ଗଣମାଧ୍ୟମ

ଓଡିଶା ଡଟ୍ କମ୍ ସମ୍ବାଦଦାତା

ରାଇଘର, ଜାନୁଆରୀ ୧୭(ଓଡିଶା ଡଟ୍ କମ୍)-ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ ସରଗୁଲି ଗ୍ରାମର ମୃତ୍ୟୁଞ୍ଜୟ ଦେ ଙ୍କ ଫସଲ କ୍ଷତିହୋଇଥିବାବେଳେ ଋଣଭାର ସହ୍ୟ କରିନପାରି ସେ ଆତ୍ମହତ୍ୟା କରିଥିବା ଚର୍ଚ୍ଚାର ବିଷୟ ହୋଇଛି ।

ସରଗୁଲି ଗ୍ରାମର ମୃତ୍ୟୁଞ୍ଜୟ ନିଜର ୫ ଏକର ଜମିର ମକା,ବାଇଗଣ,ଫୁଲକୋବି ଆଦି ଚାଷ କରିଥିଲେ । ପାଣିର ଅଭାବ ଓ ବିଭିନ୍ନ କାରଣରୁ ଫସଲ ନଷ୍ଟ ହୋଇଯିବା ଯୋଗୁଁ ସେ ଋଣ ଶୁଝି ନପାରିବାରୁ ରଶି ଲଗାଇ ଆତ୍ମହତ୍ୟା କରିଥିବା ଜଣାପଡିଛି ।

ଗ୍ରାମବାସୀ ଓ ମୃତ୍ୟୁଞ୍ଜୟଙ୍କ ବଡଭାଇ ଗଣମାଧ୍ୟମକୁ କହିଛନ୍ତି ଯେ,ମୃତ୍ୟୁଞ୍ଜୟର ଗୋଟିଏ ପୁଅ,ଗୋଟିଏ ଝିଅ । ସେ ଫସଲ ନଷ୍ଟ ହେବାଯୋଗୁଁ ସେ ଆତ୍ମହତ୍ୟା କରିଥାଇପାରେ ।

ରାଇଘର ପୋଲିସ ପକ୍ଷରୁ ଏସଆଇ ଅକ୍ଷୟ କୁମାର ରାଉଳ ଶବକୁ ଜବତ କରିବା ସହ ଏକ ମାମଲା ରୁଜୁକରି ବ୍ୟବଚ୍ଛେଦ ପାଇଁ ପଠାଇଥିବା ଜଣାପଡିଛି । ଏହି ଘଟଣା ପରେ ଶବରଖି ଲୋକମାନେ ଉମରକୋଟ-ରାଇଘର ରାସ୍ତା ଅବରୋଧ କରିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୦(ଓଡିଶା ଡଟ୍ କମ୍)- ବିଜେଡିରୁ ବହିଷ୍କାର ହେବାପରେ ରାଜ୍ୟ ସଭାରେ ତାଙ୍କର ସ୍ଥିତି କଣ ଜାଣିବା ପାଇଁ ସୋମବାର ସୁପ୍ରୀମ କୋର୍ଟର ଆଶ୍ରୟ ନେଇଛନ୍ତି ସାଂସଦ ପ୍ୟାରୀମୋହନ ମହାପାତ୍ର ।

ସେ ତାଙ୍କ ଆବେଦନରେ ଦର୍ଶାଇଛନ୍ତି ଯେ,୧୬ ନଭେମ୍ବର ୨୦୧୨ରେ ବିଜେଡି କାର୍ଯ୍ୟକାରିଣୀ ତାଙ୍କୁ ଦଳରୁ ବହିଷ୍କୃତ କରିଥିଲା । ହେଲେ ସେହି ବହିଷ୍କାର ଚିଠି ଏ ପର୍ଯ୍ୟନ୍ତ ପାଇନାହାଁନ୍ତି ।

ରାଜ୍ୟସଭାର ସଦସ୍ୟ ହୋଇଥିବାରୁ ଦଳରୁ ବହିଷ୍କୃତ ଖବର ତୁରନ୍ତ ରାଜ୍ୟସଭା ସେକ୍ରେଟେରୀଏଟ୍କୁ ଜଣାଇ ଦିଆଯିବା କଥା । ଯାହା ବର୍ତମାନ ସୁଦ୍ଧା ହୋଇନାହିଁ । ଏଭଳି ପରିସ୍ଥିତିରେ ରାଜ୍ୟ ସଭାରେ ତାଙ୍କର ସ୍ଥିତି କଣ ଜାଣିବା ପାଇଁ ସେ ନିବେଦନ କରିଛନ୍ତି ।

ଗତ ଶୁକ୍ରବାର ଦିନ ପ୍ୟାରୀମୋହନ ସୁପ୍ରୀମକୋର୍ଟ ଯିବେ ବୋଲି ଗଣମାଧ୍ୟମକୁ ଜଣାଇଥିଲେ । ଗତକାଲି ଏକ ସାମ୍ବାଦିକ ସମ୍ମିଳନୀରେ ଏକଥା ମଧ୍ୟ ସ୍ପଷ୍ଟ କରିଥିଲେ ।

ଗତ ମେ ୨୯ ତାରିଖ ରାତିରେ ତଥାକଥିତ ମିଡ୍ନାଇଟ ଅପରେସନ ପରେ ତାଙ୍କୁ ଦଳରୁ ପ୍ରଥମେ ନିଲମ୍ବନ ଓ ପରେ ନଭେମ୍ବର ୧୬ ତାରିଖରେ ବହିଷ୍କାର କରାଯାଇଥିଲା । ଏହାପରେ ପ୍ୟାରୀ ଓଡିଶା ଜନମୋର୍ଚ୍ଚା ଗଠନ କରି ସଭ୍ୟ ସଂଗ୍ରହ କରିବାରେ ଲାଗିପଡିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୮(ଓଡିଶା ଡଟ୍ କମ୍)-ରାଜ୍ୟରେ ଅନାହାର ମୁତ୍ୟୁ ଉଦ୍ବେଗ ଜନକ ପରିସ୍ଥିତି ସୃଷ୍ଟି କରିଛି । ସରକାରଙ୍କ ଅବହେଳା ପାଇଁ ଏହା କ୍ରମଶଃ ବୃଦ୍ଧି ପାଉଛି ବୋଲି ଶୁକ୍ରବାର ଦିନ ବିରୋଧୀ ଦଳ ପକ୍ଷରୁ ବିଧାନ ସଭାରେ ଅଭିଯୋଗ କରାଯାଇଛି ।

ରାଜସ୍ୱମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ଏ ସଂପର୍କରେ କହିଲେ ବର୍ତମାନ ଯେଉଁ ସବୁ କାର୍ଯ୍ୟକ୍ରମ ସରକାରଙ୍କ ତରଫରୁ ଗ୍ରହଣ କରାଯାଉଛି ସେଥିରେ କେହି ଅନାହାର ମୃତ୍ୟୁବରଣ କରିବା ହାସ୍ୟାସ୍ପଦ ।

ଅନାହାର ମୃତ୍ୟୁ ସମ୍ପର୍କରେ ଗଣମାଧ୍ୟମରୁ ଖବର ପାଇବାର ୪୮ ଘଣ୍ଟା ମଧ୍ୟରେ ତାହାର ତଦନ୍ତ କରାଯାଉଛି । ହେଲେ ଏହି ଘଟଣା ସଂପର୍କରେ କେବେ କୌଣସି ବିଧାୟକ କି ଲୋକପ୍ରତିନିଧି ଟେଲି ଫୋନ କରି ଜଣାଇ ନାହାଁନ୍ତି ।

ମୁଲତବୀ ଆଲୋଚନା ଆରମ୍ଭ କରି କଂଗ୍ରେସ ସଭ୍ୟ ସନ୍ତୋଷ ସିଂ ସାଲୁଜା କହିଥିଲେ ଯେ,ଗରିବ ଲୋକଙ୍କ ପାଇଁ କେନ୍ଦ୍ର ସରକାର ବିଭିନ୍ନ ଯୋଜନା କରୁଛନ୍ତି । କିନ୍ତୁ ରାଜ୍ୟ ସରକାର ତାକୁ ଠିକ୍ ଭାବେ କାର୍ଯ୍ୟକାରୀ କରୁନାହିଁନ୍ତି । ଫଳରେ ଗରିବ ଲୋକ ଅନାହାରରେ ମରୁଛନ୍ତି ।

ବିରୋଧିଦଳ ନେତା ଭୂପିନ୍ଦର ସିଂ କହିଲେ ଯେ,ଯଦି ଜଣଙ୍କର ଜୀବନହାନି ହୁଏ ସେଥିପାଇଁ ସରକାର ଦାୟୀ । କେନ୍ଦ୍ର ସରକାର ଗରୀବ ହଟାଇବା ପାଇଁ ସବୁ ଯୋଜନା କରିଛନ୍ତି । କିନ୍ତୁ ରାଜ୍ୟ ସରକାର ଠିକ୍ ଭାବେ କାର୍ଯ୍ୟକାରୀ କରିନାହିାଁନ୍ତି ।

ଭାଜପା ସଦସ୍ୟ ହିତେଶ କୁମାର ବଗର୍ତି କହିଥିଲେ ଯେ,ଏବେ ବି ନୂଆପଡାରେ ୮୦ ପ୍ରତିଶତ ଲୋକ ଗରିବର ତାଡନାରେ ଶଢୁଛନ୍ତି ।

ଦୃଷ୍ଟି ଆକର୍ଷଣକାରୀ ନୋଟିସ୍ ଜରିଆରେ ଶାସକ ଦଳର ସଭ୍ୟ ଅନନ୍ତ ଦାସ କହିଲେ ଯେ,ଯେଉଁ ଅଞ୍ଚଳରେ ଅନାହାର ମୁତ୍ୟୁ ହେଉଛି ସେଥିପାଇଁ ସେ ଅଞ୍ଚଳର ବିଧାୟକ ଦାୟୀ । କାରଣ ସେ ତାଙ୍କ ଲୋକଙ୍କ ପ୍ରତି ଧ୍ୟାନ ଦେଉନାହାଁନ୍ତି । ଲୋକଙ୍କ କଥା ଭୁଲି ଯାଉଛନ୍ତି ।

କେବଳ ଦାୟୀକଲେ ହେବନାହିଁ । ତାଙ୍କ ବିରୋଧରେ ୩୦୨ ଦଫାରେ ମାମଲା ହେବା ଆବଶ୍ୟକ । ଲୋକପ୍ରତିନିଧିଙ୍କୁ ଉତରଦାୟୀ ବ୍ୟବସ୍ଥା ରହିଲେ ସବୁ ଠିକ୍ ହୋଇଯିବ । କିନ୍ତୁ ଅନାହାର ମୃତ୍ୟୁ ହେବା ଅଭିଯୋଗ ସତ୍ୟ ନୁହେଁ ବୋଲି ଶ୍ରୀ ଦାସ ଦର୍ଶାଇଥିଲେ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୬(ଓଡିଶା ଡଟ୍ କମ୍)-ବିଜେଡିରୁ ବହିଷ୍କାର ନିଷ୍ପତିକୁ ସୁପ୍ରୀମ କୋର୍ଟରେ ଚ୍ୟାଲେଞ୍ଜ କରିବେ ସାଂସଦ ପ୍ୟାରୀମୋହନ ମହାପାତ୍ର । ଗଣମାଧ୍ୟମକୁ ଆଜି ଏ ସଂପର୍କରେ ସେ ସୂଚନା ଦେଇଛନ୍ତି ।

ସେ କହିଛନ୍ତି ତାଙ୍କୁ ଯେଉଁ ଭଳି ଭାବରେ ବହିଷ୍କୃତ କରାଯାଇଛି ତାହା ବେଆଇନ । ସେ ଖବ୍ ଶୀଘ୍ର ଅଦାଲତର ଆଶ୍ରୟ ନେବେ ।

ଗତ ମେ ତଥାକଥିତ ମିଡ୍ ନାଇଟ ଅପରେସନ ପରେ ପ୍ୟାରୀମୋହନଙ୍କୁ ଦଳରୁ ନିଲମ୍ବିତ କରାଯାଇଥିଲା । ଏ ସଂପର୍କରେ ଘୋଷଣା କରିଥିଲେ ବିଜେଡି ସୁପ୍ରୀମୋ ନବୀନ ପଟ୍ଟନାୟକ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧(ଓଡିଶା ଡଟ୍ କମ୍)-ଦୁର୍ନିୀତିମୁକ୍ତ ସମାଜ ଗଠନ ଦିଗରେ ସାମ୍ବାଦିକମାନେ ଆଗୁଆ ସୈନିକର ଭୂମିକା ତୁଲାଇବାକୁ ଖ୍ୟାତନାମା ସମାଜସେବୀ ଆନ୍ନା ହଜାରେ ପରାମର୍ଶ ଦେଇଛନ୍ତି ।

ଓଡ଼ିଶା ଗସ୍ତରେ ଆସିଥିବା ଏହି ବିଶିଷ୍ଟ ଗାନ୍ଧୀବାଦୀ ନେତାଙ୍କ ସହ ଶନିବାର ଓଡ଼ିଶା ସାମ୍ବାଦିକ ୟୁନିଅନ (ଓ.ୟୁ.ଜେ)ର ଏକ ପ୍ରତିନିଧି ଦଳ ସାକ୍ଷାତ କରି ରାଜ୍ୟରେ ଗଣମାଧ୍ୟମର ସ୍ଥିତି ସଂପର୍କରେ ଆଲୋଚନା କରିଥିଲେ ।

ପ୍ରତିନିଧି ଦଳର ନେତୃତ୍ୱ ନେଇ ଜାତୀୟ ସାମ୍ବାଦିକ ୟୁନିଅନ୍ (ଏନ୍.ୟୁ.ଜେ) ଉପସଭାପତି ତଥା ଓ.ୟୁ.ଜେ ସଭାପତି ପ୍ରସନ୍ନ ମହାନ୍ତି ରାଜ୍ୟରେ ସାମ୍ବାଦିକମାନଙ୍କ କଣ୍ଠରୋଧ କରିବା ପାଇଁ ପ୍ରଶାସନିକ ସ୍ତରରେ ଚାଲିଥିବା ଦମନଲୀଳା ସଂପର୍କରେ ଆନ୍ନାଙ୍କୁ ଅବଗତ କରାଇବା ସହ ସାନି ଓଡ଼ିଶା ଗସ୍ତରେ ଆସିବାକୁ ଆମନ୍ତ୍ରଣ କରିଥିଲେ ।

କୌଣସି ଚାପର ବଶବର୍ତ୍ତୀ ନହେଇ ସାମ୍ବାଦିକମାନେ ରାଜ୍ୟରେ ଚାଲିଥିବା କମ୍ପାନୀରାଜ ବିରୋଧରେ ସ୍ୱର ଉଠାଇବା ସହ ସାଧାରଣଲୋକଙ୍କ ପ୍ରତିବାଦକୁ ପ୍ରାଧାନ୍ୟ ଦେବାପାଇଁ ଆନ୍ନା ଏହି ଅବସରରେ ପରାମର୍ଶ ଦେଇଥିଲେ ।

ପ୍ରତିନିଧି ଦଳରେ ଓ.ୟୁ.ଜେ କାର୍ଯ୍ୟାଳୟ ସଂପାଦକ ସୁଧାଂଶୁ ଶେଖର ପରିଡ଼ା, ଦିପକ ମହାପାତ୍ର ପ୍ରମୁଖ ଆନ୍ନାଙ୍କୁ ସାକ୍ଷାତ କରି ଆଲୋଚନାରେ ଭାଗ ନେଇଥିଲେ ।

ଓଡିଶା ଡଟ୍ କମ୍

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କଟକ, ନଭେମ୍ବର ୭(ଓଡ଼ିଶା ଡ଼ଟ୍ କମ୍) -ଆୟୁଷ ଡାକ୍ତର ମାଧବୀଲତା ପ୍ରଧାନଙ୍କ ସନ୍ଦେହଜନକ ମୃତୁ ଘଟଣାରେ ରାଜ୍ୟ ସରକାରଙ୍କୁ ନୋଟିସ ଜାରି କରିଛନ୍ତି ହୋଇକୋର୍ଟ । ତଦନ୍ତ ପ୍ରକ୍ରୀୟାରେ କଣ ଅଗ୍ରଗତି ଘଟିଛି ସେ ସଂପର୍କରେ ଦୁଇ ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।

ମୁଖ୍ୟ ବିଚାରପତି ଜଷ୍ଟିସ୍ ଭି.ଗୋପାଳ ଗୌଡ ଓ ଜଷ୍ଟିସ ବିରକିଶୋର ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ଆଜି ମାମଲାର ଶୁଣାଳୀ କରିଥିଲେ ।

ମାଧବୀଙ୍କ ମୃତ ତଦନ୍ତ ପାଇଁ ପୋଲିସ ଦ୍ୱାରାହେଉଥିବା ତଦନ୍ତ ଉପରେ ଭରସା ନକରି ସିବିଆଇ ତଦନ୍ତ ପାଇଁ ମୃତକଙ୍କ ଭାଇ ହାଇକୋର୍ଟରେ ପିଟିସନ ଦାୟର କରିଥିଲେ । ଅନ୍ୟପଟେ ଏହି ଘଟଣାରେ ପୁରୀରେ କ୍ରାଇମବ୍ରାଂଚ ତଦନ୍ତ ଜାରିରଖିଛି ।

ତେବେ ବଦଳି ଚାପ ଏବଂ ପ୍ରେମଜନିତ କାରଣରୁ ମାଧବୀ ଟ୍ରେନ ସମ୍ମୁଖରେ ଶୋଇ ଆତ୍ମହତ୍ୟା କରିଥିବା ଜିଆରପି ପୁଲିସ ଗଣମାଧ୍ୟମକୁ କହିଛି ।ଗତ ୨୬ଦିନ ଧରି ଅନ୍ଧାରରେ ବାଡିବୁଲାଉଥିବା ରେଳବାଇ ପୁଲିସ ମଙ୍ଗଳବାର ଦିନ କ୍ରାଇମବ୍ରାଞ୍ଚକୁ ତଦନ୍ତ ରେକର୍ଡ ହସ୍ତାନ୍ତର କରିବା ପୂର୍ବରୁ ଏପରି ସୂଚନାଦେବା ଘଟଣା ସାଧାରଣରେ ଆଲୋଡନ ସୃଷ୍ଟି କରିଛି ।

ରାଜ୍ୟ ସରକାରଙ୍କ ନିର୍ଦେଶକ୍ରମେ କ୍ରାଇମବ୍ରାଞ୍ଚ ଡିଏସପି ଆଲୋକ ଦାସଙ୍କ ନେତୃତ୍ୱରେ ଏକ ତଦନ୍ତକାରୀ ଦଳ ମଙ୍ଗଳବାର ଦିନ ପୁରୀ ଜିଆରପି ଫାଣ୍ଡିରେ ପହଞ୍ଚି ଶବ ବ୍ୟବଚ୍ଛେଦ ରିପୋର୍ଟ ସମେତ ପୁରୀ-ନୂଆଦିଲ୍ଲୀ ନୀଳାଚଳ ଏକ୍ସପ୍ରେସର ଡ୍ରାଇଭର, ଗାର୍ଡ ଏବଂ ମାଳତୀପାଟପୁର ରେଳ ଷ୍ଟେସନର ଫ୍ଲାଗମ୍ୟାନଙ୍କ ଲିଖିତ ବୟାନକୁ ଟିକିନିଖିଭାବେ ଯାଞ୍ଚ କରିଥିଲେ ।

ଜିଆରପି ପୁଲିସକୁ ସାଥୀରେ ଧରି କ୍ରାଇମବ୍ରାଞ୍ଚ ଟିମ ଶବ ପୋତାଯାଇଥିବା ଶ୍ମଶାନକୁ ଯାଇଥିଲେ । ସଂପୃକ୍ତ ସ୍ଥାନକୁ ଖୋଳାଯାଇଥିଲେ ମଧ୍ୟ ସେଠାରେ ଶବର ଚିହ୍ନବର୍ଣ୍ଣ ମିଳିନଥିଲା । ବୁଧବାର ଦିନ ଟିମ୍ ସଦସ୍ୟମାନେ ସଂଗ୍ରହ କରିଥିବା ତଥ୍ୟର ଯାଞ୍ଚ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ କମ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟେବର ୩୧(ଓଡ଼ିଶା ଡ଼ଟ୍ କମ୍) –ମୁଖମନ୍ତ୍ରୀ ନବୀନ ପଟ୍ଟନାୟକ ବୁଧବାର ଦିଲ୍ଲୀ ଗସ୍ତରୁ ଫେରିବାପରେ ଗଣମାଧ୍ୟମକୁ କହିଛନ୍ତି ଯେ, ପ୍ୟାରୀମୋହନଙ୍କ ଅଭିଯୋଗ ଭିତିହୀନ ଓ ମିଥ୍ୟା ଓ ଏଥିରେ କୌଣସି ସତ୍ୟାସତ୍ୟ ନାହିଁ ।

ଏଥିସହିତ ସେ କହିଥିଲେ ଯେ, ଦଳରେ ବିଶୃଙ୍ଖଳା ସୃଷ୍ଟି କରୁଥିବା ପ୍ୟାରୀମୋହନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ତାଙ୍କର ସମସ୍ତ କାର୍ଯ୍ୟକଳାପକୁ ଅନୁଧ୍ୟାନ କରିବେ ଏବଂ ଠିକଣା ସମୟରେ ନିଷ୍ପତ ନେବେ ।

ପଟ୍ଟନାୟକ ଓ ମହାପାତ୍ର ଏୟାର ଇଣ୍ଡିଆନ ବିମାନରେ ଦୁଇ ଜଣ ସାଙ୍ଗହୋଇ ଆସିଥିଲେ ମଧ୍ୟ ବିମାନ ମଧ୍ୟରେ କୌଣସି କଥାବାର୍ତା ହୋଇନାହିଁନ୍ତି ବୋଲି ପ୍ୟାରୀମୋହନ କହିଛନ୍ତି ।

ସୂଚନା ଯୋଗ୍ୟ ଯେ, ଗତ ୨୮ ତାରିଖରେ ବିଜେଡିରୁ ନିଲମ୍ବିତ ସାଂସଦ ତଥା ଓଡିଶା ଜନମୋର୍ଚ୍ଚାର ଅଧ୍ୟକ୍ଷ ପ୍ୟାରୀମୋହନ ମହାପାତ୍ର କ୍ରାନ୍ତି ସମାବେଶରେ ବିଜେଡି କୋଇଲା ବ୍ଲକ ଆବଣ୍ଟନରେ ସଂପୃକ୍ତ ରହିଛି ବୋଲି ମତବ୍ୟକ୍ତ କରିଥିଲେ ।

ଏଥିସହିତ ସେ କହିଥିଲେ ଯେ, ମୋର୍ଚ୍ଚା କଂଗ୍ରେସର ବି ଟିମ୍ ନୁହେଁ । ବିଜେଡି କୋଇଲା ବ୍ଲକ ସୁପାରିଶରେ ସଂପୃକ୍ତ ଥିବାରୁ କଂଗ୍ରେସ ସହିତ ସଲାସୁତୁରା କରୁଛି । ତେଣୁ ବିଜେଡି କଂଗ୍ରେସର ବି ଟିମ୍ ବୋଲି ଅଭିଯୋଗ କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡିଶା ଡଟ କମ