ନବୀନ ପଟ୍ଟନାୟକ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୩(ଓଡିଶା ଡଟ୍ କମ୍)-ଗ୍ରାମାଚଂଳ ତଥା ଆଦିବାସୀ ଛାତ୍ରଛାତ୍ରୀମାନଙ୍କ ମଧ୍ୟରେ ଥିବା ପ୍ରତିଭାର ବିକାଶ ଉପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁତ୍ୱ ଆରୋପ କରିଛନ୍ତି ।

ସ୍ଥାନୀୟ ୟୁନିଟ ୩ ହାଇସ୍କୁଲ ପଡିଆଠାରେ ଶନିବାର ଦିନ ଆୟୋଜିତ ରାଜ୍ୟସ୍ତରୀୟ ପ୍ଲାଟିନମ୍ ଜାମ୍ବୋରୀ ଉଦ୍ୟାପନ ଉତ୍ସବରେ ମୁଖ୍ୟ ଅତିଥିରୂପେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍କାଉଟ ଗାଇଡ୍ ସଂଗଠନକୁ ଗ୍ରାମାଚଂଳ ଓ ଆଦିବାସୀ ଅଂଚଳରେ ପ୍ରସାର କରିବା ଉପରେ ଗୁରୁତ୍ୱ ଦେଇଥିଲେ ।

ମୁଖ୍ୟମନ୍ତ୍ରୀ କହିଲେ ଯେ,ସ୍କାଉଟ ଗାଇଡ ଆନ୍ଦୋଳନ ଯୁବ ସମାଜ ମଧ୍ୟରେ ଆତ୍ମ ନିର୍ଭରତା ଦଦାୟିତ୍ୱ ବୋଧ ଏବଂ ନିଷ୍ଠାପର ଗୁଣର ବିକାଶରେ ସଫଳ ହୋଇ ପାରିଛି । ପ୍ରାକୃତିକ ବିପର୍ଯ୍ୟୟ ଠାରୁ ଆରମ୍ଭକରି ଯାନିଯାତ୍ରା ଆଦି ଉତ୍ସବ ଅନୁଷ୍ଠାନରେ ସ୍କାଉଟ୍ ଗାଇଡି ପିଲାମାନେ ଯେପରି ଉଚ୍ଚମାନର ସେବା ଯୋଗାଇ ଦେଇ ଆସୁଛନ୍ତି ମୁଖ୍ୟମନ୍ତ୍ରୀ ତାର ଉଚ୍ଚ ପ୍ରଶଂସା କରିଥିଲେ ।

ଭାରତ ସ୍କାଉଟ ଓ ଗାଇଡର ଓଡିଶା ଶାଖାର ସଭାପତି ଶ୍ରୀ ବିଷ୍ଣଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସ୍କୁଲ ଓ ଗଣଶିକ୍ଷାମନ୍ତ୍ରୀ ଶ୍ରୀ ରବି ନାରାୟଣ ନନ୍ଦ,ସାଂସଦ ପ୍ରଶନ୍ନ ପାଟଶାଣୀ,ବିଧାୟକ ସର୍ବଶ୍ରୀ ଅଶୋକ ପଣ୍ଡା,ଭାଗୀରଥି ବଡଜେନା,ବିଜୟ ମହାନ୍ତି ପ୍ରମୁଖ ଉଦ୍ବୋଧନ ଦେଇଥିଲେ ।

ସ୍କାଉଟ ଓ ଗାଇଡର ଚିଫ୍ କମିଶନର ଶ୍ରୀ କାଳି ପ୍ରସାଦ ମିଶ୍ର ସ୍ୱାଗତ ଭାଷଣ ଦେଇଥିଲେ । ଜଷ୍ଟିସ ମନୋରଂଜନ ମହାନ୍ତି ଧନ୍ୟବାଦ ଜଣାଇଥିଲେ । ଏହି ଅବସରରେ ମୁଖ୍ୟମନ୍ତ୍ରୀ ଉଲ୍ଲେଖନୀୟ ସେବାପାଇଁ ବିଦ୍ୟାଳୟର ଛାତ୍ରଛାତ୍ରୀମାନଙ୍କୁ ପୁରସ୍କୃତ କରିଥିଲେ । ଶେଷରେ ସ୍କାଉଟ ଓ ଗାଇଡସ୍ ମାନେ ଚିତାକର୍ଷକ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୧(ଓଡିଶା ଡଟ୍ କମ୍)-ଗଣଶିକ୍ଷକଙ୍କ ସମସ୍ୟା ଓ ନାଲକୋରୁ ପୁଞ୍ଜି ପ୍ରତ୍ୟାହାର ନେଇ ମଙ୍ଗଳବାର ଦିନ ବିଧାନସଭାରେ ଉଦ୍ବେଗ ପ୍ରକାଶ ପାଇଛି ।

ଗଣଶିକ୍ଷକଙ୍କ ସମସ୍ୟା ସମାଧାନ ପାଇଁ ଉଭୟ ଶାସକ ଓ ବିରୋଧୀ ସଭ୍ୟମାନେ ଦାବି କରିଥିବା ବେଳେ ଶାସକ ବିଜେଡି ଦଳର ସଭ୍ୟମାନେ ନାଲକୋରୁ ପୁଞ୍ଜି ପ୍ରତ୍ୟାହାର ନିଷ୍ପତି ବିରୋଧରେ ସର୍ବସମ୍ମତ ପ୍ରସ୍ତାବ ଆଣିବା ପାଇଁ ମତ ରଖିଥିଲେ ।

ମଙ୍ଗଳବାର ଦିନ ଶୂନ୍ୟକାଳରେ ବିରୋଧିଦଳ ନେତା ଭୂପିନ୍ଦର ସିଂ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରି କହିଲେ ଯେ,ସରକାର ଶିକ୍ଷକଙ୍କ ପ୍ରତି ପାତର ଅନ୍ତର କରିଛନ୍ତି । ସେମାନଙ୍କ ପେଟପାଟଣାକୁ ନେଇ ରାଜନୀତି କରୁଛନ୍ତି ।

ଆଜି ଗଣଶିକ୍ଷକମାନେ ବିଧାୟକମାନଙ୍କ ବାସଭବନକୁ ଘେରାଉ କରିଛନ୍ତି । ବିଧାୟକମାନେ ବିଧାନସଭା ଆସିବାକୁ ଅସୁବଧାର ସମ୍ମୁଖୀନ ହୋଇଛନ୍ତି । ସରକାର ସେମାନଙ୍କ ସମ୍ପର୍କରେ ତୁରନ୍ତ ନିଷ୍ପତି ନେବା ଦରକାର ବୋଲି ଶ୍ରୀ ସିଂ କହିଥିଲେ ।

ସରକାରୀ ଦଳର ଉପମୁଖ୍ୟ ସଚେତକ ସଂଜୟ ଦାସବର୍ମା କହିଲେ ଯେ,ଗଣ ଶିକ୍ଷକଙ୍କ ପ୍ରତି କେବଳ ବିରୋଧୀ ଦଳର ଦରଦ ଅଛି ବୋଲି ଦେଖାଇ ହୁଅନ୍ତୁ ନାହିଁ । ସେମାନଙ୍କ ପ୍ରତି ସରକରା ମଧ୍ୟ ସଚେତନ ଅଛନ୍ତି ।

ବିଜେଡି ସରକାର ସେମାନଙ୍କୁ ଗଣଶିକ୍ଷକ କରୁଛନ୍ତି । ଶିକ୍ଷକମାନଙ୍କ ସମସ୍ୟାର ସମାଧାନକେବଳ ନବୀନ ପଟ୍ଟନାୟକଙ୍କ ସରକାର ହିଁ କରିଛନ୍ତି ବୋଲି ସେ କହିଛନ୍ତି । ଶ୍ରୀ ଦାସବର୍ମା କହିଲେ ଯେ,ଗତ ସେପ୍ଟେମ୍ବର ୧୪ ତାରିଖରେ କେନ୍ଦ୍ର ସରକାର ରାଷ୍ଟ୍ରାୟତ ଉଦ୍ୟୋଗ ନାଲକୋରୁ ୧୨.୧୫ ପ୍ରତିଶତ ପୁଞ୍ଜି ପ୍ରତ୍ୟାହାର ପାଇଁ ନିଷ୍ପତି କରିଛନ୍ତି । ଏହି ନିସ୍ପତି ରାଜ୍ୟ ସ୍ୱାର୍ଥ ପରିପନ୍ଥୀ ।

ତେଣୁ କେନ୍ଦ୍ର ସରକାର ଏହି ନିସ୍ପତି ପ୍ରତ୍ୟାହାର କରିବା ପାଇଁ ବିଧାନସଭାରେ ସର୍ବସମ୍ମତ ପ୍ରସ୍ତାବ ଗ୍ରହଣ କରାଯାଇ କେନ୍ଦ୍ରକୁ ପଠାଯାଉ ବୋଲି ସେ କହିଥିଲେ ।

ବିଜେପିର କନକବର୍ଦ୍ଧନ ସିଂଦେଓ କହିଲେ ଯେ ଗଣଶିକ୍ଷକଙ୍କ ସମସ୍ୟା ସମାଧାନ ହେବା ଉଚିତ୍ । ବିଧାନସଭା ଅଧିବେଶନ ସମୟରେ ଯେଉଁମାନେ ଆନ୍ଦୋଳନ କରିବେ ଯଦି ସେମାନଙ୍କ ସମସ୍ୟା ସମାଧାନ କରାଯିବ ତାହା ଏକ ଖରାପ ପରମ୍ପରା ସୃଷ୍ଟି କରିବ ।

ତେଣୁ ଆନ୍ଦୋଳନ ହେବାପୂର୍ବରୁ ସମସ୍ୟାର ସମାଧାନ କରାଯାଉ । ଏହାଛଡା ନାଲକୋ ପୁଞ୍ଜି ପ୍ରତ୍ୟାହାର ନିଷ୍ପତିକୁ ସେ ବିରୋଧ କରୁଛନ୍ତି । ନାଲକୋ ଏକ ଲାଭଜନକ ସଂସ୍ଥା । ଏହାର ପୁଞ୍ଜି ପ୍ରତ୍ୟାହାର ରାଜ୍ୟ ସ୍ୱାର୍ଥର ପରିପନ୍ଥୀ ।

ଅନ୍ୟମାନଙ୍କ ମଧ୍ୟରେ ବିଧାୟକ ପ୍ରଦୀପ ମହାରଥୀ,ଅମର ପ୍ରସାଦ ଶତପଥୀ,ରଣେନ୍ଦ୍ର ପ୍ରତାପ ସ୍ୱାଇଁ,ପ୍ରଫୁଲ ମାଝି,ଚକ୍ରଧର ପାଇକ,ଅନଙ୍ଗ ଉଦୟ ସିଂହଦେଓ ପ୍ରମୁଖ ଏହି ଦଦୁଇ ପ୍ରସଙ୍ଗରେ ନିଜ ନିଜର ମତ ରଖିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୬(ଓଡିଶା ଡଟ୍ କମ୍)-ବିଜେଡିରୁ ବହିଷ୍କାର ନିଷ୍ପତିକୁ ସୁପ୍ରୀମ କୋର୍ଟରେ ଚ୍ୟାଲେଞ୍ଜ କରିବେ ସାଂସଦ ପ୍ୟାରୀମୋହନ ମହାପାତ୍ର । ଗଣମାଧ୍ୟମକୁ ଆଜି ଏ ସଂପର୍କରେ ସେ ସୂଚନା ଦେଇଛନ୍ତି ।

ସେ କହିଛନ୍ତି ତାଙ୍କୁ ଯେଉଁ ଭଳି ଭାବରେ ବହିଷ୍କୃତ କରାଯାଇଛି ତାହା ବେଆଇନ । ସେ ଖବ୍ ଶୀଘ୍ର ଅଦାଲତର ଆଶ୍ରୟ ନେବେ ।

ଗତ ମେ ତଥାକଥିତ ମିଡ୍ ନାଇଟ ଅପରେସନ ପରେ ପ୍ୟାରୀମୋହନଙ୍କୁ ଦଳରୁ ନିଲମ୍ବିତ କରାଯାଇଥିଲା । ଏ ସଂପର୍କରେ ଘୋଷଣା କରିଥିଲେ ବିଜେଡି ସୁପ୍ରୀମୋ ନବୀନ ପଟ୍ଟନାୟକ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୧୯(ଓଡ଼ିଶା ଡ଼ଟ୍ କମ୍) – ମୋ ସାଥିରେ କେହି ରହିଲେ ବା ନରହିଲେ ତାହା ମୋ ପାଇଁ ଗୁରୁତ୍ୱପୂର୍ଣ୍ଣ ନୁହେଁ । ପଛରେ ଅଛନ୍ତି ଓଡିଶାର ୪ କୋଟି ଜନତା । ବିଜୁ ବାବୁଙ୍କ ସ୍ୱପ୍ନକୁ ପୁରା କରିବା ପାଇଁ ମୁଁ ଉଦ୍ୟମ ଜାରି ରଖିବି ବୋଲି ନବୀନ ପଟ୍ଟନାୟକ ପ୍ରକାଶ କରିଛନ୍ତି ।

ପଛରୁ ଆକ୍ରମଣ ପାଇଁ ହୋଇଥିଲା ଉଦ୍ୟମ । ଗଣତନ୍ତ୍ରକୁ ହତ୍ୟା କରିବାକୁ ଉଦ୍ୟମ ହୋଇଥିଲା । ଓଡିଶାର ୪ କୋଟି ଜନତା ମୋ ପାଇଁ ଗୁରୁତ୍ୱପୂର୍ଣ୍ଣ । କ୍ଷମତାରେ ଥାଏ ବା ନଥାଏ ବଞ୍ଚି ଥିବା ପର୍ଯ୍ୟନ୍ତ ଓଡିଶାବାସୀଙ୍କ ପାଇଁ ଲଢାଇ କରି ଚାଲିବି ଓ କାମ କରିଚାଲିବି ପଟ୍ଟନାୟକ ପ୍ରକାଶ କରିଛନ୍ତି ।

ଭୁବନେଶ୍ୱରରେ ଅନୁଷ୍ଠିତ ସାଂସଦ ପ୍ୟାରିମୋହନ ମହାପାତ୍ରଙ୍କ ସାମ୍ବାଦିକ ସମ୍ମିଳନୀରେ ଟାର୍ଗେଟରେ ଥିଲେ ନବୀନ ପଟ୍ଟନାୟକ ଠିକ୍ ତାପରେ ବ୍ରହ୍ମପୁରଠାରେ ଅନୁଷ୍ଠିତ ବିଜେଡିର ମହାସମାବେଶର ନବୀନଙ୍କ ଟାର୍ଗେଟରେ ଥିଲେ ପ୍ୟାରୀମୋନ ମହାପାତ୍ର ।

କିନ୍ତୁ ମୁଖ୍ୟମନ୍ତ୍ରୀ କାହାରି ନାମ ପ୍ରକାଶ କରିନଥିଲେ ମଧ୍ୟ ବ୍ରହ୍ମପୁର ସମାବେଶରେ ତାଙ୍କ ବକ୍ତବ୍ୟ ଥିଲା ପ୍ୟାରୀଙ୍କ ପାଇଁ କଡା ଜବାବ । ଏହାକୁ ନେଇ ବିଜେଡି ରାଜନୀତି ସରଗରମ ହୋଇଛି ।

ବ୍ରହ୍ମପୁର ବଡମେଡିକାଲ ପଡିଆଠାରେ ଆଜି ବିଜେଡି ତରଫରୁ ଅନୁଷ୍ଠିତ ହୋଇଥିଲା ବିଶାଳ ସମାବେଶ । ସମାବେଶରେ ସାମିଲ ହୋଇଥିଲେ ଜିଲ୍ଲାର ୪ଜଣ ସାଂସଦ,୧୨ଜଣ ବିଜେଡି ବିଧାୟକ ଏବଂ ୫୦ ହଜାରରୁ ଅଧିକ ଦଳୀୟ କର୍ମୀ ଓ ସମର୍ଥକ ।

ଏହି ସମାବେଶରେ ରାଜ୍ୟପ୍ରତି କେନ୍ଦ୍ରର ଅବେହେଳାକୁ ପୁଣି ଥରେ ଦୋହରାଇ ଥିଲେ ପଟ୍ଟନାୟକ । ସେ କହିଛନ୍ତି ଯେ, ମେନେରାଲ ରୟାଲଟି ପ୍ରଦାନନେଇ କେନ୍ଦ୍ର ଅବହେଳା କରୁଛି । ରାଜ୍ୟରୁ ୮ ହଜାର କୋଟି ଟଙ୍କା ରାଜସ୍ୱ ଯାଉଥିଲେ ବି ରେଳବାଇର ବିକାଶ ହେଉ ନାହିଁ ।

ଏଭଳି ସମାବେଶ ମୁଖ୍ୟମନ୍ତ୍ରୀଙ୍କ ଇମେଜକୁ ବଢାଇଦେଇଛି ବୋଲି ରାଜସ୍ୱ ମନ୍ତ୍ରୀ ସୂର୍ଯ୍ୟନାରାୟଣ ପାତ୍ର କହିଛନ୍ତି ।

ଗ୍ରାମ ଉନ୍ନୟନମନ୍ତ୍ରୀ ବିକ୍ରମକେଶରୀ ଆରୁଖା କହିଛନ୍ତି ସମାବେଶ ଆଜି ଆଶାତୀତ ଭାବେ ସଫଳ ହୋଇଛି । ଯେପର୍ଯ୍ୟନ୍ତ ନବୀନ ଦଳର ସଭାପତି ଅଛନ୍ତି ସେପର୍ଯ୍ୟନ୍ତ ଦଳ ଆଗେଇ ଚାଲିଥିବ ।

ଯାହା ଆଶା କରାଯାଉଥିଲା ତାର ଦୁଇଗୁଣିତ ଲୋକ ଏଠାରେ ଏକଠି ହୋଇଥିଲେ । ଗଞ୍ଜାମର କୋଣ ଅନୁକୋଣରୁ ଲୋକମାନେ ଏଠାକୁ ଛୁଟି ଆସିଥିଲେ ।

ସାଂସଦ ସିଦ୍ଧାନ୍ତ ମହାପାତ୍ର କହିଛନ୍ତି ପ୍ରକୃତରେ ଲୋକମାନଙ୍କ ଭଲ ପାଇବା ଦଳ ପ୍ରତି, ଶଂଖଚିହ୍ନ ପ୍ରତି ଓ ନବୀନ ପଟ୍ଟନାୟକଙ୍କ ପ୍ରତି ଅଛି । ଯେତେଦିନ ପର୍ଯ୍ୟନ୍ତ ନବୀନ ବାବୁ ଅଛନ୍ତି, ତାଙ୍କ ନେତୃତ୍ୱ ଅଛି ବିଜୁ ଜନତା ଦଳ ଏମିତି ହିଁ ଥିବ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକୋ୍ଟବର ୧୯(ଓଡ଼ିଶା ଡ଼ଟ୍ କମ୍) – ନବୀନ ପଟ୍ଟନାୟକ ବିଜେଡିର ସଭାପତି ନାହାଁନ୍ତି । ଦଳୀୟ ସମ୍ବିଧାନ ଅନୁଯାୟୀ ସେ କାର୍ଯ୍ୟ କରୁନାହାଁନ୍ତି । ତେଣୁ ତାଙ୍କର କୌଣସି ଆଦେଶ,ନିର୍ଦ୍ଦେଶ ଦଳୀୟ ସମ୍ବିଧାନ ସମ୍ମତ ନୁହେଁ ,ତେଣୁ ବହିଷ୍କାର କରିବା ଆଦେଶ କାହାରିବି ନାହିଁ ବୋଲି ସାଂସଦ ପ୍ୟାରୀମୋହନ ମହାପାତ୍ର କହିଛନ୍ତି ।

ସାଂସଦ ମହାପାତ୍ର ‘ଓଡିଶା ଜନମୋର୍ଚ୍ଚା’ର ଆଭିମୁଖ୍ୟ ଭବଷ୍ୟତ କାର୍ଯ୍ୟକ୍ରମ ସଂର୍ପକରେ ସୂଚନା ଦେବାପାଇଁ ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଉତ୍କଳମଣି ଗୋପବନ୍ଧୁଙ୍କ ତ୍ୟାଗ, ଉତ୍କଳଗୌରବ ମଧୁସୂଦନ ଦାସଙ୍କ ସ୍ୱାଭିମାନ ଓ ବିଜୁବାବୁଙ୍କ ସାହସକୁ ଆୟୁଧ କରାଯାଇ ମୋର୍ଚ୍ଚା ଗଠନ କରା ଯାଇଛି ।

ବିଜେଡି ଏବେ ସମ୍ବିଧାନ ଅନୁଯାୟୀ ଚାଲୁନାହିଁ । ତିନିବର୍ଷ ହେଲାଣି ସମ୍ବିଧାନ ଅନୁଯାୟୀ ଥରଟିଏ ହେଲେ କାଯ୍ୟକାରିଣୀ ବୈଠକ ହୋଇ ନାହିଁ । ତେଣୁ ମୋର୍ଚ୍ଚା ବିଜେଡିକୁ ଶକ୍ତିଶାଳୀ କରିବା ସହ ଦଳର ଆଭ୍ୟନ୍ତରୀଣ ଗଣତନ୍ତ୍ର ପ୍ରତିଷ୍ଠା ପାଇଁ କାର୍ଯ୍ୟ କରିବ ।

ସରକାର କହିଲେ ମନ୍ତ୍ରୀମାନଙ୍କୁ ବୁଝାଯାଏ,ସଚିବଙ୍କୁ ନୁହେଁ । ମାତ୍ର ସଚିବମାନେ ଏଠି ସର୍ବେସର୍ବା ପାଲଟିଛନ୍ତି । ତୃଣମୂଳ ସ୍ତରରେ ଦୁର୍ନୀତି ୨୫ରୁ ୩୦ ପ୍ରତିଶତ ବଢିଛି ।

୨୦୧୦ ଜାନୁଆରୀ ମାସରେ ଅନୁଷ୍ଠିତ ଦଳୀୟ କାର୍ଯ୍ୟକାରିଣୀରେ ଏହି ପ୍ରସଙ୍ଗ ଉଠାଇବାରୁ ନବୀନଙ୍କ ସହିତ ତାଙ୍କର ମତଭେଦ ହୋଇଛି ବୋଲି ମହାପାତ୍ର ପ୍ରକାଶ କରିଛନ୍ତି ।

ନୀତି ନିର୍ଦ୍ଧାରଣ ସମୟରେ ତାଙ୍କ ପରାମର୍ଶ ନିଆଯାଏ । ମାତ୍ର ପ୍ରଶାସନିକ ନିଷ୍ପତି ନବୀନ ପଟ୍ଟନାୟକ ତାଙ୍କ ସଚିବଙ୍କ ଦ୍ୱାରାନେଇଥାନ୍ତି ।

କ୍ଷୁଦ୍ର ଓ ମଧ୍ୟମ ଶିଳ୍ପ ବିଭାଗ ଖୋଲିବା ପାଇଁ ମୁଖ୍ୟମନ୍ତ୍ରୀଙ୍କୁ ତିନିବର୍ଷ ଲାଗିଲା । ଏହି ବିଭାଗ ଦ୍ୱାରାଓଡିଶାର ଯୁବକମାନଙ୍କୁ ଆତ୍ମନିର୍ଭରଶୀଳ କରିହୁଅନ୍ତା ।

ପ୍ରାୟ ୧୨ ଲକ୍ଷ ବେକାରଙ୍କୁ ନିଯୁକ୍ତିଦେବାପାଇଁ ଦଳର ନିର୍ବାଚନ ଇସ୍ତାହାରରେ ପ୍ରତିଶ୍ରୁତି ଦିଆ ଯାଇଥିଲା । ମାତ୍ର ତାହା କାର୍ଯ୍ୟକାରୀ ହୋଇନାହିଁ ବୋଲି ମହାପାତ୍ର ପ୍ରକାଶ କରିଛନ୍ତ ।

ଏହି ସାମ୍ବାଦିକ ସମ୍ମିଳନୀରେ ଯଜ୍ଞେଶ୍ୱର ବାବୁ, ଡ.ଶରତ ଚନ୍ଦ୍ର ମିଶ୍ର, ସ୍ୱରୁପ ପାତ୍ର, ରାଜେନ୍ଦ୍ର କୁମାର ସିଂ, ବାସୁଦେବ ପାତ୍ର, ଅଭିମନ୍ୟୁକେଶରୀ, ଶେଷଦେବ ପାତ୍ର ପ୍ରମୁଖ ଉପସ୍ଥିତ ଥିଲେ ।

ଓଡ଼ିଶା ଡ଼ଟ୍ କମ୍