ସୂର୍ଯ୍ୟମନ୍ଦିର ପାରିପାର୍ଶ୍ଵିକ ବିକାଶ ପ୍ରକଳ୍ପ କାମ ଠପ୍

ଓଡିଶା ଡଟ କମ ସଂବାଦ ଦାତା

କୋଣାର୍କ, ଅକ୍ଟୋବର ୧ (ଓଡିଶା ଡଟ କମ) ଆନ୍ତର୍ଜାତିକ ପର୍ଯ୍ୟଟନସ୍ଥଳ କୋଣାର୍କରେ ଦେଶବିଦେଶର ପର୍ଯ୍ୟଟକଙ୍କୁ ଉନ୍ନତମାନର ସୁବିଧା ସୁଯୋଗ ଉପଲବ୍ଧ କରାଇବା ଉଦ୍ଦେଶ୍ୟରେ ଇଣ୍ଡିଆନ୍ ଅଏଲ୍ ଫାଉଣ୍ଡେସନ୍(ଆଇଓଏଫ୍) ପକ୍ଷରୁ ୩୬କୋଟି ଟଙ୍କା ବ୍ୟୟ ଅଟକଳରେ ୨୦୧୩ ମସିହାରୁ ଆରମ୍ଭ କରାଯାଇଥିବା ସୂର୍ଯ୍ୟମନ୍ଦିର ପାରିପାର୍ଶ୍ଵିକ ବିକାଶ ପ୍ରକଳ୍ପର ନିର୍ମାଣ କାର୍ଯ୍ୟ ତିନିମାସ ତଳୁ ବନ୍ଦହୋଇ ପଡିଛି ।

ଗ୍ଲୋବାଲ ଟେଣ୍ଡର ମାଧ୍ୟମରେ ଏହି ସୌନ୍ଦର୍ଯ୍ୟକରଣ କାର୍ଯ୍ୟ ହାସଲ କରିଥିବା ହାଇଦ୍ରାବାଦର ଶ୍ରୀକୋ ପ୍ରୋଜେକ୍ଟ ପ୍ରାଇଭେଟ ଲିମିଟେଡ ପ୍ରକଳ୍ପ ନିର୍ମାଣ କାର୍ଯ୍ୟରେ ଅହେତୁକ ବିଳମ୍ବ କରିବାସହ ଯେତିକି କାମ ହୋଇଛି ତାହା ନିମ୍ନମାନର କରିଥିବା ଦର୍ଶାଇ ଉକ୍ତ ସଂସ୍ଥା ସହ ହୋଇଥିବା ଚୁକ୍ତିନାମାକୁ ଇଣ୍ଡିଆନ ଅଏଲ୍ ଫାଉଣ୍ଡେସନ କର୍ତ୍ତୃପକ୍ଷ ରଦ୍ଦ କରି ଦେଇଥିବାରୁ ଏହି ପ୍ରକଳ୍ପ କାମ ଠପ୍ ହୋଇଛି ।

ଠିକାଦାରୀ ସଂସ୍ଥା ଶ୍ରୀକୋ ଆଇଓଏଫ୍ ର ନିଷ୍ପତ୍ତି ବିରୋଧରେ ଓଡିଶା ଉଚ୍ଚ ନ୍ୟାୟାଳୟରେ ଅପିଲ କରିଥିଲେ । ତେବେ ଉଚ୍ଚ ନ୍ୟାୟାଳୟ ଶ୍ରୀକୋର ଅପିଲକୁ ଖାରଜ କରିଦେଇଥିବା ଜଣାପଡିଛି । ଶ୍ରୀକୋର ଚୁକ୍ତିନାମାକୁ ଗତ ୧୬ ତାରିଖରେ ରଦ୍ଦ କରାଯିବା ପରେ ଏହି ପ୍ରକଳ୍ପର ନିର୍ମାଣ ଦାୟିତ୍ୱ ଇଞ୍ଜିନିୟରସ୍ ଇଣ୍ଡିଆ ଲିମିଟେଡକୁ ଦିଆଯିବା ପାଇଁ ସ୍ଥିର କରାଯାଉଥିବା ଜଣେ ଆଇଓଏଫ୍ ଅଧିକାରୀ କହିଛନ୍ତି ।

ଏଭଳି ପରିସ୍ଥିତିରେ ଏହି ପ୍ରକଳ୍ପର କାମ କିପରି ଆଗକୁ ବଢିବ ଏବଂ ଗତ ୨୦୧୪ ମସିହା ଏପ୍ରିଲ ୧୭ତାରିଖରେ ଆରଡିସିଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ନିଆଯାଇଥିବା ନିଷ୍ପତ୍ତିଗୁଡିକର କାର୍ଯ୍ୟକାରୀତା କ୍ଷେତ୍ରରେ ବିଭିନ୍ନ ବିଭାଗ କେତେଦୂର ସଫଳ ହୋଇଛନ୍ତି, ତାର ସମୀକ୍ଷା କରିବା ନିମନ୍ତେ ଆସନ୍ତା ୩ ତାରିଖ ପୂର୍ବାହ୍ନ ୧୧ଟାରେ କେନ୍ଦ୍ରାଞ୍ଚଳ ଆରଡିସିଙ୍କ ଅଧ୍ୟକ୍ଷତାରେ ସ୍ଥାନୀୟ ଯାତ୍ରିନିବାସଠାରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେଉଥିବା ସୂଚନା ମିଳିଛି ।

ଏହି ବୈଠକରେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା(ଏଏସ୍ଆଇ),ଇଣ୍ଡିଆନ ଅଏଲ୍ ଫାଉଣ୍ଡେସନ,ପର୍ଯ୍ୟଟନ,ପୁରୀ ଜିଲା ପ୍ରଶାସନ,ପୁଲିସ ପ୍ରଶାସନ,ପୂର୍ତ୍ତ, ବିଦ୍ୟୁତ, ଟେଲିକମ୍,ଡ୍ରେନେଜ, ଜନସ୍ୱାସ୍ଥ୍ୟ,କୋଣାର୍କ ଏନ୍ଏସି ଓ ରାଜସ୍ୱ ବିଭାଗର ଅଧିକାରୀମାନେ ଯୋଗଦେବାକୁ ଆରଡିସି(କେନ୍ଦ୍ରାଞ୍ଚଳ)ଙ୍କ କାର୍ଯ୍ୟାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି ।

ସୂଚନାଯୋଗ୍ୟ ୨୦୦୧ ମସିହାରୁ ପ୍ରସ୍ତାବିତ ଏହି ପ୍ରକଳ୍ପର ଶିଳାନ୍ୟାସ ୨୦୧୩ ଜୁଲାଇ ୨୭ତାରିଖରେ ତିନିଜଣ କେନ୍ଦ୍ରମନ୍ତ୍ରୀ ଓ ଓଡିଶାର ମୁଖ୍ୟମନ୍ତ୍ରୀଙ୍କ ଦ୍ୱାରା ସଂପନ୍ନ ହୋଇଥିଲା । ଶିଳାନ୍ୟାସର ୧୮ମାସ ମଧ୍ୟରେ ନିର୍ମାଣ କାର୍ଯ୍ୟ ସାରିବା ପାଇଁ ଶ୍ରୀକୋ ସହିତ ଆଇଓଏଫ୍ ର ଚୁକ୍ତିନାମା ହୋଇଥିଲା ।

ଶ୍ରୀକୋ ନିଜସ୍ୱ ମେସିନାରୀ ଏଠାକୁ ନ ଆଣି ଛୋଟ ଛୋଟ ଠିକାଦାରଙ୍କୁ ଉପଠିକାଦାର ଭାବେ କାର୍ଯ୍ୟାଦେଶ ଦେଇ ନିମ୍ନମାନର କାମ କରୁଥିବା କୋଣାର୍କ ସୁରକ୍ଷା ସମିତି,କୋଣାର୍କ ବ୍ୟବସାୟୀ ମହାସଂଘ ଓ ବୁଦ୍ଧୀଜୀବୀମାନେ ଅଭିଯୋଗ କରିଥିଲେ ।

ଶ୍ରୀକୋ ପକ୍ଷରୁ ନିର୍ମାଣାଧୀନ ମୁଖ୍ୟ ପାର୍କିଙ୍ଗ ସ୍ଥଳ,ଇଣ୍ଟରପ୍ରିଟେସନ୍ ସେଣ୍ଟର ଓ ଡ୍ରପ୍ ଆଉଟ୍ ପଏଣ୍ଟ କାର୍ଯ୍ୟରେ କୋଣାର୍କରେ ନିର୍ମିତ ନିମ୍ନମାନର ପାଉଁଶ ଇଟା ଓ ଲୋକାଲ ଲୁଣି ବାଲି ବ୍ୟବହାର କରାଯାଇଥିବା ଅଭିଯୋଗ ହୋଇଥିଲା । ଏହି ଅଭିଯୋଗ ପରେ ଶ୍ରୀକୋ ନିଯୁକ୍ତ କରିଥିବା ଉପଠିକାଦାରଙ୍କୁ ଅର୍ଥ ପୈଠ କରିବାରେ ଟାଳଟୁଳ ନୀତି ଅବଲମ୍ବନ କରିଥିଲା ।

ସମୟାନୁଯାୟୀ ଅର୍ଥ ନ ମିଳିବାରୁ ସ୍ଥାନୀୟ ଉପଠିକାଦାରମାନେ କାମ ବନ୍ଦ କରି ଶ୍ରୀକୋ ବିରୋଧରେ ଆଇଓଏଫ୍ କତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ । ଏଯାବତ୍ ଶ୍ରୀକୋକୁ ଆଇଓଏଫ୍ ପକ୍ଷରୁ ଅଗ୍ରୀମ ଆକାରରେ ୩ କୋଟି ୪୦ଲକ୍ଷ ଟଙ୍କା ପୈଠ କରାଯାଇଥିବା ବେଳେ ଏହି ପ୍ରକଳ୍ପର ୧୦ପ୍ରତିଶତ କାମ ମଧ୍ୟ ସଂପନ୍ନ ହୋଇପାରି ନଥିବା ଜଣାଯାଇଛି ।

ଆଇଓଏଫ୍ ପକ୍ଷରୁ ନିର୍ମାଣ କାର୍ଯ୍ୟର ଗୁଣବତ୍ତା ସଂପର୍କରେ ବୈଷୟିକ ବିଶେଷଜ୍ଞଙ୍କ ଦ୍ୱାରା ସମୟାନୁଯାୟୀ ତଦାରଖ ମଧ୍ୟ କରାଯାଇ ନଥିବା ବିଭିନ୍ନ ମହଲରୁ ଅଭିଯୋଗ ହୋଇଛି । ଶ୍ରୀକୋ ଏଯାବତ୍ କରିଥିବା କାମର ମାପ କରାଯାଇ ତାର ହିସାବ ତୁଟିବା ପରେ ଅନ୍ୟ ସଂସ୍ଥାକୁ କାର୍ଯ୍ୟାଦେଶ ଦିଆଯିବ ବୋଲି ଆଇଓଏଫ୍ ଅଧିକାରୀ କହିଛନ୍ତି ।

ଗତ ସପ୍ତାହରେ ଆଇଓଏଫ୍ ର ବୈଷୟିକ ବିଶେଷଜ୍ଞମାନେ ଶ୍ରୀକୋ ପକ୍ଷରୁ ଏଯାବତ୍ ହୋଇଥିବା କାମର ମେଜରମେଣ୍ଟ(ମାପ) କରିବା ପାଇଁ ଏଠାକୁ ଆସିଥିବାବେଳେ ସ୍ଥାନୀୟ ଉପଠିକାଦାରମାନେ ସେମାନଙ୍କୁ ବିରୋଧ କରିଥିଲେ । ସେମାନଙ୍କ ବକେୟା ଅର୍ଥ ଶ୍ରୀକୋ ନଦେବା ପର୍ଯ୍ୟନ୍ତ ଏହି ପ୍ରକଳ୍ପର ଯେ କୌଣସି କାର୍ଯ୍ୟକୁ ସେମାନେ ବିରୋଧ କରିବେ ବୋଲି ଧମକ ଦେଇଥିଲେ ।

ଫଳରେ ବୈଷୟିକ ବିଶେଷଜ୍ଞମାନେ ମାପ ନକରି ଫେରିଯାଇଥିଲେ । ଆଇଓଏଫ୍ ପକ୍ଷରୁ ଏ ସଂପର୍କରେ ପୁଲିସର ସହାୟତା ମଧ୍ୟ ନିଆଯାଇ ନଥିଲା । ସ୍ଥାନୀୟ ରାଜନେତାମାନଙ୍କ ହାତବାରିସୀ ସାଜି ନିମ୍ନମାନର କାମ କରିଥିବା ଏହି ଉପଠିକାଦାରମାନଙ୍କୁ ଠିକାଦାରୀ ସଂସ୍ଥା ଶ୍ରୀକୋର ମାଲିକ ଏବଂ ଆଇଓଏଫ୍ ଅଧିକାରୀମାନେ ଭୟ କରୁଥିବା ମାନବାଧିକାରକର୍ମୀ ଏନ୍.ଏ.ଶାହ ଅନସାରୀ ଓ ବ୍ୟବସାୟୀ ମହାସଂଘ ସଭାପତି ସୁବାସ ନାୟକ କହିଛନ୍ତି ।

ଓଡିଶା ଡଟ କମ