କେନ୍ଦ୍ର ସରକାର

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଫେବୃଆରୀ ୨୮(ଓଡ଼ିଶା ଡ଼ଟ୍ କମ୍), ବୁଧବାର ଏଠାରେ ଆରମ୍ଭ ହୋଇଥିବା ଶାହା କମିଶନଙ୍କ ଶୁଣାଣିର ପ୍ରଥମ ଦିନରେ ବିଭିନ୍ନ ଖଣିଧାରୀ ସେମାନଙ୍କର ପକ୍ଷ ରଖିଛନ୍ତି ।

ଖଣି ଦୁର୍ନୀତିର ତଦନ୍ତ କରୁଥିବା ଏହି କମିଶନ ପାଖରେ ସେମାନଙ୍କ ବିରୋଧରେ ଆସିଥିବା ଅଭିଯୋଗ ସମ୍ପର୍କରେ ନିଜର ସଫାଇ ଦେବା ପାଇଁ ସୁଯୋଗ ଦେବାକୁ ଅନୁରୋଧ କରି ବହୁ ଖଣିଧାରୀ ପୂର୍ବରୁ ଆବେଦନ କରିଥିଲେ ।

କମିଶନ ଏହି ଶୁଣାଣି କରିବା ପାଇଁ ଓଡ଼ିଶା ଆସିଛନ୍ତି । ବିବାଦୀୟ ଖଣି ଅଞ୍ଚଳର ଚିହ୍ନଟ ଉପଗ୍ରହ ଚିତ୍ର ସାହାଯ୍ୟରେ କରାଯାଇଥିବାରୁ ଏହାର ସଠିକତା ଉପରେ ଖଣିଧାରୀମାନେ ନିଜ ଓକିଲଙ୍କ ଜରିଆରେ ପ୍ରଶ୍ନ ଉଠାଇଥିଲେ ।

ସେମାନେ ଆଉଥରେ ଖଣି ଅଞ୍ଚଳ ପରିଦର୍ଶନ କରି ଏହାର ସାନି ଯାଞ୍ଚ ଦାବି କରିଥିଲେ । କମିଶନ ସେମାନଙ୍କ ପ୍ରସ୍ତାବରେ ରାଜି ହୋଇଥିବା କୁହାଯାଇଛି । ଠିକ୍ ସେହିପରି ବିଭିନ୍ନ ସମୟରେ ସେମାନେ ସରକାରଙ୍କ ନିର୍ଦେଶାନାମା ସବୁ ପାଳନ କରି ଆସିଥିବା ବେଳେ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଟାନ କରାଯାଉଛି ବୋଲି ଦର୍ଶାଇଛନ୍ତି ।

ଶୁଣାଣିର ପ୍ରଥମ ଦିନରେ କମିଶନ ପ୍ରାୟ ୧୪ଟି ଖଣିମାଲିକଙ୍କୁ ସେମାନଙ୍କର ପକ୍ଷ ରଖିବା ପାଇଁ ନୋଟିସ ଜାରି କରିଥିବା ବେଳେ ଆଗାମୀ ତିନି ଚାରି ଦିନ ଅନ୍ୟ ଶତାଧିକ କଂପାନୀକୁ ସେମାନଙ୍କର ପକ୍ଷ ରଖିବା ପାଇଁ ନୋଟିସ ଦେଇଛନ୍ତି ।

ଖଣିଧାରୀମାନଙ୍କ ପକ୍ଷରୁ ଯେଉଁ ବରିଷ୍ଠ ଓକିଲ ପକ୍ଷ ରଖୁଛନ୍ତି ସେମାନଙ୍କ ମଧ୍ୟରେ ପ୍ରମୁଖ ହେଲେ ରାମ ଜେଠ୍ ମଲାନି,ଏ.ବି.ଦିୱାନ,ଗୋପାଳ ଶୁଭ୍ରମନ୍ୟମ୍ ଓ ପିନାକୀ ମିଶ୍ର ।

ଏଠାରେ ଉଲେଖଯୋଗ୍ୟ ଯେ, ବିଭିନ୍ନ ରାଜ୍ୟରେ ଖଣିଦୁର୍ନୀତି ତଦନ୍ତ ପାଇଁ କେନ୍ଦ୍ର ସରକାର ନଭେମ୍ବର ୨୦୧୦ରେ ସୁପ୍ରିମକୋର୍ଟର ପୂର୍ବତନ ବିଚାରପତି ଜଷ୍ଟିସ ଏମ୍.ବି.ଶାହା ଙ୍କ ନେତୃତ୍ୱରେ ଏହି କମିଶନ ଗଠନ କରିଛନ୍ତି ।

ଏହି କମିଶନ ଗୋଆ ଏବଂ କର୍ଣ୍ଣାଟକ ଭଳି ଖଣିଜସମ୍ପଦ ଭରପୂର ରାଜ୍ୟ ମାନଙ୍କରେ ତଦନ୍ତ କଲାପରେ ଓଡ଼ିଶାରେ ୨୦୧୧ରୁ ତଦନ୍ତ ଆରମ୍ଭ କରିଛନ୍ତି । ଜ.ଶାହା ନିଜେ କମିଶନ ବିଶେଷଜ୍ଞ ଦଳ ସହ ଡ଼ିସେମ୍ବର୨୦୧୧ରେ ରାଜ୍ୟର ବିଭିନ୍ନ ଖଣି ଅଞ୍ଚଳ ଗସ୍ତ କରିଥିଲେ ।

ଚଳିତ ଗସ୍ତ ଶାହାଙ୍କ ଦ୍ୱିତୀୟଗସ୍ତ ହୋଇଥିବା ବେଳେ କମିଶନ ବିଶେଷଜ୍ଞମାନେ ରାଜ୍ୟକୁ ଗତବର୍ଷ ଅକ୍ଟୋବର ଏବଂ ନଭେମ୍ବରରେ ତଦନ୍ତ ପାଇଁ ଆସିଥିଲେ । କମିଶନଙ୍କର କାର୍ଯ୍ୟକାଳ ୧୬ ଜୁଲାଇ ୨୦୧୨ରେ ଶେଷ ହେଉଥିବାରୁ କେନ୍ଦ୍ର ସରକାର ଆଉ ଏକ ବର୍ଷ ପାଇଁ ଏହା କାର୍ଯ୍ୟକାଳ ବୃଦ୍ଧି କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁଆରୀ ୨୯(ଓଡିଶା ଡଟ୍ କମ୍)-କେନ୍ଦ୍ର ସରକାରଙ୍କକ ପକ୍ଷରୁ ସାମଗ୍ରୀ ଓ ସେବା ଟିକସ ଲାଗୁ ପୂର୍ବରୁ ପର୍ଯ୍ୟାୟକ୍ରମେ ଉଚ୍ଛେଦ ଲାଗି ନିଆଯାଇଥିବା ପଦକ୍ଷେପ ଦଦ୍ୱାରାରାଜ୍ୟ ଗୁଡିକ ବିପୁଳ ଆର୍ଥିକ କ୍ଷତିର ସମ୍ମୁଖୀନ ହୋଇଛନ୍ତି ।

ଏହି କ୍ଷତି ଭରଣା ପାଇଁ ପ୍ରତିଶ୍ରୁତି ଦେଇ କେନ୍ଦ୍ର ସରକାର ପରବର୍ତୀ ସମୟରେ ପଛଘୁଞ୍ଚା ଦେବାରୁ ରାଜ୍ୟ ଗୁଡିକମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି । ଫଳରେ ଏବେ କେନ୍ଦ୍ର ସରକାର ଗତ ୩ ବର୍ଷ ହେଲା ବନ୍ଦ ରଖିଥିବା ଏ ସମ୍ପର୍କିତ କ୍ଷତି ଭରଣାକୁ ପ୍ରଦାନ କରିବା ପାଇଁ ସହମତି ପ୍ରଦାନ କରିଛନ୍ତି ।

ଏ ବାବଦରେ ପ୍ରାୟ ରାଜ୍ୟ ଗୁଡିକ ପକ୍ଷରୁ ୩୪ କୋଟି ଟଙ୍କା କ୍ଷତି ସହିଥିବା ବିଷୟ ଦର୍ଶାଯାଇଛି ବୋଲି ଦେଶର ବିଭିନ୍ନ ରାଜ୍ୟର ଅର୍ଥମନ୍ତ୍ରୀମାନଙ୍କୁ ନେଇ ଗଠିତ କ୍ଷମତା ସମ୍ପନ୍ନ କମିଟିର ଅଧ୍ୟକ୍ଷ ସୁଶିଲ ମୋଦି କହିଛନ୍ତି ।

କେନ୍ଦ୍ର ସରକାର ଜିଏସ୍ଟି ଲାଗୁ କରିବା ପାଇଁ ଏବଂ ଏ ସଂପର୍କିତ କ୍ଷତି ଭରଣା ଉପରେ ଅନୁଧ୍ୟାନ ଲାଗି ଏହି କ୍ଷମତା ସଂପନ୍ନ କମିଟି ଗଠନ କରିଛନ୍ତି । ଏଥିରେ ବିହାର ଅର୍ଥମନ୍ତ୍ରୀ ସୁଶିଲ ମୋଦି ଅଧ୍ୟକ୍ଷ ଅଛନ୍ତି ।

ସୋମବାର ଠାରୁ ଭୁବନେଶ୍ୱରରେ ଦୁଇ ଦିନିଆ ଅର୍ଥମନ୍ତ୍ରୀ ସମ୍ମିଳନୀ ଆରମ୍ଭ ହୋଇଛି । ପ୍ରଥମ ଦିନ ବୈଠକପରେ ସୁଶିଲ ଗଣମାଧ୍ୟମକୁ କହିଥିଲେ ଯେ ୨୦୦୦ ମସିହାରେ ସବୁ ରାଜ୍ୟରୁ ବିକ୍ରି ଟିକସ ଉଚ୍ଛେଦ କରାଯାଇ ଭାଟ୍ ବ୍ୟବସ୍ଥା ଲାଗୁ କରାଯାଇଛି ।

ଏହାପରେ ୨୦୦୮ରେ କେନ୍ଦ୍ର ସରକାରଙ୍କ ପକ୍ଷରୁ ଜିଏସ୍ଟି ଲାଗୁ କରିବା ପାଇଁ ପଦକ୍ଷେପ ନିଆଯାଇଛି । ପୃଥିବୀର ୧୫୦ଟି ଦେଶରେ ଏହା ଲାଗୁ ହୋଇଛି । ଏଥିପାଇଁ କାର୍ଯ୍ୟକ୍ରମ ଖସଡା ପ୍ରସ୍ତୁତ କରିବା ଓ କାର୍ଯକାରୀ କରିବା ଦିଗରେ ୧୩ଟି ରାଜ୍ୟର ଅର୍ଥମନ୍ତ୍ରୀ ଓ ଅଫିସରକୁ ନେଇ କମିଟି ଗଠନ କରାଯାଇଛି ।

ଏହି ବୈଠକରେ ୧୩ ଜଣ ଅର୍ଥମନ୍ତ୍ରୀଙ୍କ ସହ ସବୁ ରାଜ୍ୟର ଅର୍ଥସଚିବ,ବାଣିଜ୍ୟକର କମିସନର,କେନ୍ଦ୍ର ସରକାରଙ୍କ ଅର୍ଥ ବିଭାଗ ଅଧିକାରୀ ପ୍ରମୁଖ ବୈଠକରେ ଉପସ୍ଥିତ ଥିଲେ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୯(ଓଡ଼ିଶା ଡ଼ଟ୍ କମ୍)- ଓଡ଼ିଶା ଆଇନଜୀବୀ କଲ୍ୟାଣପାଣ୍ଠିକୁ ମ୍ୟାଚିଙ୍ଗ ଗ୍ରାଣ୍ଟଦେବା ଲାଗି ରାଜ୍ୟ ସରକାରଙ୍କ ଟାଳଟୁଳ ନୀତି ପ୍ରତିବାଦରେ ନିଖିଳ ଓଡ଼ିଶା ଓକିଲ ସଂଘ ପକ୍ଷରୁ ରାଜ୍ୟବ୍ୟାପି ଚାଲିଥିବା ଧର୍ମଘଟର ଆଜି ହେଉଛି ଦ୍ୱିତୀୟ ଦିନ ।

ଓଡ଼ିଶା ରାଜ୍ୟ ଆଇନଜୀବୀ ପରିଷଦ ଏବଂ ନିଖିଳ ଓଡ଼ିଶା ଓକିଲ ସଂଘର ମିଳିତ ସହଯୋଗରେ ଅନୁଷ୍ଠିତ ଏହି ଦୁଇ ଦିନିଆ କାର୍ଯ୍ୟବନ୍ଦ ଆନ୍ଦୋଳନ ଯୋଗୁ ହାଇକୋର୍ଟ ସମେତ ରାଜ୍ୟର ସମସ୍ତ କୋର୍ଟରେ ବାଧାପ୍ରାପ୍ତ ହୋଇଛି ।

ଧର୍ମଘଟ ଯୋଗୁଁ ଉଭୟ ବିଚାରବିଭାଗୀୟ ଓ ତତସମ୍ବନ୍ଧୀୟ କାର୍ଯ୍ୟାଳୟର ସମସ୍ତ କାର୍ଯ୍ୟ ବାଧାପ୍ରାପ୍ତ ହୋଇଛି ।ଏହି ଆନ୍ଦୋଳନରେ ରାଜ୍ୟର ସମସ୍ତ କୋର୍ଟର ଓକିଲ ସଂଘ ସାମିଲ ହୋଇଛନ୍ତି । ସ୍ଥାନୀୟ ଭୁବନେଶ୍ୱର ଜିଲ୍ଲା ଜଜଙ୍କ କୋର୍ଟ ସାମନାରେ ଆଇନଜୀବୀମାନେ ଶାନ୍ତି ଶୃଙ୍ଖଳାରେ ଧାରଣା ଦେଇଥିଲେ ।

ଗୁରୁବାର ଦିନ ମଧ୍ୟାହ୍ନରେ ନିଖିଳ ଓଡ଼ିଶା ଆଇନଜୀବୀ ସଂଘ, ଓଡ଼ିଶା ରାଜ୍ୟ ଓକିଲ ପରିଷଦ, ହାଇକୋର୍ଟ ଓକିଲ ସଂଘ, ଭୁବନେଶ୍ୱର ଓକିଲ ସଂଘର ସଦସ୍ୟମାନଙ୍କୁ ନେଇ ଏକ ପ୍ରତିନିଧି ଦଳ ରାଜ୍ୟପାଳ ମୁରଲୀଧର ଚନ୍ଦ୍ରକାନ୍ତ ଭଣ୍ଡାରଙ୍କୁ ସାକ୍ଷାତ କରି ୫ ପୃଷ୍ଠା ସମ୍ବଳିତ ଏକ ସ୍ମାରକପତ୍ର ପ୍ରଦାନ କରିଛନ୍ତି ।

ରାଜ୍ୟପାଳଙ୍କୁ ପ୍ରଦାନ କରାଯାଇଥିବା ସ୍ମାରକପତ୍ରରେ ଉଲ୍ଲେଖ କରାଯାଇଛି, ଆଇନଜୀବୀମାନଙ୍କର କୌଣସି ସାମାଜିକ ନିରାପତା ନାହିଁ । ବୃଦ୍ଧା ଅବସ୍ଥା, ରୋଗାଗ୍ରସ୍ତ ଓ ଅକାଳ ବିୟୋଗ ସମୟରେ ସେମାନଙ୍କ ପରିବାର ବେସାହାରା ହୋଇପଡୁଛି ।

ଏସବୁକୁ ଦୃଷ୍ଟିରେ ରଖି କେନ୍ଦ୍ର ସରକାର ୨୦୦୧ ଆଇନଜୀବୀ କଲ୍ୟାଣ ପାଣ୍ଠି,୨୦୦୧କୁ କାର୍ଯ୍ୟକାରୀ କରିବା ଲାଗି ଏହାକୁ ଆଇନରେ ପରିଣତ କରିଥିଲେ ମଧ୍ୟ ଏହି କେନ୍ଦ୍ରୀୟ ଆଇନକୁ ଓଡ଼ିଶା ସରକାର କାର୍ଯ୍ୟକାରୀ କରୁ ନାହାନ୍ତି ।

ଏଥିରୁ ରାଜ୍ୟ ସରକାରଙ୍କର ଓକିଲମାନଙ୍କ ପ୍ରତି ରହିଖିବା ବୈମାତୃକ ମନୋଭାବ ସ୍ପଷ୍ଟ ହୋଇଛି । ଅନ୍ୟ ୧୬ଟି ରାଜ୍ୟରେ ଏହି କଲ୍ୟାଣ ପାଣ୍ଠି ବ୍ୟବସ୍ଥା କାର୍ଯ୍ୟକାରୀ କରାଯାଇ ସାରିଲାଣି । ବିଗତ ୩୦ ବର୍ଷ ଧିର ରାଜ୍ୟ ସରକାର ଏହାକୁ ଟାଳି ଆସୁଛନ୍ତି । ଏନେଇ ସଂଘ ପକ୍ଷରୁ ରାଜ୍ୟପାଳଙ୍କ ଦୃଷ୍ଟି ଆକର୍ଷଣ କରାଯାଇଛି ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୮(ଓଡ଼ିଶା ଡ଼ଟ୍ କମ୍)-ଗୁରୁବାର ବେଆଇନ ଖଣିିଜ ପଦାର୍ଥ ଉତୋଳନ ମାମଲାରେ ଜିନ୍ଦଲ ଓ ସାରଦା ଖଣି କର୍ତୃପକ୍ଷକୁ ଜେରା କରିଥିବା ବେଳେ ଶୁକ୍ରବାର ଦିନ ତ୍ରିବେଣୀ ଆର୍ଥ ମୋଭରସ୍ କମ୍ପାନୀକୁ ପଚରା ଉଚରା କରିବାକୁ ସାହା କମିଶନ ସ୍ଥିର କରିଛନ୍ତି ।

କେତେକ ଖଣି କମ୍ପାନୀରେ ତ୍ରିବେଣୀ ପୁଞ୍ଜି ଖଟାଇଥିବା କମିଶନରଙ୍କ ନଜରକୁ ଆସିଛି । ଏମ୍ ସିଆର ଧାରା ୧୯୬୦,ଧାରା ୩୭ ଅନୁସାରେ କେନ୍ଦ୍ର ସରକାରଙ୍କ ପୂର୍ବ ଅନୁମତି ବିନା କୌଣସି ଲିଜ୍ଧାରୀ ଆଉ କାହାକୁ ଖଣି ସବ୍ଲେଟ ଦେଇ ପାରିବେ ନାହିଁ । କିମ୍ବା ଖଣିରେ ଆଉ କେହି ଅର୍ଥ ନିବେଶ କରିପାରିବେ ନାହିଁ ।

କବିତା ଅଗ୍ରୱାଲ, ଆରିୟାନ ଏଣ୍ଡ କୋ ମାଇନ୍ସ , ମାଲାରାୟ ଆଣ୍ଡ ଅଦରସ୍, ମେସ୍କୋ, ଶାରଦା, ଆରପିସାଓ ମାଇନ୍ସ, କେଜେଏସ୍ ଆଲୁୱାଲିଆ, ଇନ୍ଦ୍ରାଣି ପଟ୍ଟନାୟକ ଭଳି ରାଜ୍ୟର ପ୍ରାୟ ୧୦ଟି ଖଣି କମ୍ପାନୀ ଏହିଭଳି ଆଇନ ଉଲ୍ଲଘଂନ କରିଥିବାର ଅଭିଯୋଗ ହୋଇଥିଲା । ରାଜ୍ୟ ସରକାରଙ୍କ ଅଜାଣତରେ ଏବଂ ଅନୁମୋଦନ ବିନା ଉତୋଳନ କାମରେ ଲାଗିଥିବା କମ୍ପାନୀ ଖଣିକାରବାରରେ ପୁଞ୍ଜି ବିନିଯୋଗ କରିବା ବେଆଇନ ବୋଲି ରାଜ୍ୟ ଖଣିନିର୍ଦ୍ଦେଶକ ଦୀପକ ମହାନ୍ତି କହିଛନ୍ତି ।

ଶାହା କମିଶନଙ୍କ ପ୍ରତିନିଧିଦଳ ଆସନ୍ତାକାଲି ମୁଖ୍ୟ ଶାସନ ସଚିବଙ୍କୁ ଭେଟି ଖଣି ଦୁର୍ନୀତି ସଂପର୍କରେ ତଥ୍ୟ ସଂଗ୍ରହ କରିବେ । ଏହାସହ କାଲି କମିଶନରଙ୍କ ଆଗରେ ଆୟକର ଓ ବିକ୍ରିକର ବିଭାଗର ଅଧିକାରୀ ହାଜର ହେବାକୁ ନିର୍ଦ୍ଦେଶ ଦିଆଯାଇଛି ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୨ (ଓଡ଼ିଶା ଡ଼ଟ୍ କମ୍)– ଓଡିଶାରେ ୪ ଟି ନୂତନ ମେଡିକାଲ କଲେଜ ପ୍ରତିଷ୍ଠା କରିବା ନିମନ୍ତେ କେନ୍ଦ୍ର ସରକାର ଶତ ପ୍ରତିଶତ ସହାୟତା ପ୍ରଦାନକରିବାକୁ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡାଃ ଦାମୋଦର ରାଉତ ଦାବି କରିଛନ୍ତି ।

କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ତରଫରୁ ନୂଆଦିଲ୍ଲୀ ଠାରେ ଆୟୋଜିତ ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ଓ ସଚିବ ମାନଙ୍କ ଦୁଇଦିନିଆ ବୈଠକରେ ଯୋଗ ଦେଇ ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ଡାଃ ରାଉତ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିବା ସହିତ ଏହି ଦାବି କରିଛନ୍ତି ।

ଗତ କାଲି ବୈଠକରେ ସେ ଓଡିଶାର ସ୍ୱାସ୍ଥ୍ୟ ସେବା ସଂପର୍କରେ ଆଲୋକପାତ କରି କହିଛନ୍ତି ଯେ ଓଡିଶାରେ ଗତ ୧୧ ବର୍ଷ ମଧ୍ୟରେ ସ୍ୱାସ୍ଥ୍ୟସେବା କ୍ଷେତ୍ରରେ ଅନେକ ଉନ୍ନତି ଆସିଛି ।

ବିଶେଷକରି ମାତୃ ଓ ଶିଶୁ ମୃତ୍ୟୁହାର ହ୍ରାସ କ୍ଷେତ୍ରରେ ନିୟମିତ ଭାବେ ହ୍ରାସ ପାଉଥିଲେ ମଧ୍ୟ ପ୍ରକୃତ ଲକ୍ଷ୍ୟ ହାସଲ ଦିଗରେ ଉଦ୍ୟମ ଅବ୍ୟାହତ ରହିଛି । ଆନୁଷ୍ଠାନିକ ପ୍ରସବ ହାର ୮୫ ପ୍ରତିଶତରେ ପହଞ୍ଚିଛି ।

ଜାତୀୟ ଗ୍ରାମୀଣ ସ୍ୱାସ୍ଥ୍ୟ ମିଶନ ତରଫରୁ ଗ୍ରାମାଞ୍ଚଳରେ ନିୟୋଜିତ ୪୨ ହଜାରରୁ ଉର୍ଦ୍ଧ୍ଵ ଆଶା ସ୍ୱାସ୍ଥ୍ୟସେବାକୁ ଲୋକଙ୍କ ପାଖରେ ପହଞ୍ଚାଇବା ଦିଗରେ କାର୍ଯ୍ୟ କରୁଛନ୍ତି । ବିଶେଷ କରି ଗର୍ଭବତୀ ମହିଳା ଏବଂ ନବଜାତ ଶିଶୁଙ୍କ ସ୍ୱାସ୍ଥ୍ୟର ସୁରକ୍ଷା ପାଇଁ ସହାୟକ ହୋଇ ପାରିଛନ୍ତି ।

ତେବେ ରାଜ୍ୟର ସ୍ୱାସ୍ଥ୍ୟ ସେବାର ପରିସ୍ଥିତିକୁ ଦୃଷ୍ଟିରେ ରଖି ଏବଂ ଆବଶ୍ୟକତା ଅନୁଯାୟୀ ଡାକ୍ତର ଏବଂ ପାରାମେଡିକ ମାନଙ୍କ ଅଭାବ ଦୂର କରିବା ନିମନ୍ତେ ରାଜ୍ୟରେ ୪ଟି ସରକାରୀ ମେଡିକାଲ କଲେଜ ପ୍ରତିଷ୍ଠା କରିବା ପାଇଁ କେନ୍ଦ୍ରସରକାର ଶତ ପ୍ରତିଶତ ସହାୟତା ପ୍ରଦାନ କରିବାକୁ ସେ ଦାବି କରିବା ସହିତ ଅଧିକ ଏ.ଏନ୍.ଏମ୍ ଏବଂ ଜି.ଏନ୍.ଏମ୍ ତାଲିମ୍ କେନ୍ଦ୍ର ପ୍ରତିଷ୍ଠା ନିମନ୍ତେ ମଞ୍ଜୁରୀ ପ୍ରଦାନ କରିବାକୁ କହିଛନ୍ତି ।

ସେହିପରି ରାଜ୍ୟରେ କାର୍ଯ୍ୟକାରୀ ହେଉଥିବା ଜାତୀୟ ଗ୍ରାମୀଣ ସ୍ୱାସ୍ଥ୍ୟ ମିଶନ ପାଇଁ ରାଜ୍ୟ ସରକାରଙ୍କ ଅଂଶଧନ ୨୫ ପ୍ରତିଶତରୁ ୧୫ ପ୍ରତିଶତକୁ ହ୍ରାସ କରିବାକୁ କେନ୍ଦ୍ରସ୍ୱାସ୍ଥ୍ୟ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି ।

ଆହୁରିମଧ୍ୟ ରାଜ୍ୟର ସରକାରୀ ମେଡିକାଲ କଲେଜ ଓ ହସପିଟାଲରେ ଆଞ୍ଚଳିକ ଜରା ଓ କର୍କଟ କେନ୍ଦ୍ର ପ୍ରତିଷ୍ଠାକରାଯିବା , ଯୋଗ ଓ ନେଚରପାଥି କେନ୍ଦ୍ର ପ୍ରତିଷ୍ଠା କରାଯିବା ଏବଂ ସ୍ୱାସ୍ଥ୍ୟସେବା କ୍ଷେତ୍ରରେ କାର୍ଯ୍ୟକାରୀ କରାଯାଉଥିବା ବିଭିନ୍ନ କାର୍ଯ୍ୟକ୍ରମ ପାଇଁ ଅଧିକ କେନ୍ଦ୍ରିୟ ସହାୟତା ପ୍ରଦାନକରିବାକୁ କେନ୍ଦ୍ର ନିକଟରେ ଦାବି କରିଛନ୍ତି ।

ଏହି ବୈଠକରେ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ କମିଶନର ତଥା ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଏବଂ ଜାତୀୟ ଗ୍ରାମୀଣ ସ୍ୱାସ୍ଥ୍ୟ ମିଶନ ନିଦେ୍ର୍ଧଶକ ଡାଃ ପ୍ରମୋଦ ମେହେର୍ଦ୍ଧା ମଧ୍ୟ ଯୋଗ ଦେଇଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୨୦(ଓଡ଼ିଶା ଡ଼ଟ୍ କମ୍) –ରେଳବାଇ କ୍ଷେତ୍ରରେ ଓଡିଶାକୁ ବାରମ୍ବାରର ଅବହେଳା ପ୍ରତିବାଦରେ ଆଜି ବିଜେଡି ବିଧାୟକମାନଙ୍କର ଏକ ପ୍ରତିନିଧିଦଳ ରାଜ୍ୟପାଳ ଶ୍ରୀ ମୁରଲୀଧର ଚନ୍ଦ୍ରକାନ୍ତ ଭଣ୍ଡାରିଙ୍କୁ ଭେଟି ସ୍ମାରକ ପତ୍ର ପ୍ରଦାନ କରିଛନ୍ତି ।

ଏହି ପ୍ରତିନିଧି ଦଳରେ ବହୁ ବିଧାୟକ ଓ କର୍ମୀମାନେ ସାମିଲ ହୋଇଛନ୍ତି । ଓଡିଶାପାଇଁ କେନ୍ଦ୍ରର ବରାଦ ମୁତାବକ କେନ୍ଦ୍ରର ଅନୁଦାନ ଅର୍ଥକୁ ବିଭିନ୍ନ ସମୟରେ କାଟିନେଇଥିବା ଅର୍ଥକୁ ପୁର୍ନବାର ଫେରାଇବାକୁ ଏହି ବିଧାୟକମାନେ ଦାବି କରିଛନ୍ତି ।

୨୦୧୨ ରେଳ ବଜେଟରେ ଓଡିଶା ପାଇଁ ୭୨୩କୋଟି ଟଙ୍କା ବରାଦ ହୋଇଥିଲା ତେବେ ଏଥିରୁ ଗତ ଜୁନ ମାସରେ ୧୮୬କୋଟି ଟଙ୍କା ଓ ପରେ ସେପ୍ଟେମ୍ବରରେ ୩୪ କୋଟି ଟଙ୍କା କାଟିଦିଆ ଯାଇଥିଲା ।

ଓଡଶାପାଇଁ ଏବର୍ଷ ରାଜ୍ୟ ସରକାରଙ୍କ ପକ୍ଷରୁ ୨୩୪୫କୋଟି ଟଙ୍କା ଦାବି କରା ଯାଇଥିଲା ହେଲେ କେନ୍ଦ୍ର ସରକାର ୭୨୩ କୋଟି ଟଙ୍କା ବ୍ୟୟ ବରାଦ କରିଥିଲେ ।

କିନ୍ତୁ ଏହି ଅର୍ଥରୁ ଦୁଇଟି ପର୍ଯ୍ୟାୟରେ ୨୨୦କୋଟି ଏଥିରୁ ଟଙ୍କା କାଟି ଦେଇଛନ୍ତି । ଯାହାକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୃଢ ପ୍ରତିବାଦ କରି ରେଳମନ୍ତ୍ରୀ ଡ.ସି.ପି.ଯୋଶୀଙ୍କୁ ଚିଠି ଲେଖିଥିଲେ ।

ଓଡିଶାର ଯେଉଁ ଶିଳ୍ପର ଅବିବୃଦ୍ଧି ହୋଇଛି,ବନ୍ଦରର ସମ୍ଭାବନା ସୃଷ୍ଟି ହୋଇଛି ଏହି କାଟିଦେବା ଫଳରେ ତାହା ବାଧାପ୍ରାପ୍ତ ହେବ ବୋଲି ଯୁବ ବିଜେଡି ସଂଭାପତି ସଂଜୟଦାସ ବର୍ମା ଓଡିଶା ଡ଼ଟ୍ କମ୍ କୁ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୯ (ଓଡିଶା ଡଟ୍ କମ୍)-ବିଜୁ ମହିଳା ଜନତା ଦଳ ପକ୍ଷରୁ କେନ୍ଦ୍ର ଉପା ସରକାରଙ୍କ ଦ୍ୱାରାରନ୍ଧନ ଗ୍ୟାସ୍ର କଟକଣା ଓ ମୁଲ୍ୟ ବୃଦ୍ଧି ପ୍ରତିବାଦରେ ଭୁବନେଶ୍ୱରସ୍ଥ ରାଜଭବନ ସମ୍ମୁଖରେ ଧାରଣା ଓ ବିକ୍ଷୋଭ ସଭା ଅନୁଷ୍ଠିତ ହୋଇଯାଇଛି ।

ବିଜୁ ମହିଳା ଜନତା ଦଳର ରାଜ୍ୟ ସଭାନେତ୍ରୀ ତଥା ପୁର୍ବତନ ମନ୍ତ୍ରୀ ଶ୍ରୀମତୀ ପ୍ରମିଳା ମଲ୍ଲିକଙ୍କ ନେତୃତ୍ୱରେ ଅନୁଷ୍ଠିତ ପ୍ରତିବାଦ ସଭାରେ ଯୋଗଦେଇ କହିଥିଲେ ଯେ, ରନ୍ଧନ ଗ୍ୟାସ୍ର ଆକାଶଛୁଆଁ ଦରବୃଦ୍ଧି ସାଧାରଣ ଜନତା ଓ ଗୃହିିଣୀଙ୍କର ଆର୍ଥିକ ମେରୁଦଣ୍ଡକୁ ଦୋହଲାଇ ଦେବ ।

ଏହା ଦ୍ୱାରାସାଧାରଣ ଜନତା, ଖଟିଖିଆ, ଗରୀବ ତଥା ନିମ୍ନମଧ୍ୟବିତ ପରିବାର ବର୍ଗ ବିଶେଷଭାବରେ ପ୍ରଭାବିତ ହେବେ ଓ ଏହା ବୋଝ ଉପରେ ନଳିତା ବିଡା ସଦୃଶ ।

କେନ୍ଦ୍ର ସରକାର ନିଜକୁ ଆମ୍ ଆଦମୀର ସରକାର କହି ଡିଣ୍ଡିମ ପିଟୁଥିବାବେଳେ ଏହା କେଉଁପରି ଭାବରେ ସେହି ସାଧାରଣ ଜନତାର ହିତରେ ସହାୟକ ହେବ, ତାହା ଆଜି ସାଧାରଣ ଜନତାର ପ୍ରଶ୍ନ ।

ରାଜ୍ୟ ବିଜୁ ମହିଳା ଜନତା ଦଳ କେନ୍ଦ୍ର କଂଗ୍ରେସ ସରକାରଂକର ଏତାଦୃଶ ଜନବିରୋଧି, ଅଗଣତାନ୍ତ୍ରୀକ, ସ୍ୱେଚ୍ଛାଚାର ଓ ଅହେତୁକ ଦରବୃଦ୍ଧି ନିଷ୍ପତିକୁ ଦୃଢ ନିନ୍ଦା କରିଛି ।

କେନ୍ଦ୍ର ଉପା ସରକାରଂକର ଏଭଳି ନିଷ୍ପତିକୁ ତୁରନ୍ତ ପ୍ରତ୍ୟାହାର କରିବା ପାଇଁ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଓଡିଶାର ରାଜ୍ୟପାଳଙ୍କ ଜରିଆରେ ଏକ ସ୍ମାରକ ପତ୍ର ଦିଆଯାଇଛି ।

ଯଦି କେନ୍ଦ୍ର ସରକାର ଏଭଳି ଜନବିରୋଧି ନିଷ୍ପତିରୁ ବିରତ ନ ରୁହନ୍ତି, ତେବେ ଆଗାମୀ ଦିନରେ ବିଜୁ ମହିଳା ଜନତା ଦଳ ରାଜରାସ୍ତାକୁ ଓହ୍ଲାଇ ଜିଲ୍ଲା ସଦର ମହକୁମା, ବ୍ଲକ୍ ସଦର ମହକୁମାରେ ଆନ୍ଦୋଳନ ଜାରି ରହିବ ବୋଲି ମଲ୍ଲିକ ଘୋଷଣା କରିଥିଲେ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭଦ୍ରକ,ଅକ୍ଟେବର ୫ (ଓଡ଼ିଶା ଡ଼ଟ୍ କମ୍) – ବିଜେଡି ପକ୍ଷରୁ ଗାନ୍ଧୀ ଜୟନ୍ତୀ ଦିନ ଭଦ୍ରକ, ଧାମନଗର ଓ ଭଣ୍ଡାରିପୋଖରୀ ବିଧାନସଭା କ୍ଷେତ୍ରରେ ଜନସମ୍ପର୍କ ପଦଯାତ୍ରା ଆୟୋଜନ ହୋଇଯାଇଛି ।

ତେବେ ବିଲକ୍ଷଣ ହେଲା, ବିଜେଡି ପଦଯାତ୍ରାକୁ ନେଇ ଭଦ୍ରକ ବିଜେଡିରେ ଫାଟ । ଏଠାରେ ଯୁଗଳ ଓ ପ୍ରଫୁଲ୍ଲ ଗୋଷ୍ଠୀ ପକ୍ଷରୁ ସମାନ୍ତରାଳ ପଦଯାତ୍ରାର ଆୟୋଜନ ଭଦ୍ରକ ରାଜନୀତିରେ ଆଲୋଚ୍ୟ ପ୍ରସଙ୍ଗ ହୋଇଛି ।

କେନ୍ଦ୍ର ସରକାରଙ୍କୁ ଟାର୍ଗେଟ କରି ବିଜେଡି ଆଡୁ ଏହି ପଦଯାତ୍ରାର ଆୟୋଜନ ହେଉଥିଲେ ହେଁ ଅସଲରେ ପାରୀଙ୍କ ଅନୁପସ୍ଥିତିରେ ସଂଗଠନରେ ସାମାନ୍ୟ ହଲଚଲ ନାହିଁ ବୋଲି ସୂଚାଇଦେବାକୁ ଚେଷ୍ଟା କରାଯାଇଛି ।

ତେବେ ପୂର୍ବବର୍ଷ ଭଳି ଏଥରକ ସଭାସମିତିରେ ଆଉ ପ୍ୟାରୀବାବୁଙ୍କ ନାମ କେହି ନେତାଏ ନେଉନାହାନ୍ତି । ନବୀନ ପଟନାୟକ ହିଁ ଦଳର ସର୍ବମାନ୍ୟ ନେତା ଓ ତାଙ୍କରି ନେତୃତ୍ୱରେ ଓଡିଶା ପ୍ରଗତି ପଥରେ ଆଗେଇ ଚାଲିଛି ବୋଲି ବିଜେଡି ନେତାମାନେ ପ୍ରଚାର କରୁଛନ୍ତି ।

ଗୋଟିଏ ପକ୍ଷ ଅପରପକ୍ଷ ବିରୋଧରେ ଖୋଲାଖୋଲି ଭାବେ ଗଣମାଧ୍ୟମକୁ ବିବୃତି ରଖିବା ମଧ୍ୟ ଦଳୀୟ ଶୃଙ୍ଖଳା ପ୍ରତି ଚାଲେଞ୍ଜ ଆଣିଛି ।

ଅତୀତରେ ପ୍ରଫୁଲ୍ଲ ସମର୍ଥକମାନେ ଦଳଭିତରେ ସାଂସଦ ଶ୍ରୀ ସେଠୀଙ୍କୁ ଅନେକ ସମୟରେ ଅଡୁଆ ପରିସ୍ଥିତିରେ ପକାଉଥିଲେ । ମାତ୍ର ମନ୍ତ୍ରୀପଦ ଗଲା ପରେ ପ୍ରଫୁଲ୍ଲବାବୁଙ୍କ ସମର୍ଥକମାନେ ଯୁଗଳବାବୁଙ୍କ ସମର୍ଥକଙ୍କ ବିରୋଧରେ ସାଂସଦ ଶ୍ରୀ ସେଠୀଙ୍କ ନିକଟରେ ଫେରାଦ ହେବା କଥା କହୁଛନ୍ତି ।

ଅର୍ଥାତ ବିଜେଡିରେ ପ୍ୟାରୀ ଫାକ୍ଟର ଆଉ କାମ କରୁନଥିବାରୁ ଜିଲା ରାଜନୀତିରେ ସାଂସଦ ଶ୍ରୀ ସେଠୀ ହିଁ ସବୁଠାରୁ ପ୍ରଭାବଶାଳୀ ଏକଥା ବୁଝାପଡୁଛି ।

ଜିଲାରେ ଜନସମ୍ପର୍କ ଅଭିଯାନର ନେତୃତ୍ୱ ନେଉଛନ୍ତି ଜିଲା ବିଜେଡି ସଭାପତି ତଥା ସାଂସଦ ଅର୍ଜୁନ ସେଠୀ । ଦଳୀୟ ପର୍ଯ୍ୟବେକ୍ଷକ ଭାବେ ହୁସେନ ରବି ଗାନ୍ଧୀ ମଧ୍ୟ ପଦଯାତ୍ରାରେ ସାମିଲ ହେଉଛନ୍ତି ।

କେନ୍ଦ୍ରର ୟୁପିଏ ସରକାର ଓଡିଶାକୁ ଅବହେଳା କରୁଥିବା ନେଇ ପାରମ୍ପରିକ ଆରୋପ ସହିତ କେନ୍ଦ୍ର ସରକାରରେ ସଂଘଟିତ ମହାଦୁର୍ନୀତି ସଂପର୍କରେ ପଦଯାତ୍ରା ପରର ସଭାରେ ବିଜେଡି ନେତାମାନେ ଭାଷଣ ରଖୁଛନ୍ତି ।

ଓଡ଼ିଶା ଡ଼ଟ୍ କମ୍