଅଧ୍ୟକ୍ଷ ସାଇରସ ମିସ୍ତ୍ରୀଙ୍କୁ ନେଇ ଅନୁଷ୍ଠିତ ବୈଠକରେ ଏହି ନିଷ୍ପତି ଗ୍ରହଣ କରାଯାଇଛି ।

ଖୁବ ଶୀଘ୍ର ଏ ସମ୍ପର୍କରେ ଘୋଷଣାନାମା ପ୍ରକାଶ ପାଇବ ବୋଲି ଜଣାପଡ଼ିଛି । ଧାମରା ବନ୍ଦ ହେଉଛି ଏଲ ଏନ ଟି ଓ ଟାଟା ଷ୍ଟିଲର ଏକ ମିଳିତ ପ୍ରକଳ୍ପ । ଏଥିରେ ଉଭୟଙ୍କର ସମାନ ଅଂଶଧନ ବିନିଯୋଗ ହୋଇଛି ।

ଓଡ଼ିଶା ସରକାର ଧାମରା ବନ୍ଦର କମ୍ପାନୀ ସହିତ ବନ୍ଦର ନିର୍ମାଣ ଓ ପରିଚାଳନା ପାଇଁ ୩୪ବର୍ଷୀୟା(୪ବର୍ଷର ନିର୍ମାଣ ଅବଧି ସହିତ) ଚୁକ୍ତିନାମା ସ୍ୱାକ୍ଷର କରିଥିଲେ ।

ଓଡ଼ିଶା ଡ଼ଟ୍ କମ୍