ଦୁର୍ନୀତି

ଦୁର୍ନୀତି ଓ ଘୋଟାଲା ପାଇଁ କ୍ଷୁଧିତ ଗୋଟିଏ ଗଣମାଧ୍ୟମ ଯେ ମଧ୍ୟପ୍ରଦେଶର ନିଯୁକ୍ତି ଓ ପ୍ରବେଶିକା ପରୀକ୍ଷା ପାଇଁ ଭ୍ୟାପମ୍ ନାଁ’ରେ ନାମିତ ରାକେଟ ବା ବଡ଼ଧରଣର ସଙ୍ଗଠିତ ଘୋଟାଲାଟିକୁ ଲୋକଲୋଚନକୁ ଆଣିବା କ୍ଷେତ୍ରରେ ବିଫଳ ହୋଇଛି, ଯାହା ଅକଥନୀୟ ମନେ ହେଉଛି ।

୨୦୧୩ଠାରୁ ଏଭଳି ଏକ ଘୋଟାଲାର ପ୍ରକୋପ ସର୍ବତ୍ର ଜଣାପଡ଼ି ଆସିଥିଲା, ଯେଉଁଥିରେ ୪୫ଜଣ ଅଭିଯୁକ୍ତ ଏବଂ ସାକ୍ଷୀଙ୍କୁ ରହସ୍ୟମୟ ଭାବେ ହତ୍ୟା କରାଯାଇଥିଲା, ୨୦୦୦ ଜଣଙ୍କୁ କ୍ଷତବିକ୍ଷତ କରାଯାଇଥିଲା, ମୁଖ୍ୟମନ୍ତ୍ରୀ, ତାଙ୍କ ମବୀଗଣ ତଥା ସହଯୋଗୀମାନଙ୍କ ନାଁ’ରେ ଅଭିଯୋଗ ମଧ୍ୟ ଆସିଥିଲା ତଥାପି ଜାତୀୟସ୍ତରର ଗଣମାଧ୍ୟମ ଦିଗ ଦିଶା ନଥାଇ ଚାଲିଥିବା ଅନୁସନ୍ଧାନ ପ୍ରକ୍ରିୟାକୁ କୌଣସି ନିର୍ଣ୍ଣାୟକ ଉତ୍ତର ଦେବାପାଇଁ ଦାବୀ କରୁନାହାନ୍ତି ।

ଏହି ଘୋଟାଲା ବା ଦୁର୍ନୀତି ଯୋଗୁଁ ଏହି ପ୍ରକ୍ରିୟାରେ ନିଯୁକ୍ତି ପାଇଥିବା ବା ନିଯୁକ୍ତିର ଆଶା ରଖିଥିବା ହଜାର ହଜାର ଡାକ୍ତରୀ ତଥା ଅନ୍ୟ ପେଶାଦାର ବୃତିରେ ନିଯୁକ୍ତ ଯୁବକଯୁବତୀମାନଙ୍କର ଚାକିରୀ ତଥା ଜୀବନକୁ ବିପନ୍ନ କରିଦିଆଯାଇଥିଲା । ଏହି ଘୋଟାଲା ଦ୍ୱାରା ଜନଗଣଙ୍କର ଡାକ୍ତରମାନଙ୍କ ଉପରେ ବିଶ୍ୱାସ ତୁଟି ଯାଇଥିଲା ।

ଏମିତିକି ନ୍ୟାୟପାଳିକା ବି ଅନେକ ମାମଲାରେ ନିଜ ଆଡ଼ୁ ଅନୁସନ୍ଧାନକୁ ତଦାରଖ କରିବା ଓ ନିର୍ଦ୍ଦିଷ୍ଟ ସମୟସୀମା ଭିତରେ ସାରିବା ପାଇଁ ଯେଭଳି ପଦକ୍ଷେପ ନେଇ ଆସିଥିଲା, ଏହି ଭ୍ୟାପମ୍ ମାମଲାରେ ସେଭଳି କଲାନାହିଁ ।

ନିକଟରେ ଭାରତର ମହାହିସାବନିରୀକ୍ଷକ ତଥା ସି.ଏ.ଜି.ଙ୍କ ଭାଜପା ନେତୃତ୍ୱାଧୀନ ମଧ୍ୟପ୍ରଦେଶ ରାଜ୍ୟ ସରକାର ‘ନିୟମଗୁଡ଼ିକୁ ସୁଚିନ୍ତିତ ଭାବେ ଧ୍ୱଂସ କରିଛନ୍ତି’ ରିପୋର୍ଟ ଦେବା ସତ୍ୱେ, ଗଣମାଧ୍ୟମ ଯେଉଁମାନେ ଟିକିଏ ସୁଯୋଗ ପାଇଲେ କଂଗ୍ରେସକୁ ‘ଦୁର୍ନୀତିଗ୍ରସ୍ତ’ ବୋଲି ଚିକ୍ରାର କରନ୍ତି, ଏହି କଥାଟିରେ ବୁଝିସୁଝି ନୀରବତା ଅବଲମ୍ବନ କରିଛନ୍ତି ।

ମାର୍ଚ୍ଚମାସରେ ମଧ୍ୟପ୍ରଦେଶ ବିଧାନସଭାରେ ଉପସ୍ଥାପିତ ହେଇଥିବା ସି.ଏ.ଜି. ରିପୋର୍ଟରେ କୁହାଯାଇଛି ଯେ, ବ୍ୟବସାୟିକ ପରୀକ୍ଷା ମଣ୍ଡଳ ବା ଭ୍ୟାପମ୍ ର ପରୀକ୍ଷା କରାଇବା ପ୍ରକ୍ରିୟାର ନିୟବଣର ଢାଂଚା କିଛି ନଥିଲା । ଏମିତିକି ଏହା ଫଳରେ ପ୍ରବେଶିକା ପରୀକ୍ଷା ବା ନିଯୁକ୍ତି ପରୀକ୍ଷାରେ ଭାଗ ନେଉଥିବା ପାର୍ଥୀମାନଙ୍କ ଭବିଷ୍ୟତ ବିପଦଆଡ଼କୁ ଠେଲି ହୋଇଯାଇଥିଲା ।

ସି.ଏ.ଜି ରିପୋର୍ଟ ଆହୁରି କହିଥିଲା ଯେ, ସରକାରୀ ଚାକିରୀରେ ପ୍ରବେଶ କରିବା ପାଇଁ କେତେଥର ପରୀକ୍ଷା ଦେଇପାରିବ, ସେ ସମ୍ପର୍କରେ କିଛି ତଥ୍ୟ ନଥିଲା । ନିଯୁକ୍ତି ପ୍ରକ୍ରିୟା କେତେ ‘ଅସ୍ପଷ୍ଟ’ ପରୀକ୍ଷା ନେଉଥିବା ବୋର୍ଡ଼ର ବିଶ୍ୱସନୀୟତାର କିଭଳି ବିପର୍ଯ୍ୟୟ ଆଡ଼କୁ ଯାଇଛି, ଏକଥା ବି କୁହାଯାଇଛି ।

କିନ୍ତୁ ବୋଧହୁଏ ସି.ଏ.ଜି.ର ସବୁଠାରୁ ଘାତକ ଅନୁଧ୍ୟାନ ହେଉଛି ଯେ, ସରକାର ଯେତେବେଳେ ଭ୍ୟାପମ୍ ଦୁର୍ନୀତି ରେକର୍ଡ଼ ଦେଖିବା ପାଇଁ ସି.ଏ.ଜି.ଙ୍କୁ ସୁଯୋଗ ଦେଲେନାହିଁ ଏହା କହିକି ଯେ, ସି.ଏ.ଜି. ଗୋଟିଏ ସରକାରୀ ସଂସ୍ଥା ନୁହେଁ ଯଦିଓ ସି.ଏ.ଜି. ସବୁ ଦୃଷ୍ଟିରୁ ସରକାରଙ୍କର ନିୟବଣରେ ଥିବା ଏକ ସଂସ୍ଥା ।

ରାଜ୍ୟ ସରକାର ଷ୍ଟାଫ୍ ସିଲେକସନ୍ କମିଶନକୁ ବାଦ୍ ଦେଇ ଭ୍ୟାପମ୍ ମାଧ୍ୟମରେ ସବୁ ସରକାରୀ ନିଯୁକ୍ତି କରାଇବା ଏବଂ ଏପରିକି ଏହାର ଅଧ୍ୟକ୍ଷ, ନିର୍ଦ୍ଦେଶକ ଓ ନିୟବକ ସରକାରୀ ଅଫିସରମାନଙ୍କ ଭିତରୁ ଠିକ୍ କରିବା କାମଟି କରିଥିଲେ ବୋଲି ସି.ଏ.ଜି. ରିପୋର୍ଟ କହୁଛି ।

୨୦୦୯ମସିହାରୁ ଭ୍ୟାପମ୍ ବୋର୍ଡ଼ର ଅନିୟମିତତା ଗୁଡ଼ିକ ପ୍ରତି ଧ୍ୟାନ ଆକର୍ଷଣ କରିବା କାମଟି ଏସବୁ କଥା ଜାଣିପାରୁଥିବା ଲୋକମାନେ କହିଆସିଛନ୍ତି ଯେଉଁମାନେ ଏହାର ଚେର କେତେ ଗଭୀର ଓ କେତେକ ବ୍ୟାପକ ଏବଂ ବିବିଧ ଉପାୟରେ ସେମାନେ କେମିତି ଠକି ଚାଲିଛନ୍ତି ସେ ସମ୍ପର୍କରେ ଦୃଷ୍ଟି ଆକର୍ଷଣ କରିଆସିଛନ୍ତି ।

ଏହି ବିବିଧ ଠକାମୀ ଭିତରେ ଅଛି ଜଣଙ୍କ ନାଁ’ରେ ଆଉ ଜଣେ ପରୀକ୍ଷା ଦେବା, ନିଜ ପସନ୍ଦର ପାର୍ଥୀମାନଙ୍କୁ ଉତ୍ତର କହିଦେବା ଏବଂ ଦୁର୍ବଳ ପ୍ରାର୍ଥୀମାନଙ୍କୁ ଭଲ ପର୍ଥୀମାନଙ୍କର ଉତ୍ତର ଖାତାରୁ ନକଲ କରିବା ପାଇଁ ସୁଯୋଗ ଦେବା ଇତ୍ୟାଦି ।

ପ୍ରଥମେ ପୋଲିସ, ତା’ପରେ ସ୍ୱତବ ଟାସ୍କଫୋର୍ସ ଏବଂ ଏବେ ସି.ବି.ଆଇ. ଦ୍ୱାରା ହେଉଥିବା ଅନୁସନ୍ଧାନରେ ଅନେକ ପ୍ରଶ୍ନ ଓ ଅନେକ ଅଭିଯୋଗ ଅଣାଯାଇଛି । ତେବେ ଏହି ରାକେଟ୍ ବା ଜାଲିଆତି ପଛରେ କାମ କରିଥିବା ଅସଲ ମଣିଷ ତଥା ଶକ୍ତିମାନଙ୍କୁ ଧରିବା ପାଇଁ କୌଣସି ନିର୍ଣ୍ଣାୟକ ପ୍ରମାଣ ଦିଆଯାଇ ପାରିନାହିଁ ।

ନିଜର ମନ୍ଥର ଏବଂ ଅସନା ଅନୁସନ୍ଧାନ ପ୍ରକ୍ରିୟା ପାଇଁ ସି.ବି.ଆଇ. (କେନ୍ଦ୍ରୀୟ ତଦନ୍ତ ବ୍ୟୁରୋ) ସମାଲୋଚନାର ଶରବ୍ୟ ଦେଇଛି । ଘୋଟାଲାକୁ ପଦାକୁ ଆଣିଥିବା ଲୋକେ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନଙ୍କୁ ମଧ୍ୟ ଅଭିଯୋଗର ପରିସର ଭିତରକୁ ଆଣିଛନ୍ତି (ଚୌହାନ ଏଭଳି ଅଭିଯୋଗ ଆଣିଥିବା ଜଣେ କଂଗ୍ରେସ ନେତା ଓ ତାଙ୍କ ସ୍ତ୍ରୀ’ଙ୍କ ବିରୁଦ୍ଧରେ ମଧ୍ୟ ମାନହାନୀ ମାମଲା ରୁଜୁ କରିଛନ୍ତି) ।

ଜଣେ ଜଣାଶୁଣା ବରିଷ୍ଠ ଭାଜପା ନେତୃତ୍ୱଙ୍କ ବିରୁଦ୍ଧରେ ମଧ୍ୟ ଅଭିଯୋଗ ଆସିଛି । ଅନୁମାନ ଯେମିତି କରାଯାଉଥିଲା ଠିକ୍ ସେମିତି, ଛାତ୍ରମାନଙ୍କୁ ଅଧିକାଂଶରେ ଗିରଫ କରାଗଲା, ଯେଉଁମାନେ ପରୀକ୍ଷା ଅନିୟମିତତାର କୌଣସି ପ୍ରକାରେ ଭାଗୀଦାର ଥାଇ ପରୀକ୍ଷା ଦେଇଥିଲେ ବୋଲି ଅଭିଯୋଗ ଥିଲା ବା ସେମାନଙ୍କର ବାପା-ମା, ଅଭିଭାବକ ଏବଂ ମଧ୍ୟସ୍ଥିମାନଙ୍କୁ ଗିରଫ କରାଗଲା ।

ବିଭିନ୍ନ ସରକାରୀ ଚାକିରୀ (ଅଧିକାଂଶରେ ଠିକା ନିଯୁକ୍ତି) ଏବଂ ଡାକ୍ତରୀ ଛାତ୍ରମାନଙ୍କ ପାଇଁ ଯୋଗ୍ୟତାକୁ ଭ୍ୟାପମ୍ ବୋର୍ଡ଼ ବାତିଲ କରିଦେଇଥିଲା । ଉପହାର ଭଳି ଦେଖାଯାଉଥିବା ସରକାରୀ ଚାକିରୀଟିଏ ପାଇବା ପାଇଁ ବ୍ୟାକୁଳ ଓ ଅସୁରକ୍ଷିତ ମଣୁଥିବା ପରୀକ୍ଷାର୍ଥୀମାନେ ଯେଉଁମାନେ ଏଭଳି ଏକ ର୍ୟାକେଟ୍ର ଶିକାର ହେଇଥିଲେ ସେମାନଙ୍କୁ ପୁଣିଥରେ ଦଣ୍ଡିତ କରାଗଲା ।

ଶିକ୍ଷାବିତମାନଙ୍କ ମତରେ ଭ୍ୟାପମ୍ କେବଳ ପରୀକ୍ଷା ସମ୍ବନ୍ଧିତ ଏକ ର୍ୟାକେଟ ନୁହେଁ ଏହା ବରଂ ଏକ ‘ନିଯୁକ୍ତ ଶିଳ୍ପ’ରେ ରୂପାନ୍ତରିତ ହୋଇସାରିଛି । ଘରୋଇ ଚରିତ୍ରମାନଙ୍କୁ ଗୋଟିଏ ବଡ଼ ଭୂମିକା ଦେବା ପାଇଁ ଶିକ୍ଷା ବ୍ୟବସ୍ଥାକୁ ଜାଣିଶୁଣି ନିରବଚ୍ଛିନ୍ନ ଭାବେ ଦୁର୍ବଳ କରାଇଦେବାର ଏହା ଏକ ପରିଣାମ ।

ଜଣେ ଯୁବ ଟେଲିଭିଜନ ସାମ୍ବାଦିକ ଏହି ଦୁର୍ନୀତିର ଅନୁସନ୍ଧାନ କଲାବେଳେ ମୃତ୍ୟୁବରଣ କରିବା ପରେ ଜାତୀୟ ଗଣମାଧ୍ୟମ ଏହି ଭ୍ୟାପମ୍ ଦୁର୍ନୀତି ପ୍ରତି ଧ୍ୟାନ ଦେବା ଆରମ୍ଭ କରିଥିଲା ।

ଗୋଟିଏ ଅନୁସନ୍ଧାନମୂଳକ ପତ୍ରିକାରେ ରାଜ୍ୟ ସରକାରଙ୍କଠାରୁ ସାମ୍ବାଦିକ ଓ ବିଚାରପତିମାନଙ୍କ ଗୃହ ନିର୍ମାଣ ସମବାୟ ହାତେଇଥିବା ଜମି ସମ୍ପର୍କରେ ବିସ୍ତୃତ ବିବରଣୀ ବାହାରିଥିଲା ଏବଂ କୁହାଯାଇଥିଲା ଯେ ସ୍ଥାନୀୟ ଗଣମାଧ୍ୟମ ଏହି ଦୁର୍ନୀତିକୁ ଖାମଖିଆଲି ଭାବେ ନେବାର ଏହା ଏକ କାରଣ ।

ଯଦିଓ ଏହି ଘୋଟାଲା ସହିତ ଦଣ୍ଡିତ ୪୫ଟି ମୃତ୍ୟୁ (ଯାହା ସରକାର ୨୫ବୋଲି କହୁଛନ୍ତି) କଥା ଗଣମାଧ୍ୟମ କହିଛନ୍ତି କିନ୍ତୁ ସେମାନେ ଅଧିକ ଅନୁସନ୍ଧାନ କରିନାହାନ୍ତି । ସି.ଏ.ଜି. ରିପୋର୍ଟ ସମ୍ପର୍କରେ ଆଲୋଚନା କରିବା ପରିବର୍ତେ, ମୁଖ୍ୟତଃ ଆଲୋଚନାଗୁଡ଼ିକ ଭାଜପା ଓ ବିରୋଧୀ କଂଗ୍ରେସ ମଧ୍ୟରେ ଆରୋପ ଓ ଆକ୍ଷେପ ଭିତରେ ସୀମିତ ହିଁ ରହୁଥିଲା ।

ଘଟଣାର ଆଠବର୍ଷ ପରେ ଆଜି ଯେତେବେଳେ ଘୋଟାଲାର ମୁଖ୍ୟ ଉନ୍ମୋଚକ ବା ହ୍ୱିସିଲ ବ୍ଲୋଓର୍ , ସାକ୍ଷୀ ଓ ଅଭିଯୁକ୍ତମାନେ ମୃତ୍ୟୁର ଆତଙ୍କ ଭିତରେ ଯେଉଁମାନେ କି ଛୋଟ ଛୋଟ ମାଛି ଭଳି ଏବଂ ଯେତେବେଳେ କି ହଜାର ହଜାର ଯୁବକ ଏକ ଅସୁରକ୍ଷିତ ଭବିଷ୍ୟତର ସାମ୍ନା କରୁଛନ୍ତି, ଏହି ଘୋଟାଲାର ଅନୁସନ୍ଧାନ ପ୍ରକ୍ରିୟାଟି ନିୟବଣ ହରାଇ ବସିଛି ।

ଅପରାଧୀମାନଙ୍କୁ ଧରିବା ପାଇଁ ନାଗରିକ ସମାଜ ତରଫରୁ ମଧ୍ୟ କୌଣସି ଖାସ ଉଦ୍ୟମ ହେଉନାହିଁ । ଭ୍ୟାପମ୍ ଦୁର୍ନୀତି ଦାୟିତ୍ୱବୋଧତାବିହୀନ ଓ ଦଣ୍ଡମୁକ୍ତ ଅବସ୍ଥାକୁ ନେଇଥିବା ସଂଶୟକୁ ପଦାରେ ପକାଇ ଦେଇଛି ଯାହାକି ଆଜିର ଦିନରେ ଭାରତୀୟ ରାଜନୀତିକୁ ଚଳାଇ ରଖିଛି ।

 

April 8, 2017 VOL L II NO 14 ( Subversive Silence )

କେଦାର ମିଶ୍ର

ଜୁନ୍‍ ମାସ ତୃତୀୟ ସପ୍ତାହରେ ମାନ୍ୟବର ଓଡ଼ିଶା ଉଚ୍ଚ ନ୍ୟାୟାଳୟ ଓଡ଼ିଶା ସରକାରଙ୍କୁ ଏକ ବଡ଼ ଝଟ୍‍କା ଦେଇଛନ୍ତି । ବ୍ରହ୍ମ ପରିବର୍ତ୍ତନ ବିଭ୍ରାଟକୁ ନେଇ ମାତି ପଡ଼ିଥିବା ଓଡ଼ିଶାର ଗଣମାଧ୍ୟମରେ ଏହି ଝଟ୍‍କାର ତୀବ୍ରତା ବିଶେଷ ଅନୁଭୂତ ହୋଇନାହିଁ ।

କୁହାଯାଇପାରେ ଯେ ଏହି ଝଟ୍‍କାର ତୀବ୍ରତାକୁ ଅଣଦେଖା କରିବା ପାଇଁ ଏକ ପ୍ରକାର ସୁଚିନ୍ତିତ ଉଦ୍ୟମ ହୋଇଛି । କିଛି ମାସ ତଳେ ଓଡ଼ିଶା ପୋଲିସ୍‍ର ପୂର୍ବତନ ମହାନିର୍ଦେଶକ ପ୍ରକାଶ ମିଶ୍ରଙ୍କୁ ଅତ୍ୟନ୍ତ ଅପମାନଜନକ ଭାବେ ତାଙ୍କ ପଦବୀରୁ ବିଦା କରାଗଲା ।

ତାଙ୍କୁ ପଦବୀରୁ କେବଳ ବିଦା କରାଗଲା ନାହିଁ, ସେ ଯେମିତି କେନ୍ଦ୍ର ସରକାରରେ କୌଣସି ଗୁରୁତ୍ୱପୂର୍ଣ୍ଣ ପଦବୀ ପାଇବା ପାଇଁ ଯୋଗ୍ୟ ବିବେଚିତ ନ ହେବେ, ସେଥିପାଇଁ ଷଡଯନ୍ତ୍ର କରାଗଲା ।

ପ୍ରକାଶ ମିଶ୍ର ରାଜ୍ୟ ପୋଲିସ୍‍ ଗୃହ ନିର୍ମାଣ ନିଗମର ନିର୍ଦ୍ଦେଶକ ଥିବାବେଳେ ଠିକାଦାରମାନଙ୍କୁ ଦେଇଥିବା ଅଗ୍ରୀମ ଅର୍ଥକୁ ଦୁର୍ନୀତି ବୋଲି କହି ତାଙ୍କ ବିରୋଧରେ ଭିଜିଲାନ୍ସ ମାମଲା ଦାଏର୍‍ କଲା ।

ଭିଜିଲାନ୍ସର ଏହି ମାମଲାକୁ ମାନ୍ୟବର ହାଇକୋର୍ଟ ବେଆଇନ୍‍ ବୋଲି କହିବା ସହିତ ଓଡ଼ିଶା ଭିଜିଲାନ୍ସ ନିଜ ରାଜନୈତିକ ମାଲିକମାନଙ୍କୁ ସନ୍ତୁଷ୍ଟ କରିବାକୁ ଯାଇ ଜଣେ ବରିଷ୍ଠ ଓ ସଚ୍ଚୋଟ ପୋଲିସ ଅଧିକାରୀଙ୍କୁ ଉଦ୍ଦେଶ୍ୟ ମୂଳକ ଭାବରେ ହଇରାଣ କରିଛନ୍ତି ବୋଲି ମାନ୍ୟବର ଉଚ୍ଚ ନ୍ୟାୟାଳୟ କହିଛନ୍ତି ।

ଓଡ଼ିଶା ହାଇକୋର୍ଟର ମାନ୍ୟବର ବିଚାରପତି ଜଷ୍ଟିସ୍‍ ଏସ୍‍.ସି. ପରିଜା ତାଙ୍କର ୫୧ ପୃଷ୍ଠା ବ୍ୟାପୀ ରାୟରେ ମୁଖ୍ୟମନ୍ତ୍ରୀଙ୍କ ଅଧୀନରେ ଥିବା ଭିଜିଲାନ୍ସ ବିଭାଗ ଓ ଏହାର ନିର୍ଦ୍ଦେଶକଙ୍କୁ ଅତ୍ୟନ୍ତ କଡ଼ା ଭାଷାରେ ସମାଲୋଚନା କରିଛନ୍ତି ।

ଘଟଣାକ୍ରମର ପୁଙ୍ଖାନୁପୁଙ୍ଖ ତର୍ଜମା କରି ମାନ୍ୟବର ବିଚାରପତି ଏହି ସିଦ୍ଧାନ୍ତରେ ଉପନୀତ ହୋଇଛନ୍ତି ଯେ – ରାଜ୍ୟସରକାର ଜଣେ ସଚ୍ଚୋଟ ଏବଂ ଦକ୍ଷ ଅଧିକାରୀଙ୍କୁ ଉଦ୍ଦେଶ୍ୟମୂଳକ ଭାବରେ ହଇରାଣ କରିଛନ୍ତି । ଭିଜିଲାନ୍ସ ନିର୍ଦ୍ଦେଶକ ରାଜ ଅନୁଗ୍ରହ ଓ ରାଜ ଆନୁଗତ୍ୟ ପ୍ରଦର୍ଶନ କରିବାକୁ ଯାଇ ନିଜ ଦାୟିତ୍ୱ ସଠିକ୍‍ ଭାବରେ ତୁଲାଇ ନାହାନ୍ତି ବୋଲି ମଧ୍ୟ ଅଦାଲତ କହିଛନ୍ତି ।

ଅନ୍ୟ କୌଣସି ସମୟ ହୋଇଥିଲେ ଏହି ରାୟକୁ ନେଇ ଏକ ବଡ଼ ରାଜନୈତିକ ତୋଫାନ ଉଠିଥା’ନ୍ତା । ଦୁର୍ଭାଗ୍ୟକ୍ରମେ କୌଣସି ରାଜନୈତିକ ଦଳ ଏହି ତୋଫାନରୁ ରାଜନୈତିକ ଫାଇଦା ନେବାକୁ ଚାହିଁନାହାନ୍ତି ।

ମାନ୍ୟବର ଉଚ୍ଚ ନ୍ୟାୟାଳୟ ସ୍ପଷ୍ଟ ଭାବରେ ଏହି ଘଟଣାରେ ରାଜ୍ୟସରକାରଙ୍କ ଉପରେ ଦୋଷ ଲଦିଛନ୍ତି । ରାୟ ପ୍ରକାଶ ପାଇଲା ପରେ ପ୍ରକାଶ ମିଶ୍ରଙ୍କ ପ୍ରତିକ୍ରିୟା ଆହୁରି ଭୀଷଣ ଅବସ୍ଥା ସୃଷ୍ଟି କରିବା କଥା । ଅଥଚ ଆମର ରାଜନୈତିକ ଦଳଗୁଡ଼ିକ ଏକପ୍ରକାର ‘ଅକର୍ମଣ୍ୟ ଓ ନିସ୍ତରଙ୍ଗ’ ।

ପୂର୍ବତନ ପୋଲିସ୍‍ ମହାନିର୍ଦ୍ଦେଶକ ଭାବରେ ପ୍ରକାଶ ମିଶ୍ର ସିଧାସଳଖ ରାଜ୍ୟସରକାରଙ୍କ ଉପରେ ଦୋଷାରୋପ କରିଛନ୍ତି । ଗତ ନିର୍ବାଚନରେ ଆମ୍ବୁଲାନ୍ସରେ ଟଙ୍କା ବଣ୍ଟା ଯାଉଥିଲା ଓ ଏହାର ବିରୋଧ କରିବାକୁ ଯାଇ ତାଙ୍କୁ ବହୁ ମୂଲ୍ୟ ଦେବାକୁ ପଡ଼ିଛି ବୋଲି ପ୍ରକାଶ ମିଶ୍ର କହିଛନ୍ତି ।

ନିଜ ପିଟିସନ୍ ରେ ଶ୍ରୀ ମିଶ୍ର ନିଜର ସ୍ପଷ୍ଟବାଦିତା ଓ ଆଇନ୍‍କୁ କଡ଼ାକଡ଼ି କାର୍ଯ୍ୟ କରିବାର ଆଭିମୁଖ୍ୟ ଯୋଗୁଁ ଶାସକ ଦଳର କ୍ରୋଧର ଶିକାର ହୋଇଛନ୍ତି ବୋଲି ଉଲ୍ଲେଖ କରିଛନ୍ତି । ଯାହାକୁ କି ମାନ୍ୟବର ହାଇକୋର୍ଟ ଗ୍ରହଣ କରିଛନ୍ତି ।

ଓଡ଼ିଶା ସରକାରଙ୍କ ଅଧୀନରେ ପୋଲିସ ମହାନିର୍ଦ୍ଦେଶକ ଭଳି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ପଦବୀରେ ଥିବା ଜଣେ ପୋଲିସ୍‍ ଅଧିକାରୀଙ୍କ ଏହି ବକ୍ତବ୍ୟକୁ ହାଲୁକା ଭାବରେ ନେଇ ହେବ ନାହିଁ । ବିଜେଡ଼ି ସରକାର ଏହାର ଜବାବ ରଖିବାକୁ ବାଧ୍ୟ । ବିଜେଡ଼ି ମୁଖପାତ୍ରମାନେ ଏ ଘଟଣା ଘଟିଲାବେଳେ ପୋଲିସ୍‍ ଡିଜି କ’ଣ କରୁଥିଲେ ବୋଲି ପ୍ରଶ୍ନ ପଚାରୁଛନ୍ତି ।

ସେମାନେ ବୁଝିବା ଉଚିତ୍‍ ଯେ ପୋଲିସ୍‍ ଡିଜି ସେହି ପ୍ରଶ୍ନ ପଚାରିଲେ ବୋଲି ତାଙ୍କୁ ସିବିଆଇ ନିର୍ଦ୍ଦେଶକ କରାଇ ଦିଆଗଲା ନାହିଁ । ପ୍ରଥମଥର ପାଇଁ ଚାକିରିରୁ ଅତୀତରେ ନିଲମ୍ବିତ ହୋଇଥିବା ଜଣେ ପୋଲିସ ଅଧିକାରୀଙ୍କୁ ଓଡ଼ିଶା ସରକାର ପୋଲିସ ମହା ନିର୍ଦ୍ଦେଶକ ପଦବୀରେ ବସାଇଲେ ।

ଅଥଚ ପ୍ରକାଶ ମିଶ୍ରଙ୍କୁ ବହୁ ପ୍ରକାର ହଟହଟା କରିବା ପାଇଁ ବିଭିନ୍ନ ପ୍ରକାର ଷଡଯନ୍ତ୍ର କରାଗଲା । ପ୍ରଥମେ ତାଙ୍କୁ କେନ୍ଦ୍ରୀୟ ଡେପୁଟେସନ୍‍ରେ ଯିବା ପାଇଁ ଅନୁମତି ଦିଆଯାଇଥିଲେ ମଧ୍ୟ ଏହି ଅନୁମତିକୁ ଶେଷମୁହୂର୍ତ୍ତରେ ପ୍ରତ୍ୟାହାର କରାଗଲା ।

ଦ୍ୱିତୀୟରେ ଅତ୍ୟନ୍ତ ଅପମାନଜନକ ଭାବରେ ତାଙ୍କୁ ଡିଜି ପଦବୀରୁ ହଟାଯାଇ ଓଡ଼ିଶା ପରିବହନ ନିଗମର ଅଧ୍ୟକ୍ଷ ଭାବରେ ଅବସ୍ଥାପିତ କରାଗଲା । ପୁନଶ୍ଚ ଯେତେବେଳେ ତାଙ୍କ ନାଁ ସିବିଆଇ ନିର୍ଦ୍ଦେଶକ ପଦବୀ ପାଇଁ ଉଠିଲା, ସେତେବେଳେ ତାଙ୍କ ବିରୋଧରେ ଭିଜିଲାନ୍ସ ଏକ ମାମଲା ଦାଏର କଲା ।

ଏହି ମାମଲାର କୌଣସି ଭିତ୍ତି ନଥିଲା ବୋଲି ଅଦାଲତ କହିଛନ୍ତି । ଓଡ଼ିଶା କ୍ୟାଡର୍‍ର ପ୍ରଥମ ଆଇପିଏସ୍‍ ଅଫିସର ଭାବରେ ପ୍ରକାଶ ମିଶ୍ର ସିବିଆଇ ନିର୍ଦ୍ଦେଶକ ହେବାରୁ ବଞ୍ଚିତ ହେଲେ । ଅବଶ୍ୟ ପରବର୍ତ୍ତୀ ସମୟରେ ସିଆରପିଏଫ୍‍ର ଡିଜି ଭାବରେ ତାଙ୍କୁ କେନ୍ଦ୍ର ସରକାର ଅବସ୍ଥାପିତ କଲେ । ବର୍ତ୍ତମାନ କେନ୍ଦ୍ର ସରକାରଙ୍କ ଗୃହମନ୍ତ୍ରଣାଳୟରେ ପ୍ରକାଶ ମିଶ୍ର ଅତ୍ୟନ୍ତ ପ୍ରଭାବଶାଳୀ ଓ କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂଙ୍କର ସେ ଅତ୍ୟନ୍ତ ବିଶ୍ୱସ୍ତ ଅଧିକାରୀ ବୋଲି କୁହାଯାଉଛି ।

ଏହି ଘଟଣାକ୍ରମରେ ପ୍ରକାଶ ମିଶ୍ର କ’ଣ ପାଇଲେ ବା ହରାଇଲେ ତାହା ଯେତିକି ବଡ଼କଥା ନୁହେଁ, ତା’ଠୁ ବଡ଼ କଥା ହେଉଛି ରାଜ୍ୟସରକାରଙ୍କ ଚକ୍ରାନ୍ତକାରୀ ମନୋଭାବ । ପୋଲିସ୍‍ ଅଧିକାରୀମାନଙ୍କୁ ରାଜନୈତିକ ସ୍ୱାର୍ଥ ଲାଗି ବ୍ୟବହାର କରିବାର ହୀନ ଉଦ୍ୟମ ରାଜ୍ୟସରକାର କରିଛନ୍ତି ଓ ଏହି ଉଦ୍ୟମରେ ଯେଉଁମାନେ ସାମିଲ୍‍ ହେଉନାହାନ୍ତି ସେମାନଙ୍କୁ ସରକାର ହଲାପଟା କରୁଛନ୍ତି ବୋଲି ପ୍ରମାଣ ମିଳିଛି ।

ମାନ୍ୟବର ଉଚ୍ଚ ନ୍ୟାୟାଳୟ ନିଜ ରାୟରେ ରାଜ୍ୟ ଭିଜିଲାନ୍ସ ବିଭାଗକୁ ତୀବ୍ର ଭର୍ତ୍ସନା କରିଛନ୍ତି । ମାନ୍ୟବର ଅଦାଲତ ଯେଉଁ ଚକ୍ରାନ୍ତକାରୀ ରାଜନୈତିକ ନେତୃତ୍ୱର କଥା କହିଛନ୍ତି ତାହା ପରୋକ୍ଷରେ ମୁଖ୍ୟମନ୍ତ୍ରୀଙ୍କ ଆଡ଼କୁ ଆଙ୍ଗୁଳି ନିର୍ଦ୍ଦେଶ କରୁଛି ।

ଅଥଚ ଏହି ସମଗ୍ର ଘଟଣାକ୍ରମରୁ ଶାସକ ଦଳ ନିଜକୁ ବଞ୍ଚାଇବାକୁ ଚେଷ୍ଟା କରୁଛି । ସବୁଠୁ ମଜାର କଥା ହେଉଛି ବିଜେଡ଼ି ପ୍ରବକ୍ତାମାନଙ୍କର ମତାମତ । ବିଜେଡ଼ିର ଅନ୍ୟତମ ପ୍ରବକ୍ତା ତଥା ନିମାପଡ଼ା ବିଧାୟକ ସମୀର୍‍ ଦାସ୍‍ ଏକ ଟେଲିଭିଜନ ଚ୍ୟାନେଲ୍‍ରେ ଆଲୋଚନା ବେଳେ କହିଲେ ମାନ୍ୟବର ଅଦାଲତ ପ୍ରକାଶ ମିଶ୍ରଙ୍କ ମାମଲାର ଠିକ୍‍ ବିଚାର କରିନାହାନ୍ତି ।

ଏହାଠୁ ବଳି ଦୁର୍ଭାଗ୍ୟଜନକ ଓ ଲଜ୍ଜାଜନକ ପ୍ରତିକ୍ରିୟା ଆଉ କ’ଣ ଥାଇପାରେ ? ପାଖାପାଖି ଛଅମାସରୁ ଅଧିକ ଧରି ଏହି ମାମଲାର ବିଚାର ଚାଲିଥିଲା । ଓଡ଼ିଶା ସରକାର ନିଜ ପକ୍ଷ ରଖିଥିଲେ । ନିଜ ଅପାରଗତା ଯୋଗୁଁ ମାମଲା ଚାଲିଥିବାବେଳେ ଭିଜିଲାନ୍ସ ବିଭାଗ ବାରମ୍ବାର ବିଚାରପତିଙ୍କୁ ଦ୍ୱାରା ଭର୍ତ୍ସିତ ମଧ୍ୟ ହୋଇଥିଲେ ।

ପରିଶେଷରେ ଯେତେବେଳେ ରାୟ ପ୍ରକାଶ ପାଉଛି ତାକୁ ନେଇ ଆତ୍ମସମୀକ୍ଷା କରିବା ପରିବର୍ତ୍ତେ ବିଜେଡ଼ି ଅଦାଲତଙ୍କ ରାୟ ଉପରେ ପ୍ରଶ୍ନ ଚିହ୍ନ ଲଗାଉଛି । ସେହିପରି ପ୍ରକାଶ ମିଶ୍ରଙ୍କ ତଥାକଥିତ ଭ୍ରଷ୍ଟାଚାରକୁ ନେଇ ବାରମ୍ବାର ପ୍ରଶ୍ନ ଉଠାଉଥିବା ବିଜେଡ଼ି ଏକଥା ଭୁଲିଯାଉଛି ଯେ ପ୍ରକାଶ ମିଶ୍ରଙ୍କୁ କେନ୍ଦ୍ରରୁ ଡାକି ଆଣି ତାଙ୍କରି ସରକାର ହିଁ ପୋଲିସ୍‍ ମହାନିର୍ଦ୍ଦେଶକ ପଦବୀରେ ବସାଇଥିଲା ।

ଯଦି ପ୍ରକାଶ ମିଶ୍ରଙ୍କ ନାଁରେ ଭ୍ରଷ୍ଟାଚାରର ଅଭିଯୋଗ ଥିଲା, ତାଙ୍କୁ ପୋଲିସ୍‍ ମହା ନିର୍ଦ୍ଦେଶକ କରାଗଲା କାହିଁକି ? ପାଖାପାଖି ଦୁଇବର୍ଷ ମହା ନିର୍ଦ୍ଦେଶକ ପଦବୀରେ ରହିବା ପରେ ହଠାତ୍‍ ପ୍ରକାଶ ବାବୁ ଖଳନାୟକ ପାଲଟିଗଲେ କେମିତି ?

ଏଠି ଆଉ ଏକ କଥା କହିବା ପ୍ରାସଙ୍ଗିକ ହେବ । ନବୀନ ପଟ୍ଟନାୟକ ସରକାରରେ ପୋଲିସ ମହାନିର୍ଦ୍ଦେଶକ ପଦବୀ ହେଉଛି ସବୁଠୁ ଅପ୍ରୀତିକର ପଦବୀ । ଗତ କିଛିବର୍ଷ ଧରି ଯେଉଁମାନେ ପୋଲିସ ମହା ନିର୍ଦ୍ଦେଶକ ହେଇଛନ୍ତି ସେମାନେ ପୂରା ସମୟ ନିଜ ପଦବୀରେ ରହିପାରିନାହାନ୍ତି ।

ପ୍ରାୟ ପୋଲିସ ମହାନିର୍ଦ୍ଦେଶକଙ୍କୁ ଅତ୍ୟନ୍ତ ଅପମାନଜନକ ଭାବରେ ପଦବୀରୁ ବିଦା କରାଯାଇଛି । ଏହା ସହିତ ଆଉ ଏକ କଥା ମଧ୍ୟ ସ୍ପଷ୍ଟ ହୋଇ ଉଠୁଛି । ନବୀନ ପଟ୍ଟନାୟକ ସରକାରରେ ସଚ୍ଚୋଟ, ଦକ୍ଷ ଓ ପାରଙ୍ଗମ ଅଧିକାରୀମାନଙ୍କର କାମ କରିବାର ସୁଯୋଗ ନାହିଁ ବୋଲି ଧାରଣା ସ୍ପଷ୍ଟ ହୋଇଯାଇଛି ।

ଆଇଏଏସ୍‍ ଓ ଆଇପିଏସ ଅଫିସର ସ୍ତରରେ ବହୁ ନାମକରା ଅଧିକାରୀ ବ୍ୟତିବ୍ୟସ୍ତ ହୋଇ କେନ୍ଦ୍ରୀୟ ଡେପୁଟେସନ୍‍ରେ ଚାଲିଯିବାକୁ ବ୍ୟାକୁଳ । ଯେଉଁମାନେ ଥରେ କେନ୍ଦ୍ରୀୟ ଡେପୁଟେସନ୍‍କୁ ଯାଉଛନ୍ତି, ସେଠୁ ଆଉ ଓଡ଼ିଶା ଫେରିବାକୁ ଚାହୁଁ ନାହାନ୍ତି ।

ପ୍ରକାଶ ମିଶ୍ରଙ୍କ ସମେତ ପୂର୍ବତନ ମୁଖ୍ୟ ଶାସନ ସଚିବ ଯୁଗଳ ମହାପାତ୍ରଙ୍କ କଥାକୁ ଉଦାହରଣ ଭାବରେ ନିଆଯାଇପାରେ । ମାନ୍ୟବର ଉଚ୍ଚ ନ୍ୟାୟାଳୟଙ୍କ ରାୟ ପରେ ମଧ୍ୟ ଏହି ସ୍ଥିତି ବଦଳିଲା ପରି ମନେ ହେଉନାହିଁ । ସବୁଠୁ ବିଡ଼ମ୍ବନାର ବିଷୟ ହେଉଛି ଏହି ପ୍ରକ୍ରିୟାରେ ବିରୋଧୀଦଳଗୁଡ଼ିକ ସରକାରକୁ ଘେରିବାର ଆଉ ଏକ ସୁଯୋଗ ହରାଇଛନ୍ତି ।

ଫୋନ୍‍ : ୯୪୩୭୧୫୪୪୪୫