ନିର୍ବାଚନ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ମାର୍ଚ୍ଚ ୧୩(ଓଡ଼ିଶା ଡ଼ଟ୍ କମ୍) ରାଜ୍ୟର ସମସ୍ତ ୩୦ଟି ଜିଲ୍ଲାରେ ମଙ୍ଗଳବାର ଅନୁଷ୍ଠିତ ଜିଲ୍ଲାପରିଷଦ ଅଧ୍ୟକ୍ଷ/ଅଧ୍ୟକ୍ଷା ନିର୍ବାଚନରେ ବିଜୟୀ ହୋଇଥିବା ପ୍ରାର୍ଥୀ ।

ଏଥିରେ କଂଗ୍ରେସ କନ୍ଧମାଳ ଓ ଝାରସୁଗୁଡ଼ା ଜିଲ୍ଲାରେ ବିଜୟୀ ହୋଇଥିବା ବେଳେ ଅନ୍ୟ ୨୮ଟିରେ ବିଜେଡ଼ି ବିଜୟୀ ହୋଇଛି ।

ଅନୁଗୁଳ-ଗିରିଜା ନନ୍ଦିନୀ ସାହୁ, ବଲାଙ୍ଗିର-ବିଜୟ ପ୍ରଧାନ, ବାଲେଶ୍ୱର-ଉର୍ମିଲତା ଦାସ
ଭଦ୍ରକ-ଜଗନ୍ନାଥ ସ୍ୱାଇଁ, ବରଗଡ଼-ଗୀତାଞ୍ଜଳୀ ପୁଟା, ବୌଦ୍ଧ-ମମତା ନାଏକ, କଟକ-ପ୍ରଶାନ୍ତ
ବେହେରା, ଦେବଗଡ଼-ସୁଷମା ବେହେରା, ଢେଙ୍କାନାଳ-ବିନୋଦିନୀ ସାମଲ, ଗଜପତି-ପି.ଲତା ।

ଗଞ୍ଜାମ-ସୁରଥ ପ୍ରଧାନ, ଜଗତସିଂହପୁର-ଦେବୀଦତ୍ତ ମହାନ୍ତି, ଯାଜପୁର-ସୁଶାନ୍ତ ମିଶ୍ର
ଝାରସୁଗୁଡ଼ା-ରେଣୁକା କଂସରାଳି, କଳାହାଣ୍ଡି-ଶ୍ରୀମତୀ ମାଝି, କନ୍ଧମାଳ-ସଂଯୁକ୍ତା କହଁର
କେନ୍ଦ୍ରାପଡା଼-ଶ୍ରୀଧର ସ୍ୱାଇଁ, କେନ୍ଦୁଝର-ସାରିଲତା ପୃଷ୍ଟି, ଖୋର୍ଦ୍ଧା-ମୀନାକ୍ଷି ସାହୁ
ମୟୂରଭଞ୍ଜ-କାଳୀ ଚରଣ କିସ୍କୁ, ନୂଆପଡ଼ା-ପୁଷ୍ପାଂଜଳି ପାଣ୍ଡେ ।

ପୁରୀ-ଦେବରାଜ ବେହେରା, ରାୟଗଡ଼ା-ସୁଜାତା ମାଣ୍ଡାଙ୍ଗି, ସମ୍ବଲପୁର-ସୌଭାଗିନୀ ନାଏକ
ସୁବର୍ଣ୍ଣପୁର-ହିମାଂଶୁ ସାହୁ, ସୁନ୍ଦରଗଡ଼-ପିତ୍ରଟା ଟପ୍ପୋ, ମାଲକାନଗିରି-ପଦ୍ମିନି ମୁୁଲି
ନବରଙ୍ଗପୁର-ମୋତିରାମ ନାଏକ, କୋରାପୁଟ-ମାଳତୀ ମାଝି, ନୟାଗଡ଼-ନଳିନୀ ପ୍ରଭା ସେଠୀ

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ମାର୍ଚ୍ଚ ୪(ଓଡ଼ିଶା ଡ଼ଟ୍ କମ୍) ଆସନ୍ତା ୩୦ରେ ଓଡ଼ିଶାର ତିନୋଟି ଆସନ ସମେତ ୧୫ଟି ରାଜ୍ୟର ୫୮ଟି ଆସନ ପାଇଁ ରାଜ୍ୟସଭା ନିର୍ବାଚନ ନିମନ୍ତେ ଘୋଷଣା କରାଯାଇଛି ।

ନିର୍ବାଚନ କମିଶନ ପକ୍ଷରୁ ଶନିବାର ଏହି ଘୋଷଣା କରାଯାଇଥିବା ବେଳେ ଆସନ୍ତା ୧୨ରେ ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବ । ନିର୍ବାଚନ ପାଇଁ ୧୯ରେ ନାମାଙ୍କନ ପତ୍ର ଦାଖଲ ଏବଂ ୨୨ରେ ପ୍ରାର୍ଥୀପତ୍ର ପ୍ରତ୍ୟାହାର କରାଯିବ ।

ବିଜେଡ଼ି ରାଜ୍ୟସଭା ସଦସ୍ୟ କିଶୋର ମହାନ୍ତି, କଂଗ୍ରେସର ସୁଶୀଳା ତିରିଆ ଏବଂ ବିଜେପିର ରୁଦ୍ର ପାଣିଙ୍କ କାର୍ଯ୍ୟକାଳ ଅପ୍ରେଲ ୨ରେ ଶେଷ ହେଉଥିବାରୁ ଏହି ଆସନ ଗୁଡ଼ିକରେ ନିର୍ବାଚନ ଅନୁଷ୍ଠିତ ହେବ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ମାର୍ଚ୍ଚ ୧(ଓଡ଼ିଶା ଡ଼ଟ୍ କମ୍) ରାଜ୍ୟରେ ତ୍ରୀସ୍ତରୀୟ ପଞ୍ଚାୟତ ନିର୍ବାଚନ ପାଇଁ ବନ୍ଦ ଥିବା ବିପିଏଲ୍ ସର୍ଭେ କାର୍ଯ୍ୟ ପୁଣି ଆରମ୍ଭ କରିବାକୁ ପଞ୍ଚାୟତିରାଜ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି ।

୩୦ଟି ଜିଲ୍ଲା ମଧ୍ୟରୁ ପ୍ରଥମ ପର୍ଯ୍ୟାୟରେ ସାତଟି ଜିଲ୍ଲାରେ ଏହି ସର୍ଭେ ଆରମ୍ଭ କରାଯାଇଥିଲା । ନିର୍ବାଚନ ପାଇଁ ବଲାଙ୍ଗୀର, ଗଜପତି, କଳାହାଣ୍ଡି, କନ୍ଧମାଳ, କୋରାପୁଟ, ମାଲକାନଗିରି ଏବଂ ରାୟଗଡ଼ା ଜିଲ୍ଲାରେ ସାମୟିକ ଭାବେ ଏହି କାର୍ଯ୍ୟ ସ୍ଥଗିତ ରଖାଯାଇଥିଲା ।

ଏହାବ୍ୟତୀତ ଅନ୍ୟ ୨୨ଟି ଜିଲ୍ଲାରେ ଆସନ୍ତା ୨୦ ତାରିଖରୁ ସର୍ଭେ କାର୍ଯ୍ୟ ଆରମ୍ଭ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି । ଆଠଗଡ଼ ନିର୍ବାଚନ ପାଇଁ ଆଚରଣବିଧି ଲାଗୁ ହୋଇଥିବାରୁ କଟକ ଜିଲ୍ଲାରେ ଏହି କାର୍ଯ୍ୟ ସ୍ଥଗିତ ରଖାଯାଇଛି ।

ନିର୍ବାଚନ ପରେ ଏହି ଜିଲ୍ଲାରେ ସର୍ଭେ କରାଯିବ ଏବଂ ଜୁନ୍ ସୁଦ୍ଧା ସର୍ଭେ ଶେଷ କରିବାକୁ ଲକ୍ଷ୍ୟଧାର୍ଯ୍ୟ କରାଯାଇଥିବା ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ବ୍ରହ୍ମପୁର, ଫେବୃୟାରୀ ୨୧(ଓଡ଼ିଶା ଡ଼ଟ୍ କମ୍) ଗଞ୍ଜାମ ଜିଲ୍ଲାରେ ପଞ୍ଚାୟତ ନିର୍ବାଚନ ପରବର୍ତୀ ହିଂସାକାଣ୍ଡରେ ମଙ୍ଗଳବାର ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଯୋଗୁଁ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ପୋଲିସ କହିଛି ।

ହିଞ୍ଜିଳିକାଟୁ ଥାନା ଅନ୍ତର୍ଗତ ୟାପଲ୍ଲୀ ଗ୍ରାମରେ ଶିବରାତ୍ରୀ ଅବସରରେ ଗତକାଲି ରାତିରେ ଦୁଇ ଗୋଷ୍ଠୀ ମଧ୍ୟରେ ପାଟିତୁଣ୍ଡ ହୋଇଥିଲା ଏବଂ ଏହି ଘଟଣା ଆଜି ଉଗ୍ରରୂପ ଧାରଣ କରିଥିଲା ।

ଫଳରେ ଗୋଟିଏ ଗୋଷ୍ଠୀର ଲୋକମାନେ ଅନ୍ୟ ଗୋଷ୍ଠୀର ଲୋକଙ୍କୁ ଅସ୍ତ୍ରଶସ୍ତ୍ରରେ ଆକ୍ରମଣ କରିଥିଲେ । ଏହି ଆକ୍ରମଣରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ବ୍ୟକ୍ତି ଗୁରୁତର ଆହତ ହୋଇଛନ୍ତି ।

ତେବେ ଏହି ଘଟଣାକୁ ନେଇ ଉତ୍ତେଜନା ଦେଖାଦେଇଥିବା ବେଳେ କୌଶସି ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ପୋଲିସ ମୁତୟନ କରାଯାଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଫେବୃୟାରୀ ୧୯(ଓଡ଼ିଶା ଡ଼ଟ୍ କମ୍) ରବିବାର ଅନୁଷ୍ଠିତ ପଞ୍ଚାୟତ ନିର୍ବାଚନର ପଞ୍ଚମ ତଥା ଅନ୍ତିମ ପର୍ଯ୍ୟାୟରେ ୬୯.୪୧ ପ୍ରତିଶତ ମତଦାନ ହୋଇଛି ।

ନୟାଗଡ଼ ଜିଲ୍ଲାରେ ସର୍ବାଧିକ ୮୫ ପ୍ରତିଶତ ଓ କଟକ ଜିଲ୍ଲାରେ ସର୍ବନିମ୍ନ ୬୨ ପ୍ରତିଶତ ମତଦାନ ହୋଇଥିବା ରାଜ୍ୟ ନିର୍ବାଚନ କମିଶନ ପକ୍ଷରୁ କୁହାଯାଇଛି ।

ହଂସାକାଣ୍ଡ, ଭୋଟ୍ ବାକ୍ସ ଲୁଟ୍ ଭଳି ବିଭିନ୍ନ କାରଣରୁ ଭୋଟ୍ ଗ୍ରହଣରେ ବାଧାପ୍ରାପ୍ତ ହୋଇଥିବା ୫୬ଟି ବୁଥ୍ ରେ ସୋମବାର ସାନି ମତଦାନ କରିବାକୁ କମିଶନ ପକ୍ଷରୁ ନିର୍ଦ୍ଦେଶ ଦିଆଯାଇଛି ।

୨୪ଟି ଜିଲ୍ଲାର ୪୮ ବ୍ଲକ ଅନ୍ତର୍ଗତ ୧୧୧ଟି ଜିଲ୍ଲା ପରିଷଦ ଜୋନ ଓ ୮୦୬ ପଞ୍ଚାୟତରେ ସକାଳ
୭ଟାରୁ ଭୋଟ ଗ୍ରହଣ କରାଯାଇଥିଲା । ଏଥିପାଇଁ ମୋଟ୍ ୧୧ ହଜାର ୧୭୭ ବୁଥ୍ ରେ ୩୧ ଲକ୍ଷ ୮ଶହ
୩୦ ଜଣ ଭୋଟର ସେମାନଙ୍କର ମତଦାନ ସାବ୍ୟସ୍ତ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ଫେବୃୟାରୀ ୧୮(ଓଡ଼ିଶା ଡ଼ଟ୍ କମ୍) ପଞ୍ଚାୟତ ନିର୍ବାଚନର ଅନ୍ତିମ ପର୍ଯ୍ୟାୟ ଭୋଟ୍ ଗ୍ରହଣ ପାଇଁ ପୋସ୍କୋ ଅଞ୍ଚଳରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।

ସମ୍ବେଦନଶୀଳ ଭାବେ ଚିହ୍ନଟ ଏର୍ସମା ବ୍ଲକ, ନୂଆଗାଁ, ଗଡ଼କୁଜଙ୍ଗ ଏବଂ କୁଜଙ୍ଗ ଅଞ୍ଚଳରେ ଶନିବାର ଠାରୁ ଅତିରିକ୍ତ ପୋଲିସ ଫୋର୍ସ ମୁତୟନ କରାଯାଇଛି ।

ରବିବାର ହେବାକୁ ଥିବା ଅନ୍ତିମ ପର୍ଯ୍ୟାୟରେ ଏର୍ସମା ବ୍ଲକର ୪୬୧ଟି ବୁଥ୍ ରେ ଭୋଟ୍ ଗ୍ରହଣ କରାଯିବା ସହ କୁଜଙ୍ଗ ବ୍ଲକ ଅନ୍ତର୍ଗତ ବଗଡ଼ିଆ ପଞ୍ଚାୟତର ଦଶଟି ବୁଥ୍ ରେ ପୁନଃ ମତଦାନ ହେବ ।

ଉତ୍ତେଜନା ପ୍ରବଣ ଢିଙ୍କିଆ ପଞ୍ଚାୟତର ୨୩ଟି ବୁଥ୍ ରୁ ୧୬ଟିର ମତଦାନ ତ୍ରିଲୋଚନପୁର ଏବଂ ନୂଆଗାଁରେ କରିବାକୁ ପ୍ରଶାସନ ନିଷ୍ପତି ନେଇଛି ।

ତେବେ ବାସନ୍ଦ ହୋଇ ପୋସ୍କୋ ଅସ୍ଥାୟୀ କଲୋନୀରେ ଗତ ପାଂଚ ବର୍ଷ ଧରି ରହିଆସୁଥିବା ଢିଙ୍କିଆର ୫୨ ପରିବାରର ଭୋଟରମାନେ ତ୍ରିଲୋଚନପୁର ଯାଇ ମତଦାନ କରିବାକୁ କୁହାଯାଇଛି ।

ଭୋଟରମାନେ ନିଜ ଗାଁରେ ଥିବା ଭୋଟ୍ କେନ୍ଦ୍ରରେ ମତଦାନ କରିବାର ନିୟମ ଥିବା ବେଳେ ପ୍ରଶାସନ ଏମାନଙ୍କୁ ପାଞ୍ଚ କିମି ଦୂରରେ ତ୍ରିଲୋଚନପୁର ଯାଇ ମତଦାନ କରିବାକୁ କରିଛନ୍ତି, ଏହା ପଞ୍ଚାୟତ ନିୟମ ଉଲଂଘନ କରିଛି ବୋଲି ଗାଁମୁଖିଆ ଚନ୍ଦନ ମହାନ୍ତି କହିଛନ୍ତି ।

ଓଡ଼ିଶା ଡ଼ଟ୍ କମ୍