ଜନମୋର୍ଚ୍ଚା

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୩୦(ଓଡିଶା ଡଟ୍ କମ୍)-ଆସନ୍ତା ୨୦୧୪ ବିଧାନସଭା ନିର୍ବାଚନରେ ମଇଦାନକୁ ଓହ୍ଲାଇବ ଜନମୋର୍ଚ୍ଚା । ଏକଥା ଆଜି ସ୍ପଷ୍ଟ କରିଛନ୍ତି ମୋର୍ଚାର ଅଧ୍ୟକ୍ଷ ପ୍ୟାରୀମୋହନ ମହାପାତ୍ର ।

ପ୍ୟାରୀ କହିଛନ୍ତି ଦୁଇ ମାସରେ ୨୦ ବର୍ଷର ଯୁବକ ପାଲଟିଛି ଜନମୋର୍ଚ୍ଚା । ଏହି ସ୍ରୋତରେ ବର୍ତମାନ ଏତେ ଲୋକ ମିଶିଲେଣି ଯାହାକି କର୍ମୀଙ୍କ ସଂଖ୍ୟା ୨ ଲକ୍ଷରୁ ଉର୍ଦ୍ଧ । ଏହାପରେ ପ୍ରତିମାସରେ ତିନିଚାରି ଲକ୍ଷ ଲେଖାଏଁ ବୃଦ୍ଧି ପାଇବ । ଆସନ୍ତା ଏପ୍ରୀଲ ମାସସୁଦ୍ଧା ମୋର୍ଚ୍ଚାର କର୍ମୀ ସଂଖ୍ୟା ୨୦ରୁ ୨୫ ଲକ୍ଷ ଟପିଯିବ ।

ବିଜେଡିର ଯେଉଁ ପିରାମିଡ ଅଛି ତା ଉପରେ ବସିଥିବା ସଭାପତି ତାଙ୍କ କ୍ଷମତା ହରାଇ ବସିଛନ୍ତି । ସେ ପିରାମିଡର ଯଦି ତଳୁ ଖସିଗଲା ସେ ପିରାମିଡ ତ ଭୁସୁଡିବ । ଆଉ ଭୁସୁଡି ପଡିବ ନବୀନଙ୍କ ପିରାମିଡ । ଯଦି ବିଜେଡି ବାଟକୁ ନଆସେ ତେବେ ଅସଲ ବିଜେଡି ପାଲଟିବ ଜନମୋର୍ଚ୍ଚା ।

ନିର୍ବାଚନରେ ମୋର୍ଚ୍ଚା ପକ୍ଷରୁ ପ୍ରାର୍ଥି ଦିଆଯିବ। ସେମାନେ ହେବେ ପ୍ରକୃତ ବିଜେଡି ପ୍ରାର୍ଥି । ଯଦି ସେ ନିର୍ବାଚନ କମିଶନରଙ୍କ ନିକଟରେ ନିଜର ସ୍ଥିତି ବଜାୟ ରଖନ୍ତି ତାହେଲେ ଜନମୋର୍ଚ୍ଚା ରାଜନୈତିକ ଦଳ ହୋଇ ନିର୍ବାଚନରେ ପ୍ରତିଦୋନ୍ଦିତା କରିବ ।

ସେ ତାତ୍ସଲ୍ୟ କରିକହିଛନ୍ତି ଯେ, ମୋର୍ଚ୍ଚା କିମ୍ବା ତାଙ୍କୁ ରୋକିବାପାଇଁ ନବୀନଙ୍କ ନିକଟରେ ବୁଦ୍ଧି ନାହିଁ । କୌଣସି ଜାଗାରେ ଘେରି ପାରିବେ ନାହିଁ । ମୋର୍ଚ୍ଚା ପକ୍ଷରୁ ଜାରି ରହିଛି କର୍ମୀ ସଂଗ୍ରହ ଅଭିଯାନ । ରାଜ୍ୟସ୍ତରୀୟ ଯୁବ ସଂଗଠନ ମଧ୍ୟ ଗଠନ କରାଯାଇଛି ।

ପ୍ୟାରୀ ଆହୁରି ମଧ୍ୟ ଅଭିଯୋଗ ଆଣିଛନ୍ତି ଯେ, ତାଙ୍କୁ ବିଜେଡିରୁ ବହିଷ୍କାର କରିବାକୁ ନିସ୍ପତି ନେବାପରେ ରାଜ୍ୟ ସରକାର ତାଙ୍କ ସହ ସଂପର୍କ ରଖିଥିବା ବ୍ୟକ୍ତି ବିଶେଷଙ୍କର ଫୋନ ଟ୍ୟାପିଂ କରିଛନ୍ତି ।

ସେ କହିଛନ୍ତି ୨୦୦୮ ଡିସେମ୍ବର ପର୍ଯ୍ୟନ୍ତ ଫୋନ ଟ୍ୟାପିଂ ସଂଖ୍ୟା କମ୍ ଥିବାବେଳେ ତା ପରଠାରୁ ଏହି ପରିମାଣ ଅଧିକ ହୋଇଛି । ବିଶେଷକରି ତାଙ୍କୁ ବିଜେଡିରୁ ବାହାର କରିବାକୁ ନିସ୍ପତି ନିଆଯିବାପରେ ୪ ହଜାରରୁ ଅଧିକ ଫୋନ ଟ୍ୟାପିଂ କରାଯାଇଛିା ଏ ସମୟରେ ନିର୍ଦିଷ୍ଟ ଭାବେ କେତେକଣ ଫୋନ ଟ୍ୟାପିଂ ହୋଇଛି ତାର ତାଲିକା ଦେବାକୁ ଦାବି କରିଛନ୍ତି ପ୍ୟାରୀ ମୋହନ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୧୬(ଓଡ଼ିଶା ଡ଼ଟ୍ କମ୍)-ବିଜେଡି ଦଳରେ ବିଶୃଙ୍ଖଳା ଓ କ୍ଷମତା ଦଖଲ ଷଡ଼ଯନ୍ତ୍ରରେ ଜଡ଼ିତ ଥିବା ଅଭିଯୋଗରେ ପ୍ୟରମୋହନ ମହାପାତ୍ରଙ୍କୁ ନିଲମ୍ବନ କରାଯିବା ପରେ ଆଜି ତାଙ୍କୁ ଦଳରୁ ବହିଷ୍କାର କରାଯାଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି ।

ଶୁକ୍ରବାର ଅନୁଷ୍ଠିତ ହୋଇଥିଲା ବିଜେଡ଼ିର ରାଜ୍ୟ କାର୍ଯ୍ୟକାରିଣୀ ବୈଠକ । ଏହି ବୈଠକରେ ପ୍ୟାରୀଙ୍କ ଓଡ଼ିଶା ଜନମୋର୍ଚ୍ଚା ଗଠନ, ସଭ୍ୟ ସଂଗ୍ରହ, ଚାନ୍ଦା ସଂଗ୍ରହ, ଭୁବନେଶ୍ୱରରେ କ୍ରାନ୍ତି ସମାବେଶ ଏବଂ ଦଳ ସଭାପତିଙ୍କ ଉପରେ ଆକ୍ରମଣାତ୍ମକ ଆଭିମୁଖ୍ୟ ସଂପର୍କରେ ଆଲୋଚନା ହୋଇଥିଲା ।

ଶେଷରେ ପ୍ୟାରୀଙ୍କୁ ଦଳରୁ ବହିଷ୍କାର ପାଇଁ ପ୍ରସ୍ତାବ ଆଗତ ହୋଇଥିଲା । ଏହି ପ୍ରସ୍ତାବ ସବସମ୍ମତି କ୍ରମେ ପାରିତ ହୋଇଥିଲା ଏବଂ ମହାପାତ୍ରଙ୍କୁ ଦଳରୁ ବହିଷ୍କାର କରାଗଲା ବୋଲି ପଟ୍ଟନାୟକ ଘୋଷଣା କରିଥିଲେ ।

ଏଥି ସହିତ ଦଳର ସଂପାଦକ ଯଜ୍ଞେଶ୍ୱର ବାବୁ ଦଳ ବିରୋଧି କାର୍ଯ୍ୟରେ ଲିପ୍ତ ଥିବାରୁ ତାଙ୍କୁ ମଧ୍ୟ ଦଳରୁ ବହିଷ୍କାର କରାଗଲା ବୋଲି ସେ ଘୋଷଣା କରିଥିଲେ । ଏ ସଂପର୍କରେ ମହାପାତ୍ର କହିଛନ୍ତି ଏହି ପରି ହେବ ବୋଲି ମୁଁ ଆଗରୁ ଜାଣିଥିଲି । ଏହା କିଛି ନୂଆ କଥା ନୁହେଁ । ଏହା ବିରୋଧରେ ମୁଁ ବିଜେଡିର ୨୭ ଲକ୍ଷ କର୍ମୀଙ୍କ ନିକଟକୁ ଯିବି ଏବଂ ଓଡିଶାର ଜନସାଧାରଣଙ୍କ ପାଖକୁ ଯିବି ।

ବିଜେଡିରେ ୨୦ ଲକ୍ଷ କର୍ମୀ ଅସନ୍ତୁଷ୍ଟ ଅଛନ୍ତି । ସେମାନଙ୍କୁ ଅବହେଳା କରାଯାଇଛି । ମୁଁ କର୍ମୀଙ୍କ ଅଧିକାର ପାଇଁ ଲଢୁଛି । ଏହି ଅଧିକାର ପାଇଁ ଲଢେଇ ଆହୁରୀ ଜୋରଦାର କରାଯିବ ।

ଦଳରେ ବେଶୀ ବିଶୃଙ୍ଖଳା ନବୀନ ହିଁ ସୃଷ୍ଟି କରୁଛନ୍ତି । ନିଜର ବଡ ପଣିଆ ଦେଖାଇ ସାରା ଦଳକୁ ପଙ୍ଗୁ କରିଦେଇଛନ୍ତି । ୨୦୧୦ ଜୁଲାଇ ୧୦ତାରିଖରେ ଶେଷଥର ପାଇଁ ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା । ଏହା ପରଠାରୁ ଦଳୀୟ ସମ୍ବିଧାନମତେ କୌଣସି ବୈଠକ ବସିନାହିଁ ।

ସବୁ ନିଷ୍ପତି ନବୀନଙ୍କର ଏକଚାଟିଆ ଭାବେ ଚାଲିଥିଲା । ନୂଆ କାର୍ଯ୍ୟକାରିଣୀ ଗଠନ ହେବାର ୩ବର୍ଷ ଭିତରେ ଅନ୍ୟୁନ ୬ଥର ବୈଠକ ବସିବା କଥା, ହେଲେ ଏହି ବୈଠକ ହେଉନାହିଁ । ତିନିବର୍ଷରୁ ମାତ୍ର ଆଉ ଦେଢ ମାସ ଅଛି ସେତେବେଳେ କାର୍ଯ୍ୟକାରିଣୀ ଡାକୁଛନ୍ତି । ଏବେ କହୁଛନ୍ତି ବ୍ୟକ୍ତି ବିଶେଷ ବଡ ନୁହେଁ ।

ସେ ଦଳର ସମ୍ବିଧାନକୁ ଗୋଇଠା ମାରି ଚାଲିଗଲେ । ଏ ଦଳ ତାଙ୍କୁ କ୍ଷମା ଦେବନାହିଁ । ତାଙ୍କୁ ଏ ଦଳର କର୍ମୀମାନେ ଗୋଇଠା ମାରି ବାହର କରିଦେବେ । ଏହାଛଡ଼ା ବିଜେଡ଼ି ଗଣତାନ୍ତ୍ରିକ ପଦ୍ଧତିରେ ଚାଲୁନଥିବା ନେଇ ପ୍ୟାରୀ ଅଭିଯୋଗ କରିଛନ୍ତି ।

ପଞ୍ଚାୟତରାଜ ମନ୍ତ୍ରୀ କଳ୍ପତରୁ ଦାସ କହିଛନ୍ତି ଦଳ ସମ୍ବିଧାନ ଅନୁସାରେ କାର୍ଯ୍ୟ କରୁଛି । ସାମ୍ବିଧାନିକ ପଦ୍ଧତି ଅନୁସାରେ ମହାପାତ୍ର ଓ ଯଜ୍ଞଶ୍ୱରଙ୍କୁ ଦଳରୁ ବହିଷ୍କାର କରାଯାଇଛି । ଓଡିଶାରେ ବିଜେଡି ହେଉଛି ଏକ ମାତ୍ର ଦଳ ଯିଏକି ୧୯୯୭ ମସିହାରୁ ସମ୍ବିଧାନ ଅନୁସାରେ କାମ କରୁଛି ।

ଆଜି ବି ଯାହା କରାଯାଇଛି ସମ୍ବିଧାନ ବ୍ୟବସ୍ଥା ଅନୁସାରେ କରାଯାଇଛି । ରାଜ୍ୟ କାର୍ଯ୍ୟକାରିଣୀର ଏହି ନିସ୍ପତିକୁ କୋର୍ଟରେ ଚ୍ୟାଲେଞ୍ଜକରାଯାଇ ପାରିବ ନାହିଁ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୨ (ଓଡ଼ିଶା ଡ଼ଟ୍ କମ୍)– ଓଡିଶା ଜନମୋର୍ଚ୍ଚାର ସଦସ୍ୟ ଅମିୟ ପାଣ୍ଡବ ଆଜି ଗିରଫ ହେଲାପରେ ସର୍ତମୂଳକ ଜାମିନିରେ ଛାଡ ପାଇଛନ୍ତି ।

ଆଜି ସକାଳେ ତାଙ୍କ ଭିଏସ୍ଏସ୍ ନଗରସ୍ଥିତ ଘରୁ ମଞ୍ଚେଶ୍ୱର ଥାନା ପୋଲିସ ତାଙ୍କୁ ଗିରଫ କରିଥିଲା । ଓଡିଶା ଲୋକଦଳର ସଭାପତି ଦିପ୍ତି ରଂଜନ ମହାନ୍ତିଙ୍କୁ ଧମକ, ଗାଳି ଗୁଲଜ ଏବଂ ତାଙ୍କ ଫାର୍ମକୁ ପୋଡି ଦେବା ଅଭିଯୋଗରେ ପାଣ୍ଡବଙ୍କୁ ଗରିଫ କରାଯାଇଥିଲା । ତେବେ ପରେ ତାଙ୍କୁ ସର୍ତମୁଳକ ଜାମିନ ମିଳିଛି ।

ଗତ ସେପ୍ଟେମ୍ବର ୨୬ ତାରିଖରେ ମହାନ୍ତିଙ୍କୁ ସେ ଧମକ ଦେଇଥିବା ଅଭିଯୋଗ ହୋଇଥିଲା । ପୂର୍ବରୁ ସାଂସଦ ପ୍ୟାରୀମୋହନ ମହାପାତ୍ରଙ୍କ ବିରୋଧରେ ଖଣି ଦୁର୍ନୀତି ସଂପୃକ୍ତି ଅଭିଯୋଗରେ ଓଡିଶା ଲୋକଦଳ ପକ୍ଷରୁ ରାଜଭବନ ସମ୍ମୁଖରେ ବିକ୍ଷୋଭ ପଦର୍ଶନ କରାଯାଇଥିଲା ।

ଏହି ବିକ୍ଷୋଭ କାହିଁକି କରାଗଲା ତାହାର ପ୍ରତିବାଦରେ ପାଣ୍ଡବ ଗତ ସେପ୍ଟେମ୍ବର ୨୬ ତାରିଖ ଦିନ ଦିପ୍ତି ରଂଜନଙ୍କୁ ତାଙ୍କ ଘରେ ଯାଇ ଧମକ ଚମକ ଦେଇଥିବା ଦିପ୍ତି ରଂଜନ ମଞ୍ଚେଶ୍ୱର ଥାନାରେ ଅଭିଯୋଗ କରିଥିଲେ ।

ପାଣ୍ଡବ କହିଛନ୍ତି ଦିପ୍ତି ରଂଜନ ମହାନ୍ତି କିଏ ସେ ଆଦୈା ଜାଣନ୍ତି ନାହିଁ । ତାଙ୍କ ବିରୋଧରେ ଆସିଥିବା ଅଭିଯୋଗ ଓ କାର୍ଯ୍ୟାନୁଷ୍ଠାନ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ସେ ଅଭିଯୋଗ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟେବର ୩୧(ଓଡ଼ିଶା ଡ଼ଟ୍ କମ୍) –ମୁଖମନ୍ତ୍ରୀ ନବୀନ ପଟ୍ଟନାୟକ ବୁଧବାର ଦିଲ୍ଲୀ ଗସ୍ତରୁ ଫେରିବାପରେ ଗଣମାଧ୍ୟମକୁ କହିଛନ୍ତି ଯେ, ପ୍ୟାରୀମୋହନଙ୍କ ଅଭିଯୋଗ ଭିତିହୀନ ଓ ମିଥ୍ୟା ଓ ଏଥିରେ କୌଣସି ସତ୍ୟାସତ୍ୟ ନାହିଁ ।

ଏଥିସହିତ ସେ କହିଥିଲେ ଯେ, ଦଳରେ ବିଶୃଙ୍ଖଳା ସୃଷ୍ଟି କରୁଥିବା ପ୍ୟାରୀମୋହନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ତାଙ୍କର ସମସ୍ତ କାର୍ଯ୍ୟକଳାପକୁ ଅନୁଧ୍ୟାନ କରିବେ ଏବଂ ଠିକଣା ସମୟରେ ନିଷ୍ପତ ନେବେ ।

ପଟ୍ଟନାୟକ ଓ ମହାପାତ୍ର ଏୟାର ଇଣ୍ଡିଆନ ବିମାନରେ ଦୁଇ ଜଣ ସାଙ୍ଗହୋଇ ଆସିଥିଲେ ମଧ୍ୟ ବିମାନ ମଧ୍ୟରେ କୌଣସି କଥାବାର୍ତା ହୋଇନାହିଁନ୍ତି ବୋଲି ପ୍ୟାରୀମୋହନ କହିଛନ୍ତି ।

ସୂଚନା ଯୋଗ୍ୟ ଯେ, ଗତ ୨୮ ତାରିଖରେ ବିଜେଡିରୁ ନିଲମ୍ବିତ ସାଂସଦ ତଥା ଓଡିଶା ଜନମୋର୍ଚ୍ଚାର ଅଧ୍ୟକ୍ଷ ପ୍ୟାରୀମୋହନ ମହାପାତ୍ର କ୍ରାନ୍ତି ସମାବେଶରେ ବିଜେଡି କୋଇଲା ବ୍ଲକ ଆବଣ୍ଟନରେ ସଂପୃକ୍ତ ରହିଛି ବୋଲି ମତବ୍ୟକ୍ତ କରିଥିଲେ ।

ଏଥିସହିତ ସେ କହିଥିଲେ ଯେ, ମୋର୍ଚ୍ଚା କଂଗ୍ରେସର ବି ଟିମ୍ ନୁହେଁ । ବିଜେଡି କୋଇଲା ବ୍ଲକ ସୁପାରିଶରେ ସଂପୃକ୍ତ ଥିବାରୁ କଂଗ୍ରେସ ସହିତ ସଲାସୁତୁରା କରୁଛି । ତେଣୁ ବିଜେଡି କଂଗ୍ରେସର ବି ଟିମ୍ ବୋଲି ଅଭିଯୋଗ କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟେବର ୨୭(ଓଡ଼ିଶା ଡ଼ଟ୍ କମ୍) –ରବିବାର ହେବାକୁ ଯାଉଥିବା ଓଡ଼ିଶା ଜନମୋର୍ଚ୍ଚା(ଓଜମୋ)ର ବହୁ ଚର୍ଚ୍ଚିତ ସମାବେଶକୁ ନେଇ ସାରା ରାଜ୍ୟରେ ରାଜନୈତିକ ଉଷ୍ମତା ବୃଦ୍ଧି ପାଇବାରେ ଲାଗିଛି ।

ଇତି ମଧ୍ୟରେ ଜନମୋର୍ଚ୍ଚା ସୁପ୍ରିମୋ ପ୍ୟାରୀ ମହାପାତ୍ରଙ୍କର ନିଜସ୍ୱ କାରକୁ ଭଙ୍ଗାଯିବାଠାରୁ ଆରମ୍ଭ କରି ବିଜୁ ମହିଳା ଜନତା ଦଳ ପକ୍ଷରୁ ଶହୀଦନଗରସ୍ଥିତ ଜନମୋର୍ଚ୍ଚା ଅଫିସକୁ ଘେରାଉ କରାଯାଇ ସେଠାରେ ମହାପାତ୍ରଙ୍କ କୁଶପୁତଳିକା ଦାହ କରାଯାଇଛି ।

ଏହାକୁ ନଜରରେ ରଖି କମିସନରେଟ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ ଅଧିକ କଡାକଡି କରାଯାଇଛି । ବିଶେଷକରି ଅତୀତରେ କଂଗ୍ରେସ ସମାବେଶ ସମୟରେ ଯେଉଁ ପ୍ରକାରର ହିଂସାକାଣ୍ଣ ସୃଷ୍ଟି ହେଲା ତା’କୁ ଦୃଷ୍ଟିରେ ରଖି ଏଥର ସୁରକ୍ଷା ବ୍ୟବସ୍ଥାକୁ ଆହୁରି ଅଧିକ କଡ଼ାକଡ଼ି କରାଯାଇଛି ବୋଲି ପୁଲିସ କମିସନର ଏସ.ରୟ କହିଛନ୍ତି ।

ମହାପାତ୍ରଙ୍କ କହିବାନୁଯାୟୀ ଗତ କାଲି ରାତି ୧୨ଟା ୧୫ ମିନିଟରେ ସେମାନେ ଯେତେବେଳେ ଶୋଇବାକୁ ଯାଉଥିଲେ ସେହି ସମୟରେ ବାହାରେ ଖୁବ୍ ଯୋରରେ ଏକ ଶବ୍ଦ ହୋଇଥିଲା । ସେମାନେ ଏହାକୁ ଗୁରୁତ୍ୱ ନଦେଇ ଶୋଇବାକୁ ଚାଲି ଯାଇଥିଲେ ।

ଆଜି ସକାଳୁ ଉଠି ଦେଖିଥିଲେ ତା’ଙ୍କ କାରଟିକୁ ଇଟା ପଥର ପକାଯାଇ ସମ୍ପୂର୍ଣ୍ଣ ନଷ୍ଟ କରି ଦିଆଯାଇଛି । କାରର ପଛ କାଚଟି ସମ୍ପୂର୍ଣ୍ଣ ଭାଙ୍ଗିରୁଜି ଯାଇଥିବାର ଅଭିଯୋଗ କରି ମହାପାତ୍ରଙ୍କ କର୍ମଚାରୀମାନେ ଆଜି ସହିଦନଗର ଥାନାରେ ଏତାଲା ଦେଇଛନ୍ତି ।

ଆଜି ବିଜୁ ମହିଳା ଜନତା ଦଳର ବହୁ କାର୍ଯ୍ୟକର୍ତା ଶହିଦନଗରସ୍ଥିତ ଓଡିଶା ଜନମୋର୍ଚ୍ଚା ଅଫିସ ସମ୍ମୁଖରେ ପହଞ୍ଚି ମହାପାତ୍ରଙ୍କ ବିରୁଦ୍ଧରେ ସ୍ଲୋଗାନ ଦେଇଥିଲେ ଓ ଦାବି କରିଥିଲେ ଯେ ଶ୍ରୀ ମହାପାତ୍ର ନୈତିକତା ଦୃଷ୍ଟିରୁ ପ୍ରଥମେ ରାଜ୍ୟସଭା ପଦରୁ ଇସ୍ତଫା ଦିଅନ୍ତୁ ।

ସମାବେଶକୁ ନେଇ ରାଜନୈତିକ ଉଷ୍ମତା ବୃଦ୍ଧି ପାଉଥିବା ଦୃଷ୍ଟିରୁ ଓଡ଼ିଶା ଜନମୋର୍ଚ୍ଚାର ଧାରଣା ସ୍ଥଳରେ ଶାନ୍ତିଶୃଙ୍ଖଳା ରକ୍ଷା କରିବାପାଇଁ ୨୦ ଜଣ ଡିଏସପିଙ୍କ ନେତୃତ୍ୱରେ ୧୦୦ ଜଣ ଇନ୍ସପେକ୍ଟର ଓ ସବଇନ୍ସପେକ୍ଟର ନିଯୁକ୍ତ କରାଯାଇଛନ୍ତି ।

ବିଭିନ୍ନ ସ୍ଥାନରେ ୪୫ ପ୍ଲାଟୁନ୍ ସଶସ୍ତ୍ର ପୁଲିସ ମୁତୟନ ରହିବେ । ଜନମୋର୍ଚ୍ଚାର କର୍ମକର୍ତାମାନେ ପ୍ରତିଶୃତି ଦେଇଛନ୍ତି ଯେ ସେମାନେ ଦୁଇଟି ସ୍ଥାନରୁ ମୋଟ ୫୦,୦୦୦ ସମର୍ଥକଙ୍କର ଶୋଭାଯାତ୍ରା ବାହାର କରିବେ ।

ଗୋଟିକରେ ୪୦,୦୦୦ ଓ ଅନ୍ୟଟିରେ ୧୦,୦୦୦ ଲୋକ ଆସିବାପାଇଁ କମିସନରେଟ ପୁଲିସକୁ ପ୍ରତିଶୃତି ମିଳିଛି । ।

ରବିବାରର ସମାବେଶ ସମ୍ପର୍କରେ ସୂଚନା ଦେଇ ଜନମୋର୍ଚ୍ଚାର ମୁଖ୍ୟ ପ୍ରବକ୍ତା ଶ୍ରୀ ଯଜ୍ଞେଶ୍ୱର କହିଛନ୍ତି ଯେ ସେମାନଙ୍କ ସମାବେଶରେ ବିଜେଡିର ୭୦,୦୦୦ କାର୍ଯ୍ୟକର୍ତା ଯୋଗ ଦେଉଛନ୍ତି ବୋଲି ରିପୋର୍ଟ ପାଇବାପରେ ବିଜେଡିର କେତେଜଣ ନେତା ଏପରିକି ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଆଶଙ୍କିତ ହୋଇ ଉଠିଛନ୍ତି ।

ସେମାନଙ୍କ ପକ୍ଷରୁ ଆମର ଶୁଭେଚ୍ଛୁମାନଙ୍କୁ ଅଟକାଇବା ପାଇଁ ବହୁ ପ୍ରକାରର ଉଦ୍ୟମ କରାଯାଉଛି ବିଶେଷକରି ସରକାରୀ କଳକୁ ବ୍ୟବହାର କରି ଗାଡି ମାଲିକମାନଙ୍କୁ ଜନମୋର୍ଚ୍ଚା ସମର୍ଥକମାନଙ୍କୁ କୌଣସି ପ୍ରକାରେ ଭୁବନେଶ୍ୱର ନନେବାପାଇଁ ଧମକଚମକ ଦିଆଯାଉଛି ।

ତା ସତ୍ଵେ ଏହି ସମାବେଶ ନିଶ୍ଚିତ ସଫଳ ହେବ ବୋଲି ଯଜ୍ଞେଶ୍ୱର କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକୋ୍ଟବର ୨୬(ଓଡ଼ିଶା ଡ଼ଟ୍ କମ୍)–ଓଡିଶା ଜନମୋର୍ଚ୍ଚାର ସମାବେଶକୁ ଭଣ୍ଡୁର କରିବା ପାଇଁ ଷଡ଼ଯନ୍ତ୍ର ଚାଲିଥିବା ଅଭିଯୋଗ ଆଣି ପୁଣି ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି ସାଂସଦ ପ୍ୟାରିମୋହନ ମହାପାତ୍ର ।

ଏକ ସାମ୍ବାଦିକ ସମ୍ମିଳନୀରେ ମୋର୍ଚ୍ଚା ତରଫରୁ କୁହାଯାଇଛି ଯେ, ସମାବେଶକୁ ଲୋକମାନେ ଯେପରି ନ ଆସିପାରିବେ ସେଥିପାଇଁ ଶକ୍ତିମନ୍ତ୍ରୀ ଓ ଅନ୍ୟାନ୍ୟ ସ୍ଥାନର ଆରଟିଓ ଏମ୍ଭିଆଇମାନେ ଗାଡି ମାଲିକଙ୍କୁ ଧମକ ଦେଉଛନ୍ତି ।

ଆସନ୍ତା ୨୮ ତାରିଖରେ ହେବାକୁ ଥିବା ସମାବେଶ ଭଣ୍ଡୁର କରିବା ପାଇଁ କିଛି ରାଜନେତା ଓ ଅଫିସର ଲାଗିପଡିଛନ୍ତି ବୋଲି ଏହି ଚିଠିରେ ଅଭିଯୋଗ କରାଯାଇଛି ।

ନୟାଗଡ ଜିଲ୍ଲାରେ ଶକ୍ତିମନ୍ତ୍ରୀ ଅରୁଣ ସାହୁ ଏବଂ କଟକ, ଆଠଗଡ, ଭୁବନେଶ୍ୱର, କେନ୍ଦ୍ରାପଡା ଆରଟିଓ ଏବଂ ଏମ୍ଭିଆଇ ମାନେ ଗାଡି ନଦେବାକୁ ମାଲିକଙ୍କୁ ଧମକ ଦେଉଥିବା ମୋର୍ଚ୍ଚ ଅଭିଯୋଗ କରିଛି ।

ଏନେଇ ଆରଟିଓ,ଏମ୍ଭିଆଇମାନଙ୍କ ପ୍ରତିକ୍ରୀୟା ମିଳି ନଥିବା ବେଳେ ଏହି ଅଭିଯୋଗକୁ ଖଣ୍ଡନ କରିଛନ୍ତି ମନ୍ତ୍ରୀ ଅରୁଣ ସାହୁ ।

ସେ କହିଛନ୍ତି ଗଣତାନ୍ତ୍ରୀକ ଉପାୟରେ ଯେଉଁ ନିର୍ବାଚନ ହୁଏ ସିଧା ସଳଖ ଲୋକମାନଙ୍କର ମତଦାତା ପାଉ ନଥିବା ବ୍ୟକ୍ତି ବା ସମ୍ମୁଖିନ ହୋଇ ନଥିବା ବ୍ୟକ୍ତି ପ୍ୟାରୀମୋହନଙ୍କ ଭଲି ଲୋକ ଏହିଭଳି ଭିତିହିନ ଅଭିଯୋଗ ଆଣି ପାରନ୍ତି । ଯାହାର କିଛି ସତ୍ୟତା ନାହିଁ ।

ଏହା ଏକ ଅପପ୍ରଚାର ମାତ୍ର । ପ୍ୟାରୀମୋହନ ମହାପାତ୍ରଙ୍କ ଏକମାତ୍ର ଉଦ୍ଦେଶ୍ୟ କଂଗ୍ରେସକୁ କ୍ଷମତାକୁ ଆଣିବାକୁ । ଦିଲ୍ଲୀ ଗସ୍ତ ପୂର୍ବରୁ ପ୍ୟାରୀମୋହନ ମହାପାତ୍ରଙ୍କ ଅଭିଯୋଗ ସଂପର୍କରେ ମୁଖ୍ୟମନ୍ତ୍ରୀ ନିଜର ପ୍ରତିକ୍ରୀୟା ପ୍ରକାଶ କରିକହିଛନ୍ତି ଯେ ପ୍ୟାରୀଙ୍କ ଅଭିଯୋଗ ମିଥ୍ୟା ଓ ଭିତିହିନ ।

ଅନ୍ୟ ପକ୍ଷରେ ଏକ ସାମ୍ବାଦିକ ସମ୍ମିଳନୀରେ ବିଜୁ ଯୁବ ଜନତା ଦଳର ରାଜ୍ୟ ସଭାପତି ତଥା ସରକାରୀ ଦଳର ଉପମୁଖ୍ୟ ସଚେତକ ସଂଜୟ କୁମାର ଦାସବର୍ମା କହିଛନ୍ତି ଯେ,ନିଲମ୍ବିତ ହେବାପରେ ଜନମୋର୍ଚ୍ଚା ନାମରେ ଏକ ସଂଗଠନ ଗଢି ମୁଖ୍ୟମନ୍ତ୍ରୀଙ୍କ ସମ୍ପର୍କରେ ଗଣମାଧ୍ୟମ ଜରିଆରେ ବିଭିନ୍ନ ଅଶୋଭନୀୟ ମନ୍ତବ୍ୟ ଦେଇ ମହାପାତ୍ର ଦଳର ସମ୍ମାନ କ୍ଷୁର୍ଣ୍ଣ କରୁଛନ୍ତି ।

ତାଙ୍କର ଏଭଳି ଅଶୋଭନୀୟ ମନ୍ତବ୍ୟକୁ ଦୃଢ ନିନ୍ଦା କରି ମହାପାତ୍ର ଦଳୀୟ ଟିକେଟରେ ନିର୍ବାଚିତ ରାଜ୍ୟସଭା ସଭ୍ୟ ପଦରୁ ତୁରନ୍ତ ଇସ୍ତଫା ଦେବାପାଇଁ ଦାସବର୍ମା ଦାବି କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୧୬(ଓଡ଼ିଶା ଡ଼ଟ୍ କମ୍) – ୧୯ ଅକ୍ଟୋବରରେ ବିଜେଡି ତରଫରୁ ବ୍ରହ୍ମପୁରରେ ଏକ ସମାବେଶ କରାଯିବ ବୋଲି ଦଳ ତରଫରୁ ମଙ୍ଗଳବାର କୁହାଯାଇଛି ।

ଉକ୍ତ ଦିନ ବିଜେଡିରୁ ନିଲମ୍ବିତ ସାଂସଦ ପ୍ୟାରୀମୋହନ ମହାପାତ୍ର ଭୁବନେଶ୍ୱରରେ ଏକ ସାମ୍ବାଦିକ ସମ୍ମିଳନୀ କରିବାକୁ ପୂର୍ବରୁ ଘୋଷଣା କରିଥିବାରୁ ଏହି ରାଲି ତାଙ୍କୁ ପ୍ରତିହତ କରିବା ପାଇଁ କରାଯାଉଥିବା ରାଜନୈତିକ ପର୍ଯ୍ୟବେକ୍ଷକମାନେ ଅନୁମାନ କରିଛନ୍ତି ।

ଓଡଶା ଜନମୋର୍ଚ୍ଚା ଗଠନ କରିଥିବା ମହାପାତ୍ର ଚଳିତମାସ ୨୯ରେ ପ୍ରାୟ ପଚାଶହଜାର ଲୋକଙ୍କର ଏକ ରାଲି ଭୁବନେଶ୍ୱରରେ କରିବାକୁ ଯାଉଥିବା ବେଳେ ଏହା ପୂର୍ବରୁ ହେଉଥିବା ବିଜେଡ଼ିର ରାଲି ମୁଖ୍ୟମନ୍ତ୍ରୀ ନବୀନ ପଟନାୟକଙ୍କ ଏକ ଶକ୍ତିପରୀକ୍ଷା ବୋଲି ସେମାନେ କହିଛନ୍ତି ।

ବ୍ରହ୍ମପୁରର ଏହି ସମାବେଶରେ ପ୍ରାୟ ୫୦ ହଜାର କର୍ମୀ,ସମର୍ଥକ ଓ ସାଧାରଣ ଜନତା ଉପସ୍ଥିତ ରହିବେ ବୋଲି ବିଜେଡି ତରଫରୁ ଆକଳନ କରାଯାଇଛି ।

ଏହି ସମାବେଶରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ,୩ ଜଣ କ୍ୟାବିନେଟ ମନ୍ତ୍ରୀ ଓ ସମସ୍ତ ବିଧାୟକ ବିଧାୟିକା ଏହି ମହାସମାବେଶରେ ଯୋଗଦେବେ । ଏହାର ପ୍ରସ୍ତୁତି ପର୍ବ ଯୁଦ୍ଧକାଳୀନ ଭିତିରେ ଚାଲଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନନେଶ୍ୱର,ଅକ୍ଟେବର ୧୪(ଓଡ଼ିଶା ଡ଼ଟ୍ କମ୍) -ଅକ୍ଟୋବର ୨୮ ଭୁବନେଶ୍ୱରରେ ରାଜ୍ୟସ୍ତରୀୟ ସମାବେଶ ପାଇଁ ପ୍ୟାରୀ ମୋହନ ମହାପାତ୍ର ଙ୍କ ଓଡ଼ିଶା ଜନମୋର୍ଚ୍ଚାକୁ ପୋଲିସ ଅନୁମତି ପ୍ରଦାନ କରିଛି ।

ଲୋୟର ପିଏମ୍ଜି ଠାରେ କ୍ରାନ୍ତି ସମାବେଶ ନାଁ ରେ ହେଉଥିବା ଏହି ରାଲିରେ ପ୍ରାୟ ୫୦ ହଜାର ଲୋକ ଯୋଗ ଦେବାର ସମ୍ଭାବନା ରହିଥିବା ଆୟୋଜକ ମାନେ କହିଛନ୍ତି ।

ମିଳିଥିବା ସୂଚନା ଅନୁସାରେ ରାଜଧାନୀରୁ ବିଭିନ୍ନ କୋଣରୁ ସେଦିନ ଶୋଭା ଯାତ୍ରାମାନେ ବାହାରି ଲୋୟର ପହଞ୍ଚିବେ । କେଉଁ ସ୍ଥାନରୁ କେତେ ସମର୍ଥକ ଆସିବେ ତାର ତାଲିକା ପ୍ରସ୍ତୁତି କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି ।

ରାଜ୍ୟସ୍ତରୀୟ ସମାବେଶକୁ ପ୍ରତି ପଞ୍ଚାୟତରୁ ଅଧିକ ଲୋକ ନଆସି ଦୁଇ ରୁ ତିନିଜଣ ପର୍ଯ୍ୟନ୍ତ ପ୍ରତିନିଧିତ୍ୱ କରିବା ଉପରେ ସଂଗଠନ ଗୁରୁତ୍ୱ ଦେଇଛି ।

ବଡଧରଣର ଶୋଭା ଯାତ୍ରା,ମୋଟର ସାଇକେଲ ରାଲି ସହର ପରିକ୍ରମା କରିବ । ଲୋୟର ପିଏମ୍ଜି ଠାରେ କୌଣସି ସାଧାରଣ ସଭା କରାଯିବ ନାହିଁ କି ସଭାମଂଚ ଉପଯୋଗୀ କୌଣସି ପେଣ୍ଡାଲ ତିଆରି କରାଯିବ ନାହିଁ ତଥାପି ଶୋଭା ଯାତ୍ରାକୁ ସମ୍ବୋଧିତ କରା ଯିବାର ବ୍ୟବସ୍ଥା କରିଯିବ ।

ବିଜେଡ଼ିରୁ ନିଲମ୍ବିତ ସାଂସଦ ତଥା ଓଡ଼ିଶା ଜନମୋର୍ଚ୍ଚାର ମୁଖ୍ୟ ପ୍ୟାରୀ ମୋହନ ମହାପାତ୍ର କହିଛନ୍ତି ଭୁବନେଶ୍ୱରରେ ରାଜ୍ୟସ୍ତରୀୟ ସମାବେଶର ଏକ ମାସ ମଧ୍ୟରେ କେବିକେରେ ସମାବେଶର ଆୟୋଜନ କରାଯିବ ।

ଏହା ପରେ ରାଜ୍ୟର ବିଭିନ୍ନ ସ୍ଥାନରେ ସମାବେଶ ପାଇଁ ସଂଗଠନ ପକ୍ଷରୁ ଯୋଜନା କରାଯାଉଥିବା ସେ କହିଛନ୍ତି ।

ଓଡ଼ିଶା ଡ଼ଟ୍ କମ୍