ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ନଭେମ୍ବର ୧୫(ଓଡ଼ିଶା ଡ଼ଟ୍ କମ୍) ଓଡ଼ିଶା ସହିତ ବାଣିଜ୍ୟିକ ସଂପର୍କ ପ୍ରତିଷ୍ଠା ପାଇଁ ଆମେରିକାର ୱାଶିଂଟନ ବାଣିଜ୍ୟ ପ୍ରତିନିଧି ଦଳ ‘ୱାସିଟ୍ରାକ୍’(ୱାଶିଂଟନ୍ ଷ୍ଟେଟ୍ ଇଣ୍ଡିଆ ଟ୍ରେଡ୍ ରିଲେସନ୍ସ୍ ଆକ୍ସନ୍ କମିଟି) ସୋମବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରି ଆଲୋଚନା କରିଛନ୍ତି ।

ବାଣିଜ୍ୟିକ ସୁଯୋଗ ଦୃଷ୍ଟିରୁ ଓଡ଼ିଶା ସହିତ ଅଧିକ ସଂପର୍କ ସ୍ଥାପନ ପାଇଁ ଆମେରିକରା କଂଗ୍ରେସ ସଦସ୍ୟ ଜିମ୍ ମ୍ୟାକଡରମଟ୍ ଏବଂ ୱାଶିଂଟନ୍ ଲେଫ୍ଟ୍ମେଣ୍ଟ ଗଭର୍ନର ବ୍ରାଡ୍ ଓଏନ୍ଙ୍କ ନେତୃତ୍ୱରେ ୧୩ ଜଣିଆ ପ୍ରତିନିଧି ଦଳ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରିଛନ୍ତି । ଷ୍ଟିଲ୍, ଆଲୁମିନିୟମ୍ ଓ ବିୁ୍ଦ୍ୟୁତ କ୍ଷେତ୍ରରେ ରାଜ୍ୟରେ ବହୁତ ଶିଳ୍ପ ପ୍ରତିଷ୍ଠା କରାଯାଉଛି ।

ପ୍ରଯୁକ୍ତି ବିଦ୍ୟା ଶିକ୍ଷା କ୍ଷେତ୍ରରେ ମଧ୍ୟ ଓଡ଼ିଶାରେ ବହୁତ ବିକାଶ ହୋଇଛି ବୋଲି ସେମାନଙ୍କୁ ସୂଚନା ଦିଆଯାଇଥିଲା । ପ୍ରତିନିଧି ଦଳର ସଦସ୍ୟମାନେ ଓଡ଼ିଶାର ବିକାଶରେ ସନ୍ତୋଷ ପ୍ରକାଶ କରି ଉଭୟ ରାଜ୍ୟ ମଧ୍ୟରେ ବାଣିଜ୍ୟିକ ସଂପର୍କ ବୃଦ୍ଧି ପାଇଁ ପର୍ଯ୍ୟାପ୍ତ ସୁଯୋଗ ରହିଛି ବୋଲି ପ୍ରକାଶ କରିଥିଲେ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ନଭେମ୍ବର ୧୫(ଓଡ଼ିଶା ଡ଼ଟ୍ କମ୍) ଅବସରପ୍ରାପ୍ତ ପ୍ରଶାସକ ତଥା ପୂର୍ବତନ ମୁଖ୍ୟ ଶାସନ ସଚିବ ତରୁଣକାନ୍ତି ମିଶ୍ର ରାଜ୍ୟର ପରବର୍ତ୍ତୀ ମୁଖ୍ୟ ସୂଚନା କମିଶନର ହେବେ । ସାମ୍ବିଧାନିକ ବିଧି ବ୍ୟବସ୍ଥା ଅନୁସାରେ ସୋମବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ତିନି ଜଣିଆ କମିଟିରେ ମିଶ୍ରଙ୍କୁ ମନୋନୀତ କରାଯାଇଛି ।

କମିଟିର ଅନ୍ୟଦୁଇ ଜଣ ସଦସ୍ୟ ହେଲେ ବିରୋଧିଳ ନେତା ଭୂପିନ୍ଦର ସିଂହ ଏବଂ ସଂସଦୀୟ ବ୍ୟାପାର ମନ୍ତ୍ରୀ ରଘୁନାଥ ମହାନ୍ତି । ଏହି ମର୍ଯ୍ୟଦାଜନକ ତଥା ସାମ୍ବିଧାନିକ ପଦବୀ ନିମନ୍ତେ ଗୋଟିଏ ମାତ୍ର ନାମ ଆସିଥିଲା ।

କିଛି ସମୟର ଆଲୋଚନା ପରେ ବିନା ବିରୋଧରେ ମିଶ୍ର ମନୋନୀତ ହୋଇଥିବା ସଂସଦୀୟ ବ୍ୟାପାର ମନ୍ତ୍ରୀ ମହାନ୍ତି ସାମ୍ବାଦିକ ମାନଙ୍କୁ କହିଥିଲେ । ଏହି ପଦବୀରେ ଥିବା ଧିରେନ୍ଦ୍ର ନାଥ ପାଢୀଙ୍କ କାର୍ଯ୍ୟକାଳ ଚଳିତ ମାସ ୧୯ତାରିଖରେ ସମାପ୍ତ ହେଉଥିବାରୁ ସେହି ଦିନ ନୂତନ ମୁଖ୍ୟ ସୂଚନା କମିଶନର ଭାବେ ମିଶ୍ର ଦାୟିତ୍ୱ ଗ୍ରହଣ କରିବେ ।

ଓଡିଶା ଡଟ୍ କମ୍

ଭୁବନେଶ୍ୱର, ନଭେମ୍ବର ୮(ଓଡ଼ିଶା ଡ଼ଟ୍ କମ୍) ରାଜ୍ୟରେ ମାଓବାଦୀ ମନ କାର୍ଯ୍ୟରେ ନିୟୋଜିତ ଥିବା ସୀମା ସୁରକ୍ଷା ବଳ(ବିଏସ୍ଏଫ୍) ସହ ରାଜ୍ୟ ପୋଲିସର ତାଳମେଳ ରହୁନଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅସନ୍ତୋଷ ବ୍ୟକ୍ତ କରିଛନ୍ତି ।

ତେଣୁ ବିଏସ୍ଏଫ୍ ସହ ରାଜ୍ୟ ପୋଲିସର ସମନ୍ୱୟ ରଖିବାକୁ ସେ ନିଦେ୍ର୍ଧଶ ଦେଇଛନ୍ତି ।

ଓଡ଼ିଶା ଡ଼ଟ୍ କମ୍

ପ୍ରଶାନ୍ତ ପଟ୍ଟନାୟକ

ରାଜ୍ୟବାସୀଙ୍କ ହୃଦୟ ଜିଣିବା ନିମନ୍ତେ ବିଗତ ବର୍ଷ ମାନଙ୍କରେ ଓଡ଼ିଶାର ପ୍ରବାଦ ପୁରୁଷ ତଥା ନିଜ ପିତା ସ୍ୱର୍ଗତ ବିଜୁ ପଟ୍ଟନାୟକଙ୍କ ନୀତି ପ୍ରତି ଆନୁଗତ୍ୟ ପ୍ରକାଶ କରି ନିଜ ନିର୍ମଳ ଚେହେରା ବଜାୟ ରଖିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବେ ଦୋଛକିରେ ଅଛନ୍ତି । ଅନାହାର ମୃତ୍ୟୁ, ମାଓବାଦୀ ଆତଙ୍କ, ଶିଶୁବିକ୍ରି, କଳିଙ୍ଗନଗର ରାସ୍ତା ଅବରୋଧ ସତ୍ୱେ ନବୀନ ସିଏନ୍ଏନ୍-ଆଇବିଏନ୍ ଚ୍ୟାନେଲର ଲୋକପ୍ରିୟତା ସର୍ଭେରେ “ପ୍ରକୃତ ଓଡ଼ିଶା” ସଂକ୍ରାନ୍ତରେ କ୍ୱଚିତ୍ ଜ୍ଞାନ ରଖିଥିବା ଲୋକଙ୍କ ଭୋଟରେ ନମ୍ବର ୱାନ୍ ହୋଇପାରିଥିଲେ । ଅବଶ୍ୟ ନିକଟରେ “ଇଣ୍ଡିଆ ଟୁଡ଼େ” ଦ୍ୱାରା ହୋଇଥିବା ସର୍ଭେରେ ନବୀନ ତାଲିକା ନିମ୍ନକୁ ଚାଲି ଆସିଛନ୍ତି । ତେବେ ଏଭଳି ସର୍ଭେ ସହ ଓଡ଼ିଶାର ସାଧାରଣ ଗରିବ ଲୋକଙ୍କର କିଛି ଯାଏ ଆସେ ନାହିଁ ।

ଦେଖିବାକୁ ଗଲେ ରାଜ୍ୟର ଶାସକ ଦଳ ନେତାଙ୍କ ହାଭଭାବ ରୋମ୍ ର ସମ୍ରାଟ ନିରୋଙ୍କ ଭଳି, ଯିଏ କି ରୋମ ଜଳୁଥିବା ବେଳେ ବଂଶୀ ବାଦନ କରୁଥିଲେ । ଏହା ନିଃସନ୍ଦେହ ଯେ, ବିଜୁ ପୁତ୍ର ଭାବେ ନବୀନଙ୍କ ପ୍ରଭାବ, ତାଙ୍କ ପ୍ରଣୀତ ଶିଳ୍ପନୀତି ଏବଂ ବ୍ୟକ୍ତିଗତ ସମ୍ପର୍କ ଯୋଗୁଁ ସେ ଦେଶ/ବିଦେଶର ଅନେକ ଶିଳ୍ପୋଦ୍ୟୋଗୀଙ୍କୁ ରାଜ୍ୟକୁ ଶିଳ୍ପ ପ୍ରତିଷ୍ଠା ନିମନ୍ତେ ନିମନ୍ତ୍ରଣ କରିପାରିଛନ୍ତି । ଏହା ବିଜୁ ବାବୁଙ୍କ ଆଧୁନିକ ଓଡ଼ିଶା ଗଠନର ଅଧୁରା ସ୍ୱପ୍ନକୁ ସାକାର କରିବ ବୋଲି ତାଙ୍କର ଦାବି । କିନ୍ତୁ ଆମନ୍ତ୍ରିତ ହୋଇଥିବା ଅନେକ ଶିଳ୍ପପତିଙ୍କ ଉଦେ୍ଧଶ୍ୟ ସନ୍ଦେହଜନକ ।

ସେମାନେ ରାଜ୍ୟର ଉନ୍ନତି ପ୍ରଚେଷ୍ଟାର ଭାଗିଦାର ହେବା ପରିବର୍ତ୍ତେ ନିଜ ପାଇଁ ଖଣିଜ ଏବଂ ଜମିର ପେଣ୍ଠ ସୃଷ୍ଟି କରିବା ଲକ୍ଷ୍ୟରେ ଅଛନ୍ତି । କେବଳ ବେଦାନ୍ତ ଗ୍ରୁପ୍ର ଅନିଲ ଅଗ୍ରୱାଲ ଯେ ରାଜ୍ୟର ମୂଲ୍ୟବାନ୍ ଜମି ଏବଂ ଖଣିଜ ଉପରେ ଲୋଭିଲା ଆଖି ପକାଇଛନ୍ତି ତାହା ନୁହେଁ, ଯୋଗଗୁରୁ ଶ୍ରୀଶ୍ରୀ ରବିଶଙ୍କର, ଗୁରୁ ରାମବେ ମଧ୍ୟ ପୁରୀ-ଭୁବନେଶ୍ୱର ଉପକଣ୍ଠର ମୂଲ୍ୟବାନ ଜମିରେ ଆଶ୍ରମ ପ୍ରତିଷ୍ଠା ଲକ୍ଷ୍ୟରେ ଅଛନ୍ତି ।

ରିଲିଆନ୍ସ ଇଣ୍ଡଷ୍ଟ୍ରିର ଅନିଲ ଅମ୍ବାନୀ ମଧ୍ୟ ଏହି ଦୌଡ଼ରୁ ବାଦ ପଡ଼ି ନାହାନ୍ତି । ସେ ଭୁବନେଶ୍ୱର ଉପକଣ୍ଠରେ ଶହେ ଏକର ଜମି ଉପରେ ଏକ “ହେଲ୍ଥ ସିଟି” ପ୍ରତିଷ୍ଠା ଯୋଜନାରେ ଅଛନ୍ତି । ଏଭଳି ଅନେକ ଶିଳ୍ପପତି ଏବଂ ଯୋଗଗୁରୁଙ୍କ ରାଜ୍ୟର ଜମି ଉପରେ ଲୋଭିଲା ଦୃଷ୍ଟି ରାଜ୍ୟବାସୀ, ବୁଦ୍ଧିଜୀବୀ ତଥା ବିଶେଷ କରି ପ୍ରବାସୀ ଓଡ଼ିଆ ମାନଙ୍କ ମନରେ ସନ୍ଦେହ ସୃଷ୍ଟି କରିଛି ।

ନବୀନ ସରକାରଙ୍କ ଏଭଳି ଉଦାରନୀତି ଅନେକ ତଥାକଥିତ ଯୋଗଗୁରୁ-ଯୋଗିନୀ ମାନଙ୍କୁ “ପ୍ରବଚନ” ଉଦେ୍ଧଶ୍ୟରେ ଆମନ୍ତ୍ରିତ କରିଛି, ଯାହାର କି ଏକମାତ୍ର ଉଦେ୍ଧଶ୍ୟ ଭୁବନେଶ୍ୱର ଉପକଣ୍ଠରେ ଜମି ଅଧିକାର ।

ଦେଶ ବାହାରେ ରହୁଥିବା ଅନେକ ପ୍ରବାସୀ ଓଡ଼ିଆଙ୍କ ସହ ମୁଁ ନିକଟ ଅତୀତରେ ଆଲୋଚନା କରିବା ସମୟରେ ସେମାନେ ଓଡ଼ିଶା ସରକାର ଛଦ୍ମବେଶରେ ଆସୁଥିବା ଏହି ଜମିଲୋଭୀଙ୍କ ଜାଲରେ ପଡ଼ିବା ଅନୁଚିତ୍ ବୋଲି ମତ ଦେଇଛନ୍ତି । ସେମାନଙ୍କ ମତରେ ଯିଦି ଅନିଲ ଅଗ୍ରୱାଲ ରାଜ୍ୟରେ ଏକ ବିଶ୍ୱସ୍ତରୀୟ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବାକୁ ଆଗ୍ରହୀ ତେବେ ସେ କେବିକେ (କଳାହାଣ୍ଡି-ବଲାଙ୍ଗୀର-କୋରାପୁଟ)ରେ ଏହା କରିବା ଉଚିତ୍, ଯେଉଁଠାରେ କି ଅଳ୍ପ ସଂଖ୍ୟକ ଲୋକ ବିସ୍ଥାପିତ ହେବାର ଆଶଙ୍କା ଅଛି ।

ପ୍ରକୃତପକ୍ଷେ କେବିକେ ଏବଂ ତାହାର ପାରିପାର୍ଶ୍ୱିକ ଉନ୍ନତି ପାଇଁ ସେହି ଅଞ୍ଚଳରେ ଏକ ବିଶ୍ୱସ୍ତରୀୟ ବିଶ୍ୱବିଦ୍ୟାଳୟର ଆବଶ୍ୟକତା ଅଛି । ଏପରି ଏକ ବିଶ୍ୱବିଦ୍ୟାଳୟ ପ୍ରତିଷ୍ଠା ନିମନ୍ତେ ଜନବହୁଳ ପୁରୀ-କୋଣାର୍କ ମେରାଇନ ଡ଼୍ରାଇଭ୍ ଉପଯୁକ୍ତ ସ୍ଥାନ ନୁହେଁ । ରାଜ୍ୟର ସମୁନ୍ଦ୍ର ଉପକୂଳ ଅଥବା ବଣ ପାହାଡ଼ ଘେରା ପ୍ରାକୃତିକ ସୌନ୍ଦର୍ଯ୍ୟ ପରିପୂର୍ଣ୍ଣ ସ୍ଥାନ ପସନ୍ଦ ହେବ ତାହା ଦେଶବାହାରୁ ଆସୁଥିବା ଛାତ୍ରଛାତ୍ରୀଙ୍କ ଉପରେ ଛାଡ଼ିବା ଉଚିତ୍ ।

ସେହିଭଳି ଭୁବନେଶ୍ୱର ନିକଟବର୍ତ୍ତୀ ଅଞ୍ଚଳ ଅପେକ୍ଷା ଫୁଲବାଣୀ ଏବଂ କଳାହାଣ୍ଡି ଅଞ୍ଚଳରେ ଯୋଗ ଆଶ୍ରମ ପାଇଁ ଜମି ଦେବା ସର୍ବଦୌ ଉଚିତ୍ ନିଷ୍ପତ୍ତି ହୋଇପାରନ୍ତା । କାରଣ ଯୋଗ ଶିକ୍ଷା ପାଇଁ ଆଗ୍ରହୀ ବ୍ୟକ୍ତିବିଶେଷ ଏଥିପାଇଁ ଯଥେଷ୍ଟ ସମୟ ଦେଇ ସୁୂର ଫୁଲବାଣୀ ଅଥବା କଳାହାଣ୍ଡି ଯାଇ ସ୍ୱାସ୍ଥ୍ୟ ଉପଯୋଗୀ ପରିବେଶରେ ଯଥେଷ୍ଟ ସମୟ କାଟିପାରନ୍ତେ ।

ଜନଗହଳି ପୂର୍ଣ୍ଣ ଭୁବନେଶ୍ୱର, ପୁରୀ ଏବଂ କଟକ ଠାରୁ ବହୁ ଦୂରବର୍ତ୍ତୀ ଯେକୌଣସି ସ୍ଥାନରେ ଯୋଗ ଆଶ୍ରମ ପ୍ରତିଷ୍ଠା କରାଗଲେ ତାହା ଏକ ପର୍ଯ୍ୟଟନ କେନ୍ଦ୍ର ହୋଇପାରନ୍ତା ଏବଂ ରାଜ୍ୟରେ ଯୋଗ ପର୍ଯ୍ୟଟନକୁ ଉତ୍ସାହିତ କରାଯାଇପାରନ୍ତା ।

ଯେହେତୁ ଉଚ୍ଚାଭିଳାଷୀ ଏହି ଯୋଗଗୁରୁ ମାନେ ଯଥେଷ୍ଟ ଧନାଢ଼୍ୟ ବ୍ୟକ୍ତି ହୋଇଥିବାରୁ ଏବଂ ଏବେ ଯୋଗକୁ ବ୍ୟାବସାୟିକ ଉଦେ୍ଧଶ୍ୟରେ ବ୍ୟବହାର କରାଯାଉଥିବାରୁ ସରକାର ସେମାନଙ୍କୁ ନାମମାତ୍ର ମୂଲ୍ୟରେ ମୂଲ୍ୟବାନ ଜମି ହସ୍ତାନ୍ତର କରିବା ଅନୁଚିତ୍ ।

ଓଡିଶା ଡଟ୍ କମ୍