ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୨୭(ଓଡିଶା ଡଟ୍ କମ୍)- ମଙ୍ଗଳବାର ବିଧାନସଭାର ଶୀତ ଅଧିବେଶନ ଆରମ୍ଭ ହୋଇଛି । ଗୃହରେ ଦିବଙ୍ଗତ ନେତା ଓ ସୁରକ୍ଷା କର୍ମୀମାନଙ୍କୁ ଶ୍ରଦ୍ଧାଂଜଳି ଦିଆଯିବାପରେ ଗୃହକୁ ୨୯ ତାରିଖ ପର୍ଯ୍ୟନ୍ତ ମୁଲତବି ଘୋଷଣା କରାଯାଇଛି ।

ଫଟୋ : ଅରବିନ୍ଦ ମହାପାତ୍ର

ନିର୍ଦ୍ଧାରୀତ କାର୍ଯ୍ୟସୂଚୀ ଅନୁଯାୟୀ ଗୃହକାର୍ଯ ଆରମ୍ଭ ହୋଇଥିଲା । ପ୍ରଥମେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିବଙ୍ଗତ ନେତା ତଥା ଓଡିଶାର ପୂର୍ବତନ ରାଜ୍ୟପାଳ ବି.ସତ୍ୟନାରାୟଣ ରେଡି, ପୂର୍ବତନ ମନ୍ତ୍ରୀ ଭାଗିରଥୀ ଗମାଙ୍ଗ, ହରିହର ସ୍ୱାଇଁ, ପୂର୍ବତନ ବିଧାୟକ ସାରଙ୍ଗଧର ପ୍ରଧାନ, ମାନସ ରଂଜନ ମଲ୍ଲିକ, ଜଗମୋହନ ନାୟକ, କୁଲିୟାନ ବାଗ୍ଙ୍କ ବିୟୋଗରେ ଶୋକ ପ୍ରସ୍ତାବ ଆଗତ କରିଥିଲେ ।

ସେହିପରି ଦିବଙ୍ଗତ ୩ ସୁରକ୍ଷାକର୍ମୀ ଲାନ୍ସ ନାୟକ, ଲମ୍ବୋଦର ସାହୁ, ଗାର୍ଡ ବସନ୍ତ କୁମାର ବେହେରା, ଏଏସ୍ଆଇ ଆର୍ଏନ୍ ମହାକୁଡ ଓ ୪ ଗ୍ରାମରକ୍ଷୀ ମାଣିଖ ଖିଲ୍ଲା, ଜଗବନ୍ଧୁ ଖେମୁଡ, ଗୌରଚନ୍ଦ୍ର ଦଳାଇ ଏବଂ ଭଗବାନ ନାୟକଙ୍କ ବିୟୋଗରେ ମଧ୍ୟ ମୁଖ୍ୟମନ୍ତ୍ରୀ ଶୋକ ପ୍ରସ୍ତାବ ଆଗତ କରିଥିଲେ ।

ବିରୋଧୀ ଦଳ ନେତା ଭୂପିନ୍ଦର ସିଂହ, ବିଜେପି ବିଧାୟକ କରେନ୍ଦ୍ର ମାଝି, କମ୍ୟୁନିଷ୍ଟ ବିଧାୟକ ଆଦିକନ୍ଦ ସେଠୀ ପ୍ରମୁଖ ଶୋକ ପ୍ରସ୍ତାବ ଉପରେ ହୋଇଥିବା ଆଲୋଚନାରେ ଅଂଶଗ୍ରହଣ କରି ଶ୍ରଦ୍ଧାଂଜଳି ଜଣାଇଥିଲେ । ଏହାପରେ ଗୃହରେ ୧ ମିନିଟ୍ ନୀରବ ପ୍ରାର୍ଥନା କରାଯାଇଥିଲା ।

ଏହାପରେ ବିଧାନସଭାକୁ ୨୯ ତାରିଖ ପର୍ଯ୍ୟନ୍ତ ମୁଲତବି ଘୋଷଣା କରିଥିଲେ ବାଚସ୍ପତି ଅମାତ୍ । ଆଜିଠାରୁ ଆରମ୍ଭ ହୋଇଥିବା ଶୀତ ଅଧିବେଶନ ଡିସେମ୍ବର ୨୨ ତାରଖ ପର୍ଯ୍ୟନ୍ତ ଚାଲିବ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ନଭେମ୍ବର ୧୬(ଓଡ଼ିଶା ଡ଼ଟ୍ କମ୍)-ବିଜେଡି ଦଳରେ ବିଶୃଙ୍ଖଳା ଓ କ୍ଷମତା ଦଖଲ ଷଡ଼ଯନ୍ତ୍ରରେ ଜଡ଼ିତ ଥିବା ଅଭିଯୋଗରେ ପ୍ୟରମୋହନ ମହାପାତ୍ରଙ୍କୁ ନିଲମ୍ବନ କରାଯିବା ପରେ ଆଜି ତାଙ୍କୁ ଦଳରୁ ବହିଷ୍କାର କରାଯାଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି ।

ଶୁକ୍ରବାର ଅନୁଷ୍ଠିତ ହୋଇଥିଲା ବିଜେଡ଼ିର ରାଜ୍ୟ କାର୍ଯ୍ୟକାରିଣୀ ବୈଠକ । ଏହି ବୈଠକରେ ପ୍ୟାରୀଙ୍କ ଓଡ଼ିଶା ଜନମୋର୍ଚ୍ଚା ଗଠନ, ସଭ୍ୟ ସଂଗ୍ରହ, ଚାନ୍ଦା ସଂଗ୍ରହ, ଭୁବନେଶ୍ୱରରେ କ୍ରାନ୍ତି ସମାବେଶ ଏବଂ ଦଳ ସଭାପତିଙ୍କ ଉପରେ ଆକ୍ରମଣାତ୍ମକ ଆଭିମୁଖ୍ୟ ସଂପର୍କରେ ଆଲୋଚନା ହୋଇଥିଲା ।

ଶେଷରେ ପ୍ୟାରୀଙ୍କୁ ଦଳରୁ ବହିଷ୍କାର ପାଇଁ ପ୍ରସ୍ତାବ ଆଗତ ହୋଇଥିଲା । ଏହି ପ୍ରସ୍ତାବ ସବସମ୍ମତି କ୍ରମେ ପାରିତ ହୋଇଥିଲା ଏବଂ ମହାପାତ୍ରଙ୍କୁ ଦଳରୁ ବହିଷ୍କାର କରାଗଲା ବୋଲି ପଟ୍ଟନାୟକ ଘୋଷଣା କରିଥିଲେ ।

ଏଥି ସହିତ ଦଳର ସଂପାଦକ ଯଜ୍ଞେଶ୍ୱର ବାବୁ ଦଳ ବିରୋଧି କାର୍ଯ୍ୟରେ ଲିପ୍ତ ଥିବାରୁ ତାଙ୍କୁ ମଧ୍ୟ ଦଳରୁ ବହିଷ୍କାର କରାଗଲା ବୋଲି ସେ ଘୋଷଣା କରିଥିଲେ । ଏ ସଂପର୍କରେ ମହାପାତ୍ର କହିଛନ୍ତି ଏହି ପରି ହେବ ବୋଲି ମୁଁ ଆଗରୁ ଜାଣିଥିଲି । ଏହା କିଛି ନୂଆ କଥା ନୁହେଁ । ଏହା ବିରୋଧରେ ମୁଁ ବିଜେଡିର ୨୭ ଲକ୍ଷ କର୍ମୀଙ୍କ ନିକଟକୁ ଯିବି ଏବଂ ଓଡିଶାର ଜନସାଧାରଣଙ୍କ ପାଖକୁ ଯିବି ।

ବିଜେଡିରେ ୨୦ ଲକ୍ଷ କର୍ମୀ ଅସନ୍ତୁଷ୍ଟ ଅଛନ୍ତି । ସେମାନଙ୍କୁ ଅବହେଳା କରାଯାଇଛି । ମୁଁ କର୍ମୀଙ୍କ ଅଧିକାର ପାଇଁ ଲଢୁଛି । ଏହି ଅଧିକାର ପାଇଁ ଲଢେଇ ଆହୁରୀ ଜୋରଦାର କରାଯିବ ।

ଦଳରେ ବେଶୀ ବିଶୃଙ୍ଖଳା ନବୀନ ହିଁ ସୃଷ୍ଟି କରୁଛନ୍ତି । ନିଜର ବଡ ପଣିଆ ଦେଖାଇ ସାରା ଦଳକୁ ପଙ୍ଗୁ କରିଦେଇଛନ୍ତି । ୨୦୧୦ ଜୁଲାଇ ୧୦ତାରିଖରେ ଶେଷଥର ପାଇଁ ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା । ଏହା ପରଠାରୁ ଦଳୀୟ ସମ୍ବିଧାନମତେ କୌଣସି ବୈଠକ ବସିନାହିଁ ।

ସବୁ ନିଷ୍ପତି ନବୀନଙ୍କର ଏକଚାଟିଆ ଭାବେ ଚାଲିଥିଲା । ନୂଆ କାର୍ଯ୍ୟକାରିଣୀ ଗଠନ ହେବାର ୩ବର୍ଷ ଭିତରେ ଅନ୍ୟୁନ ୬ଥର ବୈଠକ ବସିବା କଥା, ହେଲେ ଏହି ବୈଠକ ହେଉନାହିଁ । ତିନିବର୍ଷରୁ ମାତ୍ର ଆଉ ଦେଢ ମାସ ଅଛି ସେତେବେଳେ କାର୍ଯ୍ୟକାରିଣୀ ଡାକୁଛନ୍ତି । ଏବେ କହୁଛନ୍ତି ବ୍ୟକ୍ତି ବିଶେଷ ବଡ ନୁହେଁ ।

ସେ ଦଳର ସମ୍ବିଧାନକୁ ଗୋଇଠା ମାରି ଚାଲିଗଲେ । ଏ ଦଳ ତାଙ୍କୁ କ୍ଷମା ଦେବନାହିଁ । ତାଙ୍କୁ ଏ ଦଳର କର୍ମୀମାନେ ଗୋଇଠା ମାରି ବାହର କରିଦେବେ । ଏହାଛଡ଼ା ବିଜେଡ଼ି ଗଣତାନ୍ତ୍ରିକ ପଦ୍ଧତିରେ ଚାଲୁନଥିବା ନେଇ ପ୍ୟାରୀ ଅଭିଯୋଗ କରିଛନ୍ତି ।

ପଞ୍ଚାୟତରାଜ ମନ୍ତ୍ରୀ କଳ୍ପତରୁ ଦାସ କହିଛନ୍ତି ଦଳ ସମ୍ବିଧାନ ଅନୁସାରେ କାର୍ଯ୍ୟ କରୁଛି । ସାମ୍ବିଧାନିକ ପଦ୍ଧତି ଅନୁସାରେ ମହାପାତ୍ର ଓ ଯଜ୍ଞଶ୍ୱରଙ୍କୁ ଦଳରୁ ବହିଷ୍କାର କରାଯାଇଛି । ଓଡିଶାରେ ବିଜେଡି ହେଉଛି ଏକ ମାତ୍ର ଦଳ ଯିଏକି ୧୯୯୭ ମସିହାରୁ ସମ୍ବିଧାନ ଅନୁସାରେ କାମ କରୁଛି ।

ଆଜି ବି ଯାହା କରାଯାଇଛି ସମ୍ବିଧାନ ବ୍ୟବସ୍ଥା ଅନୁସାରେ କରାଯାଇଛି । ରାଜ୍ୟ କାର୍ଯ୍ୟକାରିଣୀର ଏହି ନିସ୍ପତିକୁ କୋର୍ଟରେ ଚ୍ୟାଲେଞ୍ଜକରାଯାଇ ପାରିବ ନାହିଁ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟେବର ୨୭(ଓଡ଼ିଶା ଡ଼ଟ୍ କମ୍) –ରବିବାର ହେବାକୁ ଯାଉଥିବା ଓଡ଼ିଶା ଜନମୋର୍ଚ୍ଚା(ଓଜମୋ)ର ବହୁ ଚର୍ଚ୍ଚିତ ସମାବେଶକୁ ନେଇ ସାରା ରାଜ୍ୟରେ ରାଜନୈତିକ ଉଷ୍ମତା ବୃଦ୍ଧି ପାଇବାରେ ଲାଗିଛି ।

ଇତି ମଧ୍ୟରେ ଜନମୋର୍ଚ୍ଚା ସୁପ୍ରିମୋ ପ୍ୟାରୀ ମହାପାତ୍ରଙ୍କର ନିଜସ୍ୱ କାରକୁ ଭଙ୍ଗାଯିବାଠାରୁ ଆରମ୍ଭ କରି ବିଜୁ ମହିଳା ଜନତା ଦଳ ପକ୍ଷରୁ ଶହୀଦନଗରସ୍ଥିତ ଜନମୋର୍ଚ୍ଚା ଅଫିସକୁ ଘେରାଉ କରାଯାଇ ସେଠାରେ ମହାପାତ୍ରଙ୍କ କୁଶପୁତଳିକା ଦାହ କରାଯାଇଛି ।

ଏହାକୁ ନଜରରେ ରଖି କମିସନରେଟ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ ଅଧିକ କଡାକଡି କରାଯାଇଛି । ବିଶେଷକରି ଅତୀତରେ କଂଗ୍ରେସ ସମାବେଶ ସମୟରେ ଯେଉଁ ପ୍ରକାରର ହିଂସାକାଣ୍ଣ ସୃଷ୍ଟି ହେଲା ତା’କୁ ଦୃଷ୍ଟିରେ ରଖି ଏଥର ସୁରକ୍ଷା ବ୍ୟବସ୍ଥାକୁ ଆହୁରି ଅଧିକ କଡ଼ାକଡ଼ି କରାଯାଇଛି ବୋଲି ପୁଲିସ କମିସନର ଏସ.ରୟ କହିଛନ୍ତି ।

ମହାପାତ୍ରଙ୍କ କହିବାନୁଯାୟୀ ଗତ କାଲି ରାତି ୧୨ଟା ୧୫ ମିନିଟରେ ସେମାନେ ଯେତେବେଳେ ଶୋଇବାକୁ ଯାଉଥିଲେ ସେହି ସମୟରେ ବାହାରେ ଖୁବ୍ ଯୋରରେ ଏକ ଶବ୍ଦ ହୋଇଥିଲା । ସେମାନେ ଏହାକୁ ଗୁରୁତ୍ୱ ନଦେଇ ଶୋଇବାକୁ ଚାଲି ଯାଇଥିଲେ ।

ଆଜି ସକାଳୁ ଉଠି ଦେଖିଥିଲେ ତା’ଙ୍କ କାରଟିକୁ ଇଟା ପଥର ପକାଯାଇ ସମ୍ପୂର୍ଣ୍ଣ ନଷ୍ଟ କରି ଦିଆଯାଇଛି । କାରର ପଛ କାଚଟି ସମ୍ପୂର୍ଣ୍ଣ ଭାଙ୍ଗିରୁଜି ଯାଇଥିବାର ଅଭିଯୋଗ କରି ମହାପାତ୍ରଙ୍କ କର୍ମଚାରୀମାନେ ଆଜି ସହିଦନଗର ଥାନାରେ ଏତାଲା ଦେଇଛନ୍ତି ।

ଆଜି ବିଜୁ ମହିଳା ଜନତା ଦଳର ବହୁ କାର୍ଯ୍ୟକର୍ତା ଶହିଦନଗରସ୍ଥିତ ଓଡିଶା ଜନମୋର୍ଚ୍ଚା ଅଫିସ ସମ୍ମୁଖରେ ପହଞ୍ଚି ମହାପାତ୍ରଙ୍କ ବିରୁଦ୍ଧରେ ସ୍ଲୋଗାନ ଦେଇଥିଲେ ଓ ଦାବି କରିଥିଲେ ଯେ ଶ୍ରୀ ମହାପାତ୍ର ନୈତିକତା ଦୃଷ୍ଟିରୁ ପ୍ରଥମେ ରାଜ୍ୟସଭା ପଦରୁ ଇସ୍ତଫା ଦିଅନ୍ତୁ ।

ସମାବେଶକୁ ନେଇ ରାଜନୈତିକ ଉଷ୍ମତା ବୃଦ୍ଧି ପାଉଥିବା ଦୃଷ୍ଟିରୁ ଓଡ଼ିଶା ଜନମୋର୍ଚ୍ଚାର ଧାରଣା ସ୍ଥଳରେ ଶାନ୍ତିଶୃଙ୍ଖଳା ରକ୍ଷା କରିବାପାଇଁ ୨୦ ଜଣ ଡିଏସପିଙ୍କ ନେତୃତ୍ୱରେ ୧୦୦ ଜଣ ଇନ୍ସପେକ୍ଟର ଓ ସବଇନ୍ସପେକ୍ଟର ନିଯୁକ୍ତ କରାଯାଇଛନ୍ତି ।

ବିଭିନ୍ନ ସ୍ଥାନରେ ୪୫ ପ୍ଲାଟୁନ୍ ସଶସ୍ତ୍ର ପୁଲିସ ମୁତୟନ ରହିବେ । ଜନମୋର୍ଚ୍ଚାର କର୍ମକର୍ତାମାନେ ପ୍ରତିଶୃତି ଦେଇଛନ୍ତି ଯେ ସେମାନେ ଦୁଇଟି ସ୍ଥାନରୁ ମୋଟ ୫୦,୦୦୦ ସମର୍ଥକଙ୍କର ଶୋଭାଯାତ୍ରା ବାହାର କରିବେ ।

ଗୋଟିକରେ ୪୦,୦୦୦ ଓ ଅନ୍ୟଟିରେ ୧୦,୦୦୦ ଲୋକ ଆସିବାପାଇଁ କମିସନରେଟ ପୁଲିସକୁ ପ୍ରତିଶୃତି ମିଳିଛି । ।

ରବିବାରର ସମାବେଶ ସମ୍ପର୍କରେ ସୂଚନା ଦେଇ ଜନମୋର୍ଚ୍ଚାର ମୁଖ୍ୟ ପ୍ରବକ୍ତା ଶ୍ରୀ ଯଜ୍ଞେଶ୍ୱର କହିଛନ୍ତି ଯେ ସେମାନଙ୍କ ସମାବେଶରେ ବିଜେଡିର ୭୦,୦୦୦ କାର୍ଯ୍ୟକର୍ତା ଯୋଗ ଦେଉଛନ୍ତି ବୋଲି ରିପୋର୍ଟ ପାଇବାପରେ ବିଜେଡିର କେତେଜଣ ନେତା ଏପରିକି ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଆଶଙ୍କିତ ହୋଇ ଉଠିଛନ୍ତି ।

ସେମାନଙ୍କ ପକ୍ଷରୁ ଆମର ଶୁଭେଚ୍ଛୁମାନଙ୍କୁ ଅଟକାଇବା ପାଇଁ ବହୁ ପ୍ରକାରର ଉଦ୍ୟମ କରାଯାଉଛି ବିଶେଷକରି ସରକାରୀ କଳକୁ ବ୍ୟବହାର କରି ଗାଡି ମାଲିକମାନଙ୍କୁ ଜନମୋର୍ଚ୍ଚା ସମର୍ଥକମାନଙ୍କୁ କୌଣସି ପ୍ରକାରେ ଭୁବନେଶ୍ୱର ନନେବାପାଇଁ ଧମକଚମକ ଦିଆଯାଉଛି ।

ତା ସତ୍ଵେ ଏହି ସମାବେଶ ନିଶ୍ଚିତ ସଫଳ ହେବ ବୋଲି ଯଜ୍ଞେଶ୍ୱର କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୨୦(ଓଡ଼ିଶା ଡ଼ଟ୍ କମ୍) –ରେଳବାଇ କ୍ଷେତ୍ରରେ ଓଡିଶାକୁ ବାରମ୍ବାରର ଅବହେଳା ପ୍ରତିବାଦରେ ଆଜି ବିଜେଡି ବିଧାୟକମାନଙ୍କର ଏକ ପ୍ରତିନିଧିଦଳ ରାଜ୍ୟପାଳ ଶ୍ରୀ ମୁରଲୀଧର ଚନ୍ଦ୍ରକାନ୍ତ ଭଣ୍ଡାରିଙ୍କୁ ଭେଟି ସ୍ମାରକ ପତ୍ର ପ୍ରଦାନ କରିଛନ୍ତି ।

ଏହି ପ୍ରତିନିଧି ଦଳରେ ବହୁ ବିଧାୟକ ଓ କର୍ମୀମାନେ ସାମିଲ ହୋଇଛନ୍ତି । ଓଡିଶାପାଇଁ କେନ୍ଦ୍ରର ବରାଦ ମୁତାବକ କେନ୍ଦ୍ରର ଅନୁଦାନ ଅର୍ଥକୁ ବିଭିନ୍ନ ସମୟରେ କାଟିନେଇଥିବା ଅର୍ଥକୁ ପୁର୍ନବାର ଫେରାଇବାକୁ ଏହି ବିଧାୟକମାନେ ଦାବି କରିଛନ୍ତି ।

୨୦୧୨ ରେଳ ବଜେଟରେ ଓଡିଶା ପାଇଁ ୭୨୩କୋଟି ଟଙ୍କା ବରାଦ ହୋଇଥିଲା ତେବେ ଏଥିରୁ ଗତ ଜୁନ ମାସରେ ୧୮୬କୋଟି ଟଙ୍କା ଓ ପରେ ସେପ୍ଟେମ୍ବରରେ ୩୪ କୋଟି ଟଙ୍କା କାଟିଦିଆ ଯାଇଥିଲା ।

ଓଡଶାପାଇଁ ଏବର୍ଷ ରାଜ୍ୟ ସରକାରଙ୍କ ପକ୍ଷରୁ ୨୩୪୫କୋଟି ଟଙ୍କା ଦାବି କରା ଯାଇଥିଲା ହେଲେ କେନ୍ଦ୍ର ସରକାର ୭୨୩ କୋଟି ଟଙ୍କା ବ୍ୟୟ ବରାଦ କରିଥିଲେ ।

କିନ୍ତୁ ଏହି ଅର୍ଥରୁ ଦୁଇଟି ପର୍ଯ୍ୟାୟରେ ୨୨୦କୋଟି ଏଥିରୁ ଟଙ୍କା କାଟି ଦେଇଛନ୍ତି । ଯାହାକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୃଢ ପ୍ରତିବାଦ କରି ରେଳମନ୍ତ୍ରୀ ଡ.ସି.ପି.ଯୋଶୀଙ୍କୁ ଚିଠି ଲେଖିଥିଲେ ।

ଓଡିଶାର ଯେଉଁ ଶିଳ୍ପର ଅବିବୃଦ୍ଧି ହୋଇଛି,ବନ୍ଦରର ସମ୍ଭାବନା ସୃଷ୍ଟି ହୋଇଛି ଏହି କାଟିଦେବା ଫଳରେ ତାହା ବାଧାପ୍ରାପ୍ତ ହେବ ବୋଲି ଯୁବ ବିଜେଡି ସଂଭାପତି ସଂଜୟଦାସ ବର୍ମା ଓଡିଶା ଡ଼ଟ୍ କମ୍ କୁ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୧୭(ଓଡ଼ିଶା ଡ଼ଟ୍ କମ୍) – ରାଜଧାନୀର ବ୍ୟସ୍ତ ବହୁଳ ରାଜମହଲ ଛକ ଠାରେ ନିର୍ମାଣାଧୀନ ଫ୍ଲାଇଓଭର ବ୍ରିଜ ଆଜି ଉଦଘାଟିତ ହୋଇ ଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ ଜନସାଧାରଣଙ୍କ ଉଦ୍ଦେଶ୍ୟରେ ଅର୍ପଣ କରିଛନ୍ତି ।

୨୦୦୯ ମସିହା ଅକ୍ଟୋବର ମାସରେ ଏହାର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ଏଥିପାଇଁ ମୋଟ ୫୨ କୋଟି ୩ ଲକ୍ଷ ଟଙ୍କା ବ୍ୟୟ ଅଟ୍ଟକଳ କରାଯାଇଥିଲା ।

ପୂର୍ତ ବିଭାଗ ଦ୍ୱାରାନିର୍ମାଣ କରାଯାଇଥିବା ଦୁଇ ଟିକିଆ ଏହି ଫ୍ଲାଇଓଭରର ଲମ୍ବ ୫୬୦ ମିଟର । ତିନି ଲେନ ବିଶିଷ୍ଟ ଏହି ଓଭରବ୍ରିଜର ଚଉଡ଼ା ୬.୫ ମିଟର ହୋଇଥିବା ବେଳେ ୩ ମିଟର ଚଉଡ଼ାର ଫୁଟପାଥ ରହିଛି ।

ଏହି ଫ୍ଲାଇଓଭର କଳ୍ପନାଛକରୁ ଏ.ଜି.ଛକକୁ ସଂଯୋଗ କରୁଛି । ଏହା ତଳ ଦେଇ ଯାଇଥିବା ରାସ୍ତା ଶିଶୁଭବନ ଛକ ଓ ମାଷ୍ଟରକ୍ୟାଟିଂନିକୁ ସଂଯୋଗ କରୁଛି ।

ଫ୍ଲାଇଓଭରର ଉଭୟ ପାଶ୍ୱର୍ରେ ମଧ୍ୟ ରାସ୍ତା ନିର୍ମାଣ କରାଯାଇଛି । ଭିଡ଼ ଯୋଗୁଁ ଯାତ୍ରୀମାନେ ଏଠାରେ ଯେଉଁ ଅସୁବିଧାର ସମ୍ମୁଖୀନ ହେଉଥିଲେ ତାହା ଏଥର ଦୂର ହେବ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟୋବର ୧୬(ଓଡ଼ିଶା ଡ଼ଟ୍ କମ୍) –ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ୬୭ବର୍ଷରେ ପଦାର୍ପଣ କରିଛନ୍ତି ।

ଏହି ଅବସରରେ ତାଙ୍କୁ ଶୁଭେଚ୍ଛା ଜଣାଇବା ପାଇଁ ଆଜି ସକାଳୁ ନବୀନ ନିବାସରେ ବେଶ ଭିଡ ଜମିଥିଲା ମନ୍ତ୍ରୀ, ବିଧାୟକ, ଦଳୀୟନେତା, ପ୍ରଶାସକ , ପୋଲିସ ଅଧିକାରୀ ଓ ସାଧାରଣ ଲୋକ ମୁଖ୍ୟମନ୍ତ୍ରୀଙ୍କୁ ପୁଷ୍ପଗୁଚ୍ଛ ପ୍ରଦାନ କରିଥିଲେ ।

ସଚ୍ଚିବାଳୟର ତାଙ୍କ ପ୍ରକୋଷ୍ଠରେ ମଧ୍ୟ ସାମ୍ବାଦିକମାନେ ନବୀନଙ୍କୁ ଭେଟି ଶୁଭେଚ୍ଛା ଜଣାଇଥିଲେ । ନିଜ ଜନ୍ମଦିନ ଅବସରରେ ସମସ୍ତଙ୍କୁ ରାଜ୍ୟବାସୀଙ୍କୁ ଶୁଭେଚ୍ଛା ବାର୍ତାଦେବାସହ ପଟ୍ଟନାୟକ ସେମାନଙ୍କ ମଙ୍ଗଳ କାମନା କରିଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅକ୍ଟେବର ୫ (ଓଡ଼ିଶା ଡ଼ଟ୍ କମ୍) – ଏଣକି ଖଣି ଲିଜକୁ ନିର୍ଦ୍ଧିଷ୍ଟ ଭାବେ ବା ମୁହଁଦେଖା କାହାକୁ ପ୍ରଦାନ କରାଯିବ ନାହିଁ । ଏ କ୍ଷେତ୍ରରେ ସମସ୍ତଙ୍କୁ ସାମିଲ କରାଯିବ ଓ ସମବଣ୍ଟନ ବ୍ୟବସ୍ଥା କରାଯିବ ।

ଲିଜ ପ୍ରଦାନ ସମୟରେ ସମ୍ପୃକ୍ତ ଶିଳ୍ପର ଅବସ୍ଥିତି ଯାଞ୍ଚ ହେବ । ଆବଶ୍ୟକତାଠାରୁ ଅଧିକ ଖଣି କାହାକୁ ପ୍ରଦାନ କରାଯିବ ନାହିଁ । ଖଣିଜ ପଦାର୍ଥର ମହଜୁଦ ପରିମାଣ ମଧ୍ୟ ବିଚାରକୁ ନିଆଯିବ ।

ରାଜ୍ୟ ଇସ୍ପାତ ଓ ଖଣି ବିଭାଗ ଦଦ୍ୱାରାପ୍ରସ୍ତୁତ ଏହି ନିୟମକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କଲାପରେ ଏ ନେଇ ବିଜ୍ଞପ୍ତି ପ୍ରକାଶ ପାଇଛି । ତେବେ ଏହି ନିୟମ ରାଜ୍ୟର ଖଣି କାରବାର ଉପରେ ସୁଦୂରପ୍ରସାରୀ ପ୍ରଭାବ ପକାଇବ ବୋଲି ବିଚାର କରାଯାଉଛି ।

ଖଣି ଲିଜ ନବୀକରଣ ପାଇଁ ରାଜ୍ୟ ସରକାର ନୂଆ ପ୍ରସ୍ତାବ ଅନୁଯାୟୀ ଦ୍ୱିତୀୟ ବା ପରବର୍ତୀ ଖଣି ଲିଜ ନବୀକରଣକୁ କୌଣସି ଖଣି ଲିଜଧାରୀ ନିଜର ଅଧିକାର ବୋଲି ମନେକରିବେ ନାହିଁ ।

ଲୁହାପଥର, ମାଙ୍ଗାନିଜ, କ୍ରୋମାଇଟ, ବକ୍ସାଇଟ ଖଣିଗୁଡ଼ିକ ଲିଜ ପ୍ରଦାନ କ୍ଷେତ୍ରରେ ଆଇନର ସଂଶୋଧନକରି ସରକାର ପ୍ରଣୟନ କରିଥିବା ଏହି ନୂଆ ଆଇନ ୧୯୯୬ ମସିହାରେ ପ୍ରଦତ ସୁପ୍ରିମ କୋର୍ଟ ରାୟ ଆଧାରରେ ପ୍ରସ୍ତୁତ କରାଯାଇଛି ।

ତେବେ ଏହି ନବୀକରଣ ନିୟମ କେନ୍ଦ୍ର ଓ ରାଜ୍ୟ ସରକାରଙ୍କ ନିୟନ୍ତ୍ରଣାଧୀନ କମ୍ପାନୀ ଅଥବା ନିଗମ କ୍ଷେତ୍ରରେ ପ୍ରଯୁଜ୍ୟ ହେବନାହିଁ ।

ଏ ସମ୍ପର୍କରେ ବିଭାଗୀୟ ସଚିବ ରାଜେଶ ବର୍ମା ପ୍ରଦାନ କରିଥିବା ସୂଚନାନୁଯାୟୀ, ଲିଜଧାରୀ ଉତୋଳିତ ଖଣିଜ ପଦାର୍ଥକୁ ରାଜ୍ୟରେ ଉପଯୋଗ କରୁଛନ୍ତିି କି ନାହିଁ ତାହା ମଧ୍ୟ ଲକ୍ଷ୍ୟ କରାଯିବ ।

ପୁନଶ୍ଚ ଲିଜଧାରୀ ନବୀକରଣ ସମୟରେ ଜଙ୍ଗଲ ଓ ପରିବେଶ ଆଇନ, ଜଳ ଓ ବାୟୁ ନୀତି ଇତ୍ୟାଦି ପରିପୂରଣ କରୁଛନ୍ତି କି ନାହିଁ ତାହା ବିଚାରକୁ ନିଆଯିବ ।

ଓଡ଼ିଶା ଡ଼ଟ୍ କମ୍